ঙরাং পাংথোকখিবা দল অপুম্বগী মীফম (এ.পি.এম.) অদুদা প্রধান মন্ত্রীনা ঙাংখিবা ৱারোলশিংবু কাংলুপ খরনা অরানবা ৱাহন্থোক পীনবা হোৎনরি।

প্রধান মন্ত্রীনা লাইন ওফ একচুৱেল কন্ত্রোল (এল.এ.সি.)দা লানশিন্নবা হোৎনরকপদা মতিক চানা থেংনগনি হায়বগী অচেৎপা ৱাফম ফোংদোকখি। তশেংবদি মমাংদা থোকখিবা অসিগুম্বা থৌদোক্তা তরায়না লৌখিবগী ওন্না তৈনবা ওইনা হন্দক্তি ভারতকী লান্মীশিংনা এল.এ.সি.গী চৎনবী থুগায়রকপদা মতিক চাবা পাউখুম পীরি (‘উনহে রোক্না হে, উনহে তোক্না হে’)।

চাইনাগী লান্মীশিংনা এল.এ.সি.দা মশিং য়াম্না লাকখি অমসুং হন্দক্তি ভারতকী লান্মীনসু চান্নবা লান্মী মশিংনা মখোয়বু থেংনরি হায়না এ.পি.এম.দা খঙহনখি। এল.এ.সি.দা লানশিল্লকপগী হিরমগা মরী লৈননা জুন ১৫দা গলৱান্দা খুৎ থোক্নবগী থৌদোক অসি চাইনাগী মাইকৈদগী এল.এ.সি.গী হেক নাকন্দা স্ত্রকচর খরা শানবা তৌরকপা থিংলুবদা য়ারক্তবদগী থোকখিবনি।

এ.পি.এম.দা খন্নখিবা ৱাফমশিংগী মনুংদা পি.এম.না ঙাংখিবা ৱাফমদা মরু ওইবা মিৎয়েংদি ভারতকী লান্মী ২০গী পুন্সি মাংখিবা জুন ১৫গী গলৱানগী থৌদোক অদুদা ওইখি। মফমদুদা চাইনাগী থৌওং অদুবু থিংখিবা ভারতকী লান্মীশিংগী মথৌনা লৈবা অমসুং লৈবাক নীংবগী ইথিল অদুবু প্রধান মন্ত্রীনা ইকাইখুম্নবা উৎখি। ঐখোয়গী লান্মীশিংগী থৌনা লৈবা থৌংশিং অদুগী মরমদগী হৌজিক্তি ঐখোয়গী নাকনগী এল.এ.সি.দা চাইনা মচা অমত্তা লৈত্রে হায়না প্রধান মন্ত্রীনা হায়খি। ১৬শুবা বিহার রেজিমেন্তকী লান্মীশিংনা পাংথোকখিবা কত্থোকপগী থৌওং অদুনা চাইনাগী মাইকৈদা স্ত্রকচর শানবা হোৎনখিবা অদু মায় পাকহনখিদ্রে অমসুং এল.এ.সি.দা লানশিল্লক্নবা হোৎনখিবা অদুসু নুমিত্তুমক্তদা হন্দোকহনখি।

প্রধান মন্ত্রীনা হায়খিবা ৱাহৈ, “ঐখোয়গী লমদমদা তকশিল্লক্কে খনবশিং ঐখোয়গী থৌনা ফবা মচাশিংনা মতিক চাবা পরা তম্বীগনি” অসিনা ঐখোয়গী আর্মদ ফোর্সশিংগী ইথোস অমসুং ভেল্যুশিং শম্লপ্না তাক্লি। প্রধান মন্ত্রীনা মখা তানা অসুম্না হায়খি, “ঐখোয়গী আর্মদ ফোর্সশিংনা ঙমখৈ ঙাক শেন্নবা করিগুম্বা অমত্তা লেম্না থারোয় হায়বগী নখোয়দা ঐহাক্না থাজবা পীরি”।

ভারতকী তশেংবা মফমশিং অসি করম করম্বনো হায়বসি ভারতকী মেপ্তা ময়েক শেংনা উবা ফংই। সরকারনা মসিবু য়াম্না চেৎনা অমসুং থাজনা ইল্লি। হৌজিক হৌজিক অরানবা কাংলোনগী মতুং ইন্না লম খরদি খোপচিনখ্রে অমসুং মমাংগী চহী ৬০দা মতৌ করম্না স্ক্ব্যার কিলোমীতর ৪৩,০০০ হেনবা ঐখোয়গী লম অসি লৌশিনখিবনো হায়বসি মীয়াম্নসু খঙনরম্লগনি হায়না প্রধান মন্ত্রীনা এ.পি.এম.দা শম্লপ্না হায়খি। হৌজিক্তি সরকারনা এল.এ.সি.দা য়ুনিলেতরেল ওইবা অহোংবা অমত্তা লৈহল্লরোই হায়বা ময়েক শেংবা ৱাফম থমখি।

ঐখোয়গী থৌনা ফরবা লান্মীশিংনা ঙমখৈ ঙাক্লিবা মতম অসিদা মখোয়গী ৱাখল শোন্থহন্নবা কান্নদবা ই-পাউ কয়া শন্দোকপা অসি লায়বক থিবনি। তৌবতবু ওল পার্তী মীতিং অদুদা অমত্তা ওইনা য়ানখিবা অদুদি লৈবাক্কী লুরবা ইরাং অসিদা সরকার অমসুং আর্মদ ফোর্সপু শৌগৎপা অসিনি। ভারতকী মীয়াম্না পুন্না লেপমিন্নবা অসি লান্না শন্দোকপা পাউশিংনা কায়হনবা ঙম্লোই হায়বসি ঐখোয় পুম্নমক্কী থাজবনি।

***