दिल्ली-मुंबई, 13 ऑगस्ट 2020

(कोविड-19 संबंधी पत्र सूचना कार्यालयाद्वारे जारी बातम्‍या आणि सत्‍यता पडताळणी बातम्‍या समाविष्‍ट)

पंतप्रधान नरेंद्र मोदी यांच्या हस्ते आज “पारदर्शक करप्रणाली – प्रामाणिकतेचा सन्मान” मंचाचे व्हिडीओ कॉन्फरन्सच्या माध्यमातून उद्‌घाटन करण्यात आले. याप्रसंगी बोलताना पंतप्रधान म्हणाले, देशातील संरचनात्मक सुधारणांच्या प्रक्रियेने आज नवी उंची गाठली आहे. पंतप्रधान म्हणाले, “पारदर्शक करप्रणाली – प्रामाणिकतेचा सन्मान, या मंचाचा आरंभ 21 व्या शतकाच्या करप्रणालीच्या आवश्यकता पूर्ण करण्याच्या उद्देशाने करण्यात आला आहे. त्यांनी याविषयी तपशीलवार माहिती देताना सांगितले की, या प्लॅटफॉर्मवर फेसलेस  मूल्यांकन, फेसलेस अपील आणि करदात्यांची सनद अशा मोठ्या सुधारणा करण्यात आल्या आहेत.

आरोग्य मंत्रालयाची कोविड-19घडामोडींवरील माहिती :

भारतात एका दिवसात सर्वाधिक 56,383 रुग्ण बरे होण्याच्या आणखी एका विक्रमाची नोंद झाली आहे. या आकड्यासह, कोविड-19 च्या बरे झालेल्या रुग्णांचा आकडा आज जवळपास 17 लाखावर (16,95,982) पोहोचला आहे.

केंद्र आणि राज्य / केंद्रशासित प्रदेश सरकारच्या एकत्रित, केंद्रित आणि सहयोगी प्रयत्नांसह लाखो आघाडीच्या कर्मचाऱ्यांच्या सहाय्यामुळे, केंद्र सरकारच्या सल्ल्यानुसार स्टँडर्ड ऑफ केअरच्या माध्यमातून गंभीर स्वरूपाच्या रुग्णांचे प्रभावी क्लिनिकल व्यवस्थापन, गृह अलगीकरण यासारख्या उपाययोजनांच्या माध्यमातून चाचणी करणे, पाठपुरावा करणे आणि प्रभावी उपचारांची यशस्वी अंमलबजावणी सुनिश्चित केली आहे. रुग्ण बरे होण्याच्या संख्येत सतत होणाऱ्या वृद्धीमुळे रुग्ण बरे होण्याच्या दराने 70 % चा टप्पा पार केला आहे, कोविड-19 रुग्णांचे मृत्यूचे प्रमाण कमी होऊन मृत्यू दर 1.96% वर आला आहे आणि यात सतत घसरण होत आहे.

रुग्ण बरे होण्याच्या विक्रमी नोंदीमुळे हे सुनिश्चित झाले आहे की देशातील कोविडच्या सक्रीय रुग्णांचे प्रमाण कमी झाले आहे आणि सध्या देशात एकूण रुग्णांपैकी 27.27 % सक्रीय  कोविड-रुग्ण आहेत. सक्रीय रुग्णांपेक्षा (6,53,622) बरे झालेल्या रुग्णांची संख्या 10 लाखांहून अधिक आहे.

इतर अपडेट्स:

• संपूर्ण देशभर कोविड-19 महामारीचा झालेला उद्रेक लक्षात घेवून त्याच्या नियंत्रणासाठी आणि व्यवस्थापनासाठी केंद्र सरकारच्या वतीने सर्वतोपरी उपाययोजना केल्या जात आहेत तसेच अथक परिश्रम घेण्यात येत आहेत. याचाच एक भाग म्हणजे केंद्र सरकारच्यावतीने सर्व राज्यांना आणि केंद्रशासित प्रदेशांना कोविडसाठी आवश्यक साधनांचा पुरवठा केला जात आहे. तसेच आरोग्यविषयक पायाभूत सुविधा मजबूत केल्या जात आहेत. केंद्र सरकारने दि. 11 मार्च, 2020 पासून सर्व राज्ये आणि केंद्रशासित प्रदेशांना 3.04 कोटी एन-95मास्कचा, 1.28 कोटी पीपीईसंचाचा पुरवठा केला आहे. तसेच देशभरामध्ये 10.83 कोटी एचसीक्यू गोळ्यांचे वितरण केले आहे. या व्यतिरिक्त 22,533 ‘मेक इन इंडिया‘ व्हँटिलेटर्स विविध राज्यांना आणि केंद्रशासित प्रदेशांमध्ये पोहोचवले असून त्यांची स्थापना करून कार्यान्वयन सुरू करण्यात येत  आहेत.
• रेल्वे कर्मचाऱ्यांना ऑनलाइन ई-पास बनविणे आणि तिकिटांच्या आरक्षणासाठी सीआरआयएसच्याव्दारे ‘एचआरएमएस’ म्हणजेच मनुष्यबळ विकास कार्यप्रणालीतून  विकसित केलेल्या ई-पास मोड्यूलचा रेल्वे मंडळाच्या अध्यक्षांच्या हस्ते आज व्हिडिओ कॉन्फरन्सिंगच्या माध्यमातून प्रारंभ करण्यात आला.  याप्रसंगी रेल्वे मंडळाचे सर्व सदस्य, आयआरसीटीसीचे अध्यक्ष, सहव्यवस्थापकीय संचालक, सीआरआयएसचे व्यवस्थापकीय संचालक, सर्व महा व्यवस्थापक, डीआरएम उपस्थित होते.
• खाजगी रेल्वे प्रकल्पांच्या आऱएफक्यूंसंदर्भात 12 ऑगस्ट 2020 रोजी दुसरी प्री- ऐप्लिकेशन परिषद आयोजित करण्यात आली. या प्रकल्पांमुळे प्रवाशांना दर्जेदार सुविधा, प्रवासाच्या वेळेतील बचत आणि अत्याधुनिक रेल्वे गाड्यांच्या समावेशाने मागणी-पुरवठा तफावतीमध्ये कपात होऊन प्रवासी रेल्वे परिचालनामध्ये एक मोठे परिवर्तन घडून येणार आहे. या प्रकल्पामुळे प्रवाशांना मिळणाऱ्या प्रवासाच्या सुविधांमध्ये वाढ होणार आहे. यामध्ये महत्त्वाची बाब म्हणजे रेल्वेकडून आधीपासून चालवल्या जाणाऱ्या रेल्वेगाड्यांव्यतिरिक्त या नव्या रेल्वेगाड्या चालवल्या जाणार आहेत. या नव्या रेल्वेगाड्यांमध्ये रोजगारनिर्मितीला चालना मिळण्याची अपेक्षा आहे.
• विज्ञान आणि तंत्रज्ञान धोरणाच्या निर्मितीसाठी भारतात पहिल्यांदाच अशा आवाजांची दखल घेतली जाणार आहे ज्यांनी यापूर्वी कधीच आपले म्हणणे मांडले नव्हते आणि त्यासाठी कम्युनिटी रेडिओचा वापर केला जाणार आहे. विज्ञान आणि तंत्रज्ञान विभागाने प्रधान वैज्ञानिक सल्लागार कार्यालयाच्या सहकार्याने विज्ञान तंत्रज्ञान आणि नवनिर्मिती धोरण 2020 च्या निर्मितीची प्रक्रिया सुरु केली आहे. धोरणाच्या रचनेमध्ये विकेंद्रीकरण करण्यावर भर देत या धोरणात आमूलाग्र बदल करून समावेशक प्रक्रियेचा अवलंब करण्यात येणार आहे.

महाराष्ट्र अपडेट्स :

महाराष्ट्रात बुधवारी 12,712 नवीन रुग्णांची नोंद झाली तर 13,804 रुग्ण बरे झाले. राज्यात 1.47 लाख सक्रिय रुग्ण आहेत. महाराष्ट्रात कोविडमुळे सर्वाधिक 18,650 मृत्यू झाले असले तरी 3.81 लाखांहून अधिक रुग्ण बरे झाले आहेत.  कोविड -19 रुग्णालय शुल्काबाबतच्या अधिसूचनेचा महाराष्ट्र सरकारने आढावा घ्यावा, असे आवाहन आयएमए अर्थात भारतीय वैद्यकीय संघटनेने केले आहे. महात्मा फुले जन आरोग्य योजनेत ऑक्सिजन बेड, व्हेंटीलेटर नसलेले अतिदक्षता विभाग आणि व्हेंटीलेटरसह अतिदक्षता विभाग यासाठी असलेले प्रतिदिन 4000 ते 9000 दरम्यानचे दर गंभीर कोविड रुग्णांच्या उपचारासाठी पुरेसे नाहीत, असे आयएमएच्या महाराष्ट्र युनिटचे म्हणणे आहे.

BG/ST/PM

सोशल मिडियावर आम्हाला फॉलो करा@PIBMumbai    /PIBMumbai    /pibmumbai  pibmumbai[at]gmail[dot]com