दिल्ली-मुंबई, 31 ऑगस्ट 2020

(कोविड-19 संबंधी पत्र सूचना कार्यालयाद्वारे जारी बातम्‍या आणि सत्‍यता पडताळणी बातम्‍या समाविष्‍ट)

आपल्या शेतकरी बांधवांनी कोरोनाच्या या कठिण परिस्थितीमध्येही आपली क्षमता सिद्ध केली आहे. आपल्या देशात यंदा खरीपाच्या पेरण्यांमध्ये गेल्या वर्षीच्या तुलनेत सात टक्के वाढ झाली आहे. धान रोपणीमध्ये सुमारे 10 टक्के, डाळींच्या क्षेत्रात सुमारे 5 टक्के आणि इतर अन्नधान्याच्या पेरणीत जवळपास 3 टक्के, तेलबियांच्या क्षेत्रात 13 टक्के, कापूस लागवडीच्या क्षेत्रात सुमारे 3 जास्त वाढ झाली आहे. यासाठी मी सर्व शेतकरी बांधवांचे अभिनंदन करतो. पंतप्रधान नरेंद्र मोदी यांचे काल ‘मन की बात’ कार्यक्रमात प्रतिपादन.

‘मन की बात’ मध्ये पंतप्रधानांनी सप्टेबर महिना पोषण माह- पोषक आहाराचा महिना म्हणून पाळणार असल्याचे जाहीर केले. पोषण आणि राष्ट्र यांचा परस्परांशी अतिशय घनिष्ठ संबंध असल्याचे त्यांनी सांगितले. “यथा अन्नम तथा मनम” या वाक्प्रचाराची म्हणजे आपल्या मानसिक आणि बौद्धिक विकासाचा संबंध आपण जे अन्न ग्रहण करतो त्याच्याशी असतो याची त्यांनी आठवण करून दिली.

आरोग्य मंत्रालयाची कोविड-19 घडामोडींवरील माहिती :

• भारताने कोविड-19 चाचण्यात वाढ करण्याच्या ठाम निर्धाराचे दर्शन घडवल्याने या चाचण्यात वेगाने वाढ होत आहे. देशात कोविड-19 तपासणीचे काम सर्व प्रथम 20 जानेवारी 2020 ला पुण्यातल्या प्रयोगशाळेपासून सुरू झाले होते, ऑगस्ट महिन्यापर्यंत दररोज 10 लाखाहून अधिक चाचण्या करण्याची क्षमता आता झाली आहे. आतापर्यंत झालेल्या एकूण चाचण्यांची संख्या आज 4.23 कोटीहून अधिक झाली आहे. गेल्या चोवीस तासात 8,46,278 चाचण्या करण्यात आल्या. गेल्या चोवीस तासात (रविवार, 30 ऑगस्ट 2020 ) भारतात 78,512 रुग्णांची नोंद झाली. म्हणजेच गेल्या 24 तासात सुमारे 80,000 रुग्णांची नोंद झाल्याच्या काही माध्यमांनी दिलेल्या वृत्तामध्ये तथ्य नाही. गेल्या 24 तासातल्या या नव्या रुग्णापैकी 70% रुग्ण सात राज्यातले आहेत. यापैकी महाराष्ट्रात सर्वात जास्त म्हणजे सुमारे 21% रुग्ण आहेत, त्याखालोखाल आंध्रप्रदेश(13.5%),कर्नाटक (11.27%) आणि तामिळनाडू 8.27% आहे. तर उत्तर प्रदेश 8.27%,पश्चिम बंगाल 3.85% आणि ओदिशात 3.84% आहेत.
• केंद्रीय आरोग्य आणि कुटुंबकल्याण मंत्रालयाने उत्तर प्रदेश, झारखंड, छत्तीसगड आणि ओदिशा या चार राज्यांमध्ये उच्च स्तरीय केंद्रीय पथकं पाठवण्याचा निर्णय घेतला आहे. या राज्यांमध्ये कोविड रुग्णांच्या संख्येत अचानक वाढ झाली आहे आणि यापैकी काही राज्यांमध्ये उच्च मृत्यूदराची नोंद आहे. केंद्रीय पथकं प्रतिबंध, निगराणी, चाचण्या आणि पॉझिटीव्ह रुग्णांचे प्रभावी रुग्णालय व्यवस्थापन याकामी मदत करतील. तसेच राज्यांना वेळेत निदानासाठीचे प्रभावी व्यवस्थापन आणि आव्हाने यात मार्गदर्शन करतील.
• केंद्रीय आरोग्य आणि कुटुंब कल्याण मंत्री डॉ. हर्षवर्धन यांनी कर्नाटकचे मुख्यमंत्री बी. एस. येडीयुरप्पा यांच्यासमवेत बल्लारी येथील विजयनगर वैद्यकीय विज्ञान संस्थेमधील सुपर स्पेशलिटी ट्रॉमा केंद्राचे (एसएसटीएस) आज आभासी पद्धतीने लोकार्पण केले. त्यानंतर, आरोग्य आणि कुटुंब कल्याण राज्य मंत्री अश्विनीकुमार चौबे यांनी एक्स्प्रेस फीडर लाइन, आयसीयू कक्ष आणि 13 केएल लिक्विड मेडिकल ऑक्सिजन टँकचे आणि कर्नाटकचे वैद्यकीय शिक्षण मंत्री डॉ. के. सुधाकर यांनी अत्याधुनिक सीटी स्कॅनचे उद्‌घाटन केले.

इतर अपटेडस:

• खादी आणि ग्रामोद्योग आयोगाला (केव्हीआयसी) भारतीय रेडक्रॉस सोसायटीकडून (आयआरसीएस) 10.5 लाख उच्च दर्जाच्या फेस मास्कचा पुरवठा करण्याबाबत पुन्हा ऑर्डर मिळाली असून आतापर्यंतची ही सर्वात मोठी ऑर्डर आहे.
• कोविड-19 महामारीच्या उद्रेकामुळे बँकांवर कर्ज प्रकरणांचा आलेला मोठा ताण लक्षात घेवून या संदर्भात आराखडा करून त्याच्या अंमलबजावणीसाठी केंद्रीय वित्त आणि कॉर्पोरेट व्यवहार मंत्री निर्मला सीतारमण येत्या, गुरूवारी- दि. 3 सप्टेंबर,2020 रोजी देशातल्या शेड्यूल्ड कमर्शियल बँका आणि एनबीएफसीच्या वरिष्ठ व्यवस्थापनाबरोबर समीक्षा बैठक घेणार आहेत.
• केंद्रीय रस्ते वाहतूक, महामार्ग तसेच सूक्ष्म लघु व मध्यम उद्योग मंत्री नितिन गडकरी यांच्या हस्ते उत्तर प्रदेशातील 11 महामार्ग प्रकल्पांचे उद्‌घाटन व कोनशिला समारंभ उद्या होणार आहे.
• जैव वैद्यकीय आणि इतर अनुप्रयोगांना गंजण्यापासून आणि जीवाणूंच्या वाढीपासून वाचवू शकणारी अल्ट्राफास्ट लेसर-आधारित पृष्ठभाग स्वतः साफ करणारी पर्यावरण पूरक प्रक्रिया लवकरच अस्तित्वात येऊ शकते; वैज्ञानिकांनी कोणताही लेप किंवा पृष्ठभागावर कोणतीही अतिरिक्त प्रक्रिया न करता हे विकसित केले आहे.
• सध्या देशात सुरू असलेल्या कोविड-19च्या महामारीच्या काळात ज्येष्ठ नागरिकांची विशेष काळजी घेण्याचे आणि त्यांना आवश्यक ती मदत पुरवण्याचे आवाहन उपराष्ट्रपती एम वेंकैया नायडू यांनी केले आहे.
• गडचिरोली जिल्ह्यातील 777 कोटींच्या राष्ट्रीय महामार्गाच्या विकास कामांचा उद्‌घाटन आणि कोनशिला समारंभ व्हिडिओ कॉन्फरन्सिंगद्वारे संबोधित करताना श्री नितीन गडकरी म्हणाले की गेल्या सहा वर्षात रस्ते वाहतूक आणि महामार्ग मंत्रालयाद्वारा 541 किलोमीटर लांबीच्या 44 कामांना मंजुरी देण्यात आली यासाठी 1740 कोटी रुपयांचा खर्च झाला तसेच येत्या काळात गडचिरोली जिल्ह्यात 103 किलोमीटर लांबीच्या रस्त्यांची कामे प्रस्तावित असून त्यासाठी 402 कोटी रुपयांचा खर्च अपेक्षित आहे या सर्व कामांमुळे पंतप्रधानांनी आकांक्षी म्हणून घोषित केलेल्या गडचिरोली जिल्ह्यामध्ये पायाभूत सुविधांचा विकास करून या जिल्ह्याचा चेहरामोहरा येत्या दोन वर्षांत बदलला जाईल.

महाराष्ट्र अपडेटस:

राज्यात अंतिम सत्र/अंतिम वर्षाच्या परीक्षेचे वेळापत्रक तयार करण्यासंदर्भात विद्यापीठ अनुदान आयोगाने सांगितल्याप्रमाणे कुलगुरु आणि शिक्षण तज्ज्ञांची समिती नियुक्त करण्यात आली आहे. राज्याचे उच्च आणि तंत्रशिक्षणमंत्री उदय सामंत यांनी विद्यार्थी, शिक्षक, शिक्षकेतर कर्मचारी आणि इतर कर्मचाऱ्यांच्या आरोग्यविषयक बाबतीत सरकार कसलीही तडजोड करणार नाही असे सांगितले. 

M.Chopade/S.Thakur/P.Malandkar

सोशल मिडियावर आम्हाला फॉलो करा@PIBMumbai    /PIBMumbai    /pibmumbai  pibmumbai[at]gmail[dot]com