বোস্চ ইন্দিয়াগী মেম্বর খুদিংমক,

নুংশিরবা মরুপশিং, খুরুমজরি!

চহি ১০০ মপুংফারকপদা বোস্চ ইন্দিয়া থাগৎচরি। চৎলিবা চহি অসি ভারত অমসুং বোস্চ ইন্দিয়া অনিমক্কী অখন্নবা চহি অমনি। ঐখোয়গী লৈবাক অসি নিংতম্বা ফংবা চহি ৭৫ শুবগী থৌরম পাংথোক্লি। লোয়ন্না অদোম্না ভারত্তা চহি ১০০ থবক তৌরকপগী থৌরম পাংথোক্লি। বোস্চ স্মার্দ কেম্পস শঙ্গাবদশু ঐ হরাওই। তুংদা লাক্কদবা মতমশিংগী পোৎথোকশিং পুথোকপা অমসুং ভারত অমসুং মালেমগী পাম্বৈ কয়া পুথোকপদা কেম্পস অসিনা মাংজিল থাগনি। ২০১৫গী ওক্তোবরদা বেঙ্গালুরুদা লৈবা বোস্চ ফেকসিলিতিদা চান্সেল্লর মের্কেলগা লোয়ন্না চৎপগী খুদোংচাবা অমা ঐনা ফংখি। মফম অদুদা পায়খৎলিবা অনৌবা থবকশিং ঐনা উবা ফংখি। নহারোলশিংগী স্কিল হেনগৎহন্নবা বোস্চনা পায়খৎপা ইজুকেসনগী থবকশিং অদু উবদা অপেনবা পোকখি।

মরুপশিং,

হৌজিক অসি তেক্নোলোজিগী মতমনি। চহিচা অমদা থেংনবা মালেমগী খ্বাইদগী শাথিবা লাইচৎ অমা হৌখিবা চহি ২ অসিদা মালেম্না লান্থেংনরিঙৈদা ঐখোয়না তেক্নোলোজিগী কান্নবশিং উবা ফংলে। মরম অদুনা তেক্নোলোজি অমসুং অনৌবা থবকশিংদা শেন থাদবা অসি য়াম্না মরুওই। বোস্চ ইন্দিয়ানা অনৌবা থবকশিংদা খক নত্তনা মসি পাকচাউনা পাংথোকপা অসিদা ঐ হরাওই। হিরম অসিদা খ্বাইদগী মরুওইবদি তুংকোইনা চৎনগদবা থবকশিং পায়খৎপনি। হৌখিবা চহি ৮ অসিদা নুমিৎতগী লৌবা ইনর্জি শরুক ২০ লোম হেনগত্তুনা ভারতকী চাউখৎপা অসি অকোয়বগী ফিবমদা হেন্না ফগৎহল্লে। ভারত অমসুং মপান লৈবাকশিংদা বোস্চনা কার্বোন নিউত্রেলিতি থম্বা ঙম্লে হায়বা ঐ খঙলে। মসি পুক্নিং থৌগৎনিঙাইনি।

মরুপশিং,

ঙসিদি ভারত য়াংনা চাউখৎলক্লিবা অচৌবা ইকোনোমিশিংগী মরক্তা য়াওরে। হৌখিবা চহি ২দা শেন থাদবগী চাং হেনগৎলে। ঐখোয়গী নহারোলশিং থাগৎলি, ঐখোয়গী স্তার্দ-অপকী থবকশিং মালেমদা খ্বাইদগী চাউবশিংগী মনুংদা য়াওরে। মালেমগী ওইনা তেক্নোলোজিগী হিরমদশু খুদোংচাবা কয়া লৈরে। খুঙ্গং খুদিংমক্তা অয়াংবা ইন্তরনেৎ ফংহন্নবা ভারত সরকারনা থবক পায়খৎলি। দিজিতেল ইন্দিয়া অমগী ঐখোয়গী পান্দম অসিদা সরকারগী থবক খুদিংমক তেক্নোলোজি শীজিন্নবা য়াওরি। হায়রিবা খুদোংচাবশিং অসিগী কান্নবশিং লৌনবা অমসুং ঐখোয়গী লৈবাক্তা শেন থাদনবা ঐনা মালেমগী লৈবাকশিংদা তকশিল্লি।

মরুপশিং,

চাউখৎপগী তাঙ্ককশিং অসি য়াম্না মরুওই। মখোয় অসি হরাও-তয়াম্বা ফোঙদোক্কদবা থৌরম অমনি অমসুং মাংলোমদা চংশিনগদবনি। ভারত্তা হেন্না থবক পায়খৎনবা ঐনা বোস্চতা তকশিল্লি। অদোমগী কাংবুনা লাক্লিবা চহি ২৫ অসিদা পাংথোকপা ঙমগদবা থবকশিংগী পান্দমশিং থমগদবনি। চহি ১০০গী মমাংদা জর্মনিগী কম্পেনি অমা ওইনা বোস্চ ভারত্তা লাকখি। মসি জর্মনিগী ওইরবশু ঙসিদি মসি ভারতকী কম্পেনি অমা ওইরে। মসি জর্মনি ইঞ্জিনিয়ারিংগী তৌবা ঙম্বা অমসুং ভারতকী থৌনাগী অচৌবা খুদম অমনি। মসিগী মরী অসি হেন্না ফগৎলক্কনি। অমুক হন্না, ঐনা বোস্চ ইন্দিয়াগী মীওই খুদিংমক থাগৎচরি অমসুং অদোমগী মফমদা য়াইফ-পাউচেল পীজরি।

অদোম থাগৎচরি

অদোম য়াম্না থাগৎচরি।

*****