ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରେରଣାରେ ଆୟୋଜିତ ଏହି ‘ଚିନ୍ତନ ଶିବିର’ ଦେଶ ସମ୍ମୁଖରେ ରହିଥିବା ସମସ୍ତ ଆହ୍ୱାନ ଗୁଡିକର ମିଳିତ ଭାବେ ସମ୍ମୁଖୀନ ହେବାକୁ ଏକ ମଂଚ ପ୍ରଦାନ କରିବ

ଉଗ୍ରବାଦ ଦ୍ୱାରା ପ୍ରଭାବିତ ଅଂଚଳ ଯଥା, ଜାମ୍ମୁ କାଶ୍ମୀର ଏବଂ ଉତ୍ତର ପୂର୍ବାଂଚଳ, ଯାହା ପୂର୍ବରୁ  ହିଂସା ପ୍ରବଣ ଏବଂ ଅଶାନ୍ତ ଅଂଚଳ ଥିଲା,  ତାହା ବର୍ତ୍ତମାନ ବିକାଶିତ ଅଂଚଳରେ ପରିବର୍ତ୍ତିତ ହେଉଛି

ଆଜି ଦେଶ ତଥା ବିଶ୍ୱ ସ୍ତରରେ ସାଇବର ଅପରାଧ ଏକ ବଡ ବିପଦ ହୋଇ ଦେଖା ଦେଇଛି, ଗୃହ ମନ୍ତ୍ରଣାଳୟ ଏହା ବିରୋଧରେ ଲଢ଼ିବା ନିମନ୍ତେ ସମ୍ପୂର୍ଣ୍ଣ ଭାବେ ପ୍ରସ୍ତୁତ ଅଛି

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ତିନୋଟି ସି’ (ଇଂରାଜୀ ଅକ୍ଷର) - ସହଯୋଗ, ସମନ୍ୱୟ ଏବଂ ସହଭାଗୀତାକୁ ‘ସମ୍ପୂର୍ଣ୍ଣ ସରକାର’ (ହୋଲ୍ ଅଫ୍ ଗଭର୍ଣ୍ଣମେଂଟ) ଏବଂ ‘ଟିମ୍ ଇଣ୍ଡିଆ’ ଆଭିମୁଖ୍ୟ  ଅନୁସାରେ ପ୍ରୋତ୍ସାହିତ କରୁଛନ୍ତି

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ଦେଶ ତଥା ଯୁବକ ମାନଙ୍କୁ ନିଶା କବଳରୁ ରକ୍ଷା କରିବାକୁ ସଂକଳ୍ପବଦ୍ଧ ଅଛନ୍ତି ଏବଂ ଆମର ଏହି ନୀତି ଏହାର ପରିଣାମକୁ ପ୍ରଦର୍ଶିତ କରୁଛି, ଯେଉଁଥିରେ ୨୦୦୦୦ କୋଟି ଟଙ୍କାରୁ ଅଧିକ ମୂଲ୍ୟର ମାଦକ ଦ୍ରବ୍ୟକୁ ଏପର୍ଯ୍ୟନ୍ତ ଜବତ କରା ଯାଇଛି

ଆଜିର ଦୁନିଆରେ ଅପରାଧର ସ୍ୱଭାବ ପରିବର୍ତ୍ତିତ ହେବାରେ  ଲାଗିଛି ଏବଂ ଅପରାଧର କୌଣସି ସୀମା ରହୁ ନାହିଁ,  ସେଥିପାଇଁ ରାଜ୍ୟ ମାନଙ୍କୁ ଏହା ବିରୁଦ୍ଧରେ ଲଢ଼ିବା ନିମନ୍ତେ ଏକ ସାଧାରଣ ରଣନୀତି ପ୍ରସ୍ତୁତ କରିବାକୁ ପଡିବ

ଆତଙ୍କବାଦ ବିରୋଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାରଙ୍କର ଶୂନ୍ୟ ସହନଶୀଳତା ନୀତି ରହିଛି ଏବଂ ଏହା ଉପରେ ନିର୍ଣ୍ଣାୟକ ବିଜୟ ହାସଲ କରିବାକୁ ଏନଆଇଏ ତଥା ଅନ୍ୟାନ୍ୟ ଏଜେନ୍ସି ଗୁଡ଼ିକୁ ମଜବୁତ କରା ଯାଉଛି, ୨୦୨୪ ମସିହା ପୂର୍ବରୁ ସମସ୍ତ ରାଜ୍ୟ ଗୁଡିକରେ ଏନଆଇଏର ଶାଖା ସ୍ଥାପନ କରି ଆତଙ୍କବାଦ ବିରୋଧୀ ନେଟୱାର୍କ ଗଠନ ପାଇଁ ଉଦ୍ୟମ କରା ଯାଉଛି

ଦୋଷୀ ସାବ୍ୟସ୍ତ କରାଇବା ହାର ବୃଦ୍ଧି କରିବା ନିମନ୍ତେ ସମସ୍ତ ରାଜ୍ୟ ସେମାନଙ୍କର ଫୋରେନସିକ୍ ବିଜ୍ଞାନକୁ ଅଧିକରୁ ଅଧିକ ବ୍ୟବହାର କରିବା ଉଚିତ୍‌, ଭାରତ ସରକାର ଏନ୍‌ଏଫ୍‌ଏସ୍‌ୟୁ ଗଠନ କରି ସମସ୍ତ ସମ୍ଭାବ୍ୟ ସହାୟତା ଉପଲବ୍ଧ କରାଇଛନ୍ତି

ସୀମା ସୁରକ୍ଷା ଏବଂ ଉପକୂଳ ସୁରକ୍ଷାକୁ ସୁନିଶ୍ଚିତ କରିବା ପାଇଁ ସୀମାବର୍ତ୍ତୀ ରାଜ୍ୟ ମାନଙ୍କୁ କେନ୍ଦ୍ରୀୟ ଏଜେନ୍ସି ଗୁଡିକ ସହ ଏବଂ ସୁରକ୍ଷା ବାହିନୀ ସହିତ ଅଧିକ ଏକାଠି ହୋଇ ସମନ୍ୱିତ ଉଦ୍ୟମ କରିବାକୁ ପଡ଼ିବ

ବିପର୍ଯ୍ୟୟ ପରିଚାଳନା କ୍ଷେତ୍ରରେ ମୋଦୀ ସରକାର ମଧ୍ୟ ଅନେକ ପଦକ୍ଷେପ ନେଇଛନ୍ତି ଏବଂ ମୁଁ ଏହି ସମସ୍ତ ପଦକ୍ଷେପ ଗୁଡିକର କାର୍ଯ୍ୟକାରିତା ଉପରେ ବ୍ୟକ୍ତିଗତ ଭାବରେ ନଜର ରଖିବାକୁ ସମସ୍ତ ରାଜ୍ୟର ମୁଖ୍ୟମନ୍ତ୍ରୀ ମାନଙ୍କୁ ଅନୁରୋଧ କରୁଛି

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ମାର୍ଗଦର୍ଶନରେ  ଗୃହ ମନ୍ତ୍ରଣାଳୟ ଜାମ୍ମୁ କାଶ୍ମୀର, ଉତ୍ତର ପୂର୍ବାଂଚଳ ଆତଙ୍କବାଦ, ଡ୍ରଗ୍ କାରବାର, ବାମପନ୍ଥୀ ଉଗ୍ରବାଦ ଏବଂ ମହିଳା ସୁରକ୍ଷା ସହ ଜଡିତ ଗୁରୁତ୍ୱପୂର୍ଣ୍ଣ ତଥା ସମ୍ବେଦନଶୀଳ ପ୍ରସଙ୍ଗ ଗୁଡିକ ଉପରେ ଅତ୍ୟନ୍ତ ପ୍ରଭାବଶାଳୀ ତଥା ସୁଦୂର ପ୍ରସାରୀ ପଦକ୍ଷେପ ନେଇଛି

କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ହରିୟାଣାର ସୁରଜକୁଣ୍ଡ ଠାରେ ଦୁଇ ଦିନିଆ 'ଚିନ୍ତନ ଶିବିର' ର ପ୍ରଥମ ଦିନକୁ ସମ୍ବୋଧିତ କରିଛନ୍ତି । ଏହି ଚିନ୍ତନ ଶିବିରରେ ରାଜ୍ୟ ଗୁଡିକର ମୁଖ୍ୟମନ୍ତ୍ରୀ, ଗୃହ ମନ୍ତ୍ରୀ ଏବଂ କେନ୍ଦ୍ରଶାସିତ ଅଂଚଳର  ଲ୍ୟୁଟନାଂଟ ଗଭର୍ଣ୍ଣର ଏବଂ ପ୍ରଶାସକମାନେ ଅଂଶ ଗ୍ରହଣ କରିଛନ୍ତି ।

ନିଜ ସମ୍ବୋଧନରେ ଶ୍ରୀ ଅମିତ ଶାହ କହିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଠାରୁ ପ୍ରେରଣା ନେଇ ଆୟୋଜନ କରାଯାଉଥିବା ଏହି ଚିନ୍ତନ ଶିବିର ସାଇବର ଅପରାଧ, ନିଶା କାରବାର ଏବଂ ସୀମାପାର ଆତଙ୍କବାଦ ଭଳି ଦେଶ ସମ୍ମୁଖରେ ରହିଥିବା ସମସ୍ତ ଆହ୍ୱାନ ଗୁଡିକର ସମ୍ମୁଖୀନ ହେବାକୁ ଏକ ମଂଚ ପ୍ରଦାନ କରିବ ।  ସେ କହିଥିଲେ ଯେ, ଆଜି ଅପରାଧ ଗୁଡିକର ସ୍ୱଭାବ ବଦଳିବାରେ ଲାଗିଛି  ଏବଂ ସେଗୁଡିକର କୌଣସି ସୀମା ରହୁନାହିଁ, ସେଥିପାଇଁ ସମସ୍ତ ରାଜ୍ୟ ଗୁଡିକୁ ମିଳିତ ଭାବେ ଏକ ସାଧାରଣ ରଣନୀତି ପ୍ରସ୍ତୁତ କରି ଏହା ବିରୁଦ୍ଧରେ ଲଢ଼େଇ  କରିବାକୁ ପଡ଼ିବ । ଏହି ସାଧାରଣ ରଣନୀତିକୁ ପ୍ରସ୍ତୁତ କରିବା ପାଇଁ ଏବଂ କାର୍ଯ୍ୟକାରୀ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ‘ସହକାରୀ ସଂଘବାଦ,  'ସମ୍ପୂର୍ଣ୍ଣ ସରକାର' (ହୋଲ୍ ଅଫ୍ ଗଭର୍ଣ୍ଣମେଂଟ) ଏବଂ ‘ଟିମ୍ ଇଣ୍ଡିଆ' ଆଭିମୁଖ୍ୟ ଅଧୀନରେ ୩ସି (ଇଂରାଜୀ ଅକ୍ଷର ସି) , ଯଥା - ଅର୍ଥାତ୍ ସହଯୋଗ, ସମନ୍ୱୟ, ସହଭାଗୀତାକୁ ପ୍ରୋତ୍ସାହିତ କରୁଛନ୍ତି ।

କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ, ବାମପନ୍ଥୀ ଉଗ୍ରବାଦ ଦ୍ୱାରା ପ୍ରଭାବିତ ଅଂଚଳ ଗୁଡିକ, ଯଥା : ଜାମ୍ମୁ କାଶ୍ମୀର ଏବଂ ଉତ୍ତର ପୂର୍ବାଂଚଳ, ଯାହା ପୂର୍ବରୁ  ଏକଦା  ହିଂସା ପ୍ରବଣ ଅଂଚଳ ଥିଲା ଏବଂ ଅଶାନ୍ତି ପ୍ରଭାବିତ ସ୍ଥାନ ପାଲଟିଥିଲା, ତାହା ବର୍ତ୍ତମାନ ବିକାଶର ଅଂଚଳରେ ପରିବର୍ତ୍ତିତ ହେଉଛି ।  ସେ କହିଥିଲେ ଯେ ଗତ ଆଠ ବର୍ଷ ମଧ୍ୟରେ ଉତ୍ତର ପୂବାଂଚର୍ଳର ସୁରକ୍ଷା ସ୍ଥିତିରେ ଯଥେଷ୍ଟ ଉନ୍ନତି ହୋଇଛି ଏବଂ ୨୦୧୪ ମସିହା ପର ଠାରୁ ଉଗ୍ରବାଦ ଘଟଣା ଗୁଡିକରେ ୭୪ ପ୍ରତିଶତ ହ୍ରାସ ଘଟିଛି, ସୁରକ୍ଷା ବାହିନୀ ମାନଙ୍କର ମୃତାହତ ସଂଖ୍ୟାରେ ୬୦ ପ୍ରତିଶତ ଏବଂ ସାଧାରଣ ନାଗରିକଙ୍କ ମୃତ୍ୟୁରେ ପ୍ରାୟ ୯୦ ପ୍ରତିଶତ ହ୍ରାସ ପାଇଛି । ଏହା ବ୍ୟତୀତ ଏନ୍‌ଏଲ୍‌ଏଫ୍‌ଟି, ବୋଡୋ, ବ୍ରୁ, କାର୍ବି ଓଙ୍ଗଲୋଙ୍ଗ ଚୁକ୍ତିନାମା ସ୍ୱାକ୍ଷର  କରି ଏହି ଅଂଚଳରେ ସ୍ଥାୟୀ ଶାନ୍ତି ପ୍ରତିଷ୍ଠା ପାଇଁ ପ୍ରୟାସ କରା ଯାଇଛି ଯେଉଁଥିରେ ୯,୦୦୦ ରୁ ଅଧିକ ଉଗ୍ରବାଦୀ ଆତ୍ମସମର୍ପଣ କରି ସାରିଛନ୍ତି । ସେ କହିଥିଲେ ଯେ, ଉତ୍ତର ପୂବାଂଚଳରେ ଶାନ୍ତି ପୁନଃସ୍ଥାପନ ସହିତ ୬୦ ପ୍ରତିଶତରୁ ଅଧିକ ଅଂଚଳରୁ ଏଏଫ୍‌ଏସ୍‌ପିଏ ପ୍ରତ୍ୟାହାର କରା ଯାଇଛି । ବାମପନ୍ଥୀ ଉଗ୍ରବାଦ ପ୍ରଭାବିତ ଅଂଚଳ ଗୁଡିକରେ ସ୍ଥିତିର ଉନ୍ନତି ଉପରେ ଆଲୋକପାତ କରି ଶ୍ରୀ ଶାହା କହିଥିଲେ ଯେ , ଏହି ଅଂଚଳ ଗୁଡିକରେ ଘଟୁଥିବା ହିଂସା ଘଟଣା ଗୁଡିକରେ ୭୭%  ହ୍ରାସ ଦେଖା ଦେଇଛି ଏବଂ ଏହି ଘଟଣା ଗୁଡିକରେ ମୃତ୍ୟୁ ସଂଖ୍ୟା ୮୫% ରୁ ଅଧିକ ହ୍ରାସ ପାଇଛି । ଅଗଷ୍ଟ ୫, ୨୦୧୯ ରେ ଜାମ୍ମୁ କାଶ୍ମୀରରେ ପ୍ରଚଳିତ ଧାରା ୩୭୦ ରଦ୍ଦ ହେବା ପରେ ସେଠାରେ ଶାନ୍ତି ଏବଂ ପ୍ରଗତିର ଏକ ନୂତନ ଯୁଗ ଆରମ୍ଭ ହୋଇଛି ବୋଲି ଶ୍ରୀ ଶାହା କହିଥିଲେ ।  ସେ ଉଲ୍ଲେଖ କରିଥିଲେ ଯେ , ଅଗଷ୍ଟ ୫, ୨୦୧୯ ପୂର୍ବର ୩୭ ମାସ ଗୁଡିକ ସହିତ ଏହା ପରର ୩୭ ମାସ ଗୁଡିକ ମଧ୍ୟରେ ଯଦି ତୁଳନା କରାଯାଏ ତେବେ  ଆତଙ୍କବାଦ  ଘଟଣା ଗୁଡିକରେ ୩୪ ପ୍ରତିଶତ ହ୍ରାସ ଘଟିଛି ଏବଂ ୫ ଅଗଷ୍ଟ ୨୦୧୯ ପରେ ୩୭ ମାସ ମଧ୍ୟରେ ସୁରକ୍ଷା ବାହିନୀର ମୃତ୍ୟୁ ସଂଖ୍ୟାରେ ୫୪ ପ୍ରତିଶତ ହ୍ରାସ ଘଟିଛି ।  ସେ କହିଥିଲେ ଯେ ଶ୍ରୀ ମୋଦୀ ଜୀ’ ଙ୍କ ନେତୃତ୍ୱାଧୀନ ସରକାର ଆତଙ୍କବାଦ ବିରୋଧରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ଏକ ଶୂନ୍ୟ ସହନଶୀଳତା ନୀତି ଅନୁସରଣ କରିଛନ୍ତି ଏବଂ ଏହା ଉପରେ ନିର୍ଣ୍ଣାୟକ ବିଜୟ ହାସଲ କରିବାକୁ ଏନଆଇଏ ଏବଂ ଅନ୍ୟାନ୍ୟ ଏଜେନ୍ସି ଗୁଡ଼ିକୁ ମଜବୁତ କରା ଯାଉଛି । ଶ୍ରୀ ଶାହା ସୂଚନା ଦେଇଥିଲେ ଯେ ୨୦୨୪ ପୂର୍ବରୁ ସମସ୍ତ ରାଜ୍ୟ ଗୁଡିକରେ ଏନଆଇଏର ଶାଖା ସ୍ଥାପନ କରି ଆତଙ୍କବାଦ ବିରୋଧୀ ନେଟୱାର୍କ ପ୍ରତିଷ୍ଠା ପାଇଁ ଉଦ୍ୟମ କରା ଯାଉଛି । ଶ୍ରୀ ଶାହା କହିଥିଲେ ଯେ ଆତଙ୍କବାଦ ବିରୋଧରେ ଲଢ଼େଇରେ ଏକ ନିର୍ଣ୍ଣାୟକ ବିଜୟ ହାସଲ କରିବା ପାଇଁ ଆଇନଗତ ସରଂଚନାକୁ ମଜଭୁତ କରା ଯାଉଛି , ଯେଉଁଥିରେ ଏନଆଇଏ ଏବଂ ୟୁଏପିଏ ଆଇନ ଗୁଡିକରେ ସଂଶୋଧନ କରି ବ୍ୟକ୍ତିଗତ ଆତଙ୍କବାଦୀ ଘୋଷଣା କରିବାକୁ ବ୍ୟବସ୍ଥା କରା ଯାଇଛି ।

 ସେ କହିଥିଲେ ଯେ,  ଏନଆଇଏକୁ ଅତିରିକ୍ତ ଆଂଚଳିକ ଅଧିକାର ଦିଆ ଯାଇଛି ଏବଂ ଏହା ସହିତ ଆତଙ୍କବାଦ ଦ୍ୱାରା ଅର୍ଜନ କରା ଯାଇଥିବା /  ଏହା ସମ୍ବନ୍ଧିତ  ସମ୍ପତ୍ତି  ଜବତ କରିବାର ଅଧିକାର ମଧ୍ୟ ଏଜେନ୍ସିକୁ ପ୍ରଦାନ କରା ଯାଇଛି । ଶ୍ରୀ ଶାହା କହିଥିଲେ ଯେ , ୨୦୨୪ ମସିହା ସୁଦ୍ଧା ଦେଶର ସମସ୍ତ ରାଜ୍ୟ ଗୁଡିକରେ ଏନଆଇଏର ଶାଖା ପ୍ରତିଷ୍ଠା ପାଇଁ ଲକ୍ଷ୍ୟ ଧାର୍ଯ୍ୟ କରା ଯାଇଛି । ସେ ଆହୁରି ମଧ୍ୟ କହିଥିଲେ ଯେ କେନ୍ଦ୍ର ଏବଂ ରାଜ୍ୟ ମଧ୍ୟରେ ପାରସ୍ପରିକ ସହଯୋଗ ଏବଂ ସମନ୍ୱୟ ରହିବା କାରଣରୁ ଆଜି ଦେଶର ଅଧିକାଂଶ ସୁରକ୍ଷା ହଟସ୍ପଟ୍ ଦେଶ ବିରୋଧୀ କାର୍ଯ୍ୟକଳାପରୁ ପ୍ରାୟ ମୁକ୍ତ ହୋଇ ପାରିଛି । ଶ୍ରୀ ଶାହା ଉଲ୍ଲେଖ କରିଥିଲେ ଯେ, ନିଶା କାରବାର ବିରୁଦ୍ଧରେ ଭାରତ ସରକାରଙ୍କ ଶୂନ୍ୟ ସହନଶୀଳତା ନୀତି ଭଲ ପରିଣାମ ପ୍ରଦର୍ଶନ କରୁଛି ଏବଂ ଗତ ୮ ବର୍ଷ ମଧ୍ୟରେ ଏହାକୁ ନେଇ ୩୦୦୦ ରୁ ଅଧିକ ମାମଲା ରୁଜୁ ହୋଇଥିବା ବେଳେ ପ୍ରାୟ ୨୦୦୦୦୦ କୋଟି ଟଙ୍କାରୁ  ଅଧିକ ମୂଲ୍ୟର ମାଦକ ଦ୍ରବ୍ୟ (ଡ୍ରଗ୍ସ) ଜବତ କରା ଯାଇଛି ।

ଶ୍ରୀ ଅମିତ ଶାହା କହିଥିଲେ ଯେ, ସାଇବର ଅପରାଧ ଆଜି ଦେଶ ତଥା ବିଶ୍ୱ ସମ୍ମୁଖରେ ଏକ ବଡ ବିପଦ ହୋଇ ମୁଣ୍ଡ ଟେକିଛି ଏବଂ ଗୃହ ମନ୍ତ୍ରଣାଳୟ ଏହା ବିରୋଧରେ ଳଢ଼ିବାକୁ ପ୍ରସ୍ତୁତ ଅଛି । ସେ ସୂଚିତ କରିଥିଲେ ଯେ ଗୃହ ମନ୍ତ୍ରଣାଳୟ ସିଆର୍‌ପିସି, ଆଇପିସି ଏବଂ ଏଫ୍‌ସିଆର୍‌ଏର ସଂସ୍କାର ଗୁଡିକ ଉପରେ କ୍ରମାଗତ ଭାବେ କାର୍ଯ୍ୟ କରୁଛି ଏବଂ ଖୁବ୍ ଶୀଘ୍ର ସେଗୁଡିକର ସଂଶୋଧିତ ବ୍ଲୁ ପ୍ରିଂଟ୍ ସଂସଦରେ ଉପସ୍ଥାପିତ ହେବ । ଦୋଷୀ ସାବ୍ୟସ୍ତ କରାଇବା ହାର ବୃଦ୍ଧି କରିବା ନିମନ୍ତେ ସମସ୍ତ ରାଜ୍ୟ ସେମାନଙ୍କର ଫୋରେନସିକ୍ ବିଜ୍ଞାନକୁ ଅଧିକରୁ ଅଧିକ ବ୍ୟବହାର କରିବା ଉଚିତ୍‌, ଭାରତ ସରକାର ଏନ୍‌ଏଫ୍‌ଏସ୍‌ୟୁ ଗଠନ କରି ସମସ୍ତ ସମ୍ଭାବ୍ୟ ସହାୟତା ଉପଲବ୍ଧ କରାଇଛନ୍ତି । ସେ ଆହୁରି ମଧ୍ୟ ଗୁରୁତ୍ୱାରୋପ କରିଥିଲେ ଯେ ସୀମା ସୁରକ୍ଷା ଏବଂ ଉପକୂଳ ସୁରକ୍ଷାକୁ ସୁନିଶ୍ଚିତ କରିବା ପାଇଁ ସୀମାବର୍ତ୍ତୀ ରାଜ୍ୟ ଗୁଡ଼ିକୁ କେନ୍ଦ୍ରୀୟ ଏଜେନ୍ସି ଗୁଡିକ ସହ ଏବଂ ସୁରକ୍ଷା ବାହିନୀ ସହିତ ଅଧିକ ସମନ୍ୱିତ ଉଦ୍ୟମ କରିବାକୁ ପଡ଼ିବ । ଶ୍ରୀ ଶାହା କହିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ବିପର୍ଯ୍ୟୟ ପରିଚାଳନା କ୍ଷେତ୍ରରେ ମଧ୍ୟ ଅନେକ ପଦକ୍ଷେପ ନେଇଛନ୍ତି ଏବଂ ଏହି ପଦକ୍ଷେପ ଗୁଡିକର କାର୍ଯ୍ୟକାରିତା ଉପରେ ବ୍ୟକ୍ତିଗତ ଭାବେ ନଜର ରଖିବାକୁ ସମସ୍ତ ରାଜ୍ୟର  ମୁଖ୍ୟମନ୍ତ୍ରୀ ମାନଙ୍କୁ ସେ ଅନୁରୋଧ କରିଥିଲେ ।

କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ ଦେଶ ସମ୍ମୁଖରେ ରହିଥିବା ଆହ୍ୱାନ ଗୁଡିକର ମୁକାବିଲା ପାଇଁ ଉପଲବ୍ଧ ଆଭ୍ୟନ୍ତରୀଣ ନିରାପତ୍ତାର ସମସ୍ତ ସମ୍ବଳ ଗୁଡିକର ଉପଯୁକ୍ତ ଉପଯୋଗ କରିବାର ଆବଶ୍ୟକତା ରହିଛି । ଏଥିପାଇଁ ଉତ୍ସ ଗୁଡିକର ବୃଦ୍ଧି୍‌, ଉତ୍ସ ଗୁଡିକର ଯୁକ୍ତିଯୁକ୍ତ ଉପଯୋଗ ଏବଂ ସମ୍ବଳର ଏକୀକରଣ ହେବା ଆବଶ୍ୟକ, ଯାହା ରାଜ୍ୟ ମଧ୍ୟରେ ସମନ୍ୱୟକୁ ଆହୁରି ଉନ୍ନତ କରିବ ବୋଲି ସେ କହିଥିଲେ । ଶ୍ରୀ ଶାହା କହିଥିଲେ ଯେ  ସରକାର "ଗୋଟିଏ ତଥ୍ୟ, ଗୋଟିଏ ପ୍ରବେଶ’ (ଏକ ଡାଟା – ଏକ ଏଂଟ୍ରି) ସିଦ୍ଧାନ୍ତରେ କାର୍ଯ୍ୟ କରୁଛନ୍ତି ଏବଂ ଏହା ଅଧୀନରେ ଏନଆଇଏକୁ ଆତଙ୍କବାଦୀ ମାମଲା ସହ ଜଡିତ ଏକ ଜାତୀୟ ଡାଟାବେସ୍ ପ୍ରସ୍ତୁତ କରିବା ପାଇଁ ଦାୟିତ୍ୱ ଦିଆ ଯାଇଥିବା ବେଳେ ଏନ୍‌ସିବିକୁ ନିଶା କାରବାର ମାମଲା ସମ୍ବନ୍ଧୀୟ ଏକ ଜାତୀୟ ଡାଟାବେସ. ଇଡିକୁ ଅର୍ଥନୈତିକ ଅପରାଧ ସହ ଜଡିତ ଏକ ଡାଟାବେସ୍ ଏବଂ ଏନ୍‌ସିଆର୍‌ବିକୁ ଫିଙ୍ଗର ପ୍ରିଂଟ୍ ଡାଟାବେସ୍ – ଏନ୍‌ଏଏଫ୍‌ଆଇଏସ୍ ଏବଂ ସେକ୍ସ ଅପରାଧୀ ମାନଙ୍କର ଜାତୀୟ ଡାଟାବେସ୍ (ଏନ୍‌ଡିଏସ୍‌ଓ) ପ୍ରସ୍ତୁତ କରିବା ପାଇଁ ଦାୟିତ୍ୱ ଦିଆ ଯାଇଛି । ସେ କହିଥିଲେ ଯେ ନିୟାମକ ସଂସ୍କାର ଗୁଡିକ ଅଧୀନରେ ୧୪ସି ଅର୍ଥାତ୍ ଭାରତୀୟ ସାଇବର କ୍ରାଇମ ସମନ୍ୱୟ କେନ୍ଦ୍ର ଗଠନ କରା ଯାଇଛି, ସାଇବର କ୍ରାଇମ ପୋର୍ଟାଲ ସୃଷ୍ଟି ହୋଇଛି, ନେଟଗ୍ରିଡ ସଂଯୋଗ ପ୍ରଣାଳୀ ସ୍ଥାପିତ କରା ଯାଇଛି, ଘରୋଇ ସୁରକ୍ଷା ଏଜେନ୍ସି ଲାଇସେନ୍ସ ପୋର୍ଟାଲ ପ୍ରସ୍ତୁତ ହୋଇଛି ଏବଂ ଏଫସିଆର୍‌ଏରେ ସଂସ୍କାର ଅଣା ଯାଇଛି । ଶ୍ରୀ ଶାହା କହିଥିଲେ ଯେ ଏଫ୍‌ସିଆର୍‌ଏରେ ସଂସ୍କାରମୂଳକ କାର୍ଯ୍ୟ ଅଧୀନରେ ଦେଶ ବିରୋଧୀ କାର୍ଯ୍ୟକଳାପ, ଧର୍ମାନ୍ତରୀକରଣ, ବିକାଶ ପ୍ରକଳ୍ପ ଗୁଡିକର ରାଜନୈତିକ ବିରୋଧ କିମ୍ବା ସରକାରଙ୍କ ନୀତି ବିରୁଦ୍ଧରେ ପ୍ରଚାରରେ ଜଡିତ କିଛି ସଂଗଠନ ଗୁଡିକ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି ଏବଂ ବିଦେଶୀ ଅର୍ଥର ଅପବ୍ୟବହାରକୁ ରୋକିବା ପାଇଁ ୨୦୨୦ ରେ କରାଯାଇଥିବା ସଂଶୋଧନ ଅନୁଯାୟୀ, ପ୍ରଭାବଶାଳୀ  ଯାଂଚ ସମ୍ଭବ ହୋଇ ପାରିଛି ।

ଶ୍ରୀ ଅମିତ ଶାହା କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ଏକ ସମୟ ସୀମା ରଣନୀତିରେ ତିନୋଟି ପ୍ରମୁଖ ଆହ୍ୱାନ ଉପରେ କାର୍ଯ୍ୟ କରୁଛନ୍ତି । ପ୍ରଥମଟି ହେଉଛି, ସ୍ୱାସ୍ଥ୍ୟ ସେବା ଗୁଡିକ ପାଇଁ ସମ୍ପୂର୍ଣ୍ଣ ଯୋଜନା । ଯେଉଁଥିରେ ଆୟୁଷ୍ମାନ ସିଏପିଏଫ୍ ଯୋଜନା ଆରମ୍ଭ କରା ଯାଇଥିଲା ଏବଂ ପ୍ରାୟ ୩୫ ଲକ୍ଷ ସ୍ୱାସ୍ଥ୍ୟ କାର୍ଡ ବଂନନ କରାଯାଇ ସାରିଛି  ଏବଂ ପ୍ରାୟ ୨୦ କୋଟି ଟଙ୍କା ପ୍ରଦାନ କରା ଯାଇଛି । ଦ୍ୱିତୀୟରେ, ଗୃହ ସନ୍ତୋଷ ଅନୁପାତ ବୃଦ୍ଧି । ୨୦୧୪ ମସିହାରେ ଆବାସିକ ସନ୍ତୋଷର ସ୍ତର ପ୍ରାୟ ୩୭ ପ୍ରତିଶତ ଥିଲା, ଯାହା ବର୍ତ୍ତମାନ ୪୮ ପ୍ରତିଶତକୁ ବୃଦ୍ଧି ପାଇଛି । ଏହା ବ୍ୟତୀତ, ସିଏପିଏଫ୍ - ଆୱାସ୍ ୱେବ୍ ପୋର୍ଟାଲ୍ ସୃଷ୍ଟି ସହିତ ଏହି ସ୍ତରକୁ ବୃଦ୍ଧି କରି ୬୦ ପ୍ରତିଶତ କରିବାକୁ ଲକ୍ଷ୍ୟ ଧାର୍ଯ୍ୟ କରା ଯାଇଛି । ତୃତୀୟତଃ ଏଜ୍ ଅଫ୍ ପୁଲିସିଂ ଯେଉଁଥିରେ ୧୦୦ ଦିନ ଛୁଟିର ବ୍ୟବସ୍ଥା , ଅବସର ବୟସ ୫୭ ରୁ ୬୦ ବର୍ଷକୁ ବୃଦ୍ଧି କରିବା  ଏବଂ ୬୪,୬୪୦ ପ୍ରାର୍ଥୀ  ନିଯୁକ୍ତି କରା ଯିବାର ପ୍ରାବଧାନ ରହିଛି । ସେ କହିଥିଲେ ଯେ ଆମକୁ ଆଂଚଳିକ ଆଭିମୁଖ୍ୟକୁ ପୁଲିସିଂରେ ବିଷୟବସ୍ତୁ ସମ୍ବଳିତ ଆଭିମୁଖ୍ୟ ଆଡକୁ ଯିବାକୁ ପଡିବ ।

କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ ଦେଶର ବିକାଶ, ସ୍ଥିରତା ଏବଂ ଉତ୍ତମ ଶାସନ ପାଇଁ ଆଭ୍ୟନ୍ତରୀଣ ସୁରକ୍ଷା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଏହା ଆମ ସମସ୍ତଙ୍କର ସାଧାରଣ ଦାୟିତ୍ୱ ଅଟେ । ରାଷ୍ଟ୍ର ନିର୍ମାଣରେ କେନ୍ଦ୍ର ଏବଂ ରାଜ୍ୟ ଗୁଡ଼ିକର ସମାନ ଦାୟିତ୍ୱ ରହିଛି ବୋଲି ସେ କହିଥିଲେ । ସମସ୍ତ ଏଜେନ୍ସି ଗୁଡିକ ମଧ୍ୟରେ ଘନିଷ୍ଠ ସହଯୋଗ ରହିଲେ ହିଁ ଏକ ଦେଶ ଅଗ୍ରଗତି କରି ପାରିବ । ଶ୍ରୀ ଶାହା ଅହୁରି ମଧ୍ୟ କହିଥିଲେ ଯେ , ଅମୃତ କାଳ ସମୟରେ ସହଯୋଗୀ ସଂଘବାଦର ଭାବନା ଆମର ପ୍ରେରକ ଶକ୍ତି ହେବା ଉଚିତ୍ ଏବଂ ଏହି ଚିନ୍ତନ ଶିବିର ଆଂଚଳିକ ସହଯୋଗକୁ ଆହୁରି ବ୍ୟାପକ କରିବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ ।

***

SSP