ভারত ইমানা য়াইফরে!

ভারত ইমানা য়াইফরে!

মরৈবাক নীংবা অমসুং থৌনা লৈবা কার্গিলগী মফমসিবু ইকায় খুম্নজবা উৎনবগীদমক্তা ঐহাকপু লৈবাক্কী থৌনা লৈরবা নুপা-নুপীমচাশিং অদোমগী মরক্তা হঞ্জিন হঞ্জিন্ননা চিংশিল্লি। ঐহাক্কী ওইনদি অদোম খুদিংনা চহি কয়াদগী ঐহাক্কী ইমুং-মনুং ওইদুনা লাক্লি। অদোমগা লোয়ননা পাংথোকপনা দিপাবলী নুংঙাইবা হেল্লি। দিৱালীগী নুংঙাইবদি অদোমগী মরক্তনি। ঐহাক্না ঙমখৈদা লাক্তুনা অদোমগা লোয়ননা চহি খুদিংগী দিৱালী পাংথোকপা ফংবসি ঐহাক্কী লাইবক ফবনি। নাকল অমদনা লৈবাক্কী শাংলবা ঙমখৈ অদুগা নাকল অমদনা মসিগীদমক্তা কত্থোক্লবা লান্মীশিং লৈরি। মসিদগী হেন্না নুংঙাইনা দিৱালী পাংথোকপসি কদাইদা ফংগনি! ঐখোয়গী সিভিলিয়নশিংগী দিৱালী অমসুং বম্বুলাগা অদোমগী বম্বুলাগা য়াম্না খেৎনৈ, অদোমগী বম্বুলাদি তোঙানবা মখলগীনি। অদুগা পোকখায়বগী মতৌসু য়াম্না তোঙাল্লি।

মরুপশিং,

থৌনা ফবগী ৱারীশিংগী মথক্তা ঐখোয়গী চৎনবীদা অতোপ্পা নুংঙাইবা ৱারী কয়াসু লৈরি। অদুনা, ভারতনা মশাগী কুহ্মৈশিংবু য়াম্না নুংশি চাননা পাংথোকই। মালেম শিনবা থুংববু য়াওহন্দুনা পাংথোকই। ঙসি, কার্গিলগী মায় পাক্লবা লমদমসিদগী অদোম লান্মীশিংগী মরক্তা লৈদুনা, মালেম শিনবা থুংবগী মফমদা দিৱালীগী য়াইফ পাউজেল পীজরি। পাকিস্তানগা লান শোক্নবদা কার্গিলনা মায় পাকপগী ফিরাল হায়হনখিদবা মিৎকুপ অমত্তা য়াওখিদে। ঙসিগী মালেমগী চরাংনবা মরকসিদা থাউমৈগী মৈঙালসিনা মালেম শিনবা থুংববু ঙালহনবা ওইসনু, মসি ভারতকী অপাম্বনি।

মরুপশিং,

দিৱালীগী ৱাহন্থোক্তি তেরর লোইশিন্দুনা নুংঙাইবা ফোংদোকপা হায়বনি। কার্গিলনা মসিমক পাংথোকখি। ঐখোয়গী লান্মীশিংনা কার্গিলদা তেররগী মশা থুদেকখি, অদুগা লৈবাক্না মায় পাকপা অসিগীদমক্তা পাংথোকখিবা দিৱালী ঙসি ফাওবদা মীপুম খুদিংনা নিংশিংনরি। ঐহাক্না মায় পাকপদুগী শাখিসু ওইখি, লানবু য়াম্না নক্নসু উখি, মসি ঐহাক্কী লাইবক ফবনি। ঐহাক্না অদোমগা লোয়নখিবা মতমগী অরিবা ফোতো ঙসি ঐহাক্না হেক লাকপগা উৎপীখিবদুগীদমক্তা ঐহাক্না ওথোরিতীশিংবুসু থাগৎচরি। ঐহাক্না ফোতোশিং য়েংবা মতমদা পুক্নিং য়াম্না নুংশিখি, অমসুং থৌনা ফরবা অদোম লান্মীশিংগা লেনখিবা মতমশিং অমুক্কা হন্না নীংশিংহনবগী ঐহাক্না অদোম্বু অমুক্কা হন্না থাগৎচরি। ঐখোয়গী লান্মীশিংনা কার্গিল লান্দা য়েক্নবগী মফমদা চাউরবা পারা তম্বীখি, মতমদুদা ঐহাক্না মখোয়গা পুনবা ফংখিবদু ঐহাক্কী লাইবক ফবনি। লৈবাক্কী মীচম মীয়াম অমগী থৌদাং পাংথোকপদা ঐহাকপু লানফমদা পুদুনা লাকখি। লৈবাক্না মখোয়গী লান্মীশিংগী মতেংগীদমক্তা রিলিফ মেতরিএল মখল কয়া থাবীরকখি। মদু পুদুনা ঐহাক্না মফমসিদা লাকখিবনি। লৈবাক নীংবগী মচুনা থল্লবা অদোম পুম্নমক্কী সেবা তৌবা ফংজখি। মতমদুগী ৱারী কয়া লৈ, ঐহাক্না কৈদৌনুংদা কাওবা ঙম্লোই। মাইকৈ খুদিংদা মায় পাকপগী খোল্লাওনা পুম্থন থনখিবনি। মীপুম খুদিংনা মশা কত্থোকপগী ৱাখল্লোন লৈনখিবনি, মদুদা ঐহাক্না লৈবাক্না অদোমদা অতোপ্পা পোৎলম কয়াসু পীহন্নীংখিবনি।

মরুপশিং,

ঐখোয়না নীংজরিবা লৈবাক, ঐখোয়গী ভারত অসি ভুগোলগী লম অমখক নত্তে। ঐখোয়গী ভারত্তি অহিংবা পোৎলম অমনি, লোইবা নাইদ্রবা ৱাখল্লোন্নি, মতম পুম্বদা লৈরগৌরিবনি। ঐখোয়না ভারত হায়না পনবা মতমদা মপাঙ্গল লৈবা সংস্কৃতী মাঙদা উবা ফংই, থৌনা ফবগী চৎনবী থোক্লকই। মসিদি গগনচুম্বী হিমালয়দগী হৌরগা হিন্দ মহাসাগরদা লোইশিনবা ইচেল অমনি। মমাংগী মতমশিংদা অৱা-অনা কয়া লাকখিবদগী মালেমগী সিভিলাইজেসন কয়া মাঙখি, অদুবু, ভারতকী চৎনবীগী মহিংদি শিবা নাইদনা ঙসি ফাওবা মখা চত্থদুনা লাক্লি। ঐহাক্কী লান্মীশিং, লৈবাক অমনা করম্বা মতমদা অমর ওই? মহাক্কী মচাশিংনা, মহাক্কী থৌনা লৈবা মচানুপা-নুপীশিংনা মশাগী মপাঙ্গল অমসুং রিসোর্সশিংদা চেৎনা থাজবা মতমদা লৈবাক অমনা অমর ওইবনি। লৈবাক্কী লান্মীশিংগী মকোক্না হিমালয়গুম্না ৱাংনা থাংগৎপা মতমদা লৈবাক অমনা অমর ওই। চলন্তু গিরয়: কাম্যা য়ুগন্তা পবনাহতা: হায়না মহাক্কী মচাশিংগী মতাংদা হায়নবা মতমদা লৈবাক অমনা অমর ওই। মসিনা হায়বদি, প্রলয়কালগী নোংলৈ নুংশিৎনা চাউরবা চিংশাং কয়াগী মরু ফুক্লবসু, অদোমগুম্বা থৌনা লৈরবা মীওইশিংগী পুক্নিংদি লেঙদনা লৈ, থুগাইবা ঙমদে হায়বনি। অদুনা অদোমগী পাম্বোম্না হিমালয়গী অশাংবা ওল্লিবনি। অদোমগী মপাঙ্গল লৈবা ৱাখল্লোন্না মরুভুমিগী শিংনবা কয়া মায় পাক্না থেংনরিবনি। অদোমগী থৌনাগী মাঙদা মপাল লৈত্রবা অতিয়া অমসুং সমুদ্রনা মকোক নোল্লিবনি। কার্গিলগী কুরুক্ষেত্রনা ভারতকী লান্মীশিংগী মপাঙ্গলগী খুদম ওইরবনি। মসিগী দ্রাস, বাতালিক অমসুং তাইগর হিল্স অসিনা ভারতকী মতিক লৈবা লান্মীশিংগী মাইয়োক্তা অৱাংবা চিংজাওদা লোৎলিবা য়েক্নবশিংবু করম্না মায়থীবা পীখি হায়বগী খুদম ওইরি। লৈবাক অমগী লান্মীগী মতিক মগুনশিং লোইনাইদ্রবা ওইরকপা মতমদা, লৈবাক্তু শোইদনা অমর ওইদুনা লৈগনি।

মরুপশিং,

ঙমখৈ ঙাক্লিবা অদোম পুম্নমক্না লৈবাক্কী ঙাক শেনবগী মপাঙ্গল লৈবা য়ুম্বীনি। অদোম লৈবনা লৈবাক অসিনা চনিং তানা লৈবা ঙম্লিবনি। ভারতমচা খুদিংনা লৈবাক্কী সুরক্স কবচপু মপাঙ্গল হেন্না লৈহন্নবা পুন্না হোৎনমিন্নরিবা অসি ভারতমচা খুদিংগী চাউথোকচনীংঙাইনি। ঙমখৈনা তেক্ত কায়দবা অমসুং মতমদা লৈবাক তেক্ত কায়রোই, শেন্মিৎলোন অমসুং খুন্নাইগী পাঙ্গল লৈগনি। লৈবাক্কী পাঙ্গলগী মতাংদা অদোমসু ঙমখৈসিদা ই-পাউ তারমগনি, মদুমকান্দা অদোমগী থাজবসু শরুক অনি হেনগৎলমগনি। লৈবাক মীয়াম্না স্বচ্ছতা মিসনগা মরী লৈনবা মতমদা, লাইরবশিংনা মশাগী পক্কা য়ুম ফংনরকপা মতমদা, থক্নবা ঈশিং অমসুং মৈ-গ্যাস্কুম্বা তঙাই ফদবা পোৎলমশিং রেকোর্দ ওইবা মতমদা ফংনরকপা মতমদা, জৱান খুদিংসু চাউথোকচরমগনি। লাপ্না লৈবা মহাক্কী য়ুমদসু খুদোংচাবশিং ফংলম্লগনি খঙবদা ঙমখৈদা লৈনা লৈনা নুংঙাইবা ফাওরমগনি। কন্নেক্তিবিতী য়াম্না ফগৎলি, মহাক্কী য়ুমগা ৱারী শাবদা হেন্না লায়থোক্লকপা অমসুং মহাক্না শুতী থোকপদা ময়ুম লায়না য়ৌরকপা মতমদা অদোমসু নুংঙাইরমগনি।

মরুপশিং,

লৈবাক্কী শেন্মিৎলোন্না চহি ৭-৮গী মনুংদা ১০শুবা থাক্তগী ৫শুবা থাক্তা য়ৌরকপা মতমদা অদোম য়াম্না চাউথোকচরমগনি। অদোম নহাশিংনা নাকল অমদা লৈবাক ঙাক শেনবা অদুগা অদোমগী অতোপ্পা নহা মরুপ কয়ানা  স্তার্তঅপ লিশিং ৮০ হেন্না নাকল অমদা শেম্লকপা, অনৌবা ইন্নোভেসন কয়া পাংথোকপা মতমদা অদোমসু য়াম্না নুংঙাইরমগনি। নুমিৎ নিনি মমাংদতা, ইস্রোনা ব্রোদবেন্দ ইন্তর্নেত লৈহন্নবা সেতিলাইত ৩৬ অমুক্তদা থাগত্তুনা রেকোর্দ থমখি। স্পেস্তা ভারতনা মশাগী লম কল্লকপা মতমদা ঐহাক্কী থৌনা লৈরবা লান্মী করম্বনা চাউথোকচরোইদৈরিবনো? থা খরগী মমাংদা, য়ুক্রেন্দা লান থোক্লকপা মতমদা, ঐখোয়গী মচু অহুমগী ফিরালনা মফমদুদা পন্দুনা লৈবা ভারত মচাশিংগী সুরক্স কবচ করম্না ওইখি হায়বা মালেম পুম্বনা উরবনি। মালেমসিদা ভারতকী ইকায় খুম্নবা অমসুং মিংচৎ হৌজিক ফগৎলক্লি, মালেমগী থাক্তা হেনগৎলক্লিবা ভারত মচাশিংগী থৌদাংনা ঐখোয়গী মাঙদা লৈরে।

মরুপশিং,

ভারতনা মনুং অমসুং মপান অনিমক্কী য়েক্নববু মায় পাক্না মাইয়োক্নবা ঙমবদগী হায়রিবা ফিভম অসি ওইথোক্লিবনি। অদোম্না ঙমখৈদা কবচ ওইনা লেপ্তুনা লৈবা মতমদা লৈবাক মনুংদসু, লৈবাক্কী য়েক্নবগী মাইয়োক্তা অহকপা খোঙথাং কয়া পায়খৎলি। তেরোরিজম, নক্সেলাইত, এক্সত্রিমিজমগুম্বা মরা কয়া দিকেদ কয়াদগী শন্দোক্তুনা লাকখিবা পুম্নমক মায় পাক্না ফুকপা ঙম্লে। নক্সেলাইতনা লৈবাক অসিবু মতম অমদা চৈথেং কয়া পীরম্মি, খুদুম চল্লম্মি। ঙসিদি, মদুগী চাং লৈতবগুম্লে। লৈবাক্না ঙসি শেঞ্জা থুমজাগী মাইয়োক্তা কন্না লান্থেংনরি। মখোয়না মপাঙ্গল কয়া য়াম্না লৈরবসু, মখোয় হৌজিক নান্থোকপা ঙম্লরোই। লৈঙাক শোইবদগী লৈবাকপু মতম শাংনা চাউখৎপদা অয়েৎপা পীদুনা লাকখিবনি। ঙসিদি সবলা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রগা লোয়ননা মমাংগী অৱাৎপা কয়া ঐখোয়না মেন্সিল্লি। লৈবাক্কীদমক্তা করি করম্বা অচৌবা খোঙথাং পায়খৎপা য়াবগে হায়বগী মতাংদা ঙসি খোঙজেল য়াঙনা থবক তৌরি।

মরুপশিং,

অথুবা মতমদা অহোংবা লাক্লিবা মতমসিদা, তেক্নোলোজীগী ঙসিগী মতমসিদা, তুংগী মতমদা লাল্লোংসু হোংলক্লগনি। হোংলক্লিবা মতমগী মতুং ইন্না লৈবাক অসিনা লান্মীগী মপাঙ্গলসু হাপ্লি। দিকেদ কয়াদগী পাংথোকপগী মথৌ তারক্লবা লান্মীগী রিফোর্ম কয়া ঙসিদি থবক্তা ওন্থোক্লে। ঐখোয়গী ফোর্সশিংগী মরক্তা চুশিন্নবা হেনগৎহন্নবা, শিংনবা কয়াবু খোঙজেল য়াঙনা মাইয়োক্নবা ঙম্নবা, ঐখোয়না সি.দি.এস.কুম্বা লুপ শেমখি। মতমগা চুনবা ইনফ্রাস্ত্রকচর কয়া ঙমখৈদা শেম-শারি, মসিনা অদোম্না ইশাগী থৌদাং মশক থোক্না পাংথোকপদা য়াম্না তেংবাংগনি। লৈবাকসিদা ঙসিদি সৈনিক স্কুল কয়া অমা হাংদোক্লি। স্কুলশিং অসিদা নুপীমচাশিংগী মফমসু শেম্লে। লৈবাক্কী নুপীমচাশিংনা ঐখোয়গী পাঙ্গল হেনগৎহনবদা শরুক য়ারগনি, মসি শোইদ্রবনি।

মরুপশিং,

লৈবাক্কী ঙাক-শেলগী খ্বাইদগী মরু ওইবা হীরমদি ভারতনা মরোমদোম লেপচবা ঙম্বনি, ভারতকী লান্মীশিংনা মতমগা চুনবা খুৎলায় পায়বনি। মীরমগী খুৎলায় অমসুং মরী লৈনবা সীস্তেমশিংদা মখা পোনবা হন্থহন্নবা, ফোর্স অহুম্মক্না মরোমদোম লেপচবা ঙম্নবা ৱারেপ লৌরে। দিফেন্স পোৎলম ৪০০ হেনববু মীরমদগী লৈররোই, ভারত্তা শাবা ওইনা লৈরগনি হায়না ঐখোয়গী ফোর্স অহুম্না ৱারেপ লৌখিবদা ঐহাক্না নুংঙাইবা ফাওই। খুৎলায় ৪০০ অসি হৌজিক ভারত্তা শারগনি, মসিনা ভারতকী মপাঙ্গলবু পাম্বৈ ৪০০দা হেনগৎহনগনি। মসিনা খ্বাইদগী কান্নবা পীগদবা অমা লৈরি। মদুদি, ভারতকী লান্মীশিংনা মশাগী লমদম্না শাবা খুৎলায় শিজিন্নরকপা মতমদা মশাদা থাজবসু হেনগৎলক্কনি। মখোয়গী লান্দাদা য়েক্নবনা সর্প্রাইস ইলিমেন্তসু ফংগনি অমসুং য়েক্নবগী মবুক্নিং মথৌনাসু থুদেক্লগনি। ভারতকী লান্মীশিংনা ভারত্তা শাবা খুৎলায় শিজিন্নবা হৌরক্লিবা অসিগা লোয়ননা লৈবাক্কী মীচম মীয়াম্না ভোকেল ফোর লোকেলদা শৌগৎনরক্লিবা অসিদা ঐহাক্না নুংঙাইবা ফাওই। অদুগা, লোকেলবু গ্লোবেল ওইহন্নবা মঙলান মঙদুনা তুংলমচত্তা চঙশিল্লি।

মরুপশিং,

ঙসিদি, ব্রাহ্মোস সুপর সোনিক মিসাইলদগী হৌরগা প্রচান্দ লাইত কোম্বেত হেলিকোপ্তর অমসুং তেজস ফাইতর জেত ফাওবদা, মসিগুম্বা দিফেন্স এক্সেসরীনা ভারতকী মতিক মপাঙ্গলগী খুদম ওইরবনি। ঙসিদি ভারতকী নাক্তা, পাক চাউরবা সমুদ্রদা শাথীরবা বিক্রান্ত লৈরে। অরুবা সমুদ্র মফমদা লান শোক্নবগীসু ভারতকী অরিহন্ত লৈরে। ভারতকী নাক্তা পৃথিবী, আকাশ লৈরি। মাঙহন তাকহন্নবা শিবগী ত্রিশুল অমসুং পিনাকা লৈরে। কুরুখ্রেত্রগী লানফম্না কয়া কনবা ওইরবসু, ভারতকী অর্জুন্না য়েক্নবা থুগাইগনি। ভারতনা ঙসিদি মশাগী লান্মীগী তঙাই ফদবশিং পীরি। ভারতনা দিফেন্স খুৎলায়গী অচৌবা এক্সপোর্তর অমসু ওইরি। ভারতনা ঙসিদি মশাগী মিসাইল সীস্তেম মপাঙ্গল হাপকৎলি। লোয়ন-লোয়ননা দ্রোনগুম্বা মোদর্ন ওইবা অমসুং কান্নবা তেক্নিকশিংদসু খোঙজেল য়াঙনা থবক পায়খৎলি।

ইচিল ইনাওশিং,

লানবু অহানবা উপাইনি খনবা লৈবাক্তি ভারত নত্তে। ঐখোয়না মসিগুম্বা চৎনবী ঙাক্লি। ঐখোয়গী থৌনা অমসুং সংস্কারগী মতেংদগী লানবু খ্বাইদগী অকোনবা উপাইনি হায়না মতম পুম্বদা খল্লগা লাক্লি। লান্না লঙ্কাদা নত্ত্রগা কুরুখেত্রদা শোক্নবা ওইরবসু, য়ারিবমখৈ শোক্নদনবা অরোইবা মিৎকুপ ফাওবদা হোৎনদুনা লাকখি। মরম অদুনা, ঐখোয়না মালেম পুম্বগী শান্তি হায়বসিগী মাইকৈদা লৈরিবনি। ঐখোয়না লানগী মাইয়োক্তা লেপ্লি। অদুবু, পাঙ্গল লৈতনা শান্তি পুরকপসু ওইথোকপা নত্তে। ঐখোয়গী লান্মীশিংগী নাক্তা পাঙ্গলসু লৈ, লানগী অফবা লাল্লোংসু লৈ। কনাগুম্বনা ঐখোয়গী মাইকৈদা মঙক থাংগত্তুনা য়েংলকপা মতমদা, ঐখোয়গী ফোর্স অহুম্না মতিক চাবা পাউখুম পীনবা শেম শারগা লৈরি।

মরুপশিং,

ঐখোয়গী লৈবাক, লান্মীগী মাঙদা ৱাখল্লোন অমনা অপনবা পীরগা লৈরি। মদুদি মীখা পোনবগী ৱাখলোন্নি। ঙসিদি, লৈবাক অসিনা ৱাখল্লোন অসিদগী থোক্লক্লে। লৈবাক্কী কোনুংগী রাজপথনা মতম কুইনা মীখা পোনবগী খুদম ওইরগা লাকখি। ঙসিদি মদুবু কর্তব্য পথ ওন্দুনা অনৌবা ভারতকী থাজবা হেনগৎহল্লি। ইন্দিয়া গেতকী মনাক্তা মীখা পোনবগী খুদম লৈরম্বশিংগী মহুত্তা, ঙসিদি নেতাজী সুভাস চন্দ্র বোসকী চাউরবা মীতম্না মহুত শিন্দুনা ঐখোয়গী লম্বী তাক্লি। নেস্নেল ৱা মেমোরিএল ওইরো, নেস্নেল পুলিস মেমোরিএল ওইরো, লৈবাক ঙাক্নবা থবক পুম্নমক পাংথোকহন্নীংবগী ইথিল পীরিবা তীর্থশিং অসিনা অনৌবা ভারতকী শক্তাক ওইরে। মতম খরগী মমাংদা, লৈবাক্না ভারতকী নেভীবুসু মীখা পোনবগী ৱাখল্লোন্দগী মনীং তমহনখ্রে। শিবাজীগী মথৌনাগী ইথিলগী শক্তমসু নেভীগী ফিরালদা হৌজিক য়াওরে।

মরুপশিং,

মালেম পুম্বনা ঙসিদি ভারত্তা মিৎয়েং থম্লি, ভারতকী হেনগৎলক্লিবা মপাঙ্গলদা য়েংনরি। ভারতকী মপাঙ্গল হেনগৎলকপা মতমদা, শান্তি লৈবগী থাজবসু হেনগতলি, নুংঙাই য়াইফবগী ওইথোকপসু হেনগৎলি। ভারতকী মসিগুম্বা মপাঙ্গলগী শাখিনা নীংতম্বগী অমৃত কালনা ওইরগনি। মসিদা অদোম লান্মীশিংগী থৌদাং য়াম্না চাউনা লৈরি, মরমদি অদোম অসি “ভারতকী মমায়নি”। হকচাংনা তিরঙ্গা, ৱাখলনা তিরঙ্গা, মিৎয়েং পান্দমসু তিরঙ্গা। মায় পাক্কনি হায়বগী থাজবনা থনবা, ঙমখৈদগীসু হেন্না পাকপা থবাক, মঙলান্দা পান্দম উবা, খোঙথাং খুদিংদা পাঙ্গল তাকপা, ভারতকী মমায়নি অদোমদি, অদোম্বু উবা খুদিং ভারত মচাশিংনা চাউথোকচরিবনি।

ঐহাক্না অদোম পুম্নমক অমসুং কার্গিলগী অথৌবশিংগী তীর্থ মফম ওইরিবা হিমালয়গী তম্বাক্তগী লৈবাক অমসুং মালেমদা ঐহাক অমসুং ঐহাক্কী থৌনা লৈরবা লান্মীশিংগী মাইকৈদগী দিৱালীগী য়াইফ পাউজেল কয়া পীজরি। ঐহাক্কা লোয়ননা ইশাগী লৈজবী থাদুনা লাউমিন্নসি, হিমালয় পুম্ববু নিলহল্লসি –

ভারত ইমানা য়াইফরে !

ভারত ইমানা য়াইফরে !

ভারত ইমানা য়াইফরে !

বন্দে মাতরম !

বন্দে মাতরম !

বন্দে মাতরম !

***