হর হর মহাদেব! ত্রিলোচন মহাদেবনা য়াইফরে! ইমা শীতলা চোকিয়া দেবীজীনা য়াইফরে! উত্তর প্রদেশকী থৱাই য়াওবা অমসুং মীয়াম্না য়াবা মুখ্য মন্ত্রী, শ্রীমান য়োগী অদিত্যনাথজী, কেন্দ্রগী মন্ত্রী মন্দলদা লৈবীরিবা ঐহাক্কী মরুপ, দাঃ মহেন্দ্র নাথ পান্দেজী, য়ু.পি. সরকারগী মন্ত্রী, শ্রী অনিল রাজভরজী, নিলকন্থ তিৱারীজী, রবিন্দ্র জৈস্বালজী, পার্লীয়ামেন্ততা লৈবীরিবা ঐহাক্কী মরুপ, শ্রী বীপী সরোজজী, শ্রীমতি সীমা দ্বিৱেদিজী, বিধান সভা অমসুং বিধান পরিশদকী মীওই খুদিংমক, বনাস দাইরীগী চেয়রপর্সন, শ্রী শঙ্কর ভাই চৌধরী অমসুং মীশিং য়াম্না লেংবীরক্লিবা ঐহাক্কী নুংশিরবা লৌমী ইচিল-ইনাওশিং!

বরানসি কে ইস পিন্দ্রা খেত্রা কে লোগন কে প্রনাম করত হাইলা! পরোস কে জিলা জোনপুর কে সব বন্ধু এবম ভগিনী লোগন কে ভী প্রনাম! ঙসি, বরানসি অমসুং মনাক নকপগী লমদম পুম্নমক, লৈবাক্কী মীয়াম, উত্তর প্রদেশকী খুঙ্গং, লৌমী, য়েন-ঙানু অমসুং শা-শন লোইবশিংনা অচৌবা থৌরম অমসুং অহোংবা অমা উরে। ঙসিগী নুমিৎ অসি পুৱারীগী ওইনসু য়াম্না নীংশিংনিংঙাই ওইবগী মরমদি, ঙসিগী নুমিৎ অসি হান্নগী প্রধান মন্ত্রী ওবীরম্বা, শ্রী চৌধরী চরন সিংহগী মপোক নুমিৎসু ওইবগীনি। ঐহাক্না মহাক্কী মফমদা থম্মোই শেংনা ইকায় খুম্নবা উৎচরি। মহাকপু নীংশিংবা ওইনা, নুমিৎ অসিবু কিসান দিবস হায়নসু পালন তৌরি।

মরুপশিং,

ঐখোয়গী মফমসিদা শনগী ৱারী শাবা, গোবর্ধনগী ৱারী শাবসি মীওই খরনা অরানবা তৌবা তাহল্লে। শন হায়বসি মীওই খরগী অরানবা থৌওং ওইরম্বা য়াই, ঐখোয়গীদি মসিনা ইমানি, খুরুমজনীংঙাইনি। শন-ইরোইবু করেম্নরিবা মীওইশিংনা মসিনা লৈবাক্কী ইমুং করোর ৮গী হিংবগী পাম্বৈ ওইনরি হায়বসি কাওরে। হায়রিবা ইমুংশিং অসিনা হোৎনবদগী, ঙসিদি ভারতনা চহি খুদিংগী লুপা করোর ৮ মখায়গী শেনফমগী শঙ্গোম পুথোক্লি। ভারত্তা গেহু অমসুং চেঙ পুথোকপগী চাংদগী মসিগী শেনফম অসিনা চাং য়াম্না হেল্লি, শঙ্গোমগী মমল অসিনা য়াম্না হেল্লি। মরম অদুনা, ভারতকী দাইরী সেক্তরবু হেন্না মপাঙ্গল লৈহনবা অসি ঐখোয়গী সরকারনা খ্বাইদগী হেনবা মিৎয়েং চঙবশিংগী মনুংদা অমা ওইরি। মসিগা মরী লৈননা, মফমসিদা বনাস কাশি শঙ্কুলগী উরেপ উয়ুং তম্লি। মরুপশিং, হৌজিক্তি লম য়াম্না পিকশিল্লক্লে, মফম লৈশিল্লক্ত্রে, অদুনা ঐখোয়না লৈরিবা মফমশিং অসি চেকশিন্না থমদবা য়াদ্রে। বনাস দাইরীগা মরী লৈনবা লৌমী লাখ কয়াগী বেঙ্ক একাউন্ততা লুপা করোর কয়া হাপখ্রে, রাম্নগরগী শঙ্গোমগী প্লান্ত চলাইনবা বাইওগ্যাস্তা য়ুম্ফম ওইবা মৈ পুথোকপগী প্লান্তকী উরেপ উয়ুং তমখ্রে। য়াম্না মরু ওইবা থৌদোক অমা থোক্লে অমসুং মসিনা দাইরী সেক্তর পুম্বদা কান্নবা পীরগনি। ঙসিদি, শঙ্গোমগী অশেংবা অমসুং অফবা মগুন তাক্নবগীদমক্তা লৈবাক শিনবা থুংবদা অপুনবা পথাপ অমা অমসুং মসিগী লোগোসু চৎনবা হৌরে। দাইরী সেক্তরগা মরী লৈনবা খোঙথাংশিংগা লোয়ননা, য়ু.পি.গী মীওই লাখ কয়াদা মশাগী য়ুমগী আইনগী চে-চাং, হায়বদি ঘরোনি অসি শিন্নবা হৌখ্রে। বরানসিবু হেন্না ফজহন্নবা, খুদোংচাহন্নবগীদমক্তা লুপা করোর ১৫০০ হেনবগী প্রোজেক্ত কয়া শঙ্গাবগা লোয়ননা উরেপ উয়ুংসু তমখ্রে। অসিগুম্বা চাউখৎ-থৌরাংগী খঙথাংশিং অসিগীদমক্তা, ঐহাক্না অদোমবু থাগৎচরি অমসুং য়াইফ পাউজেল পীজরি।

মরুপশিং,

মতম অমদা, ঐখোয়গী য়ুমগী নাকন্দা শা-শন কয়া লৈবনা ইমুং অমগী নুংঙাই-য়াইফবগী শক্তাক ওইনরম্মি। অদুগা মখোয়শিং অসি খরা অমনা ‘পসুধন’ হায়নসু কৌনরম্মি। পসুধন হায়বদি শ-শনগী লন-থুম হায়বনি। কনাগী য়ুমদা পুনা হেন্না পাল্লি হায়বগী চাংয়েংনবসু লৈনরম্মিবনি। ঐখোয়গী শাস্ত্রশিংদসু মসিগী মতাংদা পল্লম্মি-

গাৱো মে স্বর্তঃ

চেৱ গ্বাম মধ্যে ৱসাম্যহম।।

মসিনা হায়বদি, শনশিংনা ঐহাক্কী অকোয়বদা লৈগদবনি অমসুং ঐহাক্না শনশিংগা মরক্তা হিংগদবনি হায়বনি। মসিগী সেক্তর অসিনা ঐখোয়দা থবক পীবগী পাম্বৈ অমা মতম কুইনদগী ওইদুনা লাক্লিবনি। অদুবু, সেক্তর অসিদা চঙফম থোকপা মিৎয়েং অসি মমাংগী সরকারনা মতম কুইনদগী চঙবীদনা লাকখি। ঐখোয়গী সরকারনা হৌজিক্তি মসিগী ফিভম অসি লৈবাক শিনবা থুংবদা হোংদোক্নবা থবক পায়খৎলি। ঐখোয়না কামধেনু কম্মিসন হৌদোক্লে, দাইরী সেক্তরগী ইনফ্রাস্ত্রকচরগীদমক্তা লুপা করোর কয়াগী অখন্নবা ফন্দ শেম্লে। ঐখোয়না চাউরবা খোঙথাং অমা পায়খত্তুনা শা-শন লোইবশিংবুসু কিসান ক্রেদিত কার্দকী খুদোংচাবা ফংহল্লে। লৌমীশিংনা হুন্নবগীদমক্তা অফবা মখলগী মরু ফংহন্নবগীদমক্তা থবক কয়া লেপ্তনা চত্থরি। শা-শনশিংবু য়ুমদা লাইয়েংনবগীদমক্তা ঐখোয়না লৈবাক শিনবা থুংবগী কেম্পেন পাংথোক্লি। শনশিংদা য়াম্না নাগনবা ফুত অমসুং মাউথ দিজিজ লাকশিন্নবগীদমক্তা ঐখোয়না লৈবাক শিনবা থুংবগী তীকা থাবগী খোঙথাং পায়খৎখি। ঐখোয়গী সরকারদি অঙাংশিংদা খক্তা নত্তনা, কোবিদকী তীকা খক্তা নত্তনা, শা-শনশিংগী তীকাসু লেম্না থাবীরি।

মরুপশিং,

লৈবাক অসিদা পায়খৎলিবা অসিগুম্বা থৌওংশিং অসিনা মরম ওইরগা চহি ৬-৭কী কী মমাংগা চাংদম্নবদা, লৈবাক্কী শঙ্গোম পুথোকপগী চাংনা ৪৫% হেনগৎলে। হায়বদি, শরুক অনিগী চাংদা হেনগৎলে হায়বনি। ঙসিদি, ভারতনা মালেমগী শঙ্গোমগী চাউরাকপা ২২%গী চাং পীরি। মসিনা তাকপদি, চাউরাক্না শরুক মরি থোকপগী অমা হায়বনি। য়ু.পি.না শঙ্গোম পুথোকপদা খ্বাইদগী মকোক ওইরিবা অমসুং দাইরী সেক্তর পাকথোক-চাউথোকপদসু খ্বাইদগী মকোক ওইরিবসিদা ঐহাক্না নুংঙাইবা ফাওই।

ইচিল ইনাওশিং,

লৈবাক্কী দাইরী সেক্তর, য়েন-ঙানু লোইবা, হ্বাইত রিভোল্যুসন্দা অনৌবা পাঙ্গল লাক্লিবা অসিনা লৌমীশিংগী ফিভম ফগৎহনবদা অচৌবা থৌদাং য়াগনি হায়বগী ঐহাক্না থাজবা থম্মি। মসিগী থাজবা অসিগী মরম য়াম্না লৈ। অহানবদা, য়েন-ঙানু লোইবনা লৈবাক্কী মীশিংগী করোর ১০ ওইরিবা অপীকপা লৌমীশিংগী অহেনবা চাগা তানবগী খ্বাইদগী চুনবা পাম্বৈ অমা ওইবা য়াই। অনিশুবদা, ভারতকী দাইরী পোত্থোকশিংগী মীরমদা চাউরবা কৈথেল লৈ অমসুং মসিদা শাহৌ লৌবা য়াবগী খুদোংচাবা য়াম্না লৈ। অহুমশুবদা, য়েন-ঙানু লোইবা অসি নুপীশিংগী শেন্মিৎলোনগী ফিভম হেন্না ফগৎহন্নবা অমসুং ওন্তোপ্রিনর্শিপ খুমাং চাউশিলহনবগী খ্বাইদগী ফরবা পাম্বৈনি। অদুগা মরিশুবদনা, ঐখোয়গী য়েন-ঙানুশিং অসিনা বাইওগ্যাস, ওর্গানিক ফার্মিং অমসুং নেচরেল ফার্মিংগী চাউরবা য়ুম্বী ওইরি। শঙ্গোম পুথোকপা ঙমদ্রবা শন অসি লেম্না মাঙবা নত্তে, মখোয়নসু লৌমীশিং চাগা তানবদা তেংবাংবা য়াই।

ইচিল ইনাওশিং,

দবল ইঞ্জিন সরকার অসিনা মশাগী অঙম্বা পাঙ্গলগা লোয়ননা লৌমী, শনশিংগীদমক্তা পুকচেল শেংনা লেপ্লি। ঙসি মফমসিদা উরেপ উয়ুং তম্লিবা বনাস কাশি সঙ্কুল অসিসু সরকার অমসুং কোওপরেতিবকী খুৎশম্নবগী খুদম্নি। কোওপরেতিব সেক্তরদা অচৌবা থৌদাং য়ারিবা বনাস দাইরী অমসুং পুর্বাঞ্চলগী গোপাল্কা লৌমীশিংগী মরক্তা খুৎশম্নবগী অনৌবা থৌওং অমা হৌরবনি। মসিগী মতমগা চুনরবা দাইরী প্লান্ত অসি মথৌ তৌবা হৌরকপা মতমদা, পিন্দ্রগীতা নত্তনা শিবপুর, সেবাপুরী, রোহনিয়া অমসুং গাজিপুর, জোনপুর, চন্দোলী, মিরজাপুর, বলিয়া, আজমগর, মথকুম্বা জিলাগী লৌমী লাখ কয়াদা কান্নবা পীগনি। বনাস কাশি সঙ্কুলনা মরম ওইরগা, মনাক নকপদা লৈবা খুঙ্গং কয়াদা শঙ্গোমগী কমিতী কয়া শেম্লগনি, কলেক্সন সেন্তর লৈরগনি অমসুং শঙ্গোম ফৎচিল্লক্তবগী শিংনবশিং লৈররোই। মসিদা নত্তনা, মশা-মউ ফবা শনশিংগীদমক্তা লৌমীশিংদা মতেং ফংগনি অমসুং শনশিংগীদমক্তা অফবা মখলগী মচিঞ্জাক ফাওবা পীগনি। শঙ্গোম, দহি, ছাছ, মখন, পনির খক্তা নত্তনা মফমসিদা আইস্ক্রিম অমসুং অথুম্বা অচাপোৎ কয়াসু ফংলগনি। মসিনা হায়বদি, বনারসকী লসসী, ছেনেগী হাওরবা মীথাই কয়া, নত্ত্রগা লোংলতাগী মহাও অসি হান্নদগী য়াম্না হেন্না হাওবা হেল্লগনি হায়বনি। অদুগা হৌজিক্তি, মলাইগী কুমসু লাক্লে। অতোপ্পা ৱাহৈদা হায়রবদা, বনাস কাশি সঙ্কুলনা বনারসকী রস্পু হেন্না হাওবা হেনগৎহল্লগনি।

ইচিল ইনাওশিং,

শঙ্গোমগী মগুন তাকপগী মতাংদা ঐখোয়গী মফমসিদা শিংনবা কয়া অয়াম্বা মতমদা হান্নদগী লৈরক্লবনি। করম্বা শংগোম লৈবনা তেক্ত-কায়দবা ওইগনি হায়বসি মীচম অমনা খঙবদা খরা লুনা থোকই। সর্তিফিকেসনগী তোঙানবা কাঙলোন কয়া লৈবদগী শন লোইবা, শঙ্গোমগী য়ুনিয়নশিং য়াওনা খুদোংচাদবা কয়া থেংনখি। হৌজিক্তি, অসিগুম্বা খুদোংচাদবশিং অসিগী ৱারোইশিন অসি লৈবাক্কী দাইরী সেক্তরগীদমক্তা পীরবনি। ঙসিদি, ইন্দিয়ন স্তেন্দর্দ ব্যুরোনা লৈবাক শিনবা থুংবগী অপুনবা পথাপ অমা হৌদোক্লে। কামধেনুগী শক্তম য়াওবা অপুনবা লোগো অমসু সর্তিফিকেসনগীদমক্তা লোঞ্চ তৌখ্রে। করিগুম্বা মসিগী খুদম, মসিগী লোগো অসি উবা ফংলবদি, ঐখোয়না অফবা মগুন খঙবদা লাইগনি অমসুং ভারতকী শঙ্গোম পুথোকপশিংদা থাজবসু হেনগৎলগনি।

মরুপশিং,

শা-শন্দগী থোক্লকপা ফত্ত-হৌদীবু নীংথিনা শিজিন্নদুনা দাইরী সেক্তরদা কান্নবা পীনবা হোৎনবসি ঙসিগী মতমগী খ্বাইদগী তঙাই ফদবা ওইরি। রাম্নগরগী শঙ্গোমগী প্লান্তকীদমক্তা বাইওগ্যাস্তা য়ুম্ফম ওইবা মৈ পুথোকপগী প্লান্ত শঙ্গাখ্রিবা অসিসু মসিগী হোৎনবা অসিগী মখা পোন্ননি। থৌওং অসি দাইরী সেক্তরগী তঙাই ফদবা মৈশিংবু বাইওগ্যাস প্লান্তগী পীবগী অমত্তা ঙাইরবা প্রোজেক্তনি। মসিনা হায়বদি, লৌমীশিংনা শঙ্গোম য়োনবদগীতা নত্তনা শন্থী য়োনবদগীসু চাগা তানবা য়ারগনি হায়বনি। অয়াম্বা মতমদা, লৌমীশিংনা শন্থী য়োন্দুনা শেল তাল্লি, অদুবু মসিগী বাইওগ্যাসকী প্লান্ত অসিনা হান্না পীনবা মমলদগী হেন্না পীদুনা লৈগনি। মফমসিদা পুথোক্কদবা বাইও স্লরী অসিনা মসিদা য়ুম্ফম ওইবা ওর্গানিক ওইবা হার শাবদা অমুক শিজিন্নগনি। মসিগী মপং ওইবা ওর্গানিক হার অসি কেমিকেল হারগা চাংদম্নবদা মমল য়াম্না তানা লৌমীশিংদা ফংহনগনি। মসিদগী ওর্গানিক ফার্মিং অমসুং নেচরেল ফার্মিংসু চাউখৎকনি অমসুং কনা লৈজদ্রবা শনশিংগী সেবা তৌনীংবগী পুক্নিংসু থৌগৎলগনি।

মরুপশিং,

মতম অমদসু, ভারত্তা নেচরেল ফার্মিং অমসুং মহৌশাগী থৌওং শিজিন্নদুনা লৌ উনরম্মি। নেচরেল ফার্মিং হায়বদি মপানগী ওইবা পোত্থোক অমত্তা য়ান্দনা লৌ-উবা হায়বনি। লবুক্তগী ফংলিবা, লৌ-উবগা মরী লৈনবা শন্দগী ফংলিবশিংবু নীংথিনা লৌ-উবদা শিজিন্নরম্মি। হার ওইরো, তিলহাৎ হিদাক ওইরো, পুম্নমক মহৌশাগী ওইবা থৌওংনা শেম-শাই, শিজিন্নৈ। অদুবু, নেচরেল ফার্মিং পাংথোকপসি মতমগী মতুং ইন্না হন্থখি অমসুং কেমিকেল ফার্মিংনা মসিবু লাকহৎখি। মহৌশাগী লৈহাও ইমাবু নৌনা ইনোৎ হাপ্নবা, লৈহাও অসিবু কন্নবা, লাক্কদৌরিবা চারোন-শুরোনগী তুংগী মতম্বু তেক্ত-কায়দবা থম্নবগীদমক্তা ঐখোয়না নেচরেল ফার্মিংগী মাইকৈদা অমুক্কা হন্না চৎপগী মথৌ তারে। মসি হৌজিক মতমগী তঙাই ফদবনি। মরম অদুনা, সরকারনা নেচরেল ফার্মিং খুমাং চাউশিলহন্নবগীদমক্তা অমসুং লৌমীশিংদা মরী লৈনবা ই-পাউ খঙহন্নবগীদমক্তা, অচৌবা খোঙথাং অমা পায়খৎলি। ঐখোয়না হৌজিক নিংতম্বগী চহি ৭৫ ফাবগী থৌরম পাংথোক্লি, ঐহাক্না লৈবাক মীয়ামদা, মরু ওইনা লৌমী ইচিল-ইনাওশিংদা অমসুং অপীকপা লৌমীশিংদা, ঙসিগী কিসান দিবস অসিদা হায়জনীংবদি অদোম্না নেচরেল ফার্মিংগী মাইকৈদা লাকপীয়ু হায়বসিনি। মসিদা শেল চঙবসু হন্থৈ অদুগা শেন্দোং ফংবনা অমুক হেল্লি। মসিদি লৌউবগী খ্বাইদগী হোঙবা পাম্বৈনি খ্বাইদগী তেক্ত কায়দবা পাম্বৈনি। অদুগা, ঙসিগী মালেমসিদা, নেচরেল ফার্মিংদগী থোক্লকপা মহৈ-মরোং অসি মমল য়াম্না ৱাংনা ফংই। ঐহাক্না লৈবাক্কী স্তার্ত-অপ সেক্তর অমসুং নহাশিংদা নেচরেল ফার্মিংগী খুদোংচাবা য়াম্না লৈ হায়বসি হায়জনীংই। ঐখোয়গী নহাশিংনা মসিগী কান্নবা লৌফম থোকই। ঐহাক্না ঙসিগী ফম্বাক অসিদা লাক্ত্রিঙৈগী মমাংদা, ঐহাক্না নহা কয়াগা উন্নবগী খুদোংচাবা ফংখি। মখোয়না সরকারগী স্কিম কয়া অমগা মরী লৈনবা ফংবদা থৌনা ফবা থবক কয়া পাংথোকখ্রে, মখোয়গী পুন্সিদা অহোংবা কয়া অমা লাক্লে তাবদা ঐহাক্না য়াম্না নুংঙাইবা ফাওই। মসিদগী ঐহাক্না স্কিমদা থাজবা থম্বসু য়াম্না হেনগৎলে।

ইচিল ইনাওশিং,

খুঙ্গং, লৌমীশিংবু মরোমদোম লেপচবা ঙমহন্নবগীদমক্তা, মখোয়বু আইন্না য়াদবা মওংদা লম খোপচিনবগী নুংশা থীবদগী কন্নবগীদমক্তা, স্বামিত্বা য়োজনাগী অচৌবা থৌদাং লৈ। য়োগীজীনা মহাক্কী লুচিং মখাদা হীরম অসিগী মতাংদা থবক পাংথোকপা অসিদা ঐহাক্না নুংঙাইবা ফাওই। য়ু.পি.গী জিলা ৭৫ পুম্বগী লাখ ২৩ হেনবা ইমুংশিংগী ঘরোনি শেম-শাখ্রে। মখোয়গী মনুংদগী, ঙসি চাউরাকপা ইমুং লাখ ২৩দা মসিগী চে-চাং খুৎশিন্নরগনি। ইশাগী য়ুমগী চে-চাং ইশাগী নাক্তা লৈরবদি, লাইরবা, দলিত, কনা লৈত্রবশিংনা মখোয়গী ময়ুম্বু আইন্না য়াদবা থৌওংদা অতোপ্পনা খোপচিনখিবগী নুংশা থীবা লৈররোই। মমাংগী সরকারগী মতমদা পাংথোক্লম্বা আইনগী ৱাংমদা লম খোপচিনবগী চৎনবী থিংলগনি। ঘরোনি ফংলবদি, তঙাই ফদবগী মতুং ইন্না বেঙ্কতগী লোন লৌবদসু লাইরগনি। মসিদগী খুঙ্গংগী নহাশিংদা মশানা মশাবু থবক পীজবগী অনৌবা পাম্বৈ কয়া অমা ফংলগনি।

ইচিল ইনাওশিং,

চাউখৎপগী মতাং লাকপা মতমদা, কাশিনা মশা মথন্তনা মোদেল অমা ওইরক্লি। হান্নগী শক্তাকপু লেঙদনা থমদুনা, ঐখোয়গী শহরনা অনৌবা শক্লোন অমা মতৌ করম্না লৌগনি হায়বসি কাশিনা থবক ওইনা পাংথোক্লে। ঙসি শঙ্গারিবা অমসুং উরেপ উয়ুং তম্লিবা প্রোজেক্তশিং অসিনা নীংথিরবা কাশি, মগুন লৈবা কাশি কেম্পেন্দা ইনোৎ অমা হাপ্লগনি। কাল ভৈরব য়াওনা শহর অসিগী মফম ৬পু নৌনা শেমদোকপা, মফম ৭০০ হেনবদা সি.সি.তি.ভি. কেমেরা খিনখিবা অসিনা কাশিনা স্মার্ত ওইবা অমসুং তেক্তা কায়দবা খুদোংচাবশিংগী মাইকৈদা খোঙ থাবা হৌরবনি। শক্নাইরবা সন্ত শ্রী রবিদাসজীগী পোক্নফম লমদম্বু চাউখৎনবগী থবকশিংসু য়াম্না কন্না পায়খৎলি। লঙ্গর হোল লৈবদগী মফমসিদা লাক্লিবা লৈবাক শিনবা থুংবগী লাইনীংবা অমসুং লমকোয়বশিংদা খুদোংচাবা য়াম্না পীরগনি।

ইচিল ইনাওশিং,

ঙসি, ভরানসিগী শোরোকশিং মশক ফজথোরক্লি, লম্বী পাকথোরক্লি, অনৌবা পার্কিং কয়া অমা লৈরক্লি, মসিদগী শহর অসিগী ত্রাফিক জাম থোকপগী ফিভম য়াম্না হন্থরগনি। ভরানসি কেন্ততগী থোরক্তুনা প্রয়াগ্রাজ ফাওবা চৎলিবা হাইৱে অসি মী কয়াম চিল্লম্মি, মসিদি অদোমদগী হেন্না কনা অমত্তনা খঙলোই। মসিনা হৌজিক লেন ৬ ওইরকপা মতমদা, দিল্লী, আগ্রা, কানপুর, প্রয়াগরাজতগী লাকপা অমসুং চৎখিবা মীওইশিংদা য়াম্না নুংঙাইহল্লগনি। মসিদা নত্তনা, অতোপ্পা লমদমসিংদগী লাকপদসু য়াম্না নুংঙাইরগনি। লাইহল্লগনি। মসিগী শোরোকশিং অসিবু জিলাদা চঙলকফম ওইনা শেমগনি। ভরানসি-ভদোহি-গোপিগঞ্জ শোরোক চাউথোকহনবদগী শহরসিদগী থোকখিবা গারীশিংনা রিং রোদ ফেজ ২ ফাওদুনা মপান থোকখিবা য়ারগনি। মসিদগী ত্রাফিক জাম থোকপসি অমুক হন্না থোক্লরোই।

ইচিল ইনাওশিং,

হেল্থ এজুকেসন অমসুং রিসর্চ হব অমা ওইনা কাশিগী শক্তাক অসিসু মপাঙ্গল হেন্না লৈহন্নবা অকনবা থবক পায়খৎলি। ঙসি অয়ুশ হোস্পিতাল অমা শঙ্গাবতা নত্তনা হোমিওপেথিগী মেদিকেল কোলেজ অমা হৌদোকপগী থবক পায়খৎপসু হৌখ্রে। অসিগুম্বা খুদোংচাবা অসিদগী কাশিনা ভারতকী হিদাক লাংথক অমসুং অনা লাইয়েংগী পথাপ্তা মরু ওইবা মফম অমা ওইরক্লগনি। রিজনেল ইন্সত্রক্সন স্তেন্দর্দ লেবোরেতরী লৈবদগীদি ঈশিং চাংয়েং তৌবা, ফিরোল অমসুং কার্পেতকা মরী লৈনবা চাংয়েং কয়াসু মফমসিদা পাংথোক্লগনি। মসিনা মরম ওইদুনা, ভরানসি অমসুং মনাক্তা লৈবা ইন্দস্ত্রী, ফিশা লোনশা তৌবশিংদা হকথেংননা কান্নবা পীগনি। ইন্তর্নেস্নেল রাইস রিসর্চ সেন্তরদা অনৌবা স্পীদ ব্রিদিং ফেসিলিতী শঙ্গাখিবা অসিদগী অনৌবা মখলগী ফৌ পুথোকপদা হান্না চঙল্মবা মতমদগী য়াম্না তানা চঙলগনি।

ইচিল ইনাওশিং,

ঐহাক্না কাশি, য়ু.পি.গী চাউখৎপগীদমক্তা দবল ইঞ্জিনগী দবল মপাঙ্গলগী ৱারী শাবা মতমদা, মীওই খরদা য়াম্না নুংঙাইতবা ফাওই। মখোয়শিং অসি য়ু.পি.গী রাজনীতিবু জাত-বিজাত, করিগুম্বা অমদা লাইনীং ওইবা, ধর্মগী খেন্নবা খক্তগী মিৎয়েংদগী য়েংবা মীওইশিংনি। মীওইশিং অসিনা য়ু.পি.না চাউখৎপা, মতমগা চুনবা শক্তাক লৈবা কৈদৌনুংদা পামদে। স্কুল, কোলেজ, হোস্পিতাল, শোরোক, ঈশিং, লাইরবশিংগী য়ুম, গ্যাস কনেক্সন, অমাংশঙ অসি মখোয়না চাউখৎপনি খন্দে। সবকা সাথ, সবকা বিকাস, সবলা বিশ্বাস অমসুং সবকা প্রয়াসকী ৱাখল্লোন অসিসু মখোয়গী সিলেবসকী ৱাংমদা লৈ। মখোয়গী সিলেবস্তা করি য়াওই, মখোয়গী ৱাখল্লোন করিনো হায়বসিদি অদোম্না নীংথিনা খঙলবনি। মখোয়গী সিলেবস্তা য়াওরিবদি মাফিয়া অমসুং ইমুং অমগী লৈঙাক্নি। মখোয়গী সিলেবস্তা য়াওরিবদি য়ুম, লন-থুম্বু আইনগী ৱাংমদা খোপচিনবনি। মমাংগী সরকারগী মতমদা য়ু.পি.গী মীয়াম্না ফংখিবা অমসুং হৌজিক্কী সরকারগী মতমদা ফংলিবশিংগী মরক্তা লৈবা খেন্নবসি ময়েক শেংলে। ঐখোয়না য়ু.পি.গী চৎনবীবু মখা তানা চত্থহল্লি, য়ু.পি.দা চাউখৎপসু পুরক্লি। অদুবু ইশাগীতা খনবা মীওইশিং অসিনা কাশিনা হৌজিক চাউখৎলিবা অসিদা পেন্দ্রি, পামদ্রি। তসেংবদি, মীওইশিং অসিনা পুর্বাঞ্চলগী চাউখৎপা, বাবাগী থবকশিং, বিস্বানাথ ধামগী থবকশিংদা অসিদা য়াম্না য়েৎলি। হৌখিবা নোংমাইজিং নুমিত্তা কাশি ধাম খুরুম্নবা মীওই লাখ অমা মখায় হেন্না লাকখি হায়না ঐহাক্কী ইফমদা পাউদমলকখি। য়ু.পি.বু দিকেদ কয়া তুং ইন্থদুনা থম্লম্বা মীওইশিংগী খোইশাওনবা হৌজিক হেনগৎলখিগনি। য়ু.পি.গী মীয়াম্না দবল ইঞ্জিন সরকার অসিগীদমক্তা লেঙদনা লেপ্লিবা অমসুং মখোয়গী থৌজাল ফংবা হেল্লিবা মখৈ মখোয়গী খোইশাওনবনা অতিয়া য়ৌরকখিগনি।

মরুপশিং,

দবল ইঞ্জিনগী সরকারনা য়ু.পি.বু চাউখৎহন্নবগীদমক্তা অহিং নুংথিল নাইদনা অসুম্না হোৎন্দুনা লৈখিগনি। মহাদেবগী থৌজাল অমসুং কাশিগী মীওইশিংগী মিনুংশিদগী কাশিনা অনৌবা রেকোর্দ কয়া অমা শেমখিগনি। মসিগী থাজবা অসিগা লোয়ননা, লৈরিবা প্রোজেক্তশিং অসিগীদমক্তা ঐহাক্না অদোম্বু থাগৎচরি। ঐহাক্কা লোয়ননা অমুক্তা লাওসি – ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে। হন্না হন্না থাগৎচরি।

***