ঙসি পান আই.আই.তি. য়ু.এস.এ.না শীন্দুনা পাঙথোকপা আই.আই.তি.-২০২০ গ্লোবেল সম্মিত্তা প্রধান মন্ত্রী শ্রী নরেন্দ্র মোদীনা ভিদিও কন্ফরেন্সিংগী খুত্থাঙদা মরুওইবা ৱারোল পীখ্রে‍।

প্রধান মন্ত্রীনা ফোঙদোকখিবদা লৈঙাক অসিনা “অওনবা, শিনপাঙবা অমসুং অহোংবা” হায়রিবসিগী পরিংদা লেপ্লি‍। অওনবা পুরকপদা সেক্তর অমত্তা চিত্থহৌবা লৈতে হায়না মহাক্না হায়খি‍। য়ুনিয়ন লেবর কোদ ৪৪বু শুপ্নতগী কোদ ৪দা পুনশিল্লকপা, মালেমগী খ্বাইদগী নেমবা কোর্পোরেত তেক্সশিংগী মরক্তা অমা ওইহনবা, মপান্দা থাদোকপা অমদি পোত্থোক পুথোকপা হেনগৎহন্নবা মরুওইবা সেক্তর তরাদা পায়খৎবা প্রদক্সন লিঙ্ক ইন্সেন্তিব স্কিমনচিংবা লৈঙাক অসিনা পুরকখিবা অ্রচৌবা অওনবশিং মহাক্না পনখি‍। কোবিদ-১৯গী চিরবা তান্ফমসিদসু ভারতনা রেকোর্দ ওইবা মওংদা শেল থাদরি অমদি থাদরিবা শেন্ফমশিংসিগী অয়ামবদি তেক সেক্তরদা ওইরি হায়না মহাক্না পনখি‍।

ঙসিগী ঐখোয়গী থৌওথনা হয়েংগী ঐখোয়গী মালেমগী মশক লেপকদৌরিবনি হায়না মহাক্না হায়খি‍। কোবিদ-১৯ মতুংগী ওইরক্কদবা মচত্তি: হন্না তমবা, হন্না খনবা, হন্না ইনোভেত তৌবা অমদি হন্না পুথোকপনি‍। মসিগা লোয়ননা অয়ামবা হীরম খুদিংমক্তা মথঙ মথঙ পায়খৎলিবা শেন্মিৎলোনগী অওনবা অসিনা ঐখোয়গী মালেম অসিবু মতুং হাপকনি‍। মসিনা ‘হিংবদা নুংঙাইহনবা’ ফীভম পুরক্তুনা লায়রবা অমদি তোল্ল-তারবশিংগী পুন্সিদা অফবা ইনোৎ পীরক্কনি‍ হায়না মহাক্না হায়খি‍। লাইচৎ মনুংদা থোরকখিবা য়াম্লবা ইনোভেসনশিং অসি ইন্দস্ত্রী অমসুং একাদমিয়াগী মরক্তা খুৎশম্ননা চৎমিন্নবদগী ওইরকখিবনি‍। ঙসি মালেম অসিনা অনৌবা পুন্সি মরেল অসিগা চুশিন্ননবগীদমক্তা ওইথোকপা য়াবা পাম্বৈশিং মথৌ তারি হায়না মহাক্না ফোঙদোকখি‍।

প্রধান মন্ত্রীনা হায়খিবদা, পান আই.আই.তি ইহৌগী মপুং ওইবা শাফম অসিনা আত্মনিরভর আরত নৎত্রগা মরোমদোম লেপচবা ভারতকী মঙলান্দা খোঙজেল হাপ্পা ঙমগনি‍। মীরমদা লৈখিবা ভারত মচাশিংবু মহাক্না ভারতকী ব্রান্দ এম্বাসেদর হায়না কৌরদুনা মখোয়গী খোঞ্জেল অসি মালেম অসিনা ভারতকী মীৎয়েঙবু মমুৎ তানা খঙহন্নবগীদমক্তা য়াম্না মরু ওই হায়না মহাক্না ফোঙদোকখি‍।

২০২২দা পাঙথোক্কদবা ভারতকী নীং তমবগী ৭৫শুবা কুমওন থৌরমগী মতাঙদা ৱা ঙাঙলদুনা শ্রী মোদীনা পান আই.আই.তি. ইহৌবু “ভারত্তা লমন শিংবগী” হেন্না ৱাংবা পান্দম অমা থম্নবা ৱাফম থমখি‍। মখোয়গী ৱাখল্লোনশিং অমদি নীং তম্বগী চহী ৭৫ শুবসিবু কমদৌনা মশক থোকহনগদগে হায়বা ৱাফমশিং তাথোক তাশিন তৌননবা মহাক্না হায়খি‍। “অদোম্না অদোমগী ৱাখল্লোনশিং মাইগোভতা পীরকপা য়াগনি‍। নৎত্রগা অদোম্না ঐঙোন্দা হকথেংননা নারেন্দ্র মোদী এপতা থারকপা য়াগনি” হায়না মহাক্না মখা তাখি‍।

কুইদ্রিবা মতমসিদা ভারত্তা হেকাথোনগী চৎনবী অমা লাক্লি অদুগা হেকাথোনশিং অসিদা নহা ওইরিবা মীওইশিংনা লৈবাক্কী অমদি মালেমগী ৱাফমশিংগী মশক থোকপা পাম্বৈশিং পীরি হায়না প্রধান মন্ত্রীনা হায়খি‍। ঐখোয়গী নহাশিংনা মখোয়গী হৈশিংবা উত্থোক্নবা মালেমগী ফম্পাক ফংহন্নবা অমদি মালেমগী খ্বাইদগী ফবা মওং মতৌশিংদগী তমজনবগীদমক লৈঙাক অসিনা খা-নোংপোক এসিয়া অমদি য়ুরোপকী লৈবাক কয়াগা থবক তৌমিন্নরি হায়না মহাক্না হায়খি‍। ভারতনা ভৈভব সম্মিত পাঙথোক্তুনা সাইন্স অমসুং ইনোভেসনগী লমদা মকোক থোংনা হৈথোই শিংথোইরবা মীওইশিং পুনশিনখি‍ হায়না মহাক্না হায়খি‍। মীফম অসিনা সাইন্স অমসুং ইনোভেসনগী লমদা তুংদা খুৎশম্ননবগী লম্বী য়াৎখি‍ হায়নসু মহাক্না মখা তাখি‍।

প্রধান মন্ত্রীনা ফোঙদোকখিবদা ভারতনা মাগী থবক তৌবগী মওংদা চাউনা অহোংবা উবা ফংলে‍। হান্নদি আই.আই.তি.শিংনা এরো-স্পেস ইঞ্জিনিয়রশিং পুথোরকপদা মখোয়বু থবক পীননবা মপাঙ্গল কল্লবা লমদমসিগী ইন্দস্ত্রিএল ইকো সিস্তেম লৈরমদা‍। ঙসিদি, স্পেস সেক্তরদা পুৱারী ওইবা মওংগী অওনবা পুরকপগা লোয়ননা মীওইবা খুন্নাইগী পনখৈ ওইরিবা মফম অসিবু ভারতকী হৈথোই শিংথোইরবা মীওইশিংগীদমক্তা থোঙ হাংদোক্লে‍। মরম অসিননি ভারত্তা অনৌবা স্তেস তেস স্তার্তঅপশিং নুমিৎ খুদিংগী থোরক্লিবসি‍। ময়াম মরক্তগী খরদি কনানসু য়ৌশিল্লিদ্রিবা মফমদুদা থৌনা ফনা চঙশিল্লক্কনি হায়না মহাক্না থাজবা ফোঙদোকখি‍। ভারতকী সেক্তর খুদিংদা মতমগী ওইবা অমদি অনৌবা মওংগী থবকশিং পায়খৎলি‍।

ঙসি মশিং য়াম্লবা আই.আই.তি. এলুম্নাইশিংনা ইন্দস্ত্রী, একাদমিয়া, আর্তস, লৈঙাক্নচিংবশিংদা মালেমগী মাঙজিন থাবা ফম পায়রি‍। মরম অসিনা এলুম্নাইশিং অসিনা অনৌবা মালেমগী তেক ওর্দর অসিগী পাম্বৈশিং পুথোক্নবগীদমক্তা য়েৎনদুনা, খন্নদুনা থৌদাং য়ামিন্ননবা ৱাফম মহাক্না থমখি‍।

***