ভারত ইমানা য়াইফরে, ভারত ইমানা য়াইফরে, উত্তরাখন্দগী রাজ্যপাল লেফতনেন্ত জেনেরেল রিতাইয়র্দ গুর্মীত সিংহজী, নহা ওইরিবা অমসুং মথৌদা থৱাই চঙবা মুখ্যমন্ত্রী, ঐহাক্কী মরুপ শ্রী পুশকর সিংহ ধামিজী, কেন্দ্রগী কেবিনেৎকী ঐহাক্কী মরুপ অমসুং খোঙলোই, শ্রী মনশুখ মন্দাবিয়াজী, শ্রী অজয় ভৎজী, উত্তরাখন্দ বিধান সভাগী স্পীকর, শ্রী প্রেম চান্দ অগ্রৱালজী, উত্তরাখন্দ সরকারগী মন্ত্রী, দাঃ ধন সিংহ রাৱৎজী, ঙসি অসি মহাক্কী মপোক নুমিৎসু ওইবনা মহাক্কী মপোক নুমিৎকী য়াইফ পাউজেল পীজরি। লৈবাক্কী তোঙানবা রাজ্যশিংগী মুখ্য মন্ত্রী, লেফতেনেন্ত গবর্নর, রাজ্যগী অতোপ্পা মন্ত্রী, এম.পি. অমসুং এম.এল.এ. অমদি ঐহাক্কী নুংশিরবা ইচিল ইনাওশিং!!!

মসিগী লাইরৈবাক অসি মুনি-ঋশি কয়াগী লাই নীংফম্নি। য়োগগী মফম অমা ওইদুনা, মসিনা মালেমগী মীয়ামগী পুক্নিং চিংশিন্দুনা লাক্লি। ইমা গঙ্গাগী নাক্তা লৈদুনা, লমদমসিনা মহাক্কী থৌজাল ফংদুনা লাক্লি। ঙসিদগী, নবরাত্রীগী শেংলবা কুমহৈসু হৌরে। ঙসিগী অহানবা নুমিৎ অসি ইমা শৈলপুত্রীদা খুরুমজবা নুমিৎনি। ইমা শৈলপুত্রী অসি হিমালয়গী মচানুপীনি। ঙসিগী নুমিৎ অসিদা ঐহাক্না মফম অসিদা লৈবা, মফমসিদা লাক্তুনা মফমসিগী লৈবাকপু খুরুমজবা, হিমালয়গী লমদম অসিদা খুরুমজবা, পুন্সিদা মসিদগী হেন্না নুংঙাইবা করি লৈগদগে। অদুগা ঐহাক্না ঙসি উত্তরাখন্দগী লমদমসিদা লাকপা অসিদা ঐহাক্না অখন্নবা হীরম অমগী ওইনসু থাগৎপা ফোংদোক্নীংই। মরমদি, তোকিয়ো ওলিম্পিক্সতা লাইরৈবাক অসিগী মীওইনা মশাগী ফিরাল হায়হল্লম্লে অমসুং অদোম খুদিংমক ঐখোয় খুদিংনা ইকায় খুম্নফম থোকই। উত্তরাখন্দগী দিব্যধারানা ঐহাক্কুম্বা মীওই কয়াগী পুন্সিদা অহোংবা লাকহনবগী চাউরবা থৌদাং লৌবীখি। মরম অদুনা, লমদম অসি ঐহাক্কী ওইনদি য়াম্না নুংশিজৈ। লমদমসিগা ঐহাক্কা লৈনরিবা মরী অসি মর্মা, কর্মা, সত্ব অমসুং তত্বগী মরীনি।

মরুপশিং,

মুখ্য মন্ত্রীজীনা হৌজিক্তা নিংশিংবীখিবা অদুনি, ঙসিগী নুমিৎসিমক্তদা চহি ২০গী মমাংদা ঐহাক্না মীয়ামগী সেবা তৌজনবা থৌদাং ফংজখি। মীয়ামগী মরক্তা লৈদুনা, মীয়ামগী মতেং পাংবগী খোঙচত্তি দিকেদ কয়াগী মমাংদগী হৌখ্রবনি, অদুবু ঙসিদগী চহি ২০গী মমাংদা ঐহাক্না গুজরাতকী মুখ্য মন্ত্রী ওইনা অনৌবা থৌদাং ফংখি। অদুগা তান য়াম্না চান্নবা অমনা, উত্তরাখন্দ শেমখিবসি ইং ২০০০দনি অমসুং লমদমসিগী ওইবা ঐহাক্কী অহানবা খোঙচৎসু মসিদগী শুপ্নগী থা খরগী মতুং, হায়বদি ইং ২০০১দনি।

মরুপশিং,

সরকারগী মকোক ওইনা অহানবদা মুখ্য মন্ত্রী অমসুং লৈবাক মীয়ামগী থৌজালদগী লৈবাক্কী প্রধান মন্ত্রী ওইহনবীখিবা অসি ওইথোক্কনি হায়বা ঐহাক্না ৱাখলদা ফাওবা লাম্বা ফংখিদে। অসিগুম্লবা চহি ২০গী লেপ্তবা খোঙচৎনা হৌজিক ২১শুবা চহি য়ৌশিল্লক্লে। অসিগুম্বা মরু ওইরবা চহিসিদা, ঐহাকপু মতম পুম্বদা শৌগৎপীখিবা, নুংশিবিখিবা মফম অসিদা ঐহাক্না অমুক হন্না লাকপা ফংজবসি ঐহাক্কী লাইবক ফবনি খঞ্জৈ। কত্থোকপা অমসুং লাইনীংবগী লম্বী তাকপীবা হিমালয়গী লমদম অসিদা লাকপা অসিদা ঐহাক্না লৈবাক মীয়াম সেবা তৌজগে খঞ্জরিবা ৱাখল্লোন্সু হান্নদগী হেন্না মপাঙ্গল লৈখৎলে। মফমসিদা লাকপদা ঐহাক্না অনৌবা ইথিল অমা ফংলে।

ইচিল ইনাওশিং,

য়োগ অমসুং অয়ুর্বেদগী শক্তিদগী পুন্সিবু হকশেল ফনা লৈনবা ৱারোইশিন পীরিবা লমদম অসিদগী হৌনা ঙসি ভারত শিনবা থুংবদা অনৌবা ওক্সীজেন প্লান্ত কয়া অমা থবক তৌবা হৌরে। লৈবাক অসিগী তোঙান-তোঙানবা রাজ্যশিংদা ওক্সীজেন প্লান্তকী অনৌবা খুদোংচাবা লৈগদৌরিবা অসিগীদমক্তা ঐহাক্না লৈবাক মীয়ামদা হন্না হন্না য়াইফ পাউজেল পীজরি।

মরুপশিং,

চহি ১০০দা থেংনবা খ্বাইদগী লুবা ইরাং অসিগা মাইয়োক্ননবগীদমক্তা ঐখোয় ভারত মচাশিংনা থৌনা ফনা হোৎনরিবা অসি মালেম শিনবা থুংবনা য়েংনরি। কোরোনাগা লান্থেংনবদা ভারতনা অতেনবা মতমদা খুদোংচাবা কয়া লৈহল্লিবা অসিনা ঐখোয়গী লৈবাক্কী তৌবা ঙম্বগী মতিক উৎলি। শুপ্নতগী তেস্তিং লেব ১দগী চাউরাকপা লেব লিশিং ৩গী নেৎৱর্ক শেম্বা ঙম্বা, মাস্ক ইম্পোর্ত তৌরম্বদগী হৌদুনা ঐখোয়না ঙসিদি এক্সপোর্ত তৌবা ঙম্নবা য়াম্না য়াঙবা খোঙচৎ অমা চৎলি। লৈবাক্কী অরাপ-অরাপ্পা মফমদসু অনৌবা ভেন্তিলেতরগী খুদোংচাবা, ভারত্তা শাবা কোবিদ ভেক্সিনসু য়াঙনা অমসুং মশিং য়াম্না পুথোকপা, মালেমগী খ্বাইদগী চাউবা অমসুং য়াঙবা তীকা থাবগী খোঙজং,

অসিগুম্বা থৌওং কয়া ভারতনা থবক্না উৎলিবা অসি ঐখোয়গী সেবা, ৱাখল চেৎপা অমসুং অমত্তা ওইনা তেংবাংনবগী খুদম্নি।

ইচিল ইনাওশিং,

ভারতনা কোরোনাগা লান্থেংনবদা, ঐখোয়গী মীশিং য়াম্বা, তোঙানবা লম্মিৎ-তুম্মিৎকী ফিভম্না য়াম্না চাউবা শিংনবা অমা ওইখি। ওক্সীজেন পীবদগী হৌনা ভেক্সিন ফাওবদা, শিংনবা অনি অসিনা লৈবাক্কী মাঙদা লেপ্তনা লেঙদনা লৈখি। লৈবাক মীয়াম খুদিংনা লৈবাক অসিনা মসিগা মতৌ করম্না থেংনখিবগে নীংথিনা খঙবা, ভাব তাবা অসি য়াম্না মরু ওইবা অমসুং তঙাই ফদবনি।

মরুপশিং,

অতোপ্পা মতমশিংদা, ভারতনা নোংমদা লিক্বিদ মেদিকেল ওক্সীজেন মেত্রিক তোন ৯০০ পুথোক্লম্মি। অপাম্বা হেক লৈরকপদগী, ভারতনা মেদিকেল ওক্সীজেন পুথোকপগী চাংবু শরুক ১০ হেন্না হেনগৎহনখি। মসিদি মালেমগী লৈবাকশিংনা খনবা ফাওবা ঙম্লোইদবা পান্দম্নি, অদুবু ভারতনা মসিগী পান্দমসিমক ফংখি।

মরুপশিং,

ঙসি মফম অসিদা তিল্লিবা মীথুংলেন কয়া অমনা ওক্সীজেন পুথোকপগা লোয়ননা মসিবু পুথোক-পুশিন তৌবদা খুদোংচাদবা কয়া থেংনরমগনি হায়বগী মতাংদা নীংথিনা খঙলমগনি। ওক্সীজেন অসি তেঙ্কর অমদা হেক্তা হাপ্লগা পুবা য়াবা নত্তে। মরম অদুনা, মসিগীদমক্তা অখন্নবা তেঙ্করগী মথৌ তাই। ভারত্তা ওক্সীজেন পুথোকপগী থবকশিং অয়াম্বনা নোংপোক ভারত্তা পাংথোকই, অদুগা মসিগী খ্বাইদগী য়াম্না তঙাই ফদবা লৈবনা অৱাং অমসুং নোংচুপ ভারত্তা ওইবনা শিংনবা য়াম্না হেন্না লৈখি।

ইচিল ইনাওশিং,

লোজিস্তিক্সতা থেংনবা শিংনবা কয়া থেংননবগীদমক্তা ভারতনা ৱার ফুতিংদা থবক পাংথোকখি। লৈবাক অমসুং মালেমগী মফম কয়াদগী অহিং-নুংথিল নাইদনা ওইথোকপা য়াবা মফমশিংদগী ওক্সীজেন প্লান্ত, ওক্সীজেন তেঙ্কর কয়া শিন-লাঙখি। অখন্নবা ওক্সীজেন ত্রেন চলায়খি, অহাঙবা তেঙ্কর পুথোক-পুশিন তৌনবা এয়রফোর্সকী এরোপ্লেন শিজিন্নখি। পুথোকপগী চাং হেনগৎহন্নবগীদমক্তা দি.আর.দি.ও.গী খুত্থাংদগী তেজাস ফাইতর প্লেনগী তেক্নোলোজী শিজিন্নখি। পি.এম. কেয়র্সতগী লৈবাক অসিদা পি.এস.এ. ওক্সীজেন প্লান্ত শাবগী থবকপুদি খোঙজেল য়াঙনা পাংথোকখিবতা নত্তনা ওক্সীজেন কন্সেন্ত্রতর লাখ ১ হেনবগীদমক্তা শেল ফাওবা পীথখি।

মরুপশিং,

তুংগী মতমদা কোরোনাগা লান্থেংনবগীদমক্তা ঐখোয়না শেম-শাবদা অৱাৎপা লৈতনবা, লৈবাক শিনবা থুংবদা পি.এস.এ. ওক্সীজেন প্লান্তকী নেৎৱর্ক অমা শেম-শারি। হৌখিবা থা খরদা, পি.এম. কেয়র্সকী মখাদা অয়াবা পীখ্রবা ওক্সীজেন প্লান্ত ১১৫০ হেনবনা থবক তৌবা হৌখ্রে। হৌজিক্তি, লৈবাক্কী জিলা খুদিং অসি পি.এম. কেয়র্সকী মখাদা শাখিবা ওক্সীজেন প্লান্তনা কোনবা ঙম্লে। পি.এম. কেয়র্সকী মতেংদগী শাখিবা মসিগী ওক্সীজেন প্লান্তশিং পুন্সিল্লবদি, কেন্দ্র, রাজ্য সরকারনা হোৎনরিবা কয়াদগী লৈবাক অসিদা অনৌবা ওক্সীজেন প্লান্ত চাউরাক্না লিশিং ৪ লৈরগনি। ওক্সীজেনগী শিংনবা কয়াগা মাইয়োক্নবগীদমক্তা হৌজিক লৈবাক অমসুং লৈবাক্কী হোস্পিতালশিং অসি হান্নদগী হেন্না মপাঙ্গল লৈরে।

মরুপশিং,

কোরোনা ভেক্সিন দোজ করোর ৯৩ হেন্না কাপখিবা অসিদি ভারত মচা খুদিংমক্না চাউথোকচগদবা ৱাফম্নি। ঐখোয়না অথুবা মতমদা করোর ১০০ য়ৌরগনি। ভারতনা কোৱিন প্লেৎফোর্ম পুথোক্তুনা অশুক চাউবা মওংদা ভেক্সিন কাপ্পা য়াই হায়না মালেমদা তাকপা ঙম্লে। চিং, মরুভুমী, উমং নত্ত্রগা সমুদ্র ওইরো, মী ১০ নত্ত্রগা লাখ ১০ ওইরো, ঙসিদি মফম খুদিংদা তেক্ত-কায়দনা ভেক্সিন য়ৌবা ঙম্লে। মসিগীদমক্তা, লৈবাক শিনবা থুংবদা তীকা কাপফম লাখ ১গা লিশিং ৩০ লিংখৎখি। অদুগা উত্তরাখন্দদসু সরকারনা থৱাই য়াওনা শিন-লাঙবদগী অহানবা দোজকী তিকা অসি ১০০% কাপা ঙমগদৌরে। মসিগীদমক্তা ঐহাক্না মুখ্য মন্ত্রী, মহাক্কী তীম, মফম অসিগী সরকারগী থৌমী খুদিংমকপু ঐহাক্না অমুক্কা হন্না থাগৎলি।

ইচিল ইনাওশিং,

তেরাইগুম্বা অপাকপা তম্পাক ওইবা লমদম ওইরম্লবদি থবকশিং অসি লায়না পাংথোকপা ঙম্লমগনি। ঐহাক্কা লমদম অসিগা মরী কয়া লৈনৈ। অদুবু মফম অসিদদি ভেক্সিন য়ৌহনবা ফাওবা য়াম্না লুনা থোকই। হিমালয় ৱাংমা লাল্লগা অতোপ্পা ৱাংমদা ভেক্সিন য়ৌহনবসি য়াম্না লুবা থবক্নি। মসিদি ঐখোয়না নীংথিনা খঙলবনি। অদু ওইরবসু, হৌজিক ফংলিবা মাই-পাকপা অসিগী ওইনা অদোম খুদিংমকপু তসেংনা থাগৎফম থোকই।

ইচিল ইনাওশিং,

২১শুবা চহি-চাগী ভারতনা মীয়ামগী অপাম্বা, মীয়ামগী তঙাই-ফদবশিংগী অপুনবা ৱারোইশিন পীরবা মতুংদা মাং থানা চৎকনি। ঙসিদি, লৈবাক্কী প্রজানা মখোয়গী খুদোংচাদবা পুরক্কনি অদুগা মদুগী ৱারোইশিন পীগনি হায়না সরকারনা ঙাইদুনা লৈত্রে। অসিগুম্বা থৌওংশিংসি সরকারগী ৱাখল্লোন অমসুং পথাপশিংদগী ঐখোয়না লৌথোক্লি। হৌজিক্তি সরকারনা প্রজাগী মনাক্তা ওইনা চৎলে। লাইরবশিংগী পক্কা য়ুম, মৈ, ঈশিং, অমাংশঙ অমসুং গ্যাস কন্নেক্সন ওইরো, মীওই করোর ৮০ হেনবদা লেম্না রেসন পীবা ওইরো, লৌমীশিংগী বেঙ্ক একাউন্ততা করোর লিশিং কয়া হকথেংননা পীবা ওইরো, পেন্সন অমসুং ইন্স্যুরেন্সকী খুদোংচাবা ওইরো, পুম্নমক অসি ভারত মচা খুদিংদা য়ৌহন্নবা কন্না হোৎনরি, অমসুং হোৎনজমন অসিনা মরম ওইদুনা ফংফম থোকপশিংনা কান্নবশিংসু ফংহনলি।

মরুপশিং,

হকশেলগী সেক্তরদসু ভারতনা ৱাখল্লোন অসিদা থবক পায়খৎলি। মসিদগী লাইরবা অসুং মিদ্দল ক্লাসকী মীওইশিংগী শেলসু কনবা ঙম্লে, খুদোংচাবসু ফংবা ঙম্লে। হান্নগী মতমদা, কনাগুম্বা মীওইনা কন্না নাবা মতমদা, মখোয়না তেংবাংগীদমক্তা মফমদুগী নেতা নত্ত্রগা সরকারগী ওফিসশিংদা তোইনা চৎলি। অয়ুশমান ভারতনা অসিগুম্বা খুদোংচাদবশিংবু মতম চুপ্পগী ওইনা লোইশিনহল্লে। হোস্পিতাল মমাংদা অশাঙবা লাইন্দা লেপ্পা, লাইয়েংবদা থেঙবা, মেদিকেল হিস্তরী লৈতবা কয়াশিং অসিদগী মীয়াম্না নুংঙাইতবা কয়া থেংনরম্মি। হৌজিক্তি, অয়ুশমান ভারত দিজিতেল মিসন্না অহানবা ওইনা অসিগুম্বা নুংঙাইতবশিং অসিগী ৱারোইশিন পুরক্নবা থবক পায়খৎপা হৌরে।

মরুপশিং,

অপিকপা লাইয়েংগীদমক্তা, নারিঙৈ মতমদা রুতিন চেক-অপ তোয়না চৎপদা নুংঙাইতবা কয়া থেংনরমগনি, মসিবু উত্তরাখন্দগী মীয়ামদগী হেন্না কনানা হেন্না খঙলমগনি। মীয়াম্বু অসিগুম্বা নুংঙাইতবশিংদগী নীংতম্বা ফংহন্নবগীদমক্তা ই-সঞ্জিবনী এপকী খুদোংচাবসু লৈহল্লে। মসিদগী, খুঙ্গংশিংদগী অনাবশিংনা ময়ুমদা ফমদুনা শহরগী হোস্পিতালশিংগী দাক্তরগা কন্সলতেসন তৌবা য়ারগনি। মসিগী কান্নবা অসি উত্তরাখন্দগী মীওইশিংনা লৌবা হৌনরে।

ইচিল ইনাওশিং,

হকশেলগী খুদোংচাবশিংবু খ্বাইদগী থাপ্পা মফমদসু য়ৌহন্নবগীদমক্তা মপাঙ্গল লৈবা হেল্থ ইনফ্রাস্ত্রকচর অমা লৈবগী তঙাই ফদবসু লৈ। চহি ৬-৭কী মমাংদা ফাওবা রাজ্য খরখক্তদা এমসকী খুদোংচাবা লৈরম্মি, ঙসিদি রাজ্য খুদিংদা লৈহন্নবা থবক পায়খৎলি। এমস ৬তগী হেন্দোক্তুনা এমস ২২গী নেৎৱর্ক অমা শেম্নবা ঐখোয়না খোঙজেল য়াঙনা থবক পায়খৎলি। লৈবাক্কী জিলা খুদিংদা য়ামদ্রবদা মেদিকেল কোলেজ অমমম লৈহনবা হায়বসি সরকারগী পান্দম্নি। মসিগীদমক্তা, হৌখিবা চহি ৭তগী লৈবাক্কী মনুংদা অনৌবা মেদিকেল কোলেজ ১৭০ শঙ্গাখ্রে। অনৌবা মেদিকেল কোলেজ দর্জন কয়া শাবগী থবকসু হৌখ্রে। ঐহাক্কী উত্তরাখন্দগী মফমদসু রুদ্রপুর, হরিদ্বার অমসুং পিথোরগরদা অনৌবা মেদিকেল কোলেজ শাবগী অয়াবসু পীখ্রবনি।

মরুপশিং,

উত্তরাখন্দ শেম্বগী মঙলানবু অতলজীনা মঙফাওনহনখি। অতলজীনা কন্নেক্তিভিতীগা চাউখৎপগা হকথেংনবা মরী লৈনৈ হায়না খল্লম্মি। মহাক্কী ইথিলদগী ঙসি লৈবাকসিদা কন্নেক্তিভিতীগী ইনফ্রাস্ত্রকচরগীদমক্তা খোঙজেল য়াঙনা অমসুং পাক-শন্না থবক পাংথোক্লি। উত্তরাখন্দ সরকার অসিনা হীরম অসিদা পুকচেল শেংনা থবক পায়খৎপসিদা ঐহাক্না নুংঙাইবা ফাওই। বাবা কেদারগী থৌজালদগী কেদারধামগী নীংথিবসু হেনগৎলে, মফমসিদা লাইনীংবা লাকপশিংগী অনৌবা খুদোংচাবসু শেম্লি। ঐহাক্না থবকশিং অসিগী চাউখৎপগী ফিভমসু দ্রোন কেমেরা শিজিন্নদুনা য়েংশিনলি। চার-ধামগা শমনহনগদবা অইং-অশা খুদিংদা চৎপা য়াবা লম্বী-শোরোক্তসু থবক কন্না পায়খৎলি। চার-ধামগী চাউরবা প্রোজেক্তনা লৈবাক অমসুং মালেমগী মফম কয়াদগী লাকপা লাইনীংবা কয়াদা কান্নবা কয়া পীরগনি। গরৱাল অমসুং কুমাউনগী খুদোংচাদবা মফমশিংবু শম্নহল্লগনি। শোরোক অমসুং রেলগী মথক্তা, নোংথক্তা শম্নহনবগী থবক অসিনসু উত্তরাখন্দদা কান্নবা কয়া পীগনি। দেহরাদুন এয়র্পোর্তকী কেপাসিতীসু শুপ্নগী পেসেঞ্জর ২৫০দগী ১২০০দা হেনগৎহল্লে। মুখ্য মন্ত্রী, শ্রীমান ধামাজীনা থৱাই য়াওনা য়েংশিনবীবদগী উত্তরাখন্দদা হেলিপোর্ত ইনফ্রাস্ত্রকচরসু খুমাং চাউশিনহল্লে।

মরুপশিং,

ঈশিং য়ৌহনবগী থবক্কী মতাংদা ঙসি উত্তরাখন্দনা মশক থোকপা থবক কয়া পাংথোক্লি। মসিনা মফমসিগী নুপীশিংদা কান্নবা ফংহনবা হৌরে, মখোয়গী পুন্সি মহিংবু হেন্না নুংঙাইহল্লে। ইং ২০১৯দা জল জীবন মিসন হৌদৈক্ত্রিঙৈগী মমাংদা উত্তরাখন্দগী শুপ্নগী য়ুম লাখ ১গা লিশিং ৩০না তোতি ঈশিং ফংলম্মি। ঙসিদি, উত্তরাখন্দগী য়ুম লাখ ৭কা লিশিং ১০দগী হেনবদা তোতি ঈশিং ফংলে। হায়বদি, শুপ্নগী চহি ২দা রাজ্যগী মনুং হঞ্জিনবা মফমশিংগী চাউরাকপা য়ুম লাখ ৬তা ঈশিংগী কন্নেক্সন ফংখি। উজ্বালা য়োজনাগী মখাদগী ফংবা গ্যাস কন্নেক্সন্না নুপীশিংদা য়াম্না নুংঙাইহল্লে, স্বচ্ছ ভারত মিসনগী মখাদা অমাংশঙ শাবদগী নুপীশিংদা নুংঙাইবা, মশাগী ইকায় খুম্নবা হেনগৎহল্লে, মতৌ অসুম্না জল জীবন মিসন্দগী ফংলিবা তোতি ঈশিংগী কন্নেক্সন্না নুপী কয়াবু খুদোংচাদবা কয়াদগী কনবীরি।

মরুপশিং,

উত্তরাখন্দনা লৈবাক্কী ঙাক-শেনবদসু অচৌবা থৌদাং কয়া য়ারি। মফমসিগী নহা, থৌনা ফবী নুপীমচাশিংনা ভারতকী আর্ম্দ ফোর্সতা থৱাই তানা শরুক য়ারি। ঐখোয়গী সরকারনা লান্মী, মমাংদা লান্মী ওইরম্বা মীওই খুদিংগী য়াইফনবগীদমক্তা পুকচেল শেংনা থবক কয়া পায়খৎলি। ৱান রেঙ্ক, ৱান পেন্সন হৌদোক্তুনা লান্মী ইচিল-ইনাও খুদিংগী চহি ৪০গী অপাম্বা ফংহনখিবসি ঐখোয়গী সরকারনি। অদুগা ঐখোয়গী ধামিজী মশামকসু লান্মীগী মচানি। মহাক্নসু ৱান রেঙ্ক, ৱান পেন্সন্না লান্মীশিংদা য়াম্না তেংবাংলে হায়নসু হায়খ্রবনি।

মরুপশিং,

দিল্লীদা নেস্নেল ৱার মেমোরিএল শাদুনা লৈবাক্কী অথৌবশিংদা কত্থোকখিবসু ঐখোয়গী সরকারনি। বেত্তল কেজুএলিতী ৱেলফিয়র ফন্দগী কান্নববু আর্মীগা লোয়ননা নেভী অমসুং এয়র্ফোর্সকী অথৌবশিংদা কান্নবা ফংহল্লিবা অসিসু ঐখোয়গী সরকারনি। জে.সি.ও. অমসুং অতোপ্পা রেঙ্ককী ওফিসরশিংগী প্রোমোসনগী মতাংদা দিকেদ কয়াদগী য়েৎনবা লাক্লিববু লোইশিনখিবা অসিসু ঐখোয়গী সরকারনি। এক্স-সর্ভিসমেনগী পেন্সনগা মরী লৈনবা শিংনবা লাক্তনবগীদমক্তা, ঐখোয়না দিজিতেল তেক্নোলোজী শিজিন্নবগী চাংসু হেনগৎহল্লে।

মরুপশিং,

হৌজিক ঐখোয়গী আর্ম্দ ফোর্সকী অথৌবশিংগী মনাক্তা মতমগা চান্নবা খুৎলায় লৈরে, লৈবাক ঙাক-শেন্নবা মতমগা চান্নবা পথাপ কয়া লৈরে, হৌজিক্তি য়েক্নবগা য়াম্না লায়না মাইয়োক্নবা ঙম্লে। অইং-অশাগী ফিভম ফত্তনা অদুম লৈবা মফমশিংদা, মতমগা চান্নবা খুৎলায় অমসুং পথাপশিংনা য়াম্না তেংবাংলি। ঐখোয়গী সরকারনা দিফেন্স সেক্তরদা মরোমদোম লেপচবা ঙম্নবগী খোঙথাং কয়া পায়খৎলি, মসিনা ঐখোয়গী আর্ম্দ ফোর্স্তা য়াম্না কান্নবা তেংবাং কয়া পীরগনি। অদুগা সরকারনা হোৎনরিবা কয়া অসিগী কান্নবশিংসি উত্তরাখন্দ অমসুং মসিগী প্রজাশিংনসু ফংগনি।

ইচিল ইনাওশিং,

ঐখোয়না লাইরৈবাক অসিদা মমাংগী মতমশিংদা নীংথিনা মিৎয়েং চঙদবগী চৎনবীশিংবু লৈহন্দনবা কন্না হোৎনরি। অফবা ইনফ্রাস্ত্রকচর লৈরবা তুংদা, ইতাক-তাকপা খুঙ্গংশিংদা অমুক হন্না মীনা পুমথন থল্লগনি। কোরোনাগী মতমদা, ঐহাক্না মফমসিগী নহা, লৌমী কয়াগা য়াম্না তোইনা ৱারী শাখি। মখোয়গী ময়ুম মনাক্তা লম্বী য়ৌরক্লে, মখোয়না হোমস্তে হাংদোক্লে হায়না তম্লকপদা ঐহাক্না য়াম্না নুংঙাইবা ফাওজখি। অনৌবা ইনফ্রআস্ত্রকচরদগী লৌউবা, লমকোইবা, লাইনীংবা অমসুং ইন্দস্ত্রীদা নহাশিংগী খুদোংচাবা কয়া লৈবা হেনগৎলক্লে।

মরুপশিং,

উত্তরাখন্দগী নহাশিং অসিদি থৱাই য়াওবা অমসুং থবক থুবা মীওইগী তীম্নি। লাক্কদৌরিবা চহি খরগী মনুংদা উত্তরাখন্দনা রাজ্য অসি শেমখিবগী ২৫শুবা চহিদা খোঙদারগনি। মতম খরা অসিদা উত্তরাখন্দনা মশাগী চহি ২৫ শুরগনি। মতমদুদা, উত্তরাখন্দনা য়ৌগদবা থাক অদু করি ওইগদগে হায়বা লেপ্পগী হৌজিক অসি চপ চারবা মতম্নি। কেন্দ্রদা হৌজিক লৈরিবা সরকার অসিনা উত্তরাখন্দগী মতেং খুদিংমক পাংলি। কেন্দ্র অমসুং রাজ্য সরকারনা খুৎশম্ননা তেংবাংমিন্নবনা মফমসিগী মীয়ামগী মঙলান কয়া মঙফাওনহনবগী য়ুম্বী শেমগনি। চাউখৎপগী দবল ইঞ্জিন অসিনা উত্তরাখন্দদা মপাঙ্গল কয়া হাপকনি। বাবা কেদারগী থৌজালদগী, ঐখোয়গী ৱারেপ খুদিংমক মাই-পাক্না পাংথোকপা ঙম্বা ওইসনু হায়বগী থাজবগা লোয়ননা, ঐহাক্না মীয়াম খুদিংবু অমুক্কা হন্না থাগৎচরি।

থাগৎচরি!!!

*****