ധനകാര്യ മന്ത്രാലയം
2024-25 ലെ സാമ്പത്തിക സർവേയുടെ സംഗ്രഹം
Posted On:
31 JAN 2025 2:23PM by PIB Thiruvananthpuram
2026 സാമ്പത്തിക വർഷത്തിൽ ഇന്ത്യയുടെ ജിഡിപി 6.3 നും 6.8 നും ഇടയിൽ വളർച്ച പ്രതീക്ഷിക്കുന്നു
2025 സാമ്പത്തിക വർഷത്തിൽ യഥാർത്ഥ ജിഡിപി 6.4 ശതമാനമായും അത് ദശാബ്ദ ശരാശരിയോട് അടുത്തതായും കണക്കാക്കപ്പെടുന്നു
2025 സാമ്പത്തിക വർഷത്തിൽ യഥാർത്ഥ ജിവിഎ 6.4 ശതമാനം വളർച്ച പ്രാപിക്കുമെന്നും കണക്കാക്കപ്പെടുന്നു
2024 ജൂലൈ - നവംബർ മാസങ്ങളിൽ മൂലധന ചെലവിലെ വളർച്ച 8.2 ശതമാനമായി വർദ്ധിച്ചു; അത് കൂടുതൽ വേഗതയിൽ ഉയരുമെന്ന് പ്രതീക്ഷിക്കുന്നു
2024 ഏപ്രിൽ - ഡിസംബർ മാസങ്ങളിൽ റീട്ടെയിൽ മുഖ്യ പണപ്പെരുപ്പം 4.9 ശതമാനമായി കുറഞ്ഞു
ഇന്ത്യയുടെ ഉപഭോക്തൃ വിലക്കയറ്റം ഏകദേശം 4 ശതമാനം എന്ന 2026 സാമ്പത്തിക വർഷത്തിലെ ലക്ഷ്യവുമായി പൊരുത്തപ്പെടും
മൊത്തത്തിലുള്ള കയറ്റുമതി 2024 ഏപ്രിൽ-ഡിസംബർ കാലയളവിൽ 6.0 ശതമാനം (YOY) വളർച്ച കൈവരിച്ചു
ഇന്ത്യയുടെ സേവന കയറ്റുമതി വളർച്ച 2024 സാമ്പത്തിക വർഷത്തിലെ 5.7 ശതമാനത്തിൽ നിന്ന് 2025 സാമ്പത്തിക വർഷത്തിലെ ഏപ്രിൽ-നവംബർ കാലയളവിൽ 12.8 ശതമാനമായി കുതിച്ചുയർന്നു
മൊത്ത വിദേശ നിക്ഷേപം 2024 സാമ്പത്തിക വർഷത്തിലെ ആദ്യ എട്ട് മാസങ്ങളിൽ 47.2 ബില്യൺ ഡോളറിൽ നിന്ന് 2025 സാമ്പത്തിക വർഷത്തിലെ അതേ കാലയളവിൽ 55.6 ബില്യൺ ഡോളറായി വർദ്ധിച്ചു, 17.9 ശതമാനം വാർഷിക വളർച്ച
2024 ഡിസംബർ അവസാനത്തോടെയുള്ള 640.3 ബില്യൺ ഡോളർ വിദേശ വിനിമയം, 10.9 മാസത്തെ ഇറക്കുമതിയും ഏകദേശം 90 ശതമാനം ബാഹ്യ കടവും ഉൾക്കൊള്ളാൻ പര്യാപ്തമാണ്
സൗരോർജ്ജത്തിലേയും കാറ്റിൽനിന്നുള്ള ഊർജ്ജത്തിലെയും ശേഷി വർദ്ധനവ് 2024 ഡിസംബറിൽ വാർഷികാടിസ്ഥാനത്തിൽ 15.8 ശതമാനം വർധന രേഖപ്പെടുത്തി
2024 ഡിസംബർ അവസാനത്തോടെ ജിഡിപി അനുപാതത്തിലേക്കുള്ള ബിഎസ്ഇ സ്റ്റോക്ക് മാർക്കറ്റ് മൂലധനം 136 ശതമാനമായി, അത് ചൈനയേക്കാളും (65 ശതമാനം), ബ്രസീലിനേക്കാളും (37 ശതമാനം) വളരെ കൂടുതലാണ്
സാമ്പത്തിക വളർച്ച ത്വരിതപ്പെടുത്തുന്നതിനും നിലനിർത്തുന്നതിനും നിയന്ത്രണങ്ങൾ ഒഴിവാക്കുന്നതിനെ സാമ്പത്തിക സർവേ പ്രോത്സാഹിപ്പിക്കുന്നു
അടുത്ത രണ്ട് ദശകങ്ങളിൽ ഉയർന്ന വളർച്ച നിലനിർത്താൻ ആവശ്യമായ രീതിയിലുള്ള അടിസ്ഥാന സൗകര്യ നിക്ഷേപത്തിന്റെ പടിപടിയായ വർദ്ധന
എംഎസ്എംഇകൾക്ക് ഇക്വിറ്റി ഫണ്ടിംഗ് നൽകുന്നതിനായി ₹50,000 കോടിയുടെ സ്വാശ്രയ ഇന്ത്യ ഫണ്ട് ആവിഷ്കരിച്ചു
2025 സാമ്പത്തിക വർഷത്തിൽ കാർഷിക മേഖല 3.8 ശതമാനം വളർച്ച നേടുമെന്ന് പ്രതീക്ഷിക്കുന്നു
2024 ലെ ഖാരിഫ് ഭക്ഷ്യധാന്യ ഉൽ‌പാദനം 1647.05 ലക്ഷം മെട്രിക് ടണ്ണിലെത്തുമെന്ന് പ്രതീക്ഷിക്കുന്നു, ഇത് മുൻ വർഷത്തേക്കാൾ 89.37 ലക്ഷം മെട്രിക് ടണ്ണിന്റെ വർദ്ധനവാണ്
ഹോർട്ടികൾച്ചർ, കന്നുകാലി, മത്സ്യബന്ധന മേഖലകളാണ് കാർഷിക വളർച്ചയുടെ പ്രധാന നായകർ
2025 സാമ്പത്തിക വർഷത്തിൽ വ്യാവസായിക മേഖല 6.2 ശതമാനം വളർച്ച പ്രാപിക്കുമെന്ന് കണക്കാക്കപ്പെടുന്നു
സാമൂഹിക സേവന ചെലവ് 2021 സാമ്പത്തിക വർഷത്തിനും 2025 സാമ്പത്തിക വർഷത്തിനും ഇടയിൽ 15 ശതമാനം വാർഷിക വളർച്ചാ നിരക്ക് രേഖപ്പെടുത്തുന്നു
ആരോഗ്യമേഖലയിലെ ഗവണ്മെന്റിന്റെ ചെലവ് 29.0 ശതമാനത്തിൽ നിന്ന് 48.0 ശതമാനമായി വർദ്ധിച്ചു; 2015 സാമ്പത്തിക വർഷത്തിനും 2022 സാമ്പത്തിക വർഷത്തിനും ഇടയിൽ മൊത്തം ആരോഗ്യ ചെലവിൽ വ്യക്തികളുടെ നേരിട്ടുള്ള ചെലവിന്റെ വിഹിതം 62.6 ശതമാനത്തിൽ നിന്ന് 39.4 ശതമാനമായി കുറഞ്ഞു
തൊഴിലില്ലായ്മ നിരക്ക് 2017-18 (ജൂലൈ-ജൂൺ) ലെ 6.0 ശതമാനത്തിൽ നിന്ന് 2023-24 (ജൂലൈ-ജൂൺ) ൽ 3.2 ശതമാനമായി കുറഞ്ഞു
എഐ സാമൂഹിക പ്രത്യാഘാതങ്ങൾ കുറയ്ക്കുന്നതിന് ഗവൺമെന്റ്, സ്വകാര്യ, അക്കാദമിക് മേഖലകൾ തമ്മിലുള്ള സഹകരണപരമായ ശ്രമം അത്യാവശ്യമാണ്
"2023-ൽ ആഗോള സമ്പദ്‌വ്യവസ്ഥ 3.3 ശതമാനം വളർച്ച കൈവരിച്ചു. അടുത്ത അഞ്ച് വർഷത്തേക്ക് ആഗോള വളർച്ച ശരാശരി 3.2 ശതമാനമായിരിക്കുമെന്നും മുൻകാല മാനദണ്ഡങ്ങൾ വെച്ചുനോക്കുമ്പോൾ ഇത് വളരെ കുറവാണെന്നും അന്താരാഷ്ട്ര നാണയ നിധി (IMF) പ്രവചിക്കുന്ന"തായി കേന്ദ്ര ധനകാര്യ, കോർപ്പറേറ്റ് കാര്യ മന്ത്രി ശ്രീമതി നിർമ്മല സീതാരാമൻ ഇന്ന് പാർലമെന്റിൽ സമർപ്പിച്ച 2024-25 ലെ സാമ്പത്തിക സർവേയിൽ പറയുന്നു.
2024-ൽ ആഗോള സമ്പദ്‌വ്യവസ്ഥ വിവിധ മേഖലകളിൽ സ്ഥിരവും എന്നാൽ അസന്തുലിതവുമായ വളർച്ച പ്രകടമാക്കിയതായി സാമ്പത്തിക സർവേയിൽ പറയുന്നു. വിതരണ ശൃംഖലയിലെ തടസ്സങ്ങളും ദുർബലമായ ബാഹ്യ ആവശ്യങ്ങളും കാരണം ആഗോള ഉൽപ്പാദനത്തിൽ, പ്രത്യേകിച്ച് യൂറോപ്പിലും ഏഷ്യയുടെ ചില ഭാഗങ്ങളിലും, മാന്ദ്യം ഉണ്ടായതാണ് ശ്രദ്ധേയമായ ഒരു പ്രവണത. ഇതിനു വിപരീതമായി, സേവന മേഖല മികച്ച പ്രകടനം കാഴ്ചവെയ്ക്കുകയും ഇത് പല സമ്പദ്‌വ്യവസ്ഥകളിലും വളർച്ചയെ പിന്തുണയ്ക്കുകയും ചെയ്തു. മിക്ക സമ്പദ്‌വ്യവസ്ഥകളിലും പണപ്പെരുപ്പ സമ്മർദ്ദങ്ങൾ കുറഞ്ഞു. എന്നിരുന്നാലും സേവന പണപ്പെരുപ്പം സ്ഥിരമായി തുടരുന്നുവെന്ന് സർവേ സൂചിപ്പിക്കുന്നു.
ആഗോള അനിശ്ചിതത്വം ഉണ്ടായിരുന്നിട്ടും ഇന്ത്യ സ്ഥിരമായ സാമ്പത്തിക വളർച്ച പ്രകടമാക്കിയെന്ന് സർവേ എടുത്തുകാണിക്കുന്നു. 2025 സാമ്പത്തിക വർഷത്തിൽ ഇന്ത്യയുടെ യഥാർത്ഥ ജിഡിപി വളർച്ച‌യായ 6.4 ശതമാനം എന്നത് ദശാബ്ദ ശരാശരിയോട് അടുത്തു നിൽക്കുന്നു.
മൊത്തത്തിലുള്ള ചോദന വീക്ഷത്തിൽ സ്ഥിര വിലയിലുള്ള സ്വകാര്യ അന്തിമ ഉപഭോഗ ചെലവ് 7.3 ശതമാനം വളർച്ച കൈവരിക്കുമെന്ന് കണക്കാക്കപ്പെടുന്നു. ഇത് ഗ്രാമീണ ചോദനത്തിലെ തിരിച്ചുവരവിന് കാരണമാകുന്നു.
വിതരണ രംഗത്ത്, യഥാർത്ഥ മൊത്ത മൂല്യവർദ്ധനവ് (GVA) 6.4 ശതമാനം വളർച്ച കൈവരിക്കുമെന്ന് കണക്കാക്കപ്പെടുന്നു. 2025 സാമ്പത്തിക വർഷത്തിൽ കാർഷിക മേഖല 3.8 ശതമാനം വളർച്ച കൈവരിക്കുമെന്ന് പ്രതീക്ഷിക്കുന്നു. 2025 സാമ്പത്തിക വർഷത്തിൽ വ്യാവസായിക മേഖല 6.2 ശതമാനം വളർച്ച കൈവരിക്കുമെന്ന് കണക്കാക്കപ്പെടുന്നു. നിർമ്മാണ പ്രവർത്തനങ്ങളിലും വൈദ്യുതി, ഗ്യാസ്, ജലവിതരണം, മറ്റ് യൂട്ടിലിറ്റി സേവനങ്ങൾ എന്നിവയിലെ‌യും ശക്തമായ വളർച്ചാ നിരക്കുകൾ വ്യാവസായിക വികസനത്തെ സഹായിക്കുമെന്ന് പ്രതീക്ഷിക്കുന്നു. സാമ്പത്തിക, റിയൽ എസ്റ്റേറ്റ്, പ്രൊഫഷണൽ സേവനങ്ങൾ, പൊതുഭരണം, പ്രതിരോധം, മറ്റ് സേവനങ്ങൾ എന്നിവയിലെ ആരോഗ്യകരമായ പ്രവർത്തനങ്ങളാൽ സേവന മേഖലയിലെ വളർച്ച 7.2 ശതമാനത്തോടെ ശക്തമായി തുടരുമെന്ന് പ്രതീക്ഷിക്കുന്നു.
വളർച്ചയുടെ ഏറ്റക്കുറച്ചിലുകൾ കണക്കിലെടുത്ത്, 2026 സാമ്പത്തിക വർഷത്തിലെ യഥാർത്ഥ ജിഡിപി വളർച്ച 6.3 ശതമാനത്തിനും 6.8 ശതമാനത്തിനും ഇടയിലായിരിക്കുമെന്ന് സർവേ പ്രതീക്ഷിക്കുന്നു.
സാമ്പത്തിക നയങ്ങളെയും വ്യാപാര നയ അനിശ്ചിതത്വങ്ങളെയും കുറിച്ചുള്ള ആഗോള ആശങ്കകൾ മൂലമുണ്ടാകുന്ന അപകടസാധ്യതകൾ വർദ്ധിക്കുന്ന സാഹചര്യത്തിൽ, ആഗോള ഘടകങ്ങളെയും ആഭ്യന്തര വളർച്ചയുടെ ചാലകങ്ങളെ ശക്തിപ്പെടുത്തേണ്ടതിന്റെ പ്രാധാന്യത്തെയും കുറിച്ച് മീഡിയം-ടേം ഔട്ട്‌ലുക്കിനെക്കുറിച്ചുള്ള അധ്യായത്തിൽ വിശദീകരിക്കുന്നു.
2047 ഓടെ വികസിത് ഭാരതത്തിന്റെ ലക്ഷ്യങ്ങൾ സാക്ഷാത്കരിക്കുന്നതിന്, ജിയോ-ഇക്കണോമിക് ഫ്രാഗ്മെന്റേഷൻ (GEF), ചൈനീസ് ഉൽപ്പാദന വൈദഗ്ദ്ധ്യം, ഊർജ്ജ പരിവർത്തന ശ്രമങ്ങൾക്കായി ചൈനയെ ആഗോളമായി ആശ്രയിക്കൽ എന്നിങ്ങനെ ഉയർന്നുവരുന്ന ആഗോള യാഥാർത്ഥ്യങ്ങളുടെ പശ്ചാത്തലത്തിൽ ഇന്ത്യയുടെ മധ്യകാല വളർച്ചാ വീക്ഷണം വിലയിരുത്തേണ്ടത് പ്രധാനമാണ്. വ്യവസ്ഥാപിതമായ നിയന്ത്രണങ്ങൾ ഇല്ലാതാക്കലിന്റെ ഒരു കേന്ദ്ര ഘടകത്തിൽ ശ്രദ്ധ കേന്ദ്രീകരിച്ചുകൊണ്ട് വളർച്ചയുടെ ആഭ്യന്തര ഘടകങ്ങളെ പുനരുജ്ജീവിപ്പിക്കുന്നതിനുള്ള ഒരു മാർഗം സർവേ മുന്നോട്ട് വയ്ക്കുന്നു, ഇത് വ്യക്തികളുടെയും സംഘടനകളുടെയും ബിസിനസുകൾക്ക് നിയമാനുസൃതമായ സാമ്പത്തിക പ്രവർത്തനങ്ങൾ എളുപ്പത്തിൽ പിന്തുടരുന്നതിനുള്ള സാമ്പത്തിക സ്വാതന്ത്ര്യത്തിന്റെ ഒരു മാതൃക പ്രാപ്തമാക്കും. ഇന്ത്യയുടെ SME മേഖല സൃഷ്ടിക്കുന്നതിനെ പ്രോത്സാഹിപ്പിക്കുന്നതിനായി പരിഷ്കാരങ്ങളും സാമ്പത്തിക നയവും ബിസിനസ്സ് ലളിതവൽക്കരിക്കൽ 2.O എന്നിവയും വ്യവസ്ഥാപിതമായ നിയന്ത്രണങ്ങൾ നീക്കുന്നതായിരിക്കണമെന്ന് സർവേ ഊന്നിപ്പറയുന്നു.
2025 സാമ്പത്തിക വർഷത്തിന്റെ ആദ്യ പകുതിയിൽ കാർഷിക വളർച്ച സ്ഥിരമായി തുടർന്നതായും രണ്ടാം പാദത്തിൽ 3.5 ശതമാനം വളർച്ചാ നിരക്ക് രേഖപ്പെടുത്തിയതായും, കഴിഞ്ഞ നാല് പാദങ്ങളെ അപേക്ഷിച്ച് ഇത് ഒരു പുരോഗതിയാണെന്നും 2024-25 ലെ സാമ്പത്തിക സർവേ വ്യക്തമാക്കുന്നു. ആരോഗ്യകരമായ ഖാരിഫ് ഉൽ‌പാദനം, സാധാരണയേക്കാൾ കൂടുതൽ മൺസൂൺ, മതിയായ ജലസേചന സൗകര്യം എന്നിവ കാർഷിക വളർച്ചയെ പിന്തുണച്ചു. 2024-25 ൽ മൊത്തം ഖാരിഫ് ഭക്ഷ്യധാന്യ ഉൽ‌പാദനം 1647.05 ലക്ഷം മെട്രിക് ടൺ (LMT) റെക്കോർഡ് നിലയിലെത്തിയാതായി കണക്കാക്കപ്പെടുന്നു, 2023-24 നെ അപേക്ഷിച്ച് 5.7 ശതമാനം കൂടുതലും കഴിഞ്ഞ അഞ്ച് വർഷങ്ങളിലെ ശരാശരി ഭക്ഷ്യധാന്യ ഉൽ‌പാദനത്തേക്കാൾ 8.2 ശതമാനം കൂടുതലുമാണ് ഇത്.
2025 സാമ്പത്തിക വർഷത്തിന്റെ ആദ്യ പകുതിയിൽ വ്യാവസായിക മേഖല 6 ശതമാനം വളർച്ച കൈവരിക്കുകയും, സാമ്പത്തിക വർഷത്തിന്റെ അവസാനത്തോടെ 6.2 ശതമാനം വളർച്ച കൈവരിക്കുമെന്ന് കണക്കാക്കപ്പെടുകയും ചെയ്യുന്നു. ഒന്നാം പാദത്തിൽ 8.3 ശതമാനം എന്ന നിരക്കിൽ ശക്തമായ വളർച്ചയുണ്ടായി, എന്നാൽ മൂന്ന് പ്രധാന ഘടകങ്ങൾ കാരണം രണ്ടാം പാദത്തിൽ വളർച്ച മന്ദഗതിയിലായി. ഒന്നാമതായി, ലക്ഷ്യസ്ഥാനങ്ങളായ രാജ്യങ്ങളിൽ നിന്നുള്ള ആവശ്യകതയിലെ കുറവ്, പ്രധാന വ്യാപാര രാജ്യങ്ങളിലെ അനഭിലഷണീയമായ വ്യാപാര-വ്യാവസായിക നയങ്ങൾ എന്നിവ കാരണം ഉൽപ്പന്ന കയറ്റുമതി ഗണ്യമായി കുറഞ്ഞു. രണ്ടാമതായി, ശരാശരിയെക്കാൾ അധികമായ മൺസൂൺ സമ്മിശ്ര ഫലങ്ങളുണ്ടാക്കി - അത് ജലസംഭരണികൾ നിറയ്ക്കുകയും കൃഷിയെ പിന്തുണയ്ക്കുകയും ചെയ്തെങ്കിലും, ഖനനം, നിർമ്മാണം, എന്നിവയെയും ഒരു പരിധിവരെ ഉൽപ്പാദനം തുടങ്ങിയ മേഖലകളെയും തടസ്സപ്പെടുത്തി. മൂന്നാമതായി, മുൻ വർഷങ്ങളിലും നിലവിലെ വർഷങ്ങളിലും സെപ്റ്റംബർ മുതൽ ഒക്ടോബർ വരെയുള്ള ആഘോഷകാലങ്ങളിലെ വ്യത്യാസം 2025 സാമ്പത്തിക വർഷത്തിന്റെ രണ്ടാം പാദത്തിൽ നേരിയ വളർച്ചാ മാന്ദ്യത്തിന് കാരണമായി.
വിവിധ വെല്ലുവിളികൾക്കിടയിലും, ഉൽപ്പാദന PMI-യിൽ ഇന്ത്യ ഏറ്റവും വേഗതയേറിയ വളർച്ച രേഖപ്പെടുത്തുന്നത് തുടരുന്നുവെന്ന് സർവേ പറയുന്നു. 2024 ഡിസംബറിലെ ഏറ്റവും പുതിയ ഉൽപ്പാദന PMI, പുതിയ ബിസിനസ്സ് നേട്ടങ്ങൾ, ശക്തമായ ഡിമാൻഡ്, പരസ്യ ശ്രമങ്ങൾ എന്നിവയാൽ നയിക്കപ്പെട്ടുകൊണ്ട് വികസന മേഖലയ്ക്കുള്ളിൽ തന്നെ തുടർന്നു.
2025 സാമ്പത്തിക വർഷത്തിൽ സേവന മേഖല മികച്ച പ്രകടനം കാഴ്ചവയ്ക്കുന്നത് തുടരുന്നുവെന്ന് സർവേ ഊന്നിപ്പറയുന്നു. സാമ്പത്തിക വർഷത്തിന്റെ ആദ്യ പകുതിയിൽ 7.1 ശതമാനം വളർച്ചയാണ് ഒന്നാം പാദത്തിലും രണ്ടാം പാദത്തിലും ഉണ്ടായത്. ഉപവിഭാഗങ്ങളിലുടനീളം മികച്ച പ്രകടനം കാഴ്ചവച്ചു. ഏപ്രിൽ-നവംബർ കാലയളവിൽ ഇന്ത്യയുടെ സേവന കയറ്റുമതി വളർച്ച 12.8 ശതമാനമായി ഉയർന്നു, ഇത് 2024 സാമ്പത്തിക വർഷത്തിൽ 5.7 ശതമാനമായിരുന്നു.
പണപ്പെരുപ്പം, സാമ്പത്തിക സ്ഥിതി, ബാഹ്യ മേഖല സന്തുലിതാവസ്ഥ തുടങ്ങിയവ സ്ഥിരതയാർന്ന വളർച്ചാ പ്രക്രിയയെ വളരെയധികം പിന്തുണച്ചിട്ടുണ്ടെന്ന് സാമ്പത്തിക സർവേ പറയുന്നു. പണപ്പെരുപ്പത്തെക്കുറിച്ച് പറയുമ്പോൾ, ചില്ലറ വിൽപ്പന മേഖലയിലെ പണപ്പെരുപ്പം 2024 സാമ്പത്തിക വർഷത്തിലെ 5.4 ശതമാനത്തിൽ നിന്ന് 2024 ഏപ്രിൽ-ഡിസംബർ മാസങ്ങളിൽ 4.9 ശതമാനമായി കുറഞ്ഞുവെന്ന് സർവേ ചൂണ്ടിക്കാട്ടുന്നു. ഉപഭോക്തൃ ഭക്ഷ്യ വില സൂചിക (CFPI) കണക്കാക്കുന്ന ഭക്ഷ്യ പണപ്പെരുപ്പം പ്രധാനമായും പച്ചക്കറികൾ, പയർവർഗ്ഗങ്ങൾ തുടങ്ങിയ ചില ഭക്ഷ്യവസ്തുക്കളുടെ സ്വാധീനത്താൽ 2024 സാമ്പത്തിക വർഷത്തിലെ 7.5 ശതമാനത്തിൽ നിന്ന് 2025 സാമ്പത്തിക വർഷത്തിൽ (ഏപ്രിൽ-ഡിസംബർ) 8.4 ശതമാനമായി ഉയർന്നു. RBI, IMF എന്നിവയുടെ കണക്കുകൾ പ്രകാരം, 2026 സാമ്പത്തിക വർഷത്തിൽ ഇന്ത്യയുടെ ഉപഭോക്തൃ വിലക്കയറ്റം ഏകദേശം 4 ശതമാനമായി ക്രമേണ കുറയുമെന്ന് പ്രതീക്ഷിക്കാം.
മൊത്തം ചെലവിന്റെ ശതമാനമായ മൂലധന ചെലവ് (മൂലധനം), 2021 സാമ്പത്തിക വർഷം മുതൽ 2024 സാമ്പത്തിക വർഷം വരെ തുടർച്ചയായി മെച്ചപ്പെട്ടു. പൊതുതെരഞ്ഞെടുപ്പിനുശേഷം, 2024 ജൂലൈ മുതൽ നവംബർ വരെയുള്ള കാലയളവിൽ കേന്ദ്ര ഗവണ്മെന്റിന്റെ മൂലധന ചെലവ് 8.2 ശതമാനം വർദ്ധിച്ചതായി സർവേ പറയുന്നു.
2024 ഏപ്രിൽ മുതൽ നവംബർ വരെയുള്ള കാലയളവിൽ മൊത്ത നികുതി വരുമാനം (GTR) 10.7 ശതമാനം വർദ്ധിച്ചിട്ടും, സംസ്ഥാന വിഹിതത്തിന്റെ ആകെത്തുകയായി നിലനിർത്തിയ നികുതി വരുമാനം കാര്യമായി വർധിച്ചിട്ടില്ലെന്ന് സർവേ പറയുന്നു. നവംബർ വരെ കമ്മി സൂചകങ്ങളെ പ്രശ്നങ്ങളില്ലാതെ കൈകാര്യം ചെയ്യുകയും, സാമ്പത്തിക വർഷത്തിന്റെ ബാക്കി കാലയളവിൽ വികസനത്തിനും മൂലധന ചെലവിനും മതിയായ സ്ഥാനം നൽകുകയും ചെയ്തു.
കേന്ദ്രസർക്കാരിന്റെ മൊത്തം ചെലവിന്റെ ഒരു ശതമാനമെന്ന നിലയിൽ മൂലധന ചെലവ് (capex), 2021 സാമ്പത്തിക വർഷം മുതൽ 2024 സാമ്പത്തിക വർഷം വരെ തുടർച്ചയായി മെച്ചപ്പെട്ടിട്ടുണ്ട്. പൊതുതെരഞ്ഞെടുപ്പിനുശേഷം, 2024 ജൂലൈ മുതൽ നവംബർ വരെയുള്ള കാലയളവിൽ കേന്ദ്ര സർക്കാരിന്റെ മൂലധന ചെലവ് മുൻവർഷം ഇതേ കാലയളവിനെ അപേക്ഷിച്ചു 8.2 ശതമാനം വാർഷിക വളർച്ച കൈവരിച്ചതായി സർവേ പറയുന്നു.
2024 ഏപ്രിൽ മുതൽ നവംബർ വരെയുള്ള കാലയളവിൽ മൊത്ത നികുതി വരുമാനം (GTR) മുൻവർഷം ഇതേ കാലയളവിനെ അപേക്ഷിച്ച് 10.7 ശതമാനം വാർഷിക വർദ്ധന രേഖപ്പെടുത്തിയിട്ടും, സംസ്ഥാനങ്ങൾക്കുള്ള വിഹിതം കുറച്ചതിന് ശേഷം കേന്ദ്രത്തിന്റെ നികുതി വരുമാനം, വളരെ കുറച്ച് മാത്രമേ വർദ്ധിച്ചിട്ടുള്ളൂവെന്ന് സർവേ പറയുന്നു. നവംബർ വരെ, കേന്ദ്രത്തിന്റെ വരുമാന കമ്മി സൂചകങ്ങളുടെ ആശ്വാസകരമായ സ്ഥിതി , സാമ്പത്തിക വർഷത്തിന്റെ ശേഷിക്കുന്ന കാലയളവിൽ വികസനത്തിനും മൂലധന ചെലവിനും ധാരാളം അവസരം നൽകുന്നതാണ്.
സർവേ പ്രകാരം, 2024 ഏപ്രിൽ മുതൽ നവംബർ വരെയുള്ള കാലയളവിൽ കേന്ദ്ര സർക്കാരിന്റെ ജിടിആറും സംസ്ഥാനങ്ങളുടെ തനത് നികുതി വരുമാനവും (ഒടിആർ) സമാനമായ വേഗതയിൽ വർദ്ധിച്ചു. 2024 ഏപ്രിൽ മുതൽ നവംബർ വരെയുള്ള കാലയളവിൽ സംസ്ഥാനങ്ങളുടെ റവന്യൂ ചെലവ് 12 ശതമാനം (മുൻവർഷം ഇതേ കാലയളവിനെക്കാൾ ) വർധിച്ചു .സബ്‌സിഡികളും പണം നൽകേണ്ട ബാധ്യതകളും യഥാക്രമം 25.7 ശതമാനവും 10.4 ശതമാനവും വളർച്ച രേഖപ്പെടുത്തി.
വിപണി മൂല്യം കുറഞ്ഞ ആസ്തികളുടെ കുറവ് , ശക്തമായ മൂലധന ബഫറുകൾ, ശക്തമായ പ്രവർത്തനങ്ങൾ എന്നിവ ബാങ്കിംഗ് മേഖലയിലെ സ്ഥിരതയ്ക്ക് കാരണമായതായി സർവേ നിരീക്ഷിക്കുന്നു. ബാങ്കിംഗ് സംവിധാനത്തിലെ മൊത്ത നിഷ്‌ക്രിയ ആസ്തികൾ (എൻ‌പി‌എ) മൊത്ത വായ്പകളുടെയും അഡ്വാൻസുകളുടെയും 2.6 ശതമാനമായി 12 വർഷത്തെ ഏറ്റവും താഴ്ന്ന നിരക്കിൽ കുറഞ്ഞു. ഷെഡ്യൂൾഡ് വാണിജ്യ ബാങ്കുകളുടെ മൂലധന-അപകടആസ്തി അനുപാതം (capital-to-risk-weighted assets ratio-സി‌ആർ‌എആർ) 2024 സെപ്റ്റംബർ വരെ 16.7 ശതമാനമാണ്.ഇത് നിശ്ചിത മാനദണ്ഡത്തേക്കാൾ വളരെ മുകളിലാണെന്ന് സർവേ പറയുന്നു.
സേവന വ്യാപാരത്തിലൂടെയും റെക്കോർഡ് പണമയയ്ക്കലിലൂടെയും ബാഹ്യമേഖലയുടെ സ്ഥിരത സംരക്ഷിക്കപ്പെടുന്നുവെന്ന് സാമ്പത്തിക സർവേ ചൂണ്ടിക്കാണിക്കുന്നു.
2024 ഏപ്രിൽ - ഡിസംബർ കാലയളവിൽ ഇന്ത്യയുടെ ചരക്ക് കയറ്റുമതി മുൻവർഷം ഇതേ കാലയളവിനെക്കാൾ 1.6 ശതമാനം വാർഷിക വളർച്ച കൈവരിച്ചതായി സർവേ പറയുന്നു . ചരക്ക് ഇറക്കുമതി 5.2 ശതമാനം വർദ്ധിച്ചു. ഇന്ത്യയുടെ ശക്തമായ സേവന കയറ്റുമതി,ആഗോള സേവന കയറ്റുമതിയിൽ ഏഴാമത്തെ വലിയ രാജ്യമെന്ന സ്ഥാനം നേടാൻ സഹായിച്ചു. ഇത് രാജ്യത്തിന്റെ മത്സരശേഷി എടുത്തുകാണിക്കുന്നു.
സേവന വ്യാപാര മിച്ചത്തിന് പുറമേ വിദേശത്തു നിന്നുള്ള പണമയയ്ക്കൽ, സ്വകാര്യ ധന കൈമാറ്റങ്ങളുടെ ആരോഗ്യകരമായ മൊത്ത വരവിന് കാരണമായി. ഒഇസിഡി സമ്പദ്‌വ്യവസ്ഥകളിലെ തൊഴിലവസര സൃഷ്ടിയിലെ വർദ്ധന കാരണം ലോകത്ത് ഏറ്റവും കൂടുതൽ പണമയയ്ക്കൽ സ്വീകരിച്ച രാജ്യമായിരുന്നു ഇന്ത്യ. സർവേ പ്രകാരം,ഈ രണ്ട് ഘടകങ്ങളും ചേർന്ന് ഇന്ത്യയുടെ കറന്റ് അക്കൗണ്ട് കമ്മി (സിഎഡി) 2025 സാമ്പത്തിക വർഷത്തിന്റെ രണ്ടാം പാദത്തിൽ ജിഡിപിയുടെ 1.2 ശതമാനമായി താരതമ്യേന നിയന്ത്രിക്കപ്പെട്ടിരിക്കുന്നുവെന്ന് ഉറപ്പാക്കി.
മൊത്തം നേരിട്ടുള്ള വിദേശ നിക്ഷേപ ഒഴുക്ക് 2025 സാമ്പത്തിക വർഷത്തിൽ വീണ്ടെടുക്കൽ രേഖപ്പെടുത്തി. 2024 സാമ്പത്തിക വർഷത്തിലെ ആദ്യ എട്ട് മാസങ്ങളിൽ 47.2 ശതകോടി യുഎസ് ഡോളറിൽ നിന്ന് 2025 സാമ്പത്തിക വർഷത്തിന്റെ അതേ കാലയളവിൽ 55.6 ശതകോടി യുഎസ് ഡോളറായി വർദ്ധിച്ചു. ഇത് മുൻവർഷത്തേക്കാൾ 17.9 ശതമാനം വളർച്ചയാണെന്ന് സർവേ പറയുന്നു. പ്രധാനമായും ആഗോള ഭൗമരാഷ്ട്രീയ, ധനനയ സംഭവവികാസങ്ങൾ കാരണം 2024 ന്റെ രണ്ടാം പകുതിയിൽ വിദേശ പോർട്ട്‌ഫോളിയോ നിക്ഷേപ (എഫ്പിഐ) ഒഴുക്ക് അസ്ഥിരമായിരുന്നു.
സ്ഥിരമായ മൂലധന വരവിന്റെ ഫലമായി, ഇന്ത്യയുടെ വിദേശനാണ്യ കരുതൽ ശേഖരം 2024 ജനുവരി അവസാനം 616.7 ബില്യൺ യുഎസ് ഡോളറിൽ നിന്ന് 2024 സെപ്റ്റംബറിൽ 704.9 ബില്യൺ യുഎസ് ഡോളറായി വർദ്ധിച്ചുവെന്നും, 2025 ജനുവരി 3 ന് ഇത് 634.6 ബില്യൺ യുഎസ് ഡോളറായി കുറഞ്ഞുവെന്നും സാമ്പത്തിക സർവേ പറയുന്നു. ഇന്ത്യയുടെ വിദേശനാണ്യ കരുതൽ ശേഖരം ബാഹ്യ കടത്തിന്റെ 90 ശതമാനം നികത്താൻ പര്യാപ്തമാണ്.ഇത് പത്ത് മാസത്തിലധികം ഇറക്കുമതി പരിരക്ഷ നൽകുമെന്നും അതുവഴി ബാഹ്യ പ്രതികൂല ഘടകങ്ങളിൽ നിന്ന് സംരക്ഷിക്കുമെന്നും സാമ്പത്തിക സർവേ പറയുന്നു.
തൊഴിൽ രംഗത്ത് തുടർച്ചയായ മികച്ച പ്രകടനം സാമ്പത്തിക സർവേ ചൂണ്ടിക്കാണിക്കുന്നു. മഹാമാരിയ്ക്ക് ശേഷമുള്ള പുനരുജീവനശേഷിയും ഔപചാരികവൽക്കരണവും സമീപ വർഷങ്ങളിൽ ഇന്ത്യയുടെ തൊഴിൽ വിപണി വളർച്ചയെ പിന്തുണച്ചിട്ടുണ്ടെന്ന് സർവേ പറയുന്നു. 15 വയസ്സും അതിൽ കൂടുതലുമുള്ള വ്യക്തികളുടെ തൊഴിലില്ലായ്മ നിരക്ക് 2017-18 ലെ 6 ശതമാനത്തിൽ നിന്ന് 2023-24 ൽ 3.2 ശതമാനമായി ക്രമാനുഗതമായി കുറഞ്ഞു. കൂടാതെ തൊഴിൽ ശക്തി പങ്കാളിത്ത നിരക്കും (LFPR) തൊഴിലാളി-ജനസംഖ്യ അനുപാതവും (WPR) വർദ്ധിച്ചു.
സേവനങ്ങളെ അടിസ്ഥാനമാക്കിയുള്ളതും, അനുയോജ്യമായ അന്തരീക്ഷവും യുവാക്കളും അടങ്ങിയ തൊഴിൽ ശക്തിയുള്ള ഒരു സമ്പദ്‌വ്യവസ്ഥയായ ഇന്ത്യയ്ക്ക്, സാമ്പത്തിക വളർച്ചയെ പിന്തുണയ്ക്കുന്നതിനും തൊഴിൽ വിപണിയിലെ ഫലങ്ങൾ മെച്ചപ്പെടുത്തുന്നതിനുമുള്ള സാധ്യതകൾ നിർമ്മിത ബുദ്ധി സ്വീകരിക്കുന്നതിലൂടെ ലഭിക്കുമെന്ന് സർവേ പരാമർശിക്കുന്നു. AI- അധിഷ്ഠിത മേഖലയിൽ അഭിവൃദ്ധി പ്രാപിക്കാൻ ആവശ്യമായ നൈപുണ്യം നൽകി തൊഴിലാളികളെ സജ്ജരാക്കുന്നതിന് വിദ്യാഭ്യാസത്തിനും നൈപുണ്യ വികസനത്തിനും മുൻഗണന നൽകുന്നത് നിർണായകമായിരിക്കും. ബൃഹത്തായ തോതിൽ AI സ്വീകരിക്കുന്നതിന് നിലവിൽ തടസ്സങ്ങളുണ്ടെന്ന വസ്തുത സർവേ വെളിപ്പെടുത്തുന്നു.ഇത് നയരൂപകർത്താക്കൾക്ക് പ്രവർത്തിക്കാനുള്ള ഒരു ഇടം നൽകുന്നു . തൊഴിൽ മേഖലയിൽ AI-അധിഷ്ഠിത പരിവർത്തനത്തിന്റെ പ്രതികൂലമായ സാമൂഹിക പ്രത്യാഘാതങ്ങൾ കുറയ്ക്കുന്നതിന് സർക്കാർ, സ്വകാര്യ മേഖല, അക്കാദമിക് മേഖലകൾ തമ്മിലുള്ള സഹകരണ ശ്രമത്തിന് സാമ്പത്തിക സർവേ ആഹ്വാനം ചെയ്യുന്നു.
ഉയര്‍ന്ന വളര്‍ച്ചാനിരക്കു നിലനിര്‍ത്തുന്നത്തിനായി അടുത്ത രണ്ടു ദശകങ്ങളിൽ അടിസ്ഥാന സൗകര്യ മേഖലയില്‍ ക്രമാനുഗതമായി നിക്ഷേപം തുടരേണ്ടതിന്റെ ആവശ്യകത സാമ്പത്തിക സര്‍വ്വേ എടുത്തു പറയുന്നു. 2024 ഏപ്രില്‍ മുതല്‍ നവംബര്‍ വരെ 2031 കിലോമീറ്റര്‍ റെയില്‍ ശൃംഖല കമ്മീഷന്‍ ചെയ്യുകയും 2024 ഏപ്രില്‍ മുതല്‍ ഒക്ടോബര്‍ വരെ 14 ജോഡി പുതിയ വന്ദേഭാരത് ട്രെയിന്‍ സര്‍വ്വീസുകള്‍ ആരംഭിക്കുകയും ചെയ്തു. 2025 സാമ്പത്തിക വര്‍ഷത്തില്‍ തുറമുഖ ശേഷി ഗണ്യമായി മെച്ചപ്പെട്ടു. ഇത് പ്രവര്‍ത്തനക്ഷമത മെച്ചപ്പെടുത്തുകയും പ്രധാന തുറമുഖങ്ങളില്‍ കണ്ടെയ്‌നറുകള്‍ കെട്ടിക്കിടക്കുന്ന സമയം 2024 സാമ്പത്തിക വര്‍ഷത്തില്‍ 48.1 മണിക്കൂർ ആയിരുന്നത് 2025 സാമ്പത്തിക വര്‍ഷം (ഏപ്രില്‍-നവംബര്‍) 30.4 മണിക്കൂറായി കുറയ്ക്കുകയും ചെയ്തു.
പ്രധാനമന്ത്രി -സൂര്യ ഘര്‍: സയജന്യ വൈദ്യുതി പദ്ധതി , ദേശീയ ബയോ ഊർജ പദ്ധതി, ദേശീയ ഹരിത ഹൈഡ്രജന്‍ മിഷന്‍, പിഎം-കുസും തുടങ്ങിയ പദ്ധതികള്‍, നയങ്ങള്‍, സാമ്പത്തിക പ്രോത്സാഹനങ്ങള്‍, നിയന്ത്രണ നടപടികള്‍ എന്നിവയിലൂടെ രാജ്യത്ത് പുനരുല്‍പ്പാദിപ്പിക്കാവുന്ന ഊര്‍ജ്ജം, ഹരിത നിക്ഷേപം എന്നിവ വര്‍ദ്ധിപ്പിക്കുന്നതിനുള്ള ഇന്ത്യാ ഗവണ്മെന്റിന്റെ ശ്രമങ്ങളെ സാമ്പത്തിക സര്‍വ്വേ അടിവരയിടുന്നു. സൗരോര്‍ജ്ജം, കാറ്റില്‍ നിന്നുള്ള വൈദ്യുതി എന്നിവയുടെ ഉത്പാദന ശേഷി വര്‍ദ്ധിപ്പിച്ചതിലൂടെ 2024 ഡിസംബറോടെ പുനരുപയോഗിക്കാവുന്ന ഊര്‍ജ്ജ ശേഷിയില്‍ വര്‍ഷം തോറും 15.8 ശതമാനം വര്‍ദ്ധന ഉണ്ടായി.
സർക്കാരിന്റെ സാമൂഹികക്ഷേമച്ചെലവ് 2021 സാമ്പത്തിക വര്‍ഷം മുതല്‍ 2025 സാമ്പത്തിക വര്‍ഷം വരെ മൊത്തത്തില്‍ 15 ശതമാനം (കേന്ദ്രത്തിന്റെയും സംസ്ഥാനങ്ങളുടെയും ചേര്‍ത്ത്) വാര്‍ഷിക വളര്‍ച്ചാ നിരക്കു കൈവരിച്ചു. ഉപഭോഗച്ചെലവിന്റെ അസന്തുലിതാവസ്ഥയുടെ അളവുകോലായ ജിനി കോഎഫിഷ്യന്റ് , സമീപ വര്‍ഷങ്ങളില്‍ കുറഞ്ഞു വരികയാണ് (ഗ്രാമ പ്രദേശങ്ങളില്‍ ഇത് 2022-23ലെ 0.266 ല്‍ നിന്ന് 2023-2024ല്‍ 0.237 ആയി കുറഞ്ഞു, നഗരങ്ങളില്‍ 2022-23ലെ 0.314ല്‍ നിന്നും 2023-24ല്‍ 0.284 ആയി കുറഞ്ഞു), വരുമാന വിതരണം പുനഃക്രമീകരിക്കുന്നതില്‍ സര്‍ക്കാര്‍ നടത്തുന്ന ശ്രമങ്ങളുടെ ഗുണപരമായ മാറ്റമാണ് ഇതു പ്രതിഫലിപ്പിക്കുന്നത്.
സ്‌കൂള്‍ വിദ്യാഭ്യാസ രംഗത്ത്, 2024ലെ ദേശീയ വിദ്യാഭ്യാസ നയത്തിന്റെ ലക്ഷ്യം കൈവരിക്കുന്നതിനു നിരവധി പരിപാടികളും പദ്ധതികളും ഗവണ്‍മെന്റ് നടപ്പാക്കി വരുന്നു. സമഗ്ര ശിക്ഷാ അഭിയാന്‍, ദീക്ഷ, സ്റ്റാര്‍സ്, പരാഖ്, പിഎം ശ്രീ, ഉല്ലാസ്, പിഎം പോഷണ്‍ എന്നിവ ഇതില്‍ ഉള്‍പ്പെടുന്നുവെന്നു സര്‍വ്വേ പറയുന്നു.
2015 സാമ്പത്തിക വര്‍ഷത്തിനും 2022 സാമ്പത്തിക വര്‍ഷത്തിനുമിടയില്‍, ആരോഗ്യ രംഗത്ത് സര്‍ക്കാരിന്റെ മൊത്തം ചെലവുവിഹിതം 29 ശതമാനത്തില്‍ നിന്നും 48 ശതമാനമായി ഉയര്‍ന്നുവെന്നു സര്‍വ്വേ പറയുന്നു. ഇതേകാലയളവില്‍ ജനങ്ങളുടെ സ്വന്തം കയ്യിൽ നിന്നുള്ള ചികിത്സാച്ചെലവ് 62.6 ശതമാനത്തില്‍ നിന്നും 39.4 ശതമാനമായി കുറഞ്ഞു.
ഇന്ത്യന്‍ സമ്പദ്‌വ്യവസ്ഥയുടെ ഊര്‍ജ്ജസ്വലമായ മേഖലയായി സൂഷ്മ, ചെറുകിട, ഇടത്തരം സംരംഭങ്ങള്‍ (എംഎസ്എംഇ) ഉയര്‍ന്നുവെന്നു സര്‍വ്വേ ചൂണ്ടിക്കാട്ടുന്നു. എംഎസ്എംഇ കള്‍ക്ക് ഇക്വിറ്റി ഫണ്ടിംഗ് നല്‍കുന്നതിന് 50000 കോടി രൂപയുടെ അടങ്കലോടെ, സര്‍ക്കാര്‍ സ്വയം പര്യാപ്ത ഇന്ത്യ ഫണ്ട് ആരംഭിച്ചു.
അമിത നിയന്ത്രണങ്ങള്‍ കുറയ്ക്കുന്നതിനുള്ള സര്‍ക്കാര്‍ നടപടികള്‍, ബിസിനസ് മേഖലയെ കൂടുതല്‍ കാര്യക്ഷമമാക്കുന്നതിനും ചെലവു കുറയ്ക്കുന്നതിനും പുതിയ വളര്‍ച്ചാ അവസരങ്ങള്‍ തുറക്കുന്നതിനും സഹായിക്കും. നിയന്ത്രണങ്ങള്‍ കമ്പനികളുടെ പ്രവര്‍ത്തനച്ചെലവു വര്‍ദ്ധിപ്പിക്കുന്നതിനു കാരണമാകുമെന്ന് സാമ്പത്തിക സര്‍വ്വേ കൂട്ടിച്ചേര്‍ത്തു. ക്രമാനുഗതമായി സംസ്ഥാനങ്ങള്‍ക്ക് അവരുടെ ചെലവു ചുരുക്കല്‍ കാര്യക്ഷമമാക്കുന്നതിനു മൂന്നു ഘട്ടങ്ങളിലായുള്ള നടപടിക്രമങ്ങളുടെ രൂപരേഖയും ഇതില്‍ വിശദീകരിച്ചിട്ടുണ്ട്. നിയന്ത്രണങ്ങള്‍ നീക്കുന്നതിനുള്ള മേഖലകള്‍ കണ്ടെത്തുക, മറ്റു സംസ്ഥാനങ്ങളുമായും രാജ്യങ്ങളുമായും നിയന്ത്രണങ്ങള്‍ താരതമ്യം ചെയ്യുക, ഓരോ സംരംഭങ്ങളിലും ഈ നിയന്ത്രണങ്ങള്‍ കൊണ്ടുണ്ടാകുന്ന ചെലവ് കണക്കാക്കുക എന്നീ നടപടികള്‍ ഇതില്‍ ഉള്‍പ്പെടുന്നു.
ലളിതമായി ബിസിനസ് ചെയ്യൽ (Ease of Doing Business- EoDB) 2.0, സംസ്ഥാന സര്‍ക്കാരുകളുടെ നേതൃത്വത്തിൽ ബിസിനസ് ചെയ്യുന്നതിലെ ബുദ്ധിമുട്ടുകള്‍ക്കു പിന്നിലെ മൂലകാരണം കണ്ടെത്തി പരിഹരിക്കുന്നതില്‍ ശ്രദ്ധ കേന്ദ്രീകരിക്കുന്ന സംരംഭമായിരിക്കണമെന്നു സര്‍വ്വേ എടുത്തു പറയുന്നു. EoDB യുടെ അടുത്ത ഘട്ടത്തില്‍, സംസ്ഥാനങ്ങള്‍ മാനദണ്ഡങ്ങളും നിയന്ത്രണങ്ങളും ഉദാരവത്കരിക്കുക, നടപ്പാക്കുന്നതിനുള്ള നിയമപരമായ സുരക്ഷ ഏര്‍പ്പെടുത്തുക, താരിഫുകളും ഫീസും കുറയ്ക്കുക, നഷ്ട സാദ്ധ്യത വിലയിരുത്തി നിയമങ്ങള്‍ പ്രയോഗിക്കുക തുടങ്ങിയ പ്രവർത്തനങ്ങൾ ഏറ്റെടുക്കണം എന്നും സർവേയിൽ പരാമര്‍ശിക്കുന്നു.
2026 സാമ്പത്തിക വര്‍ഷത്തിലെ ഇന്ത്യയുടെ സാമ്പത്തിക സാദ്ധ്യതകള്‍ സന്തുലിതമാണ്. ഭൗമ-രാഷ്ട്രീയവും വ്യാപാരപരവുമായ അനിശ്ചിതത്വവും വിലക്കയറ്റവുമായിരിക്കും വളര്‍ച്ചയുടെ പാതയിലെ വിലങ്ങുതടികള്‍. ആഭ്യന്തരമായി, സ്വകാര്യ മൂലധന ചരക്കുവസ്തു മേഖലയിലെ വളര്‍ച്ച, സുസ്ഥിര നിക്ഷേപത്തിലെ വര്‍ദ്ധന, ഉപഭോക്താക്കളുടെ ആത്മവിശ്വാസം വര്‍ദ്ധിപ്പിക്കുക, കോര്‍പ്പറേറ്റ് വേതന വര്‍ദ്ധന എന്നിവ വളര്‍ച്ചയെ പ്രോത്സാഹിപ്പിക്കുന്നതില്‍ സുപ്രധാന പങ്കുവഹിക്കും.
മികച്ച കാര്‍ഷികോത്പാദനത്തിന്റെ ഫലമായുണ്ടാകുന്ന ഗ്രാമീണ മേഖലയിലെ ആവശ്യകതാവര്‍ദ്ധന, ഭക്ഷ്യ സാധനങ്ങളുടെ വിലക്കയറ്റത്തില്‍ പ്രതീക്ഷിക്കുന്ന കുറവ്, ഒപ്പം സൂഷ്മ-സാമ്പത്തിക അന്തരീക്ഷം എന്നിവ സമീപകാല വളര്‍ച്ചയ്ക്ക് ഉത്തേജനം പകരുന്നവയാണ്. മധ്യ-കാല വളര്‍ച്ചാ സാദ്ധ്യതകള്‍ ശക്തിപ്പെടുത്തുന്നതിനു അടിസ്ഥാനതലത്തില്‍ ഘടനാപരമായ പരിഷ്‌കാരങ്ങളിലൂടെയും നിയന്ത്രണങ്ങള്‍ നീക്കുന്നതിലൂടെയും ഇന്ത്യയുടെ ആഗോള മത്സരക്ഷമത മെച്ചപ്പെടുത്തേണ്ടത് അനിവാര്യമാണ്.
******
SK/GG/LPS/MS
(Release ID: 2098136)
Visitor Counter : 33