ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ ବାର୍ତ୍ତା ମାଧ୍ୟମରେ ସ୍ୱାମୀ ଆତ୍ମସ୍ଥାନନ୍ଦଙ୍କ ଜନ୍ମ ଶତବାର୍ଷିକୀ ସମାରୋହରେ ବକ୍ତବ୍ୟ ପ୍ରଦାନ କରିଛନ୍ତି । 

ସ୍ୱାମୀଜୀଙ୍କ ସହ ବିତାଇଥିବା ମୁହୂର୍ତ୍ତଗୁଡିକୁ ମନେ ପକାଇ ପ୍ରଧାନମନ୍ତ୍ରୀ ସ୍ୱାମୀ ଆତ୍ମସ୍ଥାନନ୍ଦଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଏହି କାର୍ଯ୍ୟକ୍ରମ ସହିତ ବହୁ ଭାବନା ଓ ସ୍ମୃତି ଜଡିତ ବୋଲି ସେ କହିଥିଲେ । ସଦାବେଳେ ତାଙ୍କ ଆଶୀର୍ବାଦ ମିଳିଥିଲା ଓ ତାଙ୍କ ସହ ସମୟ ଅତିବାହିତ କରିବାର ସୁଯୋଗ ମିଳିଥିଲା । ଏହା ମୋର ସୌଭାଗ୍ୟ ଯେ, ଶେଷ ମୁହୂର୍ତ୍ତ ପର୍ଯ୍ୟନ୍ତ ତାଙ୍କ ସଂସ୍ପର୍ଶରେ ରହି ପାରିଥିଲି ।

ସ୍ୱାମୀଜୀଙ୍କ ମିଶନ ଲୋକଙ୍କ ନିକଟରେ ପହଞ୍ଚାଇବାକୁ ଚିତ୍ର ଜୀବନୀ ଓ ବୃତ୍ତଚିତ୍ର ଉନ୍ମୋଚନ ହୋଇଥିବାରୁ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଛନ୍ତି । ଏଥିପାଇଁ ଶ୍ରୀ ମୋଦୀ ରାମକୃଷ୍ଣ ମିଶନର ସଭାପତି ପୂଜ୍ୟ ସ୍ୱାମୀ ସ୍ମରାନନ୍ଦ ଜୀ ମହାରାଜଙ୍କୁ ଅଭିନନ୍ଦନ ଜଣାଇଛନ୍ତି ।

ସ୍ୱାମୀ ଆତ୍ମସ୍ଥାନନ୍ଦ ଜୀ, ଶ୍ରୀ ରାମକୃଷ୍ଣ ପରମହଂସଙ୍କ ଶିଷ୍ୟ ପୂଜ୍ୟ ସ୍ୱାମୀ ବିଜ୍ଞାନନ୍ଦ ଜୀଙ୍କ ଠାରୁ ଦୀକ୍ଷା ଗ୍ରହଣ କରିଥିଲେ । ସ୍ୱାମୀ ରାମକୃଷ୍ଣ ପରମହଂସଙ୍କ ପ୍ରବୁଦ୍ଧ ଓ ଆଧ୍ୟାତ୍ମିକ ଶକ୍ତି ତାଙ୍କ ଠାରେ ସ୍ପଷ୍ଟ ପ୍ରତୀୟମାନ ହେଉଥିଲା । ଏହି ଅବସରରେ ଶ୍ରୀ ମୋଦୀ ମହାନ ତ୍ୟାଗ ପରମ୍ପରା ସମ୍ପର୍କରେ କହିଥିଲେ । ବାନପ୍ରସ୍ଥ ଆଶ୍ରମ ମଧ୍ୟ ସନ୍ନ୍ୟାସ ଦିଗରେ ଏକ ପଦକ୍ଷେପ । ସନ୍ନ୍ୟାସର ଅର୍ଥ ସ୍ୱାର୍ଥ ତ୍ୟାଗ କରି ସମାଜର ସେବା କରିବା ଓ ସମାଜ ପାଇଁ ବଞ୍ଚିବା ଏବଂ ସମାଜ ପ୍ରତି ବ୍ୟାପ୍ତ ହେବା ବୋଲି ସେ କହିଥିଲେ । ଜଣେ ସନ୍ନ୍ୟାସୀଙ୍କ ପାଇଁ ଜୀବନ୍ତ ବ୍ୟକ୍ତିଙ୍କ ସେବା ମାଧବ ସେବା, ଜୀବନ୍ତ ଭିତରେ ଶିବ ଦର୍ଶନ ସର୍ବୋପରି । ସ୍ୱାମୀ ବିବେକାନନ୍ଦ ଜୀ ମହାନ ସନ୍ୟାସ୍ଥ ପରମ୍ପରାକୁ ଆଧୁନିକ ରୂପ ପ୍ରଦାନ କରିଥିଲେ । ସ୍ୱାମୀ ଆତ୍ମସ୍ଥାନନ୍ଦ ଜୀ ଏହି ରୂପକୁ ଗ୍ରହଣ କରି ଜୀବଦ୍ଦଶାରେ ଏହାକୁ ରୂପାୟନ କରିଥିଲେ । ଏହି ଅବସରରେ ବେଲୁର ମଠ ଓ ରାମକୃଷ୍ଣ ମିଶନର ତତ୍ତ୍ୱାବଧାନରେ କେବଳ ଭାରତ ନୁହେଁ ନେପାଳ ଓ ବାଂଲାଦେଶରେ ଚାଲିଥିବା ଉଦ୍ଧାର ଓ ରିଲିଫ କାର୍ଯ୍ୟ ସମ୍ପର୍କରେ ଗୁରୁତ୍ୱାରୋପ କରିଥିଲେ । ଗ୍ରାମାଞ୍ଚଳର ଲୋକଙ୍କ କଲ୍ୟାଣ ପାଇଁ ସ୍ୱାମୀଜୀ ନିରନ୍ତର କାର୍ଯ୍ୟ କରିଥିଲେ । ସ୍ୱାମୀଜୀଙ୍କ ଦ୍ୱାରା ଗଢା ଅନୁଷ୍ଠାନଗୁଡିକ ଗରିବ ଲୋକଙ୍କୁ ନିୟୋଜନ ଓ ଜୀବିକା ନିର୍ବାହରେ ସାହାଯ୍ୟ କରୁଛି ।

ସ୍ୱାମୀଜୀ ଦରିଦ୍ର ସେବା, ଜ୍ଞାନର ପ୍ରସାର ଓ ଏହାସହିତ ଜଡିତ କାମକୁ ପୂଜା ଭାବେ ବିବେଚନା କରୁଥିଲେ । ମିଶନ ମୋଡରେ କାମ କରିବା, ନୂତନ ଅନୁଷ୍ଠାନ ଗଢିବା ଓ ଅନୁଷ୍ଠାନଗୁଡିକୁ ସୁଦୃଢ କରିବା ରାମକୃଷ୍ଣ ମିଶନର ଆଦର୍ଶ । ଏପରି ସନ୍ଥ ଯେଉଁଠି ଥାଆନ୍ତି ତାହା ମାନବ ସେବା କେନ୍ଦ୍ର ପାଲଟେ ବୋଲି ସ୍ୱାମୀଜୀ ନିଜ ସନ୍ନ୍ୟାସ ଜୀବନରେ ପ୍ରତିପାଦିତ କରିଛନ୍ତି । ଶତ ଶତ ବର୍ଷ ପୂର୍ବର ଆଦି ଶଙ୍କରାଚାର୍ଯ୍ୟ ହୁଅନ୍ତୁ କିମ୍ବା ଆଧୁନିକ ଯୁଗର ସ୍ୱାମୀ ବିବେକାନନ୍ଦ ହୁଅନ୍ତୁ ଭାରତର ସନ୍ଥ ପରମ୍ପରା ସଦାବେଳେ ଏକ ଭାରତ, ଶ୍ରେଷ୍ଠ ଭାରତକୁ ପ୍ରଚାରିତ କରିଥାଏ । ସ୍ୱାମୀ ବିବେକାନନ୍ଦଙ୍କ ଅବଦାନ ସମ୍ପର୍କରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ, ସେ ଏହି ସଂକଳ୍ପକୁ ମିଶନ ଭାବେ ଜୀଇଁଥିଲେ । ଦେଶର ସମସ୍ତ ଭାଗରେ ତାଙ୍କ ପ୍ରଭାବ ପରିଲକ୍ଷିତ ହୋଇଥିଲା ଓ ତାଙ୍କ ଭ୍ରମଣ ଦ୍ୱାରା ଦାସତ୍ୱ ସମୟରେ ଦେଶରେ ପ୍ରାଚୀନ ଜାତୀୟ ଚେତନା ଉଦବୁଦ୍ଧ ହୋଇଥିଲା ଏବଂ ନୂଆ ଆତ୍ମବିଶ୍ୱାସ ଭରି ଯାଇଥିଲା । ରାମକୃଷ୍ଣ ମିଶନର ପରମ୍ପରାକୁ ସ୍ୱାମୀ ଆତ୍ମସ୍ଥାନନ୍ଦ ଜୀ ସାରା ଜୀବନ ଆଗେଇ ନେଇଥିଲେ । ସ୍ୱାମୀଜୀଙ୍କ ସହ ବିତାଇଥିବା ସମୟକୁ ସ୍ମରଣ କରି ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ ତାଙ୍କ ସହ ଗୁଜୁରାଟିରେ କଥା ହେବାର ସୌଭାଗ୍ୟ ମିଳିଥିଲା । କଛ ଭୂମିକମ୍ପ ବେଳେ ସ୍ୱାମୀ ଜୀଙ୍କ ଦିଗଦର୍ଶନରେ ହୋଇଥିବା ଉଦ୍ଧାର କାର୍ଯ୍ୟ ସମ୍ପର୍କରେ ପ୍ରଧାନମନ୍ତ୍ରୀ ସ୍ମରଣ କରିଥିଲେ । ରାମକୃଷ୍ଣ ମିଶନର ସନ୍ଥମାନେ ଦେଶରେ ଜାତୀୟ ଏକତାର ସୂତ୍ରଧର ବୋଲି ସମସ୍ତେ ଜାଣନ୍ତି । ବିଦେଶରେ ସେମାନେ ଭାରତୀୟତାକୁ ପ୍ରତିନିଧିତ୍ୱ କରନ୍ତି । 

ମା କାଳୀଙ୍କ ସ୍ପଷ୍ଟ ଦୃଷ୍ଟି ସ୍ୱାମୀ ରାମକୃଷ୍ଣ ପରମହଂସଙ୍କ ନିକଟରେ ଥିଲା ଓ ସେ ନିଜକୁ ମା କାଳୀଙ୍କ ପାଦପଦ୍ମରେ ସମ୍ପୂର୍ଣ୍ଣ ସମର୍ପଣ କରିଥିଲେ । ସମଗ୍ର ବିଶ୍ୱ, ପରିବର୍ତ୍ତନଶୀଳ ଓ ସ୍ଥିର, ସବୁକିଛି ମାଆଙ୍କ ଚେତନାରେ ବ୍ୟାପ୍ତ । ଏହି ଚେତନା ବେଙ୍ଗଲର କାଳୀ ପୂଜା ବେଳେ ଦେଖିବାକୁ ମିଳେ । ଏହି ଚେତନା ଓ ଶକ୍ତିର ଝଲକ ସ୍ୱାମୀ ବିବେକାନନ୍ଦଙ୍କ ଭଳି ଯୁଗପୁରୁଷଙ୍କ ମାଧ୍ୟମରେ ସ୍ୱାମୀ ରାମକୃଷ୍ଣ ପରମହଂସଙ୍କ ଦ୍ୱାରା ଉଦଭାଷିତ ହୋଇଥିଲା । ମା କାଳୀଙ୍କ ସମ୍ପର୍କରେ ସ୍ୱାମୀ ବିବେକାନନ୍ଦଙ୍କ ଆଧ୍ୟାତ୍ମିକ ପରିକଳ୍ପନା ତାଙ୍କ ମଧ୍ୟରେ ଅସାଧାରଣ କ୍ଷମତା ଓ ଶକ୍ତି ଭରି ଦେଇଥିଲା । ସ୍ୱାମୀ ବିବେକାନନ୍ଦଙ୍କ ଭଳି ପ୍ରଭାବଶାଳୀ ବ୍ୟକ୍ତିତ୍ୱ ଜଗନ୍ମାତା କାଳୀଙ୍କ ସ୍ମରଣମାତ୍ରେ ଶିଶୁ ଭଳି ଭକ୍ତିରେ ଉଦବେଳିତ ହେଉଥିଲେ । ସ୍ୱାମୀ ଆତ୍ମସ୍ଥାନନ୍ଦ ଜୀଙ୍କ ମଧ୍ୟରେ ସେହି ନିଷ୍ଠା ଓ ଶକ୍ତି ସାଧନାର ପ୍ରଭାବ ପରିଲକ୍ଷିତ ହେଉଥିଲା । 

ସ୍ୱାମୀ ଆତ୍ମସ୍ଥାନନ୍ଦ ଜୀଙ୍କ ଜୀବନ ପ୍ରତି ଶ୍ରଦ୍ଧାଞ୍ଜଳି ଅର୍ପଣ ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ, ଚିନ୍ତା ବ୍ୟାପ୍ତ ଥିବା ବେଳେ ସନ୍ଥମାନେ ପଥ ପ୍ରଦର୍ଶନ କରିଥାନ୍ତି । ଆମେ କେବେ ବି ନିଜ ଉଦ୍ୟମରେ ଏକାକୀ ନଥାଉ ! ବିନା ସମ୍ବଳରେ ଶିଖର ସ୍ପର୍ଶ କରିଥିବା ଅନେକ ସନ୍ଥଙ୍କ ଜୀବନ ଯାତ୍ରା ଭାରତବର୍ଷ ଦେଖିଛି । ସେହି ବିଶ୍ୱାସ ଓ ସମର୍ପଣ ଆତ୍ମସ୍ଥାନନ୍ଦ ଜୀଙ୍କ ଜୀବନରେ ଦେଖିବାକୁ ମିଳିଥିଲା । ଭାରତର ଜଣେ ବ୍ୟକ୍ତି, ଜଣେ ସନ୍ଥ ଯେତେବେଳେ ଏତେ କିଛି କରିପାରନ୍ତି ସେତେବେଳେ ଏପରି କିଛି ଲକ୍ଷ୍ୟ ନାହିଁ ଯାହା ୧୩୦ କୋଟି ଦେଶବାସୀ ସାମୂହିକ ଭାବେ ହାସଲ କରିପାରିବେ ନାହିଁ ।

ଡିଜିଟାଲ ଇଣ୍ଡିଆର ଉଦାହରଣ ଦେଇ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ ଡିଜିଟାଲ ପେମେଣ୍ଟ କ୍ଷେତ୍ରରେ ଭାରତ ବିଶ୍ୱରେ ଅଗ୍ରଣୀ ଭାବେ ଉଭା ହୋଇଛି । ଦେଶବାସୀଙ୍କୁ ୨୦୦ କୋଟି ଟୀକା ଡୋଜ ପ୍ରଦାନର ଉପଲବ୍ଧି ସମ୍ପର୍କରେ ମଧ୍ୟ ସେ ଆଲୋକପାତ କରିଥିଲେ । ଏସବୁ ଉଦାହରଣ ସୂଚାଇଥାଏ ଯେ, ଭାବନା ଶୁଦ୍ଧ ଥିଲେ ଉଦ୍ୟମ ଅବିଳମ୍ବେ ସଫଳ ହୁଏ ଓ ବାଧାବିଘ୍ନ ପଥ ପ୍ରଦର୍ଶିତ କରେ ।    

ଉପସ୍ଥିତ ପୂଜ୍ୟ ସନ୍ଥମାନଙ୍କୁ ପ୍ରଧାନମନ୍ତ୍ରୀ ନିଜ ବକ୍ତବ୍ୟରେ କହିଥିଲେ ଯେ, ଆଜାଦି କା ଅମ୍ରିତ ମହୋତ୍ସବ ଅନ୍ତର୍ଗତ ପ୍ରତ୍ୟେକ ଜିଲ୍ଲାରେ ୭୫ ଅମ୍ରିତ ସରୋବର ପ୍ରସ୍ତୁତ ହେଉଛି । ସମସ୍ତଙ୍କୁ ପ୍ରେରିତ କରି ମାନବ ସେବାରେ ସାମିଲ ହେବାକୁ ପ୍ରଧାନମନ୍ତ୍ରୀ ଆହ୍ୱାନ ଦେଇଥିଲେ । ଶତବାର୍ଷିକୀ ବର୍ଷ ନୂତନ ଶକ୍ତି ଓ ପ୍ରେରଣାର ବର୍ଷ ହେବା ସହ ଦେଶର କର୍ତ୍ତବ୍ୟପରାୟଣତାବୋଧକୁ ଉଜ୍ଜୀବିତ କରିବାରେ ଆଜାଦି କା ଅମ୍ରିତ ମହୋତ୍ସବ ସଫଳ ହେଉ ବୋଲି ସେ କାମନା କରିଥିଲେ । ସମସ୍ତଙ୍କ ସାମୂହିକ ଅବଦାନ ବ୍ୟାପକ ପରିବର୍ତ୍ତନ ଆଣିବ ବୋଲି ପ୍ରଧାନମନ୍ତ୍ରୀ ଆହ୍ୱାନ ଦେଇଥିଲେ । 

Tributes to Swami Atmasthananda Ji on his birth centenary. https://t.co/EKKExOGbll

— Narendra Modi (@narendramodi) July 10, 2022

 SR