মহৈ মশিংগী রাজ্য মন্ত্রী, দোক্তর সুভাস সরকারনা, লৈবাক পুম্বদগী অমদি মপান লৈবাক্তগীসু য়াওনা মহৈরোয়, মমা মপা অমদি ওজাশিংনা প্রধান মন্ত্রীগা ৱারী শাদুনা চাংয়েংশিংনা ৱাখল ৱাহনবা খন্ননবা অমদি মদুবু কোকহন্নবা লোয়ননা পুন্সিবু কুমহৈগুম হরাও তয়াম্না পাঙথোক্কদবা, প্রধান মন্ত্রী শ্রী নরেন্দ্র মোদীগী তোপ তোপ্পা ৱারী ৱাতায় শাবগী থৌরম – পরিক্ষা পে চর্চা (পি.পি.সি.)গী মতাঙদা পাউগী মীফম অমা পাঙথোকখ্রে‍।

দোক্তর সরকারনা থৌরম অসি হৌখিবা চহি তরুকসিদা মহৈ মশিং মন্ত্রালয়গী দিপার্তমেন্ত ওফ স্কুল এজুকেসন এন্দ লিতরেসীনা মায় পাক্না পাঙথোক্তুনা লাক্লি হায়না ফোঙদোকখি‍। পি.পি.সি.গী অহানবা ইদিসন অহুমদি নই দিল্লীদা তাউন-হোল ইন্তরেক্তিব মওংদা পাঙথোকখিবনি‍। কোবিদ-১৯ লাইচৎনা মরম ওইরগা, মরিশুবা ইদিসনদি দুরদর্শন অমদি চৌবা তিভি চেনেল পুম্নমক্তা থৌরম তেলিকাস্ত তৌদুনা ওনলাইন্দা পাঙথোকখি‍।

পি.পি.সি.গী মঙাশুবা অমদি তরুকশুবা ইদিসন অমুক হন্না নই দিল্লীগী তালকতোরা স্তেদিয়মদা তাউন-হোল মওংদা পাঙথোকখি‍‍। মমাঙ চহিগী (২০২৩) অথোই অহেন তান্নবদা মহৈরোয় লাখ ৩১.২৪, ওজা লাখ ৫.৬০ অমদি মমা মপা লাখ ১.৯৫রোম্না শরুক য়াখি‍।

পরিক্ষা পে চর্চাগী ৭শুবা ইদিসন অসিগীদমক মাইগোভ পোর্তেলদা রেজিস্ত্রেসন করোর ২.২৬ তৌরকখি হায়নসু মহাক্না পাউদমখি‍। মসিনা লৈবাক শিনবা থুংনা মহৈরোয়শিংগী মরক্তা লৈরিবা মথুম মরাং হৌবা, তোপ তোপ্পা থৌরমসিদা শরুক য়ানিংবা অমদি প্রধান মন্ত্রীগা ৱারী শাননিংবগী লাংতক্নবা মতৌ উৎলি‍ হায়না মহাক্না মখা তাখি‍।

চহি অসিগী ওইনা পরিক্ষা পে চর্চা অসি ভারত মন্দপম, ITPO, প্রগতী মৈদান, নই দিল্লীদা জনুৱারী ২৯, ২০২৪গী অয়ুক পুং ১১ তাবা মতমদগী হৌরগা তাউন-হোলগী মওংদা পাঙথোক্কনি‍। থৌরম অসিদা মীওই ৩০০০ লোম্না প্রধান মন্ত্রীগা ৱারী শাগনি হায়না দোক্তর সরকারনা হায়খি‍।

স্তেত অমদি য়ু.তি. খুদিংদগী মহৈরোয় অনি অমদি ওজা অমমম লোয়ননা কালা উতসব অমসুং ভীর গাথা কম্পিতিসনগী অথোয়বশিংবু মপুং ওইবা থৌরম অসিগী অখন্নবা মীথুং ওইনা শরুক য়ানবা পাউকৎ পীখ্রে‍। থৌরম অসি হৌরকপদগী হৌরগা অহানবা ওইনা লৈবাকসিগী তোঙান তোঙানবা মফমশিংদগী এক্লব্যা মোদেল রেসিদেন্সিএল স্কুল (ই.এম.আর.এস.)শিংদগী মহৈরোয় চাম্মনা শরুক য়াগনি‍ হায়নসু মহাক্না পাউদমখি‍।

থৌরম অসিদা শরুক য়াননবগীদমক, ক্লাস ৬ তগী ১২ ফাওবগী মহৈরোয়শিং, ওজাশিং, অমদি মমা মপাশিংগী ওইবা ওনলাইন MCQ কম্পিতিসন মাইগোভ পোর্তেলদা দিসেম্বর ১১, ২০২৩দগী জনুৱারী ১২, ২০২৪ ফাওবা পাঙথোকখি‍। মাইগোভ পোর্তেলদা মখোয়না খুম্লকপা ৱাহংশিংগী পাউখুমদা য়ুম্ফম ওইরগা শরুক য়াগদবা মীওইশিং খনগৎখি‍। মখোয়গী মফমদা প্রধান মন্ত্রীনা ইবা হিন্দী অমদি ইংলিসকী একজাম ৱারিয়র্স লাইরিক, অমসুং শকখঙচে অমা য়াওবা অখন্নবা পরিক্ষা পে চর্চা কিত লান্থোক্কনি হায়না মহাক্না ফোঙদোকখি‍।

পরিক্ষা পে চর্চা অসি নহাশিংগীদমক ৱাখল ৱাবা লৈতবা ফীভম অমা শেম্নবগীদমক প্রধান মন্ত্রীনা লুচিংবা হেন্না চাউবা ইহৌ - ‘একজাম ৱারিয়র্স’কী শরুক অমনি হায়না মহাক্না মখা তাখি‍।

মসি অঙাং খুদিংগী তোপ তোপ্পা শক্তমবু শকখঙবিগদবা, পুক্নিং থৌগৎপিগদবা অমদি মপুং ফানা ফোঙদোকচবা ঙমহনবিগদবা ফীভম অমা পুরক্নবগীদমক মহৈরোয়, মমা মপা, ওজা অমদি খুন্নাইবু পুনশিন্ননবা প্রধান মন্ত্রীগী থৌরাংদা থৌদুনা পুবা ইহৌ অমনি হায়না মহাক্না ফোঙদোকখি‍।

মসিদা মীৎয়েঙ থম্লগা, মপুং ওইবা থৌরমগী মাঙওইননা পাঙথোকপা থৌরম অমা ওইনা জনুৱারী ১২, ২০২৪, হায়বদি য়ুথ দে নুমিত্তগী হৌরগা জনুৱারী ২৩, ২০২৪ ফাওবা, মরাথোন লমজেল, ঈশৈ চাংদম্নবা, মিম চাংদম্নবা, স্ত্রীত প্লে, মহৈরোয়-এঙ্কর-মহৈরোয়-মীথুং খন্ন-নৈনবা থৌরম্নচিংবা নুংঙাইরবা থবক থৌওংশিং য়াওবা থৌরম কয়া স্কুলগী থাক্তা পাঙথোক্কনি‍ হায়না মহাক্না মখা তাখি‍।

জনুৱারী ২৩, ২০২৪দা লৈবাক পুম্বগী ওইবা লাই য়েকপগী অথোই অহেন তান্নবগী থৌরম অমা লৈবাক শিনবা থুংনা দিস্ত্রিক্ত ৭৭৪দা লৈবা কেন্দ্রিয় বিদ্যালয় ৬৫৭ অমদি নবোদয়া বিদ্যালয় ১২২দা পাঙথোকখি‍। প্রধান মন্ত্রী শ্রী নরেন্দ্র মোদীনা ইবা লাইরিক একজাম ৱারিয়র্সতগী লৌথোকপা চাংয়েংগী লাইৱাশিংদা য়ুম্ফম ওইরগা পাঙথোকখিবা অচৌবা থৌরম অদুদা মহৈরোয় লিশিং ৬০ হেনবনা শরুক য়াখি‍। মহৈরোয় অমদি ওজাশিংনা লাই য়েকপা চাংদম্নবা অদুদা হরাও তয়াম্না অমদি মথুম মরাং হৌবা মতৌ উত্তুনা শরুক য়াখি হায়নসু মহাক্না ফোঙদোকখি‍।

******