ভারত ইমানা য়াইফরে

ভারত ইমানা য়াইফরে

ভারত ইমানা য়াইফরে

মাইকৈ খুদিংদা কুহ্মৈগী ইনিলনা থল্লে। দিৱালীনা থোঙদা থিল্লরে। অদুগা মফম অমত্তদা অমসুং ফম্বাক অমত্তদা স্তার্তঅপ অমসুং লৈবাক্কী লৌমী লাখ কয়ানা পুনবগী মতৌ ঙসিগী নুমিৎকী থৌরমসিদা উবা ফংলে। জয় জৱান, জয় কিসান, জয় বিজ্ঞান অমসুং জয় অনুশন্ধানগী মন্ত্রগী অহিংবা শক্তম ঙসিগী থৌরমসিদা উবা ফংলে।

মরূপশিং,

ভারতকী লৌউ-শিংউগী শরুক ওইরিবা মীপুম খুদিংনা ঙসি ভর্চুএলগী খুত্থাংদা লৈবাক্কী মফম খুদিংদগী ঙসিগী থৌরমসিদা শরুক য়ারি। মসিগুম্বা মশক থোক্লবা ফম্বাক অসিনা লৌমীশিংগী পুন্সি মহিং হেন্না লায়থোকহন্নবা অমসুং ঐখোয়গী লৌউ-শিংউগী পথাপ্পু হেন্না চাউখৎহন্নবা অমসুং মোদর্ন ওইহন্নবা মাইকৈ খুদিংদা খোঙথাং কয়া পায়খৎলি। ঙসি, লৈবাক অসিদা প্রধান মন্ত্রী কিসান সাম্রুধী কেন্দ্র ৬০০ হেন্না হাংদোক্লি। অদুগা ঙসি উৎলিবা কয়া অসিসু ঐহাক্না য়েংলম্মিনি। অমনা অমদগী হেনবা তেক্নোলোজীগী ইন্নোভেসন কয়া উৎলি, ঐহাক্তি ঙসি নুমিৎ চুপ্পা ময়ামশিং য়েংবা পাম্লিবনি। অদুবু কুহ্মৈগী মতম্নিনা ঐহাক্না অদোমসু য়াম্না কুইনা পন্থহন্নীংদে, অদুনা ঐহাক ফম্বাক্তা লাক্লবনি। অদুবু, ঐহাক্না উরক্লিবা প্রধান মন্ত্রী সাম্রুধী কেন্দ্রগী শক্তম, মসিনা মোদেল অমা শেম্লিবসিদা ঐহাক তসেংনা নুংঙাইবা ফাওই অমসুং মখোয়গী তীমশিংবু ঐহাক্না থাগৎচরি। মসিদি লৌমীশিংগী হার য়োন্থোক য়োন্সিন তৌবা মফম অমখক নত্তনা লৌমীশিংগা অচেৎপা মরী লৈনহন্দুনা মখোয়গী তঙাই ফদবা খুদিংদা তেংবাংবগী মফম অমনি।

মরূপশিং,

ঙৈহাক্কী মমাংদা, লৈবাক্কী লৌমী করোর কয়াদা পি.এম. কিসান সম্মান নিধীগী অনিশুবা ইন্সতোলমেন্ত ওইনা লুপা করোর ১৬,০০০ মখোয়গী একাউন্ততা হাপখ্রে। ইশাগী মোবাইলদা য়েংলবদি লুপা ২০০০ চঙলকপগী নোতিফিকেসন লাক্লমগনি। মরক্কী মীওই, কম্পেনী অমত্তা য়াওদনা ঐহাক্কী লৌমীগী একাউন্ততা হকথেংননা শেল চৎখ্রবনি। হন্দক্কী দিৱালী মমাংদা শেল লাক্লিবা, লৌউ-শিংউগী মরু ওইবা থবক কয়াগীদমক্তা মতম চানা শেল চঙলকপা অসিগীদমক্তা ঐহাক্কী লৌমী বেনিফিশরীশিংগী ইমুং-মনুং, লৈবাক্কী কাচিন কোয়া খুদিংদা লৈরিবা লৌমীশিংবু ঙসিগী পরিয়োজনাগী তাঞ্জা অসিদা য়াইফ পাউজেল পীজরি।

ঙসি লাক্লিবা এগ্রিকলচর স্তার্তঅপশিংনা লৌমীশিংগী য়াইফনবীগদমক্তা অনৌবা ইন্নোভেসন কয়া পাংথোক্লি, লৌমীশিংগী অৱাবা করম্না হন্থহনগনি, মখোয়গী থবক্তা শেল করম্না চঙহল্লোই, মখোয়গী থবকশিংগী খোঙজেল করম্না য়াঙখৎহনগনি, মখোয়গী পোত্থোক করম্না হেনগৎহনগনি, হায়বনচিংবা থবক কয়া পাংথোকপীরি। লৌমীশিংগা মরী লৈনদুনা নক্ননা লৈরিবা মখোয়গুম্বা নহাশিংবু ঐহাক্না থাগৎলি অমসুং পুম্নমক অসিদা মখোয়না থৱাই য়াওনা শরুক য়াবগীদমক্তা ঐহাক্না থমোই শেংনা ইকায় খুম্নবা উৎলি।

মরূপশিং,

ঙসিদি, ৱান নেসন ৱান ফর্তিলাইজরগী শক্তমদা লৌমীশিংদা অহোঙবা অমসুং অফবা হার ভারত ব্রান্দগী মখাদা ফংহন্নবা স্কিম অসি হৌদোক্লে। ইং ২০১৪গী মমাংদা ফর্তিলাইজর সেক্তরদা শিংনবা কয়া লৈরমি, য়ুরিয়াবু করম্না ব্লেকমার্কেতিং তৌরম্মি, লৌমীশিংগী হক করম্না মৎপীরম্মি, মদুগী মহুত্তা লৌমীশিংনা চৈ চাবা তারম্মি। ঐহাক্কী লৌমী ইচিল ইনাওশিংনা মসিগুম্বা ইং ২০১৪গী মমাংগী মতম করম্না কাওবা ঙমগনি। লৈবাক অসিদা য়ুরিয়াগী চাউরবা ফেক্তরী কয়া চহি কয়াগী মমাংদা লোনখ্রে। অনৌবা কাঙলোন অমা লাখ্রবনি, হার ইম্পোর্ত তৌবদা লৌমী কয়াগী য়ুম য়োনখি, ফুরিতখাও হাঙখি, অদুগা মফমসিগী ফেক্তরী লোনখিবদা হরাওবা মীওইদি মখোয়নি। ঐখোয়না য়ুরিয়াবু ১০০% নীম কোতিং তৌদুনা ব্লেকমার্কেত তৌবা থিংখি। মতম কয়াদগী লোন্দুনা লাক্লবা অচৌবা ফেক্তরী ৬ ঐখোয়না হাংদোক্নবা কন্না হোৎনখি।

মরূপশিং,

ভারতনা হৌজিক লিক্বিদ নেনো য়ুরিয়া পুথোকপগী লমদা মরোমদোম লেপচবা ঙম্বগী মাইকৈদা খোঙজেল য়াঙনা চঙশিল্লি। নেনো য়ুরিয়া হায়বসি শেল য়াম্না চঙদনা চাং য়াম্না পুথোকপগী পাম্বৈ অমনি। য়ুরিয়া বোরা অমবু য়ুরিয়া বোত্তল অমনা মহুত শিনবা য়ারগনি। মসিদি সাইন্স অমসুং তেক্নোলোজীনা পাংথোকপা অঙকপা থবক্নি। মসিনা মরম ওইদুনা, য়ুরিয়া বোরা বোরা পুথোক পুশিন তৌবগী শেল কনবা ঙম্লগনি, য়ুমদা থম্বদসু মফম য়াম্না কল্লরোই। কৈথেলদা লাক্লে, পোৎ ময়াম অমা লৈরে, অদুগা ফুরিৎখাওদা বোত্তল অমা হাপ্পগা অদুম য়ারে।

ভারতকী ফর্তিলাইজর রিফোর্ম তৌবগী ৱারীদা অনৌবা থৌওং অনি পাংথোকখি। অহানবা, লৈবাক শিনবা থুংবদা প্রধান মন্ত্রী কিসান সাম্রুধী কেন্দ্র হায়না হার দুকান লাখ ৩.২৫ হেন্না শেমগৎপগী কেম্পেন অমা ঙসিদগী হৌদোক্লে। মসিনা লৌমীশিংনা হার অমসুং মরু খক লৈবা য়াবা মফমখক নত্তনা সোইল তেস্তিং পাংথোকপা অমসুং লৌউবগী থৌওংগা মরী লৈনবা কান্নবা ই-পাউ কয়া লৌবগী সেন্তর অমা ওইগনি। 

ঐখোয়গী লৌমীশিংদা মসিদা লাকউ, অদুদা চৎলু হায়দুনা চমম্নবা লৈহল্লিবনি লৈররোই। অচৌবা অহোংবা অমা পুরক্লবনি। নরেন্দ্র তোমারজীনা হৌজিক্তা শুগাইইনা তাকপীখিবদুনি। অহোংবা অদুদি হারগী মমিংগা মরী লৈনৈ। মগুন চপ মান্ননা পুথোকপগা মরী লৈনৈ। কম্পেনীশিং অসিনা পাংথোক্লিবা প্রোমোসনগী কেম্পেন অমসুং মফমদুদা হার য়োল্লিবা মীওইশিংনা কম্মিসন য়াম্না চাউনা ফংই, মদুনা হার মখলদু য়াম্না হেন্না শিৎলি। কম্মিসন য়াম্না ফংদ্রবদি ব্রান্দ অদুগী হার শিৎপা ৱাৎলি। চাংয়েংনবা লৈবা, ব্রান্দ য়াম্না লৈরকপা অমসুং হার য়োল্লিবা এজেন্তশিংগী তোঙানবা ৱা তাবদা লৌমীশিংনা মখোয়গী তঙাই ফদবা চাংগী হার লৈবদা চমম্নরে। করিগুম্বা মতমদা লৌমীশিংনা ৱাফমশিং অসিনা মরম ওইরগা অনিরক চাদিং তৌবা য়াওনরিনি।

দি.এ.পি. ওইরো, এম.ও.পি. ওইরো, এন.পি.কে. ওইরো, কম্পেনী অমদগী লৈবদা লৌমীশিংনা মতম পুম্বদা চমম্নৈ। মমিং লৈবা হারনি হায়দুনা মমল হেন্না য়োনবা য়াওরিবনি। মখোয়গী ৱাখলদা ব্রান্দ অমা লৈখ্রে, মদু ফংদবদগী অতোপ্পা ব্রান্দ অমা লৈবা মতমদা হান্নদি কিলো অমখক শিজিন্নবনি, হন্দক্তি অনৌবনিনা কিলো অনি শিজিন্নরগে খন্নরিবনি। মসিদসু মখোয়গী চাদিং হেনগৎলিবনি। মসিগুম্বা শিংনবা কয়াসিগী ঐখোয়না ৱারোইশিন পুরক্লবনি।

হৌজিক্তি, ৱান নেসন ৱান ফর্তিলাইজরনা মসিগুম্বা শিংনবদগী মনীং তমহনবগা লোয়ননা অফবা মখলগী হারসু ফংহনগদৌরবনি। লৈবাক্কী মফম অমা হেক্তদা চৎপা মতমদা, মমিং অমখক্কী হার ফংলগনি। অমসুং মান্নবা চাংদা য়োল্লগনি, অদুগা ব্রান্দ অদুদি – ভারত হায়বসিনি। লৈবাক অসিদা য়ুরিয়াসু ভারত ব্রান্দ হায়না য়োল্লগনি। লৈবাক অমগী হার পুম্নমক্না শুপ্নগী ব্রান্দ অমখক্তং ওইরবদি, কম্পেনী মমিংগী মতাংদা থেংনবা চমম্নবা পুম্নমক লৈররোই। মসিদগীদি হারগী মমলসু হন্থরগনি, লৌমীশিংদসু মখোয়গী তঙাই ফদবা চাং য়াম্না থুনা ফংলগনি।

মরূপশিং,

লৈবাক্কী চাউরাকপা লৌমী ৮৫%দি অপীকপা লৌমীনি। হেক্ত্যার অমা, হেক্ত্যার অমা মখায়দগী হেন্না চাউবা লম লৈবা নত্তে। মসিদা নত্তনা, মতমগী মতুং ইন্না ইমুং চাউথোরকপা মতমদা, অপীকপা লমদু অমুক মচেৎ মচেৎ য়েন্নরিবনি। মদুদগীদি মখোয়গী লমশিং পীকপশল্লকপা হেল্লকই, অদুগা ঐখোয়না হৌজিক্কানি অইং অশা হোংবগী ফিভমসু থেংনরে। দিৱালীদি য়ৌরক্লে অদুবু নোংদি খকউ য়াদ্রে। নেচরেল দিজাজতর থোকপসু লেপ্ত্রি।

মরূপশিং,

মতৌ অসুম্না লৈহাও ফৎলক্তবা মতমদা, ঐখোয়গী মহৌশাগী ইমা লৈবাক্কী মশা ঙম্লক্তবা মতমদা, ইমাগী লৈহাও ফবগী চাংসু হন্থরক্কনি, ঈশিংগী মগুন ফৎলক্ত্রবদি শিংনবা হেন্না লাক্কনি। হায়রিবশিং অসি লৌমীশিংনা নুমিৎ খুদিংগী থেংনবা থৌওংনি। মসিগুম্বা মতমদা, লৌউবগী পোত্থোক হেনগৎহন্নবা, মহৈ মরোং মরাং কায়না লোক্নবগীদমক্তা, ঐখোয়না লৌউ-শিংউগী পথাপ্তা অনৌবা থৌওং হৌদোকপা তাবনি, সাইন্তিফিক ওইবা থৌওং শিজিন্নবা তাবনি, ৱাখল মকা লাম্না তেক্নোলোজী তরাম্না ওকপা তাবনি। ঐখোয়না মসিগীদমক্তা লৌউ-শিংউদা সাইন্তিফিক ওইবা থৌওং অমসুং তেক্নোলোজী শিজিন্নবদা অহেনবা মিৎয়েং চঙখি। মশাগী লমগী লৈহাওগী ফিভমগী অচুম্বা পাউদম পীনবগীদমক্তা ঙসি লৈবাক্কী লৌমী করোর ২২দা সোইল হেল্থ কার্দ য়েন্থোকখ্রে।  অমসুং লৌমীশিংদা খ্বাইদগী ফবা মরু পীবা ঙম্নবগীদমক্তা সাইন্তিফিক ওইবা থৌওং কয়া পায়খৎলি। অহোংবা লৈরবা অইং অশাগী ফিভমগা চুনবা মরু মখল ১৭০০মুক লৌমীশিংগী মফমদা মমাংগী চহি ৭-৮দা ফংহনখি। ঐখোয়না লমদমসিদা চৎনবী ওইনা শিজিন্নরিবা অপৌবা গ্রেন-মিল্লেতকী মরুগী মগুন হেন্না ফগৎহন্নবা লৈবাক মনুংদা হব কয়া অমা ঙসি শেমগৎলি। ভারতকী অপৌবা গ্রেনবু মালেম শিনবা থুংবদা মমিং চৎহন্নবা সরকারনা হোৎনদুনা মথংগী চহিবু কোর্স সিরিএলগী ইন্তর্নেস্নেল য়র হায়না লাউথোকখ্রে। মালেম শিনবা থুংবনা ঐখোয়গী অপৌবা সিরিএলগী মতাংদা ৱারী শান্নরগনি। মালেমদা ঐখোয়না করম্না য়ৌবা ঙমগনি হায়বগী খুদোংচাবা পুম্নমক অদোমগী মাঙদা লৈরে।

হৌখিবা চহি ৮দা ইরিগেসনগী মতাংদা পাংথোকখিবা থবক পুম্নমক অদোম্না খঙলম্লগনি। লবুকপু ঈশিংনা পুম্থন থনদ্রিবমখৈ পেনবা লৈনদে, পাম্বী মতোন অমা ঈশিং মথক্তা লিৎখৎলকপদা ঈশিং ৱাৎলে খন্নৈ, অদুনা ঈশিং হাপ্পা লেপ্নদে, লবুকপু পুখ্রি ওলহল্লি। মসিদা ঈশিংসু মাঙই, লৈহাওসু শোকই, লৌরোকসু মাঙই। ঐখোয়না মসিগুম্বা ফিভমদগী লৌমীশিংবু পুথোরক্নবা হোৎনখি। পর দ্রোপ মোর ক্রোপ, মাইক্রো ইরিগেসন অমসুং দ্রিপ ইরিগেসন্দা অহেনবা মিৎয়েং চঙখি। স্প্রিংক্লর শিজিন্নবা পুক্নিং থৌগৎখি।

ঈশিং য়াম্না চগদনা চু থাবা য়াই হায়বসি ঐখোয়গী লৌমীশিংনা অহানবদা য়াম্না য়ানীংলমদে। স্প্রিংক্লর শিজিন্নদুনা চু নীংথিনা থাবা য়াই অমসুং ঈশিং কনবা য়ারে হায়বা হৌজিক্তি থবক্না উৎখ্রে। শা-শন্দা ঈশিং ঈশিং য়াম্না পীথক্লিঙৈ শঙ্গোম য়াম্না থোকই হায়বগী ৱাখল্লোন্দা মখোয়না অদুম লৈরি, অদুনা চু থাবদা ঈশিং য়াম্না শিজিন্নরবদি চুহিংগী মহাও হেনগনি হায়না খন্নরি। মসিগুম্বা থৌওং অদুমক পাংথোক্তুনা লাকখি। মমাংগী চহি ৭-৮দা লৈবাক্কী চাউরাকপা হেক্ত্যার ৭০গী লম্বু ঐখোয়না মাইক্রো ইরিগেসনগী মখাদা পুশিনখি।

মরূপশিং,

নেচরেল ফার্মিংনা তুংগী মতমগী শিংনবা কয়া মাইয়োক্নবা ঙমবগী মরু ওইবা পাম্বৈ পীরি। ঐখোয়না ঙসিদি, লৈবাক শিনবা থুংবদা এৱিয়র্নেসকী চাং য়াম্না হেনগৎলকপগী মতৌ উবা ফংলি। গুজরাত, হিমাচল প্রদেশ অমসুং আন্ধ্র প্রদেশকা লোয়ননা য়ু.পি., উত্তরাখন্দদা লৌমীশিংনা নেচরেল ফার্মিং পাক্তক্ননা পাংথোক্লি। গুজরাতকী ওইনদি, জিলা অমসুং গ্রাম পঞ্চায়তকী থাক্তা পাংথোকপগী থৌরাং কয়াসু য়াৎখ্রে। মমাংগী চহিশিংদা নেচরেল ফার্মিংগী অচৌবা কৈথেল লৈরকখিবা, মসিবু পুক্নিং থৌগৎখিবা অসিদগী মখোয়গী পোত্থোকসু য়াম্না হেনগৎখি।

মরূপশিং,

কি.এম. কিসান সম্মান নিধীনা অপীকপা লৌমীশিংনা মোদর্ন তেক্নোলোজী শিজিন্নদুনা মতৌ করম্না কান্নবা ফংই হায়বগী খুদম্নি। স্কিম অসি হেক হৌদোকখিবদগী, লৌমীশিংগী বেঙ্ক একাউন্ততা লুপা করোর লাখ ২ হেন্না হকথেংননা হাপখ্রে। লৈবাক্কী চাউরাকপা ৮৫% ওইরিবা অপীকপা লৌমীশিংগীদমক্তদি মসিনা য়াম্না চাউবা তেংবাং ওইরি। পি.এম. কিসান সম্মান নিধীনা মখোয়গী অৱাবা কয়া কোকহল্লে হায়না লৈবাক্কী লৌমীশিংদা ঐঙোন্দা হায়রি।

মরূপশিং,

হান্নদগী হেন্না ফবা অমসুং মোদর্ন তেক্নোলোজী শিজিন্নদুনা, ঐখোয়না লবুক অমসুং কৈথেলগী মরক্তা লৈবা অথাপ্পা হন্থহল্লি। মসিগী খ্বাইদগী কান্নবা ফংলিবসি থুনা পত্থ-পুমথবা উহৈ, মনা-মশিং, শঙ্গোম অমসুং ঙাগা মরী লৈনরিবা অপীকপা লৌমীশিংনি। কিসান রেল অমসুং কিসান উরান এয়র সর্ভিসনা হীরম অসিদা য়াম্না তেংবাংলি। মোদর্ন ফেসিলিতীশিংনা অসিনা ঙসিদি লৌমীশিংগী লবুক্কা লৈবাক্কী মরু ওইবা শহর অমসুং মীরমগী কৈথেলগা শম্নহল্লি। মসিনা মরম ওইরগা মমাংদা এক্সপোর্ত তৌগনি হায়বগী খন্নবা ফাওবা য়াওদবা লৈবাকশিংদা ঙসিদি ঐখোয়গী লৌউ-শিংউগী পোত্থোক য়ৌশিনবা ঙম্লে। ভারতনা এগ্রিকলচরগী পোত্থোক এক্সপোর্ত তৌবগী মতাংদা মালেমগী মকোক থোংবা লৈবাক ১০গী মনুং চল্লে। মালেম শিনবা থুংবনা লাইচৎ থেংনখ্রবসু, ভারতকী এগ্রি এক্সপোর্তনা ১৮%গী চাংদা শাহৌ লৌখি। চিংগী লোলদা দ্রাগোন ফ্রুত হায়না খঙনবা গুজরাতকী থম্বাল উহৈ অসি মীরমদা চাং য়াম্না থাদোক্লি। হিমাচল প্রদেশতগী খ্বাইদগী ইহানবা হানবা ওইনা ব্লেক গার্লিক এক্সপোর্ত তৌরি। অসমগী বর্মিজ অঙ্গুর, লদাখকী খুবানী, জলগাওগী লফোই নত্ত্রগা ভগলপুরগী জর্দারী হৈনৌনচিংবা তোঙানবা উহৈ কয়া মীরমগী কৈথেল য়োনবা হৌরে। ৱান দিস্ত্রিক্ত ৱান প্রদক্তকুম্বা স্কিমগী মখাদা তোঙানবা মখলগী পোত্থোক কয়াদা মিৎয়েং চঙলি, পুক্নিং থৌগৎলি। ঙসিদি, জিলাগী থাক্তা এক্সপোর্ত হব শেম্লে অমসুং লৌমীশিংনা মসিদগী কান্নবা য়াম্না ফংলি।

মরূপশিং,

ঙসিদি, প্রোসেস ফুদতা ঐখোয়গী হিন্দুস্তানগী শরুক য়াম্না হেনগৎলে। মসিদগী লৌমীশিংনা মখোয়গী পোত্থোক্কী মমল য়াম্না ৱাংনা ফংবগী লম্বী হাংদোক্লে। উত্তরাখন্দগী অপৌবা গ্রেন দেনমার্ক্তা অহানবা ওইনা থাবা হৌরে। মতৌ অসুম্না, কর্নাতকাগী ওর্গানিক থৈবোং পাউদরসু অনৌবা কৈথেলদা য়ৌরি। ত্রিপুরাসু মসিগীদমক্তা হৌজিক শেম শারি। মসিগী মহৈ ফংনবা ঐখোয়না মমাংগী চহি ৮দগী হোৎনবা হৌরকপনি, অমসুং ঙসিদি মহৈ চাবা হৌরে।

মরূপশিং,

ঐহাক মশিং খরা হায়গে, অদোম অমুক্তং খন্থবীয়ু। চাউখৎপা অমসুং অহোংবা পুরকপা হায়বসি করম্না পাংথোকই হায়বা অদোম্না মসিদগী খঙবা ঙমগনি। চহি ৮গী মমাংদা লৈবাক অসিদা শুপ্নগী ফুদ পার্ক ২খক লৈরম্মি, ঙসিদি মশিং অসি ২৩ য়ৌরে। এফ.পি.ও. অমসুং ঐখোয়গী ইচে-ইচলশিংগী সেল্ফ হেল্প গ্রুপকুম্বা লৌউ-শিংউগী পোত্থোকপ পুথোকপশিংগী লুপশিংবু মরী লৈনহন্নবা ঐখোয়না য়ারিবমখৈ হোৎনরি। কোল্দ স্তোরেজ, ফুদ প্রোসেসিং, এক্সপোর্ত ওইরো, থবকশিং অসিদা অপীকপা লৌমীশিংসু হকথেংননা শরুক য়াহন্নবা ঐখোয়গী সরকারনা লেপ্পা লৈতনা হোৎনরি।

মরূপশিং,

মরুদগী হৌদুনা কৈথেল ফাওবদা ঐখোয়না তেক্নোলোজী শিজিন্নদুনা অচৌবা অহোংবা কয়া পুরক্লে। ঐখোয়গী কৃষি মন্দি খুদিংবুসু মোদর্ন ওইহন্নবা হোৎনরি। লৌমীশিংনা তেক্নোলোজী শিজিন্দুনা ময়ুমদা ফমদুনা মশাগী পোত্থোক য়োনবা য়াহন্নবা ই-নামগী খুত্থাংদগী পাংথোক্লি। লৌমী করোর ১.৭৫ হেনবা অমসুং লল্লোন ইতিক তৌবা মীওই লাখ ২.৫বু এন.এ.এম.গী শরুক ওইরে। ই.-নামগী খুত্থাংদা পাংথোকখিবা ত্রাঞ্জেক্সন্না লুপা করোর লাখ ২ হেল্লে তাবদা অদোমসু নুংঙাইব ফাওগনি। লৈবাক্কী খুঙ্গংগী লমশিংগী মেপ শেমদুনা লৌমীশিংদা প্রোপর্তী কার্দ য়েন্থোকপগী মতৌ অদোম্না উরম্লগনি। থবকশিং অসিদা দ্রোনগুম্বা মতমগী তেক্নোলোজী শিজিন্নরি।

মরূপশিং,

ঐখোয়গী স্তার্তঅপশিংনা মতমগী তেক্নোলোজী শিজিন্নদুনা লৌউ-শিংউবু য়াম্না হেন্না কান্নবা ওইবা অনৌবা য়ুগ অমদা পুনবা কন্না হোৎনরি। ঙসিদি, স্তার্তঅপকা মরী লৈনবা মীওই মশিং য়াম্লবনা ঐখোয়গী মরক্তা তিল্লি। মমাংগী চহি ৭-৮দা লৌউবগা মরী লৈনবা স্তার্তঅপ মশিং কয়া লৈরম্মি অমুক্তা তাবীয়ু। মমাংদা ১০০ লৈরম্মি, হৌজিক্তি ৩০০০ হেনবনা লৌউবগী তেক্নোলোজীগী মতাংদা থবক তৌরি। মসিগুম্বা স্তার্তঅপশিং, ইনোভেতিব ওইবা নহাশিং, ভারতকী তেলেন্ত ওইরিবশিংনা ভারতকী লৌউ-শিংউ অমসুং খুঙ্গংগী শেন্মিৎলোনগী তুংগী মতম্বু নৌহৌননা শেম্লি। অপীবা মমলদগীনা পুথোকপ পুশিন ফাওবগী হীরমগী ৱারোইশিন খুদিংমক ঐখোয়গী স্তার্তঅপশিংগী নাক্তা লৈ।

কিসান দ্রোন্না লৌমীগী পুন্সি কয়া য়াম্না নুংঙাইহল্লে হায়বা অমুক্তা য়েংবীয়ু। লৈহাও কমায়না তৌরি, লৈহাওসিদা করম্বা হার মথৌ তাই, ঈশিং কয়াম্না তঙাই ফদে, করি লাইনা তারে, করম্বা হিদাক কাপকনি হায়বগী ৱাফম পুম্নমক দ্রোন্না খঙবা ঙম্লে অমসুং অদোমগী মফমদা তসেংবা ই-পাউসু ফংহনবা ঙম্লে। হিদাক কাপকদবা ওইরবসু দ্রোন্না কাপ্লে, কদাইদা কাপকনি, কয়া য়াম্না কাপকনি হায়বসু দ্রোন্না খঙলে। মসিনা মরম ওইরগা স্প্রে অমসুং হার মাঙবসু কনবা ঙম্লে, অদুগা লৌমীশিংগী মশাদা কেমিকেল থেংদ্রবসু য়ারে। মসিনা পীরিবসি কান্নবগী কান্নবা খক্তনি।

ইচিল ইনাওশিং,

ঙসি ঐখোয়গী মাঙদা য়াম্না চাউবা শিংনবা অমা লৈরি। ঐহাক মসিগী মতাংদা হায়জগে। ঐখোয়গী ইন্নোভেতরশিংগী মফমদা থমজগে। ঐহাক্না আত্মানির্ভরতাদা অহেনবা অমসুং লেপ্তবা মিৎয়েং করিগীদমক্তা চঙলিবনো হায়বগী মরম তাকচগে। মসিদা লৌউ-শিংউ, লৌমীশিংগী করি থৌদাং লৈবগে হায়বা ঐখোয়না খঙদুনা মিসন মোদতা থবক তৌবগী মথৌ তাই। ঐখোয়না শেল খ্বাইদগী তিংলিবসি চানবা থাউ, হার অমসুং শুংদোক্ত্রিবা থাউ লৈবদনি। পুম্নমক অসি লৈনবগীদমক্তা ঐখোয়না চহি খুদিংগী লুপা করোর লাখ কয়া চাদিং তৌই। মীরমদা থৌদোক অমা হেক থোকপদা, মদুগী চৈথেং ঐখোয়সু ফংই। কোরোনা লাকখিবা মতমদসু ঐখোয়না অৱাবা কয়া খাঙনা খাঙনা ৱারোইশিন পুরক্কদবা পাম্বৈ থিদোকখি। হৌজিক অসি কোরোনা পুম্লোই লোইবদি নত্ত্রি অদুবু লান অমুক তৌরক্লে। অদুগা লান তৌরিবা মফমসি ঐখোয়না পোত্থোক য়াম্না লৈবা মফম অমুক ওইরি। ঐখোয়গী তঙাই ফদবা পোত্থোক কয়া লৈরম্বা লৈবাক্না লান্দা মায় ওন্সিনখ্রে। য়ুরিয়া ওইরো, দি.এ.পি. ওইরো নত্ত্রগা অতোপ্পা হারবু ওইরো, মালেমগী কৈথেলদা মখোয়গী মমল অতিয়া য়ৌনা ৱাংলে। শেন্মিৎলোনগী পোৎলুম য়াম্না লৈরে অমসুং ঐখোয়গী লৈবাকসু পোৎলুম অসি পুবা য়াওরি। ঐখোয়না ঙসি মীরমদগী হার অসি কিলোদা লুপা ৭৫-৮০গী চাংদা লৈরি। অদুবু লৈবাক্কী লৌমীশিংদা পোৎলুম অসি নংহন্দনবা হায়দুনা ঐখোয়না মান্নবা হার অসিমক কিলোদা লুপা ৫-৬তা ফংহল্লিবনি মরুপশিং। লৌমীশিংদা হার হোংনা ফংহনবদা হন্দক্কী চহিসিদা সরকারগী শেনখাওদা পোৎলুম কয়া লাকই, অতোপ্পা থবক কয়া পাংথোকপদা খুদোংচাদবা কয়া থেংনরি। হন্দক্কী চহিসিদা সরকারনা য়ুরিয়া লৈবখক্তদা লুপা করোর লাখ অমগা মখায় কেন্দ্র সরকরানা চাদিং তৌখি।

ইচিল ইনাওশিং,

ইম্পোর্ততা চঙবা শেল হন্থহন্নবগীদমক্তা লৈবাক অসিবু মরোমদোম লেপচবা ঙমহন্নবা ঐখোয় পুন্না ৱারেপ লৌমিন্নবা তাই। ঐখোয় পুন্না মাইকৈ অসিদা চঙশিনবা তাই। মীরমদগী চানবা চিঞ্জাক লৈরিবা, লৌউ-শিংউগী পোত্থোক লীবা তারিবা অসিদগী নীংতম্বা ফংনবা ৱারেপ লৌবা তাই। শুংদোক্ত্রিবা থাউ অমসুং গ্যাসকী মতাংদা মীরমগী মখা পোল্লিবসিবু হন্থহন্নবগীদমক্তা বাইও ফুএল অমসুং ইথানোলগুম্বা থৌওং কয়া লৈবাক অসিদা কন্না চত্থরি। থবকশিং অসিগা লৌমীশিংগা হকথেংননা মরী লৈনৈ। লৌমীগী পোত্থোকশিংদগী শুংবা য়াবা ইথানোলদগী গাড়ি চেন্নবা, অমসুং লৌউ-শিংউগী ৱেস্ততগী, শন্থীদগী শেম্বা য়াবা বাইওগ্যাস্তগী বাইও সি.এন.জি. শুংবগী থবক কয়া ঙসি পাংথোক্লি। চানবা থাউগী মতাংদা মরোমদোম লেপচবা ঙম্নবগীদমক্তা ঐখোয়না মিসন ওইল পাল্ম হৌদোকখ্রে। মিসন অসিদগী লৌফম থোকপা কান্নবা খুদিং লৌনবা ঐহাক্না লৌমী মরুপশিংদা হায়জনীংই। থাউ থোকপা মরু (ওইলসীদ) পুথোকপগী চাং য়াম্না হেনগৎহন্দুনা ঐখোয়না মীরমদগী চানবা থাউ লৈরিবসি য়াম্না হন্থহনবা য়াই। মসিগীদমক্তা ঐখোয়গী লৌমীশিংদা মতিক য়াম্না লৈ। ইং ২০১৫দা ঐহাক্না অদোমগী মফমদা করিগুম্বা অমা হায়জখি। অদোম্না ঐহাক্কী ৱা লৌবীদুনা থবক ওইনা পাংথোক্তুনা উৎপীখি। অহানবদা করি ফিভম ওইরম্মি? হৱাই ফাঅবা মীরমদগী লৈরগা চারম্লিবনি। লৌমীশিংনা অচেৎপা ৱারেপ লৌবদগী ঐখোয়না মিৎমাংদা উনা উনা হৱাই পুথোকপদা ৭০% হেনগৎখি। মসিগুম্বা অপাম্বা অমসুং পাঙ্গলগা লোয়ননা ঐখোয়না তুংলমচত্তা খোঙদাসি, ভারতকী লৌউ-শিংউবু মতমগা চুনহনসি। নীংতম্বগী অমৃত কাল অসিদা ঐখোয়না লৌউ-শিংউবু য়েংবদা নীংথিবা অমসুং নুংঙাই য়াইফবা ওইহল্লসি। ৱারেপ অসিগা লোয়ননা ঐহাক্না লৌমী ইচিল ইনাও, স্তার্তঅপকা মরী লৈনবা নহারোলশিংবু য়াইফ পাউজেল পীবগা লোয়ননা হন্না হন্না থাগৎচরি।

হন্না হন্না থাগৎচরি!

*****