১. ভারতকী প্রধান মন্ত্রী, ঐচ.ই. শ্রী নরেন্দ্র মোদী অমসুং লকজেম্বর্গকী গ্রান্দ দ্যুকীগী প্রধান মন্ত্রী, ঐচ.ই. শ্রী জেভিয়র বেত্তেলনা পুন্দুনা নবেম্বর ১৯, ২০২০দা খ্বাইদগী অহানবা ভারত-লকজেম্বর্গকী ভর্চুএল স্মমিৎ পাংথোকখ্রে।

২. প্রধান মন্ত্রী অনি অসিনা গনতন্ত্র, নীং-তম্বা, আইনগী কাঙলোনশিং অমসুং মীওইবগী হিংবগী হকশিংবু ইকায় খুম্নবগী ৱাখল্লোনশিং অমসুং ভেল্যুদা মান্নবা ৱাখল্লোন লৈবা অসিদা য়ুম্ফম ওইবা ভারত অমসুং লকজেম্বর্গকী মরক্তা লৈরিবা নীংথিরবা মরী অসিগী মতাংদা শক-খঙমিন্নখি।

৩. ইং ১৯৪৮দা লৈবাক অনি অসিগী মরক্তা দিপ্লোমেতিক ওইবা মরী লৈনবা হৌখিবদগী দিকেদ তরেৎ হেনবগী নক্নবা অমসুং নুংশি-চান্নবগী মরীদা চাউখৎপা কয়া লাকখিবা অসিদা লুচিংবা অনি অসিনা অপেনবা ফোঙদোকখি। মতম অসিগী মনুংদা লৈবাক অনি অসিগী মরক্তা তেংবাংনবগী মরী অসি য়াম্না মশক থোকপা মওংদা ফগৎলকখি হায়বগী ৱাফমদা য়ানবা পুরকখি অমসুং ত্রেদ, ফাইনান্স, স্তীল, স্পেস, আই.সি.তি., অনৌবা থৌওং পাংথোকপা, মেন্যুফেকচরিং, ওতোমোতিব, নৌহৌননা অমুক শিজিন্নবা য়াবা ইনর্জী য়াওবা সস্তেনেবল দিবেলপমেন্ত অমসুং অইং-অশা হোংবগী মায়োক্তা লান্থেংমিন্নবগী লমশিংদা খুৎশম্নবা হেনগৎহনবগী খুত্থাংদা মরী অসিগী মতিক শিজিন্নবগী তঙাই ফদবগী মতাংদসু ৱাফম কয়া য়ান্নবা পুরকখি।

৪. মখোয়না ভারত অমসুং লকজেম্বর্গকী মরক্তা অৱাংবা থাক্কী মরী লৈনরিবা অসিদসু অপেনবা ফোঙদোক্নখি। হীরম অসিগা মরী লৈননা, কোবিদ-১৯গী লাইচৎনা মরম ওইদুনা হিস রোয়াল হাইনেস, গ্রান্দ দ্যুক্কী হন্দকী চহিগী অহৌবদা লাক্কনি হায়না তৌরম্বদগী য়ৈথোকখ্রবা মতুংদা লাইচৎকী ফিভম ফগৎলকপগী মতুং ইন্না খুদোং চাবা মতম অমদা লাক্কদৌরিবা ভারতকী খোঙচত্তা নৌহৌননা মিৎয়েং চংলি।

৫. লুচিংবা অনি অসিনা মালেমগী খুদোংচাদবশিংগী মতাংদা ভারত অমসুং লকজেম্বর্গ অনিগী মরক্তা মান্নবা ৱাখল্লোনশিংদা মান্নবা কয়া লাক্লিবা অসিবুসু শক খঙমিন্নখি। মখোয়না লৈবাক অনি অসিগী মরক্তা হেন্না ভাব তান্নবা অমসুং খুৎশম্ননা চৎমিন্নবগী মতাংদা খোঙফম চেৎপগী থৌওংগী মতাংদসু মান্নবা ৱাখল্লোন তানখি অমসুং হীরম অসিগা মরী লৈননা ভারতকী এক্সতর্নেল এফিয়র্সকী মন্ত্রালয় অমসুং লকজেম্বর্গকী ফোরেন অমসুং য়ুরোপিয়ন এফিয়র্সকী মন্ত্রালয়গী মরক্তা চাং নাইনা ৱা-তানবগী থৌওংবু ইন্সতিত্যুস্নেলাইজ তৌবগী থৌওংবুসু তরাম্না ওক্নখি।
 

শেন্মিৎলোনগী মরী

৬. প্রধান মন্ত্রী অনি অসিনা লৈবাক অনি অসিগী মরক্তা লৈনরিবা শেন্মিৎলোনগী মরীদা চাউখৎলকপা অসিবু তরাম্না ওক্নখি অমসুং ভারত অমসুং লকজেম্বর্গকী কম্পেনীশিংনা লৈবাকশিং অসিদা থবক তৌদুনা মশক তাকপগী চাং হেনগৎলকপা অসিদসু অপেনবা ফোঙদোক্নখি। হীরম অসিগা মরী লৈননা মখোয়না কারবারগী মতাংদা খুৎশম্নবগী অনৌবা খুদোংচাবা কয়াদসু য়েংশিনমিন্নবগী য়ানবসু পুরকখি। প্রধান মন্ত্রী অনি অসিনা ইনভেস্ত ইন্দিয়া অমসুং লক্সইন্নোভেসনগী মরক্তা খুৎশম্ননা চৎমিন্নবগী খুৎয়েক পীবগী মতাংসু তরাম্না ওক্নখি অমসুং মসিনা ভারত অমসুং লকজেম্বর্গকী কম্পেনীশিংগী মরক্তা কারবারগী মতাংদা খুৎশম্নবা পুরকপবু শৌগৎপা অমসুং চাউখৎহনবদা তেংবাংবগী পান্দম থম্লি।
৭. প্রধান মন্ত্রী অনি অসিনা ভারত অমসুং লকজেম্বর্গকী মরক্তা স্তীল সেক্তর্দা মতম কুইনদগী লৈরক্লবা খুৎশম্নদুনা লাক্লিবা অসিবুসু শক খঙখি অমসুং লুচিংবশিং অসিনা এস.এম.ই. অমসুং স্তার্ত-অপশিং মনুং চনবা কার্বারশিংনা শেন্মিৎলোনগী মরী অসিবু মখা তানা চাউখৎহন্দুনা অহেনবা খুদোংচাবা কয়া লৈহন্নবা হায়খি। লকজেম্বর্গকী কম্পেনীশিংনা অকোয়বা, অশেনবা ইনর্জী অমসুং ক্লীন গঙ্গা মিশন য়াওনা তুং কোইনা চৎকদবা তেক্নোলোজীগা মরী লৈনবা ভারতকী খোঙথাংশিংদা অপাম্বা উৎলিবা অসিদা হেনগৎলকপগী চাং অসিবুসু শক খঙমিন্নখি।

৮. লুচিংবশিং অসিনা ভারত অমসুং বেলজিয়ম-লকজেম্বর্গ ইকোনোমিক য়ুনিয়নগী মরক্তা শেন্মিৎলোন অমসুং ললোন-ইতিক্কী মরীশিং হঙ্গৎনা য়েংশিনবগী ১৭শুবা জোইন্ত ইকোনোমিক কম্মিসন্দসু মিৎয়েং চঙগদৌরি।

৯. হৌজিক লৈরিবা সপ্লাই চেন অসিবু হেন্না নীংহন্নবা লৈতনবা, তোঙানহন্নবা, থৌদাং খঙনবা অমসুং তুং-কোইনা চৎনবা হোৎনরিবা অসিগী মতাংদসু মখোয়গী ৱাখল্লোনশিং লান্নখি অমসুং ফোঙদোক্নখি। হৌখিবা দিকেদশিং অসিদা সপ্লাই চেনশিং অসিনা হেন্না লুশিন্দুনা চয়েৎনবা হেনগৎলিবা অমসুং মালেম শিনবা থুংনা লৈরিবা তোঙানবা স্তেকহোলদর্শিংগী কাঙলুপশিংদা তাংজরিবা অসিগী মতাংদসু ৱাফম কয়া খঙদোক্নখি। লুচিংবা অনি অসিনা মালেমগী সপ্লাই চেন অসিবু তুংগীদমক্তা অশোইবা লৈহন্দনবা হোৎনবা অসিনা ভেল্যু চেনগী মনুংদা য়াওরিবা স্তেকহোলদর্শিংগী মরক্তা খুৎশম্ননা থবক তৌমিন্নবগী চাং হেনগৎহন্দুনা অমগা অমগগী মরক্তা লৈনরিবা মরী অমসুং অখাঙ কনবগী থৌওংগী মরক্তা হেন্না নীংথিনা পাঙথোকমিন্নবগী থৌওং ওইথোকহনগনি হায়বগী ৱাফমদা য়ানবা পুরকখি।
শেল-থুম
১০. গ্রীন গ্রোথ অমসুং তুং কোইনা চাউখৎপগী থৌওংবু খুমাং চাউশিলহন্নবগীদমক্তা গ্রীন ফাইনান্সিংগী মরু ওইবদা হেন্না মিৎয়েং চঙলদুনা লুচিংবা অনি অসিনা লকজেম্বর্গ স্তোক এক্সজেঞ্জনা স্তেৎ বেঙ্ক ওফ ইন্দিয়া অমসুং ইন্দিয়া ইন্তর্নেস্নেল স্তোক এক্সচেঞ্জকা খুৎশম্ননা চৎমিন্নবগী খুৎয়েক পীনখিবা অদুবু তরাম্না ওকখি। কাঙলোন শেমগদৌরিবা মরী লৈনবা মীওইশিং, “কম্মিসন দে সর্ভেলিএন্স দ্যু সেক্ত্যুর ফাইনান্সিয়র” অমসুং দি সেক্যুরিতীজ অমসুং এক্সচেঞ্জ বোর্দ ওফ ইন্দিয়া (এস.ই.বি.আই.)গী মরক্তা য়ানবা পুরকপগী হৌদোক্লিবা থৌওং অসিনা শেলথুমগী সেক্তরদা লৈবাক অনিগী মরক্তা লৈনরিবা মরী অসিবুসু হেন্না চেৎশিনহল্লগনি হায়বগী ৱাখল্লোন্দসু য়ানবা পুরকখি। হীরম অসিগা মরী লৈননা, মখোয়না শেলথুমগী সেবাগী লমদা খুৎশম্নবগী থৌওংবু মপাঙ্গল হেন্না কনখৎহন্নবা খোঙফম চেৎপগী ৱাখল্লোনসু ফোঙদোক্নখি। প্রধান মন্ত্রী বেত্তেলনা লকজেম্বর্গনা য়ুরোপকী ওইনা শেলথুমগী মলেমগী মকোক থোংবা ময়োল অমা ওইবনা মরম ওইদুনা ভারতকী শেমথুমগী সেবাগী ইন্দস্ত্রীগা মালেমগী কৈথেলশিংগা শম্নহনবদা তেংবাংবা ঙমদুনা য়ুরোপ অমসুং মালেমগী ওইনা শেল থাদবশিংগগী মরক্তা মরু ওইবা থোং অমা শেমদুনা শম্নবা ঙমগনি হায়বগী মতাংদা মিৎয়েং চঙলদুনা ৱাফম কয়া অমা থমখি।

১১. লুচিংবা অনি অসিনা শংবা হেনবা অমসুং তুং কোইনা চৎকদবা শেন্মিৎলোন অমা ওইদুনা মালেমগী থাক্তা য়ৌহনবা ঙমগদবা শেলথুমগী ইন্দস্ত্রীশিংগী থৌদাংশিংগী মতাংদসু শক খঙমিন্নখি। হীরম অসিগা মরী লৈননা, মখোয়না তুং কোইনা চৎকদবা শেলথুমগী ফিভম অমা ওইহনবদা তেংবাংগদবা খুৎশম্ননা পাঙথোকমিন্নবা য়াবা থৌওং কয়াসু মশক খঙদোকমিন্নদুনা মদুবু চাউখৎহনবা হায়নসু য়ানবা পুরকখি। মসিদা নত্তনা, প্রধান মন্ত্রী অনি অসিনা শেলথুমগী সেক্তরদা অনৌবা থৌওং পাঙথোকপা অমসুং দিজিতাইজেসন তৌবগী কান্নবগী মতাংদা মিৎয়েং চঙমিন্নখি অমসুং লৈবাক অনি অসিগী ফাইনেন্সিএল তেক্নোলোজী অমসুং স্তার্ত-অপ কম্ম্যুনিতীশিংবু পুলহনবা ঙম্বগী মতিকশিংগী মতাংদা ৱাফম কয়া অমা খন্নখি।

স্পেস অমসুং দিজিতেলগী মতাংদা খুৎশম্নবা
 

১২. লুচিংবা অনি অসিনা ভারত অমসুং লকজেম্বর্গকী মরক্তা সেতিলাইৎ ব্রোদকাস্তিং অমসুং কম্ম্যুনিকেসনগী লমদা স্পেসকী ওইবা হীরমদা খুৎশম্নরিবা অসিগী মতাংদা খন্নখি অমসুং লকজেম্বর্গতা য়ুম্ফম ওইবা স্পেস কম্পেনীশিংনা মখোয়গী সেতিলাইৎশিংবু স্পেস্তা থাগৎনবা ভারতকী সেবা শিজিনন্নবা হৌরকপা অসিদা অপেনবসু ফোঙদোকখি। লকজেম্বর্গতগী সেতিলাইৎ ৪ য়াওদুনা পি.এস.এল.ভি.-সি.৪৯ মিসনগী শরুক অমা ওইনা নবেম্বর ৭, ২০২০দা আই.এস.আর.ও.না মাই-পাক্না সেতিলাইৎ থাগৎখিবগী থৌওং অদুবুসু তরাম্না ওকখি। লুচিংবা অনি অসিনা অনৌবা হীরম থীদোকপগী লমদা খুৎলাই শিজিন্নবগী খুৎশম্নবা অমসুং সরকার অনি অসিগী মরক্তা খন্নরিবা মপানথংবা স্পেসপু শান্তি পুরক্কদবা থৌওংশিংদা শিজিন্নবগী হীরমদা অঙনবা ৱারোইশিন পুরকমিন্নবগী মতাংদসু অপাম্বা ফোঙদোক্নখি।

১৩. লুচিংবা অনি অসিনা কোবিদ-১৯না দিজিতেলাইজেসনগী থৌওংশিংবু খোঙজেল থুগৎহল্লে হায়বগী ৱাফমদসু য়ান্নবা পুরকখি অমসুং হীরম অসিগা মরী লৈননা, মখোয়না দিজিতেলগী হীরম অমসুং মসিদগী ওইরকপা তেক্নোলোজীশিংগী মতাংদা খুৎশম্ননা চৎমিন্নবগী মতাংদা লৈরিবা তঙাই ফদবশিং অসিগী মতাংদসু মিৎয়েং চঙমিন্নখি। মখোয় অনিমক্না ভারত অমসুং লকজেম্বর্গনা মথংশিৎনা “দিজিতেল ইন্দিয়া” প্রোগ্রাম অমসুং “দিজিতেল লকজেম্বর্গ ইনিসিএতিব”কী খুত্থাংদা দিজিতেলাইজেস্নবু খুমাং চাউখৎহনলি হায়না য়ানখি অমসুং খোঙথাং অনি অসিবু পুন্সিনবগী মতাংদসু য়ানবা পুরকখি।

অৱাংবা থাক্কী মহৈ তম্বা অমসুং রিসর্চ

১৪. নেস্নেল ব্রেন রিসর্চ সেন্তর অমসুং লকজেম্বর্গ ইন্সতিত্যুৎ ওফ হেল্থকুম্বা ভারতকী পার্ত্নর ইন্সতিত্যুসন অমসুং লকজেম্বর্গ সেন্তর ফোর সীস্তেমস বাইওমেদিসিনগী মরক্তা ন্যুরোদিজেনেরেতিব লাইনাশিংগী মরমদা হৌজিক চত্থরিবা তেংবাংনবগী থৌওংশিং অসিদা লুচিংবা অনি অসিনা অপেনবগা লোয়ননা ৱাফম কয়া ফোঙদোকখি। মখোয়না বোম্বে, কানপুর অমসুং মদ্রাজকী আই.আই.তি.শিং অমসুং নেস্নেল লো স্কুল ওফ ইন্দিয়াগা লোয়ননা লকজেম্বর্গকী য়ুনিবর্সিতীগা হৌজিক লৈনরিবা মরীগী মতাংদসু ৱাফম কয়া থমখি অমসুং লৈবাক অনি অসিগী অৱাংবা থাক্কী ইন্সতিত্যুসনশিং অমসুং রিসর্চকী থবকশিংদসু খুৎশম্নবগী থৌওংশিং অসি হেন্না পাক চাউথোকহনবা হায়নসু য়ানবা পুরকখি।

নাৎ অমসুং মীওইশিংগী মরক্তা লৈনরিবা মরীশিং

১৫. লুচিংবা অনি অসিনা ভারত অমসুং লকজেম্বর্গনা হৌজিক্কী ওইরিবা মালেমগী অকোয়বগী ফিভম অসিদা অহিমশাগী ৱাখল্লোন ইল্লি হায়না পুন্না ফোঙদোকখি। মতাং অসিদা, প্রধান মন্ত্রীনা লকজেম্বর্গনা মহাত্মা গান্ধীগী ১৫০শুবা মপোক কুমওনবু ইকায় খুম্নবা ওইনা ইং ২০১৯দা নীংশিং শেনয়েক অমা পুথোকখিবা অদুগীদমক্তা থাগৎপগা লোয়ননা থৌওং অদুবু তরাম্না ওকখি। প্রধান মন্ত্রী শ্রী বেত্তেলনা হায়রিবা নীংশিং শেনয়েক অসিগী মওং-মতৌ অসি লকজেম্বর্গ সহরগী ম্যুনিসিপাল পার্ক্তা লৈরিবা মহাত্মা গান্ধীগী পিথ্রাইগী মীতম অদুদা য়ুম্ফম ওইদুনা শেমখিবনি হায়না মিৎয়েং চঙখি। অমসুং হায়রিবা মীতম অসি দিকেদ অনিগী মনুংদা (১৯২২-২০০৭) ভারত অমসুং লকজেম্বর্গকী মনুংদা লৈখিবা ভারতকী হৌজিক্কী মতমগী আর্তিস্ত অমর নাথ সেহগালনা শাখিবনি।

১৬. প্রধান মন্ত্রী অনি অসিনা মীওই অমগা মীওই অমগগী মরক্তা লৈনরিবা মরীবু হেন্না ফগৎহনবা অসি লৈবাক অনি অসিগী মরক্তা লৈনরিবা তেংবাংনবগী মরী অসিবু হেন্না ফগৎহনবদা য়াম্না তঙাই ফদবনি হায়না য়ানখি। হীরম অসিগী মতাংদা মখোয়না লকজেম্বর্গতা লৈরিবা মশিং য়াম্না হেনগৎলক্তুনা লমদম অসিগী দাইবর্সিতীবু হেন্না নীংথিজহনবদা তেংবাংলিবশিংনা অফবা মওংদা কান্নবা পীরিবশিংবু থাগৎপা ফোঙদোকখি। মখোয়গী চত্থোক-চৎশিন তৌবগী থৌওংশিং অসিবু হেন্না মপাঙ্গল হেলহন্নবা হায়দুনা লুচিংবা অনি অসিনা মাইগ্রেসন অমসুং মোবিলিতী এগ্রীমেন্তপু খোঙজেল থুনা লোইশিন্নিংবগী অপাম্বসু ফোঙদোকখি। অমসুং মসিগা লোয়ননা দিপ্লোমেতিক অমসুং ওফিসিএল/সর্ভিস পাসপোর্ত পায়বশিংগী ওইনা ভারত অমসুং বেনেলক্সকী মরক্কী মীওইশিংগী ভিজাগী তঙাইফদবশিংবুসু লৌথোকপগী য়ানবা অমসু পুরকখি।

কোবিদ-১৯গী লাইচৎ

১৭. লুচিংবা অনি অসিনা হকশেল অমসুং সোসিও-ইকোনোমিক্কী ওইবা তুংদা ওইরক্কদবশিং য়াওনা হৌজিক চৎলিবা কোবিদ-১৯গী লাইচৎকী মতাংদা খন্নখি অমসুং লাইচৎ অসি পুন্না লান্থেংমিন্ননবগী ৱারেপ অমসু লৌখি। মখোয়না লাইচৎ অসিবু মাই-পাক্না থেংননবা মালেমনা অমত্তা ওইদুনা কোবিদ-১৯গী মতুংগী মতমশিংদা তুং কোইনা চৎকদবা সোসিও-ইকোনোমিক্কী ফিভম অমা লাকহন্নবা অমসুং শেন্মিৎলোন্দা চাউখৎপা পুরক্তুনা শেন্মিৎলোন্দা নীংহন্নবা লৈহন্দনবা শাফু পীবগী তঙাই ফদবগী মতাংদসু খন্নখি। ইন্দিয়া-ই.য়ু. পার্ত্নর্শিপ ফ্রেমৱর্ক্কী মনুং চনবা থৌওং য়াওদুনা শেম-শাদুনা লৈবগী অমসুং থেংনবগী থৌওংবু মপাঙ্গল হেনগৎহনবা, অমগা-অমগী মরক্তা নুং-ফাওনা উবা অমসুং খুদক্কী ওইবা মওংদা ই-পাউ পীথোক-পীশিন তৌননবা অমসুং ৱর্ল্দ হেল্থ ওর্গানাইজেসন (দবল্যু.ঐচ.ও.)গুম্বা চানবা মালেমগী লুপশিংগী খুত্থাংদা মালেমগী থাক্তা থেংনবগী মতিক হেনগৎহন্নবগী মওং পুরক্নবা লেপ্তনা খুৎশনদুনা চৎপগী ৱাফমসু য়ানবা পুরকখি।

ই.য়ু.-ভারতকী মরী

১৮. লুচিংবা অনি অসিনা তেক্ত-কাইদবা, হেন্না গ্রীন ওইবা অমসুং তংদু লৈতাবা মালেম অমা ওইহন্নবগীদমক্তা গনতন্ত্রা, নীংখা তম্বা, আইনগী কাঙলোন অমসুং মীওইবগী হকপু ইকায় খুম্নবগী ৱাখল্লোনশিং অমসুং ভেল্যুদা মান্নবা মিৎয়েং য়েংমিন্নবগী মরা চেৎলবা ভারত-ই.য়ু.গী স্ত্রেতজিক ওইবা মরী অসিগী মরু ওইবশিংসু শক খঙমিন্নখি। হীরম অসিগা মরী লৈননা, মখোয়না জুলাই ১৫, ২০২০দা ভারত-ই.য়ু. সম্মিৎ মাই-পাক্না পাংথোকখিবা অদুদা অপেনবা ফোঙদোকখিবগা লোয়ননা লুচিংবা অনি অসিনা পাক-চাউবা, তুং কোইনা চৎকদবা অমসুং কাঙলোনশিংদা য়ুম্ফম ওইবা অমগা-অমগগী শম্নবগী থৌওংশিংগী খুত্থাংদা মান্নবা অপাম্বা লৈবা ইন্দো-পেসিফিক্কী মফমশিংদা পাঙথোক্লিবা খুৎশম্নবগী থৌওংশিংবু হেন্না মপাঙ্গল কনখৎহনবগী থৌওং য়াওনা হায়রিবা মরী অসিবু মখা তানা চেৎশিনহনবদা শৌগৎপগী য়ানবসু পুরকখি। প্রধান মন্ত্রী মোদীনা দিকেদ কয়া অসিদা লকজেম্বর্গনা য়ুরোপিয়ন য়ুনিয়নগী হৌদোকমিন্নবগী খোঙলোই অমা ওইনা ভারত অমসুং ই.য়ু.গী মরী অসি হেন্না চেৎশিনহন্নবা থৌদাং অসিবু থাগৎপা ফোঙদোকখি। হীরম অসিগী মতাংদা প্রধান মন্ত্রী বেত্তেলনা ভারত অমসুং ই.য়ু.গী মরী অসিবু হেন্না কনখৎহন্নবা মহাক্না অৱাংবা থাক্তা মিৎয়েং চঙবা অদুগী মতাংদা পনখি অমসুং ভারত অমসুং ই.য়ু. অনিমক্না অমনা-অমগী ঙাক-শেনবগী, য়াইফবগী অমসুং তুং কোইনা চাউখৎপগী মতাংদা মান্নবা অপাম্বা ৱাখল্লোন লৈ হায়নসু ফোঙদোকখি।

১৯. লুচিংবশিং অসিনা ভারত অমসুং ই.য়ু.গী শেন্মিৎলোনগী মরী চাউখৎহনবা অসিনা কোবিদ-১৯গী মতুংদা শেন্মিৎলোন চাউখৎপগী মতাংদা মরু ওইবা হীরম অমা ওইগনি হায়না য়ানবা ৱাখল্লোন ফোঙদোক্নখি। হীরম অসিগা মরী লৈননা, মখোয়না খল-মান্নবা, ৱাখল চাউবা অমসুং অনিমক্তা কান্নগদবা ফ্রী-ত্রেদ অমসুং শেল থাদবগী য়ানবা পুরকপগী মতাংদা খোঙফম চেৎমিন্নবগী ৱারোলশিং ফোঙদোক্নখি।

মলতিলেতরেল কো-ওপরেসন

২০. লুচিংবশিং অসিনা মথৌ নীংথিনা তৌবা অমসুং শেমদোক্লবা মলতিলেতরেলিজম অমসুং য়ুনাইতেদ নেসন্স (য়ু.এন.) অমসুং ৱর্ল্দ ত্রেদ ওর্গানাইজেসন (দবল্যু.তি.ও.)না ময়ায়দা লৈদুনা মখোয়গা লোয়ননা কাঙলোনশিংদা য়ুম্ফম ওইবা  মলতিলেতরেল ওর্দর অমা খুমাং চাউশিলহন্নবা অনীংবা ফোঙদোক্নখি। মখোয়না তুং কোইনা চাউখৎপা ফংবগী পান্দম ফংনবা অমসুং অকোয়ববু ঙাক-শেন্দুনা অমসুং অইং-অশা হোঙলক্লিবা অসিবু মায়োক্ননবা খুৎশম্নদুনা চৎমিন্নবগী ৱাফমশিংদসু য়ান্নবা পুরকখি।

২১. হীরম অসিগা মরী লৈননা, লুচিংবশিং অসিনা পেরিস এগ্রীমেন্ত অমসুং মসিগীদমক্তা মরী লৈনবা লৈবাকশিংনা শৌগৎলিবশিংগী মতুং ইন্না এগ্রীমেন্ত অসিবু থবক ওইনা পাঙথোকমিন্ননবা ৱারোল কয়া অমসু ফোঙদোক্নখি। লুচিংবা অনি অসিনা অকোয়বগী ওইনা তুং কোইনা শেল থাদবগী মাইকৈরোমদা সোলার ইনর্জী শিজিন্নববু খুমাং চাউশিলহন্নবা ইন্তর্নেস্নেল সোলার এলাএন্স (আই.এস.এ.) অমসুং ইন্তর্নেস্নেল প্লেৎফোর্ম ওন সস্তেনেবল ফাইনান্স (আই.পি.এস.এফ.)কী হীরমশিংদা খুৎশম্নরিবা অসিবু হেন্না চেৎশিনহনবগী অপাম্বা ফোঙদোকমিন্নখি। প্রধান মন্ত্রী বেত্তেলনা ইন্তর্নেস্নেল সোলার এলাএন্সতা লকজেম্বর্গনা য়াওনীংবগী অপাম্বা লৈরে হায়নসু লাউথোকখি।

২২. মখা তাবা ওইনা, মখোয়না অনৌবা অমসুং হৌজিক লৈরিবা অমাঙ-অতা থোকপগী শিংনবশিং অসিবু ঙাকথোক্নবা হায়দুনা সেন্দাই ফ্রেমৱর্ক ফোর দিজাজতর রিস্ক রীদক্সনবু থবক ওইনা পাঙথোকপদা খুৎশম্নদুনা চৎপদা শেম শাবা লোইরে হায়নসু ফোঙদোকখি। অমসুং হীরম অসিগা মরী লৈননা, কোওলিসন ফোর দিজাজতর রেজিলিএন্ত ইনফ্রাস্ত্রকচর (সি.দি.আর.আই.)গী মনুং চনবা ওইনা ভারত অমসুং ই.য়ু.গী মরক্তা খুৎশম্ননা চৎনীংবগী অপাম্বসু ফোংদোক্নখি।

২৩. প্রধান মন্ত্রী বেত্তেলনা ইং ২০২১-২২গী তর্মগীদমক্তা ভারতপু য়ু.এন.সেক্যুরিতী কাউন্সিলগী নন-পর্মানেন্ত সীত্তা খনখিবা অদুবু তরাম্না ওকখি অমসুং য়ু.এন. সেক্যুরিতী কাউন্সিলদা পর্মানেন্ত অমসুং নন-পর্মানেন্ত মেম্বরগী মশিংবু হেনগৎহনবা য়াওনা শেমদোকপগী মতাংদা লকজেম্বর্গনা শৌগত্তুনা লাক্লিবা অসিগী মতাংদসু নৌহৌননা অমুক পনখি। অকক্নবা মতমগী মনুংদা তং-তাবা ৱারোইশিং অমা ফংবগী মপুং ওইবা পান্দম অমা ফংনবা হায়দুনা য়ু.এন.জেনেরেল এসেম্বলীগী ৭৫শুবা সেসন্দা তেক্সতা য়ুম্ফম ওইবা শন্তাইনবা অমা হৌনবগীদমক্তা ইন্তর্গবর্ন্মেন্তেল নেগোসিএসন (আই.জি.এন.) অমা হৌনবগীদমক্তা নাকল অনিমক্না য়ানবা পুরকখি। হীরম অসিগা মরী লৈননা, প্রধান মন্ত্রী বেত্তেলনা য়ু.এন. সেক্যুরিতী কাউন্সিলদা ভারতকী পর্মানেন্ত মেম্বর ওইবগী ৱাহৌদোক অসিবু লকজেম্বর্গনা শৌগৎলি হায়না হন্না হন্না পনখি। প্রধান মন্ত্রী মোদীনা ভারতনা মিসাইল তেক্নোলোজী কন্ত্রোল রেজীম (এম.তি.সি.আর.)দা চঙবদা লকজেম্বর্গনা মরু ওইবা থৌদাং লৌখিবা অমসুং তোঙান-তোঙানবা ইন্তর্নেস্নেল অমসুং মলতিলেতরেল ইন্সতিত্যুসনশিংদা মীহুৎ ওইবগী মতাংদা শৌগৎপগীদমক্তা অমসুং ন্যুক্লিয়র সপ্লাইয়রস গ্রুপ (এন.এস.জি.)দা ভারতনা শরুক য়ারিবা অসিদা লেপ্তনা শৌগৎপগীদমক্তা থমোয় শেংনা থাগৎপা ফোঙদোকখি। প্রধান মন্ত্রী বেত্তেলনা ভারতনা লকজেম্বর্গনা য়ুনাইতেদ নেসন্সতা মীহুৎ ওইবা অমসুং য়ু.এন. হ্যুমেন রাইৎস কাউন্সিলগী ইং ২০২২-২৪গী তর্মগীদমক্তা লকজেম্বর্গপু মীহুৎ ওইনবগী মতাংদা শৌগৎপা অসিগীদমকসু থাগৎপা ফোঙদোকখি।

২৪. ঙমখৈ লানবা তেরোরিস্তকী থৌওং কয়া য়াওনা মালেমগী ওইবা তেরোরিস্তকা মরী লৈনবা লেপ্তনা লৈরিবা শিংনবশিং অসিদা য়াম্না হকচিন্না খল্লদুনা লুচিংবা অনি অসিনা তেরোরিজমগী মওং খুদিংমক অমসুং মসিনা থোকহনবা পামদবা থৌওং খুদিংবু য়ানীংদবা ফোঙদোকখি। য়ুনাইতেদ নেসন্সকী মালেমগী ওইবা থবকশিংদা ভারত অমসুং লকজেম্বর্গকী মরক্তা অরেপ্পা লৈতনা খুৎশম্নদুনা শৌগৎপগী তঙাই ফদবগী মতাংদা য়ানবা পুরকখি অমসুং মসিদা নত্তনা তেরোরিজমবু থিংনবা অমসুং থেংননবা ফাইনেন্সিএল এক্সন তাস্ক ফোর্স (এফ.এ.তি.এফ.)কুম্বা ফোরমশিংদসু শৌগৎপগী মতাংদা য়ানবা পুরকখি।   

ৱারোইশিন

২৫. প্রধান মন্ত্রী অনি অসিনা ভারত অমসুং লকজেম্বর্গকী মরক্তা পাঙথোক্লিবা অহানবা সম্মিৎ অসিনা লৈবাক অনিগী মরীদা অনৌবা তাঙ্কক অমা হৌহল্লে হায়না য়ানখি। মখোয়না লৈবাক অনিগী মরক্তা লৈনরিবা মরীগী ৱাফমশিংবু পাক চাউবা হেলহনবা অমসুং ৱাহন্থোক হেন্না লৈহনখ্রে অমসুং লৈবাক অনিসিগী অমসুং মালেমগী ওইবা অপাম্বগী মতাংদসু ৱারী শান্নবা অমসুং থবক তৌমিন্নবা হেনগৎমিন্নবগী অনৌবা তাঙ্কক অমসু ওইথোকহনখ্রে। প্রধান মন্ত্রী বেত্তেলনা প্রধান মন্ত্রী মোদীদা লকজেম্বর্গতা লাক্নবা পাউজেলসু পীখি।

***