ଶନିବାର ଆଇସିସିଆର ଦ୍ୱାରା ବୟନ ପରମ୍ପରାକୁ ନେଇ ଆୟୋଜିତ ଅନ୍ତର୍ଜାତୀୟ ୱେବିନାରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଉଦବୋଧନ ଦେଇଛନ୍ତି ।

ବିଭିନ୍ନ ଦେଶର ଲୋକେ ଏହି ୱେବିନାରରେ ଭାଗ ନେଇଥିବା ଯୋଗୁଁ ଭାରତୀୟ ସାଂସ୍କୃତିକ ସମ୍ପର୍କ ପରିଷଦ ଓ ଉତ୍ତର ପ୍ରଦେଶ ଇନଷ୍ଟିଚ୍ୟୁଟ ଅଫ ଡିଜାଇନକୁ ପ୍ରଧାନମନ୍ତ୍ରୀ ଧନ୍ୟବାଦ ଜଣାଇଛନ୍ତି । ୱିଭିଂ ରିଲେସନ: ଟେକ୍ସଟାଇନ ଟ୍ରାଡିସନ ଥିମକୁ ନେଇ ଏହି ୱେବିନାର ଆୟୋଜିତ ହୋଇଥିଲା । ବୟନ କ୍ଷେତ୍ରର ଅବଲୋକନ କଲେ ଜଣେ ଭାରତର ଇତିହାସ, ବିବିଧତା ଓ ପ୍ରଚୁର ସୁଯୋଗ ଥିବା ଦେଖିପାରିବେ ।

ପ୍ରଧାନମନ୍ତ୍ରୀ ଭାରତର ବୟନ ପରମ୍ପରାର ଇତିହାସ ସମ୍ପର୍କରେ କହିଥିଲେ । ପ୍ରାକୃତିକ ଭାବେ ରଙ୍ଗୀନ କପା ଓ ରେଶମ ଭାରତର ସୁଦୀର୍ଘ ଗୌରବଶାଳୀ ଇତିହାସର ଅଂଶବିଶେଷ । ବସ୍ତ୍ର ଉଦ୍ୟୋଗର ବିବିଧତା ଆମ ସଂସ୍କୃତିର ମହନୀୟତାକୁ ଦର୍ଶାଏ । ପ୍ରତି ଗାଁ, ପ୍ରତି ରାଜ୍ୟ ଓ ପ୍ରତି ଗୋଷ୍ଠୀର ଭିନ୍ନ ଭିନ୍ନ ବୟନ ପରମ୍ପରା ଏହାର ନିଆରା ବିଶେଷତ୍ୱ ବୋଲି ପ୍ରଧାନମନ୍ତ୍ରୀ କହିଥିଲେ । ଆଦିବାସୀ ସମ୍ପ୍ରଦାୟଗୁଡିକ ମଧ୍ୟରେ ଥିବା ଉଚ୍ଚ ବସ୍ତ୍ର ପରମ୍ପରାକୁ ସେ ପ୍ରଶଂସା କରିଥିଲେ । ଭାରତର ବୟନ ପରମ୍ପରାରେ ରଙ୍ଗୀନ, ଉଜ୍ଜ୍ୱଳ ଓ ସୂକ୍ଷ୍ମ କାମ ହୋଇଥାଏ ।

ପ୍ରଧାନମନ୍ତ୍ରୀ କହିଛନ୍ତି ଯେ, ବୟନ କ୍ଷେତ୍ର ସବୁବେଳେ ଆମକୁ ସୁଯୋଗ ପ୍ରଦାନ କରିଛି । ସ୍ଥାନୀୟ ସ୍ତରରେ ବୟନ ଶିଳ୍ପ ଦେଶର ଅଗ୍ରଣୀ ନିଯୁକ୍ତିଦାତାଙ୍କ ମଧ୍ୟରେ ରହିଛି । ଭାରତୀୟ ବସ୍ତ୍ରକୁ ସାରା ବିଶ୍ୱରେ ବେଶ ପସନ୍ଦ କରାଯାଏ । ଭାରତୀୟ ବୟନ ବିଶ୍ଵସ୍ତରରେ ବହୁତ ମୁଲ୍ୟବାନ ଏବଂ ଏହା ବୟନ ପରମ୍ପରା, କଳାଚାତୁର୍ଯ୍ୟ, ମାନ ଓ କୌଶଳରେ ଅଧିକ ସମୃଦ୍ଧ ।

ଗାନ୍ଧୀଜୀଙ୍କ 150ତମ ଜୟନ୍ତୀ ପାଳନ ଅବସରରେ ଏହି କାର୍ଯ୍ୟକ୍ରମ ଆୟୋଜିତ ହୋଇଛି । ମହାତ୍ମା ଗାନ୍ଧୀ ବସ୍ତ୍ର ଉଦ୍ୟୋଗ ଓ ସାମାଜିକ ସଶକ୍ତିକରଣ ମଧ୍ୟରେ ଘନିଷ୍ଠ ସମ୍ପର୍କ ଦେଖିବା ପରେ ସାଧାରଣ ଚରଖାକୁ ଭାରତର ସ୍ୱାଧୀନତା ସଂଗ୍ରାମର ମହତ୍ୱପୂର୍ଣ୍ଣ ପ୍ରତୀକରେ ପରିଣତ କରିଥିଲେ । ଚରଖା ଆମକୁ ଗୋଟିଏ ରାଷ୍ଟ୍ର ଭାବେ ଯୋଡି ଥିଲା ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଆତ୍ମନିର୍ଭର ଭାରତ ଗଠନ ପାଇଁ ବୟନ କ୍ଷେତ୍ରର ପ୍ରମୁଖ ଭୂମିକା ରହିଛି । ସରକାର ଦକ୍ଷତା ବିକାଶ, ବିତୀୟ ସହାୟତା ଓ ଆଧୁନିକ ପ୍ରଯୁକ୍ତିର ବ୍ୟବହାର ଉପରେ ଧ୍ୟାନ କେନ୍ଦ୍ରୀଭୂତ କରିଛନ୍ତି । ଆମ କାରିଗରଙ୍କୁ ବିଶ୍ୱ ସ୍ତରୀୟ ଉତ୍ପାଦ ପ୍ରସ୍ତୁତ କରିବାକୁ ହେଲେ ଆମକୁ ବିଶ୍ୱରେ ବ୍ୟବହାର ହେଉଥିବା ଜ୍ଞାନକୌଶଳ ଓ ଉନ୍ନତ ପଦ୍ଧତି ସମ୍ପର୍କରେ ଜ୍ଞାନ ହାସଲ କରିବାକୁ ପଡିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ୱେବିନାରରେ ଭାବ ବିନିମୟ ଓ ସର୍ବଶ୍ରେଷ୍ଠ ପଦ୍ଧତି ସମ୍ପର୍କରେ ଆଲୋଚନା ମାଧ୍ୟମରେ ସହଭାଗିତାର ନୂତନ ସୁଯୋଗ ସୃଷ୍ଟି ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି । 

ସାରା ବିଶ୍ୱରେ ବୟନ କ୍ଷେତ୍ରରେ ଅଧିକ ମହିଳା ନିୟୋଜିତ ହୁଅନ୍ତି । ତେଣୁ ଭାଇବ୍ରେଣ୍ଟ ବୟନ କ୍ଷେତ୍ର ମହିଳା ସଶକ୍ତିକରଣକୁ ଦୃଢୀଭୂତ କରିବ । ଭବିଷ୍ୟତର ଆହ୍ୱାନର ସମ୍ମୁଖୀନ ହେବାକୁ ଆମକୁ ପ୍ରସ୍ତୁତ ରହିବାକୁ ହେବ । ଆମ ବୟନ କ୍ଷେତ୍ରରେ ବିବିଧତା, ଉପଯୋଜନ, ଆତ୍ମନିର୍ଭରତା, କୌଶଳ ଓ ନବାଚାରର ପ୍ରଭାବଶାଳୀ ବିଚାରଧାରା ଓ ସିଦ୍ଧାନ୍ତ ପ୍ରଦର୍ଶିତ ହୋଇଛି । ଏହି ସିଦ୍ଧାନ୍ତ ଏବେ ସମୟ ସହିତ ଅଧିକ ଗ୍ରହଣୀୟ ହୋଇଛି । ୱେବିନାରର ବିଚାରଗୁଡିକୁ ବୟନ କ୍ଷେତ୍ରକୁ ଅଧିକ ମଜବୁତ ଓ ସମୃଦ୍ଧ ବୟନ କ୍ଷେତ୍ର ପାଇଁ ବ୍ୟାପକ ଭାଗୀଦାର ହୋଇପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

**********