“നമ്മുടെ ഭക്ഷണശീലങ്ങളിൽ ചെറിയ മാറ്റങ്ങൾ വരുത്തുന്നതിലൂടെ, ഭാവി കൂടുതൽ ദൃഢവും ആരോഗ്യപൂർണ്ണവും രോഗമുക്തവുമാക്കാൻ നമുക്ക് സാധിക്കും.”

പ്രധാനമന്ത്രി ശ്രീ നരേന്ദ്ര മോദി

ആമുഖം

ഇന്ത്യയിൽ അമിതവണ്ണം അഥവാ പൊണ്ണത്തടി ഒരു പ്രധാന പൊതുജനാരോഗ്യ വെല്ലുവിളിയായി മാറിയിരിക്കുന്നു. ഇത് എല്ലാ പ്രായത്തിലുമുള്ള ആളുകളെ ബാധിക്കുന്നു. കൂടാതെ പ്രമേഹം, ഹൃദ്രോഗം, രക്താതിസമ്മർദ്ദം തുടങ്ങിയ സാംക്രമികേതര രോഗങ്ങളുടെ (NCD) സാധ്യത വർദ്ധിപ്പിക്കുകയും ചെയ്യുന്നു. ആരോഗ്യകരമല്ലാത്ത ഭക്ഷണക്രമം, ഉദാസീനമായ ജീവിതശൈലി, പാരിസ്ഥിതിക ഘടകങ്ങൾ എന്നിവയാൽ, പൊണ്ണത്തടി ആശങ്കാജനകമായ തോതിൽ വർദ്ധിച്ചുവരികയാണ്. ഇത് നഗര-ഗ്രാമ വ്യത്യാസമില്ലാതെ ജനങ്ങളെ ബാധിക്കുന്നു. സംസ്ക്കരിച്ച ഭക്ഷണ പദാർത്ഥങ്ങളിലേക്കുള്ള കൂടുമാറ്റം, ശാരീരികാദ്ധ്വാനമില്ലായ്മ, ജീവിതശൈലിയിലെ തെറ്റായ പ്രവണതകൾ എന്നിവ പ്രതിസന്ധി വഷളാക്കുന്നു.

ഈ പ്രശ്നത്തിന്റെ അടിയന്തിര പ്രാധാന്യം തിരിച്ചറിഞ്ഞ പ്രധാനമന്ത്രി നരേന്ദ്ര മോദി, അടുത്തിടെ നടന്ന മൻ കി ബാത്തിൽ, ഭക്ഷ്യ എണ്ണ ഉപഭോഗം കുറയ്ക്കുന്നതിലൂടെ പൊണ്ണത്തടി നിയന്ത്രിക്കുന്നതിനുള്ള, രാജ്യവ്യാപകമായ അവബോധത്തിന്റെയും കൂട്ടായ പ്രവർത്തനങ്ങളുടെയും ആവശ്യകത ഊന്നിപ്പറഞ്ഞു. ബോധവത്ക്കരണ പ്രസ്ഥാനത്തിന് നേതൃത്വം നൽകാൻ അദ്ദേഹം ഇന്ത്യയിലുടനീളമുള്ള പ്രമുഖ വ്യക്തികളെ നാമനിർദ്ദേശം ചെയ്തു. കൂട്ടായ പ്രവർത്തനത്തിനുള്ള ഈ ആഹ്വാനം വ്യക്തിഗത, സാമൂഹിക തലങ്ങളിൽ പൊണ്ണത്തടിയെന്ന വിപത്തിനെ നേരിടേണ്ടതിന്റെ പ്രാധാന്യം ഉയർത്തിക്കാട്ടുന്നു. ഇത് കൂടുതൽ ആരോഗ്യപൂർണ്ണവും ആരോഗ്യദായകവുമായ ഇന്ത്യയെന്ന ആശയത്തെ ശക്തിപ്പെടുത്തുന്നു. ആരോഗ്യകരമായ ജീവിതശൈലി, മികച്ച പോഷകാഹാരം, ശാരീരിക അദ്ധ്വാനം എന്നിവ പ്രോത്സാഹിപ്പിക്കുന്നതിനായി ഫിറ്റ് ഇന്ത്യ മൂവ്‌മെന്റ്, NP-NCD, പോഷൺ അഭിയാൻ, ഈറ്റ് റൈറ്റ് ഇന്ത്യ, ഖേലോ ഇന്ത്യ എന്നിവയുൾപ്പെടെ ഒട്ടേറെ സംരംഭങ്ങൾ ഭാരത സർക്കാർ ആരംഭിച്ചിട്ടുണ്ട്. ദീർഘകാല ജീവിത ശൈലീ പരിവർത്തനം പ്രോത്സാഹിപ്പിക്കുന്നതിനും ഏവർക്കും ആരോഗ്യകരമായ ഭാവി ഉറപ്പാക്കുന്നതിനുമാണ് ഈ സംരംഭങ്ങളെല്ലാം ലക്ഷ്യമിടുന്നത്. ഇന്ത്യ അമൃത കാലത്തിലേക്ക് മുന്നേറുമ്പോൾ, നയ പരിഷ്‌ക്കാരങ്ങൾ, സാമൂഹിക ഇടപെടൽ, നിയന്ത്രണ സംവിധാനങ്ങൾ എന്നിവയിലൂടെ പൊണ്ണത്തടി നേരിടുന്നതിന് സർക്കാരും സമൂഹവും കൈകോർക്കുന്ന ഒരു സമഗ്ര സമീപനം സ്വീകരിക്കുകയെന്നതാണ് സർക്കാർ ലക്ഷ്യമിടുന്നത്. പൊതുജനാരോഗ്യ സംവിധാനങ്ങൾ ശക്തിപ്പെടുത്തുക, സുസ്ഥിരമായ ഭക്ഷണശീലങ്ങൾ പ്രോത്സാഹിപ്പിക്കുക, അവബോധം വർദ്ധിപ്പിക്കുക എന്നിവയാണ് ഈ പ്രവണത തിരുത്തുന്നതിനും ഭാവി തലമുറകളെ പൊണ്ണത്തടിയുമായി ബന്ധപ്പെട്ട ആരോഗ്യ പ്രശ്നങ്ങളിൽ നിന്ന് സംരക്ഷിക്കുന്നതിനും പ്രധാനം.

പൊണ്ണത്തടിയെ മനസ്സിലാക്കൽ : നിർവ്വചനവും കാരണങ്ങളും

എന്താണ് പൊണ്ണത്തടി ?

ലോകാരോഗ്യ സംഘടനയുടെ (WHO) നിർവ്വചന പ്രകാരം, ആരോഗ്യത്തിന് അപകടമുണ്ടാക്കുന്ന തരത്തിൽ അസാധാരണമായോ അമിതമായോ കൊഴുപ്പ് അടിഞ്ഞുകൂടുന്നതാണ് പൊണ്ണത്തടി. പൊണ്ണത്തടിയെ തരംതിരിക്കുന്നതിനായി ബോഡി മാസ് ഇൻഡക്സ് (BMI) ആണ് സാധാരണ ഉപയോഗിക്കുന്നത്. 25 അല്ലെങ്കിൽ അതിൽ കൂടുതലുള്ള BMI അമിതഭാരമായും 30 അല്ലെങ്കിൽ അതിൽ കൂടുതലുള്ള BMI പൊണ്ണത്തടിയായും  ലോകാരോഗ്യ സംഘടന കണക്കാക്കുന്നു. ഇന്ത്യയിൽ, ഒരു വ്യക്തിയുടെ ബോഡി മാസ് ഇൻഡക്സ് (BMI) 23.0 നും 24.9 kg/m² നും ഇടയിലാണെങ്കിൽ അവരെ അമിതഭാരമുള്ളവരായി കണക്കാക്കുന്നു. BMI 25 kg/m² മുതൽ മുകളിലേക്ക് പൊണ്ണത്തടിയായി കണക്കാക്കുന്നു. ഒരു വ്യക്തിയുടെ BMI 35 അല്ലെങ്കിൽ അതിൽ കൂടുതലാകുമ്പോഴാണ് രോഗാതുരമായ പൊണ്ണത്തടിയായി വിലയിരുത്തുന്നത്.

എന്താണ് BMI ?

മുമ്പ് ക്വെറ്റ്ലെറ്റ് സൂചിക എന്നറിയപ്പെട്ടിരുന്ന ബോഡി മാസ് ഇൻഡക്സ് (BMI), പ്രായപൂർത്തിയായ ഒരു  വ്യക്തിയുടെ ആരോഗ്യകരമായ ഭാരം പരിശോധിക്കാനുള്ള ലളിതമായ ഒരു മാർഗമാണ്. കിലോഗ്രാമിലുള്ള ഒരു വ്യക്തിയുടെ ഭാരത്തെ, മീറ്ററിൽ കണക്കാക്കിയ ഉയരത്തിന്റെ വർഗ്ഗം (കിലോഗ്രാം/മീ²) കൊണ്ട് ഹരിച്ചാണ് ഇത് കണക്കാക്കുന്നത്. BMI കണ്ടെത്താൻ, ഒരു വ്യക്തിയുടെ ഭാരം (കിലോഗ്രാം) എടുത്ത് അതിനെ ഉയരത്തിന്റെ (മീ) വർഗ്ഗം കൊണ്ട് ഹരിക്കുക.

ആരോഗ്യകരമായ BMI പരിധി

ലോകാരോഗ്യ സംഘടനയുടെ (WHO) മാർഗ്ഗനിർദ്ദേശങ്ങൾ പ്രകാരം, 18.5 നും 24.9 നും ഇടയിലുള്ളതെല്ലാം സാധാരണ BMI ആയി കണക്കാക്കുന്നു.

ആഗോള സ്ഥിതിവിവരക്കണക്കുകൾ

ലോകമെമ്പാടുമുള്ള മുതിർന്നവരിലും കുട്ടികളിലും അമിതഭാരത്തിന്റെയും പൊണ്ണത്തടിയുടെയും വ്യാപനം ക്രമാനുഗതമായി വർദ്ധിച്ചുകൊണ്ടിരിക്കുകയാണ്. 1990 നും 2022 നും ഇടയിൽ, പൊണ്ണത്തടിയുള്ള കുട്ടികളുടെയും കൗമാരക്കാരുടെയും (5–19 വയസ്സ്) ശതമാനം നാലിരട്ടിയായി വർദ്ധിച്ച്, 2% ൽ നിന്ന് 8% ആയി. അതേ കാലയളവിൽ, പൊണ്ണത്തടിയുള്ള മുതിർന്നവരുടെ (18 വയസ്സും അതിനു മേലെയും) അനുപാതം ഇരട്ടിയിൽ കൂടുതലായി. അതായത് 7% ൽ നിന്ന് 16% ആയി ഉയർന്നു.

പൊണ്ണത്തടിയുമായി ബന്ധപ്പെട്ട  ഇന്ത്യയിലെ സ്ഥിതിവിവരക്കണക്കുകൾ

ദേശീയ കുടുംബാരോഗ്യ സർവ്വെ (NFHS)-5 (2019-21) പ്രകാരം, ഇന്ത്യൻ വനിതകളിൽ 24% ഉം പുരുഷന്മാരിൽ 23% ഉം അമിതഭാരമുള്ളവരാണ്

NFHS-5 (2019-2021) പ്രകാരം 15-49 വയസ്സ് പ്രായമുള്ള വിഭാഗത്തിൽ, വനിതകളിൽ 6.4% ഉം പുരുഷന്മാരിൽ 4.0% ഉം പൊണ്ണത്തടിയുള്ളവരാണ്.

അഖിലേന്ത്യാ തലത്തിൽ, അമിതഭാരമുള്ള (ഉയരത്തിന് ആനുപാതികമായി) 5 വയസ്സിന് താഴെയുള്ള കുട്ടികളുടെ ശതമാനം NFHS-4 (2015-16) ലെ 2.1 ൽ നിന്ന് NFHS-5 (2019-21) ൽ 3.4 ആയി വർദ്ധിച്ചു.

ഇന്ത്യയിൽ പൊണ്ണത്തടി വർദ്ധിക്കുന്നതിന് കാരണമാകുന്ന പ്രധാന ഘടകങ്ങൾ

പൊണ്ണത്തടി തടയുന്നതിനുള്ള ഭാരതസർക്കാരിന്റെ തന്ത്രപരമായ ചട്ടക്കൂട്

നയ നവീകരണങ്ങളും ദൃഷ്ടിഗോചരമായ ഫലങ്ങളും

പൊണ്ണത്തടി ഒരു നിർണായക പൊതുജനാരോഗ്യ പ്രശ്‌നമായി അംഗീകരിച്ചുകൊണ്ട്, പൊണ്ണത്തടി തടയുന്നതിനും നിയന്ത്രിക്കുന്നതിനും കുറയ്ക്കുന്നതിനുമായി സമസ്ത തലങ്ങളിലും സമഗ്രവും ബഹുമുഖവുമായ സംരംഭങ്ങൾ ഭാരത സർക്കാർ ആരംഭിച്ചു. ആരോഗ്യം, പോഷകാഹാരം, ശാരീരിക അദ്ധ്വാനം, ഭക്ഷ്യ സുരക്ഷ, ജീവിതശൈലിയിലെ പരിഷ്‌ക്കാരങ്ങൾ എന്നിവ സമന്വയിപ്പിക്കുന്ന ഒരു സമഗ്ര സമീപനം പ്രോത്സാഹിപ്പിക്കുന്നതിനായി ഒന്നിലധികം മന്ത്രാലയങ്ങൾ ചേർന്ന് രൂപകൽപ്പന ചെയ്ത ഇടപെടലുകളാണ് ഈ ഉദ്യമങ്ങൾ. ഈ സംരംഭങ്ങളെ ഇനിപ്പറയുന്ന വിധം തരംതിരിക്കാം:

1. ആരോഗ്യ കുടുംബക്ഷേമ മന്ത്രാലയം (MoHFW) - പൊതുജനാരോഗ്യ പ്രതികരണ സംവിധാനത്തിന്റെ  ശാക്തീകരണം

1.1 സാംക്രമികേതര രോഗങ്ങൾ തടയുന്നതിനും നിയന്ത്രിക്കുന്നതിനുമുള്ള ദേശീയ പരിപാടി (NP-NCD)

ലോകാരോഗ്യ സംഘടനയുടെ '2018 - NCD ഇന്ത്യ' പ്രൊഫൈൽ പ്രകാരം, ഇന്ത്യയിൽ, സാംക്രമികേതര രോഗങ്ങൾ (NCD-കൾ) മൂലമുള്ള മരണങ്ങൾ 63% വരും. ഹൃദയ സംബന്ധമായ രോഗങ്ങൾ (27%), വിട്ടുമാറാത്ത ശ്വസന രോഗങ്ങൾ (11%) കാൻസർ (9%), പ്രമേഹം (3%), പൊണ്ണത്തടി (13%) എന്നിവ മൂലമാണിത്.

ഹൃദയ സംബന്ധമായ രോഗങ്ങൾ, കാൻസർ, പ്രമേഹം, വിട്ടുമാറാത്ത ശ്വസന രോഗങ്ങൾ തുടങ്ങിയ സാംക്രമികേതര രോഗങ്ങൾ (NCD-കൾ) പ്രധാനമായും പുകയില ഉപയോഗം, അനാരോഗ്യകരമായ ഭക്ഷണക്രമം, ശാരീരിക നിഷ്‌ക്രിയത്വം, മദ്യപാനം എന്നിവയുൾപ്പെടെയുള്ള പരിഹരിക്കാവുന്ന ജീവിതശൈലി ഘടകങ്ങളാൽ ഉണ്ടാകുന്നവയാണ്. വായു മലിനീകരണം അപകടസാധ്യത വീണ്ടും വർദ്ധിപ്പിക്കുന്നു. ഈ ഘടകങ്ങൾ പൊണ്ണത്തടി, ഉയർന്ന രക്തസമ്മർദ്ദം, രക്തത്തിലെ ഉയർന്ന  അളവിലുള്ള പഞ്ചസാര, ഉയർന്ന കൊളസ്ട്രോൾ എന്നിവയ്ക്ക് കാരണമാകുന്നു. ഇവയെല്ലാം സാംക്രമികേതര രോഗങ്ങൾ പിടിപെടാനുള്ള സാധ്യത ഗണ്യമായി വർദ്ധിപ്പിക്കുന്നു. അപകടകരമായ ഈ ഘടകങ്ങളിൽ പലതും തടയാൻ കഴിയുമെന്നതിനാൽ, പൊണ്ണത്തടിയും അനാരോഗ്യകരമായ ശീലങ്ങളും പരിഹരിക്കുന്നതിലൂടെ സാംക്രമികേതര രോഗങ്ങൾ മരണകാരണമാകുന്നത് ഒഴിവാക്കാൻ വളരെയധികം സഹായിക്കും.

ദേശീയ ആരോഗ്യ ദൗത്യം (NHM) മുഖേന നാഷണൽ പ്രോഗ്രാം ഫോർ പ്രിവൻഷൻ ആൻഡ് കൺട്രോൾ ഓഫ് നോൺ-കമ്മ്യൂണിക്കബിൾ ഡിസീസസ് (NCDs) ((NP-NCD) പ്രകാരം ആരോഗ്യ-കുടുംബക്ഷേമ വകുപ്പ്, സാമൂഹിക വിഭാഗങ്ങൾ, പൊതുസമൂഹം, മാധ്യമങ്ങൾ, വികസന പങ്കാളികൾ എന്നിവരെ ഉൾപ്പെടുത്തി ജീവിത ശൈലിയിലെ മാറ്റത്തിലൂടെ ആരോഗ്യം മെച്ചപ്പെടുത്താൻ ലക്ഷ്യമിടുന്നു. തുടർ പരിചരണം ഉറപ്പാക്കുന്നതിന് ആരോഗ്യ സംരക്ഷണ മേഖലയിൽ സ്‌ക്രീനിംഗ്, മുൻകൂട്ടിയുള്ള രോഗനിർണ്ണയം, മാനേജ്മെന്റ്, റഫറൽ, ഫോളോ-അപ്പ് എന്നിവയിലും ശ്രദ്ധ കേന്ദ്രീകരിക്കുന്നു. പ്രതിരോധം, ചികിത്സ, പുനരധിവാസം, അവബോധം (IEC/BCC), നിരീക്ഷണം, ഗവേഷണം എന്നീ മേഖലകളിലെ ആരോഗ്യ പ്രവർത്തകരുടെ ശേഷി വർധിപ്പിക്കാനും ഈ പരിപാടി ഉദ്ദേശിക്കുന്നു. കൂടാതെ, ഒരു ഏകീകൃത ICT സംവിധാനത്തിലൂടെയുള്ള ഫലപ്രദമായ മേൽനോട്ടം, വിലയിരുത്തൽ, രാജ്യവ്യാപകമായ നിർവ്വഹണം എന്നിവ ഉറപ്പാക്കുന്നതിനൊപ്പം അവശ്യ മരുന്നുകൾ, ഉപകരണങ്ങൾ, ലോജിസ്റ്റിക്‌സ് എന്നിവയ്ക്കുള്ള വിതരണ ശൃംഖല മെച്ചപ്പെടുത്തുന്നു.

ഇന്ത്യയിൽ സാംക്രമികേതര രോഗങ്ങൾ മൂലമുള്ള മരണനിരക്ക്

പ്രധാന ഘടകങ്ങൾ

NPCDCS-ന് കീഴിൽ സ്ഥാപിതമായ സൗകര്യങ്ങൾ - 682 NCD ജില്ലാ ക്ലിനിക്കുകൾ, 191 ജില്ലാ കാർഡിയാക് കെയർ യൂണിറ്റുകൾ, 5,408 CHC NCD ക്ലിനിക്കുകൾ.

മുൻകൂട്ടിയുള്ള പരിചരണവും അവബോധവും - ആയുഷ്മാൻ ഭാരത് HWC-കൾ വഴി ശാരീരിക സൗഖ്യത്തിനായുള്ള പ്രവർത്തനങ്ങളും സാമൂഹത്തിലേക്ക് എത്തിച്ചേരാനുള്ള പ്രവർത്തനങ്ങളും  നടപ്പിലാക്കുന്നു.

2. ആയുഷ് മന്ത്രാലയം: പരമ്പരാഗതവും സമഗ്രവുമായ ശാരീരിക സൗഖ്യ രീതികൾ പ്രോത്സാഹിപ്പിക്കുന്നു

ആയുർവേദത്തിലൂടെ പൊണ്ണത്തടി പരിഹരിക്കുന്നതിനും ഭാരം ഫലപ്രദമായി നിയന്ത്രിക്കുന്നതിനും ആയുഷ് മന്ത്രാലയം ഒട്ടേറെ സംരംഭങ്ങൾ നടപ്പിലാക്കിയിട്ടുണ്ട്:

1.പ്രത്യേക ആയുർവേദ പരിചരണം:

ന്യൂഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് ആയുർവേദ (AIIA) പൊണ്ണത്തടിക്കും അനുബന്ധ ജീവിതശൈലി ക്രമരാഹിത്യത്തിനും പ്രത്യേക ചികിത്സ വാഗ്ദാനം ചെയ്യുന്നു. ഈ ചികിത്സകളിൽ പഞ്ചകർമ ചികിത്സ, ആയുർവേദ മരുന്നുകൾ, വ്യക്തിഗത ഭക്ഷണ മാർഗ്ഗനിർദ്ദേശങ്ങൾ, യോഗ തെറാപ്പി എന്നിവ സംയോജിപ്പിച്ചിരിക്കുന്നു. ഇതുവരെ, പ്രമേഹവും ഉപാപചയ വൈകല്യവുമുള്ള ഏകദേശം 45,000 രോഗികൾക്ക് ഈ സേവനങ്ങളിൽ നിന്ന് പ്രയോജനം ലഭിച്ചിട്ടുണ്ട്.

2.ഗവേഷണവും പ്രാമാണീകരണവും:

സെൻട്രൽ കൗൺസിൽ ഫോർ റിസർച്ച് ഇൻ ആയുർവേദ സയൻസസ് (CCRAS) അമിതവണ്ണം ഉൾപ്പെടെയുള്ള ജീവിതശൈലി വൈകല്യങ്ങൾക്കുള്ള ആയുർവേദ ഇടപെടലുകളുടെ സുരക്ഷയും ഫലപ്രാപ്തിയും സാക്ഷ്യപ്പെടുത്തുന്നതിനായി ഗവേഷണം നടത്തുന്നു. ദിനചാര്യ, ഋതുചര്യ, ഭക്ഷണക്രമം, യോഗ തുടങ്ങിയ കാര്യങ്ങളിലെ മാർഗ്ഗനിർദ്ദേശങ്ങൾ സമ്പൂർണ്ണ ആരോഗ്യം നിലനിർത്തുന്നതിലും പൊണ്ണത്തടി പോലുള്ള അവസ്ഥകൾ തടയുന്നതിലും ഫലപ്രദമാണെന്ന് പഠനങ്ങൾ തെളിയിച്ചിട്ടുണ്ട്.

3. ആയുർ സ്വാസ്ഥ്യ യോജന:

2021-22 സാമ്പത്തിക വർഷം മുതൽ പ്രാവർത്തികമായ ഈ കേന്ദ്ര പദ്ധതിയിൽ, സാമൂഹികാരോഗ്യ സംരക്ഷണത്തിൽ ആയുഷ് ഇടപെടലുകൾ പ്രോത്സാഹിപ്പിക്കുന്നതിനുള്ള 'ആയുഷ് ആൻഡ് പബ്ലിക് ഹെൽത്ത്' ഉൾപ്പെടുന്നു. ജീവിതശൈലി വൈകല്യങ്ങളും സാംക്രമികേതര രോഗങ്ങളും (NCDs) കൈകാര്യം ചെയ്യുന്നതിൽ ശ്രദ്ധ കേന്ദ്രീകരിച്ചുള്ള പദ്ധതികളെ ഇത് പിന്തുണയ്ക്കുന്നു. പൊണ്ണത്തടി, പ്രമേഹം, രക്താതി സമ്മർദ്ദം, ഓസ്റ്റിയോപൊറോസിസ് തുടങ്ങിയ പ്രശ്നങ്ങൾ പരിഹരിക്കുന്നതിനുള്ള 11 പദ്ധതികൾ നിലവിലുണ്ട്.

സഹകരണ ഗവേഷണ ഉദ്യമങ്ങൾ :

ആയുർവേദത്തിലെ ശാസ്ത്രീയ ഗവേഷണം മെച്ചപ്പെടുത്തുന്നതിനായി കൗൺസിൽ ഓഫ് സയന്റിഫിക് ആൻഡ് ഇൻഡസ്ട്രിയൽ റിസർച്ചുമായി (CSIR) മന്ത്രാലയം സഹകരണത്തിൽ ഏർപ്പെട്ടിട്ടുണ്ട്. പൊണ്ണത്തടി പോലുള്ള ജീവിതശൈലി വൈകല്യങ്ങൾ പ്രത്യേകമായി കൈകാര്യം ചെയ്യുന്നതുൾപ്പെടെ പരമ്പരാഗത ആയുർവേദ അറിവിനെ ആധുനിക ശാസ്ത്രവുമായി സംയോജിപ്പിക്കുന്നതിലും നടപ്പിലാക്കുന്നതിലും ഈ സഹകരണം ശ്രദ്ധ കേന്ദ്രീകരിക്കുന്നു.
ഇത്തരം സമഗ്രമായ നടപടികളിലൂടെ, ആരോഗ്യത്തിനും ക്ഷേമത്തിനും വേണ്ടിയുള്ള സമഗ്രമായ ഒരു സമീപനം പ്രോത്സാഹിപ്പിച്ചുകൊണ്ട് , പൊണ്ണത്തടി തടയുന്നതിനും കൈകാര്യം ചെയ്യുന്നതിനും ആയുഷ് മന്ത്രാലയം സജീവമായ സംഭാവന നൽകുന്നു.

3. വനിതാ-ശിശു വികസന മന്ത്രാലയം:

പോഷൺ അഭിയാൻ: ബാല്യകാല പൊണ്ണത്തടി തടയൽ

2018 മാർച്ച് 8 ന് ആരംഭിച്ച പോഷൺ അഭിയാൻ, സമഗ്രമായ പോഷക സമ്പുഷ്‌ടീകരണത്തിനുള്ള ഭാരത സർക്കാരിന്റെ മുൻനിര സംരംഭമാണ്. പോഷകാഹാരക്കുറവിനെ ചെറുക്കുന്നതിനും സമഗ്ര ക്ഷേമം പ്രോത്സാഹിപ്പിക്കുന്നതിനുമായി പോഷകാഹാരം, വിതരണം, അവബോധം എന്നിവ മെച്ചപ്പെടുത്തുന്ന സംയോജിത ആവാസവ്യവസ്ഥ വളർത്തിയെടുക്കുന്നതിലൂടെ കുട്ടികൾ, കൗമാരക്കാരായ പെൺകുട്ടികൾ, ഗർഭിണികൾ, മുലയൂട്ടുന്ന അമ്മമാർ എന്നിവർക്കുള്ള  പോഷകാഹാര ലഭ്യത മെച്ചപ്പെടുത്താൻ പദ്ധതി ലക്ഷ്യമിടുന്നു.

പോഷൺ അഭിയാൻ, പോഷൺ 2.0 എന്നിവയുടെ പ്രധാന ഘടകങ്ങൾ

ജനകീയ (ജൻ ആന്ദോളൻ) പ്രസ്ഥാനത്തിന് കീഴിലുള്ള സാങ്കേതികവിദ്യ അധിഷ്ഠിത നിരീക്ഷണം, ബഹുമുഖ സഹകരണം, സാമൂഹിക ഇടപെടൽ എന്നിവയിലൂടെ പോഷകാഹാരക്കുറവ് പരിഹരിക്കുന്നതിനുള്ള ഒരു സമഗ്ര സമീപനമാണ് പോഷൺ അഭിയാൻ സ്വീകരിക്കുന്നത്. പോഷകാഹാരം വീട്ടുമുറ്റത്തെ കൃഷിയിലൂടെ എന്ന ആശയം വിളംബരം ചെയ്യുന്ന പോഷൺ വാടികകൾ (പോഷകാഹാര ഉദ്യാനങ്ങൾ) ഇത് പ്രോത്സാഹിപ്പിക്കുന്നു. മിഷൻ സക്ഷം അംഗൻവാടി & പോഷൺ 2.0 (2021) പ്രകാരം അംഗൻവാടി സേവനങ്ങളും കൗമാരക്കാരുടെ ആരോഗ്യവും ശക്തിപ്പെടുത്തുന്നു. കൂടാതെ ആയുഷ് അധിഷ്ഠിത സൗഖ്യ രീതികൾ ഇത് സംയോജിപ്പിക്കുന്നു. മാതൃ-ശിശു പോഷകാഹാരം, ഭക്ഷണ വൈവിധ്യം, ഭക്ഷ്യ സമ്പുഷ്ടീകരണം എന്നിവയ്ക്ക് ഊന്നൽ നൽകുന്നു. വിളർച്ചയും പോഷകക്കുറവും നേരിടാൻ ചെറുധാന്യങ്ങളുടെ ഉപഭോഗവും പോഷക സമ്പുഷ്ടമായ ഭക്ഷണക്രമവും പ്രോത്സാഹിപ്പിക്കുന്നു.

4. യുവജനകാര്യ-കായിക മന്ത്രാലയം: കായിക ക്ഷമതാ സംസ്‌ക്കാരത്തിന് പ്രോത്സാഹനം നൽകുന്നു.

4.1 ഫിറ്റ് ഇന്ത്യ പ്രസ്ഥാനം: ഒരു ബഹുജന ആരോഗ്യ വിപ്ലവം

2019 ൽ പ്രധാനമന്ത്രി നരേന്ദ്ര മോദി തുടക്കം കുറിച്ച ഫിറ്റ് ഇന്ത്യ പ്രസ്ഥാനം സജീവമായ ജീവിതശൈലി പ്രോത്സാഹിപ്പിക്കുകയും ദിനചര്യകളിൽ ഫിറ്റ്നസ് പ്രധാനഘടകമായി ഉൾപ്പെടുത്താൻ വ്യക്തികളെ പ്രോത്സാഹിപ്പിക്കുകയും ചെയ്യുന്നു.

പ്രധാന ഘടകങ്ങൾ:

ശാരീരിക പ്രവർത്തനങ്ങൾ പാഠ്യപദ്ധതിയിൽ ഉൾപ്പെടുത്തുന്ന സ്കൂളുകൾക്കുള്ള ഫിറ്റ് ഇന്ത്യ സ്കൂൾ സർട്ടിഫിക്കേഷൻ.

നഗരപ്രദേശങ്ങളിൽ സൈക്ലിംഗും നടത്തവും പ്രോത്സാഹിപ്പിക്കുന്ന ഫിറ്റ് ഇന്ത്യ സൺഡേസ് ഓൺ സൈക്കിൾ സംരംഭം

കേന്ദ്ര യുവജനകാര്യ-കായിക മന്ത്രി ഡോ. മൻസുഖ് മാണ്ഡവ്യ 'ഫിറ്റ് ഇന്ത്യ സൈക്ലിംഗ് ഡ്രൈവ്' ഉദ്ഘാടനം ചെയ്തു

സാമൂഹിക നേതൃത്വത്തിലുള്ള ഫിറ്റ്നസ് പ്രോഗ്രാമുകളായ യോഗ സെഷനുകൾ, റണ്ണിംഗ് ക്ലബ്ബുകൾ, ജോലിസ്ഥലത്തെ ഫിറ്റ്നസ് ചലഞ്ചുകൾ.

4.2 ഖേലോ ഇന്ത്യ പരിപാടി: സജീവമായ ഒരു തലമുറയെ സജ്ജമാക്കുന്നു

രാജ്യത്തുടനീളം കായിക മികവിന്റെ സംസ്കാരം വളർത്തിയെടുക്കുന്നതിലൂടെ, സ്കൂളുകൾ മുതൽ വൻകിട മത്സരങ്ങൾ വരെ സമസ്ത തലങ്ങളിലും കായിക പങ്കാളിത്തം പ്രോത്സാഹിപ്പിക്കുന്നതിനായി 2016-17 ൽ കായിക വികസനത്തിനായുള്ള ദേശീയ പരിപാടി-ഖേലോ ഇന്ത്യ - ആരംഭിച്ചു. യുവ കായികതാരങ്ങൾക്ക് മികച്ച പരിശീലനവും ലോകോത്തര അടിസ്ഥാന സൗകര്യങ്ങളും ലഭ്യമാക്കുന്നതിലും, അതത് കായിക ഇനങ്ങളിൽ മികവ് പുലർത്തുന്നതിന് ആവശ്യമായ വിഭവങ്ങൾ ലഭ്യമാകുന്നുണ്ടെന്ന് ഉറപ്പാക്കുന്നതിലും ഇത് ശ്രദ്ധ കേന്ദ്രീകരിക്കുന്നു. ഇന്ത്യയിലെ ഗ്രാമങ്ങളിലും നഗരങ്ങളിലും കായിക മേഖലയിൽ തുല്യ അവസരങ്ങൾ പദ്ധതി ഉറപ്പാക്കുന്നു.

പ്രധാന നേട്ടങ്ങൾ:

5. ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ  (FSSAI): പൊതുജനാരോഗ്യത്തിനായി ഭക്ഷ്യമേഖലയിലെ നിയന്ത്രണം.

5.1 ഈറ്റ് റൈറ്റ് ഇന്ത്യ പ്രസ്ഥാനം (FSSAI): ആരോഗ്യകരമായ ഭാവിക്കായി ഭക്ഷണ രീതികളുടെ പരിഷ്ക്കരണം.

ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) ആരംഭിച്ച ഈറ്റ് റൈറ്റ് ഇന്ത്യ പ്രസ്ഥാനം എല്ലാവർക്കും സുരക്ഷിതവും ആരോഗ്യകരവും സുസ്ഥിരവുമായ ഭക്ഷണം ഉറപ്പാക്കാൻ ലക്ഷ്യമിട്ടുള്ള ഒട്ടേറെ സുപ്രധാന സംരംഭങ്ങൾ ഉൾക്കൊള്ളുന്നു. പ്രാഥമിക സംരംഭങ്ങൾ ചുവടെ ചേർക്കുന്നു:
 
ഈറ്റ് റൈറ്റ് ഇന്ത്യയുടെ പ്രധാന സംരംഭങ്ങൾ

വിതരണാധിഷ്ഠിത സംരംഭങ്ങൾ:

ഭക്ഷ്യ സുരക്ഷാ പരിശീലനവും സർട്ടിഫിക്കേഷനും (FoSTaC):

എല്ലാ ഭക്ഷ്യ സംരംഭങ്ങളിലെയും ഭക്ഷ്യ സുരക്ഷാ സൂപ്പർവൈസർമാരെ സാക്ഷ്യപ്പെടുത്തുന്ന ഭക്ഷ്യ സുരക്ഷാ പരിശീലനവും സർട്ടിഫിക്കേഷൻ (FoSTaC) നൽകുന്നത് FSSAI ആണ്.

സർട്ടിഫിക്കേഷൻ പ്രോഗ്രാമുകൾ:

തട്ടുകടകൾ, ചന്തകൾ, പ്രധാന കേന്ദ്രങ്ങൾ, ആരാധനാലയങ്ങൾ എന്നിവിടങ്ങളിൽ ശുചിത്വം ഉറപ്പാക്കുന്നു.

ശുചിത്വ റേറ്റിംഗ്:

റെസ്റ്റോറന്റുകൾ, കാറ്ററിംഗ് സേവനങ്ങൾ, മധുരപലഹാര കടകൾ, മാംസ വിൽപ്പനക്കാർ എന്നിവരെ ശുചിത്വ മാനദണ്ഡങ്ങൾക്കനുസൃതമായി റേറ്റുചെയ്യുന്നു.

ആവശ്യകതാധിഷ്ഠിത സംരംഭങ്ങൾ:

ഉപഭോക്തൃ അവബോധം: ഈറ്റ് റൈറ്റ് കാമ്പസ് & ഈറ്റ് റൈറ്റ് സ്കൂൾ പ്രോഗ്രാമുകൾ വഴി ഭക്ഷ്യ സുരക്ഷ പ്രോത്സാഹിപ്പിക്കുന്നു.

മായം ചേർക്കൽ കണ്ടെത്തുന്നു: വീട്ടിലും സ്കൂളിലും ഭക്ഷണ പരിശോധനയ്ക്കായി DART പുസ്തകവും മാജിക് ബോക്സും നൽകുന്നു.

ഭക്ഷ്യസുരക്ഷാ DART പുസ്തകം -

ഭക്ഷണത്തിൽ മായം ചേർക്കുന്നത് കണ്ടെത്തുന്നതിന് ലളിതമായ പരിഹാരങ്ങൾ അടങ്ങിയ 50-ലധികം ഗാർഹിക പരിശോധനകൾക്കുള്ള ഡിറ്റക്റ്റ് അഡൽട്ടറേഷൻ വിത്ത് റാപ്പിഡ് ടെസ്റ്റ് (DART) എന്ന ലഘുലേഖ നൽകുന്നു. പൊതുജന അവബോധത്തിനായി സൗജന്യമായി ഡൗൺലോഡ് ചെയ്യാവുന്നതാണ്. ഇത് വാണിജ്യ ആവശ്യങ്ങൾക്കായി ഉപയോഗിക്കാൻ പാടില്ല. FSSAI അംഗീകാരം സൂചിപ്പിക്കുന്നുമില്ല.

ഭക്ഷ്യസുരക്ഷാ മാജിക് ബോക്സ് -

സ്കൂളുകൾക്കും അധ്യാപകർക്കും രക്ഷിതാക്കൾക്കും വേണ്ടിയുള്ള ഒരു പഠന ഉപകരണമാണ് FSSAI-യുടെ ഫുഡ് സേഫ്റ്റി മാജിക് ബോക്സ്-കംപാനിയൻ പുസ്തകം. ഭക്ഷണത്തിൽ മായം ചേർക്കുന്ന വസ്തുക്കൾ കണ്ടെത്തുന്നതിനുള്ള 102 ലളിതമായ പരിശോധനകളും ഒരു കംപാനിയൻ ഗൈഡ്ബുക്കും ഇതിൽ ഉൾപ്പെടുന്നു.

ഭക്ഷ്യ സുരക്ഷ-മാജിക് ബോക്സ്                    ഭക്ഷ്യ സുരക്ഷ - ഡാർട്ട് ബുക്ക്

മൊബൈൽ പരിശോധന: വിദൂര പ്രദേശങ്ങളിലെ പരിശോധനയ്ക്കും പരിശീലനത്തിനുമായി വാഹനങ്ങളിലെ ഭക്ഷ്യ സുരക്ഷ വിന്യാസം.

ഭക്ഷ്യ സമ്പുഷ്‌ടീകരണം:സൂക്ഷ്മ പോഷക പരിമിതി പരിഹരിക്കുന്നതിന് ഫോർട്ടിഫൈഡ് സ്റ്റേപ്പിളുകൾ പ്രോത്സാഹിപ്പിക്കുന്നു.

പൊണ്ണത്തടി, ജീവിതശൈലീ രോഗങ്ങൾ എന്നിവയെ ചെറുക്കുന്നതിനും പൊതുജനങ്ങളുടെ ഭക്ഷണ തിരഞ്ഞെടുപ്പിലും ഭക്ഷ്യ സുരക്ഷാ മാനദണ്ഡങ്ങൾ നിയന്ത്രിക്കുന്നതിലും ഫുഡ് സേഫ്റ്റി & സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) നിർണായക പങ്ക് വഹിക്കുന്നു.

5.2 ദേശവ്യാപകമായ ബോധവത്ക്കരണ പരിപാടികൾ- 'ആജ് സേ തോഡ കാം'

ആരോഗ്യകരമായ ഭക്ഷണശീലങ്ങൾ പ്രോത്സാഹിപ്പിക്കുന്നതിനായി, കൊഴുപ്പ്, പഞ്ചസാര, ഉപ്പ് എന്നിവയുടെ അളവ് ക്രമേണ കുറയ്ക്കാൻ ജനങ്ങളെ പ്രേരിപ്പിക്കുന്ന 'ആജ് സേ തോഡ കാം' കാമ്പെയ്‌ൻ FSSAI ആരംഭിച്ചു. ഈ മൾട്ടിമീഡിയ കാമ്പെയ്‌നിൽ ഇനിപ്പറയുന്നവ ഉൾപ്പെടുന്നു:

വൈവിധ്യമാർന്ന പ്രേക്ഷകരിലേക്ക് എത്തുന്നതിന് 12 ഭാഷകളിൽ സബ്‌ടൈറ്റിലുകളുള്ള ഹ്രസ്വ വിദ്യാഭ്യാസ വീഡിയോകൾ.

കരുതലോടെ ഭക്ഷണം കഴിക്കുകയെന്ന സന്ദേശം ശക്തിപ്പെടുത്തുന്ന ഫ്ലയറുകൾ, ബാനറുകൾ, ഓഡിയോ ക്ലിപ്പുകൾ.

ഭക്ഷണക്രമത്തിലെ മാറ്റങ്ങൾ വരുത്തുന്നതിന് വിജ്ഞാനപ്രദവും വിലപ്പെട്ടതുമായ വിവരങ്ങൾ വാഗ്ദാനം ചെയ്യുന്ന ഒരു സമർപ്പിത 'ഈറ്റ് റൈറ്റ് ഇന്ത്യ' വെബ്‌സൈറ്റ്.

5.3 ഉയർന്ന കൊഴുപ്പ്, ഉപ്പ്, പഞ്ചസാര (HFSS) എന്നിവ അടങ്ങിയ ഭക്ഷണങ്ങളുടെ നിയന്ത്രണം

ICMR-നാഷണൽ ഇൻസ്റ്റിറ്റ്യൂട്ട് ഓഫ് ന്യൂട്രീഷൻ (NIN) നുമായി സഹകരിച്ച്, ഉയർന്ന കൊഴുപ്പ്, ഉപ്പ്, പഞ്ചസാര (HFSS) എന്നിവ അടങ്ങിയ ഭക്ഷണങ്ങളിൽ നിർബന്ധിത മുന്നറിയിപ്പ് ശുപാർശ ചെയ്തിട്ടുണ്ട്.

ഈ സംരംഭത്തിന്റെ ലക്ഷ്യങ്ങൾ :

a. റെഡി-ടു-ഈറ്റ് ഭക്ഷണങ്ങളിൽ വ്യക്തമായ ഫ്രണ്ട്-ഓഫ്-പാക്ക് ലേബലിംഗ് ഉറപ്പാക്കുക.

b.അവബോധപൂർണ്ണമായ തിരഞ്ഞെടുപ്പുകൾ നടത്താനും അനാരോഗ്യകരമായ ഭക്ഷണങ്ങളുടെ ഉപഭോഗം മിതമാക്കാനും ഉപഭോക്താക്കളെ സഹായിക്കുക.

5.4 മൾട്ടി-പ്ലാറ്റ്‌ഫോം പൊതുജന അവബോധ സംരംഭങ്ങൾ

FSSAI യുടെ നേതൃത്വത്തിൽ സർക്കാർ, ഇനിപ്പറയുന്നവയിലൂടെ അവബോധം പ്രചരിപ്പിക്കുന്നു:

a.  ആരോഗ്യകരമായ ഭക്ഷണ തിരഞ്ഞെടുപ്പുകളെക്കുറിച്ച് പൊതുജനങ്ങളെ ബോധവത്ക്കരിക്കുന്ന പ്രിന്റ്, ഇലക്ട്രോണിക്, സാമൂഹ്യ മാധ്യമ പ്രചാരണങ്ങൾ.

b. അമിതവണ്ണം തടയുന്നതിനും ആരോഗ്യപൂർണ്ണമായ ജീവിതത്തിനും വേണ്ടിയുള്ള സംസ്ഥാനതല അവബോധ പ്രവർത്തനങ്ങളെ പിന്തുണയ്ക്കുന്ന കാൻസർ, പ്രമേഹം, ഹൃദയ സംബന്ധമായ രോഗങ്ങൾ, മസ്തിഷ്ക്കാഘാതം എന്നിവയുടെ പ്രതിരോധത്തിനും നിയന്ത്രണത്തിനുമുള്ള ദേശീയ പരിപാടിയുമായി (NPCDCS) സംയോജനം.

5.5 RUCO സംരംഭം

FSSAI യുടെ RUCO (ഉപയോഗിച്ച പാചക എണ്ണ) സംരംഭം, ഉപയോഗിച്ച പാചക എണ്ണ ഭക്ഷ്യ ശൃംഖലയിൽ വീണ്ടും ചേർക്കുന്നില്ല എന്നും അവ സുരക്ഷിതമാക്കി മറ്റാവശ്യങ്ങൾക്കായി പുനരുപയോഗിക്കുന്നു എന്നും ഉറപ്പാക്കുന്നു. വറുക്കാനുപയോഗിക്കുന്ന എണ്ണ ആവർത്തിച്ച് ഉപയോഗിക്കുമ്പോൾ, ദോഷകരമായ ടോട്ടൽ പോളാർ സംയുക്തങ്ങൾ (TPC) രൂപം കൊള്ളുന്നു. ഇത് രക്താതിസമ്മർദ്ദം, രക്തപ്രവാഹത്തിന് വിഘാതം, കരൾ രോഗങ്ങൾ തുടങ്ങിയവയ്ക്കുള്ള സാധ്യത വർദ്ധിപ്പിക്കുന്നു.

പൊതുജനാരോഗ്യം സംരക്ഷിക്കുന്നതിനായി, FSSAI 25% TPC പരിധി നിശ്ചയിച്ചിട്ടുണ്ട്. ഈ പരിധിക്കപ്പുറം എണ്ണ ഉപയോഗിക്കാൻ പാടില്ല. EEE തന്ത്രം (എജ്യുകേഷൻ, എൻഫോഴ്‌സ്‌മെന്റ്, ഇക്കോസിസ്റ്റം) പ്രകാരം, ഉപയോഗിച്ച പാചക എണ്ണ ഭക്ഷ്യ ബിസിനസുകളിൽ നിന്ന് അഗ്രഗേറ്റർമാർ മുഖേന ശേഖരിക്കുകയും ബയോഡീസൽ അല്ലെങ്കിൽ സോപ്പ് ഉത്പാദനത്തിനായി  തിരിച്ചുവിടുകയും ആരോഗ്യം, ഊർജ്ജ സുരക്ഷ, പരിസ്ഥിതി സുസ്ഥിരത എന്നിവ പ്രോത്സാഹിപ്പിക്കുകയും ചെയ്യുന്നു.

ഉപസംഹാരം

ഇന്ത്യയിൽ പൊണ്ണത്തടി ഒരു അടിയന്തര പൊതുജനാരോഗ്യ വെല്ലുവിളിയാണ്. എന്നാൽ സമഗ്രവും ബഹുമുഖവുമായ ഒരു സമീപനത്തിലൂടെ രാഷ്ട്രം അതിനെ സജീവമായി അഭിസംബോധന ചെയ്യുന്നു. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ, ഭാരതസർക്കാർ ആരോഗ്യം, പോഷകാഹാരം, ഫിറ്റ്നസ്, നിയന്ത്രണം എന്നിവ സംയോജിപ്പിക്കുന്ന തന്ത്രപരമായ ഇടപെടലുകൾ ആരംഭിച്ചു. ഫിറ്റ് ഇന്ത്യ മൂവ്‌മെന്റ്, എൻ‌പി-എൻ‌സി‌ഡി, പോഷൺ അഭിയാൻ, ഈറ്റ് റൈറ്റ് ഇന്ത്യ, ഖേലോ ഇന്ത്യ തുടങ്ങിയ സംരംഭങ്ങൾ ആരോഗ്യ അവബോധം, മുൻകൂട്ടിയുള്ള പരിചരണം, സജീവമായ ജീവിത ശൈലി  എന്നിവയുടെ ഒരു സംസ്ക്കാരം വളർത്തിയെടുക്കുന്നു. ഇന്ത്യ അമൃത കാലത്തിലേക്ക് മുന്നേറുമ്പോൾ, ആരോഗ്യ പൂർണ്ണവും ആരോഗ്യദായകവുമായ ഇന്ത്യ എന്ന ദർശനം യാഥാർത്ഥ്യമാവുകയാണ്. സുസ്ഥിരമായ പ്രതിബദ്ധത, വിവിധ മേഖലകളിലെ സഹകരണം, സജീവമായ പൗര പങ്കാളിത്തം എന്നിവയിലൂടെ, പൊണ്ണത്തടിയുമായി ബന്ധപ്പെട്ട പ്രവണതകൾ ഇല്ലാതാക്കുന്നതിനും ഭാവി തലമുറകളെ സംരക്ഷിക്കുന്നതിനും രാജ്യം സജ്ജമാണ്. അവബോധം, ജീവിതശൈലീ പരിവർത്തനം, നയാധിഷ്ഠിത പ്രവർത്തനങ്ങൾ എന്നിവയ്ക്ക് മുൻഗണന നൽകുന്നതിലൂടെ, പൊണ്ണത്തടി നേരിടുന്നതിൽ ഇന്ത്യയ്ക്ക് ആഗോള മാതൃക സൃഷ്ടിക്കാൻ കഴിയും. ഒപ്പം സൗഖ്യം, ചൈതന്യം, സമഗ്ര ക്ഷേമം എന്നിവയാൽ അഭിവൃദ്ധി പ്രാപിക്കുന്ന ഒരു രാഷ്ട്രം കെട്ടിപ്പടുക്കാനുമാകും.

References

· https://pib.gov.in/PressReleseDetailm.aspx?PRID=2105618&reg=3&lang=1

· https://www.who.int/health-topics/obesity#tab=tab_1

· https://www.who.int/europe/news-room/fact-sheets/item/a-healthy-lifestyle---who-recommendations#:~:text=Note.,osteoarthritis%2C%20some%20cancers%20and%20diabetes.

· https://pib.gov.in/PressReleaseIframePage.aspx?PRID=1823047

· https://sansad.in/getFile/loksabhaquestions/annex/1712/AU3780.pdf?source=pqals - LOK SABHA UNSTARRED QUESTION NO. 3780

· https://ncdc.mohfw.gov.in/wp-content/uploads/2024/11/Obesity-English.pdf

· https://mohfw.gov.in/sites/default/files/NP-NCD%20Operational%20Guidelines_0.pdf

· https://pib.gov.in/PressReleasePage.aspx?PRID=1812388

· https://sansad.in/getFile/annex/267/AU168_aJuwFy.pdf?source=pqars - RAJYA SABHA UNSTARRED QUESTION NO. 168

· https://x.com/moayush/status/1771778688310210809/photo/1

· https://www.mygov.in/campaigns/poshan-abhiyaan-2024/

· https://x.com/PIBWCD/status/1702599507563946219

· https://pib.gov.in/PressReleasePage.aspx?PRID=1910409

· https://fitindia.gov.in/

· https://fitindia.gov.in/fit-india-school-registration

· https://pib.gov.in/PressReleasePage.aspx?PRID=2105644

· https://pib.gov.in/PressReleaseIframePage.aspx?PRID=2085581

· https://pib.gov.in/PressReleasePage.aspx?PRID=2078544

· https://x.com/kheloindia/header_photo

· https://pib.gov.in/PressReleasePage.aspx?PRID=1740750

· https://eatrightindia.gov.in/eri-initiatives.jsp

· https://foodsafetystandard.in/eat-right-india/

· https://eatrightindia.gov.in/eri-initiatives.jsp

· https://foodsafetystandard.in/eat-right-india/

· https://www.fssai.gov.in/book-details.php?bkid=363

· https://www.fssai.gov.in/book-details.php?bkid=346

· https://eatrightindia.gov.in/eatrightschool/assets/resource/file/fs_magicbox.pdf

· https://eatrightindia.gov.in/EatRightIndia/images/gallery/books/aaj_se_thoda_kam.jpg

· https://westregion.fssai.gov.in/RUCO.php

· https://eatrightindia.gov.in/ruco/

Click here to download PDF

******