জপান্না প্রসিদেন্ত ওইরিবা জি-৭গী মীফম শরুক য়ানবা জপানগী প্রধান মন্ত্রী কিসিদা ফুমিওনা চেবাউ পীরকপদগী মে ১৯-২১,২০২৩দা প্রধান মন্ত্রী শ্রী নরেন্দ্র মোদী হিরোসিমাদা চৎকনি। মীফম মনুংদা প্রধান মন্ত্রীনা জি-৭  সেসনশিংদা পার্তনর লৈবাকশিংগা লোয়ন্না শান্তি, তুংদু-লৈতাবা, চীঞ্জাক, ইনর্জি সেকুরিতি, হকশেল, জেন্দর ইকুইলিতি, অইং-অশাগী ফিবম হোংলকপা অমসুং অকোয়বগী ফিবম, রেসিলিয়েন্ত ইনফ্রাস্ত্রকচর অমসুং চাউখৎ-থৌরাংগী মতেং পাংনবগী মতাংদা ৱা ঙাংগনি।

প্রধান মন্ত্রী মোদীনা প্রধান মন্ত্রী কিসিদা ফুমিওগা লোয়ন্না লৈবাক অনিগী ওইবা মীফম অমা পাংথোক্কনি। মীফমগী নাকলদা অতোপ্পা লৈবাকশিংগী লুচিংবশিংগা নাকল অনিগী ওইবা মীফমশিং পাংথোক্কনি।

প্রধান মন্ত্রীনা পাপুৱা নিউ গিনিগী পোর্ত মোরসবেদা চৎকনি, মফম অদুদা মহাক্না পাপুৱা নিউ গিনিগী প্রধান মন্ত্রী জেমস মারাপেগা লোয়ন্না মে ২২,২০২৩দা ইন্দিয়া-পেসিফিক আইলেন্দস কোওপরেসন(ফিপিক)কী অহুমশুবা মীফম শরুক য়াগনি। ২০১৪দা হৌদোকখিবা ফিপিক অসিদা ভারত অমসুং পেসিফিক ইথৎ লৈবাক ১৪ হায়বদি কুক ইথৎশিং, মাইক্রোনেসিয়াগী ফেদেরেল লৈবাকশিং, ফিজি, কিরিবাতি, নাওরু, নিয়ু, পালাউ, পাপুৱা নিউ গিনি, মার্সেল ইথৎশিং, সামাও, সোলোমেন ইথৎশিং, তোঙ্গা, তুবালু অমসুং ভানাওতু য়াওরি।

প্রধান মন্ত্রীনা পাপুৱা নিউ গিনিগী গভর্নর-জেনেরেল বোব দাদে অমসুং প্রধান মন্ত্রী জেমস মরাপেগা লোয়ন্না লৈবাক অনিগী ওইবা মীফমশিং পাংথোক্কনি। ভারতকী প্রধান মন্ত্রী অমনা পাপুৱা নিউ গিনিদা চৎপা অসি হন্দক্কী অসিনা অহানবনি।

তুংদা, মে ২৩-২৪,২০২৩দা প্রধান মন্ত্রী অস্ত্রেলিয়াগী সিদনিদা চৎকনি। মফম অদুদা প্রধান মন্ত্রীনা ক্বাদ লুচিংবশিংগী মীফম শরুক য়াগনি। মীফম অদুদা য়ু.এস.এগী রাস্ত্রপতি জোসেফ আর.বাইদেন অমসুং জপানগী প্রধান মন্ত্রী কিসিদা ফুমিওশু শরুক য়াগনি। ইন্দো-পেসিফিক লমদম অমসুং মনিং তম্বা অমসুং অথিংবা লৈতবা ইন্দো-পেসিফিক লমদম অমা ওইহন্নবা ৱা খন্ননবা খুদোংচাবা অমা মীফম অদুনা লুচিংবশিংদা পীগনি।

মহাক্কী খোঙচৎ মনুংদা, প্রধান মন্ত্রীনা মে ২৪,২০২৩দা প্রধান মন্ত্রী অলবানিসকা লোয়ন্না লৈবাক অনিগী ওইবা মীফম অমা পাংথোক্কনি। প্রধান মন্ত্রীনা অস্ত্রেলিয়াগী সি.ই.ওশিং অমসুং ললোন-ইতিক্কী লুচিংবগা উনগনি অমসুং মে ২৩,২০২৩দা সিদনিদা পাংথোকপা মীয়ামগী থৌরম অমদা লৈবাক অদুদা লৈরিবা ভারতমচাশিংগা উনগনি।

***