প্রধানমন্ত্রীগী লোইশঙ
প্রধান মন্ত্রীনা বিহার বিধান সভাগী চহি চামা শুবগী পাঙথোকপা পালন থৌরম লোইশিনবদা ৱা ঙাংখ্রে
“বিধান সভা বিল্দিং অসিদা অচৌবা অমসুং মরু ওইবা ৱারেপশিং লৌখি”
“বিধান সভা অসিনা দেমোক্রেসীদগী হৌদুনা খুন্নাইগী পুন্সিরোল ফাওবদা চপ মান্ননা শরুক য়াবা অমসুং চপ মান্নবা হকশিং ফংহনবা হায়বা অসি করম্না ঙাক্না চৎপগে হায়বগী খুদম অমা ওইরি”
“লৈবাক অসিগী অমসুং ঐখোয়গী নাৎকী চহি লিরিবা অসিগুম্না ভারত্তা দেমোক্রেসীগী ৱাখল্লোনগী চহিসু লিরি।”
“বিহারনা দেমোক্রেসী অমসুং দেমোক্রেতিক ভেল্যুশিং ঙাকশেন্নবগীদমক খোঙফম চেৎনা মতম চুপ্পদা লেপখি”
“বিহারনা চাউখৎপা হেল্লিবা মখৈ ভারতকী দেমোক্রেসীনা হেন্না শক্তি লৈরক্কনি। বিহারনা মপাঙ্গল কনবা হেল্লিবা মখৈ ভারতনা তৌবা ঙম্বা হেন্না হেনগৎলক্কনি”
“পার্তী-পোলিতিক্সকী খেন্নবা থম্লিবা অসিদগী থোরক্তুনা ঐখোয়গী খোঞ্জেল অসি লৈবাক্কীদমক অমসুং লৈবাক্কী য়াইফনবগীদমক অমত্তা ওইনা পুনশিনগদবনি”
“ঐখোয়গী থবক্না ঐখোয়গী লৈবাক্কী দেমোক্রেতিক মেচুরিতী অদু উৎলি”
“দেমোক্রেতিক দিসকোর্সসু মাংদা পুখৎলদুনা লৈবাক অসিনা অনৌবা ফিরেপশিংদা থবক পাইখৎলি”
“মথংগী চহি ২৫ অসি লৈবাক্কী থৌদাং ঙাক্নবা লম্বেলদা চংশিল্লিবা চহিশিং ওইরি”
“ঐখোয়গী থৌদাংশিং অদু ঐখোয়না হেন্না পাঙথোক্লিবা মখৈ
Posted On:
12 JUL 2022 7:57PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি পতনাদা বিহার বিধান সভাগী চহি চামা শুবগী কুমওন পালনগী লোইশিনবগী থৌরমদা ৱা ঙাংখি। প্রধান মন্ত্রীনা বিহার বিধান সভাগী চহি ১০০ শুবগী পালন তৌনবা শাখিবা শতাবদী সমৃতি স্তম্ভ শঙ্গাখি। মহাক্না বিধান সভা ম্যজিয়মগী উরেপ-উয়ুংসু তমখি। ম্যুজিয়ম অসিগী তোঙান-তোঙানবা গেলেরীশিংনা বিহারগী দেমোক্রেসী পুৱারী অমসুং হৌজিক লৈরিবা সিভিক স্ত্রকচরদা হোংলক্লিবা অসি উৎকনি। মসিদা মীওই ২৫০ হেনবগী কেপাসিতী ওইবা কনফরেন্স হোল অমসু লৈগনি। প্রধান মন্ত্রীনা থৌরম অসিদা বিধান সভা গেস্ত হাউসকী উরেপ-উয়ুংসু তমখি। থৌরম অসিদা বিহারগী রাজ্যপাল, শ্রী ফাগু চৌহান অমসুং মুখ্য মন্ত্রী শ্রী নিতিশ কুমারসু শরুক য়াখি।
মীতিন অদুদা ৱা ঙাংলদুনা প্রধান মন্ত্রীনা হায়খি মদুদি বিহারবু নুংশিবা মীওই অদুদা বিহারনা নুংশিবা শরুক কয়া হেনগৎনা অমুক হন্না উৎপা হায়বা অসি বিহারগী মচৎনি। মহাক্না হায়, “ঙসি ঐহাক্না লৈবাক অসিগী অহানবা প্রধান মন্ত্রী ওইনা বিহার বিধান সভা কমপ্লেক্সতা লাকপগী খুদোংচাবা ফংজখি। ঐহাক্না মীনুংশিং অসিগীদমক ঐহাক্না বিহার মীয়ামবু ইকো নোন্না খুরুমজরি”। প্রধান মন্ত্রীনা হায়খি মদুদি শতাবদী সমৃতি স্তম্ভনা বিহারগী এস্পিরেসন কয়ামরুমদা ইথিল পীরগনি।
বিহার বিধান সভাগী মতিক-ময়াই লৈরবা পুৱারীবু নীংশিংলদুনা প্রধান মন্ত্রীনা হায়খি বিধান সভাগী বিল্দিং অসিদা অমগী মথংদা অমা অচৌবা অমসুং মরু ওইবা ৱারেপ কয়া লৌখি। নীংতম্বা ফংদ্রিঙৈ মমাংদা রাজ্যপাল সত্যেন্দ্র প্রসন্ন সিনহানা বিধান সভা অসিদগী য়েলহৌমীগী উধ্যোগশিং পুক্নীং থৌগৎনবা ওইবা স্বাদেশি চরখা শীজিন্ননবা অপীল তৌখি। নীংতম্বা ফংলবা মতুং বিধান সভা অসিদা জমীন্দারী এবোলিসন এক্ত পাস তৌখি। মসিগী চৎনবী অসি তুং ইন্দুনা নিতিশজীগী সরকারনা পঞ্চায়তশিংদা নু্পীশিংগীদমক চাদা ৫০ খাক্তুনা থমখিবা বিহারনা অহানবা রাজ্য ওইহল্লিবা বিহার পঞ্চায়তি রাজকুম্বা এক্ত পাস তৌখি হায়না মহাক্না নীংশিংখি। প্রধান মন্ত্রীনা হায়, “বিধান সভা অসিনা দেমোক্রেসীদগী হৌদুনা খুন্নাইগী পুন্সিরোল ফাওবদা চপ মান্ননা শরুক য়াবা অমসুং চপ মান্নবা হকশিং ফংহনবা হায়বা অসি করম্না ঙাক্না চৎপগে হায়বগী খুদম অমা ওইরি”।
প্রধান মন্ত্রীনা ভারতকী দেমোক্রেসীগী অরিবা হৌরকফম অদুগী মতাংদা পল্লদুনা হায়খি, “দিকেদ কয়া ঐখোয়দা লোইলম লৈঙাক অমসুং লোইলমগী ৱাখল্লোন অসিনা মরম ওইরগা ভারতনা দেমোক্রেসী ফংখি হায়না তাক্নবা হোৎদুনা লাকখি। অদুবু মীওই অমনা ৱাফম অসি ফোঙদোকপা মরমদা মহাক্না বিহারগী পুৱারী অমসুং বিহারগী হেরিতেজ অসি খুমজিন্নবা হোৎনরি। মালেমগী য়াম্লবা শরুকশিংনা সভ্যতা অমসুং নাৎকী মাইকৈদা মখোয়গী অহানবা খোঙথাংশিং থাংবা হৌবা মতমদা, বৈশালীদা অখন্নবা দেমোক্রেসী অমা চল্লাইখি। মালেমগী অতোপ্পা লমদমশিংদা দেমোক্রেতিক রাইতশিংগী মতাংদা খঙবা হৌরকপা মতমদা লিচ্ছবি অমসুং বজ্জিসংঘগুম্বা রিপব্লিকশিংদি মখোয়গী পন্দোম লোম্বা ঙমখ্রে। “লৈবাক অসিগী অমসুং ঐখোয়গী নাৎকী চহি লিরিবা অসিগুম্না ভারত্তা দেমোক্রেসীগী ৱাখল্লোনগী চহিসু লিরি। ভারতনা দেমোক্রেসী অসি মান্নবা ৱাখল্লোন পুরক্নবা পাম্বৈ অমা ওইনা লৌখি। ভারতনা পুন্না অমসুং চান্না চিন্ননা হিংমিন্নবগী ৱাখল্লোন্দা থাজবা থম্মি। ঐখোয়না অচুম্বদা থাজবা থম্মি, ঐখোয়না তেংবাং পীনবদা থাজবা থম্মি, ঐখোয়না চান্না-চিন্ননা হিংবদা থাজবা থম্মি অমসুং ঐখোয়না খুন্নাইগী অপুনবা শক্তিদা থাজবা থম্মি”, হায়না প্রধান মন্ত্রীনা ফোঙদোকখি।
প্রধান মন্ত্রীনা নৌহৌনা ফোঙদোকখি মদুদি মালেমদা দেমোক্রেসীগী মমা অসি ভারতনা ওই। ভারতনা দেমোক্রেসীগী মমানি। অমসুং বিহারগী মতিক-ময়াই লৈরবা হেরিতেজ অমসুং পালিদা লৈরিবা পুৱারীগী চে-চাংশিং অসিনা মসিগী হিংদুনা লৈরিবা খুদম ওইরি। মহাক্না হায়খি মদুদি বিহারগী মতিক-ময়াই অসি কনাগুম্বা অমত্তনা মুত্থৎপা অমসুং লোৎশিনবা ঙমলোই। মহাক্না মখা তারদুনা হায়খি, “বিল্দিং অসিনা হৌখিবা চহি চামা অসিদা ভারতকী দেমোক্রেসীগী মপাঙ্গল কনখৎহনখি, মরম অসিনা মসিবু ঐখোয়না ইকাই খুম্নফম থোকই। বিল্দিং অসি মীনাই নাইথাং ওইরিঙৈ মনুংদা ফাওবা দেমোক্রেতিক ভেল্যুশিং শোকহনখিদবা ৱাখল্লোন অদুগা মরী লৈনৈ”।
প্রধান মন্ত্রীনা ব্রিতিশকী মায়োক্তা শ্রী বাবুবু লৈঙাক অসিদা নীংতম্বা পীনবা তকশিনখিবা অদু নীংশিংখি। বিহারনা দেমোক্রেসী অমসুং দেমোক্রেতিক ভেল্যুশিং ঙাকশেন্নবগীদমক খোঙফম চেৎনা মতম চুপ্পদা লেপখি। শ্রী মোদীনা হায়খি বিহারনা নীংতম্বা ফংলবা ভারত্তা দা. রাজেন্দ্র প্রসাদবু ভারতকী অহানবা রাস্ত্রপতি ওইনা পীখি। লোকনায়ক জয়াপ্রকাশ, কার্পূরি থাকুর অমসুং বাবু জগজীবন রাম অসিগুম্বা লুচিংবশিং অসি লমদম অসিদগী হৌরকখি। লৈবাক অসিগী সম্বিধানবু নমথনবা হোৎনরকখিবা মতমদা বিহারনা মাং থানা থোরক্তুনা মসিগী ময়োক্তা খোঙজং চংশিনবা হৌখি। প্রধান মন্ত্রীনা হায়খি, “বিহারনা চাউখৎপা হেল্লিবা মখৈ ভারতকী দেমোক্রেসীনা হেন্না শক্তি লৈরক্কনি। বিহারনা মপাঙ্গল কনবা হেল্লিবা মখৈ ভারতনা তৌবা ঙম্বা হেন্না হেনগৎলক্কনি”।
প্রধান মন্ত্রীনা মখা তারদুনা হায়খি, “আজাদী কা অমৃত মহোৎসব অমসুং পুৱারী ওইরভা বিহার বিধান সভাগী চহি ১০০ শুবগী কুমওন অসিনা ঐখোয় পুম্নমক্কীদমক, মীয়ামগী মীহুৎ খুদিংমক্কীদমক্তা মুন্না খন্থনবা অমসুং সেল্ফ-এনলাইসিসকী পাউজেল অমা পুরদুনা লাক্লি। ঐখোয়না ঐখোয়গী দেমোক্রেসী হেন্না মপাঙ্গল কনখৎহল্লবি, ঐখোয়গী নীংতম্বা অমসুং ঐখোয়গী হকশিংগীদমক ঐখোয়না পাঙ্গল হেন্না ফংগনি”।
২১শুবা চহিচাগী হোংলক্লিবা অহোংবশিং অমসুং নীংতম্বগী চহি ৭৫ শুরকপা অসিদা লৌরিবা অনৌবা ফিরেপশিং অসিগী মতাংদা প্রধান মন্ত্রীনা হায়খি, “লৈবাক অসিগী এম.পি.শিং ওইনা, রাজ্য অসিগী এম.এল.এ.শিং ওইনা ঐখোয়না দেমোক্রেসীনা মায়োক্নরিবা শীংনবা খুদিংমক পুন্না মাইথিবা পীবা হায়বা অসি ঐখোয়গী থৌদাং ওইহনগদবনি। পার্তী-পোলিতিক্সকী খেন্নবা থম্লিবা অসিদগী থোরক্তুনা ঐখোয়গী খোঞ্জেল অসি লৈবাক্কীদমক অমসুং লৈবাক্কী য়াইফনবগীদমক অমত্তা ওইনা পুনশিনগদবনি”।
“ঐখোয়গী থবক্না ঐখোয়গী লৈবাক্কী দেমোক্রেতিক মেচুরিতী অদু উৎলি” হায়না ফোঙদোক্লদুনা প্রধান মন্ত্রীনা হায়খি, “বিধান সভাগী হাউসশিং অসি মীয়ামগা মরী লৈনবা হীরমশিংদা পোজিতিব দাইলোগ তৌনবা সেন্তর ওইহল্লসি”। পার্লিয়ামেন্তগী পর্ফোরমেন্সকী মতাংদা মহাক্না হায়, “হৌখিবা চহি খরা অসিদা পার্লিয়ামেন্তদা এম.পি.শিংগী এতেন্দেন্সতা অমসুং পার্লিয়ামেন্তগী প্রদক্তিবিতীদা চাউনা হেনগৎলকখি। মমাংগী বজেৎ সেসন্দসু লোক সভাগী প্রদক্তিবিতী অসি চাদা ১২৯ ওইখি। রাজ্য সভাদা রেকোর্দ তৌখিবা প্রদক্তিবিতী অসি চাদা ৯৯ ওইখি। মরম অসিনা লৈবাক অসিনা অনৌবা ফিরেপশিংদা থবক পাইখৎলি, দেমোক্রেতিক দিসকোর্সসু মাংদা পুখৎলি”।
২১শুবা চহিচা অসিবু ভারতকী চহিচানি হায়না ফোঙদোক্লদুনা প্রধান মন্ত্রীনা হায়খি “ভারতকী ওইনদি চহিচা অসি থৌদাংশিং পাঙথোক্নবা চহিচা ওইরি। ঐখোয়না চহিচা অসিদা অনৌবা ভারতকী, মথংগী চহি ২৫গী অচৌবা পান্দমশিং য়ৌনবা চংশিনবা তাই। ঐখোয়গী থৌদাংশিংনা ঐখোয়বু পান্দমশিং অসি তম্না পুগনি। মরম অসিনদা চহি ২৫ অসি লৈবাক্কী থৌদাং ঙাক্নবা লম্বেলদা চংশিল্লিবা চহিশিং ওইরগনি”। শ্রী মোদীনা হায়খি “ঐখোয়গী থৌদাংশিং অসি ঐখোয়গী হকশিংদগী তোখাই হায়না লৌরোইদবনি। ঐখোয়গী থৌদাংশিং অদু ঐখোয়না হেন্না পাঙথোক্লিবা মখৈ ঐখোয়গী হকশিং অসি হেন্না মপাঙ্গল কনখৎলক্কনি। থৌদাং পাঙথোকপদা পুকচেল শেংবা অসিনা ঐখোয়গী হকশিংগী গরেন্তী ওইরি”।
***
(Release ID: 1841061)
Visitor Counter : 96
Read this release in:
Bengali
,
English
,
Urdu
,
Hindi
,
Marathi
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam