খুরুমজরি,

ময়াম করম তৌবীরিগে?

ঙসি ময়াম্না য়াম্না লাপ্পা মফমশিংদগী লাকপী হায়না ঐঙোন্দা তাকপীরি। ময়ামদা ঐহাক্না ভারতকী নাৎ, অপুনবগী শক্তম অমসুং ইচিল-ইনাও ওইবগী মরী অদু ধবা ফংই। নখোয়গী মীনুংশি অসি ঐহাক্না কৈদৌনুংদা কাওজরোই। নখোয়গী মীনুংশি, থৱায় য়াওবা অসিগীদমক ভারত্তা পাউদা মসিবু উবা ফংলিবা মীওই পুম্নমক্না শোইদনা চাউথোকচবা পোক্লমগনি।

মরুপশিং,

ঙসিগী নুমিৎ অসি অতোপ্পা মরম অমগীদমক্তসু খঙনৈ। ঙসি অসি জুন ২৬নি। ঐখোয়না চাউথোকচবা পোক্লিবা দেমোক্রেসী অসি, ভারত মচা খুদিংমক্কী দি.এন.এ.দা য়াওরিবা দেমোক্রেসী অসি ঙসিদগী চহি ৪৭কী মমাংদা মসিবু মাংহন্নবা, মসিবু নমথনবা হোৎনখি। ভারতকী ফজরবা দেমোক্রেসীগী পুৱারদা ইমর্জেন্সী লাউথোকখিবগী মতম অসি অমমমবা মতম ওইখি। অদুবু অমমমবা মতম অসিদসু চহিচা কয়া শুরবা ঐখোয়গী দেমোক্রেতিক্কী চৎনবী অসিনা মপুং ফানা শক্তি পুথোক্তুনা মাইপাকপা ঙমখি, ফত্ত্রবা মীওইশিংগীদমক্তা মসি অৱাবা ওইখি।

দেমোক্রেতিক ওইবা মওংদা দেমোক্রেসীবু নমথনবা হোৎনরিবা লালোং পুম্নমক অদুগী পাউখুম ভারতকী মীয়াম্না পীখি। ঐখোয়না মফম অমা হেক্তদা লৈজরবসু ভারতমচা অমা ওইনা ঐখোয়গী দেমোক্রেসী অসিগীদমক চাউথোকচবা পোকই। ভারত মচা খুদিংমক্না দেমোক্রেসীগী মমা অসি ভারতনি হায়না চাউথোক্না হায়বা ঙম্মি। ঐখোয়গী দেমোক্রেসীগী চহি লিশিং কয়া শুরবা পুৱারী অসি ঙসিসু ভারতকী কাচিন কোয়াদা হিংদুনা লৈরি। তোঙান-তোঙানবা লোল কয়া, তোঙান-তোঙানবা দাইলেক্ত কয়া, তোঙান-তোঙানবা পুন্সি মহিং কয়া লৈবগা লোয়ননা ভারতকী দেমোক্রেসী অসি বাইব্রেন্ত ওই, প্রজা খুদিংমক্কী থাজবা ওইরি, আশা ওইরি অমসুং প্রজা খুদিংমক্কী পুন্সিদা শক্তি পীরি।

ভারতনা পাকচাউখ্রবা অমসুং দাইভর্স ওইবা লৈবাক অমদা করম্না দেমোক্রেসী লৈহনবগে উৎখ্রে। ভারত মচা করোর কয়ানা অমত্তা ওইনা অচৌবা পান্দমশিং থুংহনবগী মওং অসি মমাংদা অমুক্তা উখিদ্রি। ঙসি খুঙ্গং খুদিংমক ওপন দেফিকেসন ফ্রী ওইহনবা ঙম্লে। ঙসি ভারতকী খুঙ্গং খুদিংদা মৈ ফংহনবা ঙম্লে। ঙসি ভারতকী খুঙ্গং অয়াম্বা লম্বী-থোং লৈরে। ঙসি ভারতকী মীয়ামগী ৯৯% হেনবনা ক্লীন কুকিংগীদমক গ্যাস কন্নেক্সন ফংলে। ঙসি ভারতকী ইমুং খুদিংমক্কা বেঙ্কিং সিস্তেমগী কন্নেক্ত তৌরে। ঙসি ভারতকী লায়রবা খুদিংমক্তা লুপা লাখ ৫গী লেম্না লায়েংনবগী খুদোংচাবা ফংলে।

কোরোনাগী মতমদা ভারতনা হৌখিবা চহি অনি অসিদা লায়রবা করোর ৮০দা লেম্না চেং-হৱায় ফংহনখি। মসি খক্তা নত্তনা ভারতনা চাংচৎ ওইনা নুমিৎ তরা খুদিংদা স্তার্তঅপশিংগী মশিং হেনগৎলক্লি, নুমিৎ তরানি খুদিংগী য়ুনিকোর্ন পুথোক্লি। ঙসি চাংচৎ ওইনা থা খুদিংগী ভারত্তা পেতেন্ত ৫০০০ ফাইল তৌরি। ঙসি চাংচৎ ওইনা ভারতনা থা খুদিংগী মোদর্ন রেলৱে কোচ ৫০০ হেন্না মেন্যুফেকচর তৌরি। ঙসি ভারতনা থা খুদিংগী চাংচৎ ওইনা য়ুমথোং লাখ ১৮দা তোতি ঈশিংগী সপ্লাই পীরি। ভারত মচাশিংনা মাইপাকখিবগী লিস্ত অসি য়াম্না শাংখ্রে। করিগুম্বা ঐহাক্না ঙাংদনা লৈরবদি নখোয়গী নুমিদাংগী চাকলেন চাবগী মতম য়ৌরক্লগনি।

মরুপশিং,

লৈবাক অমনা মতম চানা, অচুম্বা ৱাখোল্লোনগা লোয়ননা অচুম্বা ৱারেপ অমা লৌরবা মতমদা মীপুম খুদিংমক চাউখৎলি, মতম অদুদা খোঙজেল য়াংনা খুমাং চাউশিনবা ঙম্মি। হৌখিবা চহিচাদা থোখিবা অহুমশুবা ইন্দস্ত্রিএল রিভোল্যুসনগী মতমদা জর্মনী অমসুং অতোপ্পা লৈবাকশিংনা মসিগী খুদোংচাবা করম্না লৌখি হায়বা নখোয় পুম্নমক্না খঙলমগনি। মতম অদুদা ভারত অসি মীনাই-নাইথাং ওইরি। মরম অসিনা মসিগী লমজেল অসিদা মনীংদা লৈখি। অদুবু ২১শুবা চহিচাগী ভারত অসি মরিশুবা ইন্দস্ত্রিএল রিভোল্যুসনগী ইন্দস্ত্রী ৪.০ অসিদা তুংদা লৈরিবা লৈবাক অমা ওইবগী মহুৎ ভারতনা মসিগী ইন্দস্ত্রিএল রিভোল্যুসন অসিগী লুচিংবশিংগী মরক্তা অমা ওইরি।

ইনফোর্মেসন তেক্নোলোজীদা, দিজিতেল তেক্নোলোজীগী মতম অসিদা ভারতনা মাগী ফিরাল ৱাংনা পাইহল্লি। মালেমদা তৌরিবা রিএল তাইম দিজিতেল পেমেন্তশিংগী মনুংদা ত্রাঞ্জেক্সনগী চাদা ৪০দি ভারত্তা ওইরি।  ঙসি ভারতনা দেতা কঞ্জুম্পসন্দা অনৌবা রেকোর্দশিং থম্বা ঙম্লি। ভারত অসি দেতা য়াম্না হোংবা লৈবাকশিংগী মনুংদা অমা ওইরি। ২১ শুবা চহিচাগী ন্যু ইন্দিয়াদা মীয়াম্না অনৌবা তেক্নোলোজী শীজিন্নবগী খোঙজেল অসি মীপুম খুদিংমক্না ঙকনীংঙাই ওই।

কোরোনাগী ভেক্সিন কাপথোক্নবগীদমক, ভেক্সিনেসন সর্তিফিকেৎ লৌনবগীদমক শেমখিবা কোৱিন পোর্তেলদা রেজিস্ত্রেসন করোর ১১০ তৌখি। ঙসি ভারত মচা করোর ২২ হেনবনা কোরোনা নাবা ত্রেক তৌনবা শেমখিবা অখন্নবা এপ, আরোগ্য সেতুগা কন্নেক্ত তৌরি। পর্চেস তৌনবগীদমক সরকারনা শেমখিবা গভর্নমেন্ত ই-মার্কেৎ প্লেস হায়বদি জি.ইএম. অসিদা সেল্লর লাখ ৫০ হেন্না য়াওরি। ভারত মচা লাখ ১২দগী ১৫না নুমিৎ খুদিংগী ত্রেনদা চৎনবা ওনলাইন তিক্কেৎশিং বুক তৌরি।

ঙসি ভারত্তা শীজিন্নরিবা দ্রোন তেক্নোলোজীগী মওং অসি মমাংদা অমুক্তা উখিদ্রি। লৈবাক অসিগী মফম কয়াদা হৌজিক দ্রোনশিংনা হার চাইরি তাবদা য়াম্না অঙকপা পোক্কনি। স্কিম অসিগী মখাদা দ্রোনশিংনা লৈবাক অসিদা লৈরিবা খুঙ্গং লাখ কয়াদা লম মেপ্পিং তৌবগী, য়ুমশিং মেপ্পিং তৌবগী থবক তৌরি। কেম্পেন অসিগী মখাদা প্রজা করোর কয়াদা প্রোপর্তী সর্তিফিকেসৎশিং পীবা ঙমখ্রে। মহৌশাগী ওইবা খুদোংথিবশিং থোক্লিঙৈ মনুংদা দ্রোন তেক্নোলোজী শীজিন্নদুনা ভারত্তা রিলিফ অমসুং রেস্ক্যুগী থবক চত্থরি।

মরুপশিং,

ঙসি ভারতনা ওইরিবা মওং, চৎলিবা মওং, মওং অসিদা অদুমক চৎখিগনি – হায়রিবা ৱাখল্লোন অদু থাদোকপা ঙম্লে মরুপশিং। ঙসিগী ভারতকী মশক অসি, তৌগদবনি, তৌগনি অমসুং মতম চানা তৌগনি হায়বা অসিনা তাক্লি। ভারতনা ফিরেপকা লোয়ননা মাংদা চংশিল্লি। হৌজিক ভারতনা শেম-শারে, ঙাইবা ঙমদ্রে। ভারতনা চাউখৎপা, খুমাং চাউশিন্নবা ঙাইবা ঙমদ্রে, ভারতনা মাগী মঙলানশিং অসু থুংহন্নবা ঙাইবা ঙমদ্রে, ফিরেপশিং লৌদুনা মঙলানশিং অসি নীংথিনা থুংহন্নবা ঙাইদুনা লৈথোকপা ঙমলক্ত্রে। ঙসি ভারতনা মশাগী মপাঙ্গলদা থজবা থম্মি, মশাদা থাজবা থম্মি।

इसलिए মরম অসিনা ঙসি ভারতনা অরিবা রেকোর্দশিং থুগাইদুনা অনৌবা পান্দমশিং থম্লি। নখোয়না লম অমা হেক্তদা য়েংবদা, ঐহাক্না খুদম অমা পীজগে। ভারতনা ২০১৬দা ৱারেপ অমা লৌখি মদুদি ২০৩০ ফাওবদা ঐখোয়গী অপুনবা ইলেক্ত্রিসিতী জেনরেসন কেপাসিতী অসিগী চাদা ৪০দি নন-ফোসিল ফ্যুএলদগী ওইহনগনি। হৌজিক ২০৩০ য়ৌগদবা চহি ৮ ৱাৎলি অদুবু ভারতনা পান্দম অদু ফংবা ঙম্লে। ঐখোয়না পেত্রোলদা ইথানোল ব্লেন্দিং চাদা ১০ তৌনবা পান্দম অমা থমখি। পান্দম অসিসু ভারতনা থাখিবা মতম অদুগী থা মঙা মাংওইননা ফংবা ঙমখি।

ভারতকী হৌজিক ওইরিবা কোবিদ ভেক্সিনেসনগী খোঙজেল অসি ময়াম্না খঙবীরমগনি। ঙসি ভারত্তা মীয়াই চল্লবা মীওইশিংগী ৯০%দি ভেক্সিনগী দোজ অনি কাপখ্রে।  মীয়াই চল্লবা মীওইশিংগী ৯৫%দি য়ামদ্রবদা দোজ অমা কাপ্লে। মসি মীয়াম্না মীশিং বিলিয়ন ১.২৪ ভেক্সিনেসন তৌবদা চহি ১০-১৫ চংখিগনি হায়নরম্বা ভারত অদুনি। ঙসি ঐহাক্না নখোয়গা ৱারী শারিবা মতম অসিদা ভারতকী ভেক্সিন দোজকী মশিং অসি করোর ১৯৬ হায়বদি বিলয়ন ১.৯৬ হেনখ্রে। ভারত্তা শাজবা  ভেক্সিন্না ভারত লোয়ননা মালেমগী মীওই করোর কয়াগী পুন্সিবু কোরোনাদগী কনবা ঙমখি।

মরুপশিং,

২০১৫দা ঐখোয়না জর্মনীদা লাকখিবা মতমদা স্তার্তঅপ ইন্দিয়া কেম্পেন অসি শুপ্নগী আইদিয়া অমগী থাক্তা লৈখি, মতম অদুদা হায়খিবা অদু নকোংদা শং-শংনা তারি। মতম অদুদা স্তার্তঅপ তীমদা ভারতকী মীং অমত্তা তাখিদে, কনা অমত্তনা খঙবীখিদে। ঙসিদি ভারতনা মালেমগী স্তার্তঅপ ইকোসিস্তেমদা খ্বাইদগী চাউবদা অহুমশুবদা লৈরি। ইচম চম্বা স্মার্তফোনশিং ফাওবা মীরৈবাক্তগী ভারতনা লৈখিবা মতম অমা লৈখি। ঙসিদি ভারতনা মালেমগী ওইনা মোবাইল ফোন শাবদা অনিশুবা ওইরি অমসুং ভারত্তা শাবা মোবাইলনা মালেম শিনবা থুংবদা চৎলি। চহি তরেৎ-নিপানগী মমাংদা ঐহাক্না নখোয়গুম্বা মরুপশিংদা ঐখোয়গী বাইওতেক ইকনোমী অসি বিলিয়ন দোলর ১০ ওই হায়বরি লুপা করোর লিশিং ৭৫ ওই হায়না ফোঙদোকখি। ঙসিদি মসি শরুক ৮ হেন্না হেনগৎলে অমসুং দোলর বিলিয়ন ৮০ হায়বদি লুপা করোর লাখ ৬ হেনবা ঙম্লে।

মরুপশিং,

ভারতকী মীয়ামগী থৌনা অসিনা খ্বাইদগী অৱাবা তানফমশিংদা ঐখোয়গী খ্বাইদগী চাউবা পাঙ্গল ওইখি। মরুপশিং মমাংগী চহিদা ঐখোয়না ঙসি ফাওবদা খ্বাইদগী ৱাংবা চাংদা এক্সপোর্ত তৌখি। মসিনা তাক্লি মদুদি ঐখোয়গী মেন্যুফেকচর্রশিংনা অনৌবা খুদোংচাবশিং ঙাইরিবা অসিদা মালেমনা ঐখোয়দা থাজবগা লোয়ননা মীৎয়েং থম্নরকই হায়বগী খুদম অমা ওইরি। মমাংগী চহিদা ভারতনা দোলর বিলিয়ন ১১১ হায়বদি লুপা করোর লাখ ৮গা লিশিং ৩০গী ইঞ্জিনীয়রিং গুদশিং এক্সপোর্ত তৌখি। ভারতনা লশিং অমসুং হেন্দলুমগী পোত্থোকশিং এক্সপোর্ত তৌবদা চাদা ৫৫ হেনগৎলে।

ভারত্তা মেন্যুফেকচরিং হেনগৎহন্নবা সরকার অসিনা লুপা করোর লাখ ২রোমগী পি.এল.আই. স্কিম অমা হৌদোকখি। মথংগী চহিদা ঐখোয়গী এক্সপোর্তকী তার্গেৎ অসি হেন্না ৱাংখৎহনবা পাম্মি অমসুং মসিদা নখোয়নসু চাউনা মতেং পাংবা য়াই। চপ মান্ননা ঐখোয়গী এফ.দি.আই. ইনফ্লো, ফোরেন ইনভেস্তমেন্ত অসিসু চহি অমগী মতুং চহি অমদা অনৌবা রেকোর্দশিং থমলক্লি।

মরুপশিং,

লৈবাক অমগী প্রজাশিংনা সবকা প্রয়াসকী ৱাখল্লোনগা লোয়ননা, জনভাগীদারীগী ৱাখল্লোনগা লোয়ননা লৈবাক অসিগী ফিরেপশিং থুংহন্নবা হোৎনরকপা মতমদা, মখোয়না মালেমগী অচৌবা শক্তিশিংগী মতেংসু ফংই। ঙসি ঐখোয়না মালেমগী অচৌবা শক্তিশিংনা ভারতকা খুৎশম্নদুনা করম্না চৎপা পাম্লি হায়বা উবা ফংলে। ঙসি ভারতনা মাগী প্রজাশিংগী অচেৎপা ফিরেপকা লোয়ননা চাউখৎপগী লম্বেলদা মাংদা চংশিল্লি। ঐখোয়গী মীয়ামগী ফিরেপকা লোয়ননা, মখোয়না শরুক য়াবগা লোয়ননা, ভারতনা লৌখৎলিবা খোঙথাংশিং অসি ঙসিদা জন-অন্দোলন ওইরক্লি। মসিনা ঐখোয়দা লৈবাক অসিগী তুংলমচৎকীদমক থাজবা পীরি।

খুদম ওইনা, ওর্গানিক ফার্মিং অসিগুম্বা ৱাহৈশিং অসি মালেমদা খন্ন-নৈন্নবগী হীরম অমা ওইরক্লি। অদুবু ভারতকী লৌমশিংনা মাংদা থোরক্তুনা মসি থবক ওইনা পাঙথোক্লি। মসিগা মান্ননা ক্লাইমেৎ চেঞ্জ অসি ঙসি ভারত্তা শুপ্নগী সরকারগী পোলিসীশিংগী হীরম অমা খক্তা ওইদ্রে। ভারতকী নহারোলশিংনা ই.ভি.শিং অমদি মসিগা মান্নবা প্রো-ক্লাইমেৎ তেক্নোলোজীশিংদা শেল থাদরি। ঙসি ভারত্তা সস্তেনেবল ক্লাইমেৎ প্রেক্তিসশিং অসি মীচম প্রজাগী পুন্সিগী শরুক অমা ওইরক্লি।

২০১৪ ফাওবদা ওপন দেফিকেসন অসি ভারত্তা অচৌবা সমস্যা অমা ওইখি অদুবু ঐখোয়না লৈবাক অসিদা তোইলেৎ করোর ১০ হেন্না শাখি। ঙসি লুনানবা অসিনা ভারতকী পুন্সি মহিং অমা ওইরক্লি। ভারতকী মীয়াম্না, ভারতকী নহারোলশিংনা লৈবাকপু লুনান্না থম্বা অসি মখোয়গী থৌদাং ওইনা লৌনরক্লি। ঙসি ভারতকী মীয়াম্না মখোয়গী শেল অসি তশেংনমক লৈবাক অসিগীমদক চাদিং তৌরি অমসুং শেঞ্জা থুমজাগী লাংদা থুদ্রে হায়না থাজনরি। অমসুং মসিনা মরম ওইদুনা লৈবাক অসিদা কেস কম্প্লায়েন্স খোঙজেল য়াংনা হেনগৎলক্লি। মসি লেগেল প্রোসেসনা ওইহনবা নত্তে মসি মীকপ থোরকপনা ওইহনবনি মরুপশিং।

মরুপশিং,

চহি অসিদা ভারত মচা পুম্নমক্না ঐখোয়গী নীংতম্বগী চহি ৭৫শুবগী কুমওন, অমৃত মহোৎসব পাঙথোক্লি। নীংতম্বা ফংখিবগী চহি ৭৫শুরকপা অসিদা ভারতনা অমুক্তা ওইখিদ্রিবা মওংদা ইনক্লুসিবনেস অমসুং মসিনা এস্পিরেসন করোর কয়াদা কান্নবা পীবা উবা ফংলি। ঙসি ভারত্তা অমুক্তা ওইখিদ্রিবা মওংদা ওইথোকপা য়াবশিং লৈরি। মপাঙ্গল কনবা সরকার অমগী লুচিং মখাদা, তংদু লৈতাবা সরকার অমগী লুচিং মখাদা, অচুম্বা ফিরেপ লৌবা ঙম্বা সরকার অমগী মখঅদা ভারতনা অনৌবা মঙলানশিং শাগৎলি, অনৌবা ফিরেপশিং লৌরি অমসুং ফিরেপশিং অসি থবক ওইনা ওন্থোক্নবা কন্না হোৎনরি। ঐখোয়গী পোলিসী অসি ময়েক শেংই অমসুং রিফোর্মশিং পুরক্নবা অচেৎপা কম্মিৎমেন্তশিং লৈ। চহি মঙাগী মতুংদা ঐখোয়না কদায়দা য়ৌগনি হায়বগী ৱারেপ লৌখ্রে অমসুং মথংগী চহি ২৫, লৈবাক অসিনা নীংতম্বগী চহি ১০০ শুরকপা মতমদা ঐখোয়না চহি ২৫গী মতুংদা আত্মনির্ভর ওইনবগী রোদমেপ শেম-শাবা লোইরে।

মরুপশিং,

মালেমদা করিগুম্বা অমা থোকপদা ঐখোয়না কাপখিবা মতম অদু লোইখ্রে। ঙসি ভারত অসি মালেমগী শীংনবশিংগীদমক কাপ্লিবা লৈবাক অমা ওইদ্রে, ভারতনা শীংনবশিং অসিগী মাইকৈদা মাং থানা চংশিল্লি অমসুং মসিগী ৱারোইশিন পুরক্লি। কোলিজন ফোর দিজাস্তর রেজিলিয়েন্ত ইনফ্রাস্ত্রকচর (সি.দি.আর.আই.)গী খুত্থাংদা ঐখোয়না মালেম পুম্বনা খুদোংথিবশিং থেংনবা ঙম্বা ওইহনবা পাম্লি। ঙসি ইন্তর্নেস্নেল সোলর এলাইয়েন্সকী খুত্থাংদা ঐখোয়না মালেমগী লৈবাকশিংবু প্লেৎফোর্ম অমদা পুরক্তুনা মালেমদা অহোংবা অমসুং অকোইবগী ফীভমদা অকাইবা পীদবা ইনর্জীগী কান্নবশিং ফংহন্নবা হোৎনরি। ঐখোয়না মালেমগী মাংদা ৱান সন- ৱান ৱর্ল্দ – ৱান গ্রীদকী মঙলান অসি পুথোক্লি। ভারতনা মসিগী কান্নবশিং অসি মশানা হৌখিবাচহি নিপান অসিদা ফংবা ঙমখি। ভারত্তা রেকোর্দ কেপাসিতীদা সোলর পাৱর পুথোকখি, মসি য়ুনিৎ অমদা লুপা অনি-মখাইগী চাংদা ফংহল্লি।

ভারতনা গ্রীন হাইদ্রোজেন্দা পাইখৎলিবা থবক, জর্মনীগুম্বা লৈবাকশিংগা পার্তনর ওইরিবা অসি মীওইবা জাতিগীদমক্তনি। দবল্যু.ঐচ.ও. সেন্তর ফোর ত্রেদিস্নেল মেদিসিন ভারত্তা লিংখৎপা অসিগা লোয়ননা ভারতনা মালেমগী অরিবা মেদিকেল সিস্তেমশিংগী গ্লোবেল সেন্তর অমসু ওইরক্লি।

মরুপশিং,

নখোয়না য়োগগী শক্তি অসি করিনো হায়বা নীংথিনা খঙই। মালেম পুম্বনা মসি পাম্নরি।

মরুপশিং,

ঙসিগী ন্যু ইন্দিয়ানা তুংদা লাক্কদবা মীরোলশিংগীদমক অনৌবা হেরিতেজ শেমগৎনবা থবক তৌরি। কেম্পেন অসিগী খ্বাইদগী চাউবা মপাঙ্গল অসি ঐখোয়গী নহারোলগীদমক অনৌবা লেগেসী শেম্বনি। ভারতকী নহারোলশিংদা শক্তি পীনবা ঐখোয়না ২১শুবা চহিচাগী অহানবা এজুকেসন পোলিসী শেমখি। অহানবা ওইনা ভারত্তা ইমা লোলদা মেদিসিন অমসুং ইঞ্জিনীয়রিং তম্নবগী খুদোংচাবা পীরি।

জর্মনীদা লৈরিবা নখোয় পুম্নমক্না নখোয়গী ইমা লোলদা দোক্তরেল ইঞ্জিনীয়রিং তম্বগী কান্নবশিং খঙলি। হৌজিক ভারতকী নহারোলশিংনা মসিগা চপ মান্নবা কান্নবা অদু ফংলগনি। অনৌবা এজুকেসন পোলিসী অসিনা হায়র এজুকেসন অমসুং রিসর্চকীদমক গ্লোবেল পার্তনরশিপশিংদা অকনবা মীৎয়েং চংলি। মসি ঐহাক্না ঙসিসু পল্লি মরমদি মসিগী মতাংদা জর্মন ইন্সতিত্যুসনশিংদা অনৌবা খুদোংচাবা কয়া লৈরে।

মরুপশিং,

হৌখিবা দিকেদশিংদা নখোয়না কন্না হোৎন্দুনা মফম অসিদা ভারতকী ফজবা মীংচৎ শেমগৎখি। আজাদী কা অমৃত মহোৎসব অসিদা, হায়বদি মথংগী চহি ২৫ অসিদা নখোয়গী অনীংবা অপাম্বশিং অদু হেন্না হেনগৎলগনি। নখোয়না ভারতকী সক্সেস স্তোরীসু ওই অমসুং ভারতকী মাইপাকপগী ব্রান্দ এম্বেসেদরসু ওইরি। মরম অসিনা নখোয়না মতম চুপ্পদা হায়জনীংবদি, মালেম শিনবা থুংবদা লৈরিবা ভারতকী ইচিল-ইনাওশিং নখোয়না লৈবাক অসিগী এম্বেসেদরশিংনি। সরকারগী সিস্তেমদা এম্বেসেদর অমা নত্ত্রগা অনি লৈ, ঐহাক্কীদি লৈবাক অসিবু মাংদা পুরিবা নেস্নেল এম্বেসেদর করোর কয়া লৈ।

মরুপশিং,

নখোয়না পীবীরিবা মীনুংশি, থৌজালশিং, অসিগুম্বা নুংঙাইরবা থৌরম অমা থৱায় য়াওনা শিনবীবা, নখোয় পুম্নমক্কা উনবগী খুদোংচাবা অমা পীবিবা অসিগীদমক ঐহাক্না পুম্নমক্তা অমুক্কা হন্না তৌবীমল খঙবা উৎচরি। পুম্নমক ইশা-ইউ ফনা অমসুং নুংঙাই য়াইফনা লৈবীবা ওইবীয়ু।

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

হন্না-হন্না থাগৎচরি!

*****