প্রধানমন্ত্রীগী লোইশঙ
azadi ka amrit mahotsav g20-india-2023

পি.এম.না গুজরাত, কেবারিয়াগী এক্তা নগরদা লৈবা স্তেচু ওফ য়ুনিতীদা মিসন লাইফ হৌদোকখ্রে


য়ু.এন. সেক্রেতরী-জেনেরেল ঐচ.ই. মিস্তর এন্তোনিও গুতেরেসকা নাকল অনিগী ওইবা মীফম পাঙথোকখ্রে

মালেমগী লুচিংবশিংনা প্রধান মন্ত্রীবু ইনিসিএতিব অসিগীদমক থাগৎলক্লি অমদি মতেং পাংনবা থাজবা পীরক্লি

ভারতনা অকোয়বগী ফীভমগা চুনবা খুজিল থৌরাং পায়খৎনবা লেপ্লিবা ফিরেপ অসিনা হায়নিংঙাই লৈতনা পুক্নিং থৌগৎলে: য়ু.এন. সেক্রেতরী-জেনেরেল

মিস্তর গুতেরেসগা গোৱাগা পারী পুরীগী ওইবা মরী লৈ, মহাকপু গুজরাত্তা তরাম্না ওকচবা অসি ইমুংগী মীওই অমা ওকপগা মান্নৈ: পি.এম.

“অইং অশাগী খল কায়থরকপা অসি খুজিল থৌরাং য়াৎপক্তগী হেল্লি”

“মিসন লাইফনা অইং অশাগী খল কায়থরকপগা থেংনরিবা লান্থেং অসিবু পুম্নমক্না থৌদাং লৌবা য়াবা মওংদা দিমোক্রেতিক ওইহল্লি”

“মিসন লাইফনা ঐখোয় পুম্নমকপু অকোয়বগী ফীভমগী ত্রস্তী ওইহল্লি”

“মিসন লাইফনা মালেমগী মীওইশিংবু প্রো প্লানেৎ মীয়াম ওইহল্লি”

“’রিদ্যুস, রিয়ুজ অমসুং রিসাইকল’ অমদি সর্কুলর ইকনমী চহি লিশিং কয়াগী মমাঙদগী ভারত মচাশিংগী পুন্সিগী শরুক ওইদুনা লাক্লি”

“চাওখৎপা অমদি মহৌশা অনিনা কমদৌনা খুৎশম্ননা চৎপা য়াবগে হায়বগী অথোইবা খুদম ভারতনা ওইরে”

“ভারতকা য়ুনাইতেদ নেসন্সকা পুন্না থবক তৌমি

Posted On: 20 OCT 2022 1:12PM by PIB Imphal

প্রধান মন্ত্রী, শ্রী নরেন্দ্র মোদীনা য়ু.এস. সেক্রেতরী-জেনেরেল, ঐচ.ই. মিস্তর এন্তোনিও গুতেরেসকা লোয়ননা নাকল অনিগী ওইবা মীফমদা শরুক য়াখ্রে অমদি তুংদা গুজরাত, কেবারিয়াগী এক্তা নগরদা লৈবা স্তেচু ওফ য়ুনিতীদা মিসন লাইফ হৌদোকখ্রে‍। প্রধান মন্ত্রী অমসুং য়ু.এন. সেক্রেতরী-জেনেরেলনা স্তেচু ওফ য়ুনিতীদস লৈ কৎখি‍। য়ুনাইতেদ নেসন্সকী রীজম পুম্নমক্কী মহুৎ শিল্লিবা লৈবাক ১১গী মকোকশিংনা মিসন লাইফ হৌদোকপগী থৌরমদুদা থাগৎ ৱাহৈগী ভিদিও পাউজেলসু শন্দোকখি‍।

থৌরমদুদা ৱা ঙাঙলদুনা, প্রধান মন্ত্রীনা ভারত অসি সেক্রেতরী-জেনেরেল এন্তোনিও গুতেরেসকী অনিসুবা য়ুমগুম্বনি অমদি মহাক্না নহা ওইরিঙৈ মতমদা ভারত্তা কয়ারক হন্না লাকখ্রে হায়না পাউদমখি‍। মহাক্না মিস্তর গুতেরেসকা ভারতকী গোৱা স্তেতকা লৈনরিবা পারী পুরীগী ওইবা মরীগী মরমদসু পাউদমখি‍। প্রধান মন্ত্রীনা মিস্তর গুতেরেসপু তাঞ্জা অসি লৌদুনা ভারত্তা লাকপগীদমক থাগৎলদুনা মহাকপু গুজরাত্তা তরাম্না ওকপা অসি ইমুংগী মীওই অমবু তরাম্না ওকপগুম্না ফাওহল্লি হায়বা ৱাফম থমখি‍।

প্রধান মন্ত্রীনা মিসন লাইফ পায়খৎপদা ভারত্তা পীরক্লিবা মতেংশিংগীদমক নুংঙাইবা ফোঙদোকখি অমদি অসিগুম্লবা থৌরম অসিগীদমক থাগৎ পাউজেল পীরক্লিবা লৈবাক পুম্নমক্কী মকোকশিংবু থাগৎখি‍। অইং অশাগী খল কায়থরকপগী মায়োক্তা থেংনরিবা লান্থেং অসিদা লিংজেল মান্নবগী মরু ওইবা ৱাফম থম্লদুনা, শ্রী মোদীনা হায়খি মদুদি মিসন লাইফ অসি স্তেচু ওফ য়ুনিতী, ভারতকী চাউথোকচনিংঙাই ওইরবা অচৌবা মীতম, সর্দার বল্লব ভাই পতেলগী মমাঙদা পাঙথোক্লিবনি হায়বা ৱাফম থমখি‍। “মালেমগী খ্বাইদগী চাউবা মীতম অসিনা থম্লিবা পান্দমশিং অসি ফংনবগী লম্বীদা পুক্নিং থৌগৎনিংঙাই ওইরগনি”, হায়না মহাক্না হায়খি‍।

“স্তেন্দর্দ থোইদোক হেন্দোকপা ওইরবদি, রেকোর্দসু য়াম্না চাওবা ওই”, হায়বা ৱাফম প্রধান মন্ত্রীনা থমখি‍। মিসন অসি গুজরাত্তা হৌদোকপগী থোইদোক হেন্দোকপা ৱাফম থম্লদুনা, প্রধান মন্ত্রীনা গুজরাত অসি রিনিউএবল ইনর্জী অমসুং ক্লাইমেৎ প্রোতেক্সনগী মায়কৈদা থবক পায়খৎপা লৈবাকসিগী অহানবা স্তেতনি হায়না পাউদমখি‍। সোলার পেনেল খিনবা ওইরবসু নৎত্রগা স্তেত অসিগী ঈকং মায়োক্নবা মফমশিংগীদমক কেনেল নৎত্রগা ঈশিং য়োক্নবগী প্রোজেক্তশিং পায়খৎপদা ওইরবসু, গুজরাতনা মতম পুম্নমক্তা লুচিংবা অমদি ত্রেন্দসেত্তর ওইনা মাঙজিল থানা থোরক্লি হায়না মহাক্না হায়খি‍।

প্রধান মন্ত্রীনা মরুওইখ্রবা ৱাফমশিং অসি লৈঙাক নৎত্রগা মালেমগী লূপশিংখক্তদা ইন্থোক্তুনা থম্বগী ৱাখল্লোন অমা লাকহল্লিবা অইং অশাগী খল কায়থরকপা অসি খুজিল থৌরাংখক্তগা মরী লৈনবা ইসু অমনি হায়না খন্নবা ৱাফম পুথোকখি‍। মীয়াম্না অইং অশাগী খল কায়থরকপগী শাফম মখোয়গী অকোয়বদা থেংনরি, অদুগা হৌখিবা চহি খরসিদা থাজদবা অমাঙ অতা কয়া থোক্লি হায়না মহাক্না হায়খি‍। মসিনা অইং অশাগী খল কায়থরকপা অসি খুজিল থৌরাং য়াৎপখক্তদগী হেনবা ৱাফম অমনি হায়বা ময়েক শেংনা তাক্লি অমদি মীয়াম্না অকোয়বগী ফীভমগীদমক লনাই, ইমুং মনুং অমদি অপুনবগী ওইনা থৌদাং য়াফম থোকই হায়বা খঙনরক্লি হায়না মহাক্না মখা তাখি‍।

“মিসন লাফকী লাইৱাদি ‘অকোয়বগী ফীভমগীদমক পুন্সি মহিং’ হায়বসিনি”, হায়না প্রধান মন্ত্রীনা ফোঙদোকখি‍। মিসন লাইফকী কান্নবশিং পল্লদুনা, মসিনা মালেম অসি ঙাক শেন্নবগীদমক মীয়ামগী পাঙ্গলবু শম্নহল্লি, অমদি মদুবু হেন্না ফবা লম্বী অমদা শীজিন্ননবা পরা তম্বিরি হায়না প্রধান মন্ত্রীনা হায়খি‍। মিসন লাইফনা অইং অশাগী খল কায়থরকপগা থেংনরিবা লান্থেং অসিবু পুম্নমক্না মখোয়গী ঙমজবা মওংদা থৌদাং লৌবা য়াবা মওংদা দিমোক্রেতিক ওইহল্লি হায়বা ৱাফম মহাক্না থমখি‍। “মিসন লাইফনা ঐখোয় পুম্নমকপু অকোয়বগী ফীভম ঙাক শেন্নবগীদমক ঐখোয়গী নুংতিগী পুন্সিদা তৌবা য়াবশিং তৌহন্নবা পুক্নিং থৌগৎলি‍। মিসন লাইফনা ঐখোয়গী পুন্সি মহিংদা অহোংবা পুরক্তুনা অকোয়বগী ফীভম ঙাক শেনবা ঙমগনি হায়না থাজবা থম্লি”, হায়না প্রধান মন্ত্রীনা হায়খি‍। মহাক্না ভারত্তা এল.ই.দি. বল্ব শীজিন্নদুনা ইলেক্ত্রিসিতী বিল হন্থহনখিবা অমদি অকোয়বগী ফীভম ঙাক শেনবদা মতেং ওইখিববু খুদম ওইনা পীখি‍। “থৌরাং অসিনা মৈ শীজিন্নবা চাউনা হন্থহনখি অমদি অকোয়বগী ফীভমদা কান্নহল্লি অদুগা মসি মতম চুপ্পগী ওইনা লৈরগদবা কান্নবা অমনি”, হায়না প্রধান মন্ত্রীনা মখা তাখি‍।

গুজরাত অসি মহাত্মা গান্ধীগী পোক্নফম্নি হায়বা ৱাফম থম্লদুনা, প্রধান মন্ত্রীনা “মহাক অকোয়বগী ফীভম ঙাক শেনবগী মরুওইবা মতম কয়াগী মমাঙদগী খঙলম্লবা অমদি মহৌশাগা লোয়ননা পুন্সি হিংলম্বা ৱাখল খনবা মীওইশিংগী মরক্তা অমা ওইরম্মী‍। মহাক্না ত্রস্তীসিপকী ৱাখল্লোন হৌদোক্লম্মী‍। মিসন লাইফনা ঐখোয় পুম্নমকপু এনভাইরনমেন্তকী ত্রস্তী ওইহল্লি‍। ত্রস্তী অমা হায়বসি মচাক মথুম মরম চাদনা শীজিন্নবা য়াহন্দবা মীওই অমনি‍। ত্রস্তী অমনা মখোয় শোম্বিবা ওইনা থবক তৌই, মাঙহন তাকহনবা ওইনা থবক তৌদে”, হায়না মহাক্না হায়খি‍।

প্রধান মন্ত্রীনা পি.৩ মোদেল হায়বদি প্রো প্লানেৎ পীপলগী ৱাখল্লোন কোনশিল্লি হায়বা ৱাফম থমখি‍। মিসন লাইফনা মালেমগী মীয়ামবু প্রো প্লানেৎ পীপল ওইনা পুনশিল্লি, মখোয়গী ৱাখলদা পুনশিনহল্লি‍। মসিনা ‘লাইফস্তাল ওফ দি প্লানেৎ, ফোর দি প্লানেৎ এন্দ বাই দি প্লানেৎ’ হায়রিবা পরিং অসিদা থবক তৌই‍। তুংলমচৎকী লম্বী অসি মাঙলমচৎকী অশোয়বশিংদগী তমশিলহৌবখক্তনা শেম্বা ঙমগনি হায়না প্রধান মন্ত্রীনা ফোঙদোকখি‍। ভারত্তা মহৌশাবু লাৎচবগী চৎনবী অমা চহি লিশিং কয়াগী মমাঙদগী লৈরক্লি হায়বা ৱাফম মহাক্না নৌহৌননা নীংশিংখি‍। ভেদদা ঈশিং, মালেম, কংফাল, মৈ অমসু নুংশিৎনচংবা মহৌশাগী মচাকশিংগী মরুওইবা ময়েক শেংনা পল্লি‍। প্রধান মন্ত্রীনা অথর্বভেদগী ৱারোল পল্লদুনা “‘মাতা ভুনিয়াহ পুত্রোহম পৃথিব্যাহ’ হায়বদি মালেমনা ইমানি অমদি ঐখোয়না মহাক্কী মচাশিংনি” হায়বা ৱাফম থমখি‍।

প্রধান মন্ত্রীনা ‘রিদ্যুস, রিয়ুজ অমসুং রিদাইকল’ অমদি সর্কুলর ইকনমীগী ৱাখল্লোন্দা ৱাফম কয়া থমখি অমদি হায়রিবশিং অসি চহি লিশিং কয়াদগী ভারত মচাশিংগী পুন্সি মহিংগী শরুক অমা ওইদুনা লাক্লি হায়বা ৱাফম ফোঙদোকখি‍। মালেমগী অতৈ মফমশিংগী মরমদা ৱা ঙাঙলদুনা, প্রধান মন্ত্রীনা ঐখোয়বু মহৌশাগা শাগোন্ননা চৎমিন্ননবগী পুক্নিং থৌগৎপা অসিগুম্বা থৌওংশিং থেংনৈ হায়না হায়খি‍। “মিসন লাইফনা ঐখোয়গী ইপা ইপুনা শীজিন্নরম্বা মহৌশাবু ঙাক শেনবগা মরী লৈনবা অমদি ঙসিগী ঐখোয়গী পুন্সি মহিংগী শরুক অমা ওইহনবা য়াবা থৌওং পুম্নমক কোনশিনগনি”, হায়না মহাক্না হায়খি‍।

ভারতনা অইং অশাগী খল কায়থরকপনা থোকহল্লিবা অমাঙ অতাশিং থেংননবা খোঙফম চেৎনা লেপ্লি‍। “চহিগী ওইবা পর কেপিতা কার্বোন ফুৎপ্রিন্ত অসি মালেমগী চাংচৎ ওইরিবা চহিদা তন ৪গা চাংদম্নবদা ভারত্তা শুপ্নতগী তন ১.৫ খক্তমক ওইরি”, হায়না প্রধান মন্ত্রীনা পাউদমখি‍। ফীভম অসি ওইদুনসু, ভারতনা অইং অশাগী খল কায়থরকপনচিংবা মালেমগী ৱাফমশিংগী পাম্বৈ তুথোক্নবা মাঙজিল থানা হোৎনরি‍। শ্রী মোদীনা উজ্বলা য়োজনা, দিস্ত্রিক্ত খুদিংদা ‘অমৃৎ সরোবর’ ৭৫ অমদি ফত্ত-হৌদীদগী লন হায়বসিদা হান্না পানরুদবা মওংদা য়েংলিবা মীৎয়েঙনচিংবা থৌরাংশিংগী মরমদা ৱা ঙাঙখি‍। ঙসিদি ভারত্তা মালেমগী ওইনা রিনিউএবল ইনর্জীগী মরিশুবা খ্বাইদগী চাউবা কেপাসিতী লৈরে‍। “ঙসিদি ঐখোয় নুংশিৎকী ইনর্জীদা মরিশুবা অমদি নুংশা মঙালগী ইনর্জীদা মঙাশুবদা লৈরে‍। ভারতকী রিনিউএবল ইনর্জীগী কেপাসিতী হৌখৎবা চহি ৭-৮সিদা চাদা ২৯০গী চাংদা হেনগৎলক্লে‍। ঐখোয়না ইলেক্ত্রিক কেপাসিতীগী চাদা ৪০ নন-ফোসিও ফুএলদগী লৌনবা থমখিবা পান্দম থাখিবা মতমদগী চহি ৯ ঙনখৎনা ফংবা ঙম্লে‍। ঐখোয়না পেত্রোলদা ইথানোল চাদা ১০ য়ানশিন্নবগী পান্দমসু থাখিবা মতমদগী থা ৫ ঙনখৎনা ফংবা ঙম্লে‍। নেস্নেল হায়দ্রোজেন মিসনগী খুত্থাঙদা, ভারতনা অকোয়বগী ফীভমগা চুনবা ইনর্জী সোর্সকী মায়কৈদা চঙশিল্লি‍। মসিনা ভারত অমদি মালেমগী লৈবাক কয়াবু মখোয়গী নেৎ জিরোগী পান্দম ফংবদা মতেং ওইগনি”, হায়না প্রধান মন্ত্রীনা মখা তাখি‍। চাওখৎপা অমদি মহৌশা অনিনা কমদৌনা খুৎশম্ননা চৎপা য়াবগে হায়বগী অথোইবা খুদম ভারতনা ওইরে‍। হৌজিক্তি ভারত মালেমগী মঙাশুবা খ্বাইদগী চাউবা শেন্মিৎলোন ওইরে, ঐখোয়গী উমংগী শরুকসু হেনগৎলক্লি অমদি লমলক্কী শা-উচেক মশিংসু হেনগৎলক্লি, হায়না মহাক্না হায়খি‍।

ৱন সন, ৱন ৱর্ল্দ, ৱন গ্রীদকী কেম্পেনগী মরমদা পল্লদুনা, প্রধান মন্ত্রীনা ভারতনা অসিগুম্বা পান্দমশিং অসিগীদমক লৌরিবা ফীরেপ হেন্না কনশিলহন্দুনা মালেমগা খোঙবু ওইবগী মরী হেনগৎহনবা পাম্লি হায়বা ৱাফম ফোঙদোকখি‍। “কোএলিসন ফোর দিজাস্তর রেজিলিএন্ত ইনফ্রাস্ত্রকচর শেমবদা মাঙজিল থারদুনা, ভারতনা মালেমগী অকোয়বগী ফীভম ঙাক শেনবগী লমদা লৈরিবা ৱাখল্লোন খঙহনখ্রে‍। মিসন লাইফ অসি হায়রিবা পরিং অসিগী মথঙগী খোঙথাঙনি”, হায়না প্রধান মন্ত্রীনা মখা তাখি‍।

ভারতকা য়ুনাইতেদ নেসন্সকা পুন্না থবক তৌমিন্নবা খুদিং, মালেম অসিবু হেন্না ফবা মফম অমা ওইহন্নবা অনৌবা লম্বীশিং ফংই হায়বা ৱাফম প্রধান মন্ত্রীনা থমখি‍। “ভারতনা ইন্তরনেস্নেল দে ওফ য়োগগী ৱাফম হৌদোকখি, অদুগা মদুবু য়ুনাইতেদ নেসন্সনা শৌগৎখি‍। ঙসিদি মসিনা মালেমগী মীওই মিলিয়ন কয়াবু মশা মউ ফবা পুন্সি অমা হিংনবগীদমক পুক্নিং থৌগৎলি”, হায়না প্রধান মন্ত্রীনা হায়খি‍। য়ুনাইতেদ নেসন্সনা মপুং ফানা শৌগৎখিবা ইন্তরনেস্নেল ইয়র ওফ মিল্লেৎকী খুদম পীরদুনা, ভারতনা মালেম অসিগী মাগী মহৌশাগী ওইবা অমদি ইককো-ফ্রেন্দলী ওইবা কোর্স সিরিএলগী মতেংনা শমজিন্নবা পামখি হায়না প্রধান মন্ত্রীনা হায়খি‍। মথঙ চহিদা তারিবা ইন্তরনেস্নেল ইয়র ওফ মিল্লেৎ মালেম পুম্বদা খন্ন-নৈনরগনি হায়না মহাক্না হায়খি‍। “মিসন লাইফনা মসিবু মালেমগী কাচিন কোয়া শিনবা থুংনা, লৈবাক খুদিংদা য়ৌহনবদা মায় পাক্কনি” হায়ন মহাক্না মখা তাখি‍। “প্রকৃতী রক্সতী রক্সিতা হায়বদি মহৌশাবু ঙাক শেল্লিবা মহাক্তু মহৌশানা ঙাক শেনবিগনি হায়বা লাইৱা অসি ঐখোয়না নীংশিংগদবনি‍। ঐখোয়গী মিসন লাইফকী পরিংদা চত্তুনা ঐখোয়না হেন্না ফবা মালেম অমা শেমগৎপা ঙমগনি হায়না ঐনা থাজৈ” হায়বা ৱাফমগা লোয়ননা প্রধান মন্ত্রীগী ৱারোল লোইশিনখি‍।

য়ু.এন. সেক্রতরী-জেনেরেল, ঐচ.ই. মিস্তর এন্তোনিও গুতেরেসনা ঐখোয়গী মালেমগী অৱাবা নংলিবা মতম অসিদা ঐখোয় পুম্নমক হোৎনমিন্নবা মথৌ তাই হায়খি‍। লাইফস্তাইল ফোর এনভাইরনমেন্ত – লাইফ হায়রিবা থৌরাং অসি মরুওইবা অমদি মঙলান চাউবা অচুম্বা ৱাফমশিং পুখৎনবা শেমবনি‍। ঐখোয় পুম্নমক, লনাই ওইনা অমদি অপুনবগী ওইনা, ঐখোয়গী মালেম অমদি ঐখোয়গী অপুনবগী তুংলমচৎ ঙাক শেন্নবগী পাম্বৈ পুথোকপদা শরুক য়াফম থোকই‍। হেন্না শীজিন্নবনা অইং অশাগী খল কায়থরকপা, বাইদাইভর্সিতী মাঙথরকপা অমসুং মোৎশিল্লকপা হায়রিবা প্লেনিৎ ইমর্জেন্সী অহুম অসিগী মরূনি‍। ঐখোয়না ঐখোয়গী পুন্সি মহিং শৌগৎনবগীদমক মালেমগী শরুক ১.৬কা মান্ননা শীজিন্নরি‍। অয়ুম্না হেন্না শীজিন্নরিবা অসি চাউনা থোং মান্নদনা অমুক্কা হেনগৎহল্লি হায়না মহাক্না হায়খি‍। লাইফ ঈহৌগী থৌরাং অসি মালেম পুম্বদা শন্দোকখিবা ওইরসনু হায়বা ৱাফম মহাক্না ফোঙদোকখি‍। “ভারতনা অকোয়বগী ফীভমগা চুনবা খুজিল থৌরাং পায়খৎনবা লেপ্লিবা ফিরেপ, রিনিউএবল ইনর্জীগী লমদা শেল থাদবা মশক থোক্না হেনগৎহন্নবা লেপ্লিবা খোঙফম, ইন্তরনেস্নেল সোলার এলাইএন্স লমজিংলিবা অসিনা ঐবু মপুং ফানা পুক্নিং থৌগৎলি..... ঐখোয়না রিনিউএবল রিভোলুসন অসি মপুং ফানা চঙশিনবা মথৌ তাই অমদি হায়রিবা এজেন্দা অসিবু মাঙদা পুখৎপদা ভারতকা লোয়ননা থবক তৌমিন্ননবা ঐনা মীৎয়েঙ থম্লি”, হায়না মহাক্না হায়খি‍। ইজীপ্তা পাঙথোক্কদৌরিবা সি.ও.পি. ২৭গী মতাঙদা ৱা ঙাঙলদুনা, মীফম অসিনা পেরিস য়ানচেগী য়ুম্বী খুদিংমক্তা থবক খোঙজেল য়াঙনা পায়খৎনবা অমদি থাজবা ফোঙদোক্ননবা মরুওইবা রাজনিতীগী তাঞ্জা অমা পীরি হায়না সেক্রেতরী-জেনেরেলনা হায়খি‍। “ক্লাইমেৎনা চাউনা অমাঙ অতা থোকহল্লকপগী খুদোংথিবা লৈরিবা অমদি মাগী চাউরবা শেন্মিৎলোন অসি য়েংলগা ভারতনা পুম্নমকপু শমজিন্ননবগী মরুওইবা শক্লোন অমা লৌবা য়াই”, হায়না মহাক্না হায়খি‍।

মহাত্মা গান্দীগী ৱাফম পল্লদুনা, মিস্তর গুতেরেসনা “মালেমদা পুম্নমক্কী মথৌ তাবা কোন্ননবা লৈ অদুবা কল্লক কমজাওবগীদি লৈতে” হায়খি‍। ঐখোয়না মালেমগী লন-থুম ৱাখল তানা অমদি ইকায় খুম্নবগা লোয়ননা শীজিন্নবা মথৌ তাই হায়বা ৱাফমসু মহাক্না মখা তানা থমখি‍। মালেমগী মচাক মথুমশিং মওং চুম্না শীজিন্নবা ঙম্নবা অমদি ঐখোয়না মথৌ তাবদুখক লৌননবা শেন্মিৎলোন অমদি পুন্সি মহিংদা অহোংবা পুরক্লসি হায়বা ৱাশক য়ু.এন. সেক্রেতরী-জেনেরেলনা লৌখি‍। মহাক্না পুম্নমক্কী মফমদা ভারতনা জি২০ প্রেসিদেন্সী পায়বগা লোয়ননা তুং কোইগদবা, মাগী পুৱারী, নাৎ অমদি চৎনবগী পরিংদা মপুং ফানা চৎকদবা অনৌবা মতম অমা পুরক্নবগীদমক ভারত্তা থাজবা থম্নবা ৱাফমসু ফোঙদোকখি‍।

গুজরাতকী মুখ্য মন্ত্রী, শ্রী ভুপেন্দ্র পতেল, মপান থৌরমগী কেন্দ্র মন্ত্রী, শ্রী সুব্রমনিয়ম জয়শঙ্কর অমসুং য়ু.এন. সেক্রতরী-জেনেরেল, ঐচ.ই. মিস্তর এন্তোনিও গুতেরেস অতৈ কয়াগা লোয়ননা থৌরমদুদা শরুক য়াখি‍।

বেকগ্রাউন্দ

মিসন লাইফনা সস্তেনেবিলিতীগী মায়কৈদা চঙশিনবগী মওংদা অহোংবা পুরক্নবগীদমক মমায় অহুম লোংবা লাল্লোং অমা ইন্নবা পান্দম থম্লি‍। অহানবা অসিনা মীয়ামবু মখোয়গী নুংতিগী পুন্সিদা ইচম চম্বা অদুগা কান্নগদবা অকোয়বগী ফীভমগা চুনবা থৌওংশিং পাঙথোকহন্নবা ইথিল পীবা (দিমান্দ); অনিসুবদা হোংলক্লিবা দিমান্দগী মতুং ইন্না ইন্তস্ত্রীশিং অমসুং কৈথেলশিংবু খোঙলৈ থুনা থবক পায়খৎপা ঙমহনবা (সপ্লাই) অমদি; অহুমসুবদা সস্তেনেবল কঞ্জুম্পসন অমসুং প্রদক্সন অনিমক্তা চৈঙাক পীননবা লৈঙাক অমদি ইন্দস্ত্রিএল পোলিসীদা ইথিল পীবা (পোলিসী) অসিনি‍।

*****



(Release ID: 1869602) Visitor Counter : 149