প্রধানমন্ত্রীগী লোইশঙ
পি.এম.না পানীপত্তা ২জি ইথানোল প্লান্ত শঙ্গাখ্রে
“বাইওফ্যুল অসি মহৌশাবু ঙাকশেনবগী পাংখক ওই – ঐখোয়গীদমক্তদি বাইওফ্যুল হায়বা অসি গ্রীন-ফ্যুল, অকোইববু কল্লিবা ফ্যুল হায়বনি”
“রাজনিগীগী ওইবা কান্নবা লৌবা অমসুং অশম্বা লম্বেলশিং থীবগী রাজনিতী অসিনা সমস্যাশিংবু মতম চুপ্পগী ওইনা কোকহনবা কৈদৌনুংদা ঙমলোই”
“লেম্না ফংহন্নবগী ইশাগী ওইজবা থৌশিলশিং লাউথোকপা অসিনা লৈবাক অসিবু মরোমদোম লেপচনবা হোৎনরিবা অসিদা অপনবা পীগনি, থম্মোই শেংনা তেক্স থীজরিবা মীওইশিংদা অৱাবা পোৎলুম হেনগৎহনগনি অমসুং অনৌবা তেক্নোলোজীশিংদা ইনভেস্তমেন্ত লাকহল্লোই”
“মথংগী চহি খরা অসিদা লৈবাক অসিগী য়ুমথোংশিংগী চাদা ৭৫ হেনবনা পাইপ গ্যাস ফংলগনি”
Posted On:
10 AUG 2022 6:20PM by PIB Imphal
মালেমগী বাইওফ্যুল নুমিৎকী পালন থৌরমদা প্রধান মন্ত্রী শ্রী নরেন্দ্র মোদীনা ভিদিও কনফরেন্সকী থোংদা ঙসি হরিয়ানাগী পানীপত্তা লৈবা সেকেন্দ জেনরেসন (২জি) ইথানোল প্লান্ত জাতিদা খুৎশিন্নখ্রে। থৌরম অসিদা হরিয়ানাগী রাজ্যপাল, শ্রী বন্দারু দাত্তত্রেয়া, কেন্দ্রগী মন্ত্রী, শ্রী নরেন্দ্র সিংহ তোমর, শ্রী হরদীপ সিংহ পুরি, শ্রী রামেশ্বর তেলিসু শরুক য়াখি।
প্রধান মন্ত্রীনা মালেমগী বাইওফ্যুল নুমিৎ লাকপদা মীয়ামদা য়াইফ-পাউজেল পীখি। ইথানোল প্লান্ত অসি শুপ্নগী অহৌবা অমনি হায়না ফোঙদোক্লদুনা মহাক্না হায়খি প্লান্ত অসিনা দিল্লী, হরিয়ানা অমসুং এন.সি.আর.দা পোলুসন থোকপা হন্থহল্লগনি। মহাক্না সি,দবল্যু.জি. ২০২২দা হরিয়ানাগী মমোম অমসুং মপারীশিংনা শীংথানীংঙাই ওইরবা পর্ফোরমেন্স উৎখিবগীদমক হরিয়ানাবু থাগৎপা ফোঙদোকখি।
প্রধান মন্ত্রীনা হায়খি মহৌশাবু থৌনিজরিবা ঐখোয়গুম্বা লৈবাক অমদা বাইওফ্যুল অসি মহৌশাবু ঙাকশেনবগী পাংখক ওই। ঐখোয়গী লৌমী ইচিল-ইনাওশিংনা মসিগী মরমদা হেন্না নীংথিনা খঙই। ঐখোয়গীদমক্তা বাইওফ্যুল হায়বা অসি গ্রীন-ফ্যুল, অকোইববু কল্লিবা ফ্যুল হায়বনি। মহাক্না হায়খি মদুদি মোদর্ন প্লান্ত অসি লিংখৎখিবগা লোয়ননা চেং অমসুং গেহু মরাং কাইনা থারিবা হরিয়ানাগী লৌমীশিংনা মখোয়গী ক্রোপ রেসিদ্যু শীজিন্ননবা অতোপ্পা শেল-য়াম্না থোকপা পাম্বৈ অমা ফংলগনি।
পানীপত্তা লৈরিবা বাইওফ্যুল প্লান্ত অসিনা চরুখোকশিংবু মৈ থাদোক্তনা মাঙহনবা ঙম্লগনি। প্রধান মন্ত্রীনা হায়খি মদুদি মসিনা কান্নবা কয়া ফংহনবা ঙম্লগনি। অহানবা কান্নবা অসি চরুখোকশিং মৈ থাবনা পীরিবা অৱা-চৈথেংদগী মালেম ইমাবু মনীং তমহল্লগনি। অনিশুবা কান্নবা অসিনা চরুখোক ককপগী অমসুং মসিবু মাংহনবগী অনৌবা সিস্তেমশিং, পুথোক-পুশিন তৌবগী অনৌবা ফেসিলিতীশিং অমসুং অনৌবা বাইওফ্যুল প্লান্তশিং অসিনা খুঙ্গংশিং অসিদা অনৌবা থবক্কী খুদোংচাবশিং পীরগনি। অহুমশুবা কান্নবা অসিনা লৌমীশিংদা পোৎলুম অমা ওইরম্বা, অৱাবা পোৎশক অমা ওইরম্বা চরুখোকশিং অসি মখোয়দা অহেনবা শেন্থোক লৈনবা পাম্বৈ অমা ওইরগনি। মরিশুবা কান্নবনা পোলুসন হন্থহল্লগনি অমসুং অকোইববু ঙাক-শেনবদা লৌমীশিংনা লৌরিবা থৌদাং অসি হেনগৎলগনি। অমসুং মঙাশুবা কান্নবনা লৈবাক অসিনা অতোপ্পা ফ্যুল অমা ফংলগনি। প্রধান মন্ত্রীনা লৈবাক অসিগী তোঙান-তোঙানবা মফমশিংদা অসিগুম্বা প্লান্তশিং শেমগৎলক্লি হায়না নুংঙাইবা ফোঙদোকখি।
প্রধান মন্ত্রীনা হায়খি মদুদি রাজনিতীগী ওইবা খুদোংচাবা লৌনবগীদমক অশম্বা লম্বেল থিদুনা সমস্যাশিংবু নাথৈদুনা থম্নবা হোৎনরিবা মীওইশিংনদি করিগুম্বা সমস্যা অমত্তা মতম চুপ্পগী ওইনা কোকহনবা ঙম্লোই। অশম্বা লম্বেলশিং অদু মতম খরগী ওইনা শীংথারম্বা য়াই, অমসুং রাজনিতীগী ওইবা খুদোংচাবা খরা ফংখিবদি য়াই, অদুবু সমস্যা অদুদি কৈদৌনুংদা কোকপা নাইরোই। অশম্বা লম্বেল থিবনা শোর্ত সর্কিৎ শোইদনা থোক্কনি। অশম্বা লম্বেল চৎপগী মহুত্তা, ঐখোয়গী লৈঙাক অসিনা সমস্যাশিংবু মতম চুপ্পগী ওইনা কোকহন্নবা কন্না হোৎনরি। চহি কয়াগী মমাংদগী চরুখোকশিংগী মতাংদা পন্নদুনা লাক্লি। অদুবু অশম্বা লম্বেল থীবগী ৱাখল্লোন অসিনদি কোকহনবা ঙমলমদ্রে, হায়না মহাক্না ফোঙদোকখি।
প্রধান মন্ত্রীনা পুম্নমক শুনবা কোনশিনবা মওং অমদা সমস্যা অসি কোকহন্নবা পান্দম থম্মিবা খোঙথাংশিংগী মতাংদা পনখি। ‘পরালী’গীদমক শেলগী তেংবাং পীনবা ফার্মর্স প্রদ্যুসর ওর্গনাইজেসন (এফ.পি.ও.)দা ক্রোপ রেসিদ্যুগী মোদর্ন মেছিনরীদা চাদা ৮০গী সবসিদী পীখি অমসুং হৌজিক মসিগী মোদর্ন প্লান্ত অসিনা সমস্যা অসিগী মতম চুপ্পগী ওইবা ৱারোইশিন অমা পীবদা মতেং পাংলগনি, হায়না মহাক্না ফোঙদোকখি। “চুরুখোক মৈ থাদবা য়াদবনা মরম ওইদুনা চৈবীরম্বা লৌমীশিং অদুনা হৌজিক্তি বাইও-ফ্যুল পুথোকপা অমসুং জাতি শেমগৎপদা শরুক তম্বা অসিদা চাউথোকচবা পোক্লগনি”। প্রধান মন্ত্রীনা হায়খি গোবরধান য়োজনা অসি লৌমীশিংগীদমক শেন্থোক লৈনবা অতোপ্পা পাম্বৈ অমনি হায়নসু ফোঙদোকখি।
লৈবাক অসিগী সমস্যাশিংগী মতম চুপ্পগী অমসুং তুং কোইনা চৎকদবা ৱারোইশিন পীবগী মতাংদা মখা তারদুনা প্রধান মন্ত্রীনা অনৌবা ফর্তিলাইজর প্লান্তশিং, নেনো ফর্তিলাইজরশিং, অচাথাওগী অনৌবা মিসনশিংগী মতাংদসু ৱা ঙাংখি।
প্রধান মন্ত্রীনা হায়খি পেত্রোলদা ইথানোল য়ানশিন্দুনা হৌখিবা চহি ৭-৮ অসিদা মপান্দা লুপা করোর লিশিং ৫০ হেন্না চৎখিগদবদগী কনবা ঙমহৌরে। অমসুং ইথানোল য়ানশিনবসিনা মরম ওইদুনা ঐখোয়গী লৈবাক অসিগী লৌমীশিংদা ওইনা হায়রিবা শেনফম অসিগা মান্নবা চাংদা ফংহনখি। মহাক্না হায়খি, চহি ৮ ফাওবগী মমাংদা লৈবাক অসিদা ইথানোল লিতর করোর ৪০ খক্তা পুথোক্লমখি; হৌজিক্না লিতর করোর ৪০০ পুথোকপা ঙম্লে।
প্রধান মন্ত্রীনা হায়খি ২০১৪ ফাওবদা লৈবাক অসিদা এল.পি.জি. গ্যাস কন্নেক্সন করোর ১৪রোমতমক লৈরম্মি। লৈবাক অসিগী মীশিং তংখাই, ইমাশিং অমসুং ইচল ইচেশিংনা চাকখুমগী মৈখু মরক্তা লৈরমখি। হকচাংগী ফিভম ফৎলক্তবা অমসুং খুদোংচাদবা কয়ানা শোকহল্লবা ইচল ইচাশিংবু মমাংদা নীংথিনা য়েংশিনবীরমদে। প্রধান মন্ত্রীনা উজ্জ্বলা স্কিম খক্তগী মখাদা লাইরবা নুপীশিংদা গ্যাস কন্নেক্সন করোর ৯ হেন্না পীবা ঙমখিবসিগীদমক নুংঙাইবা ফোঙদোকখি। মহাক্না হায়খি, “হৌজিক্তি লৈবাক অসিদা এল.পি.জি. পুশিনবগী চাং অসি ১০০% য়ৌরক্লে। ঙসিদি লৈবাক অসিদা গ্যাস কন্নেক্সন করোর ১৪দগী হেনগৎতুনা করোর ৩১ রোম লৈরে”।
প্রধান মন্ত্রীনা হায়খি মদুদি চহি নিপানগী মমাংদা শুপ্নগী ৮০০ খক্তা লৈরমখিবা সি.এন.জি. স্তেসনশিং অসি লিশিং ৪.৫দা হেনগৎলকখি। য়ুমথোং করোর অমা হেনবদা গ্যাস অসি পাইপশিংগী খুত্থাংদা য়ৌশিনহনখি। “ঙসি ঐখোয়না নীংতম্বগী চহি ৭৫ মপুং ফারকপা অসিদা লৈবাক অসিনা মথংগী চহি খরা অসিদা লৈবাক্কী য়ুমথোং চাদা ৭৫ হেবদা পাইপ গ্যাস ফংহন্নবা পান্দমদা থবক পাইখৎলি”, হায়না মহাক্না ফোঙদোকখি।
প্রধান মন্ত্রীনা হায়খি মদুদি রাজনিতীদা মশাগী ওইজবা থিনরক্লগদি, পেত্রোল অমসুং দিজল ফাওবা লেম্না পীগনি হায়না লাউথোকপা ঙম্নগনি। অসিগুম্বা খোঙথাংশিং অসিনা ঐখোয়গী হৌরক্লিবশিংদগী হক মৎপীগনি অমসুং লৈবাক অসিনা মরোমদোম লেপচনবা হোৎনরিবসিসু মায় পাক্লোই। অসিগুম্বা ওইজবতা থিবা থৌশিলশিং অসিনা লৈবাক অসিগী থম্মোই শেংনা তেক্স পীজরিবা মীওইশিংদা অৱাবা পোৎলুম হেনগৎহনগনি হায়না পি.এম.না ফোঙদোকখি। লৈবাক অসিনা মায়োক্নরিবা শীংনবশিং অসি ময়োক্নবা ঙম্নবা মসিদা থমোই শেংনা হোৎনবা অমসুং কত্থোকপা চংই। মসিদা য়াম্না কন্না হোৎনবা, থৌশিল অমসুং অচৌবা ইনভেস্তমেন্ত মথৌ তাই হায়না মহাক্না মখা তাখি।
প্রধান মন্ত্রীনা হায়খি করিগুম্বা সরকারদা শেল লৈতবা তারবদি ইথানোল, বাইওগ্যাস অসিগুম্বা প্লান্তশিং অমসুং সোলর প্লান্তশিং অসি লেপখিগনি। “ঐখোয়না নীংশিংগদবনি ঐখোয় লৈত্রবসু জাতি অসিদা মতম চুপ্পদা লৈহৌখিগনি, মসিদা হিংলিবা অঙাংশিং অসিদা মতম চুপ্পদা লৈহৌখিগনি। নীংতম্বগীদমক মখোয়গী থৱায় থাখ্রবশিংনা মসিগী মুৎনাইদ্রবা ৱাখল্লোন অসিগা লোয়ননা থবক তৌখি…. জাতি অমা ওইনা ঐখোয়না অসিগুম্বা মওং অমদা লাক্তনাবা হোৎনগনি হায়না ঐখোয়না ৱাশক অমা লৌরসি। মসি লৈবাক অসিগী অপুনবা থৌদাংনি”, হায়না মহাক্না অকনবা ৱাফম থমখি।
প্রধান মন্ত্রীনা হায়খি মদুদি অমৃত মহোৎসব অসিদা লৈবাক অসিবু মচু অহুমগী মচুনা শংলিবা মতম অসিদা মহাক্না লৈবাক অসিগী মীয়ামগী পুক্নিং চিংশিনজনিংবা করিগুম্বা অমা লৈরে। অসিগুম্বা শেংলবা থৌরম অসিবু লৈখা তাহন্নবা থৌরাং অমসুং ঐখোয়গী থৌনা ফরবা লৈবাক অসিগী নীংতম লান্মীশিংবু ইকাই ফীরুক খুম্নবা থৌরাং অমা শিনলক্লে। লৈবাক অসিদা লৈরিবা অসিগুম্বা মীওইশিংগী ৱাখল্লোন অসিসু খঙদোকপা য়াম্না তঙাইফদে। মহাক্না হায়খি ঐখোয়গী লৈবাক অসিদা মীওই খরা অমসু ফত্তবা ৱাখলদা লুপতুনা অমসুং অৱাবা ঈপাক্তা ইরাক্নদুনা লৈরি। লৈঙাক অসিগী মাইয়োক্তা ওইদবা কয়া ঙাংদুনসু মীচম মীয়াম্নদি অসিগুম্বা মীওইশিং অসিবু অমুক হন্না থাজবা ঙম্লরোই। উপাই লৈত্রবা মতমসিদদি মখোয়না কালা জাদুদা মায় ওনশিল্লকপা উরি। প্রধান মন্ত্রীনা কালা জাদুগী ৱাখল্লোন শন্দোক্নবা হোৎনবা খোঙথাংগী ওগস্ত ৫দা থোকখিবা থৌদোকশিং অদু হাইলাইৎ তৌখি। প্রধান মন্ত্রীনা অসিগুম্বা মীওইশিং অসিনা মখোয়গী অৱাবা মতম অসি অমুবা ফি শেৎলগা কোক্কনি হায়না খল্লি, মখোয়না কালা জাদু অমসুং অমম্বদা থাজবা থমজরবসু মীয়াম্না মখোয়দা অমুক হন্নদি থাজবা থম্লরোই হায়বা খঙদে হায়না ফোঙদোক্লদুনা ৱারোল পীবা লোইশিনখি।
বেকগ্রাউন্দ
প্লান্ত শঙ্গাবা অসি লৈবাক অসিদা বাইওফ্যুল পুথোকপা অমসুং শীজিন্নবা থৌগৎনবা চহি কয়া অসিদা সরকারনা মথং-মথং পাইখৎখিবা থৌরাং কয়াগী শরুক অমনি। মসি প্রধান মন্ত্রীনা ইনর্জী সেক্তরবু হেন্না হোংহন্নবা, লায়না ফংহন্নবা, ইফিসিএন্ত ওইহন্নবা অমসুং তুং কোইনা চৎনবা অহোংবা পুরক্নবা লেপ্তনা হোৎনরিবা অসিগী লমজিং মখাদা পাইখৎখিবনি।
২জি ইথানোল প্লান্ত অসি ইন্দিয়ন ওইল কোর্পোরেসন লিমিতেদ (আই.ও.সো.এল.)না লুপা করোর ৯০০ রোম চংনা শাখিবনি অমসুং মসি পানীপত রিফাইনরী মনাক্তা লৈ। স্তেৎ-ওফ-দি-আর্ত ইন্দিজিনস তেক্নোলোজীদা য়ুম্ফম ওইবা প্রোজেক্ত অসিনা চহি অমদা ইথানোল লিতর করোর ৩ পুথোক্নবা চহিগী ওইনা চরু (পরালী) তন লাখ ২রোম শীজিন্নদুনা ভারতকী ৱেস্ত-তু-ৱেল্থকী খোঙথাং অসিদা অনৌবা পন্দুপ অমা হাংলগনি।
এগ্রি-ক্রোপ রেসিদ্যুগী এন্দ-য়ুজ য়াহন্দুনা লৌমীশিংগী মপাঙ্গল হাপ্লগনি অমসুং মখোয়দা অহেনবা শেন্থোক লৈনবগীদমক খুদোংচাবা অমা পীরগনি। প্রোজেক্ত অসিনা প্লান্ত চল্লাইবদা য়াওরিবা মীওইশিংদা হকথেংননা থবক পীগনি অমসুং চরু ককপা, হোনবা, থম্বা অসিনচিংবগী সপ্লাই চেন্দা নাকোইননা থবক পীরগনি।
প্রোজেক্ত অসিগী লিক্বিদ দিসচার্জ জিরো ওইগনি। চরু (পরালী) মৈ থাবা হন্থন্দুনা প্রোজেক্ত অসিনা চহি অমদা কার্বোন দাইওক্সাইদ ইমিসন তন লাখ ৩ রোম তৌবগা মান্নবা গ্রীনহাউস গ্যাস হন্থহনবদা শরুক তম্লগনি, মসিনা চহি অমদা লৈবাক অসিগী লম্বীদা চেল্লিবা কার ৬৩,০০০গী ময়াদা হন্থহনখিবগা মান্নরগনি।
*****
(Release ID: 1850691)
Visitor Counter : 146
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam