নুংশিরবা প্রজাশিং,

খুরুমজরি!

পুৱারী ওইরবা থৌরম অসিদা অদোমদা ৱা ঙাংবা ফংজবা অসিদা ঐহাক্না নুংঙাইবা ফাওই। রিপব্লিক দেগী নুমিৎকী মমাংদা ঐহাক্না অদোমবু থম্মোয় শেংনা নুংঙাইবা ফোংদোকচরি! চহি 75গী মমাংদা, জনুৱারীগী তাং 26তা, ঐখোয়গী ফাউন্দিং দোক্যুমেন্ত, ভারতকী সম্বিধান চৎনবা হৌখি।

কন্সতিত্যুএন্ত এসেমব্লীনা চাউরাক্না চহি অহুমগী দিবেৎকী মতুংদা 1949গী নবেম্বর 26দা সম্বিধান অসি চৎনহনখি। নবেম্বর 26 অসি 2015দগী 'সম্বিধান দিবস' হায়বদি সম্বিধান নুমিৎ ওইনা পাংথোক্লি।

রিপব্লিক দে অসি তশেংনমক লৈবাক মীয়াম পুম্নমক্কী অপুনবা নুংঙাইবা অমসুং চাউথোকচনীংঙাই ওইবা থৌরম অমনি। চহি 75 হায়বসি লৈবাক অমগী পুন্সিদা মীৎনা কুপ্পদা হৌখিবা মতমনি হায়না মীওই খরনা হায়রম্বা য়াই। নত্তে, ঐনা হায়গনি, হৌখিবা চহি 75 অসিদি নত্তে। মতম অসি ভারতকী মতম শাংনা লৈরম্বা থৱায় অদু অমুক হন্না হৌগৎলকপা মতমনি, লৈবাকশিংগী মরক্তা মাগী হকচাংগা চুনবা মফম অদু অমুক হন্না ফংনবা খোঙথাং কয়া অমা লৌখৎলি। খ্বাইদগী লিরবা সিভিলাইজেসনশিংগী মনুংদা, ভারত অসি লৌশিং অমসুং ৱিসদমগী হৌরকফম অমা ওইনা খঙনরম্মি। অদুম ওইনমক, মফম অদুদা অম্মবা মতম অমা লাকখি, অমসুং কোলোনিএল লৈঙাক্কী মখাদা তমথিরবা এক্সপ্লোইতেসন্না মরম ওইদুনা য়াম্না লাইরবা ওইখি।

ঙসি, ঐখোয়না অহানবদা ইমা লৈবাক অসিবু মপান লৈবাক্কী লৈঙাক্কী য়োৎলিংদগী নীংতম্নবগীদমক চাউনা কত্থোকখিবা থৌনা ফরবা মীওইশিংবু নীংশিংগদবনি। খরদি ময়াম্না খঙনরম্মি, অদুগা খরদি হৌজিক ফাওবদা ময়াম্না খঙনদে। চহি অসিদা ঐখোয়না ভগৱান বির্সা মুন্দগী 150শুবা মপোক কুমওন পাংথোক্লি। মহাক অসি লৈবাক অসিগী পুৱারীদা মহাক্কী থৌদাং অসি হৌজিক অচুম্বা মওংদা শকখঙনরিবা নীংতম লান্মীশিংগী মীহুৎ অমনি।

কুনশুবা চহিচাগী অঙনবা দিকেদশিংদা, মখোয়গী লান্থেংশিং অসি লৈবাক শীনবা থুংনা ওর্গানাইজ তৌরবা নীংতম্বগী ইহৌ অমা ওইরকখি। মহাত্মা গান্ধী, রবীন্দ্রনাথ তেগোর অমসুং বাবাসাহেব অম্বেদকরগুম্বা মীওইশিং লৈবা অসি লৈবাক অসিগী নুংঙাইবা অমনি। মখোয়না লৈবাক অসিগী দেমোক্রেতিক ইথোসপু অমুক হন্না শাগৎপদা মতেং পাংখি। জস্তিস, লিবর্তী, ইক্বেলিতী অমসুং ফ্রেতর্নিতী অসি ঐখোয়না অনৌবা মতম অসিদা তম্লকপা থিওরীগী ৱাখল্লোনশিং নত্তে; মখোয় অসি মতম পুম্নমক্তা ঐখোয়গী সিভিলাইজেস্নেল হেরিতেজকী শরুক অমা ওইদুনা লাক্লি। ভারতনা নৌনা নীংতম্বা ফংলবা মতমদা সম্বিধান অমসুং রিপব্লিক্কী তুংলমচৎকী মতাংদা য়েৎনবা মীওইশিং অদু করিগীদমক্তা মপুং ফানা অরানবা ওইখিবনো হায়বদুসু মসিনা শন্দোক্না তাক্লি।

ঐখোয়গী কন্সতিত্যুএন্ত এসেমব্লীগী কম্পোজিসন অসিসু ঐখোয়গী রিপব্লিকন ভেল্যুশিংগী খুদম অমনি। লৈবাক অসিগী শরুক খুদিংমক্কী অমসুং কাংলুপ খুদিংমক্কী মীহুৎশিং লৈরম্মি। মরুওইনা, মাগী মেম্বরশিংগী মরক্তা নুপী 15 লৈরম্মি, মখোয়শিং অদুদা সরোজিনি নাইদু, রাজকুমারী অমৃত কৌর, সুচেতা ক্রিপালানি, হান্সাবেন মেহতা অমসুং মালতী চৌধুরী য়াওরি। মালেমগী শরুক কয়াদা নুপীগী থোং মান্নবা অসি ওইথোকপা ঙমদ্রিবা ৱাখল্লোন অমা ওইরিঙৈদা, ভারত্তা নুপীশিংনা লৈবাক অসিগী তুংগী মীরোল শেম্বদা থৌনা লৈনা শরুক য়াখি।

কনস্তিত্যুসন অসি অহিংবা দোক্যুমেন্ত অমা ওইরক্লি মরমদি সিভিক ভর্চ্যু অসি ঐখোয়গী মোরেল কম্পাসকী শরুক অমা ওইনা চহি লিশিং কয়াদগী লৈরক্লি। সম্বিধান অসিনা ভারত মচা অমা ওইনা ঐখোয়গী অপুনবা শক্তম অদুগী অরোইবা য়ুম্ফম পীরি। মসিনা ঐখোয়বু ইমুং অমগুম্না পুনশিনলি। চহি 75দগী হৌনা, মসিনা ঐখোয়গী চাউখৎপগী লম্বীদা লমজিংলি। ঙসি, ঐখোয়না দোক্তর অম্বেদকরজীগী মফমদা থাগৎপা ফোঙদোকচরি। দ্রাফতিং কম্মিতীগী চিয়রমেন ওইরম্বা অম্বেদকর, কন্সতিত্যুএন্ত এসেমব্লীগী অতোপ্পা শক্নাইরবা মেম্বরশিং, তোঙান-তোঙানবা ওফিসরশিং অমসুং অতোপ্পা কন্না হোৎনরম্বা মীওইশিংনা ঐখোয়দা য়াম্না ফজবা দোক্যুমেন্ত অসি পীখি।

নুংশিরবা প্রজাশিং,

কনস্তিত্যুসনগী চহি 75 অসি নহা ওইরিবা রিপব্লিক অমগী চাউখৎ-থৌরাংগী খুদোংচাবা কয়া অমা লৈরি। নীংতম্বা ফংবা মতমদা অমসুং মতুংদসু লৈবাক অসিগী চাউরবা শরুক কয়া অমা কা হেন্না লায়রবা অমসুং চরাম-খৌরাংবা মায়োক্নখি। অদুবু ঐখোয়দগী মাংবা ঙমদবা করিগুম্বা অমা লৈরমখি, মদুদি ঐখোয় ইশাদা থাজবা হায়বসিনি। মীওই খুদিংমক্না চাউখৎপগী খুদোংচাবা ফংবা ঙম্নবগীদমক অচুম্বা ফিভম শেম্নবা ঐখোয়না হোৎনখি। ঐখোয়গী লৌমীশিংনা কন্না হোৎনদুনা ঐখোয়গী লৈবাক অসি চানবা পোৎথোক পুথোকপদা মশা-মরোমদোম লেপচবা ঙমহল্লে।  ঐখোয়গী ইনফ্রাস্ত্রকচর অমসুং মেন্যুফেকচরিং সেক্তরদা অহোংবা পুরক্নবা ঐখোয়গী শিন্মীশিংনা লেপ্পা লৈতনা হোৎনখি। মখোয়না হোৎনখিবশিং অদুগীদমক থাগৎপা ফোংদোকচরি। ঙসিদি ভারতকী শেন্মিৎলোন অসিনা মালেমগী শেন্মিৎলোনগী চৎনবীদা ইথিল পীরি। ঙসিদি, ভারতনা ইন্তর্নেস্নেল ফোরমশিংদা লুচিংবগী থাক্তা লৈরি। ঐখোয়গী সম্বিধান্না পীরিবা ব্লুপ্রিন্ত অসি য়াওদনা হায়রিবা ত্রান্সফোর্মেসন অসি ওইথোকপা ঙম্লোই।

হৌখিবা চহিশিংদা, শেন্মিৎলোনগী চাউখৎপগী চাং অসি লেপ্পা লৈতনা ৱাংখৎলক্লি। মসিনা ঐখোয়গী নহারোলশিংদা থবক ফংহন্নবা খুদোংচাবশিং ফংহল্লি। মসিনা লৌমী অমসুং শিন্মীশিংগী খুৎতা শেল হেন্না ফংহল্লি অমসুং মীওই কয়া অমা লায়রবদগী কোকহণবা ঙমহল্লি। থৌনা ফরবা অমসুং মীৎয়েং শানবা শেন্মিৎলোনগী রিফোর্মশিংনা লাক্কদৌরিবা চহিশিংদা মসিগী ত্রেন্দ অসিবু মখা চত্থহনগনি। ইনক্লুজন অসি ঐখোয়গী গ্রোথ সাগাগী য়ুম্বীনি, চাউখৎপগী মহৈশিং অদু য়ারিবমখৈ পাক শন্না য়েন্থোক্লি।

সরকারনা ফাইনান্সিএল ইনক্লুজনদা অহেনবা অখন্নবা মীৎয়েং থম্লিবা অসিদা, প্রধান মন্ত্রী জন ধন য়োজনা, প্রধান মন্ত্রী জীবন জ্যোতি বিমা য়োজনা, প্রধান মন্ত্রী সুরক্ষ বিমা য়োজনা, মুদ্রা, স্তেন্দ-অপ ইন্দিয়া অমসুং অতল পেন্সন য়োজনা অসিগুম্বা থৌরাংশিং অসি মীওই কয়াদা মখল কয়াগী ফাইনান্সিএল সপোর্ত স্কিমশিং ফংহন্নবা পাকথোক চাউথোকহনখ্রে।

মসিগা চপ মান্ননা মরুওইবা অমনা, সরকারনা ৱেলফেয়রগী ৱাখল্লোনবু নৌনা ৱাহন্থোক পীখ্রে, য়ুম অমসুং থক্নবা ঈশিং ফংহনবা অসিগুম্বা তঙাইফদবা পোৎলমশিং অসি এনতাইতলমেন্তগী ৱাফম ওইহনখ্রে। লায়রবা কাংলুপশিং, মরুওইনা সেদ্যুল কাস্ত, সেদ্যুল ত্রাইব অমসুং অতৈ শোত্থরবা কাংলুপশিংদা মতেং পাংনবা হোৎনরি। খুদম ওইনা হায়রবদা, SC কম্ম্যুনিতীশিংগী নহারোলশিংগীদমক প্রি-মেত্রিক অমসুং পোস্ত-মেত্রিক স্কোলারশিপ, নেস্নেল ফেলোশিপ, মপান লৈবাক্কী স্কোলারশিপ, হোস্তেল অমসুং কোচিং ফেসিলিতীশিং ফংলি। প্রধান মন্ত্রী অনুসুচিত জতি অভ্যুদয় য়োজনা অসিনা SC কম্ম্যুনিতীশিংগী মরক্তা থবক পীবা অমসুং ইনকম জেনরেসনগী খুদোংচাবশিং হাপচিন্দুনা লায়রবা হন্থহনবদা খুমাং চাউশিল্লি। ধর্তি আবা জনজাতিয়া গ্রাম উতকার্শ অভিয়ান অমসুং প্রধান মন্ত্রী জনজাতি আদিবাসি নয়া মহা অভিয়ান (পি.এম.-জনমান) য়াওনা ST কম্ম্যুনিতীশিংগী সোসিও-ইকনোমিক দিবেলপমেন্তগীদমক পান্দম থম্বা দেদিকেতেদ স্কিমশিং লৈখ্রে। দে-নোতিফাইদ, নোমাদিক অমসুং সেমি নোমাদিক কম্ম্যুনিতীশিংগীদমক দিবেলপমেন্ত অমসুং ৱেলফেয়র বোর্দ অমা শেমখ্রে।

মরক অসিদা, হৌখিবা চহি তরা অসিদা লম্বী অমসুং রেলৱেজ, পোর্তশিং অমসুং লোজিস্তিক হবশিং য়াওনা ফিজিকেল ইনফ্রাস্ত্রকচর দিবেলপমেন্তদা মীৎয়েং থম্বা অসিনা লাক্কদৌরিবা চহি তরাগী খুজিং কয়াদা গ্রোথপু সপোর্ত তৌগদবা প্লেৎফোর্ম অমা শেমগৎলে।

শেল-থুমগী লমদা সরকারনা তেক্নোলোজী শীজিন্নরিবা মওং অসি খুদম অমনি। দিজিতেল পেমেন্তগী তোঙান-তোঙানবা ওপ্সনশিংগা লোয়ননা দাইরেক্ত বেনেফিৎ ত্রান্সফরগী সিস্তেম্না মীশিং য়াম্লবা মীওইশিংবু ফোর্মেল সিস্তেমগী মনুং চলহন্দুনা ইনক্লুজনবু মতেং পাংলি। মসিনা সিস্তেম অসিদা মমাংদা অমুক্তা ওইখিদ্রিবা ত্রান্সপরেন্সীসু পুরক্লি। থৌওং অসিদা, চহি খরগী মনুংদা ঐখোয়না মালেমগী খ্বাইদগী ফবা দিজিতেল পব্লিক ইনফ্রাস্ত্রকচর অমা শেম্লে।

বেঙ্কিং সিস্তেম অসি ইন্সোলভেন্সী অমসুং বেঙ্ক্রপসী কোদকুম্বা অকনবা খোঙথাং কয়া অমা পায়খৎলবা মতুংদা অফবা ফিভম অমদা লৈরি। মসিনা সেদ্যুল কম্মর্সিএল বেঙ্কশিংগী নোন-পর্ফোর্মিং এসেৎশিং য়াম্না হন্থহনখ্রে।

নুংশিরবা প্রজাশিং,

ঐখোয়না 1947তা নীংতম্বা ফংখি, অদুবু কোলোনিএলগী ৱাখল্লোন কয়া অমা ঐখোয়গী মরক্তা মতম শাংনা লৈখি। হৌজিত্তি, ঐখোয়না ৱাখল্লোন অসি হোংদোক্নবা পুন্না হোৎনরিবা অসি উবা ফংলি। অসিগুম্বা হোৎনবা কয়াগী মরক্তা খ্বাইদগী শিংথানিংঙাই ওইরিবা অসিদি ইন্দিয়ন পেনাল কোদ, ক্রিমিনেল প্রোসিজর কোদ অমসুং ইন্দিয়ন ইভিদেন্স এক্তকী মহুৎ শিন্দোক্নবা ৱারেপ লৌখিবা অদুনি।  ভারতকী জুরিসপ্রুদেন্সকী চৎনবীদা য়ুম্ফম ওইদুনা, অনৌবা ক্রিমিনেল লোশিং অসিনা ক্রিমিনেল জস্তিস সিস্তেমগী মীৎয়েং অসি চৈরাক পীবগী মহুত্তা অচুম্বা ৱায়েল পীবদা মীৎয়েং থম্বনি। মসিগী মথক্তা, অনৌবা আইনশিং অসিনা নুপী অমসুং অঙাংশিংগী মায়োক্তা চত্থরিবা ক্রাইমশিং থেংনবদা খ্বাইদগী মরুওইবা পীরি।

অসিগুম্বা মগুন লৈরবা রিফোর্মশিং অসি ভিজনগী অহেনবা থৌনা অমা চঙই। অফবা গবর্নান্সকী ৱাহন্থোকপু নৌনা ৱাহন্থোক পীনবা থাজবা পীরিবা অতোপ্পা খোঙথাং অমা হায়রগদি লৈবাক অসিদা মীখলগী মতম চপ মান্নহন্নবা পার্লিয়ামেন্ততা পুখৎলকপা বিল অদুনি। ‘ৱান নেসন ৱান ইলেক্সন’ প্লান অসিনা  অতৈ কান্নবশিং পীবগী মথক্তা গবর্নান্সতা কন্সিস্তেন্দী প্রমোৎ তৌগনি, পোলিসী পেরালাইসিস ঙাকথোক্কনি, রিসোর্স দাইভর্জন হন্থহনগনি অমসুং ফাইনান্সিএল বর্দন হন্থহনগনি।

ঐখোয়গী সিভিলাইজেস্নেল হেরিতেজকা লোয়ননা অনৌবা মওংদা মরী লৈনরক্লি। হৌজিক ফাওবা চত্থরিবা মহাকুম্ভ অসি হেরিতেজ অদুগী মগুন অদুগী ফোংদোকফম অমনি হায়না লৌবা য়াই। ঐখোয়গী চৎনবী অমসুং কাংলোনশিংবু ঙাক-শেন্দুনা থম্নবা কলচরগী লমদা য়াম্না নুংঙাইবা থৌরাং কয়া অমা পায়খৎলি।

ভারত অসি লোল মখল-মখা কয়াগী হব অমনি। মসিগী মগুন অসিবু ঙাক-শেন্দুনা থম্নবা অমসুং শিংথানবগীদমক, সরকারনা অসামিজ, বেঙ্গালী, মারাথী, পালী অমসুং প্রাকৃতবু ক্লাসিকেল লোলশিং ওইনা শকখঙখ্রে। কাংলুপ অসিদা তামিল, সংস্কৃত, তেলুগু, কন্নর, মালয়ালম, অমসুং ওরিয়া য়াওরি। সরকারনা হৌজিক ক্লাসিকেল লোল 11দা রিসর্চ তৌবদা থৌনা হাপ্লি।

ভারতকী অহানবা আর্কিয়োলোজিকেল এক্সপরিএন্সিএল ম্যুজিয়ম গুজরাতকী বদনগরদা শঙ্গাবদা ঐহাক্না অপেনবা ফাওই। মসি খৃস্তগী মমাং চহি 800 অদুৱাইদগী মীওইবনা খুন্দারম্বগী খুদম উৎলিবা মফম অমগী মনাক্তা শাখি। ম্যুজিয়ম অসিনা তোঙান-তোঙানবা মতমগী কলা, খুৎশা হৈবগী থবক অমসুং নাৎকী মচাক কয়া অমা মফম অমদা পুনশিনগনি।

নুংশিরবা প্রজাশিং,

তুংদা, ঐখোয়গী নহা ওইরিবা জেনরেসন অসিনা ভারতকী তুংলমচৎপু শেমগৎকনি। মহৈ-মশিং তম্বনা নহাশিং অসিগী ৱাখল্লোনবু শেমগৎলি। মরম অদুনা, সরকারনা এজুকেসনদা শেল থাদবা হেনগৎহনখ্রে অমসুং সেক্তর অসিগা মরী লৈনবা পেরামিতর খুদিংমক ফগৎহন্নবা হোৎনরি। হৌজিক ফাওবদা ওইরক্লিবা মহৈশিং অসি পুক্নিং থৌগৎনিংঙাই ওই। হৌখিবা চহি তরা অসিদা মহৈ তম্বগী মগুন অমসুং ফিজিকেল ইনফ্রাস্ত্রকচর অমসুং দিজিতেল ইনক্লুজনগী মতাংদা এজুকেসনদা অহোংবা লাক্লি। মহৈ তম্বগী পাম্বৈগী ওইনা, লমদমসিগী লোলশিং অসি থাক কয়া অমদা প্রমোৎ তৌরি। মহৈরোয়শিংগী পার্ফোমেন্সতা মশক থোকপা ফগৎলকপা অসি থাজবা য়াবা নত্তে। হৌখিবা চহি তরা অসিদা ওজা ওইরকখিবা মীওইশিংগী চাদা 60 হেন্না নুপী ওইবনা নুপী ওজাশিংনা অহোংবা অসিদা মরুওইবা থৌদাং লৌখি হায়বসি খঙবদা ঐহাক নুংঙাইবা ফাওই।

ভোকেস্নেল অমসুং স্কিল এজুকেসন পাকথোক চাউথোকহনবা অমসুং মেনস্ত্রিমিং তৌবা অসি তরাম্না ওকপা অমনি। মসি হৌজিক ঐখোয়গী নহারোলশিংদা কোর্পোরেৎ সেক্তরদা ইন্তর্নশিপগী খুদোংচাবা পীনবগী স্কিমনাসু মপুং ফাহল্লি।

স্কুলগী থাক্তা এজুকেসনগী মপাঙ্গল কনখৎহন্দুনা, ভারতনা লৌশিংগী মখল কয়াগী লমশিংদা, মরু ওইনা সাইন্স অমসুং তেক্নোলোজীদা অনৌবা থাক্তা চঙশিল্লি। খুদম ওইনা হায়রবদা, মালেমদা ইন্তেলেকচুএল প্রোপর্তী ফাইলিংগী মতাংদা ভারতনা তরুকশুবদা লৈরি। ঐখোয়না গ্লোবেল ইন্নোবেসন ইন্দেক্সতা ঐখোয়গী রেঙ্কিং অসি লেপ্পা লৈতনা ফগৎহল্লে। 2020দা 48শুবা মফমদগী 2024দা 39শুবা মফমদা লৈখি।

মশাদা থাজবা হেনগৎলকপগা লোয়ননা, ঐখোয়না ইনিসিয়েতিবশিংগী পরিং অমগা লোয়ননা অৱাংবা থাক্কী রিসর্চতা ঐখোয়গী শরুক য়াবা হেনগৎহল্লি। নেস্নেল ক্বান্তম মিসনগী পান্দমদি তেক্নোলোজীগী অনৌবা ঙমখৈ অসিদা অচৌবা অমসুং ইনোবেতিব ইকোসিস্তেম অমা শেমগৎপনি। ইন্তরদিসিপ্লিনরী সাইবর ফিজিকেল সিস্তেমগী নেস্নেল মিসনগা লোয়ননা অতোপ্পা শিংথানিংঙাই ওইবা হৌরকফম অমা ওইরি। মসিনা আর্তিফিসিএল ইন্তেলিজেন্স, মেছিন লর্নিং, রোবোতিক্স অমসুং সাইবর সেক্যুরিতী য়াওনা এদভান্স তেক্নোলোজী কয়াদা মীৎয়েং থম্নবা থৌরাং তৌরি। তেক্নোলোজীশিং অসি মতম খরগী মমাং ফাওবদা ফ্যুচরিস্তিক কৌরম্মি, অদুবু মখোয় অসি ঐখোয়গী পুন্সিগী শরুক অমা ওইরক্লি।

জিনোম ইন্দিয়া প্রোজেক্ত অসি মহৌশাগী লমদা থিজিন হুমজিনবদা নুংঙাইবা থৌওং অমা ওইবতা নত্তনা মসি ভারতকী সাইন্সকী পুৱারীদা অচৌবা তাঙ্কক অমনি। মসিগী মরুওইবা প্রোগ্রাম অসিগী মখাদা, ভারত মচা 10,000গী জিনোম সিক্বেন্সিং অসি মখা তানা রিসর্চ তৌনবগীদমক থা অসিদা ফংহনখ্রে। মসিগী খোংজেল য়াংখৎপা প্রোজেক্ত অসিনা বাইওতেক্নোলোজীগী রিসর্চতা অনৌবা মীৎয়েং অমা হাংদোক্কনি অমসুং পব্লিক হেল্থকেয়র সিস্তেমদা অহোংবা অমা পুরক্লগনি।

ইন্দিয়ন স্পেস রিসর্চ ওর্গনাইজেসন্না হৌখিবা চহিশিংদা স্পেসতা অচৌবা খোঙথাং কয়া অমা লৌখৎলি। থা অসিদা, ইসরোনা মসিগী মায় পাক্লবা স্পেস দোকিং এক্সপেরিমেন্তকা লোয়ননা লৈবাক অসিবু অমুক হন্না চাউথোকচবা পোকহনখ্রে। হৌজিক ভারত অসি অসিগুম্বা তৌবা ঙম্বগী মগুন লৈবা মালেমগী মরিশুবা লৈবাক ওইরে।

লৈবাক অমা ওইনা ঐখোয়গী থাজবা হেনগৎলক্লিবা অসি ঐখোয়গী শান্নরোয়শিংনা থোইদোক হেন্দোক্না মায় পাকপগী ৱারী কয়া ইরিবা স্পোর্তস অমসুং গেমশিংগী লমদসু উবা ফংলি। হৌখিবা চহিদা ঐখোয়গী শান্নরোয়শিংনা ওলিম্পিক গেম্সতা মফম কনবা ঙমখি। পেরালিম্পিক্স গেম্সতা, ঐখোয়না খ্বাইদগী চাউবা কন্তিঞ্জেন্ত অমা থাগৎখি, অমসুং মখোয়না খ্বাইদগী ফবা পর্ফোমেন্স অমগা লোয়ননা হল্লকখি। ঐখোয়গী শান্নরোয়শিংনা মালেমদা ইকায় খুম্নখি। ঐখোয়গী নুপা অমসুং নুপীশিংনা FIDE শান্নরোয় ওলিম্পিয়াদতা সনাগী তকমান ফংখি। 2024 ফাওবদা স্পোর্তসতা ফংখিবা মায়পাকপশিং অসিদা খ্বাইদগী নহা ওইরিবা ৱার্ল্দ চেমপিয়ন ওইখিবা দি. গুকেশনা মগুন হাপখি।

গ্রাউন্দ লেভেলদা ত্রেনিং ফেসিলিতীশিংদা চাউনা ফগৎলকপা অসিনা মতেং পাংদুনা, শান্নরোয়শিং অসিনা মখোয়গী মায় পাকপগী থৌনা অদুদা ঐখোয়বু চাউথোকহল্লি অমসুং মথংগী চারোন-শুরোনশিংবু হেন্না ৱাংখৎনবা পুক্নিং থৌগৎলি।

মপান লৈবাক্তা লৈবা ঐখোয়গী ইচিল-ইনাওশিংনা ঐখোয়গী কলচর অমসুং সিভিলাইজেসনগী খ্বাইদগী ফবা অদু মালেমগী তোঙান তোঙানবা মফমশিংদা পুখৎলি অমসুং তোঙান তোঙানবা লমশিংদা মখোয়গী মায়পাকপশিং অদুনা ঐখোয়বু চাউথোকচবা পোকহল্লি। মখোয়না মতম পুম্নমক্তা মখোয় মশাবু ভারতকী ৱারীগী শরুক অমা ওইনা লৌদুনা লাক্লি। ঐহাক্না থা অসিগী অঙনবা শরুক্তা প্রভাসী ভারতী দিবসতা হায়খিবা অদুগুম্না, 2047 ফাওবদা বিক্সিত ভারত অমা, চাউখৎলবা ভারত অমা শেমগৎপদা মখোয়গী থৌনা ফবা অমসুং পুক্নিং থৌগৎপা শরুক য়াবদা ঐহাক্না থাজবা থম্লি।

নুংশিরবা প্রজাশিং,

হীরম কয়াদা মপুং ফানা অমসুং ময়েক শেংনা খুমাং চাউশিল্লকপদা থাগৎপা ফোংদোকচরি। ঐখোয়গী তুংলমচৎকী মরুওইবা অসি ঐখোয়গী নহাশিং অমসুং মরুওইনা নহা ওইরিবা নুপীশিংনি। মখোয়গী মঙলানশিং অসিনা ঐখোয়গী নীংতম্বগী চহি চা মপুং ফারকপা থৌরম পাংথোক্কদৌরিবা ভারত অসি শেমগৎলি। অমসুং ঙসিগী অঙাংশিংনা 2050গী জনুৱারী 26তা তিরঙ্গাদা ইকাই খুম্নবা মতমদা, মখোয়না মখোয়গী মথংগী মীরোনদা হায়রগনি মদুদি ঐখোয়গী অতৈগা মান্নদবা সম্বিধান্না লমজিং-লমতাকপীদ্রবদি মসিগী অচৌবা খোংজং অসি ওইথোকপা ঙম্লোই।

ঐখোয়গী তুংগী মীরোনশিংনসু মালেম অসিদা নীংতম্বা ভারতকী মিসন অসি নিংশিংদুনা লৈহৌরগনি। জাতিগী মপা, মহাত্মা গান্ধীগী ৱাহৈদা হায়রবদা [অমসুং ঐহাক্না কোৎ তৌরি]

“স্বরাজ অসি ঐখোয়বু সিভিলাইজ ওইনবা, অমসুং ঐখোয়গী সিভিলাইজেসন অসি শেংদোক্নবা অমসুং স্তেবিলাইজ তৌনবা নত্ত্রবদি, মসি করিসু ওইথোক্লোই। ঐখোয়গী সিভিলাইজেসনগী মরুওইবা অসিদি ঐখোয়না মীয়ামগী ওইবা নৎত্রগা প্রাইভেৎ ওইবা, ঐখোয়গী থৌওং পুম্নমক্তা লমচৎ শাজৎপু খ্বাইদগী মরুওইবা মফম অমা পীবনি”।

ঙসি, গান্ধীজীগী মঙলানশিং মংফাওনহন্নবা হোৎনবদা ঐখোয়গী অচেৎপা ফিরেপ অদু অমুক হন্না শৌগৎলসি। মহাক্কী ৱারোলশিং, অচুম্বা অমসুং হিংসা য়াওদবা অসি মালেম পুম্বগী ওইনা মখা তানা মরী লৈনগনি। মহাক্না ঐখোয়দা তাকপীখি মদুদি হক অমসুং থৌদাংশিং অসি কোইন অমগী নাকল অনি খক্তনি। তশেংনা হায়রবদা, হকশিংগী অশেংবা হৌরকফম অসি থৌদাংনি। ঙসি ঐখোয়না মহাক্কি করম্না নুংশিবা হায়বদুসু নীংশিংলি। ঐখোয়গী মীওইবা য়ুম্লোন্নবশিং খক্তগী নত্তনা ঐখোয়গী অতোপ্পা য়ুম্লোন্নবশিং, হায়বদি, পাম্বীশিং অমসুং শা-ঙাশিং, তুরেলশিং অমসুং চীংশিংদা করম্না নুংশিবা হায়বদুসু নীংশিংলি।

মালেমগী ওইনা অইং-অশা হোংলকপগী খুদোংথীবা অসি থেংননবা হোৎনবদা ঐখোয় খুদিংনা শরুক য়াগদবনি। হীরম অসিগী মতাংদা খুদম ওইরবা খোঙথাং অনি লৌখৎখ্রে। মালেমগী থাক্তা, ভারতনা মীওইশিং অমসুং কম্ম্যুনিতীশিংবু অকোয়বগী ফিভম ঙাক্নবা অমসুং ঙাক-শেন্নবদা হেন্না প্রো-এক্তিব ওইহন্নবা ইথিল পীনবগীদমক, মিসন লাইফস্তাইল ফোর এনভাইরনমেন্ত কৌবা মাস মুভমেন্ত অমা লুচিংলি। মমাং চহিদা, মালেমগী অকোয়বগী ফিভমগী নুমিৎতা, ঐখোয়না 'এক পের মা কে নাম' হায়বা অখন্নবা কেম্পেন অমা হৌদোকখি। মসিনা ঐখোয়গী ইমাশিং অমসুং মহৌশাগী ইমাগী মপাঙ্গল অদুদা ইকায় খুম্নবা উৎলি। মতমগী মতুং ইন্না উ-চারা করোর 80 থাবগী পান্দম অসি ফংলে। মালেমনা অসিগুম্বা ইনোবেতিব ওইবা খোঙথাংশিং অসিদগী তমজবা য়াই মদু মীওইশিংনা মখোয় মশাগী খোঙথাংশিং ওইনা শিজিন্নবা য়াই।

নুংশিরবা প্রজাশিং,

ঐহাক্না অমুক্কা হন্না ময়াম পুম্নমকপু রিপব্লিক দেগীদমক্তা হন্না-হন্না নুংঙাইবা ফোংদোকচরি। ঐখোয়গী ঙমখৈ ঙাক্লিবা লান্মীশিং অদুগা ঙমখৈগী মনুংদা ঙাক্লিবা পুলিস অমসুং পেরামিলিতরী পর্সনেলশিংবু ঐহাক্না থাগৎপা ফোংদোকচরি। ঐহাক্না জুদিসিয়রী, ব্যুরোক্রেসী অমসুং মপান লৈবাক্তা লৈরিবা ঐখোয়গী মিসনশিংগী মেম্বরশিংদসু নুংঙাইবা ফোংদোকচরি। অদোমগী থবক থৌরম পুম্নমক্তা ঐহাক্না য়াইফ-পাউজেল পীজরি।

থাগৎচরি।

জয় হিন্দ!

জয় ভারত!

***