১. ঐচ.ই. শ্রী নরেন্দ্র মোদী, ভারত রিপব্লিক্কী প্রধান মন্ত্রী অমসুং ঐচ.ই. শৈখ হসীনা, বঙ্গলাদেশকী প্রধান মন্ত্রীনা দিসেম্বর ১৭, ২০২০দা ভর্চুএল ফোর্মেত্তা সমিৎ অমা পাংথোকখি। নাকল অনিমক্না লৈবাক অনিগী ওইবা মরীগী হিরম খুদিংমক্তা পাক-চাউনা খন্ন-নৈনখি, অমসুং তোঙান তোঙানবা লমদমসিগী ওইবা অমসুং মলেমগী ওইবা হিরমশিংদা ৱাখল্লোনশিং পীথোক-পীশিন তৌনখি।

ভারত-বঙ্গলাদেশ পার্তনরশিপ

২. প্রধান মন্ত্রী অনিনা লৈবাক অনিগী শরুক য়ামিন্নরিবা মরীশিং অদুবু ফোংদোক্লিবা পুৱারী, চৎনবী-নাৎ, লোন অমসুং অতৈ তোপ-তোপ্পা মান্নবশিংগী পার্তনরশিপ্তা য়ুম্ফম ওইবা নাকল অনিগী ওইবা মরীশিংগী হোজিক্কী ফিভম অসিদা অপেনবা ফোংদোক্নখি। মখোয়না ৱাফম অসিদসু শাফু পীখি মদুদি বঙ্গলাদেশ অমসুং ভারতকী মরী অসি মচিন-মনাওগী মরীদা য়ুম্ফম ওই লোইননা মনীং তম্বা, মান্নবা, থাজনবা অমসুং ৱাখল তামিন্নবদা য়ুম্ফম ওইবা পাক-চাউনা শরুক য়ামিন্নবগী শক্তম অমনি, মসি মখা চৎথখিদুনা স্তেতেজিক পার্তনরশিপ ফাওবা য়ৌশিল্লি। মখোয়না ১৯৭১দা বঙ্গলাদেশ মুক্তি সংগ্রামগী অথৌবশিং, মুক্তিজোধাশিং অমসুং ভারতকী লান্মীশিংদা, মখোয়গী অথোইবা থৌদাং অদুগীদমক শ্রদ্ধাঞ্জলি কৎখি। মখোয়না মরূপ ওইরিবা লৈবাক অনিগী মীয়ামগী অনীংবা-অপাম্বশিংগী মতুং ইন্না দেমোক্রেসী অমসুং ইক্বেলিতীগী মগুনশিং অদুবু কাইহন্দনা থম্নবা অমসুং ঙাক-শেন্নবগী ৱাশক লৌখি।  

৩. লুচিংবা অনিমক্না ওক্তোবর ২০১৯দা প্রধান মন্ত্রী শৈখ হসীনাগী দিল্লীগী ওফিসিএল খোংচৎ মনুংদা লৌখিবা তোঙান তোঙানবা ৱারেপশিং খুমাং চাউশিল্লিবা অদুদা অপেনবা ফোংদোক্নখি। নাকল অনিমক্না সেপ্তেম্বর ২০২০দা পাংথোকখিবা জোইন্ত কন্সলতেতিব কমিশনগী মায় পাক্না পাংথোকখিবা অদুসু নীংশিংনখি।

হেল্থ সেক্তরদা তেংবাং পীনবা – গ্লোবেল হেল্থ চেলেঞ্জগী শিংনবশিং মায়োক্নবা

৪. নাকল অনিমক্না মাগী-মাগী লৈবাক্তা ওইরিবা কোবিদ-১৯গী লাইচৎ ফিভমগী মতাংদা ৱাখল্লোনশিং পীথোক-পীশিন তৌনখি অমসুং চৎথরিবা থৌদোক মনুং অসিদা লৈবাক অনিগী মরক্তা লেপ্তনা শরুক য়ামিন্নদুনা লৈরিবা মওং অসিদা অপেনবা ফোংদোক্নখি। ভারতকী য়ুমলোন্নবনা হান্না (নাইবরহুদ ফার্স্ত)গী মখাদা ভারতনা বঙ্গলাদেশপু খ্বাইদগী মরুওইবা ওইনা লৌরিবা অদু অমুক হন্না পল্লদুনা, প্রধান মন্ত্রী নরেন্দ্র মোদীনা থাজবা পীখি মদুদি ভারত্তা ভেক্সিন পুথোকপা হৌবগা মদু বঙ্গলাদেশতা ফংহনগনি। লুচিংবা অনিনা মসিগী মতাংদা প্রাইবেৎ সেক্তরগী মরক্তা চৎথরিবা নাকল অনিগী ওইবা তেংবাং পীনবা অসিদসু পুক্নীং চংখি।  

৫. ভারতনা থেরাপিতিক্সতা তেংবাং পীনবা অমসুং ভেক্সিন পুথোকপদা পার্তনরশিপ ওইনবগীদমক্তসু ওফর তৌখি। বঙ্গলাদেশনা ভারতনা হকশেলগী লমদা থবক তৌরিবা প্রোফেস্নেলশিংগীদমক কেপাসিতী বিল্দিংগী কোর্সশিং বঙ্গলা লোন্দা পাংথোকপগীদমক থাগৎপা ফোংদোকখি।

কলচরেল কোওপরেসন – পুৱারী ওইরবা মরীগী অপুনবা সেলেব্রেসন

৬. প্রধান মন্ত্রী শৈখ হসীনানা ‘মুজীব বোর্শা’গী তাঞ্জাদা তোঙান তোঙানবা থৌরমশিং পাংথোকপদা থৱাই য়াওবীবগীদমক ভারতপু থাগৎখি। প্রধান মন্ত্রী অনিনা বঙ্গবন্ধু শৈখ মুজিবুর রহমানগী চহি চাম্মাশুবা মপোক কুমওন্দা ভারত সরকারনা পুথোকপা নীংশিং পোস্তেল স্তাম্প অমা পুন্না মায়খুম হাংদোকমিন্নখি। প্রধান মন্ত্রী নরেন্দ্র মোদীনা সেপ্তেম্বর ২০২০দা গান্দীজীগী ১৫০শুবা মপোক কুমওনগী থৌরমদা মহাত্মা গীন্ধীবু ইকাই খুম্নবা উৎতুনা পোস্তেল স্তাম্প অমা পুথোকখিবগীদমক বঙ্গলাদেশ সরকারবু থাগৎপা ফোংদোকখি।

৭. থৌরম অদুদা ২০শুবা চহি চাগী অফাওবা লুচিংবা অনি, মহাত্মা গান্ধী অমসুং বঙ্গবন্ধুগী নীংশিংবা ওইনা দিজিতেল এগজিবিসনগী মতাংদা ইন্ত্রদক্তরী ভিদিও অমা উৎখি। লুচিংবা অনিনা থাজবা ফোংদোক্নখি মদুদি এগজিবিসন অসি, বঙ্গলাদেশ অমসুং ভারতকী তোঙান তোঙানবা শহরশিং অমসুং মালেম অপুনবগী অখন্নবা শহরশিংগা লোইননা য়ুনাইতেদ নেসন্সতা উৎকদবনি, মরুওইনা নহাশিংদা অচুম্বা ৱায়েল, মান্নবা অমসুং অহিংসাগী মগুন অদুগী ইথিল পীনগনি।

৮. লৈবাক অনিনা ৱাফম অসি ফোংদোক্নখি মদুদি ভারতকী ফিল্ম দাইরেক্তর শ্যাম বেনেগলগী দাইরেক্সন্দা বঙ্গবন্ধু শৈখ মুজীবর রহমানদা নম্বা দোক্যুমেন্তরী জনুৱারী ২০২১দা হৌদোক্কনি।

৯. ভারত অমসুং বঙ্গলাদেশকী মরক্তা নাকল অনিগী ওইবা মরীগী মরমদগী ২০২১গী চহি অসি পুৱারী ওইরগনি মরমদি লৈবাক অনিনা মুক্তি য়ুদ্ধ অমসুং ভারত অমসুং বঙ্গলাদেশকী মরক্তা দিপ্লোমেতিক্কী মরীশিং শেমগৎখিবগী চহি য়াঙ্খৈশুবা থৌরম পাংথোক্কদৌরিবা অসিগী য়েংলগা, মরুওইরবা থৌদোক অনি অসি নীংশিংদুনা ভারত, বঙ্গলাদেশ অমসুং অহুমশুবা লৈবাক্তা অপুনবা ওইনা তোঙান তোঙানবা থৌরমশিং পাংথোকপদা অয়াবা ফোংদোক্নখি।

১০. বঙ্গলাদেশকী প্রধান মন্ত্রীনা ভারতকী নাকলদা বঙ্গলাদেশকী মুক্তি য়ুদ্ধগী মতমদা মুজিবুর নগরদগী বঙ্গলাদেশ-ভারত ঙমখৈদা লৈবা তুরেল ফাওবা চৎলিবা শরক্কী পুৱারী ওইরবা মগুন অদু নীংশিংলদুনা পুৱারী ওইরবা শরক অসিগী মমিং “শধিনোতা শোরোক” থোন্নবগীদমক বঙ্গলাদেশনা পুখৎলকখিবা ৱাফম অদুবু খন্ননবগীদমক হায়জখি।

১১. লৈবাক অনিনা কলচর, মহৈ-মশিং, সাইন্স অমসুং তেক্নোলোজী, নহারোল অমসুং শান্ন-খোৎনবা লোইননা মাস মীদিয়া য়োকখৎনবগীদমক কাংলুপশিংগী চাং নাইনা পীথোক-পীশিন তৌনবা মখা চৎথনবগী ৱাফম অদু অমুক হন্না হৌদোক্নখি।

বোর্দর মেনেজমেন্ত অমসুং সেক্যুরিতী কোওপরেসন

১২. নাকল অনিমক্না বাউন্দরীশিংগী অরোইবা মশক লেপথোক্নবগী পান্দমদা ইচ্ছামতী, কালিন্দী, রায়মঙ্গোল অমসুং হরিয়াভঙ্গা তুরেলশিংদা য়ুংলিবা মরুওইবা পিল্লর ১দগী লেন্দ বাউন্দরী তর্মিনস ফাওবগী ত্রিপ মেপকী অনৌবা সেত অমা শেম্নবগীদমক্তা জোইন্ত বাউন্দরী কনফরেন্সকী মীফম অমা অথুবা মতমদা শিন্ননবা অয়াবা ফোংদোক্নখি। কুহসিয়ারা তুরেলদগী হৌবা ইন্তর্নেস্নেল বাউন্দরীবু অকক্নবা ঙমখৈ অমদা হোংদোক্নবগীদমক মথৌ তাবা থবক পাইখৎপদা য়ানবা ফোংদোক্নখি।

১৩. বঙ্গলাদেশকী নাকলনা রাজশাহী দিস্ত্রিক্তকী মনাক্তা পদমা তুরেলদা লৈরিবা তুরেলগী লম্বীদা কিলোমীতর ১.৩গী ইনোসেন্ত পেসেজকী হায়জবা অদু অমুক হন্না পন্নখি। ভারতকী নাকলনা হায়জরকপা অসিদা খন্নগনি হায়না থাজবা পীখি।

১৪. লুচিংবা অনিমক্না ত্রিপুরা (ভারত) – বঙ্গলাদেশ সেক্তরদগী অথুবা মতমদা হৌদুনা লৈবাক অনিগী মরক্তা ইন্তর্নেস্নেল বোর্দরদা লেমহৌরিবা শরুক পুম্নমক্তা শম্বল খাবগী পন্দুনা লৈরক্লবা থবক অসি অরাইবা মওংদা মপুং ফাহনবদা অয়াবা পীনখি। লুচিংবা অনিনা ৱাফম অসিদসু য়ানখি মদুদি ঙমখৈদা মীচম-মীয়ামগী পুন্সি মাংবা অসি অৱাবগী মশক অমনি অমসুং মখোয়না ঙমখৈ ঙাক্লিবা মরী লৈনবা সেক্যুরিতী ফোর্সশিংদা খঙহনখি মদুদি ঙমখৈদা থোকপা অসিগুম্বা থৌদোকশিং জিরোদা পুরক্নবগী মায়কৈদা থবক তৌনবগীদমক তেংবাং পীনবগী পাম্বৈশিং হেনগৎহনগদবনি।

১৫. বঙ্গলাদেশ অমসুং ভারতকী তোইনা থোক্লিবা মহৌশাগী অমাং-অতা অসিবু য়েংলদুনা, লুচিংবা অনিনা নাকল অনিগী ওফিসিএলশিংদা দিজাস্তর মেনেজমেন্ত কোওপরেসনগী লমদা এম.ও.য়ু. অদু অথুবা মতমদা মপুং ফাহন্নবা খঙহনখি।

১৬. তেরোরিজমবু মালেমগী শান্তি অমসুং ঙাক-শেলগী খুদোংথিবা অমা ওইনা লৌরদুনা, নাকল অনিনা তেরোরিজমগী মশক খুদিংমক অমসুং মেনিফেস্তেসনশিং অদু লোইশিন্নবগী মায়কৈদা মখোয়গী অচেৎপা ফিরেপ অদু অমুক হন্না ফোংদোক্নখি।

১৭. নাকল অনিমক্না লৈবাক অনিগী মীয়ামগী চৎথোক-চৎশিন লাইথোকহনবদা শাফু পীখি। বঙ্গলাদেশকী নাকলদগী অখৌরা (ত্রিপুরা) অমসুং ঘোঝদাঙ্গা (নোংচুপ বঙ্গাল)দা লৈবা চেকপোইন্তশিংদগী হৌরগা ভেলিদ দোক্যুমেন্তশিংগা লোইননা চৎথোক-চৎশিন তৌরিবা বঙ্গলাদেশ মচাশিংগীদমক্তা ভারত্তা লেন্দ পোর্তশিংদগী এন্ত্রী/এগজিৎ তৌবদা লেমহৌরিবা অথিংবশিং অদু ফেজ নাইনা লৌথোক্নবা ভারতকী ফিরেপ অদুবু অথুবা মতমদা হৌননবা হায়জখি।

চাউখৎ-থৌরাংগী ত্রেদ পার্তনরশিপ

১৮. প্রধান মন্ত্রী শৈখ হসীনানা সাফতাগী মখাদা ভারত্তা তৌবা বঙ্গলাদেশকী এক্সপোর্ত্তা ২০১১দগী দ্যুতী ফ্রী অমসুং কোতা ফ্রী ফংহনবগীদমক থাগৎপা ফোংদোকখি। প্রধান মন্ত্রী অনিমক্না পোর্ত রেস্ত্রিক্সন, থবক-থৌরমগী অপনবশিং অমসুং ক্বরেন্তাইগা মরী লৈনবা অথিংবশিং য়াওনা নন-তারিফকী অথিংবশিং অমসুং ত্রেদ ফেসিলিতেসনশিংগী ৱাফমশিং লোইশিনবদা শাফু পীখি।

১৯. লুচিংবা অনিনা সাইদ-দোর কন্তেনর অমসুং পার্সেল ত্রেনশিং শিজিন্নদুনা লৈরিবা রেল লম্বীশিংগী থোংদা নকল অনিগী ললোন-ইতিক ওইথোকহনবা য়াওনা কোবিদ-১৯গী মনুংদা অপনবা লৈতবা সপ্লাই চেনশিং কাইহন্দনা থম্বদা তেংবাং পীনবগীদমক ত্রেদ অমসুং রেলৱে ওফিসিএলশিংবু থাগৎখি।

২০. নাকল অনিগী ইকোনোমিক অমসুং কমর্সিএলগী মরীগী হায়নীংঙাই লৈতনা ওইথোকপা য়াবশিং অদুবু য়াজরদুনা, প্রধান মন্ত্রী অনিনা ওফিসিএলশিংদা নাকল অনিগী ওইবা কমপ্রিহেন্সিব ইকোনোমিক পর্তনরশিপ এগ্রীমেন্ত (সি.ই.পি.এ.)দা চংনবগী ওইথোকপশিংগী মতাংদা চৎথরিবা অপুনবা স্তদী অসি অথুবা মতমদা লোইশিন্নবা খঙহনখি।

২১. চহি অসিগী হৌরকপদা, ভারত-বঙ্গলাদেশকী তেক্সতাইল ইন্দস্ত্রী ফোরমগী অহানবা মীফম অদুবু তরাম্না ওক্লদুনা, লুচিংবা অনিনা তেক্সতাইল ইন্দস্ত্রীগী লমদা লিঙ্কেজ অমসুং কোলাবোরেসনগী মগুন্দা শাফু পীখি অমসুং ওফিসিএলশিংদা তেক্সতাইল মন্ত্রালয়, ভারত সরকার অমসুং তেক্সতাইল অমসুং জুৎ মন্ত্রালয়, বঙ্গলাদেশ সরকারগী মরক্তা এম.ও.য়ু.দা পাংথোক্লিবা ৱারী-ৱাতাই অদু অথুবা মতমদা লোইশিন্নবা পাউতাক পীখি। মখোয়না হন্দক্তা পাংথোকখিবা বঙ্গলাদেশতগীভারত্তা জুৎকী পোৎথোকশিং পুশিল্লকপদা লৌবা দম্পিং/এন্তি-সর্কমভেন্সন দ্যুতীশিংগী মতাংদা খন্নখিবা অদুবু তরাম্না ওকখি অমসুং এ.দি.দি.গা মরী লৈনবা ৱাফমশিংগী পাম্বৈ অথুবা মতমদা পুথোক্কনি হায়না আশা তৌনখি।
 

চাউখৎপগীদমক কনেক্তিবিতী

২২. প্রধান মন্ত্রী অনিনা লৈবাক অনিগী মরক্তা ১৯৬৫গী মমাংদগী লৈরক্লবা রেলৱে লিঙ্কেজশিং অমুক হন্না হৌদোক্নবগী মায়কৈদা লেপ্তনা চংশিল্লিবা খোংজেল অদুদা অপেনবা ফোংদোক্নখি। মখোয়না পুন্না হল্দীবারী (ভারত) অমসুং চিল্হাতী (বঙ্গলাদেশ)গী মরক্তা নৌনা হৌদোকখিবা রেলৱে লিঙ্ক শঙ্গামিন্নখি অমসুং হায়খি মদুদি রেলৱে লিঙ্ক অসিনা লৈবাক অনিগী ললোন-ইতিক অমসুং মীয়ামগী মরক্তা লৈনবা মরী অদু হেন্না চেৎশিলহল্লগনি।

২৩. লুচিংবা অনিনা চৎথরিবা নাকল অনিগী ওইবা কনেক্তিবিতীগী পাম্বৈশিংগী মতাংদা য়েংশিনখি অমসুং হন্দক্তা প্রোতোকোল ওন ইনলেন্দ ৱাতর দ্রাঞ্জিৎ এন্দ ত্রেদ (পি.আই.দবল্যু.তি.তি.)কী অনিশুবা এদ্দেন্দমদা খুৎয়েক পীনবা, চত্তোগ্রামগী লম্বীদা কোলকতাদগী অগরতলা ফাওবা ভারতকী পোৎলমশিংগী ত্রান্স-শিপমেন্ত তৌবা মপুং ফানা য়েংশিনবা, অমসুং পি.আই.দবল্যু.তি.তি.গী মখাদা সোনমুরা-দাউদকন্দী প্রোতোকোল মার্গকী থবক হৌবা য়াওনা হন্দক্তা পাংথোকখিবা তোঙান তোঙানবা খোংথাংশিং অদুবু তরাম্না ওকখি।

২৪. লৈবাক অনিগী মরক্তা হেন্না ফবা কনেক্তিবিতী অমসুং পেসেঞ্জর অমসুং পোৎলমশিং পুথোক-পুশিন তৌবদা লাইথোকহন্নবা, লুচিংবা অনিনা পোৎ পুবা অমসুং পেসেঞ্জরশিংগী চৎথোক-চৎশিন হৌনবা বঙ্গলাদেশ, ভারত অমসুং নেপালগীদমক্তা এম.ও.য়ু.দা খুদক্তা খুৎয়েং পীনদুনা বি.বি.আই.এন. মোতোর ভেহিকল এগ্রীমেন্ত অথুবা মতমদা হৌহন্নবা য়ানখি, মসিদা ভুতানগীদমক্তা কোন্না তাং য়াওহন্নবগী থৌরাং লৈ।

২৬. বঙ্গলাদেশকী প্রধান মন্ত্রীনা ভারত ম্যানমার থাইলেন্দ ত্রাইলেতরেল হাইৱে প্রোজেক্ততা হেন্না হৈনীংবা উৎখি অমসুং খা অমসুং খা-নোংপোক এসিয়াগী লমদমশিংগী মরক্তা কনেক্তিবিতী হেনগৎহন্নবগীদমক্তা প্রোজেক্ত অসিগা পুনশিনবদা বঙ্গলাদেশনা মতিক চাবা ওইনবা ভারত্তগী মতেং নীখি। ৱাখল অসিগা লোইননা, ভারতকী নাকলনা বঙ্গলাদেশকী লম্বীদা নোংচুপ বেঙ্গল (হিল্লী)দগী মেঘালয় (মহেন্দ্রগঞ্জ) ফাওবা ফাওননবা অয়াবা পীনবা হায়জখি।

২৬. ভারতনা বঙ্গলাদেশ সরকারগী মায়কৈদা অগরতলা-অখৌরাদগী হৌদুনা ভারত অমসুং বঙ্গলাদেশকী য়ুমলোন্নবা রাজ্য খুদিংমক্কী মরক্তা মিনিমম নেগতিব লিস্ত ওইরিবা য়ামদ্রবদা লেন্দ পোর্ত অমা লৈনবগী ৱাফম অদু অমুক হন্না পনখি। বঙ্গলাদেশকী নাকলনা ৱাফম অসি পুখৎলকখি মদুদি চত্তোগ্রাম পোর্ত্তগী ভারতকী অৱাং-নোংপোক্কী লমদমদা পোৎ-চৈ পুথোক-পুশিন তৌনবগীদমক্তা বঙ্গলাদেশকী ত্রক ফেনী ব্রিজ শাবা লোইবগা মসিগী কান্নবা লৌবা য়াগনি।

২৭. লৈবাক অনিগী মরক্তা চাউখৎ-থৌরাংগী ভাইব্রেন্ত দিবেলপমেন্ত পার্তনরশিপতা অয়াবা পীরদুনা, নাকল অনিনা এল.ও.সি. প্রোজেক্তশিং অথুবা মতমদা লোইশিন্নবগী পান্দমদা প্রোজেক্তশিংগী খোংজেল চাং নাইনা য়েংশিন্নবগীদমক বঙ্গলাদেশকী মায়কৈদগী সেক্রেতরী, ইকোনোমিক রিলেসন্স দিবিজন অমসুং ভারতকী মায়কৈদগী ধাকাদা ভারতকী হাই কমিস্নরগী লুচিং মখাদা হন্দক্তা পাংথোকখিবা অৱাংবা থাক্কী মোনিতরিং কমিতী মতিং লৈনা মথৌ পাংথোকহনবদা শাফু পীখি।

28. নাকল অনিনা কোবিদ-১৯গী লাইচৎ মনুংদা মায়কৈ অনিগী চৎথোক-চৎশিন তৌবশিংগী অদুক্কী মতিক মরুওইবা মথৌ তাবশিংবু মপুং ফাহন্নবগীদমক নাকল অনিগী মরক্তা মতম খরগী ওইবা এয়র ত্রাবেল ববল হৌদোকপদা অপেনবা ফোংদোক্নখি। বঙ্গলাদেশকী নাকলনা ভারতকী নাকলদা অথুবা মতমদা লেন্দ পোর্তশিংগী থোংদা চাং নাইনা চৎথোক-চৎশিন তৌবা অমুক হন্না হৌনবা হায়জখি।

ৱাতর রিসোর্সেস, পাৱর অমসুং ইনর্জীদা তেংবাং পীনবাঃ

২৯. প্রধান মন্ত্রী শৈখ হসীনানা তীস্তা তুরেলগী ঈশিং য়েন্ননবগীদমক ইন্তরীম এগ্রীমেন্ততা অথুবা মতমদা খুৎয়েক পীনবগী মথৌ তাবা অদু পন্নখি, মদু ওইনা ২০১১দা সরকার অনিনা য়ানখিবনি। প্রধান মন্ত্রী নরেন্দ্র মোদীনা মসিগী মতাংদা ভারতকী পুকচেল শেংবা ফিরেপ অমসুং ভারত সরকারগী লেপ্তনা হোৎনরিবশিং অদুবু অমুক হন্না পনখি।

৩০. লুচিংবা অনিনা মনু, মুহুরী, খোৱাই, গুমতী, ধারলা অমসুং দুধকুমার কৌবা রোইন্ত রিভর তরুক্কী ঈশিং য়েন্নবগী ইন্তরীম এগ্রীমেন্তকী মশক-মতৌ অথুবা মতমদা লোইশিনবগী মথৌ তাবা অদু পন্নখি।

বঙ্গলাদেশকী নাকলনা ভারতকী নাকলদা ইথৈ-লৌখোংগী পান্দমদা কুশিয়ারী তুরেলগী ইশিং শিজিন্নবা রহীমপুর খলগী লেমহৌরিবা শরুক তৌথোক্নবগী অয়াবা পীনবগীদমক মখোয়গী মরী লৈনবা ঙমখৈগী ওথোরিতীশিংদা খঙহনবীনবা হায়জখি। ভারতকী নাকলদগী কুশিয়ারা তুরেল য়েন্থোক্নবগা মরী লৈননা ত্রীতী/এগ্রীমেন্ততা খুৎয়েক পীনদ্রি ফাওবা নাকল অনিমক্না কুশিয়ারী তুরেলদগী ঈশিং লৌবা য়েংশিন্নবগীদমক লৈবাক অনিগী মরক্তা পুখৎলকপা এম.ও.য়ু.দা অথুবা মতমদা অয়াবা পীনবসু হায়জখি। লুচিংবা অনিনা জোইন্ত রিভর কমিশনগী পোজিতিব কনত্রিব্যুসন অদু নীংশিংনখি অমসুং জোইন্ত রিভর কমিশনগী সেক্রেতরীগী থাক্তা মথংগী মীফম থুনা পাংথোক্কনি হায়না থাজবা ফোংদোক্নখি।

৩২. নাকল অনিমক্না পাৱর অমসুং ইনর্জীগী মতাংদা, প্রাইবেৎ সেক্তর য়াওনা চাউনা তেংবাং পীনবদা অপেনবা ফোংদোক্নখি। ভারত-বঙ্গলাদেশকী ফ্রেন্দশিপ পাইপলাইন, মৈত্রীসুপর থর্মেল পাৱর প্রোজেক্তকা লোইননা অতৈ প্রজেক্তশিং য়াওনা তোঙান তোঙানবা প্রোজেক্তশিংগী থবক পায়খৎপদা খোংজেল য়াংখৎহনবা য়ানখি। নাকল অনিমক্না হাইদ্রোকার্বোনগী লমদা তেংবাং পীনবগা মরী লৈনবা ফ্রেমৱর্ক ওফ অন্দরস্তেন্দিংদা খুয়েক পীনববু তরাম্না ওকখি, মদুনা ইনভেস্তমেন্ত, তেক্নোলোজী পীথোক-পীশিন তৌনবা, পুন্না স্তদী তৌমিন্নবা, ত্রেনিং অমসুং হাইদ্রোকার্বোন কনেক্তিবিতীদা ইনোৎ পীবগী থোংদা ইনর্জী লিঙ্কেজ হেনগৎহনগনি। বাইওফুএলগী লম য়াওনা ইনর্জী ইফিসিএন্সী অমসুং ক্লীন ইনর্জীগী মতাংদা অমনা অমগী তেংবাং পীনবা হেনগৎহনবদসু য়ানবা পুরকখি। ইনর্জীগী গ্রীন, ক্লীন, রেন্যুএবল সোর্সেসকী মায়কৈদা চংশিন্নবগী লৈবাক অনিমক্কী ফিরেপ অদুগী মতুং ইন্না, নেপাল অমসুং ভুতান য়াওনা সবরিজনেল কোওপরেসনবু মপাঙ্গল কলহনবদা য়ানখি। নাকল অনিনা পাৱর অমসুং ইনর্জী কনেক্তিবিতীগী লমদা তেংবাং পীনবা হেনগৎহনবদসু য়ানখি।

ম্যানমারগী রাখীন রাজ্যদগী নম্ফুদা য়ুম হোংহনবীরবা মীয়াম

৩৩. প্রধান মন্ত্রী নরেন্দ্র মোদীনা ম্যানমারগী রাজ্য রাখীন্দগী হোংহল্লকখিবা মীওই মিলিয়ন ১.১গী চংজফম পীবা অমসুং মীওইবগী মতেং পাংবদা বঙ্গলাদেশকী থৌজাল অদুবু থাগৎপা ফোংদোকখি। প্রধান মন্ত্রী অনিনা অদুগুম্বা হোংহল্লকখিবা মীয়ামগী শোইদ-ঙামদনবা, য়াম্না থুনা অমদি তুং কোইবা মওংদা হলহনখিনবগী মরুওইবা অদু অমুক হন্না পনখি। প্রধান মন্ত্রী শৈখ হসীনানা ভারতপু য়ুনাইতেদ নেস্ন্স সেক্যুরিতী কাউন্সিলকী মেম্বর খল্লকপদা নুংঙাইবা ফোংদোকখি। মহাক্না নমদুনা হোংহল্লকখিবা রোহিংয়াগী মীওইশিংবু ম্যানমারদা হন্না থাবদা বঙ্গলাদেশনা ভারত্তগী থম্লিবা তেংবাংগী থাজবা অদু ফোংদোকখি।

লমদম অসোমদা অমসুং মালেমদা শরুক য়ামিন্নবা

৩৫. প্রধান মন্ত্রী নরেন্দ্র মোদীনা য়ুনাইতেদ নেসন্স সেক্যুরিতী কাউন্সিলগীদমক খল্লকপদা ভারতপু শৌগৎপীবগীদমক প্রধান মন্ত্রী শৈখ হসীনাবু থাগৎপা ফোংদোকখি। লৈবাক অনিমক্না য়ুনাইতেদ নেসন্স সেক্যুরিতী কাউন্সিলগী অহৌবগী রিফোর্মশিং, ক্লাইমেৎ চেঞ্জগা মায়োক্নবা, সস্তেনেবল দিবেলপমেন্ত গোল্স (এস.দি.জি.) মায় পাকপা অমসুং খুল্লাল্লকপশিংগী হকশিংগী ঙাক-শেলগীদমক্তা পুন্না মখা তানা থবক তৌমিন্ননবা অয়াবা ফোংদোক্নখি। প্রধান মন্ত্রী অনিনা এজেন্দা ২০৩০দা পল্লিবা ৱারোলশিংগী মতুং ইন্না এস.দি.জি.গী থবক হৌনবগী পাম্বৈশিং লেপথোক্নবগী গ্লোবেল পার্তনরশিপকী মখাদা চাউখৎলবা লৈবাকশিংনা মখোয়না লৌখিবা ফিরেপশিং মপুং ফাহনবগী তঙাইফদবশিং অদু য়ানখি।

৩৫. লুচিংবা অনিনা কোবিদ-১৯গী লাইৎ মতুংদা লমদম অসোমগী অমসুং মালেমগী শেন্মিৎলোনগী শক্তম অদুবু য়েংলদুনা, সার্ক অমসুং বিম্সতেক্কুম্বা রিজনেল ওর্গনাইজেসনগী মরুওইবা থৌদাং অদুবু পন্নখি। বঙ্গলাদেশকী প্রধান মন্ত্রীনা মার্চ ২০২০দা কোবিদ-১৯গী লাইচৎ মনুংদা সার্ক্কী লুচিংবশিংগী ভিদিও কনফরেন্স শিনবীবগীদমক্তা ভারতকী প্রধান মন্ত্রীবু থাগৎপা ফোংদোকখি। মহাক্না খা এসিয়াগী লমদমদা মালেমগী লাইচৎ অসিনা পীরিবা শাফু অসিবু মায়োক্ননবা সার্ক ইমর্জেন্সী রিস্পোন্স ফন্দ শেম্নবা পুখৎলকপা ৱাফম অদুগীদমক ভারতকী প্রধান মন্ত্রীবু থাগৎপা ফোংদোকখি। বঙ্গলাদেশকী প্রধান মন্ত্রীনা সার্ক মেদিকেল অমসুং পব্লিক হেল্থ রিসর্স ইন্সতিত্যুৎ লিংখৎনবা পুখৎলকপা ৱাফম অদুবু অমুক হন্না পনখি অমসুং মদুগীদমক তেংবাং পীবীনবা হায়খি। বঙ্গলাদেশনা ২০২১দা আই.ও.আর.এ.গী চিয়রমেনশিপ লৌগনি অমসুং মসিনা হেন্না চাউবা মেরিতাইম সেফতী অমসুং সেক্যুরিতীগী মায়কৈদা থবক তৌনবগীদমক ভারতকী মতেং নীখি। প্রধান মন্ত্রীনা ক্লাইমেৎ বল্নরেবল ফোরমগী প্রসিদেন্সীগী মতম অদুগীদমক্তা বঙ্গলাদেশপু থাগৎপা ফোংদোকখি।

৩৬. প্রধান মন্ত্রী শৈখ হসীনানা ন্যু দিবেলপমেন্ত বেঙ্ককী থবক অদুবু থাগৎখি অমসুং ইন্সতিত্যুসন অসিদা য়াওননবা বঙ্গলাদেশতা পাউজেল পীরকপগীদমক ভারতপু থাগৎপা ফোংদোকখি। মহাক্না ইনফ্রাস্ত্রকচর দিবেলপমেন্ত য়াওনা তোঙান তোঙানবা লমদা বেঙ্ককী থবক-থৌরম অদুগীদমক থাগৎপা ফোংদোকখি অমসুং খোংথাং অসিগী শরুক অমা ওইবদা বঙ্গলাদেশকী অপাম্বা ফোংদোকখি।

নাকল অনিগী ওইবা চেরোলদা খুৎয়েক পীনবা অমসুং প্রোজেক্তশিং হৌদোকপা

৩৭. থৌরম অদুদা, ভারত অমসুং বঙ্গলাদেশকী সরকারশিংগী ওফিসিএলশিংনা মখাদা পীরিবা নাকল অনিগী ওইবা চেরোলদা খুৎয়েক পীনখি অমসুং পীথোক-পীশিন তৌনখিঃ

▪ হাইদ্রোকার্বোন সেক্তরদা তেংবাং পীনবগা মরী লৈনবা ফ্রেমৱর্ক ওফ অন্দর্সতেন্দিং (এফ.ও.য়ু.);
▪ ঙমখৈ লান্না শামু ঙাকশেনবগা মরী লৈনবা প্রোতোকোল;
▪ লোকেল বোদীশিং অমসুং অতৈ পব্লিক সেক্তর ইন্সতিত্যুসনশিংগী থোংদা হাই ইম্পেক্ত কম্যুনিতী দিবেলপমেন্ত প্রোজেক্ত (ঐচ.আই.সি.দি.পি.)শিংগী থবক পায়খৎনবা ভারতকী গ্রান্ত এসিস্তেন্সকী মতাংদা এম.ও.য়ু.;
▪ বরিশাল সিতী কোর্পোরেসনগীদমক্তা ইক্বুইপমেন্তকী সপ্লাই অমসুং লমচোরীগী শরুক্তা গার্বেজ/সোলিদ ৱেস্ত দিস্পোজেল গ্রাউন্দ ফগৎহন্নবগীদমক এম.ও.য়ু;
▪ ভারত-বঙ্গলাদেশ সি.ই.ও.শিংগী রিফরেন্সকী তার্মশিং;
▪ জাতিগী মপা বঙ্গবন্ধু শৈখ মুজিবুর রহমান মেমোরিএল ম্যুজিয়ম, ধাকা, বঙ্গলাদেশ অমসুং নেস্নেল ম্যুজিয়ম, নই দিল্লীগী মরক্তা এম.ও.য়ু.
▪ লৌউ-শিংউগী লমদা তেংবাং পীনবগা মরী লৈনবা এম.ও.য়ু.

মখাদা পীরিবা মখাগী নাকল অনিগী ওইবা দিবেলপমেন্ত পার্তনরশিপ প্রোজেক্তশিংসু হৌদোকখিঃ
• রাজশাহী শহরদা ফজহনবা অমসুং সিতী দিবেলপমেন্ত প্রোজেক্ত;  
• খুলনাদা খলীসপুর কোলেজিএৎ গর্ল্স স্কুল শাবা;

৩৮. প্রধান মন্ত্রী অনিনা অনৌবা ফিভমশিংগী মরক্তা থৌরাং অসিবু শিনবগীদমক অমনা অমবু থাগৎপা ফোংদোক্নখি।

৩৯. প্রধান মন্ত্রী শৈখ হসীনানা মার্চ ২০২১দা বঙ্গলাদেশকী নীং খা তম্বা চহি ৫০ শুবগী থৌরম অমসুং বঙ্গলাদেশ-ভারতকী দিপ্লোমেতিক্কী মরীগী চহি ৫০শুবা কুমওনগা মরী লৈননা পাংথোক্কদবা থৌরমদা শরুক য়াননবা বঙ্গলাদেশতা লাকপীনবা হায়জখিবা মহাক্কী পাউজেল অদুবু য়াবীবগীদমক প্রধান মন্ত্রী নরেন্দ্র মোদীদা থাগৎপা ফোংদোকখি।

*****