ಹರ ಹರ ಮಹಾದೇವ್! ತ್ರಿಲೋಚನ ಮಹಾದೇವನಿಗೆ ಜಯವಾಗಲಿ! ಮಾತಾ ಶೀಟ್ಲಾ ಚೌಕಿಯಾ ದೇವಿಗೆ ಜಯವಾಗಲಿ! ಉತ್ತರ ಪ್ರದೇಶದ ಶಕ್ತಿಯುತ ಮತ್ತು ಜನಪ್ರಿಯ ಮುಖ್ಯಮಂತ್ರಿ ಶ್ರೀ ಯೋಗಿ ಆದಿತ್ಯನಾಥ್ ಜಿ, ನನ್ನ ಸಚಿವ ಸಂಪುಟದ ಸಹೋದ್ಯೋಗಿ ಡಾ. ಮಹೇಂದ್ರನಾಥ್ ಪಾಂಡೆ ಜಿ, ಯುಪಿ ಸರ್ಕಾರದ ಸಚಿವರುಗಳಾದ  ಶ್ರೀ ಅನಿಲ್ ರಾಜ್‌ಭಾರ್ ಜಿ, ನೀಲಕಂಠ ತಿವಾರಿ ಜಿ, ರವೀಂದ್ರ ಜೈಸ್ವಾಲ್ ಜಿ, ನನ್ನ ಸಂಸದೀಯ ಸಹೋದ್ಯೋಗಿಗಳಾದ ಶ್ರೀ ಬಿಪಿ ಸರೋಜ್ ಜಿ , ಶ್ರೀಮತಿ ಸೀಮಾ ದ್ವಿವೇದಿ ಜೀ, ಎಲ್ಲಾ ವಿಧಾನ ಸಭೆ ಮತ್ತು ವಿಧಾನ ಪರಿಷತ್ತಿನ ಗೌರವಾನ್ವಿತ ಸದಸ್ಯರು, ಶ್ರೀ ಶಂಕರ್ ಭಾಯಿ ಚೌಧರಿ, ಬನಾಸ್ ಡೈರಿಯ ಅಧ್ಯಕ್ಷರು ಮತ್ತು ಹೆಚ್ಚಿನ ಸಂಖ್ಯೆಯಲ್ಲಿ ಇಲ್ಲಿಗೆ ಆಗಮಿಸಿರುವ ನನ್ನ ಪ್ರೀತಿಯ ರೈತ ಸಹೋದರ ಸಹೋದರಿಯರೇ!

ವಾರಾಣಸಿಯ ಪಿಂದ್ರದ ಜನತೆಗೆ ನಮಸ್ಕಾರಗಳು! ನೆರೆಯ ಜಿಲ್ಲೆಯ ಜೌನ್‌ಪುರದ ಎಲ್ಲಾ ಸಹೋದರ ಸಹೋದರಿಯರಿಗೆ ಶುಭಾಶಯಗಳು! ಇಂದು, ಇಡೀ ವಾರಣಾಸಿ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳು ಮತ್ತೊಮ್ಮೆ ಇಡೀ ದೇಶಕ್ಕೆ ಮತ್ತು ಉತ್ತರ ಪ್ರದೇಶದ ಹಳ್ಳಿಗಳಿಗೆ, ಅದರ ರೈತರು ಮತ್ತು ಜಾನುವಾರು ಸಾಕಣೆದಾರರಿಗೆ ಬೃಹತ್ ಕಾರ್ಯಕ್ರಮಗಳಿಗೆ ಸಾಕ್ಷಿಯಾಗಿದೆ. ಈ ದಿನವು ವಿಶೇಷವಾಗಿದೆ ಏಕೆಂದರೆ ಇಂದು ದೇಶದ ಮಾಜಿ ಪ್ರಧಾನಿ ಚೌಧರಿ ಚರಣ್ ಸಿಂಗ್ ಜಿ ಅವರ ಜನ್ಮದಿನವಾಗಿದೆ. ಅವರಿಗೆ ನನ್ನ ಗೌರವಪೂರ್ವಕ ನಮನಗಳನ್ನು ಸಲ್ಲಿಸುತ್ತೇನೆ. ಅವರ ಸ್ಮರಣಾರ್ಥ ದೇಶವೇ ರೈತರ ದಿನಾಚರಣೆಯನ್ನು ಆಚರಿಸುತ್ತಿದೆ.

ಸ್ನೇಹಿತರೇ,

ಕೆಲವರಿಗೆ ಇಲ್ಲಿ ಗೋವು ಮತ್ತು ಗೋವಿನ ಸಗಣಿಯ ಬಗ್ಗೆ ಮಾತನಾಡುವುದು ಅಪರಾಧ ಮಾಡಿದಂತೆ. ಕೆಲವರಿಗೆ ಇದು ಅಪರಾಧವಾಗಿರಬಹುದು, ಆದರೆ ನಮಗೆ ಗೋವು ನಮ್ಮ ತಾಯಿ ಮತ್ತು ಅದನ್ನು ಪೂಜಿಸಲಾಗುತ್ತದೆ.  ಹಸು ಮತ್ತು ಎಮ್ಮೆಗಳನ್ನು ಗೇಲಿ ಮಾಡುವ ಜನರು ದೇಶದ 8 ಕೋಟಿ ಕುಟುಂಬಗಳ ಜೀವನವು ಜಾನುವಾರುಗಳ ಮೇಲೆ ಅವಲಂಬಿತವಾಗಿದೆ ಎಂಬುದನ್ನು ಮರೆತುಬಿಡುತ್ತಾರೆ. ಈ ಕುಟುಂಬಗಳ ಶ್ರಮದಿಂದಾಗಿ ಇಂದು ಭಾರತವು ಪ್ರತಿ ವರ್ಷ ಅಂದಾಜು ರೂ. 8.5 ಲಕ್ಷ ಕೋಟಿಮೌಲ್ಯದ ಹಾಲನ್ನು ಉತ್ಪಾದಿಸುತ್ತಿದೆ.  ಮತ್ತು ಹಾಲು ಉತ್ಪಾದನೆಯಲ್ಲಿ ತೊಡಗಿಸಿರುವ ಹಣವು ಭಾರತದಲ್ಲಿ ಉತ್ಪಾದಿಸುವ ಗೋಧಿ ಮತ್ತು ಅಕ್ಕಿಗಿಂತ ಹೆಚ್ಚು.  ಆದ್ದರಿಂದ, ಭಾರತದ ಡೈರಿ ಕ್ಷೇತ್ರವನ್ನು ಬಲಪಡಿಸುವುದು ಇಂದಿನ ನಮ್ಮ ಸರ್ಕಾರದ ಪ್ರಮುಖ ಆದ್ಯತೆಗಳಲ್ಲಿ ಒಂದಾಗಿದೆ. ಅದಕ್ಕೆ ತಕ್ಕಂತೆ ಇಂದು ಇಲ್ಲಿ ಬನಸ್ ಕಾಶಿ ಸಂಕುಲದ ಶಂಕುಸ್ಥಾಪನೆ ನಡೆದಿದೆ.  ಗೆಳೆಯರೇ, ಈಗ ಜಾಗ ಸಾಕಾಗುವುದಿಲ್ಲ. ಆದ್ದರಿಂದ, ಜಾಗರೂಕರಾಗಿರಿ. ಬನಾಸ್ ಡೈರಿಗೆ ಸಂಬಂಧಿಸಿದ ಲಕ್ಷಾಂತರ ರೈತರ ಖಾತೆಗಳಿಗೆ ಕೋಟ್ಯಂತರ ರೂಪಾಯಿಗಳನ್ನು ವರ್ಗಾಯಿಸಲಾಗಿದೆ.   ರಾಮನಗರ ಹಾಲಿನ ಘಟಕಕ್ಕೆ   ಜೈವಿಕ ಅನಿಲ ಆಧಾರಿತ ವಿದ್ಯುತ್ ಸ್ಥಾವರದ ಶಂಕುಸ್ಥಾಪನೆ ಕೂಡ ಮಾಡಲಾಗಿದೆ. ಇಡೀ ದೇಶದ ಹೈನುಗಾರಿಕೆ ಕ್ಷೇತ್ರದ ಮೇಲೆ ಸಕಾರಾತ್ಮಕ ಪರಿಣಾಮ ಬೀರುವ ಮತ್ತೊಂದು ಮಹತ್ವದ ಬೆಳವಣಿಗೆ ನಡೆದಿದೆ. ಇಂದು, ಏಕೀಕೃತ ವ್ಯವಸ್ಥೆಯನ್ನು ಪ್ರಾರಂಭಿಸಲಾಗಿದೆ ಮತ್ತು ಹಾಲಿನ ಶುದ್ಧತೆಯನ್ನು ಪ್ರಮಾಣೀಕರಿಸಲು ಅದರ ಲೋಗೋವನ್ನು ದೇಶಾದ್ಯಂತ ಬಿಡುಗಡೆ ಮಾಡಲಾಗಿದೆ. ಡೈರಿ ಕ್ಷೇತ್ರಕ್ಕೆ ಸಂಬಂಧಿಸಿದ ಈ ಪ್ರಯತ್ನಗಳ ಹೊರತಾಗಿ, ಇಂದು ಯುಪಿಯ ಲಕ್ಷಾಂತರ ಜನರಿಗೆ ತಮ್ಮ ಮನೆಗಳ ಕಾನೂನು ದಾಖಲೆಗಳನ್ನು ಅಂದರೆ ಘರೌನಿಯನ್ನು ಹಸ್ತಾಂತರಿಸಿಸಲಾಗಿದೆ, 1500 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ಯೋಜನೆಗಳನ್ನು ಉದ್ಘಾಟನೆ ಮಾಡಲಾಗಿದೆ ಅಥವಾ ವಾರಣಾಸಿಯನ್ನು ಹೆಚ್ಚು ಸುಂದರವಾಗಿಸಲು, ಹೆಚ್ಚಿನ ಸೌಲಭ್ಯಗಳೊಂದಿಗೆ ಪ್ರವೇಶಿಸಲು ಅವುಗಳ ಅಡಿಪಾಯವನ್ನು ಹಾಕಲಾಗಿದೆ. ವಾರಣಾಸಿಯನ್ನು ಹೆಚ್ಚು ಸುಂದರ, ಸುಲಭವಾಗಿ ಮತ್ತು ಅನುಕೂಲಕರವಾಗಿಸಲು 1500 ಕೋಟಿ ರೂಪಾಯಿಗಳಿಗೂ ಹೆಚ್ಚು ಮೌಲ್ಯದ ಯೋಜನೆಗಳನ್ನು ಉದ್ಘಾಟಿಸಲಾಗಿದೆ ಮತ್ತು ಅಡಿಪಾಯ ಹಾಕಲಾಗಿದೆ. ಈ ಎಲ್ಲಾ ಅಭಿವೃದ್ಧಿ ಯೋಜನೆಗಳಿಗಾಗಿ ನಿಮ್ಮೆಲ್ಲರಿಗೂ ಅಭಿನಂದನೆಗಳು, ಯುಪಿ ಮತ್ತು ದೇಶಾದ್ಯಂತದ ಪಶುಪಾಲಕರಿಗೆ ವಿಶೇಷ ಅಭಿನಂದನೆಗಳು!

ಸ್ನೇಹಿತರೇ,

ನಮ್ಮ ಹಳ್ಳಿಗಳಲ್ಲಿ ದನಗಳ ಹಿಂಡು ಸಮೃದ್ಧಿಯ ಲಕ್ಷಣವಾಗಿದ್ದ ಕಾಲವೊಂದಿತ್ತು. ಮತ್ತು ಇಲ್ಲಿ, ಎಲ್ಲರೂ ಅದನ್ನು 'ಪಶುಧನ್' ಅಥವಾ ʼಪಶು ಸಂಪತ್ತು' ಎಂದು ಕರೆಯುತ್ತಾರೆ. ಮನೆಗಳಲ್ಲಿ ಜಾನುವಾರುಗಳ ಸಂಖ್ಯೆಗೆ ಸಂಬಂಧಿಸಿದಂತೆ ಪೈಪೋಟಿ ನಡೆಯಿತು. ನಮ್ಮ ಧರ್ಮಗ್ರಂಥಗಳು ಈ ಸಾಲುಗಳನ್ನು ಹೊಂದಿದ್ದವು-

ಗಾವೋ ಮೇ ಸರ್ವತಃ

ಚೈವ ಗವಾಮ್ ಮಧ್ಯೇ ವಸಾಮ್ಯಹಮ್ ।

ಅಂದರೆ ಹಸುಗಳು ನನ್ನ ಸುತ್ತಲೂ ಇರಬೇಕು ಮತ್ತು ನಾನು ಗೋವುಗಳ ನಡುವೆ ಬದುಕಬೇಕು. ಈ ವಲಯವು ಯಾವಾಗಲೂ ಇಲ್ಲಿ ಉದ್ಯೋಗದ ಪ್ರಮುಖ ಮೂಲವಾಗಿದೆ. ಆದರೆ ಈ ಕ್ಷೇತ್ರಕ್ಕೆ ಬಹಳ ಹಿಂದೆಯೇ ಸಿಗಬೇಕಾದ ಬೆಂಬಲ ಹಿಂದಿನ ಸರಕಾರಗಳಿಂದ ಸಿಗಲಿಲ್ಲ. ಈಗ ನಮ್ಮ ಸರ್ಕಾರ ದೇಶಾದ್ಯಂತ ಈ ಪರಿಸ್ಥಿತಿಯನ್ನು ಬದಲಾಯಿಸುತ್ತಿದೆ. ನಾವು ಕಾಮಧೇನು ಆಯೋಗವನ್ನು ರಚಿಸಿದ್ದೇವೆ; ಹೈನುಗಾರಿಕೆ ಕ್ಷೇತ್ರದ ಮೂಲಸೌಕರ್ಯಕ್ಕಾಗಿ ಸಾವಿರಾರು ಕೋಟಿಗಳ ವಿಶೇಷ ನಿಧಿಯನ್ನೂ ರಚಿಸಲಾಗಿದೆ. ನಾವು ಬೃಹತ್ ಅಭಿಯಾನವನ್ನು ನಡೆಸುವ ಮೂಲಕ ಕಿಸಾನ್ ಕ್ರೆಡಿಟ್ ಕಾರ್ಡ್‌ನ ಸೌಲಭ್ಯದೊಂದಿಗೆ ಲಕ್ಷಾಂತರ ಜಾನುವಾರುಗಳನ್ನು ಸಬಲಗೊಳಿಸಿದ್ದೇವೆ. ರೈತರಿಗೆ ಉತ್ತಮ ಗುಣಮಟ್ಟದ ಮೇವು ಮತ್ತು ಬೀಜಗಳು ಸಿಗುವಂತೆ ನಿರಂತರ ಕೆಲಸ ನಡೆಯುತ್ತಿದೆ. ಮನೆಯಲ್ಲಿಯೇ ಪ್ರಾಣಿಗಳ ಚಿಕಿತ್ಸೆಗಾಗಿ, ಮನೆಯಲ್ಲಿ ಕೃತಕ ಗರ್ಭಧಾರಣೆಗಾಗಿ ರಾಷ್ಟ್ರವ್ಯಾಪಿ ಅಭಿಯಾನವನ್ನು ಸಹ ಪ್ರಾರಂಭಿಸಲಾಗಿದೆ. ಪ್ರಾಣಿಗಳಲ್ಲಿನ ಕಾಲು ಮತ್ತು ಬಾಯಿ ರೋಗಗಳ ನಿಯಂತ್ರಣಕ್ಕಾಗಿ ನಾವು ರಾಷ್ಟ್ರವ್ಯಾಪಿ ಲಸಿಕೆ ಮಿಷನ್ ಅನ್ನು ಸಹ ಪ್ರಾರಂಭಿಸಿದ್ದೇವೆ. ನಮ್ಮ ಸರ್ಕಾರ ಮಕ್ಕಳಿಗೆ ಉಚಿತವಾಗಿ ಲಸಿಕೆ ಹಾಕುವುದಲ್ಲದೆ, ಕೊರೊನಾ ಲಸಿಕೆಯನ್ನು ಉಚಿತವಾಗಿ ನೀಡುವುದಲ್ಲದೆ, ಜಾನುವಾರುಗಳನ್ನು ಉಳಿಸಲು ಹಲವಾರು ಉಚಿತ ಲಸಿಕೆಗಳನ್ನು ಸಹ ನೀಡುತ್ತಿದೆ.

ಸ್ನೇಹಿತರೇ,

ದೇಶದಲ್ಲಿ ಈ ಪ್ರಯತ್ನಗಳ ಫಲವಾಗಿ ಹಾಲಿನ ಉತ್ಪಾದನೆಯು 6-7 ವರ್ಷಗಳ ಹಿಂದೆ ಹೋಲಿಸಿದರೆ ಸುಮಾರು  ಶೇಕಡ 45ರಷ್ಟು ಹೆಚ್ಚಾಗಿದೆ.  ಅಂದರೆ, ಇದು ಸುಮಾರು ಒಂದೂವರೆ ಪಟ್ಟು ಹೆಚ್ಚಾಗಿದೆ. ಇಂದು ಭಾರತವು ವಿಶ್ವದ ಹಾಲಿನ ಸುಮಾರು ಶೇಕಡ 22ರಷ್ಟನ್ನು ಉತ್ಪಾದಿಸುತ್ತದೆ, ಇದು ಒಟ್ಟು ಉತ್ಪಾದನೆಯ ಸುಮಾರು 1/4 ಭಾಗವಾಗಿದೆ. ಇಂದು ಯುಪಿಯು ದೇಶದಲ್ಲೇ ಅತಿ ಹೆಚ್ಚು ಹಾಲು ಉತ್ಪಾದಿಸುವ ರಾಜ್ಯ ಮಾತ್ರವಲ್ಲ, ಡೈರಿ ಕ್ಷೇತ್ರದ ವಿಸ್ತರಣೆಯಲ್ಲಿಯೂ ಮುಂದೆ ಸಾಗುತ್ತಿರುವುದು ನನಗೆ ಖುಷಿ ತಂದಿದೆ.

ಸಹೋದರ ಸಹೋದರಿಯರೇ,

ದೇಶದ ಹೈನುಗಾರಿಕೆ, ಪಶುಸಂಗೋಪನೆ, ಶ್ವೇತ ಕ್ರಾಂತಿಯಲ್ಲಿನ ಹೊಸ ಶಕ್ತಿಯು ರೈತರ ಸ್ಥಿತಿಯನ್ನು ಉತ್ತಮಗೊಳಿಸುವಲ್ಲಿ ಬೃಹತ್ ಪಾತ್ರವನ್ನು ವಹಿಸುತ್ತದೆ ಎಂದು ನಾನು ದೃಢವಾಗಿ ನಂಬುತ್ತೇನೆ. ಈ ನಂಬಿಕೆಗೆ ಹಲವಾರು ಕಾರಣಗಳಿವೆ. ಮೊದಲನೆಯದಾಗಿ, ದೇಶದ 10 ಕೋಟಿಗೂ ಹೆಚ್ಚು ಸಂಖ್ಯೆಯ ಸಣ್ಣ ರೈತರಿಗೆ ಪಶುಸಂಗೋಪನೆಯು ಹೆಚ್ಚುವರಿ ಆದಾಯದ ದೊಡ್ಡ ಮೂಲವಾಗಬಹುದು. ಎರಡನೆಯದಾಗಿ, ಭಾರತದ ಡೈರಿ ಉತ್ಪನ್ನಗಳು ಬೃಹತ್ ವಿದೇಶಿ  ಮಾರುಕಟ್ಟೆಯನ್ನು ಹೊಂದಿದ್ದು, ಇದರಲ್ಲಿ ನಾವು ಮುಂದುವರಿಯಲು ಸಾಕಷ್ಟು ಸಾಧ್ಯತೆಗಳಿವೆ. ಮೂರನೆಯದಾಗಿ, ಪಶುಸಂಗೋಪನೆಯು ಮಹಿಳೆಯರ ಆರ್ಥಿಕ ಸಬಲೀಕರಣಕ್ಕೆ, ಉದ್ಯಮಶೀಲತೆಯಲ್ಲಿ ಅವರ ಭಾಗವಹಿಸುವಿಕೆಯನ್ನು ಹೆಚ್ಚಿಸಲು ಉತ್ತಮ ಮಾರ್ಗವಾಗಿದೆ. ಮತ್ತು ನಾಲ್ಕನೆಯದಾಗಿ, ನಮ್ಮ ಜಾನುವಾರುಗಳು ಜೈವಿಕ ಅನಿಲ ಮತ್ತು ಸಾವಯವ ಕೃಷಿಯ ಆಧಾರವಾಗಿದೆ. ಇನ್ನು ಮುಂದೆ ಹಾಲು ಉತ್ಪಾದಿಸುವ ಸಾಮರ್ಥ್ಯವಿಲ್ಲದ ಪ್ರಾಣಿಗಳು ಹೊರೆಯಲ್ಲ, ಆದರೆ ಅವು ಸಹ ರೈತರ ಆದಾಯವನ್ನು ಪ್ರತಿದಿನ ಹೆಚ್ಚಿಸಬಹುದು.

ಸಹೋದರ ಸಹೋದರಿಯರೇ,

ನಮ್ಮ ಡಬಲ್ ಇಂಜಿನ್ ಸರ್ಕಾರವು ರೈತರು ಮತ್ತು ಜಾನುವಾರು ಸಾಕಣೆದಾರರನ್ನು ಸಂಪೂರ್ಣ ಪ್ರಾಮಾಣಿಕತೆ ಮತ್ತು ಪೂರ್ಣ ಬಲದಿಂದ ಬೆಂಬಲಿಸುತ್ತಿದೆ. ಇಂದು ಬನಸ್ ಕಾಶಿ ಸಂಕುಲದ ಶಂಕುಸ್ಥಾಪನೆಯು ಕೂಡ ಸರಕಾರ ಮತ್ತು ಸಹಕಾರಿ ಸಹಭಾಗಿತ್ವಕ್ಕೆ ಸಾಕ್ಷಿಯಾಗಿದೆ.  ಸಹಕಾರಿ ಕ್ಷೇತ್ರದಲ್ಲಿ ಪ್ರಮುಖ ಪಾತ್ರ ವಹಿಸುವ ಪೂರ್ವಾಂಚಲದ ಬನಾಸ್ ಡೈರಿ ಮತ್ತು ರೈತರು ಹಾಗೂ ಪಶುಪಾಲಕರ ನಡುವೆ ಇಂದು ಹೊಸ ಪಾಲುದಾರಿಕೆ ಆರಂಭವಾಗಿದೆ. ಈ ಆಧುನಿಕ ಡೈರಿ ಘಟಕ ಸಿದ್ಧವಾದಾಗ, ಪಿಂಡ್ರಾ ಮಾತ್ರವಲ್ಲ, ಶಿವಪುರ, ಸೇವಾಪುರಿ, ರೊಹನಿಯಾ ಮತ್ತು ಗಾಜಿಪುರ, ಜಾನ್‌ಪುರ, ಚಂದೌಲಿ, ಮಿರ್ಜಾಪುರ, ಬಲ್ಲಿಯಾ, ಅಜಂಗಢ ಮತ್ತು ಮೌ ಜಿಲ್ಲೆಗಳ ಸಾವಿರಾರು ಮತ್ತು ಲಕ್ಷ ರೈತರೂ ಇದರ ಪ್ರಯೋಜನ ಪಡೆಯುತ್ತಾರೆ. ಬನಸ್ ಕಾಶಿ ಸಂಕುಲದಿಂದಾಗಿ ಸಮೀಪದ ಹಲವು ಗ್ರಾಮಗಳಲ್ಲಿ ಹಾಲಿನ ಸಮಿತಿಗಳು ರಚನೆಯಾಗಲಿವೆ; ಸಂಗ್ರಹಣಾ ಕೇಂದ್ರಗಳನ್ನು ಸ್ಥಾಪಿಸಲಾಗುವುದು ಮತ್ತು ಹಾಲು ಹಾಳಾಗುವ ಬಗ್ಗೆ ನಾವು ಚಿಂತಿಸಬೇಕಾಗಿಲ್ಲ. ಇದಲ್ಲದೆ, ರೈತರು ಉತ್ತಮ ತಳಿಯ ಜಾನುವಾರುಗಳಿಗಾಗಿ ಸಹಾಯವನ್ನು ಪಡೆಯುತ್ತಾರೆ; ಮತ್ತು ಪಶುಗಳಿಗೆ ಉತ್ತಮ ಗುಣಮಟ್ಟದ ಆಹಾರವೂ ಲಭ್ಯವಾಗಲಿದೆ. ಇಲ್ಲಿ ಹಾಲಿನ ಹೊರತಾಗಿ ಮೊಸರು, ಮಜ್ಜಿಗೆ, ಬೆಣ್ಣೆ, ಪನೀರ್, ಐಸ್ ಕ್ರೀಮ್ ಮತ್ತು ಸಿಹಿತಿಂಡಿಗಳನ್ನು ಸಹ ತಯಾರಿಸಲಾಗುತ್ತದೆ. ಅದೇನೆಂದರೆ, ಬನಾರಸ್‌ನ ಲಸ್ಸಿ, ಚೆನ್ನಾದಿಂದ ಮಾಡಿದ ಎಲ್ಲಾ ಸಿಹಿತಿಂಡಿಗಳು ಮತ್ತು ಲಾಂಗ್-ಲತಾ ರುಚಿಯನ್ನು ಇನ್ನಷ್ಟು ಹೆಚ್ಚಿಸುತ್ತವೆ. ಸರಿ, ಈಗ ಮಳೆಯ್ಯೋ ಸೀಸನ್ ಕೂಡ ಬಂದಿದೆ. ಒಂದು ರೀತಿಯಲ್ಲಿ ಬನಾರಸ್‌ನ ಮಾಧುರ್ಯವನ್ನು ಬನಸ್ ಕಾಶಿ ಸಂಕುಲ್ ಹೆಚ್ಚಿಸುತ್ತದೆ.

ಸಹೋದರ ಸಹೋದರಿಯರೇ,

ಸಾಮಾನ್ಯವಾಗಿ, ಹಾಲಿನ ಗುಣಮಟ್ಟದ ಸತ್ಯಾಸತ್ಯತೆಯ ಬಗ್ಗೆ ನಾವು ತುಂಬಾ ಗೊಂದಲಕ್ಕೊಳಗಾಗಿದ್ದೇವೆ. ಹಾಲನ್ನು ಖರೀದಿಸಿದರೆ ಸಾಮಾನ್ಯ ವ್ಯಕ್ತಿಗೆ ಹಾಲು ಸೇವಿಸಲು ಸುರಕ್ಷಿತವಾಗಿದೆಯೇ ಅಥವಾ ಇಲ್ಲವೇ ಎಂದು ಗುರುತಿಸುವುದು ಕಷ್ಟ. ವಿಭಿನ್ನ ಪ್ರಮಾಣೀಕರಣಗಳಿಂದಾಗಿ, ಜಾನುವಾರು ಸಾಕಣೆದಾರರು ಮತ್ತು ಹಾಲು ಒಕ್ಕೂಟಗಳು ಸೇರಿದಂತೆ ಇಡೀ ಹೈನುಗಾರಿಕೆ ವಲಯವು ಬಹಳಷ್ಟು ಸವಾಲುಗಳನ್ನು ಎದುರಿಸಬೇಕಾಯಿತು. ಇದೀಗ ದೇಶಾದ್ಯಂತ ಹೈನುಗಾರಿಕೆ ಕ್ಷೇತ್ರಕ್ಕೆ ಈ ಸವಾಲು ಪರಿಹಾರವಾಗಿದೆ. ಇಂದು ಬ್ಯೂರೋ ಆಫ್ ಇಂಡಿಯನ್ ಸ್ಟ್ಯಾಂಡರ್ಡ್ಸ್ ದೇಶಕ್ಕೆ ಏಕೀಕೃತ ವ್ಯವಸ್ಥೆಯನ್ನು ಬಿಡುಗಡೆ ಮಾಡಿದೆ. ಪ್ರಮಾಣೀಕರಣಕ್ಕಾಗಿ ಕಾಮಧೇನುವನ್ನು ಒಳಗೊಂಡ ಲೋಗೋವನ್ನು ಸಹ ಬಿಡುಗಡೆ ಮಾಡಲಾಗಿದೆ. ಈ ಪುರಾವೆ, ಈ ಲೋಗೋ ಗೋಚರಿಸಿದರೆ, ಶುದ್ಧತೆಯ ಗುರುತಿಸುವಿಕೆ ಸುಲಭವಾಗುತ್ತದೆ ಮತ್ತು ಭಾರತದ ಹಾಲಿನ ಉತ್ಪನ್ನಗಳ ವಿಶ್ವಾಸಾರ್ಹತೆಯೂ ಹೆಚ್ಚಾಗುತ್ತದೆ.

ಸ್ನೇಹಿತರೇ,

ಹೈನುಗಾರಿಕೆ ಕ್ಷೇತ್ರಕ್ಕೆ ಸಂಬಂಧಿಸಿದ ಪ್ರಾಣಿಗಳಿಂದ ಉತ್ಪತ್ತಿಯಾಗುವ ತ್ಯಾಜ್ಯವನ್ನು ದೇಶವು ಸರಿಯಾಗಿ ಬಳಸಿಕೊಳ್ಳುವ ಸಮಯ ಬಂದಿದೆ. ರಾಮನಗರದ ಹಾಲಿನ ಘಟಕದ ಬಳಿ ಜೈವಿಕ ಅನಿಲ ವಿದ್ಯುತ್ ಸ್ಥಾವರ ನಿರ್ಮಾಣವು ಅಂತಹ ಒಂದು ಪ್ರಮುಖ ಪ್ರಯತ್ನವಾಗಿದೆ. ಡೈರಿ ಘಟಕದ ಎಲ್ಲಾ ಶಕ್ತಿಯ ಅವಶ್ಯಕತೆಗಳನ್ನು ಜೈವಿಕ ಅನಿಲ ಸ್ಥಾವರದಿಂದಲೇ ಪೂರೈಸುವ ಈ ರೀತಿಯ ಯೋಜನೆಯಲ್ಲಿ ಇದು ಮೊದಲನೆಯದು. ಅಂದರೆ, ರೈತರು ಹಾಲಿನಿಂದ ಮಾತ್ರವಲ್ಲದೆ ಹಸುವಿನ ಸಗಣಿ ಮಾರಾಟದಿಂದಲೂ ಗಳಿಸಲು ಸಾಧ್ಯವಾಗುತ್ತದೆ. ಈ ಜೈವಿಕ ಅನಿಲ ಸ್ಥಾವರವು ರೈತರಿಗೆ ಸಾಮಾನ್ಯವಾಗಿ ಸಿಗುವ ದರಕ್ಕಿಂತ ಹೆಚ್ಚಿನ ಬೆಲೆಗೆ ರೈತರಿಂದ ಹಸುವಿನ ಸಗಣಿ ಖರೀದಿಸುತ್ತದೆ. ಇಲ್ಲಿ ಉತ್ಪತ್ತಿಯಾಗುವ ಜೈವಿಕ ಸ್ಲರಿಯನ್ನು ಜೈವಿಕ ಸ್ಲರಿ ಆಧಾರಿತ ಸಾವಯವ ಗೊಬ್ಬರಗಳ ಉತ್ಪಾದನೆಗೆ ಬಳಸಲಾಗುವುದು. ತಯಾರಾಗುವ ಘನ ಸಾವಯವ ಗೊಬ್ಬರವು ರಾಸಾಯನಿಕ ಗೊಬ್ಬರಕ್ಕಿಂತ ಕಡಿಮೆ ದರದಲ್ಲಿ ರೈತರಿಗೆ ದೊರೆಯಲಿದೆ. ಇದು ಸಾವಯವ ಕೃಷಿ-ನೈಸರ್ಗಿಕ ಕೃಷಿಯ ಬೆಳವಣಿಗೆಗೆ ಕಾರಣವಾಗುತ್ತದೆ ಮತ್ತು ನಿರ್ಗತಿಕ ಪ್ರಾಣಿಗಳ ಸೇವೆಯನ್ನು ಉತ್ತೇಜಿಸುತ್ತದೆ.

ಸ್ನೇಹಿತರು,

ಭಾರತದಲ್ಲಿ ಸಾವಯವ ಕೃಷಿ ಮತ್ತು ನೈಸರ್ಗಿಕ ಪ್ರಕ್ರಿಯೆಗಳನ್ನು ಬಳಸುತ್ತಿದ್ದ ಸಮಯವಿತ್ತು. ಸಾವಯವ ಕೃಷಿಯಲ್ಲಿ ಯಾವುದೇ ಕಲಬೆರಕೆ ಇಲ್ಲ ಮತ್ತು ಯಾವುದೇ ರಾಸಾಯನಿಕಗಳನ್ನು ಕೃಷಿಯಲ್ಲಿ ಬಳಸಲಾಗುವುದಿಲ್ಲ. ಎಲ್ಲಾ ಕೃಷಿ ಉಳಿಕೆಗಳು, ಉತ್ಪನ್ನಗಳು ಮತ್ತು ಕೃಷಿಯಲ್ಲಿ ತೊಡಗಿರುವ ಪ್ರಾಣಿಗಳ ಉತ್ಪನ್ನಗಳನ್ನು ಈ ರೀತಿಯ ಕೃಷಿಗೆ ಬಳಸಲಾಗುತ್ತಿತ್ತು. ರಸಗೊಬ್ಬರಗಳಿರಲಿ, ಕೀಟನಾಶಕಗಳಿರಲಿ ಎಲ್ಲವನ್ನೂ ನೈಸರ್ಗಿಕವಾಗಿ ತಯಾರಿಸಿ ಬಳಸಲಾಗುತ್ತಿತ್ತು. ಆದರೆ ಕಾಲಕ್ರಮೇಣ ನೈಸರ್ಗಿಕ ಕೃಷಿಯ ವ್ಯಾಪ್ತಿ ಕುಗ್ಗಿ, ರಾಸಾಯನಿಕ ಕೃಷಿಯ ಮೇಲುಗೈ ಸಾಧಿಸಿತು. ಭೂಮಿ ತಾಯಿಯ ಪುನರುಜ್ಜೀವನಕ್ಕಾಗಿ, ನಮ್ಮ ನೆಲವನ್ನು ರಕ್ಷಿಸಲು, ಮುಂದಿನ ಪೀಳಿಗೆಯ ಭವಿಷ್ಯವನ್ನು ಸುಭದ್ರಗೊಳಿಸಲು, ಈಗ ನಾವು ಮತ್ತೊಮ್ಮೆ ಸಾವಯವ ಕೃಷಿಯತ್ತ ಮುಖ ಮಾಡಬೇಕಾಗಿದೆ. ಇದು ಇಂದಿನ ಕಾಲದ ಅಗತ್ಯವಾಗಿದೆ. ಹಾಗಾಗಿ, ರೈತರಿಗೆ ಅರಿವು ಮೂಡಿಸಲು ಮತ್ತು ನೈಸರ್ಗಿಕ ಕೃಷಿಯನ್ನು ಉತ್ತೇಜಿಸಲು ಸರ್ಕಾರವು ದೊಡ್ಡ ಅಭಿಯಾನವನ್ನು ನಡೆಸುತ್ತಿದೆ. ಮತ್ತು ಇಂದು ನಾವು 75 ವರ್ಷಗಳ ಸ್ವಾತಂತ್ರ್ಯ 'ಅಮೃತ ಮಹೋತ್ಸವ'ವನ್ನು ಆಚರಿಸುತ್ತಿರುವಾಗ, ನಾನು ದೇಶವಾಸಿಗಳಿಗೆ, ನನ್ನ ರೈತ ಸಹೋದರ ಸಹೋದರಿಯರಿಗೆ, ವಿಶೇಷವಾಗಿ ನನ್ನ ಸಣ್ಣ ರೈತರಿಗೆ ರೈತರ ದಿನದಂದು, ನೀವು ನೈಸರ್ಗಿಕ ಕೃಷಿ ಮತ್ತು ಸಾವಯವ ಕೃಷಿಯತ್ತ ಮುನ್ನಡೆಯಬೇಕೆಂದು ಒತ್ತಾಯಿಸುತ್ತೇನೆ.  ವೆಚ್ಚ ಕಡಿಮೆ ಮತ್ತು ಉತ್ಪನ್ನ ಹೆಚ್ಚು. ಇದು ಕೃಷಿಯ ಅಗ್ಗದ ವಿಧಾನವಾಗಿದೆ, ಸುರಕ್ಷಿತ ವಿಧಾನವಾಗಿದೆ ಮತ್ತು ಇಂದು ಪ್ರಪಂಚದಾದ್ಯಂತ, ಸಾವಯವ ಕೃಷಿಯಿಂದ ಉತ್ಪತ್ತಿಯಾಗುವ ಬೆಳೆಗಳ ಮೌಲ್ಯವು ತುಂಬಾ ಹೆಚ್ಚಾಗಿದೆ. ಇದು ನಮ್ಮ ಕೃಷಿ ಕ್ಷೇತ್ರವನ್ನು ಸ್ವಾವಲಂಬಿಯಾಗಿಸುವ ನಿಟ್ಟಿನಲ್ಲಿ ಒಂದು ದೊಡ್ಡ ಹೆಜ್ಜೆಯಾಗಿದೆ. ಸಾವಯವ ಕೃಷಿ ಕ್ಷೇತ್ರದಲ್ಲಿ ನಿಮಗೆ ಹಲವು ಹೊಸ ಸಾಧ್ಯತೆಗಳಿವೆ ಎಂದು ನಾನು ದೇಶದ ನವೋದ್ಯಮದ ವಲಯಕ್ಕೆ, ಯುವಕರಿಗೆ ಹೇಳುತ್ತೇನೆ. ನಮ್ಮ ಯುವಕರು ಈ ಅವಕಾಶವನ್ನು ಸಂಪೂರ್ಣವಾಗಿ ಬಳಸಿಕೊಳ್ಳಬೇಕು. ಇಲ್ಲಿ ವೇದಿಕೆಗೆ ಬರುವ ಮುನ್ನವೇ ಇಲ್ಲಿ ಹಲವಾರು ಯುವಕರನ್ನು ಭೇಟಿಯಾಗುವ ಅವಕಾಶ ಸಿಕ್ಕಿತು. ಸರ್ಕಾರದ ಯೋಜನೆಗಳ ಭಾಗವಾಗಿ ಅವರು ಸಾಧಿಸಿದ ಅನೇಕ ಸಾಹಸಪೂರ್ಣ ಕಾರ್ಯಗಳ ಬಗ್ಗೆ ಕೇಳಲು ನನಗೆ ತುಂಬಾ ಸಂತೋಷವಾಯಿತು, ಅವರ ಜೀವನದಲ್ಲಿ ಎಷ್ಟು ದೊಡ್ಡ ಬದಲಾವಣೆಯಾಗಿದೆ! ಯೋಜನೆಗಳ ಮೇಲಿನ ನನ್ನ ನಂಬಿಕೆ ಇನ್ನಷ್ಟು ಬಲಗೊಂಡಿದೆ.

ಸಹೋದರ ಸಹೋದರಿಯರೇ,

ಸ್ವಾಮಿತ್ವ ಯೋಜನೆಯು ಗ್ರಾಮಗಳು ಮತ್ತು ರೈತರನ್ನು ಸ್ವಾವಲಂಬಿಗಳನ್ನಾಗಿ ಮಾಡುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ, ಅವರನ್ನು ಅಕ್ರಮ ಉದ್ಯೋಗದಿಂದ ಮುಕ್ತಗೊಳಿಸುತ್ತದೆ. ಯೋಗಿಯವರ ನಾಯಕತ್ವದಲ್ಲಿ ಯುಪಿ ಕೂಡ ಈ ವಿಷಯದಲ್ಲಿ ಮುನ್ನಡೆ ಸಾಧಿಸುತ್ತಿರುವುದಕ್ಕೆ ನನಗೆ ಸಂತೋಷವಾಗಿದೆ. ಯುಪಿಯ ಎಲ್ಲಾ 75 ಜಿಲ್ಲೆಗಳಲ್ಲಿ 23 ಲಕ್ಷಕ್ಕೂ ಹೆಚ್ಚು ಘರೌನಿಗಳನ್ನು ಸಿದ್ಧಪಡಿಸಲಾಗಿದೆ. ಈ ಪೈಕಿ ಸುಮಾರು 21 ಲಕ್ಷ ಕುಟುಂಬಗಳಿಗೆ ಇಂದು ಈ ದಾಖಲೆಗಳನ್ನು ನೀಡಲಾಗಿದೆ. ಅವರ ಕೈಯಲ್ಲಿ ಈ ಕಾಗದಪತ್ರಗಳು ಇದ್ದಾಗ, ಸಮಾಜದ ಬಡವರು, ದೀನದಲಿತರು ಮತ್ತು ಹಿಂದುಳಿದ ವರ್ಗದವರು ತಮ್ಮ ಮನೆಗಳನ್ನು ಅಕ್ರಮವಾಗಿ ವಾಸಿಸುವ ಚಿಂತೆಯಿಂದ ಮುಕ್ತರಾಗುತ್ತಾರೆ. ಹಿಂದಿನ ಸರ್ಕಾರಗಳ ಆಡಳಿತದಲ್ಲಿ ಇಲ್ಲಿ ವಿಜೃಂಭಿಸಿದ ಅಕ್ರಮ ಒತ್ತುವರಿ ಪ್ರವೃತ್ತಿಗೂ ಕಡಿವಾಣ ಹಾಕಲಾಗುವುದು. ಮನೆ ಪಡೆಯುವ ಮೂಲಕ, ಅಗತ್ಯವಿದ್ದರೆ ಬ್ಯಾಂಕ್‌ಗಳಿಂದ ಸಾಲ ಪಡೆಯುವುದು ಸಹ ಈಗ ಸುಲಭವಾಗುತ್ತದೆ. ಇದರಿಂದ ಹಳ್ಳಿಗಳ ಯುವಕರಿಗೆ ಉದ್ಯೋಗ, ಸ್ವಯಂ ಉದ್ಯೋಗಕ್ಕೆ ಹೊಸ ಮಾರ್ಗ ದೊರೆಯಲಿದೆ.

ಸಹೋದರ ಸಹೋದರಿಯರೇ,

ಅಭಿವೃದ್ಧಿ ವಿಚಾರದಲ್ಲಿ ಕಾಶಿಯು ಮಾದರಿಯಾಗುತ್ತಿದೆ. ಪ್ರಾಚೀನ ಅಸ್ಮಿತೆಯನ್ನು ಉಳಿಸಿಕೊಂಡು ನಮ್ಮ ನಗರಗಳು ಹೊಸ ಮೈಕಟ್ಟನ್ನು ಹೇಗೆ ಅಳವಡಿಸಿಕೊಳ್ಳುತ್ತವೆ ಎನ್ನುವುದು ಕಾಶಿಯಲ್ಲಿ ಗೋಚರಿಸುತ್ತದೆ. ಇಂದು ಉದ್ಘಾಟನೆ ಹಾಗೂ ಶಂಕುಸ್ಥಾಪನೆ ನಡೆದಿರುವ ಯೋಜನೆಗಳು ‘ಭವ್ಯ ಕಾಶಿ, ದಿವ್ಯ ಕಾಶಿ’ ಅಭಿಯಾನಕ್ಕೆ ಮತ್ತಷ್ಟು ಚಾಲನೆ ನೀಡಲಿವೆ. ನಗರದ 6 ವಾರ್ಡ್‌ಗಳ ಪುನರಾಭಿವೃದ್ಧಿ ಕಾರ್ಯ, ಕಾಲಭೈರವ್ ಜಿ ಸೇರಿದಂತೆ 700 ಕ್ಕೂ ಹೆಚ್ಚು ಸ್ಥಳಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳ ಅಳವಡಿಕೆಯು ಕಾಶಿಯ ಸ್ಮಾರ್ಟ್ ಮತ್ತು ಸುರಕ್ಷಿತ ಸೌಲಭ್ಯಗಳತ್ತ ಸಾಗಲು ಮತ್ತಷ್ಟು ವೇಗವನ್ನು ನೀಡಿದೆ. ಮಹಾನ್ ಸಂತ ಪೂಜ್ಯ ಶ್ರೀ ರವಿದಾಸ್ ಜಿ ಅವರ ಜನ್ಮಸ್ಥಳವನ್ನು ಅಭಿವೃದ್ಧಿಪಡಿಸುವ ಕೆಲಸವೂ ತ್ವರಿತ ಗತಿಯಲ್ಲಿ ನಡೆಯುತ್ತಿದೆ. ಲಂಗರ್ ಹಾಲ್ ನಿರ್ಮಾಣದಿಂದ ದೇಶದ ವಿವಿಧೆಡೆಯಿಂದ ಬರುವ ಭಕ್ತರಿಗೆ ಸಾಕಷ್ಟು ಅನುಕೂಲವಾಗಲಿದೆ.

ಸಹೋದರ ಸಹೋದರಿಯರೇ,

ಇಂದು ವಾರಣಾಸಿಯ ವೃತ್ತಗಳು ಸುಂದರವಾಗುತ್ತಿವೆ, ರಸ್ತೆಗಳು ಅಗಲವಾಗುತ್ತಿವೆ, ಹೊಸ ಪಾರ್ಕಿಂಗ್ ಸ್ಥಳಗಳನ್ನು ನಿರ್ಮಿಸಲಾಗುತ್ತಿದೆ, ಇದರಿಂದಾಗಿ ನಗರದಲ್ಲಿ ಟ್ರಾಫಿಕ್ ಜಾಮ್ ಪರಿಸ್ಥಿತಿ ಸಾಕಷ್ಟು ಸುಧಾರಿಸಿದೆ. ವಾರಣಾಸಿ ಕ್ಯಾಂಟ್‌ನಿಂದ ಲಹರ್ತಾರಾ ಮೂಲಕ ಪ್ರಯಾಗ್‌ರಾಜ್‌ವರೆಗಿನ ಹೆದ್ದಾರಿ ವಿಸ್ತರಣೆಯ ಮೇಲಿನ ಒತ್ತಡದ ಬಗ್ಗೆ ನಿಮಗೆ ಚೆನ್ನಾಗಿ ತಿಳಿದಿದೆ. ಈಗ 6 ಲೇನ್‌ಗಳಿಂದ ದೆಹಲಿ, ಆಗ್ರಾ, ಕಾನ್ಪುರ, ಪ್ರಯಾಗ್‌ರಾಜ್‌ಗಳಿಂದ ಪ್ರಯಾಣಿಸುವ ಎಲ್ಲಾ ಪ್ರಯಾಣಿಕರು ಮತ್ತು ವಾಣಿಜ್ಯ ವಾಹನಗಳಿಗೆ ಸಾಕಷ್ಟು ಪ್ರಯೋಜನವಾಗಲಿದೆ! ಇದಲ್ಲದೆ, ನಗರದ ಇತರ ಪ್ರದೇಶಗಳಿಗೆ ಪ್ರಯಾಣಿಸುವುದು ಸಹ ಸುಲಭವಾಗುತ್ತದೆ. ಈ ರಸ್ತೆಯನ್ನು ಜಿಲ್ಲೆಯ ಪ್ರವೇಶ ದ್ವಾರವಾಗಿ ಅಭಿವೃದ್ಧಿಪಡಿಸಲಾಗುವುದು. ವಾರಣಾಸಿ-ಭದೋಹಿ-ಗೋಪಿಗಂಜ್ ರಸ್ತೆ ಅಗಲೀಕರಣದಿಂದಾಗಿ ನಗರದಿಂದ ಹೊರಡುವ ವಾಹನಗಳು ರಿಂಗ್ ರೋಡ್ ಹಂತ-2 ಮೂಲಕ ಹೊರಭಾಗದಿಂದ ಹೋಗಬಹುದಾಗಿದೆ. ಇದರಿಂದ ಭಾರೀ ಟ್ರಾಫಿಕ್ ಜಾಮ್‌ಗೆ ಮುಕ್ತಿ ಸಿಗಲಿದೆ.

ಸಹೋದರ ಸಹೋದರಿಯರೇ,

ಆರೋಗ್ಯ, ಶಿಕ್ಷಣ ಮತ್ತು ಸಂಶೋಧನಾ ಕೇಂದ್ರವಾಗಿ ಕಾಶಿಯ ಗುರುತನ್ನು ಬಲಪಡಿಸಲು ನಿರಂತರ ಪ್ರಯತ್ನಗಳು ನಡೆಯುತ್ತಿವೆ. ಇಂದು ಆಯುಷ್ ಆಸ್ಪತ್ರೆ ಉದ್ಘಾಟನೆಗೊಂಡಿದ್ದು, ಹೊಸ ಹೋಮಿಯೋಪತಿ ವೈದ್ಯಕೀಯ ಕಾಲೇಜು ಸ್ಥಾಪನೆ ಕಾರ್ಯ ಆರಂಭವಾಗಿದೆ. ಇಂತಹ ಸೌಲಭ್ಯಗಳೊಂದಿಗೆ ಕಾಶಿಯು ಭಾರತೀಯ ವೈದ್ಯ ಪದ್ಧತಿಯ ಪ್ರಮುಖ ಕೇಂದ್ರವಾಗಿಯೂ ಹೊರಹೊಮ್ಮಲಿದೆ. ರೀಜನಲ್ ರೆಫರೆನ್ಸ್ ಸ್ಟ್ಯಾಂಡರ್ಡ್ ಲ್ಯಾಬೊರೇಟರಿಯ ರಚನೆಯೊಂದಿಗೆ, ನೀರಿನ ಪರೀಕ್ಷೆ, ಬಟ್ಟೆ ಮತ್ತು ಕಾರ್ಪೆಟ್‌ಗಳಿಗೆ ಸಂಬಂಧಿಸಿದ ಪರೀಕ್ಷೆಗಳನ್ನು ಇಲ್ಲಿ ಮಾಡಲಾಗುತ್ತದೆ. ಇದು ನೇಕಾರರಿಗೆ ಮತ್ತು ವಾರಣಾಸಿ ಮತ್ತು ಸುತ್ತಮುತ್ತಲಿನ ಅನೇಕ ಕೈಗಾರಿಕೆಗಳಿಗೆ ನೇರವಾಗಿ ಪ್ರಯೋಜನವನ್ನು ನೀಡುತ್ತದೆ. ಅದೇ ಸಮಯದಲ್ಲಿ, ಅಂತರರಾಷ್ಟ್ರೀಯ ಅಕ್ಕಿ ಸಂಶೋಧನಾ ಕೇಂದ್ರದಲ್ಲಿ ಸ್ಥಾಪಿಸಲಾದ ಹೊಸ ವೇಗ ತಳಿ ಸೌಲಭ್ಯದೊಂದಿಗೆ, ಮೊದಲಿಗಿಂತ ಹೊಸ ಭತ್ತವನ್ನು ಅಭಿವೃದ್ಧಿಪಡಿಸಲು ಕಡಿಮೆ ಸಮಯ ತೆಗೆದುಕೊಳ್ಳುತ್ತದೆ.

ಸಹೋದರ ಸಹೋದರಿಯರೇ,

ಕಾಶಿ ಮತ್ತು ಉತ್ತರ ಪ್ರದೇಶದ ಅಭಿವೃದ್ಧಿಯಲ್ಲಿ ನಾನು ಡಬಲ್ ಪವರ್ ಮತ್ತು ಡಬಲ್ ಇಂಜಿನ್‌ನೊಂದಿಗೆ ಡಬಲ್ ಅಭಿವೃದ್ಧಿಯ ಬಗ್ಗೆ ಮಾತನಾಡುವಾಗ, ಕೆಲವರು ತುಂಬಾ ಅಸಮಾಧಾನಗೊಳ್ಳುತ್ತಾರೆ. ಉತ್ತರ ಪ್ರದೇಶದ ರಾಜಕೀಯವನ್ನು ಕೇವಲ ಜಾತಿ, ಮತ, ಧರ್ಮಗಳ ಪರಿಧಿಯ ಮೂಲಕವೇ ಕಣ್ಣಾರೆ ಕಂಡವರು ಇವರು. ಈ ಜನರು ಯುಪಿ ಅಭಿವೃದ್ಧಿ ಹೊಂದಲು ಬಯಸಲಿಲ್ಲ ಅಥವಾ ಆಧುನಿಕತೆಯನ್ನು  ಕಲ್ಪಿಸಿಕೊಳ್ಳಲಿಲ್ಲ. ಶಾಲೆಗಳು, ಕಾಲೇಜುಗಳು, ಆಸ್ಪತ್ರೆಗಳು, ರಸ್ತೆಗಳು, ನೀರು, ವಿದ್ಯುತ್, ಬಡವರ ಮನೆ, ಗ್ಯಾಸ್ ಸಂಪರ್ಕಗಳು, ಶೌಚಾಲಯಗಳು: ಇವುಗಳನ್ನು ಅವರು ಅಭಿವೃದ್ಧಿ ಎಂದು ಪರಿಗಣಿಸುವುದಿಲ್ಲ. 'ಸಬ್ಕಾ ಸಾಥ್, ಸಬ್ಕಾ ವಿಕಾಸ್, ಸಬ್ಕಾ ವಿಶ್ವಾಸ ಮತ್ತು ಸಬ್ಕಾ ಪ್ರಯಾಸ್' ಎಂಬ ಈ ಭಾಷೆ ಅವರ ನಿಘಂಟು ಅಥವಾ ಪಠ್ಯಕ್ರಮದಲ್ಲಿ ಇಲ್ಲ. ಅವರ ಪಠ್ಯಕ್ರಮ, ನಿಘಂಟು, ಭಾಷೆ ಮತ್ತು ಆಲೋಚನೆಗಳಲ್ಲಿ ಏನಿದೆ ಎಂಬುದು ನಿಮಗೆಲ್ಲರಿಗೂ ತಿಳಿದಿದೆ. ಅವರು ತಮ್ಮ ಪಠ್ಯಕ್ರಮದಲ್ಲಿ ಹೊಂದಿದ್ದಾರೆ - ಮಾಫಿಯಾ, ಸ್ವಜನಪಕ್ಷಪಾತ. ಅವರು ಮನೆ ಮತ್ತು ಜಮೀನುಗಳನ್ನು ಅಕ್ರಮವಾಗಿ ವಶಪಡಿಸಿಕೊಂಡಿದ್ದಾರೆ. ಹಿಂದಿನ ಸರ್ಕಾರಗಳ ಅವಧಿಯಲ್ಲಿ ಉತ್ತರಪ್ರದೇಶದ ಜನರು ಪಡೆದುಕೊಂಡದ್ದಕ್ಕೂ ಇಂದು ನಮ್ಮ ಸರ್ಕಾರದಿಂದ ಯುಪಿಯ ಜನರು ಪಡೆಯುತ್ತಿರುವುದಕ್ಕೂ ಇರುವ ವ್ಯತ್ಯಾಸ ಸ್ಪಷ್ಟವಾಗಿದೆ. ನಾವು ಯುಪಿಯಲ್ಲಿ ಪರಂಪರೆಯನ್ನು ಉತ್ತೇಜಿಸುವುದು ಮತ್ತು ಹೆಚ್ಚಿಸುವುದು ಮಾತ್ರವಲ್ಲದೆ ಯುಪಿಯನ್ನು ಅಭಿವೃದ್ಧಿಪಡಿಸುತ್ತಿದ್ದೇವೆ.

ಆದರೆ ತಮ್ಮ ಸ್ವಾರ್ಥದ ಬಗ್ಗೆ ಮಾತ್ರ ಯೋಚಿಸುವ ಈ ಜನರಿಗೆ ಯುಪಿ ಅಭಿವೃದ್ಧಿ ಇಷ್ಟವಾಗುತ್ತಿಲ್ಲ. ಪರಿಸ್ಥಿತಿ ಹೇಗಿದೆಯೆಂದರೆ ಪೂರ್ವಾಂಚಲದ ಅಭಿವೃದ್ಧಿ, ಬಾಬಾರವರ ಕೆಲಸ, ವಿಶ್ವನಾಥಧಾಮದ  ಕೆಲಸಗಳಿಗೆ ಕೂಡ ಈ ಜನರು ಆಕ್ಷೇಪಿಸುವ ಪರಿಸ್ಥಿತಿ ನಿರ್ಮಾಣವಾಗಿದೆ.  ಕಳೆದ ಭಾನುವಾರ 1.5 ಲಕ್ಷಕ್ಕೂ ಹೆಚ್ಚು ಭಕ್ತರು ಕಾಶಿ ವಿಶ್ವನಾಥ ಧಾಮಕ್ಕೆ ದರ್ಶನಕ್ಕೆ ಆಗಮಿಸಿದ್ದರು ಎಂದು ನನಗೆ ತಿಳಿಸಲಾಗಿದೆ. ಯುಪಿಯನ್ನು ದಶಕಗಳ ಹಿಂದೆ ತಳ್ಳಿದ ಈ ಜನರ ಅಸಮಾಧಾನವು ಇನ್ನೂ ಹೆಚ್ಚಾಗುತ್ತದೆ. ಯುಪಿಯ ಜನರು ಡಬಲ್ ಎಂಜಿನ್ ಸರ್ಕಾರದೊಂದಿಗೆ ದೃಢವಾಗಿ ನಿಂತಿದ್ದಾರೆ ಮತ್ತು ನಮಗೆ ಆಶೀರ್ವಾದ ಮಾಡುತ್ತಿದ್ದಾರೆ; ಮತ್ತು ಆಶೀರ್ವಾದಗಳು ಹೆಚ್ಚಾದಂತೆ, ಆ ಜನರ ಕೋಪವೂ ಹೆಚ್ಚಾಗಲು ಪ್ರಾರಂಭವಾಗುತ್ತದೆ.

ಸ್ನೇಹಿತರೇ,

ಯುಪಿ ಅಭಿವೃದ್ಧಿಗಾಗಿ ಡಬಲ್ ಇಂಜಿನ್ ಸರ್ಕಾರವು ಹಗಲಿರುಳು ಶ್ರಮಿಸುತ್ತಲೇ ಇರುತ್ತದೆ. ಮಹಾದೇವನ ಆಶೀರ್ವಾದ ಮತ್ತು ಕಾಶಿಯ ಜನರ ಪ್ರೀತಿಯಿಂದ ನಾವು ಅಭಿವೃದ್ಧಿಯ ಹೊಸ ದಾಖಲೆಗಳನ್ನು ರಚಿಸುವುದನ್ನು ಮುಂದುವರಿಸುತ್ತೇವೆ. ಈ ನಂಬಿಕೆಯೊಂದಿಗೆ, ಎಲ್ಲಾ ಅಭಿವೃದ್ಧಿ ಯೋಜನೆಗಳಿಗಾಗಿ ನಾನು ನಿಮ್ಮೆಲ್ಲರನ್ನು ಅಭಿನಂದಿಸುತ್ತೇನೆ. ನನ್ನೊಂದಿಗೆ ಜೋರಾಗಿ ಹೇಳಿ: ಭಾರತ್ ಮಾತಾ ಕೀ ಜೈ, ಭಾರತ್ ಮಾತಾ ಕೀ ಜೈ, ಭಾರತ್ ಮಾತಾ ಕೀ ಜೈ. ತುಂಬ ಧನ್ಯವಾದಗಳು.

ಸೂಚನೆ: ಇದು ಪ್ರಧಾನಮಂತ್ರಿಯವರ ಭಾಷಣದ ಅಂದಾಜು ಅನುವಾದವಾಗಿದೆ. ಮೂಲ ಭಾಷಣವನ್ನು ಹಿಂದಿಯಲ್ಲಿ ಮಾಡಲಾಯಿತು.

***