খুরুমজরি! থৌরম অসিদা তিনবীরিবা নুপী অমদি অঙাংশিংগী চাউখৎ-থৌরাংগী মন্ত্রী, শ্রী স্মৃতি ইরানিজী, লৈবাক শিনবা থুংবগী কেন্দ্রগী মন্ত্রী-মন্দল পুম্নমক, সিনিয়র সিতিজেনশিং, অমসুং ঙসিগী থৌরম অসি পাঙথোকপগী মরম ওইরিবা নুংশিরবা অঙাংশিং, ইকাই খুম্নরবা মুখ্য মন্ত্রীশিং, অতোপ্পা দিগনিতরীশিং অমসুং নুংশিজরবা ইরৈবাকচাশিং!

ঙসি, ঐহাক্না নখোয়দা ৱারী শারিবা অসি প্রধান মন্ত্রী অমা ওইনা নত্তে নখোয়গী ইমুংগী মীওই অমা ওইননি। ঙসি অঙাংশিং অসিগী মরক্তা তিনজবা ফংজবা অসিদা ঐহাক্না য়াম্না নুংঙাইবা ফাওই।

মরুপশিং,

পুন্সিনা করিগুম্বা মতমদা ঐখোয়বু থাজবা থৌদোকশিংগা থেংনহল্লি। খঙহৌদনা অৱাবা অমা লাকখি অমসুং ঐখোয়না নুংঙাইনা লৈরম্বা অদু পুম্নমক অহোংবা পুরকখি। কোরোনানসু মসিগা মান্নবা মওংদা মীওই অমদি ইমুং কয়াগী পুন্সিদা অসুম্না ওইহনখি। কোরোনানা মরম ওইদুনা মখোয়গী নুংশিজরবা মীশকশিং লৈখিদ্রবশিংগী পুন্সিদা অহোংবা অসিনা অৱাবা কয়া য়াম্না পীবগে হায়বা ঐহাক্না খঙই। নুমিৎ খুদিংগী থেংনবা অৱাবা, নুমিৎ খুদিংগী মায়োক্নবা শীংনবশিং। ঙসি থৌরম অসি মখোয়গীদমক পাঙথোক্লিবা, ঐখোয়গী ইরক্তা তিল্লিবা অঙাংশিং অসিনা থেংনরিবা অৱাবা অসি ৱাহৈনা ফোঙদোকপা ঙম্লোই। চৎখ্রবা মীওইশিং অদু নীংশিংহৌবা খক্তা ঙাইহৌরে। অদুবু হিংহৌরিবশিংদি শীংনবা কয়ামরুম মাইয়োক্নরি। অসিগুম্বা অৱাবা তানফম অসিদা পি.এম. কিয়র্স ফোর চিলদ্রেন স্কিম অসি নখোয়গুম্বা মমা অমসুং মপা অনিমক লৈখিদ্রবা কোরোনানা চৈথেং পীরিবা অঙাংশিংগী অৱাবশিং কোকহন্নবা পাইখৎপা অপীকপা খোঙথাং অমনি।

মরুপশিং,

পি.এম. কিয়র্স ফোর চিলদ্রেন স্কিম অসি সেন্সিতিবিতী লৈবগা লোয়ননা নখোয়গীদমক লৈবাক অসিদা লৈরিবা মীপুম খুদিংমক্না লেপ্পি হায়বা ৱাফম অসিসু তাক্লি। মখোয়না নীংথিনা অমসুং অপনবা লৈতনা মহৈ-মশিং তমজনবগীদমক মখোয়গী ময়ুমশিংগী মনাক্তা লৈবা সরকার নত্ত্রগা লনাইগী স্কুলশিংদা মখোয়গী এদমিনিসন তৌখিবা অসিদা ঐহাক্না অপেনবা পোকই। অঙাংশিংগী বোই, লাইরিক অমসুং য়ুনিফোর্মশিংগী চাদিংসু পি.এম. কিয়র্সকী খুত্থাংদা তৌরগনি। করিগুম্বা কনাগুম্বা অমনা প্রোফেস্নেল কোর্স নত্ত্রগা হায়র এজুকেসনগীদমক এজুকেসন লোন অমা মথৌ তারবদি পি.এম.-কিয়র্সনা মদুদসু মতেং পাংগনি। অতোপ্পা নোংমগী তঙাই-ফদবশিং অদু থুংহন্নবগী অতোপ্পা স্কিমশিংগী খুত্থাংদা থা খুদিংগী লুপা লিশিং ৪ পীনবা থৌরাংসু পাইখৎলি।

মরুপশিং,

অসিগুম্বা অঙাংশিং অসিনা মখোয়গী স্কুলিং লোইরবা মতমদা মখোয়গী তুংগী মঙলানশিং থুংহন্নবা শেল হেন্না মথৌ তারক্কনি। মসিগীদমক অঙাংশিং অসিনা চহি ১৮দগী ২৩ ফাওবা থা খুদিংগী স্তাইপেন্দ ফংগনি। অমসুং মখোয়না চহি ২৩ শুরক্লবা মতমদা লুপা লাখ ১০ ফংগনি।

মরুপশিং,

অতোপ্পা মরু ওইবা হীরম অমনা হকশেলগা মরী লৈনৈ। লাইনা অমা হেক্তা লায়েংবদা শেল মথৌ তাই। অদুবু অঙাং নত্ত্রগা মহাক্কী অহল লমন অমা হেক্তনা মসিগীদমক ৱাবগী মথৌ তারোই। পি.এম. কিয়র্স ফোর চিলদ্রেনগী খুত্থাংদা আয়ুশ্মান হেল্থ কার্দ পীরি। কার্দ অসি পাইরবদি নখোয়না লুপা লাখ ৫ ফাওবা লেম্না লায়েংবা ফংগনি।

মরুপশিং,

খোঙথাং পুম্নমক অসিগী মরক্তা ঐখোয়না অঙাংশিং অসিনা ইমোস্নেল সপ্পোর্ত অমসুং মেন্তেল গাইদেন্সসু মথৌ তাই হায়বা খঙই। ইমুং অদুদা অহলশিং লৈরবদু সরকারনা খোঙথাং অমা পাইখৎনবা হোৎনখি। হীরম অসিদা অখন্নবা ‘সমবদ’ সর্ভিস হৌদোকখ্রে। অঙাংশিং অসিনা ‘সমবদ হেল্পলাইন’গী খুত্থাংদা সাইকোলোজিকেলগী ওইবা লমদা লৈরিবা অখং-অহৈশিংগা লোয়ননা তান্নবা য়াগনি।

মরুপশিং,

কোরোনাগী মালেমগী লাইচৎ অসিগী চৈথেং অপুনবা মীওইবা খুন্নাইনা ফংখি। চহি চামদা থোকপা খুদোংথিবা অসিনা কাউবা ঙম্লরোইদবা শাফু পীখিদবা মালেম অসিদা মফম অমত্তা লৈখিদে। লাইচৎ অসিগী খ্বাইদগী অৱাবা চৈথেং অদু থৌনা লৈনা মায়োক্নখিবগীদমক অঙাংশিং অসিবু ঐহাক্না ইকাই খুম্নবা উৎচরি। নখোয়গীদমক লৈবাক অসিনা লেপ্পি অমসুং মসিগা ইরোইননা লৈবাক পুম্বনা নখোয়গী মঙলানশিং অদু থুংহন্নবা নখোয়গীদমক লেপ্পি। ঐহাক্না হায়জনীংবা অতোপ্পা ৱাফম অমনা নখোয়গী ইমা-ইপাগী মীনুংশিং অদুবু থবক নত্ত্রগা মতেং অমত্তনা মহুৎশিনবা ঙম্লোই। অদুবু নখোয়গী ইপা অমসুং নখোয়গী ইমা লৈত্রবা মতম অসিদা, অৱাবা তানফম অসিদা ইমা ভারতিনা অঙাংশিং নখোয়গীদমক লৈরি! লৈবাক অসিনা পি.এম. কিয়র্স ফোর চিলদ্রেনগী খুত্থাংদা মখোয়গী থৌদাংশিং থুংহন্নবা হোৎনরি। অমসুং খোঙথাংশিং অসি মীওই, ইন্সতিত্যুসন নত্ত্রগা সরকার অমা খক্তগী খোঙথাং নত্তে, ঐখোয়গী ইরৈবাকচা করোর কয়ানা মখোয়না ৱানা তানখিবা শেলশিং পি.এম. কিয়র্সতা দান তৌরকখি। নখোয়না শেবা অমসুং কত্থোকপগী খুদমশিং অদু নীংশিংবীয়ু। কনাগুম্বা অমনা মহাক্না পুন্সি চুপ্পা ৱানা তানখিবা শেলশিং দান তৌরকখ, অমরোমদা কনাগুম্বা অমনা মহাক্কী মঙলানশিং থুংহন্নবা তুংশিন্দুনা থমজবা শেলশিং ফন্দ অসিদা হাপলকখি। ফন্দ অসিনা কোরোনাগী মতমদা হোস্পিতালশিং শাবা, ভেন্তিলেতরশিং লৈবা অমসুং ওক্সিজেন প্লান্তশিং লিংখৎখিবদা চাউনা মতেং পাংখি। মসিনা মরম ওইদুনা পুন্সি কয়া কনবা ঙমখি, অমসুং ইমুং কয়াগী তুংগী পুন্সি কনবা ঙমখি। ঙসি ফন্দ অসি ঐখোয়বু মনুং মতম চাদনা থাদোক্তুনা চৎখ্রবশিংগী অঙাংশিংগীদমক, মখোয়গী তুংলমচৎকীদমক শীজিন্নরি।

মরুপশিং,

নখোয়ী মাংদা শাংলবা পুন্সিগী খোঙচৎ অমা লৈরি। নখোয় পুম্নমক্না থৌনা ফনা ফীভম অসি মায়োক্নরি। ঐখোয়গী লৈবাক নত্ত্রগা মালেমগী অফাওবা মীওই পুম্নমক্না মখোয়গী পুন্সিগী তাঙ্কক অমদা অৱাবশিং মায়োক্নখি। মখোয়না মাইথিবা অসিদা নীংহন্নবা তৌখিদে। মাইপাকপগী মন্ত্র অসিনা নখোয়গী পুন্দিদা নখোয়বু লমজিংগনি অমসুং মতেং কয়া পাংগনি অমসুং নখোয়না মসি কাউফদে। নখোয়না মতম চুপ্পদা নীংশিংগদবা ৱাফম অমদি হৌজিক নখোয়দা অফবা ফত্তা অসুং অচুম অরানগী মরক্তা খেন্নবা অদু তাকপীনবা নখোয়গী ইমুং মনুং অমসুং ওজাশিং খক্তা ঙাইরে মরম অসিনা মখোয়না তাক্লিবা অদু তাবা অমসুং ঙাক্না চৎপা অসি নখোয়গী থৌদাংনি। অসিগুম্বা অৱাবা তানফম অসিদা অফবা লাইরিকশিংনা নখোয়গী খ্বাইদগী থাজবা মরুপ ওইহল্লু। অফবা লাইরিকশিংনা নখোয়দা অৱাবা পোত্থাহনবা খক্তা নত্তনা নখোয়বু লমজিংগনি। ঐহাক্না নখোয় পাউতাক অমগা পীজগে।

মরুপশিং,

অনাবা অমা হেক্তা লৈরকপা মতমদা লায়েংবা মথৌ তাই। অদুবু পুন্সি অসি হকচাং ফনা থম্বা অসিনা ওইগদবনি লায়েংবনা ওইরোইদবনি। ঙসি অঙাংশিংগীদমক লৈবাক অসিদা ফিৎ ইন্দিয়া অমসুং খেলো ইন্দিয়া কেম্পেন চত্থরি। নখোয়না মসিদা য়াওশিন্দুনা কেম্পেন অসিবু লমজিংগদবনি। য়োগ নুমিৎ অসি নুমিৎ খরগী মতুংদা পাঙথোক্লগনি। নখোয়গী নহৈ-নশিংগা লোয়ননা য়োগ অসি নখোয়গী পুন্সিগী শরুক অমা ওইহনবা হায়বা অসি য়াম্না মরু ওই।

মরুপশিং,

অৱাবগী খ্বাইদগী ৱাবা পুংফমদসু করিগুম্বা ঐখোয়না ইশাদা থাজবা থম্লবদি আশাগী মঙাল অমা শোইনা উবা ফংগনি। ঐখোয়গী লৈবাক্না মসিগী অচৌবা খুদম অমা ওইরি। ঐখোয়না হৌজিক আজাদী কা অমৃত মহোৎসব পাঙথোক্লি। মীনাই-নাইথাং ওইনা চহি চামা খাংলকখিবা, ঐখোয়গী নীংতম্বগী শাংলবা খোঙজং অসিদা ঐখোয়গী খ্বাইদগী চাউবা পাঙ্গল থৌনা অসি করিনা ওইখি? ঐখোয়না পাঙ্গল থৌনা অসি নীংহন্নবা তৌদবা হায়বা অসিনা ওইখি! ঐখোয়গী থৌনা অসি লৈবাক অসিগীদমক খনবা অমসুং হিংবা অসিনা ওইখি অমসুং ওইজবা থিবা কয়াদগী মীনুংশি হায়বা অসিনা পুমহেন হেনখি! হৌজিক চত্থরিবা আজাদী কা অমৃত মহোৎসব অসি থৌনা লিংজেল অসিগা লোয়ননা পাঙথোক্তুনা মাংদা চংশিল্লি। মসিগী থৌনা লিংজেল অসিনা লৈবাক অসিনা কোরোনাগী অচৌবা লান অসি মায়োক্নবদা মতেং পাংখি অমসুং মালেম পুম্বগী মাংদা খুদম অমা থম্বা ঙমখি। য়েংবীয়ু, চহি অনি মখাইগী মমাংদা কনা অমত্তনা কোরোনা ভাইরস অসিগী মরমদা নীংথিনা খঙলমদে। মীপুম খুদিংমক্না মালেমগী অচৌবা লৈবাকশিংদা থাজবা থমখি। কনা অমত্তনা ভারত্তা থাজবা থমখিদে। মীয়াম্না অসিগুম্বা ফীভমশিং অসিনা চৈথেং পীখিবগী পুৱারী অদু য়েংলুরগা ভারত্তা চীংনবা মীৎয়েংনা য়েংখি। অদুবু নেগাতিবিতীনা থনখিবা ফীভম অদুদা ভারতনা মাগী মপাঙ্গলদা থাজবা থমখি। ঐখোয়গী বিজ্ঞানিক, ঐখোয়গী দোক্তর, অমসুং ঐখোয়গী নহারোলশিংদা থাজবা থমখি। অমসুং, ঐখোয়না মালেমগীদমক অৱা পোৎলুম অমা ওইবগী মহুৎ আশাগী মঙাল ওইনা থোরকখি। ঐখোয়না অৱাবা পীবগী মহুৎ ঐখোয়না সোল্যুসন ওইনা পুরকখি। ঐখোয়না মালেমদা লৈরিবা লৈবাকশিংদা হীদাক-লাংথক, অমসুং ভেক্সিনশিং থাখি। ঐখোয়গী অচৌবা লৈবাক অসিদা ফাওবা ঐখোয়না প্রজা খুদিংমক্তা ভেক্সিন ফংহনবা ঙমহনখি। ঙসি লৈবাক অসিদা ভেক্সিন দোজ করোর ২০০রোম কাপখ্রে। খুদোংথিবা মতম অসিদা ঐখোয়না ‘আত্মনির্ভে ভারত’কী ফিরেপ অমা লৌখি অমসুং ঙসি ফিরেপ অসিনা মাইপাকপগী মাইকৈ তম্না খোঙজেল য়াংনা চংশিল্লি। ঙসি লৈবাক অসিনা খ্বাইদগী খোঙজেল য়াংনা চাউখৎলক্লিবা ইকনোমী অমা ওইরি অমসুং মালেমনা ঐখোয়না অনৌবা আশা অমসুং থাজবগা লোয়ননা মীৎয়েং থম্লক্লি।

মরুপশিং,

ঙসি, ঐখোয়গী সরকার অসিনা চহি ৮ মপুং ফারকপগী মতম অসিদা লৈবাক অসিগী থাজবা অমসুং ইরৈবাকচাশিংনা মশাদা থমজরিবা থাজবা অসি অমুক্তা ওইখিদ্রিবা মওংদা হেনগৎলক্লি। ২০১৪গী মমাংদা লৈবাক শিনবা থুংবদা শেঞ্জা-থুমজা, লুপা করোর লিশিং কয়াগী স্কেমশিং, নেপোতিজম, তেরোরিস্ত ওর্গনাইজেস অমসুং রিজনগী ওইবা খেন্নবা লৈরিবা অসিগী লোইনাইদ্রবা অৱাবগী লাংদা লৈবাক অসি লুপতুনা লাকখিবা অদুদগী থোরকপা ঙম্লে। খ্বাইদগী অৱাবা মতমশিং অসিসু হৌখি হায়বা অসিগী মসি অঙাংশিং নখোয়গীদমক খুদম অমসু ওইরি। ভারতনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী ৱাখল্লোনগা লোয়ননা খোঙজেল য়াংনা মাংদা চংশিল্লি। স্বচ্ছ ভারত মিসন, জন ধন য়োজনা নত্ত্রগা হর ঘর জল অভিয়ান ওইরবসু ঐখোয়না হৌখিবা চহি নিপান অসিদা লায়রবশিংগী য়াইফনবা অমসুং শেবা তৌনবগীদমক কত্থোক্তুনা লাকখি। ইমুংগী মীওই অমা ওইনা ঐখোয়না লৈবাক অসিদা লৈরিবা লায়রবশিংগী অৱাবশিং কোকহন্নবা অমসুং ইজ ওফ লিবিং হেনগৎহন্নবা হোৎনদুনা লাকখি। ইরৈবাকশিংগীদমক প্রোএক্তিব ওইনা তৌবা য়াবা থবক অমত্তা ঐখোয়না লেম্না মাংহনখিদে। মমাংগী সরকানা তেক্নোলোজী শীজিন্নবদা চীংনবা পোক্লম্বা অমসুং মীয়াম্না মসি শীজিন্নবা হৈরমদবা অদু তেক্নোলোজী শীজিন্নবা হেনগৎহন্দুনা সরকার অসিনা লায়রবশিংগী হকশিং ফংহনবা ঙমখি। হৌজিক্তি লায়রবশিংগী মরক্তা খ্বাইদগী লায়রবশিংনা মখোয়না সরকারগী স্কিমশিংগী কান্নবা অসি ফংগনি, মখোয়না মখা তানা ফংখিগনি হায়না থাজবা থম্লি। থাজবা অসি হেনগৎহন্নবা ঐখোয়গী সরকারনা হৌজিক ১০০% এম্পাৱর্মেন্তগী কেম্পেন অমা চত্থরি। ঐখোয়গী সরকারনা খ্বাইদগী মরু ওইনা লৌরিবশিংগী মনুংদা সরকারগী স্কিমশিংগী মখাদা পীরিবা কান্নবশিং অসি লায়রবা খুদিংদা ফংহনবা অমসুং লায়রবা খুদিংমক্না মখোয়গী ফংফম থোকপা অদু ফংহনবা হায়বা অসিনা ওইরি।

হৌখিবা চহি নিপান অসিদা ভারতনা ফংবা ঙমখিবা পনখৈ অসি মমাংদা কনাগুম্বা অমতনা ৱাখলনা লামবা ফাওবা ফংখিদে। ঙসি মালেম শিনবা থুংবদা ভারতকী মীংচৎ হেনগৎলক্লি, ঐখোয়গী ভারতকী তৌবা ঙম্বগী শক্তি অদু মালেমগী ফম্পাকশিংদা হেনগৎলক্লি। অমসুং ভারতকী খোঙচৎ অসিদা নহারোলশিংগী শক্তিনা লমজিংলিবা অসিদা ঐহাক্না নুংঙাইবা পোকই। নখোয় পুম্নমক্না, ঐখোয়গী অঙাংশিং অমসুং নহারোলশিংনা লৈবাক অসিবু অমদি মালেমবু মসিগী থৌনা অমসুং মীওইবগী মীনুংশিগা লোয়ননা লমজিংগনি হায়না ঐহাক্না থাজৈ। ফিরেপ অসিগা লোয়ননা মাংদা চংশিল্লু, ফিরেপ অসিগীদমক নখোয়গী পুন্সিবু কত্থোকউ অমসুং মসিনা নখোয়গী মঙলানশিং শোইদনা থুংহনবা ঙমগনি। নখোয়না য়ৌবা পাম্লিবা থাক অদু য়ৌনবা হোৎনবদা মালেমগী শক্তি অমত্তনা নখোয়দা অথিংবা পীবা ঙম্লোই। করিগুম্বা নখোয়না পুক্নিং চংলবা, নখোয়দা অখাং কনবা য়াওরবা অমসুং ফিরেপ অসি থুংহন্নবা মতিক-ময়াই চেল্লবদি নখোয়না লেপ্পগী মথৌ তাদে। অমসুং ঐহাক্না হৌরকপদা হায়খ্রে, ঐহাক্না নখোয়দা ইমুংগী মীওই অমা ওইনা ৱা ঙাংলি। ঙসি ঐহাক্না ইমুংগী মীওই অমা ওইনা য়াইফ-মঙ্গোল পীজনীংই। নখোয়দা মঙ্গোল পীবগী ঐঙোন্দা হক লৈবা লৈতবা ঐহাক্না খঙদে অদুবু নখোয়দা ঐহাক্না মতিক-ময়াই অদু উবা ফংই। অমসুং মরম অসিনা ঐহাক্না নখোয়দা য়াইফ-মঙ্গোল পীরি। নখোয়না অফবতা ওইয়ু। ঐহাক্না য়াইফ-মঙ্গোল পীজরি। হন্না-হন্না থাগৎচরি!

খঙহনজবা: মসি পি.এম.না পীখিবা ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***