প্রধানমন্ত্রীগী লোইশঙ

ইন্দিয়া গ্লোবেল ৱিক হৌদোকপা থৌরমদা প্রধান মন্ত্রী ৱা ঙাংখ্রে

মালেম অসি হান্নগী ফিবমদা হঞ্জিল্লক্নবা ভারতনা অচৌবা থৌদাং লৌরি: প্রধান মন্ত্রী

Posted On: 09 JUL 2020 3:17PM by PIB Imphal

ভিদিও-কনফরেন্সকী খুৎথাংদা ঙসি প্রধান মন্ত্রী নরেন্দ্র মোদী ইন্দিয়া গ্লোবেল ৱিক হৌদোকপা থৌরমদা ৱা ঙাংখ্রে।

হৌজিক ওইরিবা অৱাবা ফিবম অসি পল্লদুনা প্রধান মন্ত্রীনা হায়খি মালেম হান্নগী ফিবমদা হঞ্জিল্লক্নবা হোৎনবদা ভারতনা অচৌবা থৌদাং অমা লৌগনি। মসি হিরম অনিগা য়াম্না নক্নবা মরী লৈনৈ। অহানবনা-ভারতকী হৈশিংবা অমসুং অনিসুবনা অহোংবা পুরকপা অমসুং অমুক হিঙ্গৎহনবা ঙম্বা ভারতকী তৌবা ঙম্বা অসিনি। মরুওইনা ভারতকী তেক ইন্দস্ত্রী অমসুং তেক্নোলোজীশিংগী শিনফম পায়রিবশিংনা পাংথোক্লিবা থবকশিং য়াওনা ভারতকী হৈশিংলবা মীওইশিং অসি মালেম শিনবা থুংনা মশক খঙলে।

মহাক্না হায়খি ভারত অসি মতেং পাংনবা খৌরাংনা ঙাইদুনা লৈরিবা হৈশিংলবা মীওই কয়াগী লৈফম অমনি। মহৌশানা ভারতমচাশিং অসি অহোংবা পুরকপা মীওইশিংনি অমসুং শেন-থুম নৎত্রগা খুন্নাইগী লমদা ওইগেরা, শিংনরকপা খুদিংমক ভারতনা মায়োক্নবা ঙম্মি হায়বা পুৱারীনা উৎলে। হান্নগী ফিবমদা হঞ্জিল্লক্নবা ভারতনা ৱারী শানবদা য়াওরি: চেকশিনবগা লোয়ননা অমুক হিঙ্গৎহন্নবা, খাংবা কনবগা লোয়ননা অমুক হিঙ্গৎহন্নবা, অকোয়বগী ফিবম অমসুং শেন-থুম অনিমক তুংকোইনা চৎনগদবা মওংদা অমুক হিঙ্গৎহন্নবা।

জি.এস.তি, তেক্সকী অহোংবশিং, ললোন-ইতিক নুংঙাইহনবা, মী খুদিংমক শেন-থুমগী কান্নবা ফংহনবা, শিংথানীংঙাই ওইনা য়ুম অমসুং লম্বী-থোং শেমগৎপা য়াওনা হৌখিবা চহি ৬দা মাইপাক্না পাংথোকখিবা থবকশিং প্রধান মন্ত্রীনা পনখি।

প্রধান মন্ত্রীনা হায়খি মাইথিবা পীবা ঙমদবা ভারতকী থৌনা অসিনা মরম ওইদুনা শেন-থুমগী ফিবম অমুক হিঙ্গৎলকপগী অনৌবা ময়োলশিং মাংজৌননা উবা ফংলে। বেনিফিসরীশিংদা হকথেংননা কান্নবশিং য়ৌহনবদা ঙসিদি তেক্নোলোজীনা সরকারগী মতেং পাংলে। লেম্না চাক থোংনবা গ্যাস পীবদা , বেঙ্ক একাউন্তশিংদা শেন পীবদা, মীওই মিল্লিয়ন কয়াদা লেম্না চেং ফংহনবদা অমসুং অতৈ পোৎলমশিং য়ৌহন্নবা তেক্নোলোজী শিজিন্নরে।

প্রধান মন্ত্রীনা হায়খি মালেমদা খ্বাইদগী মনীংতম্বা ইকোনোমীশিংগী মনুংদা ভারতসু অমনি অমসুং ভারত্তা মখোয়গী ললোন-ইতিক্কী থবকশিং পায়খৎনবা মলতিনেস্নেল কম্পনী পুম্নমক কৌরি। ভারত অসি খুদোংচাবা কয়া মরাংকাইনা লৈবা লৈবাক অমনি। লৌউ-শিংগী লমদা অহোংবা কয়া পুরক্লে অমসুং মালেমগী ইন্দস্ত্রী কয়া শেন থাদনবগী খুদোংচাবা অমা লৈবাক অসিনা পীরে। এম.এস.এম.ই. সেক্তর ফগৎহন্নবা খ্বাইদগী নৌবা অহোংবা কয়া পুরক্লে অমসুং মখোয়না অচৌবা ইন্দস্ত্রীগী মতেং পাংগনি। দিফেন্স অমসুং স্পেসকী সেক্তরশিংদসু শেন থাদনবগী খুদোংচাবা কয়া লৈরে।

প্রধান মন্ত্রীনা হায়খি ভারতকী ফার্মা ইন্দস্ত্রী অসি ভারত খক্তগী নত্তনা মালেম পুম্নমক্কী লন অমনি হায়বা লাইচৎ অসিনা অমুক হন্না উৎলে। মসিনা মরুওইনা চাউখৎলক্লিবা লৈবাকশিংদা মমল হোংবা হিদাক-লাংথকশিং ফংহনবদা মরুওইবা থৌদাং অমা লৌরি। আত্মনির্ভর ভারত অসি মশা-মরোমদোম নাইতোম হিংজনবা নৎত্রগা মালেমগী লৈবাকশিংগা শম্নদনবা নত্তে , মসি মশা-মরোমদোমগী ওক্নবা অমসুং মশাগী দরকার ওইবশিং পুথোক্নবনি।

মহাক্না হায়খি মসি অহোংবা পুরক্লিবা, থবক পাংথোক্লিবা অমসুং অওনবা পুরক্লিবা ভারত অমনি। মসি শেন-থুমগী খুদোংচাবা কয়া লৈবা ভারত অমনি। মসি মীওইবদা য়ুম্ফম ওইবা অমসুং পুন্না চাউখৎপদা চংশিল্লিবা ভারত অমনি। ভারতনা ময়াম পুম্নমক ঙাইদুনা লৈরি।

থৌরম অসিদা ভারতকী ক্লাসিকেল ঈশৈগী ফজবা মালেমদা মশক তাকখিবা পন্দিৎ রবী সংকরগী ১০০সুবা মপোক নুমিৎ পাংথোকপদা মহাক্না হরাওবা ফোংদোকখি। কমদৌনা নমস্তেনা মালেমগী ওইনা তরাম্না ওক্নবগী চৎনবী অমা ওইরকখিবগে হায়বগী মতাংদা মহাক্না পাউদমখি। মহাক্না হায়খি মখা তানা মালেমগী অফবা অমসুং নুংঙাইবা পুরক্নবা থবক খুদিংমক পাংথোক্নবা ভারতনা থৌরাং তৌদুনা লৈরি।

***



(Release ID: 1637569) Visitor Counter : 6