প্রধানমন্ত্রীগী লোইশঙ

পি.এম.না লাদাখতা লৈবা নিমুদা চৎতুনা ভারতকী লাম্মীশিংগা ৱারী-ৱাতাই শানখ্রে

ভারতকী য়েক্নবশিংনা ঐখোয়গী লান্মীশিংগী তমথীবা মশক উবা ফংলে: পি.এম.

হৌখিবা চয়োল খরা অসিদা আর্ম ফোর্সশিংগী থোইদোক হেন্দোকনা শীংথানিংঙাই ওইরবা থৌনানা মরম ওইরগা মালেম পুম্বনা ভারতকী মপাঙ্গল অদু খংবা ঙমখ্রে: পি.এম.

ভারতনা শান্তিগীদমক কৎথোকপা অসি ভারতকী অশোনবা ওইনা উবদি লানগনি: পি.এম.

ঙমখৈ খোপচিনবগী মতম লোয়খ্রে, হৌজিক চাওখৎপা পুরকপগী মতমনি: পি.এম.

ঙমখৈগী ইনফ্রাস্ত্রকচরদা চাদিং শরুক অহুম হেনগৎখ্রে: পি.এম.

Posted On: 03 JUL 2020 2:59PM by PIB Imphal

প্রধান মন্ত্রী শ্রী নরেন্দ্রা মোদীনা ঙসি অঙনবদা ভারত লান্মীশিংগা ৱারী শানবা লাদাখকী নিমুদা চৎখ্রে। নিমু অসি জান্সকার চীংশাংনা কোয়শিল্লি অমসুং ইন্দস তুরেল তোর্বানদা লৈ। ভারত লান্মীগী মকোক থোংবশিং প্রধান মন্ত্রীনা উনখি অমসুং মখা তারকপদা আর্মী, এয়র ফোর্স অমসুং আই.তি.বি.পি.গী পর্সনেলশিংগা ৱারি শানখি।

লান্মীশিংগী মথৌনাবু ইকাই খুম্নবা

প্রধান মন্ত্রীনা ঐখোয়গী আর্ম ফোর্সশিংগী মথৌনাবু অৱাংবা থাক্কী ইকাই খুম্নবা উৎপগা লোয়ননা মখোয়গী থৌনা লিংজেল অমসুং ভারত ইমাগীদমক কৎথোকপা অসি চাংদমনিংঙাই লৈরোই হায়খি। ভারত মচাশিংনা শান্তিদা হিংবা ঙম্লিবগী মরমদি ঐখোয়গী আর্ম ফোর্সশিংনা থৌনা ফন্না লৈবাক অসি ঙাক শেল্লি হায়বা ঐখোয়না খঙবগীনি।

হৌখিবা চয়োল খরা অসিদা আর্ম ফোর্সশিংগী থোইদোক হেন্দোকনা শীংথানিংঙাই ওইরবা থৌনানা মরম ওইরগা মালেম পুম্বনা ভারতকী মপাঙ্গল অদু উৎপা ঙমখ্রে হায়না প্রধান মন্ত্রীনা ফোঙদোকখি।

গালৱান তম্পাক্তা থৱায় কৎখিববু নিংশিংবা

গালৱান তম্পাক্তা থৱায়না পোন্থা কৎখ্রবা ভারত ইমাগী মথৌনা লৈবা মপারি পম্নমকপু প্রধান মন্ত্রীনা নিংশিংখি। মহাক্না থৱায় কৎখ্রবা মখোয়শিং অদু ভারতকী মফম কয়াদগীনি অমসুং মসিনা ঐখোয়গী লমদম অসিগী মথৌনা লিংজেলগী খুদম ওইখি।

লেহ-লাদাখ, কারগিল নত্রগা সিয়াচেন গ্লেসিয়র ওইরবসু, অৱাংবা চীংজাও নত্রগা তুরেলশিংদা চেল্লিবা ঊনগী অইংবা ঈশিং ওইরবসু, মসিনা ভারতকী আর্ম ফোর্সশিংগী মথৌনা-মরিংজেল অদুগী শাখি ওই হায়না মহাক্না অমুক হন্না ফোঙদোকখি। ভারতকী য়েক্নবনা ঐখোয়গী থৌনা অমদি তমথিবা মতৌ অদু উখি হায়না প্রধান মন্ত্রীনা হায়খি।

প্রধান মন্ত্রীনা ইমা অনিদসু: ভারত ইমাদা অমদি থৌনা ফবা লান্মী পুম্নমক পোক্লিবা ইমাশিং অমসুং চোকথবা লৈতনা ভারত ইমাবু শেবা তৌরিবা ভারতকী সেক্ব্যুরিতি ফোর্সশিংদা ভক্তি তৌখি।

ঐখোয়না শান্তিগীদমক কৎথোকপা অসি ঐখোয়গী অশোনবা নত্তে

মতম কয়াদগী হৌনা শান্তিগী ৱাখল্লোন, মরূপ ওইবগী মরী অমসুং থৌনা-লিংজেল অসি ভারতকী চৎনবিগী শরুক অমা ওইদুনা লাক্লি হায়বগী মতাংদা প্রধান মন্ত্রীনা শাংনা ঙাংখি। লৈরিবা শান্তি অমদি চাওখৎ থৌরাংদা অকায়বা পীরকপা খুদিংদা ভারতনা মতিক চাবা পাউখুম পীদুনা লাক্লি হায়না মহাক্না হায়খি।

ভারতনা শান্তি অমদি মরূপ ওইবগী মরী থম্নবা হোৎন্দুনা লাক্লি অদুবু শান্তিগীদমক কৎথোকপা অসি ভারতকী অশোনবা ওইনা উবদি লানগনি হায়না মহাক্না হায়খি। সমুদ্রগী লান্মীগী থৌনা, নোংথক্কী শক্তি, স্পেসকী শক্তি অমসুং ঐখোয়গী লান্মী মপাঙ্গলদা ওইরবসু ঙসি ভারতকী মপাঙ্গল কনখৎলাক্লি। অনৌবা মখলগী খুৎলাইশিং অমসুং মচাক-মথুম ফগৎহনবনা ঐখোয়গী ঙাকশেলগী মপাঙ্গল শরুক কয়া হেনগৎহনখ্রে।

মালেমগী অনিশুবা লাঞ্জাও য়াওনা মালেমগী ওইবা মিল্তিরি কেম্পেনশিংদা ভারত লান্মীশিংগী থৌনা অমসুং মথৌ পাঙথোকপা ঙম্বগী শাংলবা ইতিহাস অদুবু প্রধান মন্ত্রীনা নিংশিংখি।

চাওখৎপা পুরকপা মতম

ঙখৈ চাওথোকপগী মতম অদু লোয়খ্রে হায়না প্রাধান মন্ত্রীনা হায়খ্রে। মসি চাওকৎপা পুরকপা মতমনি। মসিগী ঙমখৈ আওথোকপগী ৱাখল্লোন অসিনা অচৌবা অমাং অতা থোকহনবনি হায়না মহাক্না নিংশিংখ্রে।

মহাক্না মখা তারদুনা হৌখিবা চহি খরদা ভারতকী লান্মীশিংগী য়াইফনবা অমসুং ভারতকী সিক্যুরিতিগী শেমশাবদা মখল কয়াগী খোংথাং কয়া লৌখৎখি। মসিদা অনৌবা খুৎশধ-খুৎলাই ফংহনবা, ঙমখৈগী ইনফ্রাস্ত্রকচর, ঙমখৈগী মফমশিং শেমগৎপা অমসুং লম্বী-থোং ফগৎহনবা য়াওরি। ঙমখৈগী ইনফ্রাস্ত্রকচরগীদমক চাদিং শরুক অহুম থোক্না হেনগৎখ্রে হায়না মহাক্না মখা তাখি।

নেসনল সেক্ব্যুরিতিগী খুৎলাই হেনগ*নবা অমসুং ঐখোয়গী আর্ম ফোর্সশিংগী য়াইফনবা হোৎনবশিং অদুসু প্রধান মন্ত্রীনা পনখি। সি.দি.এস. শেম্বা, অচৌবা নেসনল ৱার মেমোরিএল, দেকেদ কয়াগী মতুংদা ও.আর.ও.পি.গী অৱাৎপা মেনখৎপা অমসুং আর্ম ফোর্স পর্সনেলশিংগী ইমুং মনুংগী য়াইফনবা তৌবা অসিগুম্বা সরকারগী অনৌবা খোংথাংশিং মহাক্না পনখি।

লাদাখকী নাৎপু ইকাই খুম্নবা উৎপা

ৱারী ৱাতাই শাবা অদুদা প্রধান মন্ত্রীনা লাদাখকী ফজরবা নাৎ লোয়ননা কুশোক বকুলা রিমপোচেগী অৱাংবা ৱাখল্লোন অদুবু শিংথখি। লাদাখ অসি কৎথোকপদনা মশরুক ওইকরবা লমদম অমা অমসুং মরৈবাক নিংবা কয়া পুথোক্লিবা লমদম অমনি হায়না মহাক্না শকতাকখি।

থৌনা অসি অরানবা অমসুং অচুম্বগা মরী লৈন্নৈ হায়না লৌরিবা গৌতম বুদ্ধগী লমজিং-লমতাকপু ভারতকী মীয়ামনা ইল্লি হায়না প্রধান মন্ত্রীনা ফোঙদোকখি।

***



(Release ID: 1636197) Visitor Counter : 6