খুরুমজরি,

মন্ত্রী মন্দলদা লৈবীরিবা ঐহাক্কী খোংবুরোই শ্রীমান রমেশ পোখরিয়াল নিশঙ্কজী, শ্রীমান সঞ্জয় ধোত্রেজী, বোর্দ ওফ গবর্নর্সকী চেয়র্মেন দোক্তর আর চিদম্বরমজী, আই.আই.তি. দিল্লীগী দাইরেক্তর প্রোফেসর ভি. রামগোপাল রাৱজী, বোর্দ অমসুং সিনেৎকী মীহুৎশিং, ফেকল্তী মেম্বরশিং, মপা-মমাশিং, নহা ওইরিবা মরূপশিং, ইকাইখুম্নজরবা অমদি ইকাইখুম্নজরিবীশিং!!

ঙসি অসি তেক্নোলোজীগী তাইবং অসিগী ওইনা য়াম্না অথোইবা নুমিৎ অমনি। ঙসি আই.আই.তি. দিল্লীগী থোংদগী লৈবাক অসিদা তেক্নোলোজীগী ফর-ফরবা অখং-অহৈ লিশিং ২দগী হেন্না ঙসি লৈবাক অসিনা ফংলগনি। ঙসি দিগ্রী ফংগদৌরিবা মহৈরোয়শিং, মরুওইনা মখোয়গী মপা-মমাশিংদা, মখোয়গী গাইদশিংদা, ফেকল্তী মেম্বরশিংদা, মীপুম খুদিংমক্তা মসিগী মরুওইবা নুমিৎ অসিগীদমক্তা ঐহাক্কী ইফমদগী য়াইফ-পাউজেল পীজরি।

ঙসি অসি আই.আই.তি. দিল্লীগী ৫১শুবা কনভোকেসন্নি অমসুং হন্দক্কী চহি অসিদা মসিগী অথোইবা ইন্সতিত্যুৎ অসিনা দাইমন্দ জুবিলীসু পাংথোক্লি। আই.আই.তি. দিল্লীনা হন্দক্কী দিকেদ অসিগী ওইনা মহাক্কী ভিজন দোকুমেন্তসু শেম্লে। ঐহাক্না দাইমন্দ জুবিলীগী চহি অমসুং হন্দক্কী চহিগী পান্দমশিং অসিগীদমক্তা অদোমগী মফমদা য়াইফ-পাউজেল কয়া পীজরি অমসুং ভারত সরকারগী মায়কৈদগী মপুং ফানা তেংবাং পীগনি হায়বগী থাজবা পীজরি। 

ঙসি, অথোইবা বৈজ্ঞানিক দোক্তর সি.ভি. রমনজীগী মপোক কুমওন্নি। ঙসি কনভোকেসনগা মহাক্কী মপোক কুমওনগা লোয়ননা পুনশিন্নরিবা অসি য়াম্না অফবা তাঞ্জা অমনি। ঐহাক্না মহাক্কী মফমদা নোল্লুক্না খুরুমজরি। মহাক্কী অথোইবা থবক অসি চহি কয়াফাওবা ঐখোয় পুম্বদা, মরুওইনা ঐখোয়গী নহা ওইরিবা বৈজ্ঞানিক মরূপশিংগী পুক্নিং অদুম্মক থৌগত্তুনা লৈরগনি।

মরূপশিং,

কোরোনাগী লুরবা তানফম অসিদা মালেম অসিদা চাউনা অহোংবা পুরকখ্রে। কোবিদ থোকখ্রবা মতুংগী মালেম অসি অসুক্কী মতিক য়াম্না হোংলগনি অমদি মসিদা খ্বাইদগী অচৌবা থৌদাং অসি তেক্নোলোজীনা লৌগনি। চহি চুপ্পগী মমাংদা কনা অমত্তনা মীফম ওইরো, পরিক্ষা ওইরো, ভাইবা ওইরো নত্রগা কনভোকেসন ওইরো পুম্নমক্কী মওং অসি লোইনা ওনখ্রে। ভর্চুএল রিএলিতী অমসুং ওগমেন্তেদ রিএলিতী অসিমক ৱর্কিং রিএলিতীগী মফম কনশিল্লক্লি, ওইশিল্লক্লি।

অদোম্না অদোমগী বেত্চ অসি লাইবক ফত্তে হায়না খল্লম্বা য়াই। অদোম্না অদোম ইশাদা হংজরমগনি হায়বা ঐহাক্না খল্লিবদি-মসিগীশিং অসিবু ঐখোয়গী গ্রেজুএসন তৌবগী চহি অসিখক্তদা থোক্কদৌরিবরা? অদবু তোঙানবা মওংদা খনবিয়ু। অদোম্না হান্না চংশিন্নবগী খুদোংচাবা অমা ফংলবনি। অদোম্না পানবগী মতম হেন্না ফংলে অমদি থবক তৌফমদা অমদি অতৈ ৱাংমদা অনৌবা থোরকপা মওংশিং শিজিন্নবা ফংলে। মরম অসিনা মসি খ্বাইদগী য়াম্না শিজিন্নবিয়ু। অদুগা অফবা নাকল্লোমদসু খনবিয়ু। অদোমসু লাইবক ফবা বেত্চনি। অদোম্না কেম্পসতা অদোমগী ফাইনেল ইয়রদা ময়াম উন্নবগী নুংঙাইবা ফংখি। হৌখিবা ওক্তোবর অসিগা হন্দক্কী ওক্তোবর অসিদা করি-করিদা হোংলকপগে হায়বা য়েংবিয়ু। অদোম্না হঙ্গৎনা নুংঙাইনা য়েংগদবশিং অসি: পরিক্ষাশিং পাংথোক্ত্রিঙৈগী মমাংদা নুমিদাং পুম্বা লাইব্রেরীদা অমদি রিদিং রুমদা লৈখিবা, নুমিদাংগী মেশতা অহিং অথেংবগী পরাথা, লেকচরগী মরক্তা কোফী অমদি মফিন। আই.আই.তি.-দিল্লীদা মখল অনিগী মরূপ লৈ হায়নসু ঐঙোন্দা হায়রকখি: কোলেজগী মরূপশিং। হোস্তেল ভিদিও গেমশিংগী মরূপশিং। অদোম্না শোইদনা মখোয় অনিমক নিংশিংলক্লমগনি।

মরূপশিং,

মসিগী মমাংদা ঐহাক্না আই.আই.তি. মদ্রাজ, আই.আই.তি. বোম্বে অমসুং আই.আই.তি. গুৱাহাতীগী কনভোকেসনশিংদসু অসিগুম্না য়াওজনবগী তাঞ্জা ফংজখি অমদি মফম খরদনা মায়-মায় ওনশিন্নদুনা চৎপগী তাঞ্জা ফংজখি।  মসিগী মফম খুদিংমক অসিদা ঐহাক্না মান্নবা উরিবা অসিদি করিগুম্বা মফম অমদা নত্রগা অমদা ইনোভেৎ তৌরি হায়বসিনি।  আত্মনির্ভর ভারত অভিয়ান অসি মায় পাকহন্নবগীদমক্তা মসি য়াম্না চাউরবা পাঙ্গল অমনি। কোবিদ-১৯না মালেম অসিদা ৱাফম অমা তম্বিরে। গ্লোবেলাইজেসন অসি মরুওই অদুবু মসিগা লোয়ন-লোয়ননা ইরোমদোম হিংজবা ঙম্বা অসিসু য়াম্না মরুওই।

মরূপশিং,

আত্মনির্ভর ভারত অভিয়ান অসি ঙসি লৈবাক অসিগী নহা ওইরিবশিংদা, তেক্নোক্রেৎশিং, তেক-ইন্তর্প্রাইজগী লুচিংবশিংদা অনৌবা খুদোংচাবা কয়া অমা পীননবগীসু মরুওইবা অভিয়ান্নি। মখোয়দা লৈরিবা ৱাখল্লোনশিং, ইনোভেসনশিং অদু মখোয়না অপনবা য়াওদনা চৎনহনবা ঙম্নবা, স্কেল তৌবা ঙম্নবা, মার্কেৎ তৌবা ঙম্নবগীদমক্তা ঙসি খ্বাইদগী চুনরবা এনভাইরোন্মেন্ত ওইরে। ঙসি ভারত অসিনা মসিগী নহা ওইরিবশিংসিনা মাগী ইনোভেসন্দগী ইরৈচা করোর কয়াগী পুন্সিদা অওনবা পুরকপা ঙম্নবা মাগী নহা ওইরিবশিংদা ইজ ওফ দুইং বিজিনেস পীনবগীদমক্তা মপুং ফানা অচেৎপা ৱাফম থম্লি। লৈবাক অসিনা অদোমদা ইজ ওফ দুইং বিজিনেস ফংহল্লগনি, শুপ্নতগী অদোম্না থবক অমা তৌবিয়ু, অদোমগী খ্বাইদগী হেন্না তৌবা ঙম্বনা, অদোমগী খংজ-হৈজবনা, অদোমগী ইনোভেসন্না লৈবাক অসিনা অদোমদা ইজ ওফ দুইং বিজিনেস পীরবদি, সরকারগী সিস্তেমশিং পীরবদি অদোম্না লৈবাক অসিগী লাইরবদগী লাইরবা নাগরিকশিংদা ইজ ওফ লিভিং পীনবগীদমক্তা অনৌ-অনৌবা ইনোভেসন পুদুনা লাকপিয়ু, অনৌ-অনৌবা পোৎ পুদুনা লাকপিয়ু।

হন্দক্তা চাউরাক্না সেক্তর খুদিংমক্তা অচৌবা অওনবা অমা পুরকখ্রিবা অসিগী মরুমদসু মসিগী ৱাখল্লোন অসিমক্নি। অহানবা ওইনা এগ্রীকলচর সেক্তরদা ইনোভেসন অমদি অনৌবা স্তার্ত-অপশিং অসিগী ওইনা মশিং থিঙমদবা তৌবা য়াবা কয়া লৈহল্লে। অহানবা ওইনা স্পেস সেক্তরদা প্রাইভেৎ ইনভেস্তমেন্তকী লম্বি হাংদোক্লে। নুমিৎ নিনিগী মমাংদা বি.পি.ও. সেক্তরগী ইজ ওফ দুইং বিজিনেসকীদমক্তসু অচৌবা অওনবা অমা পুরকখ্রে। সরকারনা অদর সর্ভিশ প্রোভাইদর-ও.এস.পি. গাইদলাইনশিং অসি পুম্লাই লাইথোকহনখ্রে, অয়াম্বনা অথিংবা খুদিংমক লৌথোকখ্রে। মওং অমা ওইনা হৌজিক সরকার লৈ হায়বা ফাওররোই। মীপুম খুদিংদা থাজখ্রে। মসিনা বি.পি.ও. ইন্দস্ত্রীশিংগী ওইনা কম্প্লাইএন্সকী ওইনা লৈরম্বা পোৎলুম অদু, অপুনবা কয়া লৈরম্বা অদু খর অমদি হন্থরগনি। মসিদা নত্তনা বেঙ্ক গরেন্তী য়াওনা অতোপ্পা মথৌ তাবশিংসু বি.পি.ও.ইন্দস্ত্রীদা লৈহন্দ্রে।  মসিদা নত্তনা তেক ইন্দস্ত্রীদা ৱর্ক ফ্রোম হোম নত্রগা ৱর্ক ফ্রোম এনিহ্বেয়রগুম্বা খুদোংচাবশিংদা ৱায়েল পথাপ্না অথিংবা পীরম্বা থবক-থৌরাংশিংসু লৈহনখিদ্রে। মসিনা লৈবাক অসিগী আই.তি. সেক্তর অসি গ্লোবেল্লি অমদি কম্পিতিতিব ওইহল্লগনি অমদি অদোমগুম্লবা নহা ওইরিবা হৈথোই-শিংথোইবশিংদা হেন্না তাঞ্জা ফংহল্লগনি।

মরূপশিং,

ঙসি লৈবাক অসিনা অদোমগী মথৌ তাবশিং খুদিংমক খংলদুনা তুংদা মথৌ তারক্কদবশিং অসি খংলদুনা ৱারেপ মথং-মথং লৌরি, অরিবা চৎন-কাংলোনশিং হোংদোক্লি অমদি ঐহাক্না খঞ্জবা অমদি হৌখিবা চহি চাগী চৎন-কাংলোনশিংদগী মথংগী চহি চাগী চৎন-কাংলোনশিং অসিনা তুংলমচৎ অসি লেপ্পা ঙম্লোই হায়বসিনি। অনৌবা চহি চা অনৌবা ৱাশক। অনৌবাচহি চা, অনৌবা চৎনবী। অনৌবা চহি চা, অনৌবা ৱায়েল-পথাপ। ঙসিদি ভারত অসি কোর্পোরেৎ তেক্স খ্বাইদগী হন্থবা লৈবাকশিংগী মনুংদা অমনি। স্তার্ত-অপ ইন্দিয়া অসি মসিগী অভিয়ানগী মতুংদগী ভারত্তা স্তার্ত-অপ লিশিং ৫০দগী হেন্না হৌখ্রে। সরকারগী হোৎনজমলশিং অসিগী মহৈনা হৌখিবা চহি মঙাসিদা লৈবাক অসিগী পেতেন্তকী মশিং অসি শরু ৪ ওইরে। ত্রেদমার্ক রেজিস্ত্রেসন্দা শরুক ৫ হেনগৎনা রেজিস্তর তৌখ্রে। মসিদসু ফিন্তেক্কা লোয়ন-লোয়ননা এগ্রো, দিফেন্স অমসুং মেদিকেল সেক্তরগা মরি লৈনবা স্তার্ত-অপশিং অসি হৌজিক থুনা হেনগৎলক্লি। হৌখিবা চহিশিংদা য়ুনিকোর্নস ইন্দিয়ন ২০দগী হেনবনা ভারত্তা শাখ্রে। মতৌ অসিগুম্না লৈবাক অসি চাউখৎপগী লম্বিরোমদা চংশিল্লি, ঐহাক্না থাজৈ মদুদি লাক্কদৌরিবা চহি অমা-অনিসিদা মসিগী মশিং অসি হেনগৎলগনি অমদি ঙসি লৈবাক অসিদগী থোরক্লিবা অদোমগুম্বা নহা ওইরিবশিংনা মসিদা অনৌবা ইনর্জী অমা হাপচিল্লকপা য়াই।

মরূপশিং,

ইনক্যুবেসন্দগী হৌরগা ফন্দিংফাওবা ঙসি স্তার্ত অপশিং অসিদা মখল কয়াগী তেংবাং পীরি। ফন্দিংগীদমক্তা লুপা করোর লিশিং ১০গী ফন্দ ওফ ফন্দশিং শেমখ্রে। চহি ৩গী ওইনা তেক্স একজেম্পসন, সেল্ফ-সর্তিফিকেসন, ইজি-একজিৎনচিংবা খুদোংচাবা কয়া অমা স্তার্ত অপশিংগীদমক্তা পীরি। ঙসি ঐখোয়া নেস্নেল ইনফ্রাস্ত্রকচর পাইপলাইনগী মখাদা লুপা করোর লাখ ১দগী হেন্না ইনভেস্ত তৌনবা থৌরাং তৌরি। মসিদগী লৈবাক শিন-থুংনা স্তেত-ওফ-দি-আর্তকী ইনফ্রাস্ত্রকচর অসি শেমদুনা হৌজিক্কী অমদি তুংগী মথৌ তাবশিং অসি ফংহল্লগনি।

মরূপশিং,

ঙসি লৈবাক অসিগী লম খুদিংমক্কী পাংথোকপা য়াবশিং অসি খ্বাইদগী য়াম্না ফংবা ঙম্নবগীদমক্তা অনৌবা থৌওংশিংদা থবক চত্থরি। অদোম্না মফমসিদগী চৎখিবা মতমদা, অনৌবা মফমদা থবক তৌবা তারবদি অদোম্নসু মসিগী লাইসোন অসি শোন্দুনা থবক তৌবিয়ু। মসিগী লাইশোন অসিদি-অফবা থবক্তা মাই ওনশিনবা; কৈদৌনুংদা য়াশিন্নথোক্কনু। শোইদনা স্কেবিলিতী লৈহল্লু; নহাক্না পাংথোক্লিবা অনৌবা মী.য়াম পাক-শন্না শিজিন্নবা ঙমহল্লু, শোইদনা থাজনিংঙাই ওইহল্লু; মার্কেত্তা অশাংবা মতমগী ওইনা থাজহল্লু। চুশিন্নবা মওংদা তৌবিয়ু; অহোংবা পুরকপদা মায়োক্ননবা শেম-শাদুনা লৈবিয়ু অমদি তম্বা ঙমদবা হায়বসি পুন্সিনি হায়না খন্না চৎলু। করিগুম্বা ঐখোয়না মসিগী লাইশোনশিং অসিনা থবক তৌরবদি মসিগী মঙাল অসিনা অদোমগী শক্তমগা লোয়ননা ব্রেন্দ ইন্দিয়াদসু শোইদনা মশক থোকহল্লক্কনি। ঐহাক্না অদোমদা মসি হায়রিবগী মরমদি ব্রেন্দ ইন্দিয়াগী ক্বাইদগী অচৌবা ব্রেন্দ এম্বাসেদরশিং অসি অদোম্না অদুম ওইরিবনি। অদোম্না তৌরিবা থবক অদুনা লৈবাক অসিগী প্রদক্তশিং অসি গ্লোবেল ওইনা মশক খংবিগদৌরিবনি। অদোম্না তৌরিবা থবক অদুনা লৈবাক অসিনা হোৎনরিবশিং অসিদা খোংজেল হেনগৎহনগদৌরিবনি। খুঙ্গংগী লাইরবগীদমক্তা লৈবাক অসিনা হোৎনরিবশিং অসিদসু অদোমগী কত্থোকপা, অদোমগী ইনোভেসন্দগী মপুং ফাহনগদৌরিবনি।

মরূপশিং,

তেক্নোলোজীনা মতৌ করম্না ঐখোয়গী লৈঙাক অসি লাইরবদগী লাইরবা ফাওবা য়ৌবা ঙমহন্নবা খ্বাইদগী মপাঙ্গল লৈবা পাম্বৈ ওইবা য়াই হায়বসি হৌখিবা চহিশিংদা লৈবাক অসিনা পাংথোক্তুনা খংহনখ্রবনি। ঙসি য়ুম ওইরো, মৈ ওইরো, অমাংশঙ ওইরো, গ্যাস কনেক্সন ওইরো নত্রগা হৌজিক ঈশিংগী ওইরো, অসিগুম্বা খুদোংচাবশিং অসি দেতা অমসুং স্পেস তেক্নোলোজীগী মতেংনা য়ৌবা ঙমহল্লি। ঙসি বর্থ সর্তিফিকেত্তগী হৌরগা পুন্সিগী খুদম ওইরিবা সর্তিফিকেৎফাওবগী খুদোংচাবা অসি দিজিতেল ওইনা ফংহনগদৌরে। জনধন-অধার-মোবাইলগী ত্রিনিতী জে.এ.এম., দিজি লোক্করশিংগুম্বা খুদোংচাবশিং অমসুং হৌজিক দিজিতেল হেল্থ আই.দি.গীদমক্তা হোৎনরিবা, মীয়াম-মীচমগী পুন্সি অসি লাইথোকহন্নবগীদমক্তা লৈবাক অসিনা মথং-মথং য়াংনা খোংথাং কয়া অমা পায়খৎলি। তেক্নোলোজীনা লাস্ত মাইল দেলিভরী অসি মপাঙ্গল লৈবা ওইহনখ্রে অমদি করপসনগী স্কোপ অসি হন্থহনখ্রে। দিজিতেল ত্রাঞ্জেক্সনশিংগী মতাংদসু ভারত অসি মালেম অসিগী লৈবাক কয়াদগী মমাং থানা লৈরি। ভারতনা শাবা য়ু.পি.আই.গুম্বা প্লেৎফোর্ম অসি হৌজিক মালেম অসি চাউখৎলবশিংনসু শিজিন্নবা পাম্মি।

মরূপশিং,

হন্দক্তা সরকারনা অনৌবা স্কীম অমা হৌদোকখ্রিবা অসিদা তেক্নোলোজীনা অচৌবা থৌদাং লৌরি। মসিগী স্কীম অসিদি-স্বামিত্ব য়োজনানি। মসিগী মখাদা অহানবা ওইনা ভারতকী খুঙ্গংশিংদা লম অমসুং লন-থুম, য়ুমগী লন-থুমগী মেপ্পিং তৌরি। হান্নদি মসিগী থবক অসি শুপ্নতগী হ্যুমেন ইন্তর্ফেসতগী থোংদগী পাংথোক্লম্বনি। মরম অসিনা অশোইবশিংগী, মীচং-মীখাই নাইবগী চিংনবা-চিংনদবশিং লৈবা অসি হৌনশা ওইরম্মি। অদোম্না নুংঙাইবা পাওবিগনি মরমদি অদোম অসি তেক্নোলোজীগী তাইবংগী মীওই হায়বদু ওইরদুনা ঙসি দ্রোনগী থোংদগী দ্রোন অসি শিজিন্নদুনা খুঙ্গং-খুঙ্গংদা মসিগী মেপ্পিং তৌরি অমদি খুঙ্গংগী মীশিংনসু মসিদা য়াম্না অপেনবা ফাওই, মখোয়গী শরুক য়াহন্দুনা মমাং থানা চংশিল্লি। মসিনা ভারতকী চম্লবদগী চম্লবা মীওইশিংনসু তেক্নোলোজীদা থাজবা কয়া থম্বগে হায়বসি তাকই।

মরূপশিং,

তেক্নোলোজীগী মথৌ তাবা অমদি মসিদা ভারত্তা লৈরিবা মীশিংনা থাজবা অসি অদোমগী তুংলমচৎকী লম্বি তাক্লিবনি। লৈবাক অসিদা সোলুসন অসি অদোম্না পীবা ঙম্বা অদোমগী ওইনা তৌবা য়াবা থবক কয়া অমা, শিংনবা কয়া অমা লৈরে। ঈশিং-ঈচাউ অমসুং নোংলৈ-নুংশিৎকী মতমদা পোস্ত দিজাস্তর মেনেজমেন্ত ওইরো, গ্রাউন্দ ৱাতর লেভেল অসি অদুম্মক লেংদনা লৈহন্নবগীদমক্তা অফবা তেক্নোলোজী ওইরো, সোলর পাৱর জেনরেসন অমসুং বেতরীগা মরি লৈনবা তেক্নোলোজী ওইরো, তেলিমেদিসিন অমসুং রিমোৎ সর্জরীগী তেক্নোলোজী ওইরো, বিগ দেতা এনালাইসিস ওইরো অসিগুম্বা লমশিং অসিদা থবক কয়া অমা পাংথোকপা য়াই।

মরূপশিং,

ঐহাক্না মথং-মথং ওইনা লৈবাক অসিগী মথৌ তাবশিং অসি অদোমগী মাংদা পুথোকপা ঙম্মি। মসিগী মথৌ তাবশিং অসি অনৌবা ইনোভেসনশিংদগী মপুং ফাবা ঙমহনগনি, অদোমগী অনৌবা ৱাখল্লোনশিং অদুমক্তদগী, অদোমগী পাঙ্গল-থৌনা, অদোমগী হোৎনজবশিংনা মপুং ফাহনবা ঙমগনি। মরম অসিনা ঐহাক্না অদোম পুম্নমক্তা মরুওইনা হায়জগদবা অসি ঙসি অদোম্না লৈবাক অসিগী মথৌ তাবশিং অসি মশক খংবিয়ু। অশেংবা থবক্তা ওইনা অহোংবা লাক্লিবশিং, আত্মনির্ভর ভারতকা মরি লৈনবা মীওইবা ওইবগী অনিংবা-অপাম্বশিংগা মরি লৈননা থবক তৌবিয়ু, ঐহাক্না অদোমদা পাওকৎচরি। অদুগা মসিদা অদোম ময়ামগী এলম্নি নেতৱর্ক অসিসু য়াম্না কান্নরক্কনি।

মরূপশিং,

অদোম খুদিমক্কীদমক্তা এলম্নি মীৎশিং পাংথোকপা অসি য়াম্না লাই। অতোপ্পা কোলেজশিংগী মহৈরোয়শিংনা মখোয়গী এলম্নি মীৎকীদমক্তা তত্তনা অশাংবা খোংচৎ অমা চৎপা তারি, কোলেজফাওবা চৎপা তারি। অদুবু অদোমগী ওইনদি অচৌবা অরাইবা ওপ্সন অমা লৈরি। অদোম্না অদোমগী এলম্নি অসি চয়োল লোইশিল্লকপদা অতেনবা নোতিশতা বে এরিয়াদসু পাংথোকপা য়াই, সিলিকোন তম্পাক্তসু পাংথোকপা য়াই, ৱাল স্ত্রীত্তসু পাংথোকপা য়াই, নত্রগা করিগুম্বা সরকারগী সেক্রতরিএত্তসু অদোমগী এলম্নি মীর অদু পাংথোকপা য়াই মরমদি মফম খুদিংদা অদোম লৈরি। মশিং য়াম্না অদোম লৈরি। ভারতকী স্তার্ত-অপ কেপিতেলশিং অসি মুম্বাই ওইরো, পুনে ওইরো নত্রগা বেঙ্গলুরু ওইরো অদোম্না হায়রিবা মফমশিংদসু আই.আই.তি.দগী মহৈ তম্লগা থোককিবা মীশিংগী অকনবা নেতৱর্ক ফংগনি। মসিনি অদোমগী মায় পাকপা, মসিনি অদোমগী ইথীল।

মরূপশিং,

অদোম পুম্নমক থোইদোক-হেন্দোক্না হৈ শিংলবা মহৈরোয় ঙাক্তনি। অদোম্না য়ামদ্রবদা চহি ১৭-৮ শুরকপা মতমদা খ্বাইদগী অরুবা চাংয়েংশিংগী মনুং চল্লিবা আই.আই.তি. অসিদা মায় পাকখি। ! অদুদগী অদোম আই.আই.তি.দা চংলকখি। তৌইগুম্বশুং অদোম্না তৌবা ঙম্বগী পাঙ্গল অদু হেনগৎহনগদবা পোৎশক অনি লৈ। অমনা ফ্লেক্সিবিলিতীনি অদুগা অতোপ্পা অদুনা হ্যুমিলিতীনি। ফ্লেক্সিবিলিতীদা ঐহাক্না হায়জগদবা অসি ওইথোকপা য়াবা: মীয়াম মরক্তা তোপ-তোপ্পা মওংদা লৈবা ঙম্বা অমদি ময়ামগী মরক্তা চন্নবা অসিনি। নশাগী শক্তম অদু কৈদৌনুংদা পুন্সিগী তাঙ্কক অমদা চাং শুংতা তাহল্লোইদবনি। কনাগুম্বা নত্রগা করিগুম্বা অমগী ‘লাইত ভর্জন’ অমা ওইনা লৈরোইদবনি। নশাগী অশেংবা ‘ভর্জন’ লৈহনগদবনি।স অদোম্না থাজরিবা ভেল্যু অদুদা চেম্পিয়ন ওইগদবনি। অদুগা লোয়ন-লোয়ননা তীম অমগী মনুং চন্নবা হোৎনবদা মীপাইরোইদবনি। মীওই অমম্না হোৎনবা ঙম্বগী পনখৈশিং লৈ। মমাং চংশিনগদৌরিবা লম্বি অদু তীমৱর্কতা লৈরিবনি। তীমৱর্ক্না মপুং ফাহনবা ঙমগদৌরিবনি। অনিশুবা অসিনা হ্যুমিলিতীনি। অদোম্না মায় পাকখিবা, অদোম্না মায় পাক্না পাংথোককিবশিং অদুগীদমক্তা চপ চানা চাউথোকচগদবনি। নখোয়না তৌবা ঙম্লিবা অদুগুম্না মীপুম খুদিংমক্না তৌবা ঙম্বা নত্তে। মসিনা নশানা অমুক হেন্না চমথোক্না হিংবা ঙম্নবগী মচাক ওইহনগদৌরিবনি।

মরূপশিং,

য়াম্না মরুওইরিবা অমনা ঐকোয় ইশানা ইসাবু মতম লৈবা খিবিক্তা খুত্তুম শিংদুনা লৈগদবনি অমদি নুমিৎ খুদিংগী করিগুম্বা অমা খংজিন্নবা অমদি হৈজিন্নবা হোৎনবা লেপ্লোইদবনি। নশানা নশাবু পুন্সি চুপ্পা মহৈরোয় অমনি হায়না খঞ্জবা অসি য়াম্না মরুওই। কৈদৌনুংদা নহাক্না খংলিবা অদুনা লোইরে হায়না খল্লোইদবনি।

ঐখয়গী শাস্ত্রশিংদা হায়রম্মি- সত্য গ্যান অনন্ত ব্রহ্ম

হায়বদি ৱাখল-লৌশিং অমদি অচুম্বা অসি ব্রহ্মাগী মতৌগুম্না লৌইবা নাইদে, ইনফাইনাইত ওই। অদোম্না অনৌ-অনৌবা ইনোভেসন তৌরিবা অসি অচুম্বগী, ৱাখল-লৌশিং অসি হেন্না পাকথোক-চাউথোকহনবনি। মরম অসিনা ইনোভেসন অসিদা লৈবাক অসিগীদমক্তা, ইরৈচাশিংগীদমক্তা, খুঙ্গং-লাইরবগীদমক্তা, আত্মনির্ভর ভারতকীদমক্তা তৌবা য়াবা কায়া অনা লৈহল্লকই।

অদোমগী ৱাখল-লৌশিং, অদোমগী হৈথোই-শিংথোইবা, অদোমগী মতিক-ময়াই অদুনা লৈবাক অসিদা কান্নহল্লক্কনি হায়বগী থাজবা অসিগা লোয়ননা অদোম পুম্নক্তা য়াইফ-পাউজেল পীজরি, অদোমগী ইমা-ইপাশিংগী অনিংবা-অপাম্বশিংগী চান্ননা অদোমগী পুন্সি খোংচৎ হৌবা ওইরো, অদোমগী ওজাশিংনা অদোমদা তম্বিবা মহৈশিংনা অদোমগী পুন্সি অদু মায় পাকপা পুন্সি ওইনবা মফম খুদিংদা কান্নবা ওইহন্নবা অমদি ভারত সরকারগী মতাংদা হায়রগদি ভারত অসি চাউথোকচবগা লোয়ননা মাগী দেমোগ্রাফীগীদমক্তা চাউথোকচৈ অমদি ঐখোয়গী দেমোগ্রাফী অসি আই.আই.তি.শিংগী মীওইশিংগীনা থল্লবদি মালেম অসিদসু ভেল্যু এদিশন তৌই। মসিগী মতিক-ময়াইশিং অসিগা লোয়ননা ঙসি পুন্সি খোংচৎ অমা হৌগদৌরিবা অসিদা ঐহাক্কী ইপমদগী অদোমগী ইমুং-মনুং অমদি ওজাশিংগী মফমদা থাগৎচবগা লোয়ননা ঐহাক্কী ৱাফম অসি তেনশিঞ্জরগে।

য়াইফ-পাউজেল কয়া অমা পীজরি।

***