প্রধানমন্ত্রীগী লোইশঙ
পি.এম. মোদীনা ত্রিপুরাগী বেনিফিসরী লাখ ১.৪৭ হেনবদা পি.এম.এ.ৱাই.-জি.গী অহানবা ইনস্তোলমেন্ত ত্রান্সফর তৌখ্রে
“ঙসি প্রধান মন্ত্রী আৱাজ য়োজনাগী মখাদা অহানবা ইনস্তোলমেন্ত পীখিবনা ত্রিপুরাগী মঙলানশিংদা অনৌবা ইনোৎ অমা হাপখ্রে”
“দবল ইঞ্জিন সরকার অসিনা মপুং ফানা অমসুং পুকচেল শেংনা ত্রিপুরাদা চাউখৎ-থৌরাং পুরক্নবা হোৎনরি”
“প্রজাশিংগী য়াইফ-থৌরাংদা কান্নদবা কাংলোনশিংনা অপনবা থোকহল্লোই”
“মমাংদা লৈবাক অসিগী অৱাং অমদি নোংচুপ থংবা ঐখোয়গী তুরেলশিংনা নোংপোক্তা য়ৌক্লমখি, অদুবু গঙ্গাগী চাউখৎ-থৌরাং অসিদি মফম অসিদা য়ৌরক্ত্রিঙৈ মমাংদা লেপখি”
“ঙসি লৈবাক অসিগী চাউখৎ-থৌরাং অসি ‘এক ভারত, শ্রেস্থা ভারত’কী ৱাখল্লোনগা লোয়ননা মীৎয়েং থম্লি। চাউখৎ-থৌরাং অসি লৈবাক্কী অমত্তা ওইবগী ৱাখল্লোন অদুগা চপ মান্নৈ হায়না ঙসিদি লৌনরি”
“লৈবাক অসিনা হৌজিক চহি খুদিংগী নভেম্বর ১৫বু জনজাতিয় গৌরব দিৱস হায়না ভাগৱান বিরসা মুন্দাগী মপোক কুমওন অসি পালন তৌরগনি। নুমিৎ অসি অদিৱাসি সমজতা ইকাই খুম্নবা উৎপগী নুমিৎ অমা ওইবতা মসিনা তংদু লৈতাবা খুন্নাই অমগী খুদমসু ওইহৌরগনি”
Posted On:
14 NOV 2021 2:21PM by PIB Imphal
প্রধান মন্ত্রী, শ্রী নরেন্দ্র মোদীনা ত্রিপুরাগী বেনিফিসরী লাখ ১.৪৭ হেনবদা পি.এম.এ.ৱাই.-জি.গী অহানবা ইনস্তোলমেন্ত ত্রান্সফর তৌখ্রে। থৌরম অসিদা বেনিফিসরীশিংগী বেঙ্ক একাউন্তদা হকথেংননা লুপা করোর ৭০০ হেন্না হাপখি। প্রধান মন্ত্রীগী খোঙথাং অসি তুং ইল্লদুনা ত্রিপুরাগী তো-তোপ্পা জিও-ক্লাইমেতিক কন্দিসন অসি য়েংলগা রাজছ অসিগী ‘কচ্চা’গী য়ুমগী ৱাখল্লোন অসিদা অহোংবা লাকখ্রে, মসিনা ‘কচ্চ’গী য়ুমদা লৈরিবা মশিং য়াম্লবা বেনিফিসরীশিংদা ‘পক্কা’গী য়ুম অমা শান্নবা মতেং ফংবা ঙমহনখ্রে। থৌরম অসিদা কেন্দ্রগী খুঙ্গং চাউখৎ-থৌরাং মন্ত্রী অমসুং ত্রিপুরাগী মুখ্য মন্ত্রীসু শরুক য়াখি। প্রধান মন্ত্রীনা বেনিফিসরীশিংগা লোয়ননা ৱারী-ৱাতায় শাখি।
প্রধান মন্ত্রীনা ত্রিপুরাগী ধল্লাইদগী অনিতা কুকি দব্বর্মা লোয়ননা ৱারী শাবদা মঙোন্দা মহাক্কী পুন্সি অমসুং পুন্সি মহিংগী মতাংদা হংখি অমসুং মপাঙ্গল কনবা অমসুং অফবা য়ুম অমা শাদুনা পক্কাগী য়ুম অমদা লৈনবসু হায়খি। প্রধান মন্ত্রীনা মঙোন্দা সরকার অসিনা শক্তি হেক পাইবদগী, লায়রবা অমসুং ত্রাইবেল কাংলুপক্কী য়াইফনবা থবক পাইখৎপা অসিদা খ্বাইদগী চাউবা মীৎয়েং চংখি হায়না ফোঙদোকখি। একলাব্য স্কুলশিং অসিগুম্বা স্কীমশিং, উমংগী পোত্থোক পুথোকপগা মরী লৈনবা স্কীমশিং অসি পাইখৎলি অমসুং ইমপ্লিমেন্ত তৌরি। মহাক্না অঙাংশিং মহৈ-মশিং তমহন্নবা বেনিফিসরীদা হায়খি।
প্রধান মন্ত্রীনা সেপাহিজলাদগী শ্রীমতি সোমা মজুমদারদা স্কীম অসিদগী কান্নবা ফংখিবগী মহাক্কী অৱা-নুংঙাইগী মতাংদা হংখি। মহাক্না পক্কাগী য়ুম অমা লৈরবা মতুংদা মহাক্কী পুন্সিদা করম্না অহোংবা লাক্কনি হায়নসু হংখি। মসিদা পাউখুম পীরদুনা বেনিফিসরীনা হায় স্কীম অসিনা মরম ওইদুনা মহাক্কী পক্কাগী য়ুম অমদা লৈনবগী মঙলান অদু থুংহনবা ঙম্লগনি অমসুং মসিনা নোংজু থা মনুংদা চাউনা মতেং ওইরগনি। পি.এম.না মঙোন্দা ইনস্তোলমেন্তশিং অদু মহাক্কী য়ুম শাবদা খক্তা চাদিং তৌনবা হায়খি। মহাক্না হায়খি মহাক্কী সরকারগী পান্দম অসি স্কীম অসিগী কান্নবশিং অসি অপনবা থোক্তনা নত্ত্রগা দলালি য়াওদনা বেনিফিসরীশিংদা য়ৌহনবনি।
প্রধান মন্ত্রীনা নোর্থ ত্রিপুরাদগী শ্রী সমিরন নাথতা মহাক্কী য়ুম শান্নবা পি.এম.এ.ৱাই.-জি.গী মখাদা পীরিবা ইনস্তোলমেন্তশিং অসিগা লোয়ননা মহাক্না ফংগদবা কান্নবশিং অদুগী মতাংদা মহাক্না খঙলবরা হায়না হংখি। প্রধান মন্ত্রীনা য়ুম শাবগী মতাংদা পাঙথোকপা সর্ভে অসিগুম্বা প্রি-স্কীমগী থবক-থৌরমশিংগী মতাংদা মহাক্কী অৱা-নুংঙাইগী মতাংদসু হংখি। পি.এম.না মঙোন্দা স্কীম অসিগী মখাদা কান্নবশিং লৌবদা সমস্যা থেংনবরা নত্ত্রগা মহাক্না কান্নবশিং অসি লৌনবা শেল পীখিবা লৈবরা হায়না হংখি। পি.এম.না বেনিফিসরীশিংনা কান্নবশিং অসি লৌবদা শেল পীদ্রবদি ফংলমদবা মমাংগী সিস্তেম অদু চৈখি।
সাউথ ত্রিপুরাগী শ্রীমতি কদর বিয়াগা ৱারী শাবদা প্রধান মন্ত্রীনা মঙোন্দা স্কীম অসিগী মখাদা মহাক্না ইনস্তোলমেন্ত ওইনা লুপা কয়া ফংবগে হায়বা মহাক্না খঙজবরা হায়না হংখি। পি.এম.না বেনিফিসরীদা মহাক্না পাম্বা য়ুম শাবদা সরকারনা শেলগী মতেং পীরক্কনি হায়না খনখিবা লৈবরা হায়না হংখি। প্রধান মন্ত্রী পক্কাগী য়ুমশিং অসিনা মখোয়গী পুন্সিশিংদা নুংঙাইবা পুরক্লগনি হায়না থাজবা ফোঙদোকখি। মহাক্না হায়খি শ্রীমতি বিয়াগুম্বা বেনিফিসরীশিং অসিনা সরকারনা খেন্নবা থমদনা অমসুং দলালি য়াওদনা কান্নবশিং ফংহল্লি হায়বগী খুদম ওইরি। মহাক্না হায়খি সরকার অসিনা প্রজাশিংদা কান্নবা পীনবা ৱাখল্লোন অমগা লোয়ননা থবক তৌরি। প্রধান মন্ত্রীনা মুখ্য মন্ত্রী অমসুং মহাক্কী তীমনা কন্না হোৎনিবা অসিবু থাগৎলদুনা হায় বিপ্লব কুমার দেবজীগী সরকার নত্ত্রগা মোদৌ সরকার ওইরবসু কাংলোনশিংনা প্রজাশিংগী য়াইফ-থৌরাংদা অপনবা ওইহন্দে। মহাক্না নুংঙাইবা ফোঙদোক্লদুনা হায়খি য়ারিবা মখৈ পি.এম.এ.ৱাই.গী মখাদা শারিবা য়ুমশিং অসি নুপীশিংগী মমিংদা ওইহল্লি।
মীতিন অদুদা ৱা ঙাংলদুনা প্রধান মন্ত্রীনা হায়খি ঙসিগী থৌরম অসি ত্রিপুরাগী তুংদা লাক্কদবা অফবা নুমিৎশিং অমসুং আশাগী খুদম অমনি। মহাক্না হায়খি রাজ্য অসিদা পাল্লিবা বিপলব দেবজীগী সরকার অমসুং কেন্দ্রগী সরকারনা রাজ্য অসি খুমাং চাউশিন্নবা হোৎনখি। “ঙসি প্রধান মন্ত্রী আৱাজ য়োজনাগী মখাদা অহানবা ইনস্তোলমেন্ত পীখিবনা ত্রিপুরাগী মঙলানশিংদা অনৌবা ইনোৎ অমা হাপখ্রে। ঐহাক্না ত্রিপুরাগী মীয়াম পুম্নমক, অহানবা ইনস্তোলমেন্তগী কান্নবা ফংখিবা ইমুং লাখ অমগা মখাই অসিবু থমোয় শেংনা নুংঙাইবা ফোঙদোকচরি”, হায়না শ্রী মোদীনা ফোঙদোকখ্রে।
প্রধান মন্ত্রীনা হায়খি ত্রিপুরাগী লায়রবা ওইহন্দুনা থম্লিবা ৱাখল্লোন অসিনা ত্রিপুরাগী মীয়ামবু খুদোংচাবশিং ফংহনদনা থমখি, মসিগী ৱাখল্লোন অসি ঙসি ত্রিপুরাদা লৈত্রে। হৌজিক দবল ইঞ্জিন সরকার অসিনা মপুং ফানা অমসুং পুকচেল শেংনা ত্রিপুরাদা চাউখৎ-থৌরাং পুরক্নবা হোৎনরি।
লমদম অসিবু মতম শাংনা য়েংশিনবীদনা লাকখিবা অসিগী মতাংদা প্রধান মন্ত্রীনা হায়খি মমাংদা লৈবাক অসিগী অৱাং অমদি নোংচুপ থংবা ঐখোয়গী তুরেলশিংনা নোংপোক্তা য়ৌক্লমখি, অদুবু গঙ্গাগী চাউখৎ-থৌরাং অসিদি মফম অসিদা য়ৌরক্ত্রিঙৈ মমাংদা লেপখি। “লৈবাক অসিগী অপুনবা চাউখৎ-থৌরাং অসি মচেৎ-মচেৎ ওইখি অমসুং মসি রাজনিতিগী ওইবা মীৎয়েংগী মখাদা য়েংখি। মরম অসিনা ঐখোয়গী অৱাং-নোংপোক্না য়েংশিনবীদে হায়না ফাওখি”, হায়না মহাক্না ফোঙদোকখি। “ঙসি লৈবাক অসিগী চাউখৎ-থৌরাং অসি ‘এক ভারত, শ্রেস্থা ভারত’কী ৱাখল্লোনগা লোয়ননা মীৎয়েং থম্লি। চাউখৎ-থৌরাং অসি লৈবাক্কী অমত্তা ওইবগী ৱাখল্লোন অদুগা চপ মান্নৈ হায়না ঙসিদি লৌনরি”, হায়না মহাক্না মখা তাখি।
প্রধান মন্ত্রীনা লৈবাক অসিগী চাউখৎ-থৌরাংদা শরুক তমখিবা নারি শক্তি অদু পনখি। নারি শক্তিগী অচৌবা খুদম ওইনা ঐখোয়গী নুপীশিংগী ওইবা সেল্ফ-হেল্প গ্রুপশিং লৈরি। মসিগী এস.ঐচ.জি.শিং অসি জন ধন একাউন্তশিংগী কনেক্ত তৌখি। অসিগুম্বা গ্রুপশিংদা পীবা কোল্লাতরেল ফ্রী লোন অসি লুপা লাখ ২০দা হেনগৎহনখ্রে হায়না শ্রী মোদীনা ফোঙদোকখ্রে।
হিংবদা লায়থোকপা হেনগৎলকপা অসিগী মতাংদা প্রধান মন্ত্রীনা হায়খি, মমাংদা মীচম প্রজাশিংনা থবক খুদিংমক্কীদমক সরকারগী লোয়শঙদা ঙাইহাক লৈতনা চৎপা মথৌ তারমখি অদুবু হৌজিক্তি সরকারনা মখোয়গী সর্ভিস অমসুং খুদোংচাবা পুম্নমক ফংহন্নবা মীয়ামগী মনাক্তা ওইনা লাক্লরে। “মমাংদা সরকারগী কর্মচারীশিংনা মতম চানা তোলোপ ফংদবগী মতাংদা ৱান্নরম্মি অদুবু হৌজিক্তি মখোয়না ৭শুবা পে কম্মিসনগী কান্নবা ফংলি”, হায়না মহাক্না মখা তাখি।
প্রধান মন্ত্রীনা হায়খি নীংতম্বগী পৱারীদা ঐখোয়গী অৱাং-নোংপোক্কী অমসুং লৈবাক অসিগী অতোপ্পা মফমশিংদা লৈবা ত্রাইবেল লান্মীশিংনা লৈবাক অসিগীদমক মখোয়গী পুন্সি কত্থোকখি। চৎনবী অসিবু ইকাই খুম্নবা উৎনবা লৈবাক অসিনা লেগাসী অসি মাংদা পুখৎনবা লেপ্পা নাইদনা হোৎনরি। হীরম অসিদা লৈবাক অসিনা অমৃত মহোৎসবকী মনুংদা অচৌবা ৱারেপ অমগা লৌরি। লৈবাক অসিনা হৌজিক নভেম্বর ১৫দা চহি খুদোংগী ভাগৱন বিরসা মুন্দাগী মপোক কুমওন অসি জনজাতিয় গৌরব দিৱস হায়না পাল্লন তৌরগনি। নুমিৎ অসিনা ওক্তোবর ২ – অহিমসা দিৱস, ক্তোবর ৩১ য়ুনিতী দে, জনুৱারী ২৬ রিপব্লিক দে, রাম নবমি, কৃষ্ণ অস্তমি অসিনচিংবা অসিগুম্বা মরু ওইনা খঙনহৌরগনি। “নুমিৎ অসি অদিৱাসি সমজতা ইকাই খুম্নবা উৎপগী নুমিৎ অমা ওইবতা মসিনা তংদু লৈতাবা খুন্নাই অমগী খুদমসু ওইহৌরগনি”, হায়না প্রধান মন্ত্রীনা ফোঙদোকখ্রে।
প্রধান মন্ত্রীনা হায়খি রিজন অসিদা অচৌবা পোতেন্সিএল লৈ মসি মতমগা চুনবা ইনফ্রাস্ত্রকচর শেমগৎতুনা অমসুং কন্নেক্তিবিতী ফগৎহন্দুনা পুথোকপা ঙমগনি। মহাক্না রিজন অসিদা তৌরিবা থবক অসিনা লৈবাক অসিবু চাউখৎপগী অনৌবা পনখৈ ম্না পুরগনি হায়না থাজবা ফোঙদোকখ্রে।
***
(Release ID: 1771883)
Visitor Counter : 192
Read this release in:
English
,
Urdu
,
Marathi
,
Hindi
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam