২০২১গী সেপ্তেম্বর ২৩দা প্রধান মন্ত্রী শ্রী নরেন্দ্র মোদীনা ৱাশিংতন দি.সি.দা ক্বাদ লিদরস সমিতকী সাইদলাইন্দা জাপানগী প্রধান মন্ত্রী ঐচ.ই. মিস্তর সুগা য়োশিহিদেগা উনখ্রে।

প্রধান মন্ত্রী অনিনা মখোয়গী অহানবা মশা-মশা থেংনবা অসিদা নুঙাইবা ফোংদোক্নখ্রে। ২০২০ সেপ্তেম্বরদগী মিস্তর সুগানা জাপানগী প্রধান মন্ত্রী অমা ওইনা ওফিস হেক পায়রকপদগী তেলেফোন্দা অহুমলক ৱারী শানখিবা নুঙাইনা নিংশিংনখি। প্রধান মন্ত্রী মোদীনা প্রধান মন্ত্রী সুগাবু মহাক্কী মশাগী ওইবা ৱা ঙাকপা অমসুং লুচিংবা অমা ওইনা, প্রধান মন্ত্রী ওইনা অমসুং মমাংদা চীফ কেবিনেত সেক্রেতরী ওইরিঙৈ অনিমক্তা, হৌখিবা চহি খরা অসিদা ভারত-জাপান স্পেসিএল স্ত্রাতেজিক অমসুং গ্লোবেল পার্নরশিপ্তা য়াম্না চাউনা খুমাং চাউশিবনবা ঙম্বগীদমক থাগৎপা ফোংদোকখি। মালেমগী ওইবা লায়চৎ মনুংদা তোকিও ওলিম্পিক্স অমসুং পেরালিম্পিক গেম্স মায় পাক্না শিনখিবগীদমক প্রধান মন্ত্রী সুগাবু মহাক্না থাগৎপা ফোংদোকখি।

প্রধান মন্ত্রী অনিনা লৈবাক অনিগী মরক্তা লৈনরিবা মখল কয়াগী মরীশিং য়েংশিনখি অমসুং অফগানিস্তান য়াওনা হন্দক্তা লৌখৎখিবা মালেমগী অমসুং রিজনেলগী ওইবা চাউখৎ থৌরাংশিদা মিৎয়েং থম্নখি। মখোয়না ইন্দো-পেসিফিক্কী মফমদা অয়েৎপা লৈতবা, ফাজিন্দবা অমসুং ইনক্লুসিব ওইবা ৱাফমশিং ঙাক্নবা অমুক হন্না হায়নখি। মখোয়না দিফেন্স ইক্যুইপমেন্ত অমসুং তেক্নোলোজীশিংগী মফমশিং য়াওনা নাকন অনিগী ওইবা সেক্যুরিতী অমসুং দিফেন্স কোওপরেসন হেনগৎহনবা হায়না য়ানখি।     

প্রধান মন্ত্রী অনিনা লৈবাক অনিগী মরক্তা ইকোনোমীগী ওইবা এঙ্গেজমেন্ত হেনগৎলকপা অসিদা তরাম্না ওকখি। চহি অসিগী অঙনবদা অচেৎপা, মখল কয়া অমা ওইবা য়াবা অমসুং থাজবা য়াবা সপ্লাই চেন ওইবা ঙম্বা কোলাবোরেতিব মেকানিজম অমা ওইনা ভারত, জাপান অমসুং ওস্ত্রালিয়াগী মরক্তা সপ্লাই চেন রিজিলেন্স ইনিসিএতিব (এস.সি.আর.আই.) হৌদোকখিববু মখোয়না তরাম্না ওকখি। প্রধান মন্ত্রী মোদীনা মেনুফেকচরিং, এম.এস.এম.ই. অমসুং স্কীল দিবলপমেন্তদা নাকন অনিগী ওইবা পার্তনরশিপ অমা শেমগৎপা মথৌ তাই হায়না উৎখি। প্রধান মন্ত্রী সুগানা প্রধান মন্ত্রী মোদীদা পাউদমখি মদুদি চহি অসিগী অঙনবদা সহি তৌনখিবা স্পেসিফাইদ স্কীল ৱার্করস (এস.এস.দবল্যু.) এগ্রীমেন্ত অসিবু থবক ওইনা পাংথোক্নবা, জাপানগী মাইকৈরোমদগী ২০২২গী অঙনবদগী হৌদুনা ভারত্তা স্কীল অমসুং লেঙ্গোইজ তেস্তকী থৌদাং লৌরগনি।      

প্রধান মন্ত্রী অনিনা কোবিদ-১৯গী লায়চৎ অমসুং মসিবু মুথৎনবা হোৎনরিবা অসিদা ৱা খন্নখি। মখোয়না দিজিতেল তোক্নোলোজীগী মরুওইবা হেনগৎলক্লিবা অসি পুথোকখি অমসুং হিরম অসিদা ইন্দিয়া-জাপান দিজিতেল পার্তনর্শিপ, মরুওইনা স্তার্ত-অপ্তা চংশিল্লিবা থবকশিং ফজনা উৎখি। মখোয়না হেনগৎলক্লিবা তেক্নোলোজী কয়াদা মখা তানা মতেং পীননবা মিৎয়েং থম্নখি। অইং-অশা ওল্লকপগী থেংনরিবা অৱাবশিং অমসুং গ্রীন ইনর্জী ত্রান্সিসন, অমসুং ভারতকী নেস্নেল হায়দ্রোজেন ইনর্জী মিসনগা লোয়ননা জাপানগা থবক তৌমিন্নবদা ওইরকপা য়াবা অসিদা ৱা খন্নখি।   

প্রধান মন্ত্রী অনিনা মুম্বাই-অহমেদবাদ হায় স্পীদ রেল (এম.এ.ঐচ.এস.আর.) প্রোজেক্তপু অয়েৎপা লৈতনা অমসুং মতম চানা হাপ্পদা লায়থোক্নবা হেন্না হোৎননবগী ৱাফমশিং অমুক হন্না ৱা চেৎশিন্নখি।

লুচিংবা অনিনা ইন্দিয়া-জাপান এক্ত ইস্ত ফোরুমগী মখাদা ভারতকী অৱাং নোংপোক্কী মফমশিংদা পায়খৎলিবা নাকন অনিগী ওইবা চাউখৎ থৌরাংগী প্রোজেক্তশিংগী চংশিল্লিবা থবকশিং তরাম্না ওকখি অমসুং অসিগুম্বা মতেং পীনবা অসি মখা তানা হেনগৎহনবগী ওইথোকপা লৈ হায়না পনখি।

প্রধান মন্ত্রী সুগানা থাজবা লৈ হায়না ফোংদোকখি মদুদি হৌখিবা চহি খরা অসিদা ইন্দিয়া-জাপান অনিনা লৈনরিবা অকনবা মরী অসিনা জাপানগী অনৌবা এদমিনিস্ত্রেসনগী মখাদা ফাওবা চৎথগনি হায়রি। প্রধান মন্ত্রী মোদীনা লাক্কদৌরিবা ইন্দিয়া-জাপান এন্নুএল সমিত্তা জাপানগী মথং ওইরক্কদবা প্রধান মন্ত্রীবু তরাম্না ওক্নবা ঙাইদুনা লৈরি হায়না ফোংদোকখি।  

***