এক্সেলেন্সীশিং,
দিজিতেল ত্রান্সফোর্মেসন হায়বসিনা ঐখোয়গী য়ুগ অসিদা লাক্লিবা খ্বাইদগী মশক নাইবা অহোংবনি। লাইরবগী মাইয়োক্তা ঐখোয়না দিকেদ কয়াদগী থেংনরক্লিবা লান অসিদা দিজিতেল তেক্নোলোজী শিজিন্নবনা ঐখোয়গী থৌওংশিংগী খোঙজেল হেন্না য়াঙখৎহনগনি। দিজিতেল সোল্যুসনশিংনা ক্লাইমেত চেঞ্জকা মাইয়োক্নরিবা অসিদসু তেংবাংবা ঙম্মি, কোবিদ মনুংদা পাংথোকখিবা রিমোত-ৱর্কিং অমসুং পেপরলেস গ্রীন ওফিসকী মতৌশিংদা ঐখোয়না খুদম ওইনসু উখ্রে। অদুবু, হায়রিবা কান্নবশিং অসি দিজিতেল এক্সেসনা তসেংনা ইনক্লুসিব ওইরবা অমসুং দিজিতেল তেক্নোলোজীবু পাক শন্না শিজিন্নরকপা মতমদা ফংগনি। অদুবু লাইবক থীবদি, মসিগুম্বা কান্নবা খুৎলায়শিং অসি অচম্বা কারবার খক্তদা শিজিন্নদুনা লৈরি, মাঙবা তোংবগী হিসাবকী চে খক্তদা লৈরি। দিজিতেল ত্রান্সফোর্মেসনগী কান্নবশিংবু পুম্নমক্তা ফংহনবা হায়বসিনা ঐখোয় জি.২০ লুচিংবশিংগী থৌদাং ওইগদবনি।

মমাংগী চহি খরদা ভারতনা থেংনখিবা থৌদোকশিংনা করিগুম্বা ঐখোয়না দিজিতেল আর্কিতেকচরবু ইনক্লুসিব ওইহল্লবদি, মসিনা সোসিও-ইকোনোমিক ত্রানফোর্মেসন পুরকপা ঙমগনি হায়বা খঙবা ঙম্লে। দিজিতেলগী থৌওং শিজিন্নবনা খোঙজেল অমসুং পাক চাউবগী ফিভম পাউরকপা ঙমগনি। লৈঙাকপগী থৌওংদা নুং-পান ফাওনা উবা ঙমহল্লক্কনি। ইন-বিল্ত দিমোক্রেতিক প্রিন্সিপল য়াওবা বেসিক আর্কিতেকচর লোয়নবা দিজিতেল পব্লিক গুদ ভারতনা পুথোক্লে। হায়রিবা সোল্যুসনশিং অসিদি ওপন সোর্স, ওপন এ.পি.আই., ওপন স্তেন্দর্দকুম্বা ইন্তরওপরেবল অমসুং পব্লিক ওইবা মতৌদা য়ুম্ফম ওই। মসিদি ভারত্তা ঙসি লাক্লিবা দিজিতেল ইহৌদা য়ুম্ফম ওইদুনা থাংজিল্লিবা ঐখোয়গী খোঙথাংনি। খুদম অমা ওইনা হায়রবদি, য়ুনিফাইদ পেমেন্ত ইন্তর্ফেস (য়ু.পি.আই.)।

মালেমগী রিএল তাইম পেমেন্ত ত্রাঞ্জেক্সনগী ৪০% হেনবগী চাংদি মমাংগী চহিদা য়ু.পি.আই.গী খুত্থাংদা পাংথোকখি। মান্নবা মতৌ ওইনা, ঐখোয়না দিজিতেল আইদেন্তিতীগী মখা পোন্দুনা অনৌবা বেঙ্ক একাউন্ত মিলিয়ন ৪৬০ হাংদোকখ্রে অমসুং মসিনা ঙসি ভারতপু ফাইনেন্সিএল ইনক্লুজনগী হীরমদা মালেমগী লুচিংবা ওইহল্লি। ঐখোয়গী ওপন সোর্স কোৱিন প্লেতফোর্ম্না, লাইচৎ মনুংদা ফাওবা, মীওইবগী পুৱারীদা পাংথোকপা তিকা কাপ্পগী খ্বাইদগী চাউবা খোঙজংবু মায় পাকহনখি।

এক্সেলেন্সীশিং,
দিজিতেল এক্সেসপু ঐখোয়না ভারত্তা পব্লিক ওইহল্লি, অদুবু মালেমগী থাক্কী ওইনদি, থৌওং অসিদা থাক মান্নদবা অচৌবা মতৌ লৈরি। মালেমগী চাউখৎলক্লিবা লৈবাক কয়াগী মীয়ামগী দিজিতেল আইদেন্তিতী মখল অমা ফাওবা লৈনদ্রি। লৈবাক ৫০খক্কী মনাক্তা দিজিতেল পেমেন্ত সীস্তেম লৈ। মথংগী চহি ১০গী মনুংদা, মীওইবা খুদিংগী পুন্সিদা দিজিতেল ত্রান্সফোর্মেসন পুরক্কনি হায়বগী ঐখোয়না ৱাশক লৌবা য়াবরা? মদু ওইরবদি, মালেমদা লৈবা মীওই খুদিংদা দিজিতেল তেক্নোলোজীগী কান্নবা ফংহনবা য়াগনি।

ভারতনা মথংগী চহিগী জি.২০ প্রসিদেন্সী মনুংদা পান্দম অসিগী মাইকৈদা জি.২০ পার্ত্নরশিংগা পুন্না থবক পায়খৎমিন্নগনি। “চাউখৎপগীদমক্তা দেতা”গী ৱাখল্লোন্না ঐখোয়গী প্রসিদেন্সীগী মপুং ওইবা থীম, “পৃথিবী অমা, ইমুং মনুং অমা, তুংগী মতম অমা”, অসিগী তৎন-থানবা য়াদ্রবা শরুক অমা ওইগনি।

থাগৎচরি।

দিসক্লেমরঃ মসিদি প্রধান মন্ত্রীগী ৱারোলগী শম্লপ্পা পাউদম্নি। অশেংবা ৱারোলদি হিন্দিদা থমখিবনি।

***