ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

ঙসি অসি দীপাবলিগী কুহ্মৈনি অমদি মীপুম খুদিংমক্না মখোয় মখোয়গী ইমুংগী মীওইশিংগা লোইননা দীপাবলি পাংথোকপা পাম্লি৷ ঐসু ঐগী ইমুং-মানুংগী মীওইশিংগা লোইননা দীপাবলি পাংথোক্কদবনি হায়না ইশাদা ফাওজৈ অমদি মদুনা মরম ওইদুনা নখোয় অসি ঐগী ইমুং-মানুং ওইবনিনা, ঐ অসি নখোয়গী ইমুংগী মেম্বর অমা ওইবনা দীপাবলি অসি পাংথোক্নবা মতম খুদিংমক্তা ঐগী ইমুং-মানুংগী মীওইশিংগী মরক্তা লাক্লিবনি৷ মফম অসদা ঐহাক প্রধান মন্ত্রী ওইনা লাকপা নত্তে৷ মফম অসিদা ঐহাক নখোয়গী ইমুংগী মেম্বর অমা ওইনা লাকখিবনি৷ নখোয় ময়ামগী মরক্তা ঐনা লাকপা মতমদা অমদি ঐগী ইমুংদা চৎপা মতমদা ঐঙোন্দা ফাওরিবা নুংঙাইবা অদু চপ মান্নৈ৷মসিগী কন্সতিত্যুসনগী ওইবা থৌদাং লৌরকপা অসি চহি ২০ হেল্লে অমদি লৈবাকমচাশিংনা মসিগী খুদোংচাবা অসি মতম কুইনা ঐঙোন্দা ফংহল্লে৷ মমাংগী মতমদা গুজরাতকী মীয়াম্না অমদি হৌজিক্না লৈবাকমচাশিংনা মসিগী খুদোংচাবা অসি ঐঙোন্দা ফংহল্লে৷ ঐনা দীপাবলি খুদিংমক নখোয়গা অমদি বোর্দরদা লৈরিবা ঐগী ইমুংগী মীওইশিংগা লোইননা শরুক য়াখ্রে৷ ঙসি নখোয়গী মরক্তা ঐ অমুক হন্না লাক্লে, নখোয়দগী অনৌবা ইনর্জী অমসুং থাজবা অমগা লোইননা ঐ হনখিগনি৷ অদুবু মফম অসিদা ঐ ইতোম্তা লাকখিবা নত্তে৷ ঐনা মফম অসিদা লাকখিবা মতমদা লৈবাকমচা কোতি ১৩০গী য়াইফ-মঙ্গোলশিংগা লোইননা ঐনা লাকখিবনি৷ অদুগা ঙসিদি, নখোয়না নখোয়গী য়ুমদা ফোতোশিং থাববু ওইরবসু নখোয়গী ইমুং-মানুংদা ৱারি শারগনি; চহি অসিগী দীপাবলি অসি অখন্নবা ওই হায়না নখোয়না হায়রগনি হায়না ঐনা খল্লি৷ নখোয়বু তৌগদ্রো? তপথখো, কনা অমতনা নখোয়বু য়েংবা নত্তে, অদু পাখৎখিনু৷ ফরে, নহাকসু অথুম-অহাউ কয়া অমা চারে হায়না নখোয়না নখোয়গী ইমুং-মানুংদা হায়গদ্রো?

মরুপশিং,

ঙসি, ঐগী ইমাংদা লৈরিবা লৈবাক অসিগী থৌনা ফরবা অথৌবশিং অমদি থৌনা ফরবী মচানুপীশিংনা ইমা লৈবাক্কীদমক অসিগুম্বা থবক অসি পাংথোক্লি অমদি মীওই খুদিংমক মরাইবক ফবদি নত্তে৷ মসিগী অফবা লাইবক অসি ফংলিবা মীওই অসি খরা খজিক্তনি৷ মসিগী খুদোংচাবা অসি নখোয়না ফংলে৷ নখোয়গী মাইথোংদা তারিবা মমি অদু ঐনা উবা ফংই অমদি ফাওই৷ নখোয়দা চেল্লিবা থৌনা অদুনা লৈবাকমচা কোতি ১৩০দা কনফিদেন্স পীরি অমদি মখোয়না শান্তি লৈনা তুমজবা ফংলি৷ নখোয়গী তৌবা ঙম্বা অদুনা মরম ওইদুনা লৈবাক অসিনা শান্তি, সেক্যুরিতী অমদি কনফিদেন্সকী ৱাখল্লোন অমা ফাওহল্লি৷ নখোয়গী থৌনা অদুনা মরম ওইদুনা ঐখোয়গী কুহ্মৈশিং অসি মঙাল নাইনা পাংথোকপা ঙম্লিবনি, মফম পুম্নমক্তা নুঙাই-য়াইফবা হরাউ নুংঙাইবনি নিল্লি অমদি মসিনা ঐখোয়গী কুহ্মৈশিংগী মশক হাপ্লি৷ দীপাবলিগী মতুংদা কুইদনা, গোবর্ধন পুজা, ভৈয়া দোজ অমদি ছথ কুহ্মৈশিং লাক্লগনি৷ নখোয়গা লোইননা, ঐনা নৌশেরাগী লমদম অসিদগী হরাউ-কুহ্মৈ পুম্নমক্কী ওইনা লৈবাকমচাশিংদা ঐগী য়াইফ-পাউজেলশিং পীজরি৷ ঐখোয়গী লৈবাক্কী মফম কয়াদা, মীয়াম্না দীপাবলিগী হেক মথংদা ন্যু য়র পাংথোক্লগনি৷ দীপাবলিদা একাউন্তিং তৌবা লোইনরগনি অমদি দীপাবলিগী হেক মথংগী নুমিৎতা অনৌবা ফাইনান্সিয়েল চহি অমা হৌরগনি৷ মরু ওইনা গুজরাত্তা, হয়েং অসি অনৌবা চহিনি৷ মরম অদুনা ঙসি, ঐনা গুজরাতকী মীয়ামদা য়াইফ-পাউজেল কয়া পীজরি৷

মরুপশিং,

নৌশেরাগী লম অসিদা ঐনা লাকখিবা মতম, মফম অসিগী লৈহাউ অসিদা শোকখিবা মতমদা, ঐঙোন্দা তোঙানবা ইহুল, তোঙানবা নুংঙাইবা অমা ফাওরকখি৷ লমদম অসিগী পুৱারি অসিনা ইন্দিয়ন আর্মীগী থৌনা অদুবু ইকাই খুম্নরি অমদি মদু চিংদোল খুদিংমক্তদগী তাবা ফংগনি৷ মফম অসিদা শরুক য়ারিবা অসি নখোয়গুম্বা থৌনা লৈরবা লান্মীশিংগী থৌনাবু উৎলিবা ময়েক লারবা খুদম অমনি৷ থৌনা ফবগী লিবিং প্রুফ অদু ঐগী ইমাংদা লৈরি৷  নৌশেরানা লানফম, প্রোক্সী অমদি কন্সপিরেসী খুদিংমক্তা অফবা পাউখুম অমা পীদুনা কাশ্মীর অমদি শ্রীনগরগী ঙাকশেল অমা ওইনা লৈখ্রে৷ লৈবাক অসিনা মনিং-মখা তম্লবা মতুং ইকুই-কুইদনা, মসিদা য়েক্নবশিংনা মীৎয়েং থমখি৷ নৌশেরাদা লান্দারকখি অমদি য়েক্নবশিংনা মশিবু লৌশিন্নবা হোৎনরকখি৷ ভিদিও অদু য়েংলবা মতুং হৌজিক খক্তদা, খুদিংমক খঙনবগী খুদোংচাবা অমা ঐনা ফংখি অমদি নৌশেরাগী থৌনা লৈরবা মীয়ামগী মমাংদা কন্সপিরেসী পুম্নমক মাইথিবা পীরিবা অসিদা ঐ নুংঙাইবা ফাওই৷

মরুপশিং,

ঙল্লিঙৈ মতমদগী হৌদুনা য়েক্নবনা ইন্দিয়ন আর্মীগী মপাঙ্গল অসি খঙখ্রে৷ লৈবাক অসি ঙাক শেনবদা অৱাংবা থাক অমদা কৎথোকখিবা নৌশেরাগী নোংশা, ব্রিগেদিয়র মোহামদ উসমান অমসুং নাইয়ক জাদুনাথ সিংহদা ঐনা ইকাই খুম্নবা উৎচরি৷ ইন্দিয়ন আর্মীনা মাই পাকপগী লম্বী য়াৎপিখিবা লেতনেল আর.আর. রেনদা ইকাই খুম্নবা উৎচরি৷  দীপাবলিগী কুহ্মৈদা অসিগুম্বা মীথোইরবা মীওই অনিনা ঐবু চানবিবগী খুদোংচাবা ফংখিবা অসি ঐ লাইবক ফৈ৷ মসি ঐগী পুন্সিদা মমল নাইদ্রবা খুদোল অমা ওইরগনি৷ অঙাং ওইরিঙৈদগী হৌনা রিসোর্সশিং অমতা য়াওদনা ইমা ভারতপু ঙাক শেন্নবা হোৎনবিখিবা  শ্রী বাল্দেব সিংহ জী অমদি শ্রী বসন্ত সিংহ জীগী মঙ্গোলশিং ঐনা ফংখি৷ মনিং-মখা তম্নবা শোক্নখিবা লানফমগী মতুংদা, অসিগুম্বা লোকেল তীনএজর কয়া অমনা ব্রিগেদিয়র মোহামদ উসমানগী লমজিং-লমতাক মখাদা চাইল্দ সোলজরগী থৌদাংশিং লৌখি৷ মখোয়গী পুন্সিগী মতাংদা কা-হেন্না খল্লুদনা, মখোয়না লৈবাক্কী আর্মীগা লোইননা থবক তৌমিন্নখি, অসিগুম্বা য়াম্না নৌরিবা মতম অসিদা আর্মীগী মতেং পাংখি৷ সর্জিকেল স্ত্রাইক্তা ব্রিগেদিয়র অসিনা লৌখিবা থৌদাং অসিনা লৈবাকমচা খুদিংমকপু চাওথোকচবা ফাওহল্লি৷ মীপুম খুদিংমক্না নুমিৎ তাদ্রিঙৈ মমাংদা হল্লক্কদবনি হায়না ঐনা লেপখিবনা নুমিৎ অদু ঐনা মতম পুম্নমক্কী ওইনা নিংশিংলি৷ থৌনা ফরবা লান্মীশিংনা মখোয়গী মথৌ অদু লোইশিল্লবা মতুংদা তেক্ত-কাইদনা হল্লকপগী পাউ অদু তাননবা ঐনা ফমদুনা ফোন লাকপা ঙাইদুনা লৈরমখিরম্মী৷ মফম অসিদা তংদু লৈতানা লৈহন্দনবা কয়ারক হন্না হোৎনরকখি অমদি মখোয় অদু ঙসি সর্জিকেল স্ত্রাইক পাংথোক্লবা মতুং ফাওবা থোক্লিবনি অদুবু মতম খুদিংমক্তা তেরোরিজম্না অফবা পাউখুম অমদি ফংলি৷ লমদম অসিদা অরানবা অমদি পিচার চুম্না তৌদবগী মাইয়োক্তা নেচরেল মোতিবেসন অমা লৈ৷ মসিনা লমদম অসিদা অচৌবা ইন্সপিরেসন অমা ওইগনি হাযনা ঐনা থাজৈ৷ পান্দবশিংসু মখোয়গী মরৈবাক্তদগী তান্থোরকখিবা মতমদা লমদম অসিদা মতম খরা লৈরম্মী হায়না থাজনরি৷ ঙসি নখোয় পুম্নমক্কী মরক্তা মফম অসিদা লৈরিবা ইনর্জীদা ঐবু চিংশিনবগুম ফাওই৷

মরুপশিং,

হৌজিক হৌজিক্কী ওইনা, লৈবাক অসিনা মনিং-মখা তম্লকপা চহি ৭৫ শুরকপদা, নিংতম্বগী অমিৃত মহোতসব পাংথোক্লি৷ শাংলবা মতম অসিদা মশিং থিবা ঙমদনা কৎথোক্লবা মতুংদা মসিগী নিংতম্বা অসি ঐখোয়না ফংখিবনি৷ মসিগী নিংতম্ববু ঙাক-শেনবা হায়বসি ঐখোয়গী থৌদাংনি৷ নিংতম্বগী য়াইফরবা মতম অসিদা ঐখোয়না অনৌবা পান্দমশিং, অনৌবা রিজোলুসনশিং অমদি চেলেঞ্জশিং থেংনরি৷ অসিগুম্বা য়াম্না মরু ওইরবা মতম অমদা, ঙসিগী ভারতনা মহাক্কী শক্তি অমদি মহাক্কী রিসোর্সশিংগী মতাংদা নিংথিনা খঙলি৷ লাইবক থিবদি, ঙল্লিঙৈ মতমদা আর্মীনা মহাক্কী দরকার ওইরিবা রিসোর্সশিং অদু মপান লম খক্তদগী লৌগনি হায়না খন্নরমখি৷ ঐখোয়না তেক্নোলোজীদা শেল হেন্না থাদগদবনি৷                                                                                                                                                                                                                               অনৌবা খুৎলাইশিং অমদি ইক্ব্যুইপমেন্ত লৈনবগী থৌওং চত্থরকপা চহি য়াম্লে৷ ওফিসর অমনা ফাইল হাংদোক্লবদি, মরু ওইরিবা ইক্ব্যুইপমেন্ত অদু মহাক্না থবক্তগী পোৎথাদ্রিঙৈগী মমাং ফাওবদা য়ৌরক্লোই! মসিনা মরম ওইদুনা, তঙাই ফদবা মতমদা অথুবগী ওইনা স্পেয়র পার্তশিং য়াওনা খুৎলাইশিং লৈখিরমখি, ঐখোয়না অতোপ্পা লৈবাকশিংদা মখা পোন্দুনা লৈরমখি৷

মরুপশিং,

দিফেন্স সেক্তরদা মশা মরোমদোম লেপচবা ঙম্নবা হোৎনরিবা অসিনা অদুগুম্বা অরিবা ফিভমশিং অসি হোংদোকহন্নবগী শক্তি লৈরবা লম্বী অমা ওই৷ হৌজিক্তি দিফেন্স বদজেৎকী চাদা ৬৫রোমদি লৈবাক অসিদা শাজবা খুৎলাইশিং লৈবদা শিজিন্নরি৷ পুম্নমক অসি ঐখোয়গী লৈবাক অসিনা তৌবা ঙমগনি অমদি ঙমগনি হায়বা অদুসু মসিনা উৎলে৷ মমাংগী মতমদা অমুক্তা লৌখৎত্রিবা খোংথাং অমা ওইনা, হৌজিক্তি ভারতনা লৈবাক অসিদা শাজবা দিফেন্সকা মরী লৈনবা ইক্ব্যুইপমেন্ত ২০০ হেন্না লৌশিন্নবসু ৱারেপ্নখ্রে৷ মসি অত্মনির্ভর ভারতকী রিজোলুসননি৷ লাক্কদৌরিবা থা খরা অসিদা অহেনবা আইতেমশিং হাপচিল্লগনি অমদি মসিগী পোজিতিব লিস্ত অসিনা লৈবাক অসিবু মশা-মরোমদোম লেপচবা ঙমহল্লগনি৷ মসিনা লৈবাক অসিগী দিফেন্স সেক্তর অসি হেন্না মপাঙ্গল লৈহল্লগনি অমদি অনৌবা খুৎলাইশিং অমদি ইক্ব্যুইপমেন্ত পুথোক্নবগীদমক শেল থাদবসু হেনগৎলগনি৷

মরুপশিং,

ঙসিদি ঐখোয়গী লৈবাক অসিদা আর্জুন তেঙ্কশিং অমদি তেজাসকুম্বা স্তেত-ওফ-দি-আর্ত লাইত কোম্বেৎ এয়রক্রাফত শারি৷ হন্দক্তা ইকুই কুইদ্রিঙৈদা, বিজয়াদশমী নুমিৎতা লৈবাক অসিদা অনৌবা দিফেন্স কম্পেনী তরেৎসু দেদিতেদ  তৌরকখ্রে৷ ঐখোযগী লৈরম্লিবা ওর্দিনেন্স ফোক্তরীশিং অসিনা হৌজিক্তি স্পিসিয়েলাইজ সেক্তরশিংদা অনৌবা দিফেন্স ইক্ব্যুইপমেন্ত পুথোক্লগনি৷ লৈবাক অসি ঙাক শেন্নবা ঙসিদি ঐখোয়গী প্রাইভেৎ সেক্তরনসু হিরম অসিদা এলাই অমা ওইরক্লি৷ ঙসিদি, ঐখোয়গী অনৌবা দিফেন্স স্তার্ত-অপ কয়া অমনা মখোয়গী মার্ক থম্লি৷ চহি ২০-২২-২৫ শুরবা ঐখোয়গী নহাশিংনা অনৌবা ইন্নোবেসনশিংগা লোইননা থোক্লক্লি৷ মসি চাওথোকচনিংঙাই অমনি৷

মরুপশিং,

উত্তর প্রদেশ অমদি তামিল নাদুদা শারিবা দিফেন্স কোরিদোরশিংনা মসিগী খোঙজেল অসি মখাতানা য়াংখৎহল্লগনি৷ ঙসি ঐখোয়না থাংলিবা খোংথাং পুম্নমক অসিনা ভারতকী তৌবা ঙম্বা হেনগৎহল্লগনি অমদি দিফেন্স এক্সপোর্তর অমা ওইনা ঐখোয়গী আইদেন্তিতী উৎথোক্লগনি৷

মরুপশিং,

ঐখোয়গী স্ত্রিপচরশিংদা অসুম্না ইরম্মী:

को अतिभारः समर्थानाम।

মসিনা হায়নিংলিবা অদুদি, তৌবা ঙম্বা মীদা পোৎলুমগী করিসু মথৌ তাদে৷ মরম অদুনা মালেমগী হোংলক্লিবা ফিভম, হোংলক্লিবা লানগী মওং-মতৌ অসিনা মরম ওইদুনা ঐখোয়না ঐখোয়গী মিলিতরীগী শক্তি অসি হেনগৎহনবা দরকার ওই৷ মখোয়সু অনৌবা শক্তি ফংহনগদবনি৷ মালেমদা খোঙজেল য়াংনা হোংলক্লিবা মওং মতৌ অসিগী মতুং ইন্না ঐখোয়গী প্রিপরেসনশিংদা চুশিন্ননবা ঐখোয়না হোৎনগদবনি৷ মতম অমদা, শামুশিং অমদি শগোলশিং শিজিন্নদুনা লানশিং লান্থেংনরমখি৷ হৌজিক্তি মওং অসি হোংলকপনা কনা অমনা মসিবু নিংশিংলরোই৷ ঙল্লিঙৈ মতমদা, লানগী মওং হোংদোক্নবা হোৎনবদা চহি খুজিং কয়া, চহি-চা কয়া চংনরম্বা য়াই৷ ঙসিদি, রেপিদ তেক্নোলোজীনা মরম ওইদুনা অয়ুক্তগী নুমিদাংৱাইরম ফাওবদা লান শোক্নবগী মওং অসি হোংলে৷ ঙসিদি, তোঙান তোঙানবা এস্পেক্তশিংগী হেন্না ফবা কোওর্দিনেসন থম্বা, তেক্নোলোজী অমদি হাইব্রিদ তেক্তিকশিং শিজিন্নবা অসিনা চাওনা হোংহনবা ঙমগনি৷ ঙসিদি, থবক তৌবদা লিদরশিপ ওর্গানাইজ তৌবা অমদি হেন্না ফবা কোওর্দিনেসন থম্বা অসিনা য়াম্না মরু ওইরক্লি৷ মরম অদুনা, হৌখিবা চহি খরা অসিদা লেবেল খুদিংমক্তা রিফোর্মশিং লেপ্প-লৈতনা তৌরক্লি৷ দিফেন্স স্তাফকী চীফপু খল্লবসু নত্রগা মিলিতরী এফিয়র্সকী দিপার্তমেন্তবু শেম্লবসু, হোংলক্লিবা মতমশিং অসিদা ঐখোয়গী মিলিতরী শক্তি অসি চান্ননবা হোৎনবদা মখোয়না য়াম্না মরু ওইবা থৌদাং অমা লৌরি৷

মরুপশিং,

মোদর্ন বোর্দর ইনফ্রস্ত্রকচর অসিনা ঐখোয়গী মিলিতরী শক্তি অসি হেন্না মপাঙ্গল লৈহল্লগনি৷ লৈবাক অসিদা লৈরিবা মীয়াম্না মমাংগী মতমদা ঙমখৈগী মফমশিংদা পাংথোক্লিবা কন্নেক্তিবিতীগী থবক অদু নিংথিংনা মশক খঙই৷ হৌজিক্তি, হৌজিক মতমগা চুনবা লম্বীশিং, অচৌবা তনেলশিং, থোংশিং অমদি ওপ্তিকেল ফাইবর নেতৱার্কশিং লদাখতগী অরুনাচল প্রদেশ ফাওবা, জয়সাল্মরদগী অন্দামন অমসুং নিকোবর ইথৎশিং ফাওবা অমদি নোর্মেল কন্নেক্তিবিতী লৈতবা ঐখোয়গী ঙমখৈগী মফমশিংদা শেম-শারি৷ মসিনা ঐখোয়গী দিপ্লোইমেন্ত কেপাবিলিতী মমাংগী মতমদা অমুক্তা ফাওবা ফংখিদ্রিবা ইমপ্রুবমেন্ত অদু ফংহনবতা নত্তনা ঐখোয়গী লান্মীশিং খুদোংচাবা কয়া অমসু ফংহল্লগনি৷

মরুপশিং,

অনৌবা অমসুং তৌবা ঙম্বা ভারত অমগী পোতেন্সিয়েলদা নুপীনা শক্তি পীননবা হৌখিবা চহি তরেৎ অসিদা সেক্তর খুদিংমক্তা কা-হেন্না হোৎনরি৷ ভারতকী মচানুপীশিংনা শরুক যাশিল্লকপা অসিনা হৌজিক্তি দিফেন্সকী ফিল্দদা অনৌবা তাংকক অমা ফংনবা চংশিল্লক্লি৷ নুপীশিং অসি ইশিংগী লান্মী অমদি নোংথক্কী লান্মীদা হাপচিল্লক্লবা মতুংদা হৌজিক্তি নুপীগী থৌদাং অসি আর্মীদসু চাওথোরক্লি৷ মিলিতরী পুলিসকী থোংশিং অসি ইচানুপীশিংদা হাংদোক্লবা মতুংদা, নুপী ওফিসরশিংদা পার্তনরশিপ অসিগী শরুক অমা ওইনা পর্মেনেন্ত কম্মিসন পীরি৷ হৌজিক্তী নেস্নেল দিফেন্স একাদমী, রাস্ত্রিয়া মিলিতরী স্কুল অমসুং রাস্ত্রিয়া ইন্দিয়ন মিলিতরী কোলেজকুম্বা লৈবাক্কী মমিং লৈরবা মিলিতরী ইন্সতিত্যুসনশিং নুপীশিংগীদমক হাংদোরক্লি৷ চহি অসিগী ওগস্ত ১৫দা, লৈবাক অসিদা লৈরিবা সাইনিক স্কুল পুম্নমক্তা ইচানুপীশিংনা মহৈ-মশিং তম্বগী খুদোংচাবা অমসু হৌজিক্তি ফংলগনি হায়না ঐনা রেদ ফোর্ততগী লাওথোকখ্রে৷মসিদসু থবক পাইখৎপা হৌখ্রে৷

মরুপশিং,

নখোয়গুম্বা লৈবাক্কী দিফেন্দরশিংগী য়ুনিফোর্মদা ঐনা অচৌবা শক্তি উবতা নত্তনা, ঐনা নখোয়দা য়েংবা মতমদা, ঐনা নখোয়গী পুক্নিং চিংশিন্নিংঙাই ওইরবা সর্ভিস, অখাং-কনবা অমদি চাংদম্নিংঙাই লৈত্রবা নখোয়গী সেন্সিতিবিতী অদু উবা ফংই৷ মরম অদুনা, ভারতকী আর্মী অসি মালেমদা লৈরিবা অতোপ্পা আর্মী অমা হেক্তদগী তোঙাল্লি, মহাক্কী তোঙানবা আইদেন্তিতী অমা লৈ৷ নখোয় অসি মালেমগী মকোক থোংবা আর্মীশিংগুম্বা প্রোফেস্নেল ফোর্ম অমনি, অদুবু নখোয়গী হ্যুমেন ভেল্যুশিং অমদি ইন্দিয়ন কল্চর অদুনা নখোয়বু থোইদোক-হেন্দোক্না পর্সোনেলিতী লৈবা মীওই ওইহল্লিবনি অমদি নখোয়বু ময়ামদগী তোঙালহল্লিবনি৷ লৈবাক অসিগী প্রজা কোতি ১৩০গী পুন্সিবু থাক অমদা নখোয়না পুখৎলিবনি৷ মসি কোকথোক-চামথোকপগী লম্বী অদুনি অমদি মপু ইবুংঙো রামদা ঐখোয়গী খ্বাইদগী ৱাংবা আইদিল ফংলিবা মীওই অদু ঐখোয়নি৷ মপু ইবুংঙো রাম্না লঙ্কা খুদুম চল্লবা মতুং অযোধ্যাদা লাকখিবা মতমদা, মহাক্না মীয়ামদা লাওথোকখি:

अपि स्वर्ण मयी लंका, न मे लक्ष्मण रोचते। जननी जन्म भूमिश्च स्वर्गादपि गरीयसी॥

মসিনা হায়নিংলিবা অদুদি, সনা মরাং কাইনা ফংলবা অমসুং চাওখৎপদা লম্বা লৈত্রবা লঙ্কাবু ঐখোয়না মাইথিবা পীবা ঙম্লে, অদুবু ঐখোয়না লান্থেংনখিবা অসিদি ঐখোয়গী প্রিন্সিপলশিং অমদি মীওইবা জাতিবু ঙাক শেন্নবা পাংথোকখিবনি৷ ঐখোয়গী ওইনিদ, ঐখোয়গী নেতিব ওইজবা লম অসি ঐখোয়গীনি, মফম অসিদা ঐখোয় অমুক হল্লক্কদবনি অমদি মফম অসিদা হিংগদবনি৷ মরম অদুনা, মপু ইবুংঙো রাম্না হল্লক্লবা মতুংদা, অযোধ্যা পুম্বনা মহাকপু ইমানি হায়না তরাম্না ওকখি৷ অযোধ্যাগী মীপুম খুদিংমক অমদি লৈবাক পুম্বনা দীপাবলি পাংথোকখি৷ মসিগী ৱাখল্লোন অসিনা ঐখোয়বু ময়ামদগী তোঙালহল্লিবনি৷ পুৱারি শেমখি অমদি মাংহনখি৷ শক্তি লাক্লি অমদি চৎখিনি৷ এম্পাইয়রশিং মঙাল-নাইনা পাল্লম্মী, মুৎখিরম্মী অদুবু ভারতকি চহি লিশিং কয়াগী মমাংদগী ওমোর ওইখি, ঙসিসু ভারতকি ওমোর ওইরি, অমদি চহি লিশিং কয়াগী মতুংদা ওমোর ওইদুনা অদুমক লৈহৌরগনি৷ লৈবাক অসিবু ঐখোয়না রুল, পৱার অমদি এম্পাইয়র অমা ওইনা উদে৷ ঐখোয়গী ওইনদি, মসি অহিংবা থৱাই অমনি৷ মহাক্না ঙাক শেল্লিবা অসি জিওগ্রাফিকেল বাউন্দরীশিং খক্ত নত্তে৷ ঐখোয়গী ওইনা, লৈবাক অসিবু ঙাক শেনবা হায়বসি লৈবাক্কী বাইতেলিতী, নেস্নেল য়ুনিতী অমদি নেস্নেল ইন্তিগ্রিতীবু ঙাক-শেনবা হায়বনি! ঐখোয়গী আর্মীশিংনা থৌনা লৈনা পাংথোক্লি অমদি মসিগা লোইননা মখোয়গী থমোইদা হ্যুমেনিতী অমদি কম্পেসন লৈ৷ মরম অদুনা ঐখোয়গী আর্মীশিংনা ঙমখৈশিং খক্তদা মখোয়গী থৌনা উৎথোক্তে৷ কলামিতীশিং, দিজাস্তরশিং, লাইনা অমদি লাইচৎকী মতমদা লৈবাক অসিনা মখোয়বু দরকার ওইরকপা মতমদা মখোয়না অদুমক শরুক য়াগনি৷ মীওই অমতা তৌবা ঙমদবা ফংবা ঙমদবা মফম অদুদা ভারতকী আর্মীশিং লৈরমগনি হায়না লৈবাক অসিদা থাজনবা লৈ৷ লৈবাক অসিনা লৈরিবা মীওইশিংনা ইন্দিয়ন আর্মী উরুবা মতমদা ভারত মচা খুদিংমক্তা ৱাখল অমা লাক্কনি৷ মসি অপিকপা ৱাফম অমা নত্তে৷ নখোয় অসি লৈবাক্কী ইন্তিগ্রিতী অমদি য়ুনিভর্সেলিতীগী সেন্তিনেলনি; নখোয়না ‘এক ভারত শ্রেস্থ ভারত’ (ভারত অমা, সুপ্রিম ইন্দিয়া)কী রিসোল্বকী সেন্তিনেলনি৷ নখোয়গী থৌনাগী ইন্সপিরেসন অদুগা লোইননা, ঐখোয়না ঐখোয়গী ভারতপু খ্বাইদগী ৱাংবা থাকশিংদা পুখৎলক্কনি হায়না ঐনা থাজৈ৷

মরুপশিং,

নখোয়সু নুংঙাইরবা দীপাবলি ওইরসনু! নখোয়গী ইমুং-মানুংগী মীওইশিংদা য়াইফ-পাউজেল পীজরি অমদি নখোয়গুম্বা অথৌবা মচানুপাশিং অমদি মচানুপীশিং পোক্লিবা মমাংশিংদসু খুরুমজরি৷ নখোয় পুম্নমক্তা নুংঙাইরবা দীপাবলি অমা ওইরসনু হায়না ঐনা অমুক্কা হন্না য়াইফ-পাউজেল পীজরি৷ নখোয়গী শক্তি পুম্নমক্কা লোইননা ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে!

থাগৎচরি!

******