হর-হর-মহাদেব

কাশীগী শেংলবা লৈবাক অসিদা লৈবিরিবা শেংলবা মীওই পুম্নমকপু খুরুমজরি। হৌজিক অসি য়েংন্নিং থাগী মতম্নি। অসিগুম্বা মতম অসিদা ইপাগী খুয়াখাদা মীওই খুদিংনা লাক্নিংই। অদুবু ইপাগী লমদমদা লৈরিবা মীওই খুদিংগী  হকথেংননা উন্নবগী তাঞ্জা ফংবা অসিদা ঙসি অসি ঐঙোন্দা খুরুম্বগী খুদোংচাবা ফংবগুম ফাওই। খ্বাইদগী ইহান হানবদা অদোম পুম্নকপু ইবুংঙা ভোলেনাথকী থানা লাকপদা য়াইফ পাওজেল পীজরি।

ঙসি কোরোনাগী লুরবা তানফম অসিদফাওবা কাশীদা থাজবনা থল্লিবা, লাংতক্নবনা থল্লিবা অসি  ভগৱান ভোলেনাথমক্কী থৌজালননি। হৌজিক ভগৱান বিশ্বনাথকী লাইফমদা চৎপা ঙম্নদবা অদুসু য়েন্নিংথাগী মতামদা চৎপা ঙমদবা অসিদা অদোমগী থম্মোইদা ফাওরিবা অদু ঐহাক্না খংই।  মানসকী লাইশং ওইরো, দুর্গা কুন্দ ওইরো, সঙ্কৎ মোচন্দা য়েন্নিংথাগী মেলা ওইরো পুম্নমক লোইনা য়ৈথোকখ্রে, পাংথোকপা ঙমদ্রে হায়বসিসু চুম্মি।

অদুগা মমাংদা অমুক্তা থোকখিদ্রিবা অমদি ঐগী কাশীদা, ঐখোয়গী কাশীনা অমুক্তা থেংনখিদ্রিবা অরুবা তানফম অসি চপ চানা অকনবা মওংদা লান্থেংনরি হায়বসিসু অচুম্বনি। ঙসিগী অসিগুম্বা থৌরম অসিসু মসিগী মসিগী তাঙ্কক অমনি। খুদিংথিবা অদু চাওনিংবমখৈ চাওজসনু কনানসু কাশীগী মীশিংগী ইচংথৌবা অসি মায়োক্নবা ঙম্বা কনাসু লৈরোই। মালেমগী খোংজেল য়াংখৎহল্লিবা সহর অসিগী মমাংদা কোরোনা অসি করিশু লৈবা পোৎ নত্তে হায়বসি অদোম্না উৎলে।   

কোরোনাগী..কাশীগী অথোইবা মতৌশিং অসি ঐঙোন্দা হৃখংহল্লকখি, মসিগী কোরোনা অসিগী মরম্না কীসীদা চা পোৎফমশিংসু হাংদুনা লৈরে অদুনা দিজিতেল পোৎফমশিং হৌদোকখি। তোঙান-তোঙানবা হৈ-শিংনা থবক পাংথোকপা মীওইশিংনা মসিগী পোৎফম অসি থৱায় হাপ্পিরে। মফম অসি বিস্মিল্লা খানজী, গিরিজা দেবীজী, হীরালাল য়াদবজীগুম্বা অথোইবা লান্থোকপা ঙম্বা মীওই কয়ানা থন্না লৈরিবা ঈশৈগী চৎনবি লৈরিবা মফম অসিবু ঙসি কাশীগী ইকাই খুম্নরবা কলাকারশিং, অনৌবা য়ুগকী কলাকারশিংনা ঈশৈগী চৎনবি অসি মখা তানা চত্থরি।  অসিগুম্বা থবক কয়া অসি হৌখিবা থা অহুম-মরী অসিদা কাশীদা লেপ্তনা চত্থরি।

হৌজিক্কী মতমসিদা য়ৌগীজীগা লেপ্তনা পাও ফাওখি, সরকারগী তোঙান-তোঙানবা মীওইশিংগা পাও ফাওনখি। কাশীদগী ফংখিবা পাও খুদিংমক্কীদা করি তৌগদগে, তৌরোইদগে হায়বগী মতাংদা লেপ্তনা ময়ামগা পাও ফাওনখি। অদুগা অদোম ময়ামগী মরক্তগী কয়া অমা, বনারসকী মীওই কয়া অমগা চাং নাইনা ফোন্দা পাও ফাওনখি, অৱা-নুংঙাই হংনখি, ই-পাওশিং লৌখি, ফীদবেকশু লৌখি।  অদুগা মখোয়শিং অদুগী মরক্তগী ঐগা ফোন্দা ৱারী শানখিবা মীওই খরা  মফম অসিদা ফম্বিরমগনি হায়বা থাজৈ।

লায়চৎ অসিবু থিংনবগীদমক্তা কনানা করম্বা থৌরাং লৌখৎলিবগে, হোসপিতালগী ফীভম্না করিনো, মফমসিদা করি-করি তৌরাং তৌরিবগে, ক্বারেন্তিনগীনা করম হায়না থবক পাখৎলিবগে, মপান্দগী হল্লকখিবা শিন্মী মরূপশিংগী ঐখোয়না থবক কয়া য়াম্না পায়খৎপা ঙম্লিবগে হায়বনচিংবা ই-পাও পুম্নমক লেপ্তনা লৌরি।

মরূপশিং, ঐখোয়গী কাশী অসিদা ইপা ইবুংঙো বিশ্বনাথ অমসুং ইমা অন্নপুর্ননা লেংশিন্দুনা লৈরি। অদুগা মহাদেবনা ইমা অন্নপুর্নদগী মশামক্না ভিক্ষা নিখি হায়ানা মমাংঙৈদা লৌনরম্মি। মতম অদুদগী হৌনা কাশীনা অথোইবা থৌজাল অদুদগী হৌনা ঐখোয়গী কাশীনা অথোইবা থৌজাল অসি ফংদুনা লাকপদুনা মফম অসিদা মীওই অমত্তা মবুক হাংনা তুমহল্লোই, ইমা অন্নপুর্ন অমদি ইপা ইবুংঙো বিশ্বনাথনা ময়ামগী চানবগী থৌরাং তৌগনি। 

হন্দক্কী মতাং অসিদা ঐখোয়দা, মরু ওইনা অদোম ময়ামদা  লায়রবশিংগী থৌগল তৌনবগী তাঞ্জা অদু লাইনা পীনবিরে, অদোম ময়ামগীদমক্কী ওইনা, লুপ কয়াগী ওইনা, ঐখোয় পুম্নমক্কী ওইনা লাইবক ফবনি।  মায়কৈ অমরোমদা অদোম পুম্নমক্না ইমা অন্নপুর্ন অমদি ইপা বিশ্বনাথকী দুৎ ওইদুনা তেংবাংগী মথৌ তাবা মীশিং তান্না য়ৌহনবা ঙমহল্লি।

অসুক তেল্লবা মতম অসিদা ফুল হেল্পলাইন ওইরো, কম্ম্যুনিতীগী চাকখুমগী পাক চাওরবা নেৎৱর্কী থৌরাং তৌবা ওইরো, হেল্পলাইন শেমগৎপা ওইরো, দেতা সাইন্সকী অনৌবা তেক্নোলোজীগী মতেং লৌবা ওইরো, বনারসকী স্মার্ত সিতী কন্ত্রোল অমদি কমান্দ সেন্তরনা মসিগী থবক অসিদা পিক থন্না শিজিন্নবা হায়বদি থাক খুদিংদা ময়াম পুম্নমক্না লায়রবগী মতেং পাংনবগীদমক্তা অঙম্বা থাদুনা হোৎনরি। অদুগা ঐহাক মসিমসু হায়রমগে, ঐখোয়গী লৈবাক অসিদা সেবা তৌবগী ৱাখল্লোন অসি অনৌবা ৱাফম নত্তে, ঐখোয়গী ইশাদা য়াওরিবা ইওং-ইতৌ অসিদা য়াওজরক্লবনি। অদুবু হন্দক্কী সেবা তৌবগী থবক অসি অসি অচম্বা সেবা নত্তে। মসি কনাগুম্বা থৱায় নুংঙাইতবা মী ওমগী মপী তৈথোকপা, কনাগুম্বা লায়রবা অমদা চানবা পীবখক্তা নত্তে, মসিদা কোরোনাগুম্বা মখলগী লায়না কোনশিনবা অসি য়াম্বা খুদোংথিনিংঙাই ওইখি, করিগুম্বা কোরোনা অসিনা ঙকশমদা য়ান্দুনা লৈখ্রবদি হায়বা। অমসুং মরম অসিনা সেবাগা লোয়ন-লোয়ননা থাদোকপা অমসুং কত্থোকপগী ৱাখল্লোনসু ওইখি। অদুনা হিন্দুস্তান অসিগী কাচিন খুদিংমক্তা কোরোনাগী লায়চৎ অসিগী থবক তৌরিবা অসি অচম্বা থবক নত্তে। মশাগী মথৌদাং পাংথোকপখক্তা নত্তে, অকিবা অমসু লৈখি, অরুবা অদু ইমাংদা লৈখি অদুগা মদুগী মমাংদা চৎপা, ইশানা য়ানিংনা চৎপগী অনৌবা মওং অমনি।

জীলাগী লৈঙাকশিংগী মনাক্তা চানবা য়েন্নবগী গারীগী অৱাৎপা লৈখিবদা দাক বিভাগনা হাংদুনা লৈরিবা মখোয়গী পোস্তেল ভেনশিং অদু মসিগী থবক অসি তৌহনখি হায়বসি ঐঙোন্দা হায়রকখি। খন্দুনা য়েংবিয়ু, সরকারশিংগী, লৈঙাক্কী ইমেজ অসি হান্নদি থবক খুদিংমক তৌবা য়ারমখিদে হায়না লৈরম্মি। মসিগী ঐগী দিপার্তমেন্তনি, নঙোন্দা কনানা পীরক্কনি, ঐদি অসুম্না তৌগনি, নহাক করি ওইরিগে হায়বনচিংবশিং অসি ওইনা লৈরমখি। অদুবু মফমসিদা মমাং থাদুনা অমগা-অমগা মতেং পাংনখি হায়বসি ঐখোয়না মফমসিদা উনরে।  মসিগী অমত্তা ওইনা পুনশিনবা, অপুনবগী মওং অসিনা ঐকোয়গী কাশী অসি হেন্না অথোইবা ওইরে। অসিগুম্বা মখলগী মীওইবগী থৌজাল অসিগীদমক্তা মফম অসিগী লৈঙাক ওইরো,  গায়ত্রী পরিবার ক্রিএতিব ত্রস্ত ওইরো, প্রসিদেন্সিএল রোতী বেঙ্ক ওইরো, ভারত সেবাশ্রম য়ুনিয়ন ওইরো, ঐখোয়গী সিন্ধী খুন্নাইগী ইচিল-ইনাওশিং ওইরো, ভগৱান অবধুত রাম কুশ্থ সেবা আশ্রম সর্বেশ্বরী কাংবু ওইরো, বেঙ্কশিংগা শম্নরিবা মীওইশিং ওইরো, কোৎ-পেন্ত-তাই থাজৃদোক্তুনা লৈরক-খুল্লক্তা  লায়রবশিংগী থোংদা লেপ্লুরসি, লল্লোন-ইতিক্কী এসোসিএসন ওইরো অমদি ঐখোয়গী অনৱর অহমদজীনা কয়াদা নিংথিনা হায়খ্রিবা, অসিগুম্বা মশিং থিঙমদবা মীওই কয়ানি অদুবু ঐহাক্তি হৌজিক শুপ্নতগী মীওই মঙা-তরুকখক্তংগা ৱারী শান্নবা ঙম্লি অদুবু অসিগুম্বা মীওই লিশিং কয়া অসিনা কাশী অসিবু চাওথোকচনিংঙাই ওইহল্লে। লুপ চা-চা কয়ানা মশা-মশানা শেল পুথোকচখ্রে। ময়াম পুম্নমক্কা ৱারী শান্নবা ঙমদ্রি, অদুবু ময়াম পুম্নমক্না তৌরিরিবা থবকশিং অদুবু ঐহাক্না খুরুমজরি। মসিগা শম্নরিবা মীওই খুদিংমকপু খুরুমজরি। অদুগা ঐহাক্না ঙসি অদোম ময়ামগা ৱারী শান্নরিবা অসিদা শুপ্নতগী ই-পাওখক্তমক লৌবগী নত্তে, অদোমদগী ইথীল লৌরিবনি। থবক ময়াম অমা তৌনবগীদমক অদোমগুম্বা মীওই কয়ানা অরুবা তানফম অসিদা থবক তৌবিরিবা অসিগীশিং অসিদগী ঐহাক্না থৌজাল ফংজরি। অদুগা ঐহাক্না অদোম পুম্নমকপু ইপা ইবুংঙৌ অমসুং ইমা অন্নপুর্ননা পাঙ্গল-থৌনা পীনবিবা ওইরসনু, শক্তি পীনবিবা ওইরসনু।   

মরূপশিং, কোরোনাগী লুরবা তানফম অসিদা মালেম্না খন্নবগী খংবা ঙম্বগী, থবক-ইনখাং তৌবা ঙম্বগী, চান-থক্নবগী, পুম্নমক্কী থবক-থৌওংশিং হোংদোকখ্রে। অমসুং অদোম্না সেবা তৌবিরিবা অদুগুম্না অমসুং মসিগী সেবা অসিনা খুন্নাই অসিগী পুন্সিদা অচৌবা শাফু পীরি। ঐহাক্না অঙাং ওইরিঙৈদা তারমখিবদা সনা শাবা অমা লৈরম্মি, মহাক্না শানা শাবা অমা ওইনা ময়ুমদা থবক মচা-মশু খরা তৌরম্মি অমসুং ইমুং-মনুংগী ওইনসুং শনাগী পোৎ খরা শাবনচিংবা তৌরম্মি। অদুবু মদুগী মীওই অদুগী হৈনবী অমা লৈরম্মি, মহাক্না কৈথেলদগী য়াশেং পয়া লৈরম্মি।  হান্নগী মতমদদি অয়ুক্তা হৌজিক ঐখোয়না ব্রশ শিজিন্নরিবা অসি য়াশেং পয়ানা শেংলম্মি। অদুগা মহাক্না হোসপিতালদা চৎলগা অনাবশিংদা, মাগী মরি-মতা থোক্নবশিংগী মশিং থিরগা পয়া অদু য়েল্লম্লগা অয়ুক-নুংথিল য়াশেং পয়া অদু পীরগা হল্লক্লম্মি, অদুগা নুমীৎ চপ্পা সনা সাবগী থবক অদু তৌরম্মি। মহাক্না সনা শাবগী থবক তৌনা-তৌনা মীশিংদা য়াশেং পয়া য়েন্দুনা মীশিংগী মতেং পাংবগী অপিকপা হৈনবী অদুগীদমক মফম অদুদা মহাক্কী ইমেজ অসি অদুক্কী মতিক লৈরম্মি, মহাক্কী শেবা তৌবগী ৱাখল্লোন অদুগী মতাংদা মীয়াম্না শোন্নরম্বা অদুনা মীশিংনা সনা শানবগীদমক্তা মীয়াম্না মহাক অসি সেবাগী ৱাখল্লোন চেনবা মীনি অদুনা মহাক্কীদা চত্তুনা সনা শাহনগনি হায়না হায়নরমখি। মসিনা হায়রিবদি মহাক তৌখিবা সেবা অদুনা মশানা অদুম থাজনিংঙাই ওইবা মী হায়বদু মশা মথন্তা ওইজখি, মহাক্কী সনা শাবগী থবক অদু মীপুম খুদিংনা ইমুং খুদিংনা থাজবা মীশক হায়বদু ওইখি। হায়বদি ঐখোয়গী খুন্নাই অসিনা সেবা তৌবগী ৱাখল্লোন অসিদগী খরখক্তমক তাল্লকখিবা, খরখক্তমক ফংলকখিবা নত্তে, মসিদগী য়াম্না য়াম্বা ৱাখল্লোন্দা য়েংলি। অদুগা সেবা ফংলিবা মীশিংনসু মখোয়গী ৱাখলদসু করিগুম্বা তাঞ্জা ফংবদা মখোয়নসু অতোপ্পগী সেবা তৌগনি হায়দুনা চপ য়ুংনা লেপ্লি, মসি অসুম হায়না উংনা চত্তুনা  লৈ। মসিদি খুন্নাই অসিবু ইথীল পী। অদোম্না তাবিরম্লগনি, চহি চামগী মমাংদা য়াম্না অকিবা ফংলবা লায়চৎ অমা থোকখি, হৌজিক চহি চামগী মতুংদা মসি থোক্লি। অদুগা মসি হায়নৈ মদুদি ভারত্তা মী মশিং অসি লৈত্রিঙৈদা মীওই খরদমক লৈরম্মি। মতম অদুদা লায়চৎ অদুনা মালেমদা খ্বাইদগী মী য়াম্না শিখিবশিং অদুগী মনুংদা ঐখোয়গী ভারতসু য়াওরম্মি। মীওই কোতী-কোতী শিখিরমখি। অদুনা মরম অসিনা হন্দক লায়চৎ অসি লাকপসিদা মালেম পুম্বনা ভারতকী মিং অসি পনবা মতমদা মখোয়দা অকিবা ফাওই। চহি চামগী মমাংদা ভারতকী মরম্না অসুক মতিক অমা-অতা থোকখিবা, ভারত্তা অদুক্কী মতিক মী ময়াম অমা শিখি অদুগা ঙসিগী ভারতকী অসুক য়াম্বা মী মশিং, অসুক য়াম্বা শিংনবা, অচৌ-অচৌবা এক্সপর্তশিংনা মসি হায়রমখি অমদি ভারত্তা মথক্তা ভারত অসি কিন্থরক্লগনি হায়না ৱাহং হংনরম্মি।  অদুবু করি মওংদা লৈরিবগে হায়বদু অদোম্না উবিরি। মীওই কোতী ২৩-২৪ লৈরিবা ঐখোয়গী উত্তর প্রদেশ অসিগী ওইনা চিংনবা কয়া-ফত্তবা চিংনবা কয়াসু লৈখি, মসি মতৌ করম্না কনগদগে হায়বগী।  কনাগুম্বনা য়ু.পি.দা লায়রবা য়াম্না লৈ, মফমসিদগী মপান্দা চৎখিবা শিন্মীশিং, থবক তৌবা মরূপশিং য়াম্না লৈ, গজ অনি থাপ্ননা লৈবা অসি করম্না ঙাকপা ঙমগনি? মখোয়শিং অসি কোরোনাদগী নত্রগা চরা হেন্দুনা শিরগনি হায়না মীওই কয়া অমা হায়নখি। অদুবু অদোম ময়ামগী মতেংনা উত্তর প্রদেশকী মীশিংনা হোৎনজমন্না, থৌনা-লিংজেলনা চিংনবা পুম্নমক তুম্না মাংহনখ্রে।

মরূপশিং, ব্রাজীলগুম্বা চাওরবা লৈবাক অসিদা মীওই কোতী ২৪ লৈরিবা লৈবাক অসিদা কোরোনানা মীওই লিশিং ৬৫দগী হেন্না শিখ্রে। অদুবু অদুক য়াম্না লৈরিবা মী মশিং অদুগুম্না লৈরিবা উত্তর প্রদেশ অসিদা শুপ্নতগী মীওই ৮০০ খক্তমক কোরোনানা শিখি। হায়বদি য়ু.পি.দা কোরোনাদগী মীওই লিশিং কয়া, শিবা য়ানা লৈরম্বা মীওই কয়া অমা কনবা ঙমখ্রে। ঙসি উত্তর প্রদেশনা কোরোনাগী লায়চৎ অসি লাকশিনবগী খোংজেল হেনগৎখিবদা নত্তনা কোরোনানা নাবদগী থুনা ফগৎলকপগী ফীভমদা লৈরে। অদুগা মসিগী য়াম্না চাউবা মরমদি অদোমগুম্বা অথোইবা ৱাখল্লোন চেনবশিংগী ৱাখল লৈবা মতৌ, সেবা তৌবগী ৱাখল্লোন, থবক তৌনিংবা অসিনি।  অসিগুম্লবা খুনাইগী, ধর্মগী অমদি মশাগী ওইজবা য়াওদ্রবা ওর্গনাইজেসনশিং অসিগী থৌওং, মখোয়গী ৱাশক, মখোয়গী মচৎ ময়াম অসিনা হৌজিক ওইরিবা লুরবা তাঞ্জা অসিদা খুনাই অসিগী মীপুম খুদিংদা কোরোনা লানথেংননবা থৌনা পিবগা লোয়ননা মতেং কয়া পাংলি।

মরুপশিং, ঐখোয়দি কাশীৱাসিনি। কবিরদাসজীনা অসুম্না হায়বিরম্মি-

সেবকনা মহৈ থিদে, অহিং-নুংথিল খাক্তনা সেবা তৌই

সেবা তৌবা মীওইনা মহাক্না তৌবা সেবা অদুগী মহৈ থিদে, অহিং-নুংথিল খাক্তনা মশাগী ওইজবা থিদনা সেবা তৌই। কনাগুম্ববু মশাগী ওইজবা থিদনা সেবা তৌবা অসিগুম্বা ঐখোয়গী চৎনবি অসিনা লুরবা তাঞ্জা অসিদা লৈবাক মীয়ামগী মতেং ওইরি। অসিগুম্বা ইথিলগা  লোয়ননা  কেন্দ্র সরকারনসু লেপ্পা লৈতনা হোৎনরি মদুদি কোরোনাগী মতম অসিদা মীয়ামগী অৱাবদা শরুক য়াদুনা, অৱাবশিং অসিবু খরতা ওইরবসু কোকহন্ননবা লেপ্তনা হোৎনরি। লাইরবশিংবু চেং ফংহনবা, মখোয়গী ফুরিৎখাউদা শেল য়াওবা, মখোয়দা থবক ফংহনবা অমদি মখোয়গী থবক শুনবগীদমক শেনথং ফংহনবা হায়রিবা ৱাফমশিং অসিদা পুক্নিং চংশিল্লে।

মরুপশিং, ঙসিদি ভারতকী মীয়াম কোতি ৮০ হেনবদা লেম্না চেং ফংহল্লি। বনারসকী লাইরবা অমদি শিনমী খুদিংনা মসিগী কান্নবা কয়া ফংলি। অদোম্না খনবিয়ু মদুদি অমেরিকাগী মীশিং অনীগুম্বা ভারতনা মখোয়দগী শেল মতেং লৌদনা মপুক থাক্লি। অদুগা হৌজিক্তি মসিগী থৌরাং অসিনা নবেম্বর লোইরমদাই ফাওবগী মনুংদা হায়বদি দিৱালি অমসুং সথ পুজা মদুদি নবেম্বর ৩০ ফাওবা শাংদোকখ্রে। ঐখোয়না হোৎনজরিবা অসি কুমৈ-ফিয়োংগী মতমদা লাইরবা অমত্তা চানা-থক্নবগী অৱাৎপা লৈতনবনি। চানা-থক্নবগা লোয়ননা, লোকদাউন্না মরম ওইরগা লাইরবশিংনা থোং-থাকপদা অৱাবা মায়োক্নদনবগীদমক উজ্জৱলা য়োজনাগী কান্নবা ফংলিবা মীওইশিংদা হৌখিবা থা অহুমদগী লেম্না গ্যস সিলিন্দর ফংহল্লি।

মরুপশিং, লাইরবশিংগী জনধন একাউন্ততা লুপা কোতি লিশিং কয়া হাপ্পবু ওইরো লাইরবশিং, শিন্মীশিংগী থবক্কিবু ওইরো, অপিকপা ইন্দস্ত্রিশিং, থেলাচিংবশিং কয়াদা লাইনা শেনথং ফংহনববু ওইরো, লৌ শুবা, শা-ষন য়োকপা, ঙা য়োকপা অতৈ অতোপ্পা থবক তৌবা মীওই কয়াগীদমক পুরানদা শোন্নহৌরগদবা ৱারেপ কয়া অমসুং সরকারনা লেপ্পা নাইদনা থবক-থৌরম কয়া পাইখৎলি।

নুমীৎ খরনিগী মমাংদা লুপা কোতী লিশিং ২০গী ঙা য়োকপগী স্কীমগীসু অয়াবা পীখ্রে। মসিগী খুদোংচাবা অসিসু লম অসিদা লৈরিবা ঙা য়োকপশিংনা ফংগনি।  মসিদা নত্তনা উত্তর প্রদেশতা নুমীৎ খরনিগী হেক মমাংদা থবক অমসুং ইশানা থবক পীজবগীদমক্তা অথোইবা অভিয়ান অমসুং পাংথোকহনখ্রে। মসিদগী ঐখোয়গী খুৎনা হক্তুনা শাবশিং, ফি লোনবশিং, অতোপ্পা হকপশিং ওইরো নত্রগা অতোপ্পা রাজ্যদগী লম অসিদা হল্লকখিবা শিন্মী মরূপশিং, অসিগুম্বা থবক শুবা মীওই লাক্ষ কয়াগীদমক্তসু থবক্কী থৌরাং তৌখ্রে। 

মরূপশিং কোরোনাগী খুদোংথিবা অসি অদুক্কী মতিক চাওবা মরম্না মসিদগী নান্থোরক্নবগীদমক্তা লেপ্তনা হোৎনবা তাই। ঐখোয়না পেন্থোক্তুনা ফম্মগা লৈথোক্লোইদবনি। ঐখোয়গী ফি লোনবগী থবক তৌরিবা ইচিল-ইনাওশিং ওইরো, হী থৌরিবা ঐখোয়গী মরুপশিং ওইরো, লল্লোন-ইতিক তৌবশিং ওইরো ময়াম পু্ম্নমক্তা ঐহাক্না থাজবা ৱাফম থমদুনা ঐখোয়না লেপ্তনা খ্বাইদগী হন্থবা খুদোংচাদবা অমদি বনারস অসিসু অদুম্মক খুমাং চাওশিন্নবা কন্না হোৎনরি।  ঐহাক্না নুমীৎ খরনিগী মমাংদা বনারস অসি চাওখৎহন্নবগী থবকশিংদগী হৌরগা লৈঙাক্তগী সহর অসিগী ঐখোয়গী এম.এল.এ.শিংদগীসু তেক্নোলোজীগী থোংদা কুইনা উন্নখি, য়াম্না মরিক চুম্না ৱারী শান্নখি, অমমমতগী ওইনা ঐহাক্না তেক্নোলোজী অমসুং দ্রোনগী মেথদশিংদগী মোনিতর তৌখি। মসিদা লম্বিশিং, মৈ, ঈশিংনচিংবগী প্রোজেকশিংগা লোয়ন-লোয়ননা ইপা বিশ্বনাথকী লাইফমগী প্রোজেক্কী ফীভমগী মতাংদা মরিক চুম্বা ই-পাওশিং ঐঙোন্দা পীখি। ঐহাক্না মরুওইবা ই-পাওশু পীখি। অপনবা খরা লৈরগসু মদু কোকহন্নবগীদমক হায়গদবা মফমশিং অদুদা হায়খি।

মতম অসিদা কাশীদা লুপা কোতী লাক্ষ ৮গী শেনফমগী ওইবা প্রোজেকশিংদা য়াংনা থবক চত্থরি। লুপা কোতী লিশিং ৮গী থবক, হায়বদি মীওই কয়াদা চান-থক্নবা ফংহল্লি। ফীভম অসি হান্নগীদা হঞ্জিল্লক্লবা মতমদা কাশীগী হান্নগী তরং-তরংবা শক্তম অদুসু থুনা হঞ্জিল্লক্কনি।

মসিগীদমক্তা ঐখোয়না হৌজিক্তগী হৌনা শেম-শাদুনা লৈগদবনি অমসুং মসিগীদমক্তা তুরিজমগা মরি লৈনবা প্রোজেকশিং-ক্রুজ তুরিজম, লাইত অমসুং সাউন্দগী শো, দশাশ্বমেঘ ঘাত অমুক অনৌবা মওংদা শেমগৎপা, গঙ্গাগী আরতীগীদমক্তা ওদিও-ভিদিও স্ক্রীন হাপ্নবগী থবক, ঘাতশিংদা হেন্না নিংথিজবা মওংদা য়েংশিন্নবগী থৌরাংশিংগী থবক, অসিগুম্বা প্রোজেকশিং অসি থুনা লৌইশিন্নবগীদমক্তা নিংথিজনা হোৎনরি।

মরূপশিং, লাক্কদৌরিবা মতমদা কাশী অসি আত্মনির্ভর ভারত অভিয়ানগীসু অচৌবা কেন্দ্র অমা ওইনা ময়াম পুম্নমক্না য়েংবা পাম্মি অদুগা মসি ঐখোয় পুম্নমক্কী ইথৌদাংসুনি। সরকারনা ইকুই কুইদনা লৌখিবা ৱারেপশিং অদুগী মতুংদা মফমসিগী সারীশিং, মফমসিগী খুৎনা হক্তুনা শাবশিংগীদমক্তা, মফমসিগী দায়রী, ঙা য়োকপা অমসুং খোই লোকপগী লল্লোন-ইতিক্কী ওইনা অনৌবা তৌবা য়াবা কয়াগী থোং হাংলগনি। মালেমদা বি.ৱৈক্সকী দিমান্দ অসুক্কী মতিক য়াম্না লৈ। মসি ঐখোয়না মপুং ফাহন্নবা হোৎনবা য়াই।

ঐহাক্না লৌমীশিংদা, নহারোলশিংদা হায়গদবসি অসিগুম্বা লল্লোন-ইতিক্কী থবক অসিদা হেনগৎ-চাওখৎহন্দুনা শরুক য়ানবা চপ চাবা ৱাখল থম্বিয়ু। ঐখোয় পুম্বগী হোৎনজমলনা কাশী অসি ভারতকী অচৌবা এক্সপোর্ত হব অমগী মওংদা শেমগৎপা য়াই অমসুং ঐখোয়না তৌগদবনি। কাশী অসিবু ঐখোয়না আত্মনির্ভর ভারত অভিয়ানগী ইথীল পীবা ঙম্বা মফমগী মওংদা শেমগৎসি, লিংখৎসি।

মরূপশিং, ঐহাক নুংঙাইবা ফাওই, ঙসি অদোম পুম্নমক্কা উন্ননবগী তাঞ্জা ফংবা অমদি কাশীগী মীশিংবু য়েন্নিংথা অসিদা উন্নবা ফংবা অসিনা ইশানা অদুম্মক লাইবক ফবা হায়বদু ওইরবনি। অদুগা অদোম্না সেবা তৌবগী ৱাখল্লোনগা লোয়ননা থবক তৌবিখিবা, হৌজিক-হৌজিকসু থৱায় য়াওনা অদোম্না তৌবিরিবশিং অসিগীদমক অদোম পুম্নমকপু হন্না-হন্না থাগৎপা ফোংদোকচরি।

মীগী কান্ননবনা, সেবাগী ৱাখল্লোন্না অদোম্না তৌরিবা থবকশিং অসিনা অদোম্না মীয়ামদা ইথীল পীরি, তুংদসু ইথীল পীখিগনি।  অদুবু হোয়, ৱাফম অমখক হন্না-হন্না হায়গনি, মীওই খুদিংমক্তা হায়গনি, ইশা-ইতোমতসু হায়জগনি। ঐখোয়না সিঙ্গল য়ুজ প্লাস্তিক্তগী লান্থোকপা পাম্মি, মসি থাদোকফম থোক্তে। হৌজিক লম্বিদা তিন শিৎপা অসিদসু ঐখোয়গী বনারসকী ক্বা, ঐখোয়গী হৈনবি অসি হোংদোকপা তাবনি। অনিশুবদা গজ অনি থাপ্না লৈনবা, গমশা নত্রগা ফেস মাস্কনা কুপ্পগী অমদি খুৎ হামদোকপা অসি কনানসু থাদোকহল্লোইদবনি। হৌজিক মসি ঐখোয়গী সংসকারগী মওংদা, লমচৎকী মওংদা ওইহল্লগদবনি। 

মতম পুম্নমক্তা ইপা বিস্বনাথ অমসুং ইমা গঙ্গাগী থৌজানবিবা ওইরসনু, মসিগা লোয়ননা ঐহাক্কী ৱাফম অসি লোইশিনজরগে অদুগা অমুক্কা হন্না অদোমগী অথোইবা থবক অসিগীদমক্তা খুরুমজরি।  

হন্না-হন্না থাগৎচরি! হর-হর মহাদেব !!!

***