ভারত ইমানা য়াইফরে – ভারত ইমানা য়াইফরে, গুজরাতকী মমিং লৈরবা মৃদু অমসুং মক্কম মুখ্য মন্ত্রী, শ্রী ভুপেন্দ্র ভাই, ঐহাক্কী পার্লিয়ামেন্ত মরুপ, সি.আর. পতেল, কেন্দ্রগী মন্ত্রী মন্দলদা লোইরিবা ঐহাক্কী মরুপ, দেবু সিংহ, ইচল দর্শনা, গুজরাত সরকারগী মন্ত্রী পুম্নমক, এম.পি., এম.এল.এ., বদোদরাগীতা নত্তনা অনন্দ, ছোতা উদয়পুর, খেরা অমসুং পঞ্চমহল জিলাদগী মশিং য়াম্না লেংবীরক্লিবা মীয়াম, মরু ওইনা ইমা-ইবেল অমসুং ইচে-ইচলশিং!

ঙসিগী থৌরম অসি ঐহাক্কী ওইনা মাত্রিবন্দনা ওইবা থৌরম্নি। ঙসি, অয়ুকসিদি ঐখোয়বু পোকপীবা ইমাগী থৌজাল, মসিগী মতুংদা জগৎ জননী ইমা কালীগী থৌজাল, অমসুং ইমাগী শক্তিগী মশকপু লাৎচদুনা মহাক্কী থৌজালগীদমক্নি। ঙসি ঐহাক্না পৱাগরদা ইমা কালীগী ভক্তশিংগী তোঙান-তোঙানবা খুদোংচাবা কয়া পীবগী তাঞ্জা ফংজখ্রে। ঐহাক্না ইমাগী মফমদগী লৈবাক অমসুং লৈবাক মীয়ামগী নুংঙাই য়াইফবা অমসুং অনীংবা অপাম্বা থুংহনবীয়ু হায়বা থৌজাল নীজরক্লে।

ইচিল ইনাওশিং,

সংস্কারী নগরী বদোদরাদা ঙসি লুপা করোর লিশিং ২১গী চাউখৎ-থৌরাংগী প্রোজেক্ত কয়া শঙ্গাবগা লোয়ননা উরেপ উয়ুং তম্বসিদা ঐহাক্না য়াম্না নুংঙাইবা ফাওই। প্রোজেক্তশিং অসি ভারত, গুজরাতকী চাউখৎ-থৌরাংদা য়াম্না তেংবাংগনি। লাইরবশিংগী ময়ুম, অৱাংবা থাক্কী মহৈ-মশিং, অমসুং অফবা কন্নেক্তিবিতীদা য়াম্না চাউনা ইনভেস্ত তৌবসিনা গুজরাতকী ইন্দস্ত্রীশিংবু হেন্না চাউখৎহনগনি, মফমসিগী নহারোলশিংগী থবক্কী মশিং থীঙমদ্রবা খুদোংচাবা কয়া পীগনি। প্রোজেক্তশিং অসিদগী অয়াম্বদি ঐখোয়গী ইচে-ইচল, ইমা-ইবেলশিংগী হকশেল, ন্যুত্রিসন অমসুং মপাঙ্গল হাপ্পগা মরী লৈনবনা অয়াম্বনি। ঙসি, মশিং য়াম্লবা ইমা-ইবেল, ইচেল-ইচলশিংনা ঐহাকপু থৌজাল পীনবা লাকপীরি। ঐহাক্না গুজরাত সরকার, ভুপেন্দ্র ভাই অমসুং বি.জে.পি.গী প্রসিদেন্তপু অখন্ননা থাগৎপা ফোংদোক্নিংই। মরমদি, মখোয়না ঐহাকপু অদোমগী মরক্তা পুবীরি। মফমদুদগী সিদা গারিদা লাকপদা চাউরাক্না মিনিৎ ১৫-২০ চঙখ্রে। খোঙনা লাক্লম্মবদি মতম কয়া য়াম্না চঙলমগনি হায়বা ঙমদ্রে। য়াম্লবা মীয়াম মরক্তা ঐহাক্না থোক্লকপদা থেংনরকপা ঐহাক্না মতম শাংনা থবক তৌমিন্নরম্বা মখোয় ময়ম্বু ঐহাক্না নোল্লুকচবগী তাঞ্জা ফংজরকখি। ঐহাক্না মখুৎ পায়রগা চৎলকপা সেনিয়র ওইরবা কার্য়কার্তা খরসু ঐহাক্না উবা ফংলকখি। ঐহাক্না মখুত্তগী তল চাবা ফংজরকখিবা ইমা কয়াবুসু ঐহাক্না খুরুমজরম্লে। অসুক য়াম্লবা মীওইশিংগা উন্নবা, মখোয়দগী থৌজাল ফংবসিদগী হেন্না নুংঙাইবা অমত্তা লৈত্রে। মরম অদুনা, গুজরাত লমদম্বু, ভুপেন্দ্র ভাই পতেলজীবু অমসুং সরকারবু ঐহাক্না থম্মোই শেংনা নোল্লুকচরি। হৌখিবা চহি ৮দগী দবল ইঞ্জিন সরকারনা নারী শক্তিবু ভারতকী পাঙ্গলগী য়ুম্ফম ওইহন্নবা হোৎনদুনা লাক্লি, অদুগা ঙসিদি ইমা কলিকাগী থৌজালদগী মখোয়না গুজরাত্তা অনৌবা পাঙ্গল ফংলে। ঐহাক্না ইচে-ইচল খুদিং, বেনিফিশরী খুদিংবু হন্না হন্না থাগৎচরি।

মরুপশিং,

২১সুবা চহি-চাগী ভারতনা খোঙজেল য়াঙনা চাউখৎপদা নুপীশিংগীনা খোঙজেল য়াঙনা চাউখৎপা, মখোয়গী মপাঙ্গল হাপ্পগী মথৌ য়াম্না তাই। ঙসিদি, ভারতকী নুপীশিংগী তঙাই ফদবশিং, অনীংবা-অপাম্বশিংবু খন্নরবা মতুংদা মখোয়গীদমক্তা স্কিম কয়া সরকারনা শেম্লি। লান্মীদগী হৌরগা মাইন ফাওবদা নুপীশিংনা অপাম্বা থবক খন্দুনা তৌবা য়াহন্নবা সরকারনা থোঙ কয়া হাংবীরে। মখোয়না থোঙশিংদা চত্তুনা থীনবা ঙম্নবা ফিভম ঐখোয়না শেম শারবনি। ঐখোয়না নুপীশিংগী পুন্সিগী তাঙ্কক খুদিং খঙদুনা স্কিম শেম্লি, মখোয়গী পুন্সি মহিং লাইহন্নবা, মখোয়গী খুদোংচাদবা কয়া হন্থহন্নবা, মাংজিল থানা চৎপা ঙম্নবা অরৈবা খুদোংচাবা খুদিং ফংহন্নবা থৌওংশিংদা ঐখোয়গী সরকারনা অহানবা মিৎয়েং চঙলি। অদোম ইমা-ইবেল, ইচে-ইচলশিংগী তেংবাংবা ঙম্বসি ঐহাক্কী লাইবক দবনি হায়না খল্লি। ঐহাক্না বদোদরা অমসুং অনকপা মফমগী ইচেল-ইচল, ইমা কয়াবু অমুক্কা হন্না কোক নোঞ্জরি। শহরশিংনা ঐহাকপু মতম অমদা শেন্নবীরম্বনি। ঐহাকপু য়োকপীখিবনি। বদোদরা অসি মাত্রিশক্তিগী নুংঙাইবা ফোংদোকপগী খ্বাইদগী চুনবা শহরনি, মরমদি মহাক্না ঐখোয়দা মমানা পীবগুম্না সংস্কার পীবিরি, বদোদরাদি সংস্কারী শহরনি। শহরসিনা মফমসিদা লাকপা মীওই খুদিংবু শেন্নবী, অৱা-নুংঙাইদা মখোয়গীদমক্তা লেপ্পী অমসুং চাউখৎনবা খুদোংচাবসু পীবি। শহরসিদা, বরোদাদা লাকপদা থাইনগী ৱারী কয়া নীংশিংলকই, অঙাং অমবু মমানা নুংশিবীবগী মতৌগুম্না ফাওই। চাউখৎ খোংথাংগী খোঙচত্তা বরোদানা তমখিবা শরুকশিংবু ঐহাক্না কৈদৌনুংদা কাওবা ঙম্লোই। শহর অসিদি ইথিল পীবা শহরনি, শহরসিনা স্বামী বিবেকানন্দা, মহাঋশি অর্বিন্দ, বিনোবা ভাবে অমসুং বাবাসাহেব অম্বেদকরগুম্বা শক্নাইরবা মীওই কয়াদা ইথিল পীখিবনি। অদোমসু নীংশিংলমগনি, ঐহাক্তি য়াম্না ময়েক শেংনা নীংশিংলি। বেলুর মথকী প্রসিদেন্তনা ঐহাক্কী তীনেজ মতমদা লমজিং লমতাকপীখি অমসুং ঐহাক্কী পুন্সিবু শেম্বদা মহাক্না গুরু অমগী থৌদাং লৌখিবনি। বেলুর মথ, রামকৃষ্ণ মিসন মথকী প্রসিদেন্ত স্বামী আত্মাস্থানন্দজী য়াওবা থৌরমদা ঐহাক্না বদোদরাগী দিলারাম বঙ্গলো রামকৃষ্ণ মিসনবু খুৎশিন্নবগী খুদোংচাবা ফংখিবনি। ঐখোয়গী অরিবা শাস্ত্রী পোল, রাউপুরা অমসুং ঐখোয়গী আরাধনা সিনেমাগী মনাক্তা লৈবা পঞ্চমুখী হনুমান, নীংশিংবা য়াবা ৱারী কয়া অমা অমসুং মীওই কয়া অমগা উন্নখিবনি। পঞ্চমহল, কালোল, হালোল, গোধ্রা দাভোই, ছোতা উদয়পুর। মশিং থীববু ঙমদ্রেদা, অদুগা থাইনগী মরুপ ম্যাম্বু অমুক্কা হন্না নীংশিংলক্লে। অদুগা বরোদাগী মতাং লাক্লগবু হরা চিবরা অমসুং মহাক্কী ভাখরৱারী করম্না কাওগনি, বরোদা খঙবা মীওইশিংগা ঐহাক্না মপান্দা উন্নবা মতম খুদিংগী হায়রিবশিং অসি অদুমক নীংশিংই।

মরুপশিং,

ইং ২০১৪দা ঐহাক্না পুন্সিগী অহানবা ওইনা লোক সভাগী মীখল থেংনবদা, লৈবাক সেবা তৌবগী ইশাগী থৌদাং পাংথোকপগীদমক্তা ঐহাক্না বদোদরাগী নবনাথ অমসুং কাশী বিশ্বানাথ অনিমক্কী থৌজাল ফংজখি, মসিদগী হেন্না লাইবক ফবা করি ওইগনি? ঙসিদি, ঐহাক্কী মিৎয়েংদগী য়েংবদা গুজরাতকী ইচে-ইচলশিংগী য়াম্না অখন্নবা নুমিৎ অমনি। মমা ওইবী অমসুং অঙাংগী হকশেল ফহন্নবগীদমক্তা গুজরাত সরকারনা ঙসি অচৌবা স্কিম অনি হৌদোক্লি। স্কিম অসিগীদমক্তা ঐহাক্না শ্রী ভুপেন্দ্র ভাইবু থাগৎচরি। লুপা করোর ৮০০গী মুখ্য মন্ত্রী মাত্রিশক্তি য়োজনানা মীরোল্লিঙৈ অমসুং অঙাং শঙ্গোম পীথকপা হৌরকপা মতমশিংদা মমাদা মচি লৈবা চিঞ্জাক ফংহন্নবগীদমক্তা ন্যুত্রিসন হেনগৎহন্নবা স্কিমসু হৌজিক গুজরাতকী ত্রাইবেলগী মফমশিংদসু য়ৌহল্লগনি। হৌজিক, ঐহাক্না বেনিফিশরী ওইবা ইচে-ইচল করোর লাখ অমগা মখায় হেনবদা (পুন্না করোর ১গা লাখ ৩৬ বেনিফিশরী) লুপা করোর ১১৮ হেন্না য়েন্থোকপগী খুদোংচাবা ফংজরে। মমা হেক ওইবদগী অহানবা নুমিৎ ১০০০দা মমা অমসুং অঙাংগী তুংগী পুন্সি লেপ্পি। মমা অমসুং মচাগীদমক্তা খনবা। মেলন্যুত্রিসন অমসুং এনেমিয়াগী শিংনবা, মসিনা হৌজিক মতমগী খ্বাইদগী চাউবা শিংনবা ওইরি। গুজরাতনা ঐহাক্কী ইফমদগী সেবা তৌনবা চহি ২গী মমাংদা খুদোংচাবা পীখিবা মতমদা মেলন্যুত্রিসন্না য়াম্না চাউবা শিংনবা অমা ওইরম্মি। মদুদগী ঐখোয়না মাইকৈ খুদিংদা থবক তৌবা হৌখি, মসিগী মহৈ ঐখোয়না ঙসি উবা ফংলে। ঙসিদগী হৌনা গুজরাতকী ইচে-ইচলশিংগীদমক্তা মুখ্য মন্ত্রী মাত্রিশক্তি য়োজনা হৌদোক্লে। মসিনা মমা ওইবা ফংলবী ইচলশিংদা কান্নবা য়াম্না পীগনি। য়োজনা অসিগী মখাদা প্রোতিনগীদমক্তা য়াম্না তঙাই ফদবা চানা কিলো ২, তুবর দাল কিলো ১ পীগনি। মসিনা মরম ওইরগা ঐখোয়না নীংথিনা খন্নরবা তুংদা স্কিম অসি শেম্বনি। মসিগী মথক্তা থাউ লিতর ১সু পীগনি। হায়রিবশিংসি ইচলশিংদা শোইদনা পীগনি। মসিদা নত্তনা, কোরোনাগী মনুংদা ঐহাক্না থবক অমা হৌদোকখি। লৈবাক্কী লাইরবশিংগী চাকখুম মৈ মুত্তনবা লৈবাক্কী মীওই করোর ৮০দা চেং হৱাই লেম্না পীথোকখি। মখোয়না হায়রিবসি ঙসিসু ফংলি। মীওই করোর ৮০দা চহি ২ চুপ্না লেম্না চেং পীবদা মালেমগী মীওই খুদিংনা অঙকপা ফাওনরিবনি।স্কিম অসিনা মমা অমসুং মচাশিংবু এনেমিয়া অমসুং মেলন্যুত্রিসন্দগী কনবদা য়াম্না চাউনা মতেং পাংগনি। ঙসিদি য়াম্না অফবা থবক অমা হৌদোক্লে অমসুং শ্রী ভুপেন্দ্র ভাইগী লুচিং মখাদা পোকপদা ঙাইরিবা অঙাংশিংবু তেংবাংবগী খুদোংচাবা ফংজরে। ঐখোয়গী ছোতা উদয়পুর, ঐখোয়গী কৱাৎ, ঐখোয়গী ত্রাইবেলগী মফম খুদিং, পুম্নমক ঐখোয়গী ইমুং মনুংনি। ঐহাক্না মখোয়গী মরক্তা থবক তৌবা ফংবসি য়াম্না লাইবক ফবনি, ঐহাক্না মখোয়গী খুদোংচাদবা খুদিংবু য়াম্না নক্না উরে। ত্রাইবেলগী মফম কয়াগী ঐখোয়গী ইচে-ইচলশিংবু সিক্কলসেলদগী ঙাকথোক্নবগীদমক্তা ঐখোয়না সিক্কলসেল সোসাইতী শেম্লি। মসিদগী ঙাকথোক্নবা চাউরবা খোঙথাং কয়া পায়খৎলি। হায়রিবা লাইনা অসি ঐখোয়গী সরকার শেম্লবা তুংদা লাকখিবা নত্তে, মসিদি চহি কয়াদগী লৈরক্লবনি। সরকার কয়া অমা লাকখ্রে, অদুবু মখোয়না করিসু তৌরমদে। মসিগী অৱাবা মাইয়োক্নবা ঐখোয়না থৌদাং লৌখি। জিলা খুদিংদা অখন্নবা সেন্তর শেমখি, ত্রাইবেল ইচিল ইনাও কয়াগী তেস্ত তৌখি। অসিগুম্বা মায় পাকপা প্রোগ্রাম পাংথোকপগীদমক্তা ঐহাক্কী গুজরাত সরকারনা প্রধান মন্ত্রী সিভিল সেবাগী মনাসু ফংখিবনি। গুজরাতনা ন্যুত্রিসন্দা মমাংদগী হৌনা অহেনবা মিৎয়েং চঙদুনা লাকখি। ঐখোয়গী গুজরাতকী শঙ্গোম সঞ্জীবনী, ফোর্তিফাই তৌরবা থুম, তেক হোম রাসন, পোশন সমবাদনচিংবা থৌরম কয়া পাংথোক্লি অমসুং লৈবাকপুসু অনৌবা মাইকৈ তাক্লি। মসিগুম্বা স্কিমগী বেনিফিশরী ইচে-ইচলগী মশিংনা নোংম-নোংমগী হেনগৎলক্তুনা চাউরাক্না ইচে-ইচল লাখ ৫৮না স্কিমসিগী কান্নবা ফংনখ্রে। শঙ্গোম সঞ্জীবনী স্কিম্না ত্রাইবেল মফমগী থা ৬তগী চহি ৬ ফাওবগী অঙাংগী তঙাই ফদবশিং অমসুং ফোর্তিফাই তৌবগীদমক্তা ৱাবীরি। মীরোনবী অমসুং শঙ্গোম পীথক্লিবী মমা লাখ ২০গী ফোর্তিফাই তৌরবা থুমগীদমকসু মসিনা ৱাবীরি। মসিনা হায়বদি, মচি ওইবা চিঞ্জাক মপুং ওইনা ফংহন্নবগীদমক্তা পাংথোকফম থোকপা থবক খুদিংমক ঐখোয়না তোঙান-তোঙানবা স্কিম কয়া শেমদুনা পায়খৎলি হায়বনি। পোশন সুধা য়োজনা হায়বসি মাইকৈ অসিদা পায়খৎপা অখন্নবা খোঙথাং অমনি। চহি ৪-৫গী মমাংদা, দাহোর, বলসার, মহিসাগর, ছোতা উদয়পুর অমসুং নর্মদাগী ত্রাইবেল মফমগী ব্লোক খরদা পোশন সুধা য়োজনা হৌদোকখিবনি। হৌখিবা চহিশিংদা মসিগী মশক থোকপা কান্নবা কয়া ত্রাইবেল ইচেল-ইচল অমসুং অঙাংশিংগী মফমদা উবা ফংবদগী মসিবু ত্রাইবেল মফম খুদিংদা শন্দোকহনখি। মসিদগী থা খুদিংগী চাউরাক্না ত্রাইবেল ইমা, ইচল লাখ ১গা লিশিং ৩৬না কান্নবা ফংলি। য়োজনা অসিগী মখাদা মীরোনবী অমসুং শঙ্গোম পীথক্লিবী মমাশিংবু আঙ্গনৱারীদা ফোংবা শাবা চাক অমুক্লক, আইরন অমসুং কেলসিয়মগী গুলি পীগনি। ঐখোয়না পোশনগী স্কিম শেম্বতা নত্তনা খুদোংচাবা কয়াবু বেনিফিশরী ইচেল-ইচল অমসুং ইমা-ইবেলশিংগী মফমদা য়ৌরিবরা হায়বগী মতাংদসু ৱারিবনি। ঐহাক্না গুজরাতকী মুখ্য মন্ত্রী অমা ওইনা তেক্নোলোজী শিজিন্নবগী খুদোংচাবা ফংখি। মতমদুদা, মমতা পোর্তেল হৌদোকখি অমসুং মমাংগী চহি ৮দা আঙ্গনৱারীশিংদা খুৎলায় লাখ ১২ য়ৌহনখি। গুজরাতকী মনুংদসু ইচেল-ইচল লিশিং কয়াদা শিজিন্ননবা খুৎলায় কয়া পীখি। 

মসিগী মখাদা, গুজরাত য়াওনা লৈবাক পুম্বগী বেনিফিশরী ইচল-অঙাং চাউরাকপা করোর ১১ মখায়গী হকশেলগী ফিভম্বু রিএল তাইমদা মোনিতর তৌরি। পোশন সুধা য়োজনা হৌদোক্লিবা অসিবু য়েংশিন্নবা মোবাইল এপ শেম্লে। গুজরাতকী মায় পাক্লবা থৌওংশিংবু খুদম ওইনা থমদুনা লৈবাক অসিদা মেলন্যুত্রিসন অমসুং এনেমিয়াগী মাইয়োক্তা খোঙথাং কয়া অমা পায়খৎলি। খ্বাইদগী অহানবা ওইনা, গুজরাতকী সাৱন-ভাদো থা ওইরিবা সেপ্তেম্বর থাবু পোশন মাহ হায়না পাংথোক্নবা ৱারেপ লৌখি। খোঙথাং অসিদগী গুজরাতকী ইচে-ইচলশিংদা কান্নবা য়াম্না ফংলি। পোশনগী ৱাহন্থোক অসি চাবা থকপা খক্তা নত্তে, মসিগী চুনবা অকোয়বগী ফিভম অমা লৈহনবা, অচৌবা অমসুং অপীকপা খুদোংচাবা পুম্নমক, স্বচ্ছ ভারত অভিয়ান, য়ুম্থোং খুদিংগী অমাংশঙ লৈবা, হায়রিবশিং অসি ইমা অমসুং ইচে-ইচল কয়াগী হকশেল ফনা লৈহন্নবা পাম্বৈ অমসু ওইরবনি। মসিগী মথক্তা উজ্বালা য়োজনা, গ্যাস কন্নেক্সন লেম্না পীবসু য়াওরি। য়ুমদা মৈখু খুবদগী অনা অয়েক থোক্লক্কদববু থিংনবা ঐখোয়না খোঙথাং পায়খৎখি।

ইমুং লাখ ৩৬ হেনবদা উজ্বালা য়োজনাগী মখাদা লেম্না গ্যাস কন্নেক্সন ফংহনখি। য়ুম্থোং খুদিংদা তোতি ঈশিং ফংহনখি। ঐখোয়গী ইমাশিংগী কোকথক্তগী ঈশিং চফু থাংথবগী লাইবক ফবসু ঐখোয়না ফংজখি। ঐখোয়না তোতি পাইপকী খুত্থাংদা ঈশিং ফংহন্নবা থৌদাং লৌখি। ইমা, ইচে-ইচলশিংগী খুদোংচাদবা কয়া হন্থহন্নবা, শেংদবা ঈশিংদগী নীংতম্বা ফংনবা থবক পায়খৎখি, অফবা ঈশিং ফংলবদি অনা অয়েক্কী চাংসু হন্থরে। পি.এম. মাতু বন্দনা য়োজনাগী মখাদা গুজরাত য়াওনা লৈবাক পুম্বগী ইমা করোর কয়াগীদমক্তা চাউরাক্না লুপা করোর ১১ চাদিং তৌখি। য়োজনা অসিগী মখাদা গুজরাত্তসু ইচল্লাখ ৯না মসিগী কান্নবা ফংখি। ইচলশিংনা মীরোল্লিঙৈদা মচি ওইবা চিঞ্জাক ফংহন্নবগীদমক্তা চাউরাক্না লুপা করোর ৪০০ চাদিং তৌদুনা মখোয়গী মতেং পাংলি।

গুজরাতকী নুপীশিংবু থাক খুদিংদা মাংজিল থানা পুখৎনবা খন্নগদবা ৱাফম খুদিংদা ঐখোয়না অহেনবা মিৎয়েং চঙখি। নুপীশিংগী শীন-লাঙবগী মতিক খঙদুনা মখোয়বু খুঙ্গংগী মরুও ওইবা থবক-থৌরম কয়াগী থৌদাং শিন্নখি। পানি সমিতীগী মতাংদা গুজরাতকী নুপীশিংনা পাংথোকপা থবকশিং থাগৎনীংঙাই ঙাক্তনি। পঞ্চায়তী রাজ সংস্থাশিংগী মরক্তা নুপীগী রিজর্বেসন ৫০% খাকপা লৈবাক্কী রাজ্যশিংগী মরক্তা গুজরাতসু অমনি। নীংতম্বগী চহি ৫০ মপুং ফাবগী নুংঙাইবা ফোংদোক্লিঙৈ মতমদা ঐখোয়না নুপীশিংবু শেন্মিৎলোনগী লমদা মপাঙ্গল হেন্না লৈহন্নবগীদমক্তা মিসন মঙ্গলম হৌদোকখি অমসুং মসিগী মখাদা চহি ১২গী মনুংদা সখী মন্দল লাখ ২গা লিশিং ৬০ হেনবনা সেল্ফ হেল্প গ্রুপ ওইখি। গ্রুপ লাখ ২.৫ হেনবা অমসুং মসিদা লাখ ২৬ হেনবা খুঙ্গংগী ইচে-ইচলশিংনা শরুক য়ারি। মসিদা ঐখোয়গী শোত্থরবা, দলিত অমসুগ ত্রাইবেলগী ইচে-ইচল কয়া য়াওরি। মখোয়দা বেঙ্ককী খুত্থাংদগী লুপা করোর কয়াগী তেংবাং ফংহল্লি। নুপীশিংনা ইমুং মনুংগী শেন্মিৎলোনগী হীরমদা অহেনবা থৌদাং লৌহন্নবা ঐখোয়না লেপ্তনা হোৎনরি।

ইং ২০১৪দা ঐখোয়না কেন্দ্রদা সরকার হেক শেম্লবা তুংদা লৈবাক্কী ওইবা য়াম্না চাউবা জন ধন বেঙ্ক একাউন্তকী থবক অমা হৌদোকখি। মসিগী মখাদা ইচে-ইচল লাখ ক্যানা বেঙ্ক একাউন্ত হাংহনখি, মসিনা ঙসিদি মখোয়দা কান্নবা য়াম্না পীরে। কোরোনাগুম্বা চাউরবা লাইচৎ অমা লাকপা মতমদা মখোয়গী বেঙ্ক একাউন্ততা হকথেংননা শেলগী তেংবাং য়ৌহনখি। মুদ্রা য়োজনাগী খুত্থাংদা মশাগী কারবার হৌদোকচনবা শেলগী তেংবাং পীখি। অসিগুম্বা তেংবাং অসিদা বেঙ্ক গেরেন্তী অমত্তগী তঙাই ফদবা লৈহনখিদে। অদুগা মুদ্র য়োজনাগী কান্নবা ফংবশিংগী মনুংদা নুপী মশিংনা ৭০% ওইবদা ঐহাক্না য়াম্না নুংঙাইবা ফাওই। সখি মন্দলগীদমক্তা কেন্দ্র সরকারনা লুপা লাখ ১০গী লোন পীরম্বদুসু লুপা লাখ ২০দা হেনগৎহনখ্রে। মসিনা মখোয়না মশাগী কারবার চাউথোকহনবা ঙম্নরে। মসিমক দবল ইঞ্জিন সরকারগী থবক থৌরম্নি। মসিগী দবল ইঞ্জিন সরকারগী কান্নবনা মরম ওইরগা মাইকৈ খুদিংদা খোঙজেল য়াঙনা চাউখৎলিবনি। ঙসিগী থৌরমসিদা লাইরবা লাখ ১গা লিশিং ৪০না পক্কা য়ুম ফংলি। অসুক য়াম্বা মীওইগী পক্কা য়ুম পীবা হায়বসি কয়া য়াম্না চাউবা থবক্নো হায়বা অদোমসু অমুক্তা খন্থবীয়ু। হায়রিবা মীওইশিং অসি অহানবদা কচ্চা য়ুমদা, লম্বী শোরোক্তা লৈরম্বনি। অদুগা য়ুম ফংলিবশিং অসিদসু য়ুম্বু অসি নুপীগী মিংদা ওইহন্নবা ঐহাক্না কন্না হোৎনরি। য়ুমশিং অসিগী অচঙবা শেনফম য়েংলুরবদি, নুপীশিং অসি লাখপতি ওইরবনি। য়ুমশিং অসিগী মওংদা ঐখোয়না লুপা করোর ৩০০০ হেনববু নুপীশিংগী মিংদা পীরবনি। মফমসিদা ফম্লিবী ইমা-ইবেল, ইচে ইচলশিং অসি লুয়াপ করোর ৩০০০গী লনথুমগী মপুনি।

শরদা লৈবা লাইরবা অমসুং মিদ্দল ক্লাস ইমুংশিংগী মঙলান মঙফাওনহল্লে। হৌখিবা চহিশিংদা গুজরাতকী শহরগী লাইরবা অমসুং মিদ্দল ক্লাস ইমুংগীদমক্তা য়ুম শাবগী মশক থোকপা থবক পায়খৎখ্রবনি। হৌজিক ফাওবদা অয়াবা পীখ্রবা য়ুম লাখ হেনবগী মনুংদগী য়ুম লাখ ৭তি শহরগী লাইবশিংনা ফংলবনি। গুজরাতকী মিদ্দল ক্লাস ইমুং চাউরাক্না লাখ ৪ মখায়দা মশাগী য়ুম শাবগী তেংবাং পীখ্রবনি। বদোদরা, অনন্দ, ছোতা উদয়পুর, খেরা, পঞ্চমহল, নর্মদা, দাহোর, ঐহাক্কী মধ্য গুজরাত, মসিগী অকোইবগী জিলা মরিদা লৈবা ইচে-ইচলশিংনা সরকারগী অসিগুম্বা স্কিমগী কান্নবা ফংলি।

ইচিল ইনাওশিং, ঐখোয়গী বদোদরাগী শক্তাক্না এজুকেসন সেক্তরদসু অচৌবা মমিং লৈ, ঐখোয়গী এম.এস. য়ুনিভর্সিতীগী মমিংনা নিল্লি। হৌজিক্তি, ঐখোয়না এজুকেসন, সাইন্স, কোর্ত্তা মাংজিল থানা চৎপা হৌরে। বদোদরাবু মমাং চহিদা এজুকেসন অমসুং স্কিল দিভেলপমেন্ত হব ওইবগীদমক্তা শকখঙনখি। ত্রিপল আই.তি., স্বরনিম গুজরাত স্পোর্ত য়ুনিভর্সিতী, সেন্ত্রেল য়ুনিভর্সিতী, হায়রিবশিং অসি হৌজিক গুজরাতকী বদোদরাদা লৈরে। লৈবাক্কী খ্বাইদগী অহানবা রেল য়ুনিভর্সিতীসু বদোদরাদা লৈ তাবদা অদোম্না নুংঙাইবা ফাওরমগনি, অদুগা গতিশক্তি য়ুনিভর্সিতীসু হৌজিক বদোদরাদা পাকথোক চাউথোক্লি। মসিগী অকোয়বদা লৈবা অমসুং মসিদগী তম্বা লোইদনা থোক্লকপা মীওই খুদিংনা কান্নবা কয়া ফংগনি। লৈবাক পুম্বগী মীয়াম্না কান্নবা ফংলগনি। অদুগা, ঐখোয়গী অনন্দ ওইরো, ছোতা উদয়পুর ওইরো, নত্ত্রগা মধ্য গুজরাতকী অতোপ্পা জিলাশিং ওইরো, খেরা ওইরো, পঞ্চমহল ওইরো নত্ত্রগা সোমগী নাকলগী ঐখোয়গী ভরুচ ওইরো, নর্মদা ওইরো, মখোয়সু কান্নবা ফংলগদবনি। অদুগা নর্মদাদা লৈরিবা বির্সা মুন্দা ত্রাইবেল য়ুনিভর্সিতী, গোধ্রাদা লৈবা গোবিন্দ গুরু য়ুনিভর্সিতী, মখোয়না লৈবাক শিনবা থুংবদা নুংঙাইবা পাউ পীরবনি।

ইচিল ইনাওশিং, বদোদরা অসি লৈবাক্কী খ্বাইদগী লিবা, কোস্মোপোলিতান শহর হায়নসু কৌবা য়াবা শহর অমনি। মফমসিদা লৈরমদবদা, থবক তৌরমদবা নত্ত্রগা মফমসিবু উদ্রিবা লৈবাক্কী কাচিন কোয়া অমত্তদগী মীওই লৈরম্লোই। মেক ইন ইন্দিয়াগী হীরমদসু বদোদরানা লৈবাকপু য়াম্না তেংবাংলি। চাউখৎ-থৌরাংগী খোঙচত্তা বদোদরানা সর্ভিস সেক্তর হব অমা হৌজিক ওইরক্লি। মফমসিদা তেক্নোলোজীগা মরী লৈনবা থবক কয়া অমা হৌরক্লি, ঐখোয়গী মফমসিদা লৈবা বোম্বার্দিয়র কম্পেনীগী মেত্রো কোচশিং মালেম শিনবা থুংবদা য়ৌরি। মেত্রোশিং অসিনা মালেমগী মফম কয়াদা য়ৌখিবা মতমদা কদাইদগী লাকপনো হংবদা বদোদরাদগীনি হায়না হৌজিক খুম্নরবনি। ওস্ত্রেলিয়াদা চেল্লিবা মেত্রোদুসু কদাইদগী লাকপনো হংবদা বদোদরাদগীনি হায়গদৌরিবনি, ভারত্তগী লাকপনি হায়গদৌরিবনি। গুজরাত সরকারগী লৈত-লাইরবগী তেংবাং অমসুং তেংবাংনবগী মতৌনা রাজ্যসিগী অখন্নবা মগুন অমা ওইরিবনি। মসিনা খ্বাইদগী অপুনবা পাঙ্গল ওইরিবনি। দবল ইঞ্জিন সরকারগী হোৎনজমন্দগী, খুন্নাইগী লুপশিংগী পাঙ্গলদগী, মীয়াম্না শরুক য়াবদগী, সিভিল সোসাইতীগী তেংবাংদগী, চাউখৎ-থৌরাংগী অনৌবা স্কিম কয়াগী মতেংদগী গুজরাতকী মীচম মীয়ামগী পাঙ্গল হাপ্লি। অমসুং গুজরাতকী হৌরক্কদৌরিবা চারোন শুরোনগীদমক্তা খ্বাইদগী ফবা গুজরাত অমা শেম্নবা ৱাখল্লোনগা লোয়ননা গুজরাতনা অনৌবা থাক কয়া কারি। অদোমগী থৌজালনা পুম্নমক অসি ওইথোকপদা অমুক্কা হেন্না তেংবাংলি। অদোমগী থাজবনা লৈবাকপু অৱাংবা থাক্তা পুখৎনবা ঐখোয়গী ইফমদা ইথিল পীবিরি। অদোমগী থৌজালনা ঐখোয়গী অচৌবা পাঙ্গল ওইরি, লৈবাক্কী অসিগুম্বা মঙলান মঙফাওনহন্নবা ঐখোয়না কৈদৌনুংদা তুং হন্দুনা চৎখিদ্রি, মতম পুম্বদা লেপ্তনা হোৎনরি। ঙসিগী মাত্রিবন্দনা নুমিৎ অসিদা মশিং য়াম্না লেংবীরক্লিবা ইমা-ইবেল, ইচেল-ইচলশিংগা উন্নজবা ফংজরে, অদোমগী থৌজালসু ফংজরে। গুজরাতকী পুন্সিদা ইচেল-ইচল অসুক য়াম্না লাক্লগা অমুক্তদা থৌজাল পীবা, অসিগুম্বা লাইবক ফবসিবু কনানা মমাংদা ফংলমগদগে? অদোম ইমা, ইচে-ইচলশিংবু ঐহাক্না অমুক্কা হন্না নোল্লুকচরি। অদোমগী থৌজালনা মাত্রিশক্তি, ইমা ভারতকী সেবা তৌবগী ঐঙোন্দা পাঙ্গল হাপ্পীগনি। অসিগুম্বা থাজবশিংগা লোয়ননা অদোম্বু ঐহাক্না অমুক্কা হন্না থম্মোই শেংনা থাগৎচরি।

দিস্ক্লেমরঃ মসি প্রধান মন্ত্রীগী ৱারোলগী চাউরাকপা পাউদম্নি। অশেংবা ৱারোলদি হিন্দিদা পীখিবনি।

*****************