থৌরম অসিদা শরুক য়ারিবা লৈবাক্কী ঙাক-শেল মন্ত্রী, রাজনাথ সিংহজী, এন.সি.সি.গী দি.জি., লেফতেনেন্ত জেনেরেল গুরবীরপাল সিংহজী, মফমসিদা তিল্লিবা ইকায় খুম্ননীংঙাই ওইরবশিং, ওফিসরশিং অমসুং গনতন্ত্রা দিবস নুমিৎকী পেরেদতা শরুক য়াখিবা আর্তিস্ত, এন.এস.এস.-এন.সি.সি.গী মরুপশিং!

হৌজিক ঐখোয়গী লৈবাক্না নীংতম্বগী অমৃত মহোৎসব পাংথোক্লি। অদুগা নহা ওইরিবা লৈবাক অমনা, অসিগুম্লবা পুৱারী ওইরবা পুংফম্বু উবা ফংবা মতমদা, মহাক্কী থম্মোইদা হরাও নুংঙাইবগী ইথিল অমা উবা ফংই। মসিগী নুংঙাইবগী ইথিল অসি ঐহাক্না হৌজিকসু করিয়প্পা গ্রাউন্দ অসিদা উবা ফংলি। মসিদি লৈবাক্না ২০৪৭তা নীংতম্বগী চহি ১০০ মপুং ফারকপা মতমদা ঐখোয়গী ৱারেপ্পু মঙফাওনহনগদৌরিবা ভারতকী নহারোলগী শক্তি উৎপনি অমসুং মখোয়না ২০৪৭কী অনৌবা ভারতপু শঙ্গাগনি।

ঐহাক্না অদোমগুম্বা এন.সি.সি.গী কেদেত ওইরকপদা য়াম্না চাউথোকচবা ফাওজৈ। অদুবু, অদোম্না ফংলিবা খুদোংচাবশিং অসি ঐহাক্তি ফংলক্তে। ঐহাক্না ফংলকখিবা এন.সি.সি.গী ত্রেনিং, মদুদগী  খঙলকখিবা লৌশিং অসিনা ঐহাক্না ঙসি লৈবাক্কীদমক্তা ইথৌদাং পাংথোকপা অসিদা য়াম্না তেংবাংই, পাঙ্গল হাপ্পী। ঐহাক্না মতম খরগী মমাংদা এন.সি.সি.গী এলম্নি কার্দসু ফংলে। ঐহাক্না ঙসি লৈবাক্কী প্রধান মন্ত্রী অমা ওইবগা লোয়ননা অদোমগা লৈনরিবা মরীগী মাইকৈদগীসু অদোমগী নাক্তা লোইরিবনি। ঐহাক্না ঙসিগী থৌরম অসিদা এন.সি.সি.গী ওফিস পায়রিবশিংগা লোয়ননা কেদেত মরুপশিংগী মফমদা সলাম তৌজরি। অদুগা ঙসি মনা ফংলিবা কেদেতশিংবুসু ঐহাক্না থাগৎপা ফোংদোক্লি। ঙসিদি, ফাওরবা নীংতম লান্মী, পঞ্জাব কেসরী লালা লাজপত রাইগী মপোক নুমিৎসু ওই। অদুগা ফিল্দ মার্শেল করিয়াপ্পাগী মপোক নুমিৎসু ঙসি ওই। লৈবাক শেমগৎ-শাগৎপদা মরু ওইবা থৌদাং লৌবীরম্বা মখোয়গুম্বা অথৌবশিংগী মফমদা ঐহাক্না ইকায় খুম্নজরি।

মরুপশিং,

ঙসিদি, লৈবাক অসিনা অনৌবা ৱারেপ কয়াগা লোয়ননা তুংলমচৎকীদমক্তা চৎলি, অদুগা এন.সি.সি. মপাঙ্গল হেন্না লৈহন্ননবা লৈবাক্না হোৎনবসু লেপ্ত্রি। মসিগীদমক্তা লৈবাক অসিদা অৱাংবা থাক্কী রিভিয়ু কম্মিতী অমসু শেমখ্রবনি। ঐখোয়না হৌখিবা চহি অনিদা লৈবাক্কী ঙমখৈগী মফমশিংদা অনৌবা কেদেত লাখ ১ শেমখ্রে। এন.সি.সি. কেদেতশিংগী ত্রেনিংদা সাইম্যুলেসনগুম্বা মতমগা চুনবা তেক্নোলোজী শিজিন্নবগী চাংসু য়াম্না হেনগৎপসিদা ঐহাক্না নুংঙাইবা ফাওই। ঐখোয়গী এজুকেসনগী পথাপকা এন.সি.সি.গা মরী লৈনহন্নবা লৈবাক অসিনা খোঙথাং কয়া পায়খৎলি। মপুং ওইবা সেল্ফ ফাইনান্সিং স্কিমগী মখাদা লৈবাক্কী কোলেজশিংদা কেদেত লাখ ১সু পাকথোক চাউথোকখ্রে। অসিগুম্বা কেদেত লাখ ১গীদমক্তা হোৎনরিবা অসি স্কুলশিংদসু হৌখ্রবনি।

লৈবাক্কী অনৌবা এজুকেসন পোলিসীগী মখাদা লৈবাক্কী য়ুনিভর্সিতী ৯০না এন.সি.সি.বু ইলেক্তিব সবজেক্ত অমা ওইনা মনুং চলহনবসু হৌখ্রে। ঐহাক্না ঙসি নুপীমচা কেদেত মশিং য়াম্না উবা ফংই। মসিদি লৈবাক্কী হোংলক্লিবা ৱাখল্লোনগী খুদম অমনি। লৈবাক্না অদোমগী থৌদাংগী তঙাই ফদবা লৈরে। লৈবাক অসিদা অদোমগীদমক্তা মশিং থীঙমদ্রবা খুদোংচাবা কয়া লৈরে। আর্মীদা নুপীশিংনা অচৌবা থৌদাং কয়া ফংলি। লৈবাক্কী ইচানুপীশিংনা এয়রফোর্সতা ফাইতর প্লে কয়া পাইরি। তাঞ্জা অসিদা ঐখোয়না নুপীমচা মশিং য়াম্বনা এন.সি.সি.দা য়াওহন্নবা হোৎনফম থোক্লি। মশানা পামজদুনা এন.সি.সি. য়াওরিবা নুপীমচাশিংনা অতোপ্পগী ইথিল ওইরগদবনি।

মরুপশিং,

লৈবাক্কী মমিং লৈরবা কবি, মাখনলাল চতুর্বেদীগী শৈরেং অমসুং মহাক্কী অদুগুম্বা শৈরেং অদুদা মহাক্না অসুম্না হায়রি-

ভুখন্দ বিছা, আকাশ ঔর, নয়নোদক লে, মোদক প্রহার,

ব্রমহান্দ হথেলি পর উছাল, অপ্নে জীবন-ধন কো নিহার।।

মসিগী ৱাহৈশিং অসিনা পাঙ্গল ফংবগী মতাংদা ফোংদোক্লি। কংফালদা পাক শন্না শন্দোক্তুনা, অতিয়াবু কুপ্তুনা অমসুং য়ুনিভর্স্পু খুবাক্তা হাপ্পা ঙম্বা অদুগুম্বা শক্তি ওইবা ওইসনু। লুরবা তাল্লক কয়াবু নোক্তুনা অমসুং কিদনা মাইয়োক্নবা ঙম্বা শক্তি ওইসনু। ঙসিদি, ইমা ভারতীনা নহারোলশিংদা খোল্লাও অসি লাওরি।

ভুখন্দ বিছা, আকাশ ঔর, নয়নোদক লে, মোদক প্রহার,

ব্রমহান্দ হথেলি পর উছাল, অপ্নে জীবন-ধন কো নিহার।।

লাক্কদৌরিবা চহি ২৫গী মতম অসিদি লৈবাক নীংবগী মতম্নি। মালেমগী মীওইশিংনা চেলেঞ্জ অসিবু য়াগনি নত্ত্রগা য়ারোই হায়বসি ঐখোয়গী শিংনবা নত্তে। হৌজিক্কী ওইনা য়াম্না মরু ওইবা ওইরিবদি, মালেম অসিনা ঙসি ভারত্তা থাজবা কয়া অমগা লোয়ননা ইয়েংলিবা অসিদা, ঐখোয়না হোৎনরিবা খুদিংদা পাঙ্গল শোন্থবা কৈদৌনুংদা তৌরোইদবনি।

হৌজিক্কী নীংতম্বগী অমৃত মহোৎসবকী মতমসিদা ভারতনা লৌরিবা ৱারেপ খুদিং, হৌদোক্লিবা খোঙজং খুদিং, মখোয়না অনৌবা পাঙ্গল লেপ্তনা ফংলি অমসুং মসিগী খ্বাইদগী মরু ওইবা মরমদি ঐখোয়গী লৈবাক্কী নহারোল করোর কয়া অসিনি। ঙসিগী মতমসিদা এন.সি.সি., এন.এস.এস.তা য়াওরিবা নহা খুদিং অসি হৌজিক্কী চহি-চা অসিদা পোকপা ঙাক্তনি। অদোম খক্তনা ভারতপু ২০৪৭ ফাওবা য়াম্না লায়না পুদুনা চৎপা ঙমগনি। মরম অদুনা, অদোমগী ৱারেপ, অদোমগী হোৎনজমন্না মাঙফাওনবদা ভারতকী মঙালনা মঙফাওনগনি, ভারতনা মায় পাকপা ঙমগনি। লৈবাক নীংবদগী হেনবা লাইনীং অমত্তা লৈতে, লৈবাক্কীদমক্তা পাংথোকপা থবক্তগী হেনবা থবক অমত্তা লৈতে। লৈবাক্না খ্বাইদগী মাং থানা থমদুনা অদোম্না পাংথোকপা খুদিংমক্না লৈবাক্কী চাউখৎ-থৌরাংদা তেংবাংগনি। ঙসিদি, ঐখোয়গী নহারোলশিংনা ভারতপু স্তার্ত-অপকী মালেমদা খ্বাইদগী মকোক থোংবা মফম অহুমগী মরক্তা থম্বীরে। কোরোনাগী লুরবা তাঞ্জা অসিদা য়ুনিকোর্ন কয়া শেমখিবশিং অসিনা ভারতকী নহারোলশিংগী মপাঙ্গল উৎলি। কোরোনাগী মনুংখক্তদা য়ুনিকোর্ন ৫০দগী হেন্না থোকখিবগী মতাংদা অদোমসু অমুক্তা খন্থবীয়ু। য়ুনিকোর্ন অমমম অমসুং স্তার্ত-অপ খুদিংগী মমল অসি লুপা করোর লিশিং তরেত মখায় হেল্লি হায়বসি অদোমসু খঙনরমগনি। অসিগুম্বা ৱারোল অসিনা ইশাদা থাজবসু য়াম্না হেনগৎহল্লিবনি। অদুগা মসিদা খ্বাইদগী মরু ওইবা ৱাফম অসি করিনো হায়বা খঙবরা? মসিগী স্তার্ত-অপ লিশিং কয়া অসি লৈবাক্কী শিংনবা অমমমগী ৱারোইশিন পীনবা শেমখিবনি। খরা অমনা লৌউ-শিংউগী মতাংদা থবক তৌরি, খরনা সপ্লাই চেন শেমদোকপদা তেংবাংলি। খরনা মহৈ-মশিংগী সেক্তরদা অহোংবা পুরক্তুনা অনৌবা থৌওং কয়া পাংথোক্লি। মখোয়শিংদা লৈবাক্কীদমক্তা করিগুম্বা খরা পাংথোক্নিংবগী অপাম্বা লৈ।

মরুপশিং,

লৈবাক্না খ্বাইদগী হেন্না থমগনি হায়বগী ৱাখল্লোনগা লোয়ননা তুংলমচৎকীদমক্তা চৎপা নহারোলশিংনা লৈবাক অমদা লৈরকপা মতমদা মখোয়বু মালেমগী পাঙ্গল অমত্তনা থিংবা ঙমলোই। ঙসিগী শান্ন-খোৎনবগী মালেমদা, ভারতনা মায় পাকপা ফংলক্লিবা অসিসু য়াম্না চুনবা খুদম অমনি। শান্নরোইশিংগী হৈথোই-শিংথোইবা, মখোয়গী ৱারেপকী মরু ওইবসু লৈ, মখোয়না কন্না হোৎনবগী মরু ওইবসু লৈ, অদুগা ঙসিদি লৈবাক মীয়াম করোর ১৩০না মখোয়গী মায়-পাকপা অমসুং মায়থীবদসু শরুক য়ারবনি। ভারতকী নহা অমনা হীরম অমা হেক্তদা অতোপ্পা উমগা চাংয়েংনবা মতমদা, মহাক্কীদমক্তা লৈবাক পুম্বনা অমত্তা ওইনা লেপ্লি। ঐহাক্না হোৎনরিবা অসি মনা ফংনবা নত্তে, লৈবাক্কীদমক্তনি হায়বা ৱাখল্লোনসু ঐখোয়গী শান্নরোইশিংদা লৈরে। অসিগুম্বা ৱাখল্লোন অসিগা লোয়ননা ঐখোয়গী নহারোলশিং অমসুং তুংগী য়ুম্বীরেলশিংনা হীরম খুদিংদা মাং থাদুনা চঙশিল্লগদবনি।

মরুপশিং,

কোরোনাগী হৌজিক্কী মতমসিনা মালেমদা ভারতকী মীয়ামগী লিচৎ-শাজৎ অমসুং খুন্নাইগী পাঙ্গলবু মশক তাক্লিবনি। জনতা কর্ফিয়ুগী মতমদা লৈবাক শিনবা থুংবনা কোরোনাগী মাইয়োক্তা লান্থেংননবা অমত্তা ওইনা লেপখিবা মতমদা মালেম পুম্বনা ঙক্নখিবনি। মীওই খরনা ঐখোয়গী খুন্নাইবু করেম্নরম্মি, অদুবু মসিগী খুন্নাই অসিমক্না লৈবাক্কী ৱাফম ওইবা মতমদা মসিদগী হেনবা করিমত্তা লৈতে হায়না মালেমদা থবক্না তাকখিবনি। অচুম্বা লম্বী লৈরবা, অচুম্বা খুদম লৈরবা, ঐখোয়গী লৈবাক্না থবক থৌরম য়াম্না পাংথোক্তুনা উৎপা ঙম্মি হায়বা খুদম ওইনা উৎখিবনি।

অদোম এন.সি.সি. অমসুং এন.এস.এস.কী মীওইশিংনা কোরোনাগী ইরাং অসিদা পাংথোকখিবা ইশাগী থৌদাং অমসুং তেংবাংশিংনা মীওই খুদিংগী থম্মোই খুদুম চনখিবনি। অদোম্না এন.সি.সি. তমখিবা খুদিংমক য়ুনিফোর্ম শেৎলিঙৈদা খক্তা পাংথোক্কদবা নত্তে, শিজিন্নগদবা নত্তে হায়বসি অদোম্না নীংশিংগদবনি। মসিদা অদোমগী পুন্সিনি, মতৌ অসুম্না করম্না হিংগনি, মতমগী মতুং ইন্না করম্না তেংবাংগনি অমসুং খুন্নাইদা করম্না কান্নহনগনি হায়বা খনগদবনি। অদোম্না করিগুম্বা খুঙ্গং অমদা লৈবা ওইরবদি, মফমদুগী মহৈরোই করম্বনা স্কুল কাবা তোক্তুনা দ্রোপাউত কয়াম্না তৌরে হায়বা অদোম্না খঙদোকপা য়াই। অদোম্না মখোয়গা উন্নগনি, মখোয়গী শিংনবশিং খঙদোক্কনি, মখোয়না মহৈ-মশিং অমুক্কা হন্না তম্বা হৌনবা অদোম্না হোৎনগনি। অসুম্না তৌরবদি, এন.সি.সি.গী ৱাখল্লোনবু চাউখৎহনবদা তেংবাংগনি।

অদোম্না স্বচছতা অভিয়ানবু খুমাং চাউশিলহন্নবগীদমক্তা ইশাগী খুঙ্গং, লৈকাই, শহরদা তোঙান-তোঙানবা তীম শাদুনা তেংবাংবা য়াই। ঐখোয়না তম্লিবা লুচিংবা অমা ওইবগী গুন অসি ঐখোয়না ইশাগী খুন্নাইদা শিজিন্নবা য়াই। অদোম্না সমুদ্র মপান শেংদোকপগীদমক্তা ‘পুনিত সাগর’ পাংথোকখিবা, মীয়াম্না য়াম্না থাগৎনখিবা অদু এন.সি.সি.গী মতমগী মতুংদসু মখা চত্থহনগদবনি। অদুগা, হৌজিক্কান অসিদা লৈবাক অসিদা ‘কেৎচ দি রেন’ কেম্পেন অমগী মীয়মাগী ইহৌ অমা চত্থরি। নোংগী ঈশিংবু করম্না য়োকশিনগনি, পাৎ, তুরেলশিংবু করম্না লু-নান্না থমগনি হায়বগী মাইকৈদা অদোম্না অতোপ্পশিংদা খঙহনবা য়াই।

মরুপশিং,

মহাত্মা গান্ধীনা নীংতম লান্দা লৈবাক্কী মীচম মীয়াম্বু তোঙান-তোঙানবা থৌওংগা মরী লৈনহনখি। মসিদগী লৈবাক মীয়াম্না মখোয়গী পুন্সি মহিং তাঞ্জবা ঙমখি, মসিগা লোয়ননা নীংতম লানগী খোঙজেলসু য়াংখৎহনখি। মীওই খরনা লং চিংবগী থবক তৌই, মীওই খরনা অহল-লমনবু মহৈ তম্বীবগী থবক্তা চঙখি, মীওই খরনা শন লোইখি, মীওই খরনা সেনিতেসনগী থবক পাংথোকখি, গান্ধীজীনা হীরমশিং অসিগা নীংতম ইহৌগা মরী লৈনহনখি। মতৌ অসুম্না, ঐখোয়না নীংতম্বগী অমৃতগী মতমসিদসু ঙসিদগী হৌদুনা মথংগী চহি ২৫ ফাওবদা ঐখোয়গী থবক-থৌরম খুদিংমক লৈবাক্কী চাউখৎনবগীদমক্তা মরী লৈনহনগদবনি, লৈবাক্কী অপাম্বগা মরী লৈহনগদবনি। ঙসিদি ভারতনা মরোমদোম লেপচবা ঙম্নবা কন্না হোৎনরি। অদোম নহারোলশিংনা ভোকেল ফোর লোকেলগী ইহৌদা য়াম্না চাউনা শরুক য়াদুনা ইশাগী শরুক তম্বা য়াই।

করিগুম্বা ভারতকী নহাশিংনা ভারতকী মীওইগী হোৎনজম য়াওবা, হুমাং মনম নম্বা ফংবা পোত্থোকশিং খক্তা শিজিন্নগনি হায়না খল্লবদি, ভারতকী মরাইবক্না য়াম্না থুনা ফরক্কনি। ভোকেল ফোর লোকেলগী মন্ত্রা অসিনা অচম্বা ভারত মীয়ামগসু মরী লৈনরিবনি। মীয়াম্না করিগুম্বা মশাগী মরমদমগী পোত্থোক শিজিন্নরবদি, লমদমদুগী পোত্থোক পুথোকপা হেনগৎকনি, ক্বালিতীদসু ফগৎলক্কনি। মসিনা করিগুম্বা ওইথোক্লবদি, মফমদুগী থবক লৈবসু হেনগৎলক্কনি।

মরুপশিং,

হৌজিক্কী মতমসিদি তেক্নোলোজী অমসুং ইন্নোভেসনগীনি। হৌজিক্কী মতমসিদি দিজিতেলগী ইহৌগী মতম্নি। মসিগী য়ুগ অসিগী মীওই হায়রবদি, অদোম নহারোলশিংনি। মরম অদুনা, অহোংবা নাইবা হৌজিক্কী মতমসিদা কেদেত অমা ওইনা অদোমগী থৌদাং য়াম্না লৈ। ইহৌ অসিদা ভারতপু খ্বাইদগী মকোক ওইহন্নবগীদমক্তা অদোম্না লৈবাকপু লুচিংগদবনি অদুগা মসিদা লাকপা শিংনবা অমসুং খুদোংচাদবশিংগা মাইয়োক্নগদবনি। ঙসিদি, দিজিতেল তেক্নোলোজী অমসুং ইনফোর্মেসনগা মরী লৈনবা খুদোংচাবা লৈবা মতমদা মিস-ইনফোর্মেসনগী শিংনবা খরসু অমুক লৈ। ঐখোয়গী লৈবাক্কী মীচম মীয়াম্না লান্না শন্দোকপা পাউনা অশোকপা অকায়বা নংহন্দনবগীদমক্তা এন.সি.সি. কেদেতশিংনা মরী লৈনবা এৱিয়র্নেস কেম্পেন চত্থবা য়াই। অদুগা অদোমগী মাংদা লৈরিবা ঙসিগী মতমগী শিংনবা অমদি ভর্চুএল অমসুং রীএল লাইফকী মরক্তা খল কায়রকপা অসিনি। মসিগী থৌওং অসিগা থেংননবগীদমক্তা এন.সি.সি.না মখোয়গী কেদেতশিংগী অখন্নবা ত্রেনিং শীনবা য়াই অমসুং মসিনা অতোপ্পা মীচম মীয়ামদসু কান্নবা ফংহনগনি।

মরুপশিং,

ঐহাক্না অদোমগী মাঙদা হীরম অমগা পুথোকপা পাম্মি। হীরম অসিদি দ্রগ অমসুং নিশাগী মতাংদনি। মসিনা ঐখোয়গী নহা কয়া মাঙহনখ্রে হায়বসি অদোম্নসু নীংথিনা খঙলবনি। অদুগা এন.সি.সি. অমসুং এন.এস.এস. লৈবা স্কুল কোলেজশিংদা দ্রগনা করম্না য়ৌবা ঙমগনি। অদোম ইশানা কেদেত অমা ওইনা দ্রগতগী লাপ্না লৈবীয়ু অমসুং ইশাগা নক্নবা মীওইশিংসু মসিদগী লাপ্না লৈহনবীয়ু। এন.সি.সি. অমসুং এন.এস.এস. য়াওদবা অদোমগী মরুপশিংবুসু মসিদগী লাপ্না লৈনবা অদোম্না তেংবাংবা য়াইনা।

মরুপশিং,

অসিগুম্বা থৌওং অসিবু খুমাং চাউশিলহন্নবগীদমক্তা লৈবাক্না চহি খরগী মমাংদা পোর্তেল অমসু হৌদোকখ্রবনি। মসিগী পোর্তেল অসিদি Self4Society পোর্তেলনি। পোর্তেল অসিদা তোঙানবা অতোপ্পা পোর্তেল, কম্পেনী, ওর্গনাইজেসনশিং কয়া লাক্তুনা খুন্নাইগী অফবা ওইনবা পায়খৎলিবা থবকশিংদা খুৎশম্নখি। মসিদা ভারতকী আই.তি. অমসুং তেক কম্পেনীশিংনা য়াম্না ফজবা থবক কয়া পাংথোকখি। ঙসিদি, মসিদা ওর্গনাইজেসন লিশিং ৭ হেনবা অমসুং মীওই লাখ ২.২৫ হেনবনা মসিগা মরী লৈনরি অমসুং অঙম্বা মতেং খরা নত্ত্রগা খরা পাংদুনা লৈরি। এন.সি.সি. অমসুং এন.এস.এস.কী নহা লাখ কয়াসু পোর্তেল অসিগা মরী লৈনবা য়াই।

ইচিল ইনাওশিং।

ঐখোয়না এন.সি.সি. কেদেতপু পাকথোক চাউথোকহনবগা লোয়ননা মসিগী ইথিলবুসু হেন্না খুমাং চাউশিলহনগদবনি। ইথিল অসিবু মীয়াম খুদিংদা য়ৌহনগদবনি, খুঙ্গং খুদিংদা মসিগী খোল্লাও তাহনগদবনি, মসি ঐখোয়গী খুদিংগী থৌদাংনি। অদুগা ঐহাক্না থাজবদা মসিদা এন.সি.সি. এলম্নাইগী অচৌবা থৌদাং লৈ। এন.সি.সি. এলম্নাই সোসিএসন্না মসিগী থবকসিদা থোং অমগুম্না অমসুং নেতৱর্ক অমগুম্না থবক তৌবা য়াই। ঐহাক্না লুপা অসিগী মেম্বর অমা ওইবনিনা, ঐহাক্না লৈবাক অমসুং মীরমদা লৈরিবা এলম্নাই মরুপ খুদিংদা থোকপীরক্তুনা মিসন অসিগী শরুক অমা ওইসি হায়না হায়জরি। কেদেত অমবু ওইরবদি, মতম পুম্বদা কেদেত ওই হায়নরিবনি। ঐখোয়না মফম অমদা লৈরবসু, ইশাগী তেংবাং পীদুনা সেক্তর অমা হেক্তদা লৈরবসু, ঐখোয়গী লৌশিং অমসুং থেংনরকখিবশিংনা তুংগী চারোন শুরোন্দা য়াম্না তেংবাংবা য়াই। ঐখোয়গী লৌশিং অসিনা লুপ অমা ওইনা এন.সি.সি.বু হেন্না ফগৎহন্নবা তেংবাংবা য়াই। মসিনা মরম ওইরগা, এন.সি.সি.গী ইথিল অমসুং থৌদাংগী ৱাখল্লোনবু খুন্নাইদা শন্দোকপা অমসুং পাকথোক চাউথোকহনবা য়াগনি।

ঐখোয়না হৌজিক্কী নীংতম্বগী অমৃত মহোৎসবকী মতমসিদা হোৎনরিবা অসিনা অনৌবা ভারত অমা শেম্বগী থৌওংদা পাঙ্গল হাপকনি অমসুং এন.সি.সি.গী কেদেতশিংনা মসিদা অচৌবা থৌদাং য়াগনি হায়বগী ঐহাক্না থাজবা থম্লি। মসিগী থাজবা অসিগা লোয়ননা, ঐহাক্না অদোম খুদিংবু অমুক্কা হনা থাগৎপগা লোয়ননা য়াইফ পাউজেল পীজরি।

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

বন্দে মাতরম! বন্দে মাতরম!

***