மணிப்பூரில் குடியரசுத் தலைவர் ஆட்சியை அமல்படுத்த ஒப்புதல் கோரி மத்திய உள்துறை அமைச்சரும், கூட்டுறவுத் துறை அமைச்சருமான திரு அமித் ஷா மக்களவையில் சட்டப்பூர்வ தீர்மானத்தை முன்மொழிந்தார். இதையடுத்து மக்களவையில் தீர்மானம் நிறைவேற்றப்பட்டது. மணிப்பூரில் நடந்த வன்முறையில் உயிரிழந்தவர்களுக்கு அவையில் அஞ்சலியும், அனுதாபமும், ஆழ்ந்த வருத்தமும் தெரிவிக்கப்பட்டது.

தீர்மானத்தை அறிமுகம் செய்து பேசிய மத்திய உள்துறை அமைச்சரும் கூட்டுறவு அமைச்சருமான திரு அமித் ஷா, இடஒதுக்கீடு தொடர்பான பிரச்சனை காரணமாக மணிப்பூர் உயர்நீதிமன்றம் அளித்த உத்தரவு காரணமாகவே மணிப்பூரில் இரு இனக்குழுக்களுக்கு இடையே  கலவரம் தொடங்கியது என்று தெரிவித்தார். இவை கலவரமோ அல்லது பயங்கரவாதமோ அல்ல, உயர்நீதிமன்றத்தின் தீர்ப்பின் விளக்கத்தின் விளைவாக இரண்டு சமூகங்களுக்கு இடையிலான இன வன்முறை என்று அவர் குறிப்பிட்டார். டிசம்பர் முதல் மார்ச் மாதம் வரை சுமார் 4 மாதங்களாக மணிப்பூரில் எந்த வன்முறையும் ஏற்படவில்லை என்றும், முகாம்களில் உணவு, மருந்துகள் மற்றும் மருத்துவ வசதிகளுக்கான ஏற்பாடுகள் உறுதி செய்யப்பட்டுள்ளன என்றும் திரு அமித் ஷா மேலும் கூறினார். தொழில்நுட்ப மற்றும் மருத்துவக் கல்விக்கான ஆன்லைன் ஏற்பாடுகள் செய்யப்பட்டுள்ளதாகவும், தொடக்கக் கல்விக்காக, முகாம்களில் வகுப்புகள் அமைக்கப்பட்டுள்ளதாகவும், அங்கு மாணவர்களின் படிப்புக்கான ஏற்பாடுகள் செய்யப்பட்டுள்ளன என்றும் அவர் கூறினார்.

எந்தவொரு வன்முறையும் இருக்கக்கூடாது என்றும், இன வன்முறையை எந்தவொரு அரசியல் கட்சியுடனும் தொடர்புபடுத்தக்கூடாது என்றும் திரு அமித் ஷா கூறினார். எங்கள் ஆட்சியின் போது இனக்கலவரம் இடம்பெற்றதாக எதிர்க்கட்சியினர் சித்திரிக்க முயற்சித்ததாக அவர் குறிப்பிட்டுள்ளார். 1993 மற்றும் 1998-ம் ஆண்டுகளுக்கு இடையில், மணிப்பூரில் ஐந்து ஆண்டுகள் நாகா-குக்கி மோதல் இருந்தது. இதன் விளைவாக 750 பேர் இறந்தனர். மேலும் அடுத்த 10 ஆண்டில் சில இடங்களில் வன்முறை சம்பவங்கள் தொடர்ந்தன என்று அவர் அவையில் தெரிவித்தார். எங்கள் ஆட்சியின் கீழ் இதுபோன்ற சம்பவங்கள் ஒருபோதும் நடக்கக்கூடாது என்று நாங்கள் நம்பினாலும், ஒரு துரதிர்ஷ்டவசமான முடிவு வன்முறைக்கு வழிவகுத்தது, அது உடனடியாக கட்டுப்பாட்டுக்குள் கொண்டுவரப்பட்டது என்று திரு அமித் ஷா கூறினார். வன்முறையில் ஏற்பட்ட 260 உயிரிழப்புகளில், 80 சதவீதம் முதல் மாதத்தில் நிகழ்ந்தன, மீதமுள்ள இறப்புகள் அடுத்தடுத்த மாதங்களில் நிகழ்ந்தன என்றும் அவர் கூறினார். 1997-98 குக்கி-பைட் மோதலில், 50 க்கும் மேற்பட்ட கிராமங்கள் அழிக்கப்பட்டன, 40,000 பேர் இடம்பெயர்ந்தனர், 352 பேர் கொல்லப்பட்டனர், நூற்றுக்கணக்கானோர் காயமடைந்தனர், 5,000 வீடுகள் எரிக்கப்பட்டன என்றும் அவர் குறிப்பிட்டார். 1993-ம் ஆண்டில் ஆறு மாத கால மெய்தேய்-பங்கல் மோதலின் போது 100 க்கும் மேற்பட்டோர் இறந்தனர் என்று அவர் மேலும் கூறினார்.

மணிப்பூரில் இது முதல் வன்முறை என்பது போலவும், எங்கள் ஆட்சி தோல்வியடைந்தது போலவும் எதிர்க்கட்சிகள் சித்தரிக்க முயற்சிக்கின்றன என்று மத்திய உள்துறை அமைச்சர் கூறினார். கடந்த அரசின் ஆட்சியின் போது 10 ஆண்டுகள், 3 ஆண்டுகள் மற்றும் 6 மாதங்கள் என நீடித்த அளவிற்கு மூன்று முக்கிய வன்முறை சம்பவங்கள் நடந்ததாக அவர் குறிப்பிட்டார். இந்த வன்முறை சம்பவங்களுக்குப் பிறகு, உள்துறை அமைச்சர் உட்பட அப்போதைய அரசைச் சேர்ந்த யாரும் இப்பகுதிக்கு செல்லவில்லை என்று அவர் மேலும் கூறினார்.

2017-ல் பாஜக ஆட்சிக்கு வந்தது என்றும், அதற்கு முந்தைய 5 ஆண்டுகளில் மணிப்பூர் ஆண்டுக்கு சராசரியாக 212 நாட்கள் முடக்கப்பட்டு இருந்ததாகவும், அந்த நேரத்தில் இனக்கலவரம் எதுவும் நிகழவில்லை என்றும் திரு அமித் ஷா குறிப்பிட்டார். 1,000-க்கும் மேற்பட்ட என்கவுன்டர்கள் நடந்துள்ளதாகவும், அவற்றை உச்ச நீதிமன்றம் கவனத்தில் கொள்ள வேண்டும் என்றும் அவர் குறிப்பிட்டார். உயர் நீதிமன்ற உத்தரவுக்கு முன்பு, மணிப்பூரில் 2017 முதல் ஆறு ஆண்டுகால பிஜேபி ஆட்சியில் ஒரு நாள் கூட ஊரடங்கு மற்றும் முற்றுகை இல்லை, வன்முறை எதுவும் நடக்கவில்லை என்று திரு அமித் ஷா கூறினார். ஒரு குறிப்பிட்ட சூழ்நிலையில், இரு சமூகங்களும் உயர் நீதிமன்றத்தின் உத்தரவு தங்களுக்கு எதிரானது என்று கூறியபோது, இரண்டு நாட்களுக்குள் வன்முறை வெடித்தது என்று அவர் கூறினார்.

மணிப்பூரில் நடந்த வன்முறையை அரசு கண்டுகொள்ளவில்லை என்று எதிர்க்கட்சிகளும் குற்றம் சாட்டியுள்ளதாக மத்திய உள்துறை அமைச்சரும் கூட்டுறவு அமைச்சரும் கூறினார். உயர் நீதிமன்றத்தின் உத்தரவு பிறப்பிக்கப்பட்ட அதே நாளில், பாதுகாப்புப் படைகளின் நிறுவனங்கள் விமானப்படை விமானங்கள் மூலம் அந்த பிராந்தியத்திற்கு அனுப்பப்பட்டதாக அவர் அவையில் தெரிவித்தார். இந்த விஷயத்தில் அனைவரும் ஒரே மாதிரியான கவலையைப் பகிர்ந்து கொள்கிறார்கள் என்று அவர் கூறினார். மணிப்பூரில் அமைதியை மீட்டெடுக்க அரசு சாத்தியமான அனைத்து முயற்சிகளையும் மேற்கொண்டு வருவதால், இந்த விவகாரத்தை அரசியலாக்க வேண்டாம் என்று உள்துறை அமைச்சர் அனைத்து உறுப்பினர்களுக்கும் வேண்டுகோள் விடுத்தார்.

மணிப்பூரில் குடியரசுத் தலைவர் ஆட்சி அமல்படுத்தப்பட்ட பிறகு, இரு சமூகங்களுடனும் கலந்துரையாடல்கள் நடத்தப்பட்டதாகவும், இரு சமூகங்களைச் சேர்ந்த அனைத்து அமைப்புகளுடனும் தனித்தனியாக சந்திப்புகள் நடந்ததாகவும் திரு அமித் ஷா கூறினார். உள்துறை அமைச்சகம் விரைவில் ஒரு கூட்டுக் கூட்டத்தைக் கூட்டும் என்று அவர் குறிப்பிட்டார். வன்முறையை முடிவுக்குக் கொண்டுவருவதற்கான பாதையைக் கண்டறிய அரசு செயல்பட்டு வரும் அதே வேளையில், அமைதியை நிலைநாட்டுவதே முதன்மையான முன்னுரிமை என்று அவர் வலியுறுத்தினார். கடந்த நான்கு மாதங்களாக மணிப்பூரில் வன்முறையால் எந்த இறப்பும் ஏற்படவில்லை என்றும், இரண்டு பேர் மட்டுமே காயமடைந்துள்ளனர் என்றும், நிலைமை பெரும்பாலும் கட்டுப்பாட்டில் உள்ளது என்றும் திரு அமித் ஷா குறிப்பிட்டார்.

***

(Release ID: 2118264)
TS/IR/RR/SG