খুরুমজরি !!

ভারতমচা করোর কয়ানা থৌনা ফনা কোরোনা লাইচৎকী ময়োক্তনা থেংনরি।

ঙসি হাংদোক্লিবা অৱাংবা থাক্কী তেক্নোলোজিগী তেস্ত তৌনবগী খুদোংচাবশিং অসিদগী নোংচুপ বঙ্গাল, মহারাস্ত্র অমসুং উত্তর প্রদেশনা কোরোনাগী মায়োক্তা লান্থেংনরিবা অসিদা হেন্না পাঙ্গল হাপ্লগনি।

মরুপশিং,

দিল্লী- এন.সি.আর, মুম্বাই অমসুং কোলকাতা অসি শেন্মিৎলোনগী থবক-থৌরমগী অচৌবা মফমশিংনি। মফমশিং অসিদা লৈবাক অসিগী নহারোল লাক্ষ-লাক্ষনা মশাগী মশিল, মশাগী মঙলান মপুং ফাহন্নবগীদমক্তা লাক্নরি।  হৌজিক মফম অসিদা তেস্ত তৌনবা লৈরিবা খুদোংচাবশিং অসিনা মীওই লিশিং ১০গী চাংদা তৌবা ঙম্নবা হাপচিল্লক্লগনি।

হায়রিবা সহরশিং অসিদা তেস্তশিং য়াম্না য়াংনা পাংথোক্লগনি। অফবা অমনা হায়রিবা অৱাংবা থাক্কী লেবশিং অসি কোরোনা খক তেস্ত তৌনবা নত্তে। তুংদা হেপাতাইতিস বি. অমসুং সি. অমদি ঐচ.আই.ভি., দেঙ্গু য়াওনা অতোপ্পা লায়নাশিং তেস্ত তৌনবগীদমক্তা লেবশিং অসিদা খুদোংচাবা লৈহল্লগনি। অসিগুম্বা থৌরাংশিং পায়খৎপগীদমক ইন্দিয়ান কাউন্সিল ওফ মেদিকেল রিছর্স অমসুং অতোপ্পা ইন্সতিতুৎশিংগী মরুপশিং থাগৎচরি।

মরুপশিং,

সরকারনা মতম চানা ৱারেপশিং লৌবদগী, কোবিদনা মরম ওইদুনা মী শিবগী চাং য়েংনবদা অতোপ্পা লৈবাকশিংদগী ভারতনা হেন্না ফরি। ঙসিদি, অচৌবা লৈবাকশিংদগী ঐখোয়গী লৈবাক্না কোরোনাদগী মী শিবগী চাং হন্থরে। অনাবা ফগৎলকপগী চাংসু অতোপ্পা লৈবাকশিংদগী হেন্না ফিবম ফরি অমসুং নোংম-নোংমগী ওইনা ফগৎলক্লি। হৌজিক, ভাইরস অসিদগী অনাবা ফগৎলক্লবা অপুনবা মীশিং চাউরাক্না লাখ ১০ য়ৌরে।

মরুপশিং,

কোরোনাগী ময়োক্তা শোক্নরিবা অকনবা অমসুং মতম শাংবা লানফম অসিগীদমক কোরোনা খক্তগী ওইবা হকশেলগী মচাক-মথুমশিং য়াংনা শেমগৎপা অসি লৈবাক অসিদা মরুওইবনি। মরম অদুনা,  মসিগী লানফম অসি হৌরকপদা, সরকারনা লুপা করোর ১৫,০০০গী পেকেজ অমা লাউথোকখ্রে। আইসোলেসন সেন্তরশিং, কোবিদ স্পিসিএল হোস্পিতালশিং নৎত্রগা তেস্ত অমসুং খোঙ্গুল লিবগী নেতৱার্ক অমা ওইগেরা ভারতনা মসিগী তৌবা ঙম্বশিং য়াম্না য়াংনা পাকথোক-চাউথোক্লি। হৌজিক লৈবাক অসিদা কোবিদ লায়েংফম ১১,০০০ হেন্না লৈরে অমসুং আইসোলেসন বেদ লাখ ১১ হেন্না লৈরে।

মরুপশিং,

জনৱারীদা ঐখোয়গী তেস্ত তৌনবা সেন্তর অসি শুপ্নতংগী অমখক্তমক লৈরম্বা অদু হৌজিক্তি লৈবাক শীনবা থুংনা লেব ১৩০০রোম্না মথৌ পাংথোক্লি। ঙসি ভারত্তা নোংমদা তেস্ত লাক্ষ ৫দগী হেন্না তৌরি। লাক্কদৌরিবা চয়োলশিংদা নোংমদা তেস্ত লাক্ষ ১০ তৌনবা ঐখোয়না হোৎনরি।

মরুপশিং,

কোরোনা লায়চৎ মনুংদা মীওই খুদিংনা ভারতকী মীওই অমমম কন্ননবগী ৱাশক্কা লোয়ননা অচেৎপা ফিরেপ লৌখি। ৱাশক অসিনা ভারত অসি অঙকপা মওংগী মহৈ ফংহল্লি। মরুওইনা পি.পি.ই., মাস্ক অমসুং তেস্ত তৌনবা কিৎশিংগী ওইনা ভারতনা তৌরিবা থবক অসি অসি চাওনা মায় পাকপগী ৱারীনি।মতম অমদা ভারত্ত পি.পি.ই কিৎ অমা ফাওবা শারমদে। ঙসিদি ভারতনা মালেমদা পি.পি.ই কিৎশিং য়াম্না শাবা অনিসুবা লৈবাক ওইরে।

থা ৬খক্কী মমাংদা লৈবাক অসিদা পি.পি.ই. কিৎ অমফাওবা শারমদে। ঙসিদি নোংমদা শান্নবা মফম ১২০০দগী হেনবনা পি.পি.ই.কিৎ লাক্ষ ৫ হেন্না শারে। মতম অমদা ভারত অসি এন.-৯৫ মাস্ক অসি মপান্দগী পুশিল্লক্লম্মি। ঙসি ভারত্তা নোংমদা এন.-৯৫ মাস্ক লাক্ষ ৩দগী হেন্না শারে।

ভেন্তিলেতরশিংগীদমক ভারতনা অতোপ্পা লৈবাকশিংগী মখা পোনবা মতম অমা লৈরমখি। ঙসিদি ভারত্তা চহি অমদা ভেন্তিলেতর পুথোকপা ঙম্বগী থাক লাখ ৩ য়ৌরে অমসুং হায়রিবা মতম অসিদা মেদিকেল ওক্সিজেন সিলিন্দরশিং পুথোকপা ঙম্বসু শিংথানিঙাই ওইনা হেনগৎলে। হায়রিবা থবকশিং অসিনা থৱায় কনবা খক নত্তনা ভারত অসি মপান্দগী পোৎ-চৈশিং লৈরম্বদগী মপান্দা থাদোকপা লৈবাক অমা ওইরে।

মরুপশিং,

অতেনবা মতমগী মনুংদা য়াম্লবা মচাক-মথুমশিং শেমগৎনবা ঐখোয়গী মাঙদা তারিবা অচৌবা শিংনবা অদু অদোমসু খঙলমগনি। অতোপ্পা অচৌবা শিংনবা অমনা কোরোনা থেংননবা লৈবাক অসিদা মীওই কয়া শেমগৎপা অসিনি। তেল্লবা মতম অসিদা মমাংদা অমুক্তা থোকখিদ্রিবা মওংদা ঐখোয়গী পেরামেদিকশিং, অসা ৱার্করশিং, এ.এন.এমশিং, অঙ্গনৱাদি অমসুং অতোপ্পা হেল্থ ৱার্করশিং অমসুং সিবিল ৱার্করশিং ত্রেনিং পীখি।

ঙসিদি, ভারতনা কোরোনা থেংনবা উবদা মালেম অসি ঙকখ্রে অমসুং মালেম্না চিংনবা লৈরম্বশিং অসি অরানবা তাহনখ্রে অমসুং মসি ঐখোয়গী লান্মীশিংনা হোৎনবদগী ওইহনখিবনি।

মরুপশিং,

কোরোনাগী মায়োক্তা থেংনরিবা লান্থেংসিদা ঐখোয়না চেকশিন্না লৈনবগী মতাংদা ৱাখল তাহন্নবা অৱাৎপা অমত্তা লৈহন্দনা, সাইন্তিফিক ওইবা দেতা অসি চাওথোকহন্দুনা অমসুং রিসোর্সশিংসু হেনগৎলকপগী ফীভমদা লৈরে। হৌজিক ঐখোয়না জিলা, ব্লোক অমসুং খুঙ্গংশিংগী থাকশিংদা দরকার ওইবশিং অমসুং ফংহনবগী থবকশিং মপাঙ্গল কনখৎহল্লে।

অপুনবা ওইনা ঐখোয়না অনৌবা হকশেলগী মচাক-মথুমশিং শেমগৎপা খক নত্তনা খুঙ্গং খুদিংমক্তা লৈরিবা সরকার অমসুং লনাইগী দিসপেন্সরিশিং অমসুং ক্লিনিকশিং মপাঙ্গল কনখৎহনগদবনি। ঐখোয়গী খুঙ্গংশিংদা কোরোনা থেংনবা শোন্থদনবা ঐখোয়না মসি তঙাইফদনা পাংথোক্কদবনি। মসিগী মতাংদা হৌজিক ফাওবদা, খুঙ্গংশিং থবক ফজনা পাংথোক্লি।

মসিগা লোয়ননা , ঐখোয়গী কোরোনা লান্মীশিং অসি চোকথদনবা ঐখোয়না হোৎনগদবনি। অনৌবা অমসুং থবক্তগী পোথারবা হকশেলগী শীনফমগী মীওইশিং মখা তানা থবক তৌনবা ঐখোয়না হোৎনগদবনি।

মরুপশিং,

লাক্কদৌরিবা মতম অসিদা কুহ্মৈ কয়া অমা লাক্কদৌরে। ঐখোয়না কুহ্মৈ অসি লম য়ৌনা নিংথিনা পাংথোকহন্নবগী মরম ওইহনসি, ময়ামদা লায়চৎ অসি শন্দোরক্তনবগীদমক্তা চেকশিনসি। ঐখোয়না কুহ্মৈশিং অসিদা লায়রবা ইমুংশিংদা অৱাবা পীদনবা তৌগদবনি। প্রধান মন্ত্রী গরীব কলয়ান অন্ন য়োজনাগী কান্নবশিং লায়রবশিংদা মতম চানা য়ৌহনগদবনি।

মরুপশিং,

ঐখোয়গী লৈবাক অসিদা হৈথোই-শিংথোইরবা বৈজ্ঞানিকশিংনা কোরোনাগী তিকা পুথোক্নবগীদমক্তা য়াংনা থবক চত্থরি।  অদুবু করিগুম্বা ফহনবা হিদাক নত্রগা তিকা অসি শেম্বা ঙমদ্রিবফাওবা মাস্ক, গজ ২ লাপথোক্না লৈনবা, খুৎ তোইনা হাম্বা অসিনা ঐখোয়গী পাম্বৈনি। ঐখোয় ইশাবুসু কঞ্জগদবনি অমসুং য়ুমদা লৈরিবা নহা-অহল খুদিংমকসু কনগদবনি।

কোরোনাগী মায়োক্তা থেংনরিবা লান্থেং অসি ঐখোয় পুন্না লান্থেংনমিন্নদুনা মায় পাকপা ঙমগনি হায়না ঐহাক্না থাজৈ। অমুক্কা হন্না অৱাংবা থাক্কী তেক্নোলোজিশিং অসিগীদমক্তা হন্না-হন্না নুংঙাইবা ফোংদোকচরি।

অদোমবু থাগৎচরি !!

*****