প্রধানমন্ত্রীগী লোইশঙ
পি.এম.না গুজরাত, মেহসানাগী মোধেরাদা লুপা করোর ৩৯০০ হেনবগী তোঙান তোঙানবা প্রোজেক্তশিং উরেপ উয়ুং তমখ্রে অমদি লৈবাক মীয়ামদা কত্থোকখ্রে
পি.এম.না মোধেরাবু ভারতকী অহানবা পুং ২৪ চুপ্না সোলার পৱারনা চলাইবা খুঙ্গঙ ওইনা লাউথোকখ্রে
“ঙসি অসি মেহসানা, মোধেরা অমসুং অৱাংথংবা গুজরাৎ অপুম্বগী চাওখৎপগী লমদা অনৌবা ইনর্জী অমগী অহৌবা নুমিৎ ওইরে”
“মালেমগী মফম অমা হেক্তদা সোলার পৱারগী খন্নবা মতমদা মোধেরা মতম পুম্নমক্তা য়াওরগনি”
“অদোম্নাম থৌ তাবা মৈ শীজিন্নরগা অহেনবনা লৈঙাক্না য়োন্বিয়ু”
“নরেন্দ্র অমসুং ভুপেন্দ্রগী দবল-ইঞ্জিন লৈঙাক অমত্তা ওইরে”
“নুমিৎনা মীচঙ মীখায় নাইদনা য়েল্লিবা মঙালগুম, চাওখৎপগী মঙালনা য়ুমথোঙ খুদিং, খাঙপোক খুদিং য়ৌরে”
Posted On:
09 OCT 2022 10:24PM by PIB Imphal
প্রধান মন্ত্রী, শ্রী নরেনদ্র মোদীনা ঙসি মেহসানা, মোধেরাদা লুপা করোর ৩৯০০ হেনবগী তোঙান তোঙানবা প্রোজেক্তশিং উরেপ উয়ুং তমখ্রে অমদি লৈবাক মীয়ামদা কত্থোকখ্রে। প্রধান মন্ত্রীনা মোধেরাবু ভারতকী অহানবা পুং ২৪ চুপ্না সোলার পৱারনা চলাইবা খুঙ্গঙনি হায়না লাউথোকখ্রে।
তিল্লিবা মীয়ামদা ৱা ঙাঙলদুনা, প্রধান মন্ত্রীনা ঙসি অসি মেহসানা, মোধেরা অমসুং অৱাংথংবা গুজরাৎ অপুম্বগী চাওখৎপগী লমদা অনৌবা ইনর্জী অমগী অহৌবা নুমিৎ ওইরে হায়বা ৱাফম থমখি। ইলেক্ত্রিসিতী অমসুং ঈশিংদগী হৌরগা রেলৱেজ অমসুং লম্বী, শঙ্গোমগী পোত্থোকশিংদগী হৌরগা স্কিল দিভেলপমেন্ত অমসুং হকশেলগী লমদা য়াম্লবা প্রোজেক্তশিং শঙ্গারে অমদি উরেপ উয়ুং তম্লে হায়না প্রধান মন্ত্রীনা ফোঙদোকখি। প্রোজেক্তশিং অদুগী কান্নবশিং পাউদম্লদুনা, প্রোজেক্তশিং অসিনা লমদমসিদা থবক পীনবগী পাম্বৈ ওইরগনি, অমদি স্তেতঅসিগী হেরিতেজ তুরিজমদা ইনোৎ হাপ্পদা নত্তনা এনিমেল হজবেন্দ্রীগী লমদা লৈরিবা লৌমী অমদি মীওইশিংগী শেন্থোক হেনগৎহনবদা মতেং ওইরগনি হায়না প্রধান মন্ত্রীনা ফোঙদোকখি।
প্রধান মন্ত্রীনা লৈবাক মীয়ামদা সরদ পুর্নিমা অমসুং বাল্মিকী জয়ন্তীগী য়াইফ-পাউজেলসু পীরদুনা, মহারিসি বাল্মিকীনা প্রভু রামগী ‘সমরস’ পুন্সিবু তাকপিখি অমদি খোং মান্নবা পুন্সিগী মরমদা তাকপিরম্মী হায়না ফোঙদোকখি।
হান্নদি মোধেরা অসি সুর্য় মন্দীর লৈবগীদমক খঙনরম্বনি, অদুবু হৌজিক্তি সুর্য় মন্দীরনা মালেমগী এনভাইরনমেন্ত অমসুং ইনর্জীগী মেপ্তা মফম কল্লিবা সৌর গ্রামবুসু পুক্নিং থৌগৎলে হায়না প্রধান মন্ত্রীনা হায়খি। মোধেরাবু লৈখা তানা মাঙহন্নবা থৌরাং কয়া চহিচা কয়াসিদা হোৎনখ্রবসু, হৌজিক্তি মোধেরা অরিবা অমসুং অনৌবগী ইতিন্ফমগী চপ চারবা খুদম অমা ওইরে হায়না মহাক্না হায়খি। “মালেমগী মফম অমা হেক্তদা সোলার পৱারগী খন্নবা মতমদা মোধেরা মতম পুম্নমক্তা য়াওরগনি,” হায়না মহাক্না হায়খি। প্রধান মন্ত্রীনা সোলার ইনর্জী অমসুং ইলেক্ত্রিসিতীগী কভরেজ পীবদা মায় পাক্লিবা অসি গুজরাৎকী মীয়াম্না কেন্দ্র অমসুং স্তেত লৈঙাক্তা থম্লিবা থাজবসিনা ওইহনবা ঙম্বনি হায়বা ৱাফমসু থমখি। কত্থোকপা অমদি মীৎয়েঙ শানবা অমসুং তশেং তশেংবা ফিরেপ লৈরগদি ওইথোক্তবা করিসু লৈরোই।
সোলার ইনর্জীনা মোধেরাগী পৱার হাউস লাইত, লৌউ শিংউগী মথৌ তাবা লোয়ননা গারীগী মথৌ তাবশিং প্রধান মন্ত্রীনা পাউদমখি। “২১শুবা চহিচাগী মরোমদোম লেপচবা ভারত অমগীদমক, ঐখোয়গী ইনর্জীগা মরী লৈননা হোৎনরিবশিং হেনগৎহনবা মথৌ তাই,” হায়না শ্রী মোদীনা মখা তাখি। ইলেক্ত্রিসিতী শীজিন্নবা অমদি পুথোকপা অনিমক মীয়াম্না ওইহন্নবগী লমদা মহাক্না থবক পায়খৎলি হায়না প্রধান মন্ত্রীনা ফোঙদোকখি। “অদোম্না মথৌ তাবা মৈ শীজিন্নবিয়ু অদুগা অহেনবনা লৈঙাক্তা য়োন্বিয়ু,” হায়না মহাক্না মখা তাখি। মসিনা ইলেক্ত্রিসিতী বিলসু লাক্লরোই অদুগা অহেনবা শেন্থোকসু লাক্লগনি হায়না মহাক্না ফোঙদোকখি। মমাঙদদি লৈঙাক্না মৈ পুথোক্লগা মীয়াম্না লৈদুনা শীজিন্নরম্বনি, অদুবু ঙসিদি মীয়াম্না মখোয়গী য়ুমদা অমদি লৌমীশিংনা মখোয়গী লৌফমদা সোলার পেনেলশিং খন্দুনা ঈথৈ লৌখোংগী সোলার পম্প খিন্দুনা মৈ পুথোকচবা ঙমহন্নবা থৌরাং কেন্দ্র লৈঙাক্না পায়খৎলি হায়বা ৱাফমসু প্রধান মন্ত্রীনা থমখি।
অৱাবা মায়োক্নখিবা মতমশিং নীংশিংলদুনা, মৈ ফংদবনা মরম ওইরগা পাক শন্না শোকহল্লিবসি অঙাং নুপীমচাশিংগী মহৈ মশিং তম্বদনি হায়বা ৱাফম প্রধান মন্ত্রীনা ফোঙদোকখি। মেহসানাগী মীওইশিং মহৌশানা চৈশিংলোন অমদি সাইন্সতা হৈথোই শিংথোইবনি হায়বা ৱাফমসু প্রধান মন্ত্রীনা থমখি। “করিগুম্বা অদোম্না অমেরিকাদা চৎলবদি, অৱাং গুজরাৎকী অঙকপা মফমদুনা চৈশিংলোনগী লমদা উবা ফংগনি। করিগুম্বা অদোম্না কত্চ শিনবা থুংনা চৎলবদি, অদোম্না মেহসানাদগী ওজাশিং মফমদুদা থেংনগনি। মৈ ফংদবনা মরম ওইরগা মখোয়গী পন্দোল লোম্বা ঙমদবনি,” হায়না মহাক্না মখা তাখি। গুজরাৎনা ভারত্তা মহাক্কী ফিরাল থেৎলিবসি হৌখিবা চহি কুনলোমসিদা মীয়াম্না লৈঙাক্তা থমখিবা থাজবদুননি হায়বা ৱাফমসু প্রধান মন্ত্রীনা মখা তানা থমখি।
প্রধান মন্ত্রীনা গুজরাৎপু মুখ্য মন্ত্রী ওইনা লমজিংলম্বা মতম নীংশিংলদুনা, গুজরাৎ অসি চহি তরাগী মনুংদা তরেৎতি ঈকঙনা শোকহনবা মরম্না স্তেত বজেৎকী চাউরবা শেন্ফম অমা ঈশিংগীদমক্তা কাইথোক্লম্মী হায়না শ্রী মোদীনা হায়খি। “মরম অদুননি ঐখোয়না গুজরাৎকী ঈশিংগী অৱাবা কোকহন্নবগীদমক পঞ্চম্রুৎ স্কীম হৌদোকখিবা,” হায়না মহাক্না মখা তাখি। খুঙ্গঙ খুদিংদা পুং ২৪ চুপ্না মৈ ফংহন্নবগীদমক উন্ঝাদা জ্যোতিগ্রাম স্কীম মায় পাক্না পায়খৎখিবা অমদি মদুবু নুমিৎ লিশিং অমগী মনুংদা লোইশিন্নবা লৈঙাক্না হোৎনখিবা প্রধান মন্ত্রীনা নীংশিংখি। সুজলাম সুফলাম স্কীমগী মরমদা পল্লদুনা, ঙসি অৱাং গুজরাৎকী লৌফমশিংদা ঈথৈ লৌখোং পীরিবা সুজলাম সুফলাম কেনেলগীদমক লম হরাউ হরাউ পীরকখিবা লৌমীশিংবু প্রধান মন্ত্রীনা তৌবিমল খঙবা ফোঙদোকখি। ঙসি শঙ্গারিবা ঈশিংগা মরী লৈনবা স্কীমশিং অসিনা ইমুং কয়াগী, মমাশিংগী অমদি ইচে-ইচলশিংগী হকশেলদা চাউনা কান্নহল্লগনি, হায়না প্রধান মন্ত্রীনা মখা তাখি।
হৌখিবা চহি কুনলোমসিদা, লৈঙাক্না লম্বীথোংদা মীৎয়েঙ থমখি, অমদি নরেন্দ্র অমসুং ভুপেন্দ্রগী দবল-ইঞ্জিন লৈঙাক অমত্তা ওইরে হায়বা ৱাফম প্রধান মন্ত্রীনা থমখি। ইং ১৯৩০দা ব্রিতিশশিংনা মহেসানা-অম্বাজী-তরঙ্গ-অবুরোদ রেলৱে লাইন শেমগৎনবা রোদ মেপ অমা শেমখি, অদুবু পানখিবা লৈঙাকশিংনা মদুদা পুক্নি চঙখিদে হায়না শ্রী মোদীনা ফোঙদোকখি। “ঐখোয়না পুম্নমক লৌখত্তুনা, থৌরাং য়াৎখি, অমদি মসিনা শেলথুমগী লমদা পুরক্কদবা কান্নবশিং অদোম খনবা ঙম্বিরমগনি,” হায়না মহাক্না মখা তাখি।
হিদাক লাংথক অতাবা মমলদা ফংহল্লিবা প্রধান মন্ত্রী জন ঔসধী কেন্দ্রনা মায় পাক্লকপদা প্রধান মন্ত্রীন নুংঙাইবা ফোঙদোকখি। লুপা ১০০০ পীরম্বা জেনেরিক হিদাকশিং লুপা ১০০-২০০দা ফংলিবা জন ঔসধী কেন্দ্রশিংদগী মীয়াম্না হিদাক লাংথক লৈবিনবা ৱাফম শ্রী মোদীনা থমখি। তুরিজমগী মতাঙদা পল্লদুনা, ইন্দস্ত্রী অসি য়াম্লবা মীওইশিংদা থবক পীননবা পাম্বৈ অমনি হায়না প্রধান মন্ত্রীনা হায়খি। “বরনগরদা পায়খৎলিবা এক্সকাভেসন অসিদা য়েংবিয়ু!, চহি লিশিং কয়া লিরবা পোৎলমশিং মসিদা ফংলি,” হায়না শ্রী মোদীনা অঙকপা ফোঙদোকখি।
হৌখিবা চহি কুনলোমসিদা, গুজরাৎকী লাইশঙশিং অমসুং সক্তীপীথশিং হান্নগী ফীভমদা শেমগৎনবা থৌরাং পায়খৎলক্লি হায়না প্রধান মন্ত্রীনা ফোঙদোকখি। “সোম্নাথ, চোতিলা অমসুং পাবরগরগী ফগৎলবা ফীভমশিংনা মসিগী খুদম্নি। ঐনা লাকপা মতমদু ফাওবদা পাবরগরদা ফিরাল চিংখৎখিদবা চহি ৫০০ শুরে অমদি ঐনা লাক্লবা ফিরাল চিংখৎখিবনি।
মহাক্কী ৱারোল লোইশিল্লকপদা, ‘সবকা সাথ, সবকা বিকাস, সবকা বিস্বাস অমসুং সবকা প্রয়াস’ হায়রিবা লাইৱা অসিনা দবল ইঞ্জিন লৈঙাক্কী য়ুম্ফম্নি হায়বা ৱাফম প্রধান মন্ত্রীনা থমখি। “নুমিৎনা মীচঙ মীখায় নাইদনা য়েল্লিবা মঙালগুম, চাওখৎপগী মঙালনা য়ুমথোঙ খুদিং, খাঙপোক খুদিং য়ৌরে,” হায়বা ৱাফমগা লোয়ননা প্রধান মন্ত্রীগী ৱারোল লোইশিনখি।
গুজরাৎকী মুখ্য মন্ত্রী, শ্রী ভুপেন্দ্র পতেল, মেম্বর্স ওফ পার্লিয়ামেন্ত শ্রী সি.আর. পাতিল, শ্রী ভারাসিন্হ ধাবি, শ্রীমতী সর্দাবেন পতেল অমসুং জুগাঞ্জী লোখন্দৱালাসু থৌরমদুদা শরুক য়াখি।
বেকগ্রাউন্দ
প্রধান মন্ত্রীনা লৈবাক মীয়ামদা কত্থোক্কদৌরিবা প্রোজেক্তশিংদি অহমদবাদ-মেহসানা গেজ কন্ভর্জন প্রোজেক্তকী সাবরমতি-জগুদান শরুক্কী গেজ কন্ভর্জন; ও.এন.জি.সি.গী নন্দসন জিওলোজিকেল ওইল প্রদক্সন প্রোজেক্ত; খেরাবাদগী সিঙ্গোদা পাৎ ফাওবগী সুজলাম সুফলান কেনেল; ধরোই দামদা য়ুম্ফম ওইবা বরনগর খেরালু অমসুং ধরোই গ্রুপ রিফোর্ম স্কীম; বেচ্রাজী মোধেরা-চনস্মা স্তেত হায়ৱেগী শরুক অমা ফোর লেন্দা ওনখৎপগী প্রোজেক্ত; উঞ্জা-দসাজ উপেরা লাদোল (ভনখর এপ্রোচ রোদ)গী শরুক অমা পাকথোকপগী প্রোজেক্ত; রিজনেল ত্রেনিং সেন্তর, সরদার পতেল ইন্সতিত্যুৎ ওফ পব্লিক এদমিনিস্ত্রেসন (এস.পি.আই.পি.এ.), মেহসানাগী অনৌবা বিল্দীং; অমসুং মোধেরাগী সন তেম্পলগী প্রোজেক্সন মেপিং অমদি অতৈ অতৈ য়াওরি।
প্রধান মন্ত্রীনা উরেপ উয়ুং তমগদৌরিবা প্রোজেক্তশিংদি এন.ঐচ.-৬৮গী পতনদগী গোজারিয়া ফাওবগী শরুক লেন মরিদা ওনখৎপা; মেহসানা দিস্ত্রিক্তকী জোতানা তালুকাদা লৈবা চালাসন খঙ্গঙদা শেমগৎকদবা ৱাতর ত্রীতমেন্ত প্লান্ত; দুধসাগর দেরীদা অনৌবা ওতোমেতেদ মিল্ক পাউদর প্লান্ত অমসুং য়ু.ঐচ.তি. মিল্ক কার্তোন প্লান্ত; জেনেরেল হোস্পিতাল মেহসানাগী রিদিভেলপমেন্ত অমসুং রিকন্সত্রক্সন; অমসুং মেহসানা অমসুং অৱাং গুজরাৎকী অতৈ দিস্ত্রিক্তশিংগী রিভেম্প দিস্ত্রিব্যুসন সেক্তর স্কীম অমসুং অতৈ অতৈ য়াওরি।
প্রধান মন্ত্রীনা মোধেরা খুঙ্গঙবু পুং ২৪ চুপ্না সোলার পৱারনা চলাইবা খুল ওইনা লাউথোকখি; অসিগুম্বা মখলগী অহানবা ওইরিবা প্রোজেক্ত অসিনা মোধেরা হায়রিবা সন-তেম্পলগী তাউন অসিদা সোলার পৱারনা চলাইবগী মঙলান অদু মঙফাওনহল্লি। মসিদা লৈমায়দা খিনবা সোলার পৱার প্লান্ত অমসুং লনাই মীওইশিংগী য়ুমথক অমদি লৈঙাক্কী ওফিসকী য়ুমথক্তা রুফতোপ সোলার সিস্তেম ১৩০০ হেন্না খিন্দুনা বেত্তরী ইনর্জী স্তোরেজ সিস্তেম (বি.ই.এস.এস.ৱ অমদা পুল্লপ পুনশিল্লি। প্রোজেক্ত অসিনা ভারতকী রিনিউএবল ইনর্জীগী মতিংনা কমদৌনা গ্রাসরুত্তা মীয়ামবু মপাঙ্গল কলহনবগে হায়বদু উৎলি।
*****
(Release ID: 1866536)
Visitor Counter : 112
Read this release in:
Bengali
,
English
,
Urdu
,
Marathi
,
Hindi
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam