য়োর এক্সেলেন্সী, প্রেসিদেন্ত রানিল ৱিক্রেমেসিংহে,

লৈবাক অনিমক্কী মীথুংশিং,

মেদিয়াগী মরূপশিং

হেল্লো!

অয়ুবোৱান!

বনক্কম!

ঐনা প্রেসিদেন্ত ৱিক্রেমেসিংহে অমদি মহাক্কী দেলিগেসনবু ভারত্তা তরাম্না ওকচরি‍। ঙসি, প্রেসিদেন্ত ৱিক্রেমেরেসিংহেনা মহাক্কী ওফিস পায়রকপা চহি অমা মপুং ফারে‍। থৌরম অসিদা, ঐখোয় পুম্নমক্কী মহুৎ শিল্লগা, ঐনা মহাক্কী মফমদা য়াইফ-পাউজেল পীজরি‍। হৌখিবা চহি অমা অসি স্রি লঙ্কাগী মীয়ামগীদমক্তদি শিংনবনা থনখি‍। অচানবা মরুপ অমা ওইনা, হান্নগী মতৌগুম, ঐখোয়না লাংফমগী পুংফম অসিদা স্রি লঙ্কাগী মীয়ামগা লোয়ননা লেপমিন্নরি‍। অদুগা ঐনা স্রি লঙ্কাগী মীয়ামবু হায়রিবা শিংনবনা থল্লবা ফীভমশিংবু থৌনা ফনা থেংনখিবগীদমক থাগৎলি‍।

মরূপশিং,

ঐখোয়গী মরী ঐখোয়গী খুন্থোক্লোনগুম্না লিরবা অমদি পাক চাউবা মরীনি‍। স্রি লঙ্কানা ভারতকী ‘নৈবর্হুদ ফর্স্ত’ পোলিসী অমদি ‘সাগর’ ভিজন অনিমক্তা মরুওইবা মফম কল্লি‍। ঙসি ঐখোয়না নাকল অনিগী ওইবা, রিজনেল অমদি মালেমগী ওইবা ৱাফমশিংগী ঐখোয়গী ৱাখল্লোনশিং ফোঙদোক্নরি‍। ভারত অমসুং স্রি লঙ্কাগী সিক্যুরিতী ইন্তরেস্ত অমদি চাওখৎপগী ৱাফমশিং অমগা অমগা মরী লৈনৈ হায়না ঐখোয়না থাজৈ‍। মরম অদুনা, অমনা অমগী শাফনবা অমদি হুল্লিবা ইহুলশিং খঙনা পুন্না থবক তৌমিন্নবা মরুওই‍।

মরূপশিং,

ঙসি ঐখোয়না ঐখোয়গী শেন্মিৎলোনগী খোঙবু ওইমিন্নবগী ভিজন দোকুমেন্ত অমা শেম্লে‍। হায়রিবা মঙলানসি লৈবাক অনিগী মরক্তা সমুদ্রগী, নোংথক্কী, ইনর্জী অমদি মীগা মীগগী মরক্তা লৈনরিবা মরীশিং মপাঙ্গল কনখৎহন্নবনি‍। মঙলান অসি তুরিজম, পৱার, ত্রেদ, হাইয়র এজুকেসন অমদি স্কিল দিভেলপমেন্তকী লমদা অমনা অমবু তেঙবাংনবগী ফীভম খোঙজেল য়াঙশিলহন্নবনি‍। মসি ভারতনা স্রি লঙ্কাগীদমক মতম শাংনা লেপকদবা খোঙফম অদুগী মঙলান্নি‍।

মরূপশিং,

ঐখোয়না ইকনমিক এন্দ তেক্নোলোজিকেল কোওপরেসন এগ্রীমেন্তকী মতাঙদা ৱারী শানবা থুনা হৌনবা লেপ্নরে‍। মসিনা লৈবাক অনিমক্তা ত্রেদ অমদি ইকনমিক কোওপরেসনগী অনৌবা খুদোংচাবা কয়া হাংদোরক্কনি‍।

ঐখোয়না ভারত অমসুং স্রি লঙ্কাগী মরক্তা নোংথক্কী লম্বী শম্নবা হেনগৎহন্নবা য়ানরে‍। বিজিনেস অমদি মীয়াম চত্থোক চৎশিন হেনগৎহন্নবগীদমক তামিল নাদুগী নাগপত্তিনম অমদি স্রি লঙ্কাগী কনকে সন্থুরাইগী মরক্তা পেসেঞ্জর ফেরী সর্ভিস হৌননবা ৱারেপসু লৌরে‍।

লৈবাক অনিগী মরক্তা ইলেক্ত্রিসিতী গ্রিদ শম্নহনবগী থবক খোঙজেল য়াংখৎহন্নবা ঐখোয়না ৱারেপ্নরে‍। ভারত অমসুং স্রি লঙ্কাগী মরক্তা পেত্রোলিয়ম পাইপলাইন থম্বা য়াবরা হায়বগী মতাঙদা থিজিল্লগনি‍। মসিগী মথক্তা, কংফালগী থোং অমসু শাবা য়াবরা হায়বা য়েংশিল্লগনি‍। স্রি লঙ্কাদা য়ু.পি.আই. হৌদোক্নবা ঙসি খুৎয়েক পীনরিবা য়ানচে অসিনা ফিনতেক কন্নেক্তিবিতীসু হেনগৎহল্লগনি‍।

মরূপশিং,

ঙসি ঙামীশিংগী পুন্সি হিংনবগী লম্বীগা মরী লৈনবা ৱাফমশিংসু ঐখোয়না খন্নখি‍। হীরম অসিগী মতাঙদা মীওইবগী মিনুংসিগা লোয়ননা থবক চঙশিন্নবা ঐখোয়না য়ানরে‍। ঐখোয়না স্রি লঙ্কাবু অমুক্কা হন্না শেমগৎপা অমদি শন্তাইনবগী মতাঙদসু ৱারী শানখি‍। প্রেসিদেন্ত ৱিক্রেমেসিংহেনা মহাক্কী পুম্নমক কোনশিন্দুনা চঙশিল্লিবা থৌরাংগী মতাঙদা ৱাফম কয়া পাউদম্লকখি‍।

স্রি লঙ্কা লৈঙাক্না তামিল মীয়ামগী অনিংবা অপাম্বা ফংহনগনি, থোং মান্নবা, অচুম্বা ৱায়েল অমদি ইং তপ্পা পুরক্নবগী থৌরাংশিং পায়খৎকনি, তরাহুমদোইশুবা এমেন্দমেন্ত পায়খৎনবগী মাগী খোঙফম চেৎনা লেপ্তুনা প্রোভিন্সিএল কাউন্সিল মীখল পাঙথোক্কনি, অমদি স্রি লঙ্কাদা লৈরিবা তামিল মীয়ামগী ইকায়ুম্নবা ঙাক্না চাউথোকচনা হিংজবা ফংহনগনি হায়না ঐনা থাজৈ‍।

মরূপশিং,

চহি অসি ঐখোয়না নাকল অনিগী ওইবা মরীদা মরুওইবা চহি অমা ওইরি‍। ঐখোয়গী দিপ্লোমেতিক ওইবা মরীগী ৭৫শুবা কুমওন থৌরম ঐখোয়না পাঙথোক্লি‍। অদুগা ভারতকী তামিল ফুরুপ্না স্রি লঙ্কাদা লৈরকপা চহি ২০০ ফারক্ল‍ে‍। থৌরম অসিদা স্রি লঙ্কাদা লৈবা ভারত্তগী হৌখিবা তামিল মীয়ামগীদমক লুপা কর,র ৭৫ তাবা তোঙান তোঙানবা প্রোজেক্তশিং পায়খৎলগনি হায়না পাউদমজবদা ঐঙোন্দা নুংঙাইবা ফাওই‍। মসিগী মথক্তা, ভারতনা স্রি লঙ্কাগী অৱাংথংবা অমদি নোংপোক থংবা শরুকশিংদা চাওখৎ থৌরাংগী থবকশিং পায়খৎপদা মতেঙসু পাংগনি‍।

এক্সেলেন্সী,

মরা চেৎপা, সিক্যুর ওইবা অমদি নুংঙাই য়াইফবা স্রি লঙ্কা হায়বসি ভারতকী ইন্তরেস্তখক্তা নত্তনা ইন্দিয়ন ওসীন রিজন পুম্নমক্কী ইন্তরেস্তনি‍। ঐনা অমুক্কা হন্না থাজবা পীজরি মদুদি অৱাবা তারিবা পুংফমসিদা ভারতকী মীয়াম্না স্রি লঙ্কাগী মীয়ামগীদমক লেপ্লি‍।

ময়ামবু হন্না হন্না থাগৎচরি‍।

দিসক্লেমর – মসি প্রধান মন্ত্রীগী প্রেসতা পীবা ৱারোলগী চাউরাকপা ৱাহন্নি‍। অশেংবা প্রেসতা পীবা ৱারোলদি হিন্দীদা পীখিবনি‍।

***