U Myntri Rangbah duh ka ri, u Narendra Modi u la ai jingkren ha ka National Rozgar Mela lyngba ka video conferencing mynta ka sngi bad sam kumba 70,000 tylli ki shithi thung kam sha kito kiba dang rung kam thymmai ha ki tnat sorkar bapher bapher. . Kine kiba ioh kam thymmai, ia kiba la jied na kylleng ka ri kin rung ha ki tnat bapher bapher jong ka Sorkar kiba kynthup ia ki tnat Financial Services, Posts, School Education, Higher Education, Defence, Revenue, Health and Family Welfare, Atomic Energy, Railways, Audit and Accounts, Atomic Energy bad Home Affairs ha ryngkat kiwei kiwei. La pyniasoh ia 43 tylli ki jaka bad ka Mela ha ka jingai jingkren jong u Myntri Rangbah duh.

Ha ka jingai jingkren ha ka jingialang, u Myntri Rangbah duh u la ong ba ka National Rozgar Mela ka la long ka thymmei ba thymmai jong ka sorkar ba mynta ha kaba la aiti ia ki shithi thung kam sha palat 70,000 ngut mynta ka sngi. U la pynpaw ka jingkmen ba ki jylla ba synshar ka BJP bad NDA ki la pynlong man ka por ia kum kine ki Rozgar Mela. Da kaba ong ba ka Azadi Ka Amrit Kaal ka dang sdang, u Modi u la ong ba kane kalong ka por kaba kongsan bha ia kito ki ban iasoh ha ki kam jong ka sorkar namar ki don ka lad ban nohsynniang ban pynlong ia ka India ka ri kaba la kiew ha ki 25 snem ban wan. “Ryngkat bad kaba don mynta, phi dei ban leh ei ei na ka bynta ka lawei jong ka ri,” la ong u Myntri Rangbah duh. U Modi u la ai khublei ia kiba dang rung kam thymmai bad ki dkhot jong ka longiing jong ki ha kane ka jingialang.

U Myntri Rangbah duh u la kren shaphang ki lad kiba dang mih na ka bynta ka ioh kam ioh jam bad ka jingseng kam lajong ha kaba iadei bad ka ioh ka kot. U la kren shaphang ki sienjam kum ka skhim Mudra, Startup India, Stand Up India. U la ong mynta kine ki samla ki la kylla long ki nongseng kam. U Myntri Rangbah duh u la ong ba ka campaign ban ai kam sorkar sha ki samla kalong kaba kyrpang. Ki kynhun kum ka SCC, UPSC bad RRB ki plie lad ioh kam shibun ryngkat ki rukom trei ba thymmai. Kine ki kynhun ki phaikhmat sha ka rukom pynrung kam kaba suk bad kaba shai. Ki la pynduna ia ka por pynrung kam na ka 1-2 snem sha katto katne bnai, u la ong.

“Ki ri ka pyrthei mynta ki kwah ban iatreilang bad ka India ha ka jingiaid lynti jong ka sha ka roi ka par”, la ong u Myntri Rangbah duh haba pynpaw ia ka jingshaniah ki ri ka pyrthei ia ka India bad ka ioh ka kot jong ka. U Myntri Rangbah duh u la ong ba ka India ka rah ia ka ioh ka kot jong ka sha ki kyrdan ba thymmai ha kaba u la kdew ia ki jingeh kiba don mynta kynthup ka jinghiar ka ioh ka kot, ka khlam ha kylleng ka pyrthei bad ka jingthut ha ki kam pynpoi mar namar ka thma kaba dang iaid mynta. U Myntri Rangbah duh u la ai ki nuksa jong ki kompani bapher bapher kiba phaikhmat sha ka India na ka bynta ka jingpynmih tiar bad ka jingkiew ka foreign exchange reserve jong ka ri. U Modi u la iathuh ba ki jingbei tyngka nabar ri ha India ka la kyntiew ia ka jingpynmih mar, ka jingpyniar bad seng ia ki karkhana ba thymmai, bad ka jingkyntiew ia ki kam shalan mar, ka plie ia ki lad ioh kam ioh jam. Haba kren shaphang ki polisi jong ka sorkar ba mynta kaba la plie lad ioh kam da ki lak ha ki kompani, u Myntri Rangbah duh u la ai nuksa ia ka kam shna kali kaba la nohsynniang palat 6.5 percent sha ka GDP jong ka ri.  U la ong ba ka jingkiew jong ka kam shna kali ha India lah ban sakhi da ka jingkiew ka jingshalan ia ki kali kit passenjar, ki kali kamai bad ki kali lai bad ar shaka sha ki ri bapher bapher. U la pyntip ba ka kam shna kali kaba shongdor 5 lak klur shiphew snem mynshuwa, ka shongdor palat 12 lak klur mynta. “Ka jingpyniar ia ka jingiaid ki kali elektrik ka la jia ha India ruh. Ka skhim PLI ruh ka iarap ia ki kam shna kali,” la bynrap u Modi da kaba ong ba kum kine ki kam ki plie ki lad ioh kam da ki lak na ka bynta ki samla jong ka ri.

U Myntri Rangbah duh u la ban haba ianujor bad shiphew snem mynshuwa, ka India ka la long ka ri kaba kham skhem, shngain bad kaba khlain. U la kynmaw ia ka por haba ka jingbamsap bad ka jingpyndonkam bakla ia ki paidbah ka la long ka dak jong ki kam Sorkar ha ki por ba la dep. “Mynta, ia ka India la tip na ka bynta ka jingskhem jong ka ha ki kam sain pyrthei kaba donkam bha ha kane ka juk ba mynta. Mynta, ka la ithuh ia ka Sorkar India kum ka sorkar kaba skhem ha ki rai. Mynta, la tip ia ka sorkar na ka bynta ki rai ba iar jong ka ha ka ioh ka kot bad ka imlang sahlang,” u la ong. Ki kynhun kylleng ka pyrthei ki iaroh ia ka kam ha ka jingpynsuk ha ka rukom im, ka jingtei ia ki jingdon jingem bad ka jingsuk ban leh ia ki kam khaii pateng.

U la ong ruh ba ka India ka la bei tyngka ha ki jingdon jingem. Haba kren shaphang ki jingdon jingem ha ka imlang sahlang, u Myntri Rangbah duh u la ai nuksa ia ka jingpynthikna ka jingdon ka umdih kaba shngain lyngba ka Jal Jeevan Mission. U la pyntip kumba saw lak klur tyngka la pynlut ha kaba iadei bad ka Jal Jeevan Mission. Naduh ba la sdang ia ka kumba, 15 na ki 100 tylli ki longiing ha ki jaka nongkyndong ki la ioh ia ki pipe um, mynta kane ka la kiew sha ka 62 na man ka 100 tylli ki longiing. Ki don 130 tylli ki distrik kiba la ioh pura ia ki pipe um na ka bynta man ka longiing. Kane ka la ialam sha ka jingtyngkai ia ka por bad ka jinglait na ki jingpang ba bun ba ioh na ka um ka bym khuid. Ki jingwad bniah ki la pyni ba ka um kaba khuid ka la iada kumba 4 lak ki jingiap na ka jingpang pynhiar bad la tyngkai ka jinglut kaba 8 lak klur jong ki briew kaba ju pynlut ban pynkhuid ia ka um bad sumar ia ki jingpang. U la bthah ia ki kandidet ban sngewthuh ia ki jingmyntoi ba bun jong ki skhim sorkar.

U Modi u la kren shaphang ki jingsniew kiba wan na ka jinghiar pateng ka bor ha ki kam sain pyrthei bad ka jingshah shiliang ha ka jingthep kam. U Myntri Rangbah Duh u la kdew sha ka jingbam sap ha kaba la ai jingsiew ban ioh kam kumba la lap ha kawei ka jylla bad u la ong ba ki samla ki dei ban husiar ia kane. Ha ka jingkren shaphang kane, u la ong ba la pynkhreh ia ka rate card lane ka thup jong ki dor na ka bynta ki kam kumba don ki menu ha ki jaka bam. U la kren ruh shaphang ka jingai ia ki jaka puta ban ioh kam ha kaba u Myntri ka tnat rel mynshuwa u la ioh ia ki jaka puta ban pynthep kam bad u la ong ba ka CBI ka dang buddien ia kane bad kane ka dang don hapoh ka jingbishar ka iing shari. U Myntri Rangbah Duh u la ong ba ki briew ki dei ban husiar ia kum kine ki seng sain pyrthei kiba pynhiar pateng ia ka bor bad kiba tuh na ki samla ban ai kam. “Ha kawei ka liang ngi don ki seng sain pyrthei kiba buh da ki dor ia ki kam, hynrei mynta ka dei kane ka Sorkar kaba iada ia ka lawei jong ki samla. Mynta ka ri kan rai lada ka lawei jong ki samla kan iaid da ka dor ne da ka jingshaniah,” la ong u Myntri Rangbah Duh.

U Myntri Rangbah duh u la ong ba kiwei kiwei ki seng sain pyrthei ki pyrshang ban phiah ia ki briew ha ka kyrteng jong ka ktien ka thylliej, katba ka sorkar ka pynlong ia ka ktien ka thylliej ka lad kaba khlain ha ka ioh kam ioh jam. U la ong ba ka jingkongsan ki eksamin pynrung kam ha ka ktien tynrai ka iarap ia ki samla.

U Myntri Rangbah Duh u la ong ba ki rukom treikam ka Sorkar bad ka rukom treikam ki nongtrei sorkar ka dang kylla ha ka India kaba mynta. U la ong ba u kynmaw ia ki por ha kaba ki briew ki hap ban leit sha ki ophis sorkar hynrei mynta ka sorkar ka poi sha ki iing jong ki briew da kaba pynpoi ia ki jingshakri sha baroh. U la ong ba ka kam ban sngewthuh ia ki jingthrang jong ki briew bad ki jingdonkam jong ki thain ka dang iaid shakhmat bad ba ki tnat sorkar ki dang treikam da kaba sngewthuh ia ki jingsngew jong ki briew. U Modi u la ai nuksa da ki jingshakri digital lyngba ki mobile app kiba la pynsuk ban ioh jingshakri na ka sorkar, bad ka lad ai jingkyntu paidbah dang pynkhlain katba dang iaid ka por.

Ha ka jingpynkut ia ka jingai jingkren, u Myntri Rangbah Duh u la ong ba kito kiba dang rung ha ka kam ki dei ban trei da ka jingsngewthuh ia ki briew jong ka ri. “Phi dei ban rah shakhmat ia ki jingpynkylla. Bad lyngba kane phin bat ia ka jingthrang ban kham pyntbit ialade,” la ong u Modi. U la kren ruh shaphang ka rynsan online iGoT kaba la tam ia ka 1 million dang shen ha ka jingdon ki nongpyndonkam bad u la kyntu ia ki ba kin shim jingmyntoi katba lah na ki jingpyntbit kiba don ha kane ka rynsan online. “Ha kane ka jingiaid lynti 25 snem jong ka Amrit Kaal, to ngin ia iaid shaphrang lang ban pynurlong ia ka jingthmu ban don ka India kaba la kiew shaphrang”, la ong u Myntri Rangbah Duh.

Nongrim

Ka Rozgar Mela ka dei ka sienjam na ka bynta ka jingpynurlong ka jingpeit bniah u Myntri Rangbah Duh ia ki lad ioh kam. La khmih lynti ba ka Rozgar Mela kan plie lad shuh shuh ia ka jingioh kam bad kan plie ia ki lad na ka bynta ki samla na ka bynta ka jingpynkupbor ia ki bad ka jingiashim bynta jong ki ha ka roi ka par jong ka ri.

Kine kiba dang shu ioh kam ki ioh ruh ia ki lad ban pyntbit ialade lyngba ka Karmayogi Prarambh, ka rynsan online ha ka rynsan iGOT Karmayogi, ha kaba la pynbiang palat 400 ki lad ioh jinghikai e-learning ha kano kano ka tiar elektrik na kano kano ka jaka.