কেন্দ্র মন্ত্রী মন্দলদা লৈরিবা ঐহাক্কী মরুপ, শ্রী পিয়ুশ গোয়লজী, শ্রী হর্দীপ সিংহ পুরীজী, শ্রী সোমপ্রকাশজী, অনুপ্রিয়া পতেলজী, অতোপ্পা মীয়ামগী মীহুৎ, ইবেম্মা অমসুং ইবুংঙোশিং!

ঐহাক্না দিল্লী, নোইদা, ঘাজিয়াবাদ, এন.সি.আর.গী মীওইশিং অমসুং দিল্লীদা লাকখ্রবা লৈবাক পুম্বগী মীওইশিংবু থাগৎচরি। ঙসিদি, কেন্দ্র সরকারনা দিল্লীদা মতমগা চুনবা ইনফ্রাস্ত্রকচরগী নীংথিরবা খুদোল অমা তম্লে।

ঐহাক্না ঙসি তন্নেল মনুংদা চৎলিঙৈদা ৱাখলদা ৱাফম কয়া অমা লাকই। তেল্লবা মতমদা ঙসিগী ইন্তিগ্রেতেদ ত্রাঞ্জিত কোরিদোর শেম-শাখিবসি অরায়বা থবক্তি নত্তে। মসিগী কোরিদোরসিগী অকোয়বদা লৈবা লম্বী-শোরোকশিং অসি মী চিনবা শোরোক ঙাক্তনি। নুমিৎ খুদিংগী গারী লাখ লাখতা চেল্লিবনি। অদুগা শারিবা তন্নেলসিগী মথক্তা রেলৱে লাইন ৭না ফাওদুনা মথক্তা চেল্লিবনি। অসুক য়াম্না ৱারিবসিগী মথক্তা কোরোনা অমুক লাকশিনখি। মদুনা অনৌবা শিংনবা অমা অমুক লৈহনখি। অদুগা, ঐখোয়গী লৈবাকসিদা থবক অমা তৌবদা জুদিসিএরীগী থোঙ থিনবা মী ৱাৎপসু নত্তে। হীরম খুদিংদা অয়েৎপগী অয়েৎপা ঙাক্তা পীবনি।

লৈবাক অসিবু মাঙ থানা পুবদা খুদোংচাদবা কয়া থেংনৈ। প্রোজেক্ত অসিনসু অদুগুম্বা খুদোংচাদবা কয়া মাইয়োক্নবা তাখি। অদুবু, হৌজিক্কী অনৌবা ভারতনা শিংনবশিংগী ৱারোইশিন পুরকই, অনৌবা পান্দম থম্বনি অমসুং পান্দম ফংনবা লেপ্তনা হোৎনবনি। ঐখোয়গী ইঞ্জিনিয়র, শিন্মীশিংবু ঐহাক্না থাগৎচনীংই। মখোয়না খোঙফম চেৎনা, হোৎনবা লেপ্তনা অমসুং নীংথিনা তেংবাংনদুনা প্রোজেক্ত শেন্নবগী অফবা খুদম অমা পীবগা লোয়ননা প্রোজেক্ত অসিবু মপুং ফানা লোইশিনখি। মসিগীদমক্তা হুমাং তাদুনা হোৎনখিবা শিন্মীশিংবু ঐহাক্না থম্মোই শেংনা থাগৎচরি, অদোম্বু ইকায় খুম্নজরি।

মরুপশিং,

প্রোজেক্ত অসিদি প্রগতী মাইদানবু ২১শুবা চহি-চাগী তঙাই ফদবগী মতুং ইন্না চুন্নহন্নবা শেমদোকপগী কেম্পেনগী শরুক অমনি। প্রগতী মাইদান অসি ভারত চাউখৎহনবদা তেংবাংলিবা ভারতকী তৌবা ঙম্বগী মতিক, পোত্থোক, চৎনবীবু মালেমদা উৎনবগীদমক্তা দিকেদ কয়াগী মমাংদা শাখিবনি। মদুগী মতুংদা ভারত্তা অহোংবা য়াম্না লাকখ্রে, ভারতকী তৌবা ঙম্বগী মতিক হোংলে, ঐখোয়গী তঙাই ফদবশিং শরুক কয়া হেনগৎখ্রে। অদুবু, লাইবক থীবদি, প্রগতী মাইদান্না প্রগতী নীংথিনা তৌদ্রে, খ্বাইদগী হান্না চাউখৎফম থোকপা অসিনা মনিংদা অদুমক লৈহৌরে। দিকেদ মখায়গী মমাংদা মফমসিগী খুদোংচাবশিং পাকথোক চাউথোকহন্নবা থৌরাং য়াৎখি, মরী লৈনবা ৱাফম কয়া শন্দোক্তুনা, রিব্বোন কক্তুনা, পাউ-চেদা হাপ্তুনা ফেসন অমগুম্না মীয়ামদা খঙহনবগী থৌওং কয়া অমা পাংথোকখ্রে। অদুবু, ঐনা ঐগী থবক, মানা মাগী থবক হায়দুনা অদুমক লৈথোকখিবনা মখা তাবা থবক অমত্তা চত্থখিদে।

ভারত সরকারনা লৈবাক্কী কোনুংদা মালেমগী থাক্তা লৈবা থৌরম পাংথোক্নবা স্তেত ওফ দি আর্ত ফেসিলিতী, এগজিবিসন হোল লৈহন্নবগীদমক্তা লেপ্তনা হোৎনরি। ঐখোয়গী দিল্লীমক্কী দ্বার্কাদা শারিবা ইন্তর্নেস্নেল কনভেন্সন অমসুং এক্সপো সেন্তর অমসুং প্রগতী মাইদানবু নৌহৌননা শেমগৎপগী থবকশিং অসিদি মশানা খুদম ওইজবা থবক-থৌরম ওইগদৌরিবনি।

ঐহাক্না চহি ৪গী মমাংদা মফমসিগী এগজিবিসন হোল শঙ্গাবগী খুদোংচাবা ফংখি অমসুং ঙসিনা কন্নেক্তিবিতীগী মতমগা চুনবা খুদোংচাবা অসিবু ঐহাক্না লৈবাক মীয়ামদা খুৎশিন্নরি। কেন্দ্র সরকারগী মখাদা পায়খৎলিবা মতমগা চুনবা থবক-থৌরম কয়ানা দিল্লীগী শক্তকা হোংহল্লি, মসিবু মোদর্ন ওইহল্লি। থবকশিং অসি শক্তম হোংহনবা খক্কী নত্তে, শক্তম হোংলক্লিবা অসি মরাইবক হোংলকপগী পাম্বৈ অমসু ওইবা য়ারিবনি।

মরুপশিং,

কেন্দ্র সরকারনা দিল্লীদা মতমগা চুনবা ইনফ্রাস্ত্রকচর, মোদর্নাইজেসন তৌবদা মিৎয়েং চঙলিবা খুদিংগী হকথেংননা ফংবা মহৈ অমসুং পান্দমদি মীচম মীয়ামগী পুন্সি মহিং হেন্না ফগৎহনবনি। মীচম মীয়ামগী খুদোংচাদবশিং হন্থহনবা, মখোয়গী পুন্সিদা খুদোংচাবশিং হেনগৎহনবা হায়বসি হৌজিক পায়খৎলিবা থৌরাংশিং অসিদগী ফংগদবনি অদুবু অকোয়বগী ফিভম অমসুং অইং-অশাগী ফিভম খঙনা ইনফ্রাস্ত্রকচর শেমগৎপগী তঙাই ফদবা লৈ।

মমাং চহিদা, ঐহাক্না দিফেন্স কমপ্লেক্স অমা মীয়ামদা খুৎশিন্নবগী খুদোংচাবা ফংজখি। অদুবু, অফবা পান্দম অমসুং ৱাখল্লোনগা লোয়ননা পাংথোকপা থবকশিং অসি রাজনিতীগী ইরাংদা অদুমক য়াওখিদবা নত্তে, অমসুং মিদিয়াসু তি.আর.পি. পাম্বনা মরম ওইরগা মখোয়সু অদুমক চেন্নৈ। তসেংনা করি থোকখি হায়বা খঙনবা ঐহাক খুদম অমা পীগে। দিল্লীবু নীংথিনা খঙবা মীওইনদি মসি মমুৎ তানা খঙগনি। মালেমগী অনিশুবা লাঞ্জাওগী মতুংদা দিফেন্সকা মরী লৈনবা থবকশিংগী মতাংদদি। মতম কয়া য়াম্না হৌখ্রে, অদোমসু অমুক্তা খন্থরগা য়েংউ। ঐখোয়গী রাস্ত্রপতি ভবনগী মনাক্তা লৈবা হায়রিবা মফমশিংদা হতমেন্ত কয়া অমা লৈরম্মি। অপীকপ-অপীকপা খাঙপোকশঙগুম্বনি। অয়াম্বা থবক মসিদগী পাংথোকই। সরকার কয়া অমা লাকখ্রে অমসুং চৎখ্রে। অদোম্নসু খঙলবনি, ঐহাকসু য়াম্না হায়নীংদে।

ঐখোয়গী সরকারনা কেজি মার্গ অমসুং অফ্রিকা এভেন্যুয়দা ইকো-ফ্রেনলী বিলদিং কয়া শারে অমসুং খাঙপোকশঙগুম্বা মফমশিংদা চহি ৮০মুক দিফেন্সকী থবক কয়া পাংথোক্লমবদো, ঐখোয়না মদুদগী হোংদোক্তুনা অফবা ইনভাইরনমেন্ত অমদা দিফেন্সকী খুদোংচাবা অমা শেমখিবনি। দিকেদ কয়াদগী লৈরক্লবা ওফিসশিংবু হোংদোকপগী মরমদি থবক তৌবদা খুদোংচাবা লৈগদবা ইনভাইরনমেন্ত অমা পীবা পাম্বগীনি। মতমগা চুনবা তেক্নোলোজী শিজিন্নবা য়ানবা ইনফ্রাস্ত্রকচরগী তঙাই ফদবা লৈবশিংবু ঐখোয়না খঙদুনা ঐখোয়না বিলদিং অসি শাবনি অমসুং ইকো ফ্রেনলীসু ওইহনবনি।

মসিগী কান্নবা করি ফংই, অফবা ইনভাইরনমেন্ততা থবক তৌরবদি, থবক্কী মহৈসু য়াম্না ফজনা ফংই। অদুগা ওফিস হোংদোক্লবা মতুংদা হান্নগী চাউরবা মফমশিং হাঙলে, মসিদা মীয়ামগী নুংঙাইগদবা থবকশিংগী থবক পায়খৎপা হৌখ্রবনি। সেন্ত্রেল ভিস্তা অমসুং লৈবাক্কী অনৌবা পার্লিয়ামেন্ত হাউসকী থবসু খোঙজেল য়াঙনা চত্থরিবা অসিদা ঐহাক্না নুংঙাইবা ফাওই। লাক্কদৌরিবা মতমশিংদা ভারতকী কোনুংগী মতাংদা ৱারী শান্নগনি, মসিনা হিন্দুস্তানীশিংবুসু চাউথোকচবা পোকহনগনি হায়বগী ঐহাক্না থাজবা লৈ।

মরুপশিং,

ঙসিগী ইন্তগ্রেতেদ ত্রাঞ্জিত কোরিদোর অসি ঐখোয়গী সরকারনা শাবনি, মসিদসু মতমগা চুনবা ইনফ্রাস্ত্রকচর, অমসুং ইনভাইরনমেন্তকী মান্নবা পান্দম অদুমক থম্লি, মখোয়না চুননা মথৌ পাংথোক্লি। প্রগতী মাইদানগী মনাক্কী মফমশিংসি দিল্লীগী খ্বাইদগী চিনবা মফমশিংগী মনুংদা অমনি। মফমসিদা মীয়াম্না অচিনবা ত্রাফিক্কী খুদোংচাদবা চহি চুপ্পা থেংনৈ। আই.তি.ও.গী খাইনফমদা খুদোংচাদবা কয়াম্না লৈ, মসি ঐখোয়না নীংথিনা খঙলবনি।

ঐহাক্কী থৌরম অমা লৈবা খুদিংদা ঐহাক্না ৫০রক খল্লি। মীয়াম্না খুদোংচাদবা থেংনদনবা অয়ুক্কী পুং ৫দগী থোকসিরা নত্রগা অহিং অথেংবদগী থোকসিরা হায়না ঐহাক্কী এস.পি.জি.দা হায়রিবনি। অদুগা মীয়ামদা খুদোংচাদবা পীগদবা লম্বীদা ঐবু পুবীগনু হায়না হায়রিবনি। ঐহাক্না য়ারিবমখৈ মসি থোক্তনবা হোৎনৈ, অদুবু উপাই লৈতবদগী অদুমক চৎলিবনি।

মসিগী কিলোমীতর ১দগী হেন্না শাংবা তন্নেল শারিবা অসিনা ইস্ত দিল্লী, নোইদা অমসুং ঘাজিয়াবাদতগী মাইকৈ অসিদা নুমিৎ খুদিংগী লাকপা মরুপ লিশিং কয়াদা য়াম্না নুংঙাইহল্লগনি। মসিগী ত্রাঞ্জিত কোরিদোর অসিনা মরম ওইরগা দিল্লীগী মীওইশিংগী মতম য়াম্না কল্লগনি, গারীশিংগী থাউ কনবা ঙম্লগনি। হৌজিক ঐহাক্কী ইফমদা প্রজেন্তেসন পীবদা অসুম্না তম্বীরি, পেত্রোল লিতর লাখ ৫৫ কনবা ঙম্লগনি, হায়বদি মীয়ামগী ফুরিৎখাওদা শেল লেম্লগনি হায়বনি।

ঐহাক্না মীওই অমদা লুপা ১০০ পীগনি লাউথোক্লবদি, মদুনা হেদলান অদুম ওই। অদুবু, মহাক্কী লুপা ২০০ কনগদবা করিগুম্বা খুদোংচাবা অমা শীনবা মতমদা মদুনা পাউ ওইদে। মদুদা পোলিতিকেল মাইলেজ লৈতবনা মদুগী কান্নবা থোইদোক্না লৈতে। অদুবু, লৈবাক্কী অফবা তৌগদবা লৈবনা, ঐখোয়না লোকেলগী খুদোংচাবশিংবু পাকথোক চাউথোকহন্দুনা মীয়ামগী খুদোংচাবা হেনগৎহন্নবা অমসুং মখোয়গী অৱাবা পোৎলুম হন্থহনবগী মাইকৈদা ঐখোয়না থবক পায়খৎলি।

হৌজিক্তি, ত্রাফিক জাম হন্থরগনি, দিল্লীগী ইনভাইরনমেন্ত হৌজিক তেক্ত কায়দবা ওইরগনি। মতম অসি শেলনি হায়না মীয়াম্না হায়নৈ। তন্নেল শারবনিনা হৌজিক্তি মতম কল্লগনি, শেল কয়া য়াম্না কল্লগনি হায়বসি অদোম্না খনগদবনি। মতম অসি শেলনি হায়বসি পাউরৌগী ঐনদি য়াম্না চুম্মি, অদুবু ভারত সরকারনা খুদোংচাবা কয়া শীনবদগী মতম কল্লে, শেল কল্লে হায়বসি হায়বীনবা কনামত্তা লৈতে। মসিনা হায়বদি, ঐখোয়গী ৱাখল খনবগী মওং হোংদোকপা তাবনি অমসুং অরিবা মতমগী মিৎয়েংদগী করিগুম্বা অমদা য়েংবগী হৈনবীদগী ঐখোয়না মপান থোক্লকপা তাবনি।

অতোপ্পা খুদম অমনা, কোরিদোর অসিনা মরম ওইরগা হন্থহনবা ঙমগদবা পোল্ল্যুসন অসিনা উ চারা লাখ ৫না পোল্ল্যুসনগী মরী লৈননা তেংবাংবগা মান্নগনি হায়না হৌজিক্তা পিয়ুশ ভাইনা হায়খ্রিবদুনি। মসি হায়রগা মফমসিদা উ থাগনি হায়বা নত্তে। প্রোজেক্ত অসিগা লোয়ননা য়মুনা তোর্বান্দা উ থাবগী থৌরম য়াওবসিদা ঐহাক্না নুংঙাইবা ফাওই। হৌজিক্তি মদুগী থবকসু লোইরে অদুনা শরুক অনি থোক্না কান্নবা ফংলবনি। মাইনা হায়বদি, ঐখোয়গী সরকারনা উ থাবগা লোয়ননা পোল্ল্যুসন য়াম্না থোকহল্লম্বা মরমশিংবু ঐখোয়না তেক্নোলোজী শিজিন্নদুনা কয়া য়াম্না হন্থহনবা ঙমগদগে হায়বগী মাইকৈদা ঐখোয়না লেপ্তনা থবক পায়খৎলি।

ভারতনা পেত্রোলদা ইথানোল ১০% য়ানবগী পানফম হন্দক্তা ফংখ্রে। মসি য়াম্না চাউবা মায় পাকপনি। ভারতকী তঙাই ফদবা ১০%গী ইথানোল অসি চুদগী ফংই, অরেম্বদগী শুংবা ইথানোলনা ঙসিদি ঐখোয়গী গারীশিং চলায়রি। ঐখোয়গী চাউখৎপগী খোঙেজলদা পাঙ্গল হাপ্লি। অদুগা থবক অসি ঐখোয়না পাংথোক্কনি হায়বগী থম্লম্বা পান্দমগী মতমগী মমাংদা পাংথোকপা ঙমখিবনি। থা কয়াগী মমাংদা পাংথোক্লিবনি। পেত্রোলদা ইথানোল য়ানবগী ঐখোয়গী খোঙজংনা পোল্ল্যুসন হন্থহল্লি, ঐখোয়গী লৌমীশিংগী শেন্থোক হেনগৎহনবদা তেংবাংলি। ঐখোয়না প্রেম্বা পোৎলমশিংবু খ্বাইদগী ফবা পোৎলমদা ওন্থোক্লি।

মরুপশিং,

দিল্লী এন.সি.আর.গী শিংনবশিংগী ৱারোইশিন পুরক্নবা ঐখোয়না মমাংগী চহি ৮দা মশক থোকপা খোঙথাং কয়া পায়খৎলি। মমাংগী চহি ৮দা দিল্লী এন.সি.আর.গী মেত্রোগী অশাংবনা কিলোমীতর ১৯৩দগী চাউরাকপা কিলোমীতর ৪০০ য়ৌরে, শরুক অনিদগী হেনখ্রে। ঐহাক্না চত্থোক চৎশিন তৌবদা ঐহাক্কী গারী শিজিন্নবগী ১০% অদু ঐহাক্না মেত্রোদা ওইনা চৎলগে হায়না খনবা মতমদা মেত্রোগী মী চিনবা খরবুদি হেনগৎকনি, অদুবু মসিগুম্বা অপীকপা খোঙথাংনা দিল্লীগী পুন্সি মহিংদা কয়া য়াম্না কান্নবা পীগনি হায়বসি খনবীয়ু। মসিসু খন্ননীংঙাই ওইবা ৱাফম অমনি।

করিগুম্বা মতমদা মীয়াম মরক্তা চৎপগী তোঙানবা নুংঙাইবা অমসু লৈবনি। মদুগী তেল্লবা মিনিৎ ৫-১০গী মতমদা মখোয়গী পুন্সিগী মরমদা খঙবগী তাঞ্জা ফংগনি। মসিনা হায়বদি কান্নবগী কান্নবা ঙাক্তনি হায়বনি। মেত্রোদা পেসেঞ্জর মশিং য়াম্বা মতমদা শেন্মিৎলোন্দসু কান্নবা পীরিবনি। ঐখোয় পুন্না অসুম্না তৌরবদি কান্নবা কয়া য়াম্না ফংগনি। দিল্লী এন.সি.আর.দা মেত্রোগী নেতৱর্ক হেনগৎলকপদগী শোরোক্তা চৎলম্বা গারী লিশিং কয়া হন্থরে। মসি হেন্না হন্থবা য়ারি। মসিনা পোল্ল্যুসন হন্থহনবদা য়াম্না মতেং পাংলি।

ইস্তর্ন অমসুং ৱেস্তর্ন পেরিফরেল এক্সপ্রেসৱেনা দিল্লীদা য়াম্না হেন্না নুংঙাইহল্লবনি। ত্রক লিশিং কয়ানা হকথেংননা মপান্দা লোইনা থোক্নরে। দিল্লীগী ইন্তরস্তেত কন্নেক্তিবিতীগী পাক চাউবা, মশক থোকপা খোঙজেলনা দিল্লীগী শক্তাক অমা ওইরবনি। দিল্লী-মীরত এক্সপ্রেসৱেনা দিল্লী অমসুং মীরতকী অরাপ্পসি শুপ্নগী পুংশিংব খরদা তেনশিনহল্লবনি। হরিদ্বার, রিশিকেশ অমসুং দেহরাদুন চৎপা পাম্লবা মীওইশিংনা মফমশিংসিদা চৎপদা পুং ৯ চঙলম্মি। হৌজিক্তি পুং ৪, মরি মখায়দা য়ৌবা ঙম্লে।

মতমগী পাঙ্গল অসি করিনো, ঐহাক্না হৌজিক কাশী রেলৱে স্তেসন্দা চৎলুবনি। মফমদুগী এম.পি. ওইবনিনা অমসুং মফমদুগী মীয়ামদা খুদোংচাবা থেংনহন্দনবা ঐহাক্তি অহিংগী পুং ১ অদাইদা চৎপনি। স্তেসন্দা চৎলবনিনা করি য়েংসিগে হায়না খনবনি, মীয়ামগী করি খুদোংচাবা লৈবগে য়েংগে খল্লি। মফমদুদা পায়খৎলিবা রেলৱেগী থবকশিং য়েংই, অদুগা ত্রাফিক অমসুং ত্রেনগী মতাংদা ঐহাক্না হংবনি। মফমদুদা বন্দে ভারত ত্রেনগী দিমান্দ য়াম্না লৈ হায়না মখোয়না ঐঙোন্দা হায়। মদুদি খরা তাঙবনি হায়না ঐহাক্না হায়বদা, নত্তে সাহেব, ঙসিদি লাইরবা মীওইনা খ্বাইদগী হেন্না বন্দে ভারত্তা চৎপা পাম্নরে হায়না খুম্মি। মদুগী ভারাদি খরা য়াম্বনি হায়বদা মখোয়সু অঙকপা ফাওই হায়না খুম্লকই। মখোয়না পেসেঞ্জরশিংদা হংবদা, মখোয়না অসুম্না খুম্মি হায়, বন্দে ভারত্তা পোৎ থম্বগী মফম য়াম্না ফংই, ঐখোয়দি লাইরবনিনা চৎপা মতমদা ইশাগী লৈজবা পুম্নমক পুদুনা চৎলি অদুনা বন্দে ভারত্তা পোৎলমখুদিংমক থম্বা চৎলি, অদুনা চৎলিবনি হায়। অদুগা মখোয়না পুং ৪/৫ ঙন্না য়ৌবা ঙম্মি, মদুগী মতমদুদা থবক ফংবা হৌরবদি শেল তানবা ঙন্না হৌবা য়াই হায়না মখোয়না খুম্মি।

মীচম মীয়ামগী ৱাখল্লোন্দা অহোংবা কয়া য়াম্না লাক্লে হায়বা অমুক্তা য়েংবীয়ু। অদুগা বন্দে ভারত পুরক্লে, অতাঙবা ত্রেন অমু পুরক্লে হায়না অরিবা ৱাখল্লোনা হায়রি। মীয়াম্না করি খল্লি হায়বা খঙদ্রবদি করি অহোংবা কালে হায়বসু খঙলরোই। অদুগা হিন্দুস্তানগী মীয়াম্না অহোংবশিংবু করম্না য়াদুনা চৎনরিবগে হায়বসি খঙবদা ঐহাক্না য়াম্না নুংঙাইবা ফাওই। দিল্লী-মুম্বাই এক্সপ্রেসৱে, দিল্লী-দেহরাদুন এক্সপ্রেসৱে, দিল্লী-অমৃতসর এক্সপ্রেসৱে, দিল্লী-চান্দিগর এক্সপ্রেসৱে অমসুং দিল্লী-জয়পুর এক্সপ্রেসৱেনা দিল্লীবু মালেমগী খ্বাইদগী শম্নবা মফম ওইহনবা ঙমগনি অমসুং থবকশিং অসি লোইশিল্লকপা মতমদা শোইদনা ওইরগনি। লৈবাক্কী মশাগী তেক্নোলোজীনা শাজবা খ্বাইদগী অহানবা স্পীদ রেল হৌজিক দিল্লীদগী মীরত ফাওবা চেলহন্নবা শেম শারি। হরিয়ানা অমসুং রাজস্থানবু দিল্লীগা শম্নহন্নবা মসিগুম্বা স্পীদ ত্রেন অমগী থবকসু পায়খৎলি। প্রোজেক্তশিং অসিনা মপুং ফারকপা মতমদা লৈবাক্কী কোনুং অমা ওইনা দিল্লীগী শক্তাক য়াম্না হেন্না ফজরগনি। মসিগী কান্নবদি দিল্লী এন.সি.আর.দা লৈরিবা প্রোফেস্নেল, ঐখোয়গী নহারোল, মহৈরৈ, স্কুল চৎলিবা অঙাং, ওফিস চৎপা মীওই, তেক্সী-ওতো থৌরিবা ঐখোয়গী মরুপ, কারনার তৌবা মীওই, দুকান মচা ফম্লিবা মীওইশিংনা ফংগনি। খুন্নাইগী মীওই খুদিংনা কান্নবা ফংগনি।

মরুপশিং,

পি.এম. গতিশক্তী নেস্নেল মাস্তর প্লানগী পান্দমগী মখা পোন্না লৈবাক অসিনা মলতিমোদেল কন্নেক্তিবিতী শেম্লি। হন্দক্তা ধরমসালাদা পাংথোকখিবা চীফ সেক্রেতরী কনফরেন্সতা মহাক্কী মফমদা রাজ্যশিংনা গতিশক্তি য়াবগী ৱাফম পাউদম্লকখিবগী মতুং ইন্না ঐহাক্না য়াম্না নুংঙাইবা ফাওই। মখোয়না হায়বদা থবক অমা পাংথোকপদা থা ৬ চঙলম্বা অদু, গতিশক্তিগী তেক্নিকেলগী খুদোংচাবা, তেংবাংনবা অমসুং প্রোজেক্ত ফোর এন্তর এপ্রোচকী মরমদগী নুমিৎ ৬নিদা পাংথোকপা ঙম্লে। গতিশক্তি নেস্নেল মাস্তর প্লান অসিদি সবকা বিশ্বাস অমসুং সবকা প্রয়াসকী পাম্বৈ ওইরবনি। প্রোজেক্ত অমত্তা পল্লগা লৈত্রে, বিভাগ খুদিংনা নীংথিনা পাউ ফাওনরি, বিভাগকী মীওই খুদিংদা প্রোজেক্তকী ই-পাউ লোইনা লৈনরে। ফিভম অসিমক লাকহন্নবগীদমক্তা গতিশক্তি হৌদোকখিবনি। সবকা প্রয়াসকী অসিগুম্বা ৱাখল্লোন অসিনা অর্বান দিভেলপমেন্ততা মশক থোক্না তেংবাংগনি। নীংতম্বগী অমৃত কাল অসিদা লৈবাক্কী তাইয়র ২ অমসুং ৩গী হেন্না ফবা প্লান্নিংগা লোয়ননা থবক তৌদুনা অমসুং লৈবাক্কী মেত্রো শহরশিংগী স্কোপ পাকথোক চাউথোকপগী তঙাই ফদবা চাউনা লৈরে। লাক্কদৌরিবা চহি ২৫দা ভারতনা হীরম খুদিংদা চাউখৎপা পুরক্নবগীদমক্তা ঐখোয়না গ্রীন, ক্লীন অমসুং ফ্রেন্দলী ওইবা শহরগী মথৌ তাই। ঐখোয়না অর্বানাইজেসনবু শিংনবগী মহুত্তা খুদোংচাবা ওইনা লৌরবদি, মসিনা লৈবাক চাউখৎপদা শরুক য়াম্না তেংবাংগনি।

মরুপশিং,

শহরগী লাইরবদগী হৌদুনা শহরগী মিদ্দল ক্লাস খুদিংগী হেন্না ফবা খুদোংচাবা লৈহন্নবা ঐখোয়না খোঙজেল য়াঙনা থবক পায়খৎলি। মমাংগী চহি ৮দা মমাংগী চহি ৮দা, শহরগী লাইরবা মীওই করোর ১গা লাখ ৭০ হেনবগী য়ুম শোইদনবা শীনখ্রে। মিদ্দল ক্লাস ইমুং লাখ কয়াদা মশাগী য়ুম শাবদা তেংবাংখ্রে। করিগুম্বা মিৎয়েং চঙলিবসি শহরশিংগী মতমগা চুনবা পব্লিক ত্রান্সপোর্ত্তা চঙলকপদা সি.এন.জি.দা য়ুম্ফম ওইবা মোবিলিতী অমসুং ইলেক্ত্রিক মোবিলিতীদা হেন্না অহানবা মিৎয়েং থম্লক্কনি। কেন্দ্র সরকারগী ফেম স্কিম্না মসিগী খ্বাইদগী নীংথিবা খুদম্নি। য়োজনা অসিগী মখাদা, দিল্লী য়াওনা লৈবাক্কী শহর দর্জন কয়াদা ইলেক্ত্রিক বসকী ফ্লীত শেম্বগী থবক পায়খৎলি। নুমিৎ খরনিগী মমাংদা দিল্লীদা স্কিম অসিগী মখাদা অনৌবা বস খরা চেনবসু হৌখ্রে। মসিনা লাইরবা অমসুং মিদ্দল ক্লাসকী মীওইশিংদা খুদোংচাবা কয়া পীগনি অমসুং পোল্ল্যুসনগী শিংনবসু য়াম্না হনথহনগনি।

পুন্সি লাইথোকহন্নবা তেক্নোলোজী শিজিন্নবগী ৱারেপ অসি মপাঙ্গল হেন্না হেন্না লৈখৎলকপা ওইরসনু। অদুগা, তন্নেল অসি য়েংনবগীদমক্তা ঐহাক্কীদমক্তা হাংদোকপা জীপ অমা শেম-শারম্মি। ঐহাকসু কাঙলোন, আইন অমসুং দিসিপ্লিনগী মখা পোন্না মতেক অমা জীপ্তা চৎলি, অদুদগীদি অদুমক কুমথরে। ঐহাক্না মফমসিদা য়ৌরকপদা মিনিৎ ১০-১৫ থেংখ্রিবা অদুসু মসিনা মরম ওইরগনি। ঐহাক্না খোঙনা চৎপগীনি। নাকলদা য়েক্লিবা আর্তকী থবকশিংবু নীংথিনা য়েংবা পাম্বদগী ঐহাক্না খোঙনা চৎপনি। লাই অমমম নীংথিনা য়েংদুনা চৎপনি। চহিগী কুম খুদিংমক লাইসিদা য়াওই হায়না পিয়ুশজীনা হায়বীখ্রে। অদুবু মসিগী মথক্তা মখোয়না ভেল্যু এদিসন ওইনা হাপ্লিবা থৌওং কয়াদু য়াম্না ফজৈ, পুম্নমকপু নৌথোকহল্লি।

ঐহাক্না তন্নেল য়েংবা মতমদা মসিনা এক ভারত শ্রেস্থ ভারতকী মতি চারবা এজুকেসন সেন্তর অমা ওই হায়না ঐহাক্না খল্লি। মালেমদা কদাইদা করি লৈবগে হায়বা ঐহাক খঙদ্রবসু, তনেল অসি য়েংলুবা মতমদা তন্নেল অমগী মনুংদা লৈবা অসুক য়াম্না শাংবা আর্ত গেলরী অমত্তনা মসিদগী হেন্না শাংলম্লোই হায়না ঐহাক্না খল্লি। ভারতপু অকুপ্পা মিৎয়েংদগী করিগুম্বা খঙবা পাম্লবদি, ভারতকী দাইভর্সিতী, থৱাই য়াওবগী মতৌ নীংথিনা খঙবা পাম্লবদি তন্নেল অসিদা চৎপদা খঙবা ঙমগনি। মীরম মচা ওইরবসু মখোয়না নাগালেন্দ করম্না তৌই, কশ্মির করম্না তৌই অমসুং ভারতকী তোঙানবা মওং-মতৌ কয়া খঙবা ঙমগনি। পুম্নমক অসি খুৎনা য়েক্তুনা শেম-শাবা থবক ঙাক্তনি।

পুম্নমক অসি য়েংলুরবা মতুংদা ঐহাক্না হৌজিক ফাওবদা ৱাফম কয়া থমবসিদা ওন্ন-তৈনবা অমদি হায়জগে। অখঙ-অহৈশিংনা ঐহাক্কী ৱাফম অসিদা করি হায়গনি হায়বা ঐহাক খঙদে। ঐহাক্না হায়নীংবদি, নোংমাইজিং নুমিত্তা ত্রাফিক খরা কোম্মিকো, নুমিৎসিদা তন্নেল অসিবু শাখিবগী পান্দমগী মাইয়োক্তা পুং ৪-৬ মুক থিংদুনা স্কুলগী অঙাংসিংবু খোঙ লম্বীদা চৎহন্দুনা আর্ত গেল্লরী অসি য়েংহনবা য়াগদরা হায়বসিনি। মসি য়াম্না কান্নগনি হায়না ঐহাক্না খল্লি। অদুগা ঐহাক্না ফোরেন এফিয়র্স মন্ত্রালয়দা হায়নীংবদি, ঐখোয়গী লমদা লাকপা এম্বেসেদর ওইরো, মখোয়গী মিসনগী মীওইশিং ওইরো, তন্নেল অসিগী খোঙনা চৎপা তুর অমত্তা শীনবীয়ু। গান্ধীজী লাক্লে, মসিনা ভগবান কৃষ্ণগা মরী লৈনবা থবক্নি অমসুং অসমগী নাৎকী জগোইনা অসুম্না তৌই হায়বনচিংবা কয়া মখোয়না খঙবা ঙমগনি। মসিগা লোয়ননা, ফোতো পাইলোত অমসুং ফোনগী খুত্থাংদা লমজিং লমতাকপগী থৌওংসু তেক্নোলোজী শিজিন্নদুনা পাংথোকপা য়াগনি। অদুগা শেল য়ামদবা ওইরবসু, তিকেত কক্লগা মীয়াম থাজিল্লবদি, অরেম্বা মীওই লাকপগী মতৌসু হন্থগনি অদুগা অচুম্বা মওংদা শিজিন্নবসু য়াগনি। ঐহাক্তি অচুম্বা ঙাঙবনি মরুপশিং, ঐহাক্তি অসিগুম্বা খুদোংচাবসু কয়া ফংদে, অদুবু ফংলবদি লেপ্তবনি, অদুনা ঙসিদি য়েংবা য়াবসিদা কুমথরগা লোইনা য়েংথোকপনি। তসেংবনি, আর্তপু য়াম্না পামজবা মীওইশিংগী ওইনা তন্নেল অসি য়াম্না চুনবা মফম অমনি। চয়োল অমগী মনুংদা ত্রাফিক খরা হন্থবা নুমিৎ অমদা, মদুনা নোংমাইজিং ওইরবসু য়াই, নোংমগী পুং ৪-৬ খোঙনা চৎহনবগী খোঙজং অমা ওইনা পাংথোকপা য়াবরা খল্লি, ভি.আই.পি. মীওইশিংসু মখোঙনা চৎলগনি। পার্লিয়ামেন্ত হৌবা মতমদা এম.পি.শিংদা ঐহাক্না মখোয়না মশাগী ইমুং মনুংদা থৌরাং য়াৎপা লৈরবদি, ম্ফমসিদা লাকতুনা খোঙনা ঙৈহাক চৎপীয়ু হায়গনি। অদুগা মসিগী থবক অসি হৌদোক্কে হায়রবদি, মিদিয়াগী আর্ত ক্রিতিক রাইতরশিংগা লোয়ননা নোংমগী ওইবা অখন্নবা থৌরম অমা পাংথোকপা য়াই। মখোয়না অফবতা ইগনি হায়বগী ঐহাক্না থাজবা থম্মি। ৱাফমশিং অসিবু মীয়ামদা য়ৌহন্নবগীদমক্তা অফবা থবক অমা পাংথোকপা ওইগনি। ঐখোয়না মসিগী খুদোংচাবা লৌফম থোকই।

মরুপশিং,

দিল্লীগী অকোইবদা শেমগৎ-শাগৎলিবা কন্নেক্তিবিতী, মসি চত্থোক চৎশিনগী খুদোংচাবা খক নত্তে হায়না ঐখোয়না খল্লোইসি। দিল্লী-নোইদা-ঘাজিয়াবাদকী মীয়াম্না ফংলিবা খুদোংচাবশিং অসিগী মথক্তা, মসিনা অর্বান বর্দেন কয়া অমসু হন্থহল্লিবনি। মখোয়না চত্থোক চৎশিন তৌবদা লাইরবনিনা দিল্লীদা অসুক য়াম্না তাঙনা লৈবগী মহুত্তা ঐহাক ঘাজিয়াবাদতা লৈরগে, মীরত্তা লৈরগে, তঙাই ফদবা মতমগা চৎলগে হায়না খনবসু য়াই। মমাংগী মতমগা হায়নরুবা মতমদা হৌজিক্তি শুপ্নগী পুংখাইদা য়ৌবা য়ারে, মসিনা হায়বদি অর্বান বর্দন হন্থহন্নবা মসিগুম্বা কন্নেক্তিবিতীনা নীংথিনা তেংবাংলি হায়বনি। মসিগী ম্থক্তা ভারতনা সরকারনা মসিদা শেল কয়া অমা থদরি, মসিনা দিল্লীগী পোৎলুম হন্থহনবদা অচৌবা মতেং পাংলি।

মরুপশিং,

ঙসিগী মফমসিদা লাক্লিবা মীওইশিংনা, করিগুম্বা ত্রাফিক হাংদোক্ত্রিবা ওইরগদি, খোঙনা ঙৈহাক চৎলগা য়েংবীয়ু, অমসুং ঐহাক্কী ৱাফমসিদা করিগুম্বা লৌশিনবা য়াবা য়াওরগদি, অদোমসু পাউ অসি শন্দোকপীয়ু, অতোপ্পা ইথিল পীবিয়ু হায়না হায়জনীংই। ঐহাক্না মসিমক বিভাগশিং অমসুং সরকারগী থৌমী খুদিংগী মফমদা হায়গনি। অদোমসু অমুক্তা খন্থবীয়ু।

অদোম্বু হন্না হন্না থাগৎচরি, অদুগা খ্বাই পুম্নমকপু ঐহাক্না য়াইফ অয়াউজেল পীজরি।

*****