Ka Secretariat jong u/ka President
Plie paidbah ka President jong ka ri ia ka jingrakhe National Space Day kaba nyngkong
Posted On:
23 AUG 2024 1:31PM by PIB Shillong
Ka President jong ka ri, Droupadi Murmu ka la plie paidbah ia ka jingrakhe National Space Day kaba nyngkong ha Bharat Mandapam ha New Delhi mynta ka sngi (23 tarik Nailar, 2024). Ia ka National Space Day la rakhe ban kynmaw burom ia ka jingpoi jong ka ‘Vikram’ Lander sha u bnai ha ka 23 tarik Nailar, 2023. Ka President ka la sam ia ki khusnam sha ki lahduh jong ka ‘Robotics Challenge’ bad ‘Bharatiya Antariksh Hackathon’ ha kane ka jingialang.
Ha ka jingai jingkren ha ka jingialang, ka President ka la ong ba ka ISRO ka la iaid ha ka lynti kaba jrong naduh ba la sdang ia ka. Ka la ioh ia ki jingjop kiba khraw ha ka kam ba iadei bad ka haw haw. Nalor kane, ka ISRO ka la nohsynniang shikatdei sha ka jingkyntiew ia ka imlang sahlang bad ioh ka kot jong ka ri. Ka la iaroh ia ki scientist kiba la trei shitom ban kyntiew ia ka kam jong ka India ba iadei bad ka haw haw sha ki kyrdan ba iaryngkat bad kiwei kiwei ki ri kiba la kham tbit ha kane ka kam da kaba pyndonkam ia ki katto katne ki jingdon jingem. Ka la pynpaw ba ka ngeit skhem ba ka ri jong ngi kan nang kiew shaphrang ha kaba iadei bad ka space science bad ngin nang bteng ban trei ha ka rukom kaba seisoh.
Ka President ka la ong ba ka jingkiew shaphrang ki kam haw haw jong ka India kalong kaba phylla. La kadei ka jingjop jong ka Mars Mission ha kaba ki jingdon jingem ki duna, lane ka jingpynher palat shispah tylli ki satellite shisien pynher, ngi la ioh shibun ki jingjop.
Ka President ka la ong ba ka jingphaikhmat sha ki kam haw haw ka la kyntiew ia ka bor treikam jong ki briew bad pynkylla ia ka jingmut jingpyrkhat sha ka jingshisha. Hynrei ka jingphaikhmat sha ki kam haw haw kalong ka kam kaba eh. La pynlong ia ka jingwad bniah ban weng ia ki jingeh ha ka por ba leit sha ka haw haw bad kane ka la pynsted ia ka jingkiew shaphrang ka science bad ka jingim jong ki briew. Bun ki kam ki la ioh jingmyntoi na ki jingshem kiba mih na ki kam kiba iadei bad ka haw haw, ba kynthup ia ka koit ka khiah bad ki dawai, ki lad ka leit ka wan, ka jingshngain, ka bording, ka mariang bad ka information technology.
Ka President ka la ong ba haba la plie lad ia ki briew bad ki kynhun shimet ba kin iadon kti ha ki kam kiba iadei bad ka haw haw, ki startup ki la bun bha ha ka por kaba duna. Kane ka la kyntiew ia ka kam wad bniah shaphang ka haw haw bad ka la plie ia ki lad kiba thymmai ia ki samla ba kin pyni bad pynkhlain ia ki sap jong ki. Ka la ong ba ka kmen ba dang ha kine ki bnai, ka kompani na India ka la pynher ia u single-piece 3D printed semi-cryogenic engine-powered rocket, kaba long ka sien kaba nyngkong ban leh ia kane.
Ka President ka la ong ba ngi dei ban pynkhreh ialade ia ki jingeh ki ban wan. Ki mar jot mar pei ba her ha ka haw haw ki buh jingeh ia ki kam ban leit sha ka haw haw. Ka la iaroh ia ka ‘ISRO System for Safe & Sustainable Operations Management’ kaba dang pyntreikam ban pynthikna ka jingkiew shaphrang ha ki jingwad bniah shaphang ka haw haw. Ka la ong ruh ba ka kmen ba ka India ka dang iaid shaphrang ban pynlong ba ki kam haw haw jong ka ki lait na ka jingpynjakhlia ia ka haw haw shuwa u snem 2030.
Sngewbha shon hangne ban ioh ia baroh kawei ka jingai jingkren jong ka President -
***
(Release ID: 2048655)
Visitor Counter : 7
Read this release in:
English
,
Urdu
,
Hindi
,
Hindi_MP
,
Marathi
,
Bengali
,
Bengali-TR
,
Manipuri
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam