প্রধান মন্ত্রী শ্রী নরন্দ্র মোদীনা ফেব্রুৱারী ১২দা রাজস্থান্দা অমদি ফেব্রুৱারী ১৩দা কর্নাতকাদা চৎকদৌরি‍।

ফেব্রুৱারী ১২গী নুংথিল পুং ৩লোম তাবা মতমদা, মহাক্না লুপা করোর ১৮,১০০ হেনবগী লম্বী শেম্বগী প্রোজেক্তশিং উরেপ উয়ুং তম্নবা অমদি লৈবাক্কী মফমদা কত্থোক্নবা দৌসাদা থুংগনি‍।

ফেব্রুৱারী ১৩গী অয়ুক পুং ৯:৩০রোম তাবা মতমদা মহাক্না বেঙ্গলুরুগী য়েলাহঙ্কাদা লৈবা এয়র ফোর্স স্তেসন্দা এরো ইন্দিয়া ২০২৩গী ১৪শুবা ইদিসন হৌদোক্কনি‍।

দৌসাদা প্রধান মন্ত্রী

প্রধান মন্ত্রীনা অনৌবা ভারতকী খুমাঙ চাওশিনবা, চাওখৎপা অমদি কন্নেক্তিবিতীগী ইঞ্জিন অমা ওইনা অফবা মখলগী লম্বীগী ইনফ্রাস্ত্রকচর শেমগৎপদা থম্লিবা মীৎয়েঙ, লৈবাক শিনবা থুংনা মালেমগী থাক্কী এক্সপ্রেসৱে কয়া শেমগৎলিবসিনা থবক ওইনা ওন্থোক্লি‍। অসিগুম্বা মরুওইবা প্রোজেক্তশিংগী মরক্তা দিল্লী মুম্বাই এক্সপ্রেসৱেসু অমা ওইদুনা, মসিগী অহানবা ওইনা লোইশিল্লবা শরুক, দিল্লী – দাউসা – লালসোৎকী শরুকপু প্রধান মন্ত্রীনা লৈবাক্কী মফমদা কত্থোক্কনি‍।

দিল্লী মুম্বাই এক্সপ্রেসৱেগী কিলোমিতর ২৪৬ শাংবা দিল্লী – দাউসা – লালসোৎ সেক্সন অসি লুপা করোর ১২,১৫০ হেন্না চঙনা শেমগৎখিবনি‍। হায়রিবা সেক্সন অসি শীজিন্নরকপনা দিল্লীদগী জয়পুর ফাওবা চৎপগী মতম পুং ৫রোম ওইরম্বদগী পুং ৩.৫রোমদা হন্থহল্লগনি অমদি লমদম অস,মদা শেন্মিৎলোন চাওখৎহনবদা চাউনা ইনোৎ হাপ্লগনি‍।

দিল্লী মুম্বাই এক্সপ্রেসৱে অসি কিলোমিতর ১,৩৮৬ শাংদুনা ভারতকী খ্বায়দগী শাংবা এক্সপ্রেসৱে ওইগনি‍। মসিনা দিল্লীদগী মুম্বাই ফাওবা চৎপগী অশাংবা কিলোমিতর ১,৪২৪দগী কিলোমিতর ১,২৪২দা হন্থহন্দুনা ১২% তেনশিনহল্লগনি অমদি চৎপগী মতম পুং ২৪রোম ওইরম্বদগী পুং ১২দা হন্থহন্দুনা ৫০% তেনশিনহল্লগনি‍। মসিনা দিল্লী, হরিয়ানা, রাজস্থান, মধ্য প্রদেশ, গুজরাত অমদি মহারাস্ত্র হায়রিবা স্তেত তরুক অসি ফাওদুনা কোতা, ইন্দোর, জয়পুর, ভোপাল, বদোদরা অমদু সুরত হায়রিবা অচৌবা ময়োল্লমশিংবু শম্নহল্লগনি‍। এক্সপ্রেসৱে অসিনা জেৱার এয়রপোর্ত, নাভী মুম্বাই এয়রপোর্ত অমদি জে.এন.পি.তি. পোর্তনচিংবা নৌনা পায়খৎকদৌরিবা গ্রীনফীল্দ এয়রপোর্তশিংদা ইনোৎ হাপ্পগা লোয়ননা পি.এম. গতিশক্তি ইকনমিক নোদ ৯৩, হিথাংফম ১৩, অচৌবা এয়রপোর্ত ৮ অমদি মল্তি-মোদেল লোজিস্তিক্স পার্ক (এম.এম.এল.পি.) ৮দা কান্নহনগনি‍। এক্সপ্রেসৱে অসিনা থংনবা মফম পুম্নমক্তা চাওখৎপগী খোঙজেল য়াঙখৎহনবদা ইথিল পীদুনা লৈবাকসিগী শেন্মিৎলোন্দা অহোংবা পুরকপদা চাউনা থৌদাং য়াগনি‍।

থৌরম অসিদা, প্রধান মন্ত্রীনা লুপা করোর ৫৯৪০ হেন্না চঙনা পায়খৎকদবা কিলোমিতর ২৪৭ শাংবা নেস্নেল হায়ৱেজ প্রোজেক্তশিংগী উরেপ উয়ুংসু তম্লমগনি‍। মসিদা লুপা করোর ২০০০ হেন্না চঙনা শেমগৎকদবা বন্দিকুলদগী জয়পুর ফাওবগী মিলোমিতর ৬৭ শাংবা ফোর-লেন স্পর রোদ, লুপা করোর ৩৭৭৫ রোম চঙনা শেমগৎকদবা কোতপুত্লিদগী বরাউদানিও ফাওবগী সিক্স-লেন স্পর রোদ অমা, অমদি লুপা করোর ১৫০রোম চঙনা শেমগৎকদবা লালসোৎ-করোলী সেক্সনগী তু-লেন পেব সোল্দর য়াওরি‍।

বেঙ্গলুরুদা প্রধান মন্ত্রী

প্রধান মন্ত্রীনা বেঙ্গলুরুগী য়েলাহঙ্কাদা লৈবা এয়র ফোর্স স্তেসন্দা এরো ইন্দিয়া ২০২৩গী ১৪শুবা ইদিসন হৌদোক্কনি‍। এরো ইন্দিয়া ২০২৩গী থীমদি ‘দি রনৱে তু এ বিলিয়ন ওপোর্চুনিতিজ’ হায়বসিনি‍।

প্রধান মন্ত্রীগী ‘মেক ইন ইন্দিয়াও মেক ফোর দি ৱর্ল্দ’ হায়বা মঙলানগী পরিংদা, থৌরমঅসিনা ইন্দিজিনস ইকুইপমেন্ত/তেক্নোলোজীশিং অমদি মপানগী কম্পেনীশিংগী খোঙবু ওইবগী মরী শেমগৎপদা মীৎয়েঙ থমগনি‍। দিজাইন লীদরসিপ, য়ু.এ.ভি. সেক্তর, দিফেন্স স্পেস অমদি তুংলমচৎকী ওইবা তেক্নোলোজীশিংদা খুমাঙ চাওশিল্লিবা লৈবাকসিগী খোঙজেলশিং উৎকদৌরিবা থৌরম অসিনা প্রধান মন্ত্রীগী ভারতকী দিফেন্স সেক্তরদা আত্মনিরভরতা পুরকপগী মায়কৈদা থম্লিবা মীৎয়েঙবুসু উৎকনি‍। মখা তানা, থৌরম অসিনা লাইত কোম্বেৎ এয়রক্রাফ্ত (এল.সি.এ.) – তেজাস, ঐচ.তি.তি.-৪০, দোর্নিয়র লাইত য়ুতিলিতী হেলিকোপ্তর (এল.য়ু.ঐচ.), লাইত কোম্বেৎ হেলিকোপ্তর (এল.সি.ঐচ.) অমদি এদভান্স লাইত হেলিকোপ্তর (এ.এল.ঐচ.)নচিংবা ইন্দিজিনস এয়র প্লেৎফোর্মশিং মপান্দা থাদোকপগী থৌওং পুক্নিং থৌগৎকনি‍। থৌরম অসিনা লমদমসিগী এম.এস.এম.ই.শিং অমদি স্তার্ত-অপশিংবু মালেমগী সপ্লাই চেনগা পুনশিন্নহন্দুনা কো-দিভেলপমেন্ত অমদি কো-প্রদক্সনগী খোঙবু ওইবা য়াওনা মপান লৈবাক্তগী ইনভেস্তমেন্তশিং পুক্নিং চিংশিনগদৌরি‍।

এরো ইন্দিয়া ২০২৩দা লৈবাক ৮০ হেনবনা শরুক য়ারগদৌরি‍। লৈবাক ৩০রোমগী মন্ত্রীশিং অমদি মালেমগী অমসুং ভারতকী ও.ই.এম.শিংগী সি.ই.ও. ৬৫রোম্না এরো ইন্দিয়া ২০২৩ অসিদা শরুক য়ারবা য়ারি‍।

এরো ইন্দিয়া ২০২৩ একজিবিসন্দা মপান লমগী দিফেন্স কম্পেনী ১০০ অমদি ভারতকী কেম্পেনী ৭০০ য়াওনা পুন্না কম্পেনী ৮০০ হেনবনা শরুক য়াগদৌরি‍। মসিদা শরুক য়াগদৌরিবা ভারতকী কম্পেনীশিংগী মরক্তা, নিচ তেক্নোলোজীদা খুমাং চাওশিনবা, এরোস্পেসতা খুমাঙ চাওশিনবা অমদি লৈবাকসিগী দিফেন্স কেপেবিলিতীশিং উৎকদৌরিবা এম.এস.এম.ই.শিং অমদি স্তার্ত-অপশিং য়াওগদৌরি‍। এরো ইন্দিয়া ২০২৩দা শরুক য়াগদৌরিবা অচৌবা একজিবিতরশিংগী মরক্তা এয়রবস, বোইং, দাসোল্ত এভিএসন, লোকহীদ মার্তিন, ইজ্রেল এরোস্পেস ইন্দস্ত্রী, ব্রহ্মোস এরোস্পেস, আর্মী এভিওসন, ঐচ.সি. রোবোতিক্স, এস.এ.এ.বি., সফ্রন, রোল্স রোইস, লার্সেন এন্দ তৌব্রো, ভারত ফোর্জ লিমিতেদ, হিন্দুস্তান এরোনোতিক লিমিতেদ (ঐচ.এ.এল.), ভারত ইলেক্ত্রোনিক্স লিমিতেদ (ব.ই.এল.), ভারত দাইনামিক্স লিমিতেদ (বি.দি.এল.) অমদি বি.ই.এম.এল. লিমিতেদনচিংবা য়াওরি‍।

****