U Myntri Rangbahduh ka ri Narendra Modi u la plie paidbah ia ka Rising North East Investors Summit 2025 ha Bharat Mandapam, New Delhi mynta ka sngi. Da kaba pdiang sngewbha ia baroh ki riew pawkhmat sha kane ka jingialang, u Myntri Rangbah duh u la pynpaw ka jingsngew sarong, jingsngewkmen, bad jingshaniah kaba khraw ia ka lawei jong ka thain shatei lammihngi. U la pynkynmaw ia ka Ashtalakshmi Mahotsav ba dang shen kaba la long ha Bharat Mandapam bad ban jur ba kane ka jingialang mynta ka sngi ka dei ka jingrakhe ia ka jingbei tyngka ha ka thain shatei lammihngi. U Myntri Rangbahduh u la pynpaw ïa ka jingdon jong ki nongïalam jong ki karkhana ha kane ka jingïalang, da kaba pynpaw ïa ka jingsngewtynnad kaba don sawdong ki lad ki lynti ha ka thaiñ. U la ai khublei ia baroh ki tnad bad ki sorkar jylla, da kaba ithuh ia ka jingpyrshang jong ki ha kaba wanrah ia ka jinglong jingman kaba sngewtynnad ha kaba iadei bad ka jingbei tyngka. Haba ai ka jingkitbok kitrwiang jong u, u Myntri Rangbahduh u la ïaroh ïa ka Northeast Rising Summit, da kaba pynskhem biang ïa ka jingkut jingmut jong u na ka bynta ka jingkiew shaphrang bad ka jingseisoh jong ka thaiñ.

Haba pynpaw ïa ka kyrdan jong ka India kum ka ri kaba pher tam ha ka pyrthei, u Modi u la ong, “ka thaiñ shatei lammihngi ka dei ka thaiñ kaba iar tam jong ka ri jong ngi kaba iar bha”. U la ban jur ia ki lad ki lynti ba iar ba kynthup ia ka khaii pateng, ka dustur, ki kam ba iadei bad ki jain, bad kam jngohkai pyrthei, da kaba ong ba ka jingpher jong ka thain ka dei ka bor kaba khraw tam jong ka. U la ong ba ka thaiñ shatei lammihngi ka iaryngkat bad ka ïoh ka kot kaba kiew bha bad ka kam kaba iadei bad ki siej, ka jingpynmih slasha bad ka umphniang, ki kam ïalehkai bad ka jingtbit, bad kumjuh ruh ka jaka pdeng kaba dang mih na ka bynta ka kam jngohkai pyrthei. U la ong shuh shuh ba kane ka thain ka plie lad ia ki mar rep organic bad ka long ka bor kaba khlain ha ka jingpynmih bording. U la pynskhem ba ka thain shatei lammihngi ka pyni ia ka jingngeit jong ka Ashtalakshmi, kaba wanrah ia ka jingseisoh bad ki lad ki lynti. Lyngba kane ka bor, u la ong, man la ka jylla jong ka thain shatei lammihngi ka pynbna ia ka jinglong ba la pynkhreh jong ka na ka bynta ka jingbei tyngka bad ban long nongialam.

Haba ban jur ia ka bynta ba kongsan jong ka thain mihngi jong ka ri ban kot sha ka Viksit Bharat, u Myntri Rangbahduh u la ban kur ia ka thain mihngi kum ka bynta ba kongsan tam jong ka. “Na ka bynta jong ngi, ka EAST kam dei tang ka lynti hynrei ka jingthmu—Pynkupbor, Pyntreikam, Pynkhlain, bad Pynkylla—kaba batai ia ka polisi treikam na ka bynta ka thain”, u la ong, da kaba pynpaw ba kane ka rukom treikam ka la buh ia ka thain mihngi jong ka ri India, khamtam ia ka thain shatei lammihngi, ha ka bynta kaba pdeng jong ka jingkiew shaphrang jong ka ri India.

U Myntri Rangbahduh u la pynpaw ia ki jingkylla kiba pynkylla dur kiba la sakhi ha ka thain shatei lammihngi ha kine ki 11 snem ba la dep, da kaba ban jur ba ka jingkiew shaphrang kam paw tang ha ki jingkhein jingdiah hynrei ka long kaba lah ban iohi shai. U la ong ba ka jingïadei jong ka sorkar bad ka thaiñ kam sahkut ha tang ki polisi, kaba kyntiew ïa ka jingïadei kaba jan bad ki briew jong ka. U Myntri Rangbahduh u la pynpaw ïa ki jingleit jngoh ba palat 700 tylli da ki Myntri sorkar pdeng ia ka thaiñ shatei lammihngi, kaba pyni ïa ka jingkut jingmut jong ki ban sngewthuh ïa ka jaka, ban sakhi ïa ki jingangnud ha ki khmat jong ki briew, bad ban pynkylla ïa kata ka jingshaniah sha ki polisi na ka bynta ka roi ka par. U la ban jur ba ki projek ba iadei bad ki jingdon jingem kim dei tang kiba shu sah kumto hynrei ki shakri kum ki lad ban pynïasoh ïa ka jingsngew jan. U la pynskhem biang ia ka jingpynkylla na ka Look East sha ka Act East, da kaba ong ba kane ka rukom treikam ka wanrah ia ka jingseisoh. “Katba ïa ka thaiñ Shatei Lammihngi la ju kheiñ tang kum ka thaiñ khappud, mynta ka mih kum kaba hakhmat eh ha ka khana jong ka jingkiew shaphrang jong ka India”, u la bynrap.

Da kaba pynpaw ba ki jingdon jingem kiba khlain ki don ka bynta kaba kongsan ha kaba pynlong ia ka kam jngohkai pyrthei kaba khring bad ban pynrung ia ka jingshaniah hapdeng ki nongbei tyngka, u Modi u la pynpaw ba ki surok kiba bha, ki jingdon jingem ba iadei bad ka bording, bad ki kam logistics ki long u budlum jong kano kano ka karkhana, kaba pynsuk ia ka khaii pateng kaba khlem jingeh bad ka jingkiew ka ioh ka kot. U la ong ba ki jingdon jingem kilong ki nongrim jong ka roi ka par bad ba ka sorkar ka la sdang ia ka Infrastructure Revolution ha ka thain shatei lammihngi. U la kubur ïa ki jingeh jong ka thaiñ ha ki por ba la leit hynrei u la pynskhem ba mynta ka la long kum ka Jaka jong ki Lad ki lynti. U la ong ba da ki hajar klur la pynlut ban kyntiew ïa ki lad jingpyniasoh, da kaba kdew ïa ki projek kum ka Sela Tunnel ha Arunachal Pradesh bad ka jingkieng Bhupen Hazarika ha Assam. U Modi u la ban jur ruh ïa ki jingkiew shaphrang ba kongsan ha ki shiphew snem ba la leit, kynthup ïa ka jingshna ïa ki surok bah ba 11,000 kilomitar, ki lynti rel ba thymmai, ka jingpynbun ar shah ïa ki kad liengsuiñ, ka jingkyntiew ia ki lad ka leit ka wan lyngba ki jaka shong um ha ki wah Brahmaputra bad Barak, bad ka jingbuh da ki spah tylli ki mobile tower. U la kdew shuh shuh ia ka jingbuh ia ka Northeast Gas Grid kaba jrong 1,600 kilomitar, kaba pynthikna ia ka jingpynbiang bording na ka bynta ki karkhana. U Modi u la ban jur ba ki surok bah, ki lynti rel, ki lad ka leit ka wan lyngba ki jaka shong um, bad ka jingpyniasoh digital baroh ki pynkhlain ia ki jingdon jingem jong ka thain shatei lammihngi, kaba pynlong ia ka jaka kaba seisoh na ka bynta ki karkhana ban shim ia ka jingmyntoi jong u nongpyniaid ba nyngkong.

U la pynthikna ba ha ki shiphew snem ban wan, ka lad khaii pateng jong ka thaiñ kan nang kiew bha. U la kdew shuh shuh ba ka kam khaii jong ka India bad ka ASEAN mynta ka long kumba $125 billion bad la khmih lynti ba kan palat ia ka $200 billion ha ki snem ban wan, kaba buh ia ka thain shatei lam mihngi kum ka jaka khaii pateng kaba kongsan bad ka khyrdop sha ki iew ASEAN. U la pynpaw biang ïa ka jingkut jingmut jong ka sorkar ban pynsted ïa ki projek ba iadei bad ki jingdon jingem ban kyntiew ïa ka jingpyniasoh ha ki thaiñ. Haba ban jur ïa ka jingdonkam jong ka surok bah India-Myanmar-Thailand Trilateral Highway, kaba plie lad ban rung beit na Myanmar sha Thailand, kaba pynkhlaiñ ïa ka lad ka jingpyniasoh jong ka India bad ka Thailand, Vietnam, bad Laos, u Modi u la ban jur ïa ki sienjam jong ka sorkar ban pynkloi ïa ka Kaladan Multimodal Transit Project, ka ban pynïasoh ïa ka kad lieng jong ka Kolkata bad ka kad Sittwe jong ka Myanmar, kaba plie lad ia ka lynti khaii pateng kaba kongsan lyngba ka Mizoram. U la ong ba kane ka projek kan pynduna shibun ïa ka jingjngai ka leit ka wan hapdeng ka West Bengal bad Mizoram, kan kyntiew ïa ka khaii pateng bad ka jingroi jong ki karkhana.

Haba kren shaphang ki kam pynroi ba dang ïaid shakhmat jong ka Guwahati, Imphal, bad Agartala kum ki Multi-Modal Logistics Hub, u Myntri Rangbahduh u la ong ba ka jingseng ïa ki Land Custom Station ha Meghalaya bad Mizoram ka nang pynïar shuh shuh ïa ki lad khaii pateng ha ka pyrthei. U la ban jur ba kine ki jingkiew shaphrang ki buh ia ka thain shatei lammihngi kum ka bor kaba dang kiew ha ka khaii pateng bad ki ri Indo-Pacific, kaba plie lad ba thymmai na ka bynta ka jingbei tyngka bad ka jingkiew ha ka ioh ka kot.

Haba ban jur ïa ka jingthmu jong ka India ban long ka Global Health and Wellness Solution Provider, u Myntri Rangbahduh u la ong ba ïa ka sienjam Heal in India la pynwandur kum ka jingiakhih ha ka pyrthei baroh kawei. U la pynpaw ïa ka jingriewspah ki jingdon jingem, ka mariang bad ka rukom im kaba khuid jong ka thain shatei lammihngi, da kaba batai ïa ka kum ka jaka kaba biang bha na ka bynta ka jingkoit jingkhiah. U Myntri Rangbahduh u la kyntu ïa ki nongbei tyngka ban wad bniah ïa ka thaiñ shatei lammihngi kum ka bynta kaba kongsan jong ka thong Heal in India, da kaba pynskhem biang ba ka jinglong ka suiñbneng bad ka jingpher jong ka mariang jong ka thaiñ ka plie lad kaba khraw ia ki karkhana kiba pynïaid kiba don bynta ha ka kam ba iadei bad ka koit ka khiah.

U Modi u la kren shaphang ka kolshor kaba riewspah jong ka thain shatei lammihngi, da kaba ban jur ia ka jingiadei kaba jylliew jong ka bad ka put ka tem, ka shad, bad ki jingrakhe. U la ong ba kane ka thain ka dei ka jaka kaba biang bha na ka bynta ki jingialang jong ki ri ka pyrthei, ki concert, bad jaka khawai kyntiew kurim, da kaba buh ia ka kum ka jaka jngohkai pyrthei kaba pura. U la ong ba katba ka roi ka par ka nang poi sha man la ki kyndong kynshrot jong ka thaiñ Shatei Lammihngi, ka jingktah kaba bha jong ka ha ka kam jngohkai pyrthei ka paw shai, ha kaba ka jingbun ki nongwan jngohkai ka nang kiew ar shah. U la ong ba kine kim dei tang ki jingkhein jingdiah—kane ka jingkiew ka la pynlong ia ka jingkiew jong ki jaka sah ha ki shnong, ki lad ioh kam ba thymmai na ka bynta ki samla, bad ka jingkiew ka kam jngohkai pyrthei bad ka leit ka wan. Haba ban jur ia ka jingdonkam ban kyntiew shuh shuh ia ka kam jngohkai pyrthei ha ka thain shatei lammihngi, u la kdew ia ka lad bei tyngka kaba heh ha ka kam jngohkai pyrthei kaba iadei bad ka mariang bad ka kam jngohkai pyrthei kaba iadei bad ka kolshor. Haba pynskhem biang ba ka shongsuk shongsain ka dei ka mat ba kongsan tam na ka bynta ka roi ka par jong kano kano ka thaiñ, u Modi u la ong, “Ka sorkar jong ngi ka don ïa ka polisi ka bym ailad pyrshah ïa ki kam lehnoh bad kam pyntriem”. U la ong ba shisien ka thaiñ Shatei Lammihngi ka ju don ki jingpakhang bad ki jingïakynat, kaba la ktah jur ïa ki lad ki lynti na ka bynta ki samla jong ka. U la batai ïa ki sienjam jong ka sorkar na ka bynta ki jingïateh kular iasuk, da kaba pynpaw ba ha kine ki 10-11 snem ba la leit noh, palat 10,000 ngut ki samla ki la iehnoh ïa ki tiar ialeh ban pdiang ïa ka jingsuk. U la ban jur ba kane ka jingkylla ka la plie lad ioh kam ba thymmai bad ki lad seng kam lajong hapoh ka thaiñ. U Modi u la pynpaw shuh shuh ia ka jingktah jong ka skhim MUDRA, kaba la ai jingiarap pisa da ki hajar klur sha ki lak ngut ki samla ha ka thain shatei lammihngi. U la kdew shuh shuh ia ka jingkiew jong ki jaka pule, kaba iarap ia ki samla ban kyntiew ia ki sap na ka bynta ka lawei. U la ong ba ki samla jong ka thain shatei lammihngi kim dei tang ki nongpyndonkam internet hynrei ki nongsaindur thymmai kiba dang kiew. U la ban jur ia ki jingkiew kum ka jingpynheh ia ka optical fiber palat 13,000 kilomitar, ka jingpynpoi ia ka 4G bad 5G, bad ki lad kiba nangroi ha ka liang ka teknoloji. “Ki nongseng kam seng jam mynta ki sdang ïa ki startup kiba heh hapoh ka thaiñ, kaba pynskhem ïa ka bynta jong ka thaiñ shatei lammihngi kum ka khyrdop ha ka kam digital jong ka India”, u la bynrap.

Da kaba ban jur ia ka bynta ba kongsan jong ka jingkyntiew ia ki sap na ka bynta ka jingkiew shaphrang bad ka lawei kaba bha, u Myntri Rangbahduh u la ong ba ka thain shatei lammihngi ka long ka jaka kaba biang na ka bynta kane ka jingkiew shaphrang, ha kaba ka sorkar pdeng ka bei tyngka shibun ha ka pule puthi bad ki sienjam ban kyntiew ia ka sap. U Myntri Rangbahduh u la ong ba ha kine ki shiphew snem ba la dep, la bei tyngka T. 21,000 klur ha ka pule puthi jong ka thaiñ shatei lammihngi. U la kdew ïa ki kam ba kongsan, kynthup ïa ka jingseng palat 800 tylli ki skul ba thymmai, ka AIIMS ba nyngkong eh jong ka thaiñ, khyndai tylli ki medical college ba thymmai, bad ar tylli ki IIIT ba thymmai. Nalor kata, u la kdew ïa ka jingseng ïa ka Indian Institute of Mass Communication Campus ha Mizoram bad jan 200 tylli ki jaka kyntiew ia ki sap ha kylleng ka thaiñ. Shuh shuh u la ong  ba ïa ka sports university ba nyngkong jong ka India la shna ha ka thaiñ Shatei Lammihngi, da ka jingbei tyngka hapoh ka prokram Khelo India. U la kdew ba la seng ïa phra tylli ki Khelo India Centre of Excellence bad palat 250 tylli ki Khelo India Centre, kiba kyntiew ïa ki sap ïalehkai ha kylleng ka thaiñ. U Myntri Rangbahduh u la pynthikna ba ka thaiñ shatei lammihngi mynta ka don ïa ki sap ba tbit ha ki bynta bapher bapher, kaba pynshlur ïa ki karkhana bad ki nongbei tyngka ban pyndonkam ïa ka lad kaba khraw jong ka thaiñ. U Modi u la ban jur halor ka jingdawa kaba nang kiew ha ka pyrthei ïa ki jingbam organic, da kaba ong ba ka jingthmu jong u ka long ba ka jait jingbam jong ka ri India kan don ha man la ka miej bam ha kylleng ka pyrthei. U la pynpaw ia ka bynta ba kongsan jong ka thain shatei lammihngi ban pynurlong ia kane ka jingangnud. U la ong ba ha kine ki shiphew snem ba la dep, ka rukom rep organic ha ka thain shatei lammihngi ka la kiew ar shah, ha kaba kane ka thain ka pynmih ia u slasha ba bha tam, ki sohtrun, ki sohniamtra, ki sohjew, u shynrai, bad u sying. U la pynskhem ba ka jingbang bad ka jinglong kaba kham bha jong kine ki mar ka la pynlong ka jingkiew ka jingdawa ia kine ki mar na kylleng ki ri ka pyrthei. U la pynshlur ruh ïa ki nongshim bynta ban pyndonkam ïa kane ka ïew kaba nang kiew, da kaba ithuh ïa ka lad jong ka thaiñ shatei lammihngi kum ka nongpynïaid ba kongsan jong ka jingshalan marbam organic jong ka India. Haba pynpaw ïa ka jingangnud jong ka sorkar ban pynsuk ïa ka jingseng ïa ki jaka pynkhreh marbam ha ka thaiñ Shatei Lammihngi, u Myntri Rangbahduh u la ong ba watla ka jingkyntiew ïa ki lad jingpyniasoh ka la kyrshan lypa ïa kane ka sienjam, ki la don shuh shuh ki jingpyrshang ban kyntiew ïa ki jaka buh marbam ba heh, ban pynheh ïa ki jaka buh pyndait thah, bad ban pynbiang ïa ki jaka test. U la kren shaphang ka jingsdang ia ka Oil Palm Mission, da kaba ithuh ia ka jinglong ka khyndew bad ka suinbneng jong ka thain shatei lammihngi kum kaba biang bha ban rep palm oil. U la kdew ba kane ka sienjam ka plie ki lad kamai ba khlain ia ki nongrep katba ka pynduna ia ka jingshaniah jong ka India ha ka jingthied umphniang bam nabar ri. U la bynrap shuh shuh ba ka jingrep palm oil ka ai ka lad kaba khraw na ka bynta ki karkhana, kaba pynshlur ïa ki nongshim bynta ban shim kabu ïa ka bor rep jong ka thaiñ.

“Ka thaiñ shatei lammihngi ka dang long kum ka jaka ba kongsan na ka bynta ar tylli ki kam—ka bording bad ki semiconductor”, la ban jur u Modi, da kaba pynpaw ïa ka jingbei tyngka kaba heh jong ka sorkar ha ka bording elektrik bad bording solar ha kylleng ki jylla jong ka thaiñ shatei lammihngi, ha kaba la mynjur ïa ki projek kiba shongdor katto katne hajar klur. U la kdew ba nalor ki lad ban bei tyngka ha ki karkhana bad ki jingdon jingem, ka don ka lad kaba kongsan ha ka jingshna, kynthup ïa ki solar module, ki cell, ki lad ban buh ïa ki tiar, bad ka jingwad bniah. U la ban jur ia ka jingdonkam ban pynbun ia ka jingbei tyngka ha kine ki bynta, da kaba pynpaw ba ka jingkyrshan dalade kaba kham bun mynta kan pynduna ia ka jingshaniah ha ki mar kiba wan nabar ri ha ki por ban wan. U Modi u la kren shuh shuh halor ka bynta kaba nangroi jong ka Assam ha kaba pynkhlain ia ka kam semiconductor jong ka India. U la pynbna ba shen yn sa pynmih ïa u chip Made in India ba nyngkong eh na ka karkhana semiconductor kaba don ha ka thain shatei lammihngi, kaba pyni ïa ka dak kaba kongsan na ka bynta kane ka thaiñ. U la pynskhem ba kane ka kam ka plie ki lad ki lynti na ka bynta ka jingstad ba thymmai bad pynskhem ïa ka kyrdan jong ka thaiñ shatei lammihngi ha ka jingkiew ka teknoloji jong ka ri India.

“Ka Rising Northeast ka long kham palat ban ïa ka jingïalang jong ki nongbei tyngka—ka dei ka jingïakhih bad ka jingkyntu ia ka sienjam”, la ban jur u Myntri Rangbahduh, da kaba ong ba ka lawei jong ka Ri India kan kot sha ki kyrdan kiba thymmai lyngba ka jingkiew shaphrang bad jingseisoh jong ka thaiñ Shatei Lammihngi. U Myntri Rangbah u la pynpaw ka jingshaniah pura ha ki nongïalam jong ki kam khaii kiba la iadon lang, da kaba kyntu ïa ki ban ïatylli na ka bynta ka jingkiew shaphrang. Haba pynkut ïa ka jingkren jong u, u la kyntu ïa ki nongshim bynta ban ïatreilang ha kaba pynkylla ïa ka Ashtalakshmi—ka dak jong ka jinglah jong ka thaiñ shatei lammihngi—sha ka bor ïalam lynti na ka bynta ka Viksit Bharat. U la pynpaw ia ka jingshaniah shuwa ka Rising Northeast kaba hadien, ka India kan sa jam shaphrang.

U Myntri Sorkar pdeng ba dei peit tnad Development of North Eastern Region, Jyotiraditya M. Scindia, Lat ka jylla Manipur, Ajay Kumar Bhalla, Myntri Rangbah ka jylla Assam, u Himanta Biswa Sarma, Myntri Rangbah ka jylla Arunachal Pradesh, Pema Khandu, Myntri Rangbah ka jylla Meghalaya, Conrad Sangma, Myntri Rangbah ka jylla Mizoram, Lalduhoma, Myntri Rangbah ka jylla Nagaland, Neiphiu Rio, Myntri Rangbah ka jylla Sikkim, Prem Singh Tamang, Myntri Rangbah ka jylla Tripura, Manik Saha, Myntri Khynnah jong ka sorkar pdeng ba dei khmih ia ka Tnad Development of North Eastern Region, Dr. Sukanta Majumdar ki la iadonlang ha kane ka jingialang.

Ka Nongrim

Da ka jingthmu ban pynpaw pyrthei ïa ka thaiñ shatei lammihngi kum ka jaka jong ki lad ki lynti, kaba khring ïa ki nongbei tyngka na ka pyrthei bad napoh ri, bad ban wanrah lang ïa ki nongshim bynta ba kongsan, ki nongbei tyngka, bad ki nongthaw polisi ha kawei ka rynsan, u Myntri Rangbahduh ka ri u Narendra Modi u la plie ïa ka Rising North East Investors Summit ha Bharat Mandapam, New Delhi mynta ka sngi.

Ka Rising North East Investors Summit, ka jingialang kaba ar sngi naduh 23-24 tarik u Jymmang, ka dei ka jingpynkut ia ki kam bapher bapher shuwa ka summit, kum ki roadshow, bad ki jingïalang jong ki jylla kynthup ïa ka Ambassador’s Meet bad ka Bilateral Chambers Meet ba la pynlong da ka sorkar pdeng ryngkat ka jingkyrshan shitrhem na ki sorkar jylla jong ka thaiñ shatei lammihngi. Ka Summit kan kynthup ia ki jingialang jong ki myntri, ki jingialang Business-to-Government, ki jingialang Business-to-Business, ki startup bad ki jingpyni ia ka polisi bad ki sienjam ba iadei bad kane ba la shim da ka Sorkar Jylla bad ki tnad sorkar pdeng na ka bynta ban kyntiew ia ka jingbei tyngka.

Ki bynta ba kongsan jong ka jingkyntiew ia ka jingbei tyngka ki kynthup ia ka kam jngohkai pyrthei bad ka kam ai jaka sah, ka jingpynkhreh ia ki marbam bad ki bynta ba iadei bad kane; Ki jain, ki jingshna kti, ka kam ai jingsumar; Ka pule puthi bad ka jingkyntiew ia ki sap; Ka Information Technology ne ki jingai jingshakri ba iadei bad ka jingai jingtip; ki jingdon jingem bad ki kam logistics, bad ka Jingpynbyrngia bad ki kam ialehkai.

***