ঙসি আই.সি.সি.আর.না শীনবা তেক্সতাইলগী চৎনবীশিংগী ইন্তরনেস্নেল ৱেবিনারদা প্রধান মন্ত্রী শ্রী নরেন্দ্র মোদী ৱা ঙাংখ্রে।

“ফিশাবগী মরীশিং:ফিগী চৎনবীশিং” হায়বা হিরমদা পাংথোকপা ৱেবিনার অসিদা মালেমগী তোঙান-তোঙানবা লৈবাকশিংদগী মীওইশিং শরুক য়ানবা মখোয়না পাংথোকখিবা থবকশিং অদুগীদমক ইন্দিয়ান কাউন্সিল ফোর কলচরেল রিলেসন্স অমসুং উত্তর প্রদেস ইন্সতিতুৎ ওফ দিজাইন থাগৎলদুনা থৌরম অদুদা ৱা ঙাংবদা প্রধান মন্ত্রীনা হায়খি তেক্সতাইলগী থবকশিংদা কনাগুম্বা অমনা ঐখোয়গী পুৱারি, খেন্নবশিং অমসুং খুদোংচাবশিং উবা ফংগনি।

প্রধান মন্ত্রীনা ভারতকী মমাংঙৈগী তেক্সতাইলগী চৎনবীশিংগী মতাংদা পনখি। মহাক্না হায়খি মশাগী ওইনা মচু শংলবা লশিং অমসুং সিল্ক অসি ভারত্তা মতম শাংনা মমিং চৎলবা পুৱারি অমা লৈখি। ঐখোয়গী ফিশিংগী খেন্নবা অসিনা ঐখোয়গী ইনাকখুল্লবা কলচর উৎলি। কাংলুপ খুদিংমক্কী, খুঙ্গং খুদিংগী অমসুং রাজ্য খুদিংগী অখন্নবা ফিরোলগী চৎনবীশিং লৈজৈ। ঐখোয়গী ত্রাইবেল কাংলুপশিংগী ইনাকখুল্লবা ফিগী চৎনবীশিং লৈরি। ভারতকী ফিগী চৎনবীশিংদা মচু, ফজবা অমসুং খুৎচঙনা শাবা উবা ফংলি।

প্রধান মন্ত্রীনা হায়খি ফিশাবগী থবক অসিনা মতম পুম্নমক্তা খুদোংচাবা কয়া পীরি। ভারত্তা তেক্সতাইল সেক্তর অসি থবক য়াম্না ফংহনবশিংগী মরক্তা য়াওরি। মালেমগী লৈবাকশিংগা ললোন-ইতিক পাংথোকপা অমসুং কলচরগী মরীশিং শেমগৎপদা তেক্সতাইলনা মালেমগী ওইনা মতেং পাংলি। ভারতকী ফিরোলশিং মালেমদা মগুন য়াম্না লৈরি অমসুং মসিনা অতোপ্পা লৈবাকশিংগী চৎনবীশিং, ক্রাফশিং, পোৎথোকশিং অমসুং তেক্নিকশিংদা থৌনা পীরি।

প্রধান মন্ত্রীনা হায়খি গান্ধীজিগী ১৫১সুবা মপোক কুমওনগা মরী লৈন্না থৌরম অসি পাংথোকপনি। ফি শাবগী থবক অমসুং খুন্নাইগী ফিবম ফগৎহনবা অনিগী মরক্তা লৈনরিবা অচেৎপা মরী অদু মহাত্মা গান্ধীনা উখি অমসুং ভারতকী নিংতম্বগী ইহৌদা অচম্বা তরেং অসি মরুওইবা খুদম অমা ওইহনখি। চক্রনা ঐখোয় লৈবাক অমদা অমতা ওইনা পুনশিনখি।  

প্রধান মন্ত্রীনা হায়খি অত্মানির্ভর ভারত নৎত্রগা মশাগী ওক্নবা পুথোকপা ভারত অমা শেমগৎনবা তেক্সতাইল সেক্তরনা মরুওইবা সেক্তর অমা ওইনা মতেং পাংগনি। হিরম অসিদা হৈশিংবা হেনগৎহনবা, শেন-থুমগী মতেং পাংনবা অমসুং খ্বাইদগী নৌবা তেক্নোলোজিশিং ফংহন্নবা সরকারনা মরুওইবা মিৎয়েং থম্লি। ঐখোয়গী ফিশাবা মীওইশিংনা মালেম থাক্কী পোৎথোকশিং পুথোক্নবদা মতেং পাংনবা, মালেমগী খ্বাইদগী অফবা থবকশিং তম্বা ঐখোয়না পাম্মি। ৱেবিনার অসিদা ৱাখল্লোলশিং পীথোক-পীশিন তৌনবা অমসুং খ্বাইদগী ফবা থবকশিং শরুক য়ামিন্নবা অসিনা মতেং পাংনবগী অনৌবা মফমশিং শেম্লগনি।

প্রধান মন্ত্রীনা হায়খি মালেম শীনবা থুংনা তেক্সতাইল সেক্তরনা নুপী কয়া থবক ফংহল্লে। অসুম্না, তেক্সতাইলগী থবকশিং ফগৎহনবনা নুপীশিং শক্তি পীবদা মতেং পাংগনি। অৱাবা তারকপা মতমশিংদা মায়োক্ননবা ঐখোয়গী লাক্কদবা মতমশিংগীদমক থৌরাং তৌবা ঐখোয় দরকার ওই। ঐখোয়গী ফিগী চৎনবীশিং অসিদা ফজরবা ৱাখল্লোলশিং, খেন্নবশিং, চুশিন্নবা ঙম্বা, মশাগী ওক্নবা পুথোকপা, লৌশিং অমসুং অনৌবা কয়া উবা ফংলে। হায়রিবা ৱাখল্লোলশিং অসি হৌজিক ফাওবা চুনরি। ৱেবিনার অসিনা হায়রিবা ৱাখল্লোলশিং অসি মখা তানা ফগৎহনবদা মতেং পাংগনি অমসুং অফবা তেক্সতাইল সেক্তর অমা শেমগৎপদা মতেং ওইগনি।

***