Ha ka jingbteng ia ki jingiakren ba la sdang da u Myntri Rangbah Duh, Narendra Modi ha ka episode kaba nyngkong jong ka Pariksha Pe Charcha 2025, ka episode kaba hynniew ka la mih mynta ka sngi ha kaba la wan iashim bynta ki nongialehkai ba pawnam kum ka M C Mary Kom, Avani Lekhara, bad Suhas Yathiraj. Ki la kren shaphang ka jingbuh ia ki thong, ka jingskhem jingmut bad ka jingpynduna ia ka jingkhuslai. Ki la iathuh ruh shaphang ki jingshem jong ki ha ka jingim jong ki bad kiei kiei kiba ki la sngewthuh na ka jingialehkai ha ka jingim jong ki.

Ka Mary Kom ka la batai kumno ka la pynkylla ia ka jingsngew ba ka jingialehkai boxing kam dei ka jingialehkai na ka bynta ki kynthei, bad ka la ialeh pyrshah ia ki jingsngew ha ka imlang sahlang ym tang ialade, hynrei ia ki kynthei ha kylleng ka ri. Da kaba kdew sha ka jingai jingmut u Myntri Rangbah Duh kumno ban long ka nongrim lajong kaba khlain, ka la kren shaphang ki arphew snem ka jingiaid lynti kum ka khun kynthei, ka tnga bad ka kmie. Ka la ban jur ruh halor ka jingkongsan jong ka jingtrei shitom, da kaba ong ba ka jingskhem jingmut bad ka jingiaishah ki dei kiba wanrah ia ka jingjop.

U Suhas Yathiraj u la pynshlur ia ki khynnah pule ba kin pyndonkam ia ka bor jong ka jingpyrkhat ban jop ia ki jingsngew kum ka jingtieng, bad u la ong ba kane ka dei ka jingwit hakhmat jong ka jingjop. U la ong ba ka dei tang ka jingjop ia ka jingtieng kaba plie lad ia ki briew ba kin lah ban trei bha ia ki kam. “Ban phyrnai kum ka sngi, u briew u dei ban kloi ban khluit kum ka sngi,” u la ong da kaba kyntu ia ki khynnah pule ba kin pdiang ia ki jingeh da ka jingskhem jingmut. U la kren ruh shaphang ka jingpyntngen ka put ka tem ka ban wanrah ia ka bor kaba bha bad u la kren shaphang ka jingkongsan jong ka jingpyrkhat jingpuson, namar ki jingpyrkhat ki tei ia ka lawei jong ki briew.

Ka Avani Lekhara ka la ban jur halor ka jingkongsan jong ka jingpyntbit ialade, da kaba ong ba ka jingioh ia ki sap ka wanrah ia ka jingsngewshngain halade bad ka pynduna ia ka jingtieng. Da kaba pyniahap bad ka kam ialehkai, ka la ban jur halor ka jingkongsan jong ka jingshongthait haba khreh kot, bad ka la ong ba ki khynnah pule ki dei ban ioh ia ka thiah ka dem kaba biang lada ki kwah ban leh bha. Ka la pyni ruh ia ki khynnah pule kumno ban kyntiew ia ka jingsngewshngain halade.

Ha kane ka bynta, ki khynnah pule ki la buh ki jingkylli halor ki phang bapher bapher kum ka jingpynmynjur ia ki kmie ki kpa shaphang ki kam ba ki kwah ban trei, ka jingioh ia ka jingshlur ban ialeh pyrshah ia ki jingeh, bad ka jinglah ban pynleit jingmut. Ki khynnah pule na Dubai bad Qatar ruh ki la iashim bynta ha kaba ki la ai ia ki jingkylli jong ki.

Ban pynthikna ka jingkiew shaphrang kaba pura, ki riew pawkhmat na ki kam bapher bapher – ba kynthup ka kam ialehkai, ki briew kiba la pyntbit ha ka teknoloji, ki briew kiba la wan hakhmat duh ha ki eksamin, ki briew kiba trei ha ka kam pynbyrnia, ki nongialam ha ka jingngeit – ki dang ai jingmut ia ki khynnah pule. Ha ka jingpyllait sa lai tylli ki episode, man ka bynta ka bteng ban ai ia ki khynnah pule ki atiar ba ki donkam khnang ba kin leh bha ha ki jingpule bad ha ka jingim. Hadien ka prokram, ki khynnah pule ki la batai shaphang ki jingshem jong ki na kane ka bynta.

Ka bynta kaba phra jong ka Pariksha Pe Charcha (PPC) 2025, ha ka rukom pynlong kaba la saindur thymmai ka dei kaba la ioh jingiaroh na ki khynnah pule, ki nonghikai, ki kmie ki kpa na kylleng ka ri. Da kaba phai noh na ka rukom pynlong ha ka rukom jong ka Town Hall, ka bynta mynta u snem ka la sdang da ka jingiakren bad u Myntri Rangbah Duh, Narendra Modi ha ka Sunder Nursery, New Delhi, ha ka 10 tarik u Rymphang 2025.

Ha ka episode kaba nyngkong, u Myntri Rangbah Duh u la iakren bad 36 ngut ki khynnah pule na kylleng ka ri ha kaba ki la iakren shaphang ka bam kaba tei met bad ka koit ka khiah, ka jingialeh pyrshah ia ka jingban khia, ka jingbuh thong halade, ka jinglong nongialam, ki kam kiba lait na ki jingpule, ka jingkiew shaphrang kaba pura, ka jingioh ia ki nuksa kiba bha bad kiwei kiwei. Ka jingialam lynti jong u ka la ai ia ki khynnah pule ki lad ban ialeh pyrshah ia ki jingeh ha ka jingpule da ka jingskhem jingmut bad ka wanrah ia ka rukom pyrkhat kaba niewkor ia ka jingkiew shaphrang bad ka jingioh jinghikai kaba pura.

Katba ka Pariksha Pe Charcha 2025 ka dang bteng, ka long kum ka jingai mynsiem ia ki khynnah pule, da kaba pynkup bor ia ki da ka jingsngewshngain halade bad ka jingskhem jingmut ban ialeh pyrshah ia ki jingeh ha ka pule puthi bad ka jingim da ka rukom pyrkhat kaba bha.

Link ban peit ia ka episode 1: https://www.youtube.com/watch?v=G5UhdwmEEls

Link ban peit ia ka episode 2: https://www.youtube.com/watch?v=DrW4c_ttmew

Link ban peit ia ka episode 3: https://www.youtube.com/watch?v=wgMzmDYShXw

Link ban peit ia ka episode 4: https://www.youtube.com/watch?v=3CfR4-5v5mk

Link ban peit ia ka episode 5: https://www.youtube.com/watch?v=3GD_SrxsAx8

Link ban peit ia ka episode 6: https://www.youtube.com/watch?v=uhI6UbZJgEQ

Link ban peit ia ka episode 7: https://www.youtube.com/watch?v=y9Zg7B_o8So

*****