ভারতকী রাস্ত্রপতি শ্রীমতি দ্রৌপদি মুর্মুনা ঙসি (ওগস্ত 23, 2024) ন্যু দিল্লীগী ভারত মান্দপমদা অহানবা নেস্নেল স্পেস দেগী পালন থৌরমদা শরুক য়াখ্রে। নেস্নেল স্পেস দে অসি ওগস্ত 23, 2023দা “বিক্রম” লেন্দরনা থাগী লৈমায়দা মায় পাক্না লেন্দ তৌখিববু অদু নীংশিংদুনা পাংথোক্লি। থৌরম অদুদা রাস্ত্রপতিনা "রোবোতিক্স চেলেঞ্জ" অমসুং "ভারতীয় এন্তারিক্ষ হেক্কাথোন"গী মায় পাক্লবশিংদা মনাশিং পীখি।

থৌরম অদুদা ৱা ঙাংলদুনা রাস্ত্রপতিনা হায়খি মদুদি ISRO না হৌরকপগী মতমদগী হৌদুনা য়াম্না ফবা খোঙচৎ অমা চংশিনখ্রে। মানা স্পেস সেক্তরদা শিংথানীংঙাই ওইবা মওংদা মায় পাকখ্রে। মসিগা লোইননা, লৈবাক অসিগী খুন্নাই অমসুং শেন্মিৎলোন চাউখৎপদা ISROনা থোইদোক হেন্দোক্না কান্নবা পীরি। ভারতকী স্পেস প্রোগ্রামবু খ্বাইদগী হন্থবা রিসোর্স শিজিন্নদুনা মালেমগী খ্বাইদগী ফবা স্পেস প্রোগ্রামশিংগী মরক্তা চলহল্লিবা কত্থোক্লবা সাইন্তিস্তশিংবু মহাক্না থাগৎপা ফোংদোকখি। মহাক্না থাজবা থমখি মদুদি ঐখোয়গী লৈবাক অসিনা স্পেস সাইন্সতা লেপ্পা লৈতনা খুমাং চাউশিল্লগনি অমসুং ঐখোয়না এক্সিলেন্সকী অনৌবা স্তেন্দর্দশিং লেপ্তনা থমগনি।

ভারতকী স্পেস সেক্তরগী খুমাং চাউশিল্লকপা অসি অখন্নবা অমনি হায়না রাস্ত্রপতিনা হায়খি। রিসোর্স মরাং কায়দনা মায় পাক্না মার্স মিসন অমা লোইশিনখিবা ওইগেরা নত্ত্রগা অমুক্তদা সেতলাইত 100 হেন্না মায় পাক্না থাগৎখিবা ওইগেরা, ঐখোয়না চাউথোকচনীংঙাই ওইবা মায়পাকপা কয়া অমা ফংলে।

রাস্ত্রপতিনা হায়খি মদুদি স্পেস এক্সপ্লোরেসন্না মীওইবগী তৌবা ঙম্বশিং হেনগৎহল্লি অমসুং ঐখোয়গী ৱাখল্লোনবু মঙফাওনবা ঙমহল্লি। অদুবু স্পেস এক্সপ্লোরেসন অসি শীংনবনা থনবা থবক অমনি। স্পেস এক্সপ্লোরেসনগী মনুংদা লৈরিবা প্রোব্লেমশিং কোকহন্নবা হোৎনরিবা রিসর্চ অসিনা সাইন্সকী দিবেলপমেন্ত খোঙজেল য়াংশিনহল্লি অমসুং মীওইবগী পুন্সি ফগৎহল্লি। হেল্থ অমসুং মেদিসিন, ত্রান্সপোর্ত, সেক্যুরিতী, ইনর্জী, এনভাইর্নমেন্ত, অমসুং ইনফোর্মেসন তেক্নোলোজী য়াওনা সেক্তর কয়ানা স্পেস সেক্তরদা চাউখৎলকপশিংদগী কান্নবা ফংলি।

স্পেস সেক্তরবু প্রাইবেৎ সেক্তরগীদমক হাংদোকপগা লোননায়, স্তার্ত-অপশিংগী মশিং য়াম্না থুনা হেনগৎলক্লি হায়না প্রসিদেন্তনা পনখি। মসিনা স্পেস রিসর্সতা খুমাং চাউশিল্লকপতা নত্তনা ঐখোয়গী নহাশিংদা মখোয়গী হৈশিংবশিং উৎনবা অমসুং মপাঙ্গল কনখৎহন্নবা অনৌবা খুদোংচাবা কয়া পীরি। থা খরগী মমাংদা, ভারতকী কম্পনী অমনা অহানবা ওইনা 3D প্রিন্ত তৌরবা সেমি-ক্রাইওজেনিক ইঞ্জিন্না চলাইবা রোকেৎ অমা মায় পাক্না থাগৎপা ঙমখিবদা মহাক্না নুংঙাইবা ফোংদোকখি।

রাস্ত্রপতিনা হায়খি মদুদি ঐখোয়না তুংলমচৎকী শীংনবশিংগীদমক্তা শেম-শাদুনা লৈগদবনি। স্পেস মিসনশিংদা স্পেস দেব্রিজনা খুদোংচাদবা থোকহনবা য়াই। মহাক্না স্পেস রিসর্চকী থবক থৌরমশিংদা লেপ্তনা খুমাং চাউশিলহন্নবা হোৎনরিবা ' ISRO সিস্তেম ফোর সেফ এন্দ সস্তেনেবল ওপরেসন মেনেজমেন্ত'গী ফেসিলিতী অদু থাগৎপা ফোংদোকখি। ভারতনা 2030 ফাওবগী মনুংদা মসিগী স্পেস মিসন পুম্নমক দেব্রিজ-ফ্রী ওইহন্নবা মাংলোমদা চংশিল্লিবা অসিদা মহাক্না নুংঙাইবা ফোংদোকখি।

রাস্ত্রপতিগী ৱারোল য়েংনবগীদমক মসিদা নম্বীয়ু -

***