সিয়াবর রামচন্দ্রগী জয়!

সিয়াবর রামচন্দ্রগী জয়!

সিয়াবর রামচন্দ্রগী জয়!

ঙসিগী ফম্বাক্তা শরুক য়াবীরিবা উত্তর প্রদেশকী রাজ্যপাল, শ্রীমতি অনন্দিবেন পতেল; মীয়াম্না য়াবা মুখ্য মন্ত্রী, শ্রী য়োগী অদিত্যনাথজী, অৱদকী মীয়াম, লৈবাক অমসুং মালেম শিনবা থুংবগী শ্রী রাম অমসুং শ্রী ভারতকী মনাইশিং, ইবেম্মা অমসুং ইবুংঙোশিং!

ঙসিদি, অয়োধ্যানা থাউমৈ অমসুং নুংঙাইবগী ইথিলগা লোয়ননা পুক্নিং হুনা ফজরি। ভারতকী কলচরেল এৱেকনিংগী সনাগী তাঙ্কক অমা হৌবগী মমি ঙসি অয়োধ্যাদা তারি। ঐহাক্না রাম অভিশেক পাংথোক্লবা তুংদা মফমসিদা লাকপা মতমদা, ঐহাক্কী ৱাখল্লোন্দা তোঙানবা ইথিল কয়া লাকখি। ভগ্বান রাম্না অয়োধ্যাদা চহি ১৪গী তুংদা হল্লকখিবা মতমদা অয়োধ্যাবু করম্বা মওং-মতৌদা লৈতেংলমগনি হায়না খল্লকখি। ঐখোয়না ‘ত্রেতা’ মতমগী অয়োধ্যা উবা ফংহৌদ্রে; অদুবু ভগ্বান রামগী থৌজালদগী ঙসিদি অমৃত কাল অসিদা অয়োধ্যাগী লাইগুম্লবা নীংথিবগী মওং-মতৌ উবদি ফংজরি।

মরূপশিং

ঐখোয়গী মহৌশাগী পুন্সিগী শরুক ওইরিবা কুহ্মৈগী হরাওবা ফোংদোকপগী সিভিলাইজেসন অমসুং কলচরগী মনুং চন্না লৈবনি। খুন্নাইদা অনৌবা থবক অমা থোকপা মতমদা, ঐখোয়না অনৌবা কুহ্মৈ হৌদোকই। খুন্নাই অসিদা ‘অচুম্বনা মায় পাকই অমসুং অরানবনা মায়থী’ হায়বগী ৱাখল্লোনবু হিংহন্দুনা ভারতনা থম্লিবা পাম্বৈ অসিগা চাংদম্ননীংঙাই ওইবা অমত্তা লৈতে। শ্রী রাম্না রাবনগী মীওই মীনৈবু চহি লিশিং কয়াগী মমাংদা লোইশিনবীখি। থৌদোক্তুদগী হৌরকখিবা মীনুংশি খঙবা অমসুং স্পিরিচুএলগী ৱারোলশিং অসিনা চহি লিশিং কয়াগী মতুংদা ফাওবদা থাউমৈগী মওংদা ঙসি ফাওবা ঙান্দুনা লৈরি।

মরূপশিং

দীপাবলিগী থাউমৈশিং অসি ঐখোয়গী ওইনা শুপ্নগী পোৎলম অমা নত্তে। মখোয় অসিদি ভারতকী ৱাখল্লোন, ভেল্যু অমসুং ফিলোসোফীগী মতিক লৈরবা ইথিল অমনি। থাউমৈ থানবা, মসিগী মঙালনা পীবা শাফু, মৈশিং অসিগী মঙালনা অহিংদা ঙাল্লিবা অসিনা ভারতকী খ্বাইদগী মরু ওইবা মন্ত্রা ওইরিবা ‘সত্যমেব জয়তে’ তাক্লি হায়বা ঐখোয়না খঙই। মসিদি, ঐখোয়গী উপানিশদতা য়াওবা ৱাহৈ পরেং অমা – “সত্যমেব জয়তে নানরিতম সত্যেন পান্থো বিতাতো দেবয়ান”,  ফোংদোকপনি।  মসিনা হায়বদি, অচুম্বনা মায় পাকই অমসুং অরানবনা মায়থী হায়বনি। মসিমক ঐখোয়গী মুনিনা হায়রম্বা ৱাফম্নি – “রামো রাজমনি, সদা বিজয়তে”। মসিনা হায়বদি, ভগ্বান রামগা অমত্তা ওইনা লৌনরিবা অফবনা মতম পুম্বদা মায় পাক্কনি, ফত্তবগী শক্তাক ওইরিবা রাবন্না কৈদৌনুংদা মায় পাক্লোই হায়বনি। মসিনা মরম ওইরগা, লৈবাক্কী থাউমৈ ফাওবগী মনুংদা লাইগুম্লবা শক্তি অসি উবা ফংলম্লিবা ঐখোয়গী মুনিশিংনা অসুম্না হায়বীরম্মিবনি, “দীপো জ্যোতি: পরব্রহ্ম দীপো জ্যোতি: জনার্দন”। মসিনা হায়বদি, থাউমৈগী মৈঙাল অসি ভগ্বান ব্রহ্মগী শাইওন্নি হায়বনি। মসিগুম্বা থাউমৈগী মৈঙালগী ইথিলনা ভারতকী চাউখৎ থৌরাং অমসুং নৌনা শক্তাক শেম্লিবসু লমজিংগনি হায়না ঐহাক্না থাজবা থম্মি।

মরূপশিং

ঙসিগী য়াইফরবা থৌরমসিদা, মসিগুম্বা থাউমৈ লাখ কয়াগী মঙালগী মতাংদা লৈবাক মীয়ামদা অতোপ্পা অহেনবা ৱাফম খরগা থমজনীংই। গোস্বামী তুলসিদাসজীনা রামচরিতমানস্তা অসুম্না হায়রম্মি, “জগত প্রকাস্য প্রকাসক রামু”। মসিনা হায়বদি, ভগ্বান রাম্না মালেম পুম্ববু ঙালহল্লি হায়বনি। মহাক অসি মালেমগী মৈরাগুম্বনি। মসিগী মঙাল অসি করিনো? মসিদি থৌজাল হৈবা অমসুং মীনুংশি খঙবগী মঙালনি; মসিদি মীওইবা খুন্নাই অমসুং ইকায় খুম্নননা হিংবগী মঙালনি; মসিদি পম্নমকপু অমত্তা ওইনা য়েংবা অমসুং নুংশিবগী মঙালনি। মঙাল অসি মীপুম খুদিংগীনি; ঐখোয় মশেল অমত্তা ওইনা চৎমিন্নবগী ৱারোল অমা মঙালসিনা শন্দোক্লি। ঐহাক্না চহি কয়াগী মমাংদা, ‘থাউমৈ’গী মতাংদা গুজরাতীদা শৈরেং অমা ইখি। শৈরেং মমিংদি ‘দিয়া’ কৌই, মতেক খরা ঙসি ঐহাক হায়জগে। ঐহাক্না অসুম্না ইখি –

દીવા જેવી આશ ને દીવા જેવો તાપ, દીવા જેવી આગ ને દીવા થકી હાશ. ઊગતા સૂરજને હર કોઈ પૂજે, એ તો આથમતી સાંજે’ય આપે સાથ. જાતે બળે ને બાળે અંધાર, માનવના મનમાં ઊગે રખોપાનો ભાવ. মসিনা হায়বদি, থাউমৈনা থাজবা পোকহনবগা লোয়ননা মৈশাশু থাদোকই। থাউমৈনা মৈশু পুথোকই অদুগা নুংঙাইনসু থম্বী। মীপুম খুদিংনা নুমিৎপু নীংজৈ, অদুবু থাউমৈনা ঐখোয়দা অমম্বদা লমজীংবি। থাউমৈ মশামক্না মৈ চাক্তুনা অমম্ববু কোকহল্লি। থাউমৈনা মীওই অমবু মশাগী খোঙফম চেৎহল্লি। ঐখোয়না কন্না হোৎনদুনা ইশাগী অঙম্বা হোৎনৈ (পান্দম অমা ফংনবগীদমক্তা), অদুগা পান্দম ফংলবা তুংদা, ঐখোয়না মায় পাকপগী মঙালবু ইশাগী খন্দবা ইথিল অমগা লোয়ননা মালেমগীদমক্তা কত্থোক্তুনা মালেম শিনবা থুংবদা শন্দোকই।

ইচিল ইনাওশিং,

ঐখোয়না ওইজবা থিবগী থৌওংগী মথক্তা কাদুনা ইশাগী ওইজবা থাদোকপগী খোঙচৎ অসিদা খোঙদারকপা মতমদা, ৱাখল্লোন কয়া নীংথিনা খঙগে হায়বগী ৱারেপ মথন্তনা লাকই। ঐখোয়গী অপাম্বা থুংলবা মতমদা ঐখোয়না ‘ইদম ন মম’ হায়। মসিনা হায়বদি, ঐহাক্না ফংলিবসি ঐহাক্কী নত্তে, মসিদি মালেমগী মীওইবা খুন্নাইগী য়াইফ য়ুম্বালগীনি। ‘দীপ সে দীপাবলি তক’ হায়বসিনা ভারতকী ফিলোসোফীনি; মসিনা ভারতকী ৱাখল্লোন্নি; মসিনা ভারতকী নুংগী ওইবা চৎনবীনি। ভারতনা মেদিএভেল অমসুং মোদর্ন মতমদা অৱাবা কয়া মাইয়োক্নরক্লে হায়বা ঐখোয়না নীংথিনা খঙই। ঐখোয়গী নীংথিরবা সিভিলাইজেসন মাঙহনখিবা অৱাবা মরক্তসু, ঐখোয়গী থাউমৈনা লেপ্পা লৈতনা চাক্তুনা মঙাল পীরম্মি। অৱাবা মতমশিং লোইরবা তুংদা ঐখোয়না অমুক হন্না য়াকায়রক্লিবসি ঐখোয়না থাউমৈ থানবা লেপ্তবগীনি। ঐখোয়না থাজবা শেমগৎপা লেপ্তবগীনি।

কুইখিদ্রিবা মতম খরগী মমাংদা, কোরোনাগী অৱাবা মতমগী মরক্তা, ভারত মচা খুদিংনা মসিগুম্বা ইথিলগা লোয়ননা থাউমৈ অমগা পায়দুনা লেপখৎখি। ভারতনা কোরোনাগী মাইয়োক্তা অকনবা লান থেংনরিবা অসিবু মালেম্না য়েংলি। অমম্বগী য়ুগ খুদিংদগী থোক্লক্তুনা ভারতনা মশাগী মতিক্কী মশেক মঙাল মমাংগী মতমদসু তাকখ্রে, অদুগা তুংগী মতমদসু লেপ্তনা তাক্কনি হায়বগী মসিনা খুদম্নি। মঙাল অসিনা ঐখোয়গী থবক্কী শাখি ওইরক্লবদা, অমম্বা লোইরকপা হায়বসি শোইদ্রবা ওইরকই। মঙাল অসিনা ঐখোয়গী থবক্কী শাখি ওইরক্লবদা, অনৌবা অয়ুক অমসুং অহৌবা অমগী থাজবসু মথন্নতা মপাঙ্গল হেনগৎলকই। থাজবা অসিগা লোয়ননা, ঐহাক্না মীপুম খুদিংবু দিৱালীগী য়াইফ পাউজেল পীজরি। পুক্নিংদা থাজবগা লোয়ননা ঐহাক্না পুন্না অমুক্তা হায়মিন্নসি –

সিয়াবর রামচন্দ্রগী জয়!

সিয়াবর রামচন্দ্রগী জয়!

সিয়াবর রামচন্দ্রগী জয়!

দিস্ক্লেমর: ৱাফম অসি প্রধান মন্ত্রীগী ৱারোলগী চাউরাকপা ৱাহন্থোক্নি। অশেংবা ৱারোলদি হিন্দিদা থমখিবনি।

****