খুরুমজরি মরূপশিং,

অনলোক-ৱান তৌখিবা অসি চয়োল অনী ফারক্কদৌরে। মসিগী মতমসিদা খংহৌ-উহোবশিং অসি নৈনবা, মদুগীশিং অদুগী মতাংদা খন্ন-নৈনবগী মথৌ তাই। ঙসিগী খন্ন-নৈনবা অসিদা ঐনা অদোমদগী ৱাফম কয়া খংনবগী তাঞ্জা ফংলগনি, গ্যান লৈহৌনবগী তাঞ্জা ফংলগনি। ঙসিগী খন্ন-নৈনবা অসিদগী থোরকপা ৱাফমশিং, অদোমগী ওইবা ৱাখল্লোনশিং অসিনা লৈবাক অসিগী মখা তাবা লৈঙাক্লোন শেম্বদা তেংবাং ওইরগনি।

মরূপশিং,

করিগুম্বা খুদোংথীবা অমা লান্থেংননবা চানবা মতম অসি য়াম্না মরু ওই। মতম চানা ৱারেপ লৌবনা লৈবাক অসি কোরোনাগী লায়চৎ অসি লাকশিনবদা য়াম্না মতেং ওইরি।

মতুংদা করিগুম্বা ভারত অসি কোরোনাগী মায়োক্তা লান্থেংনবগী মতাংদা নৈনবা তারবদি মসিগী মতাং অসি ঐখোয়না মতৌ করম্না পুন্না থবক তৌমিন্নখিবগে কোওপরেতিব ফেদেরেলিজমগী খ্বাইদগী অথোইবা খুদম ওইনা পুথোক্তুনা উৎখিবগে হায়বসি নিংশিংদুনা লৈহৌরগনি।

মরূপশিং,

কোরোনাগী মরমদা মালেম অসিদা নৈননবগী হীরম ওইদ্রিঙৈদা ভারতনা মসিদগী ঙাকথোক্ননবগী থৌরাংশিং তৌবা হৌখি, ৱারেপশিং লৌবা হৌখি। ঐখোয়না ভারত্তা লৈরিবা মীশিংগী পুন্সি কন্ননবগীদমক অহিং-নুংথীল খাক্তনা কন্না হোৎনখি।

হৌখিবা চয়োলশিংদা ভারতকী মী লীশিং কয়া-কয়া মীরৈবাক্তগী ইরৈবাক্তা হল্লকখি। হৌখিবা চয়োলশিংদা মাইগ্রেন্ত ৱার্কর লাক্ষ কয়া-কয়া মাগী-মাগী খুঙ্গংদা য়ৌরকখি। রেলগী লম্বী, এয়র-সি, লম্বী খুদিংমক হাংদোকখ্রে। অদুবু মসি তৌদুনসু, ঐখোয়গী মীশিং অসি অসুক য়াম্না য়াম্লগসু, কোরোনাগী লায়চৎ অসিনা অতোপ্পা লৈবাকশিংদা খুদোংথিনিংঙাই ওইনা উহল্লিবা অদুগুম্না ঐখোয়গী ভারত্তা উহন্দে। মালেম অসিগা চাওর-চাওরবা অখং-অহৈশিং, হকশেলগী অখং-অহৈশিং, লোকদাউন অমসুং ভারতকী মীশিংনা উৎলিবা থকশি-খাশি অসিগী মতাংদা মীশিংনা খন্ন-নৈনরি।

ঙসি ভারত্তা ফগৎলকপগী চাং অসি চাদা ৫০গী মথক্তা ওইরে। ভারত অসি ঙসি মালেম অসিদা কোরোনাগী লায়না অসিনা নারবা মীশিংগী পুন্সি অসি কনবা ঙম্বা লৈবাকশিংগী মাংজিল থারি। কোরোনানা মী অমা হেক শিহনখিবদা নুংঙাইতবা ফাওই। ঐখোয়গী ওইনা ভারতকী মী অমা হোক শিখিবা অসি নুংঙাইহন্দে। অদুবু ভারত অসি কোরোনাগী মরম্না মী শিবগী মশিং খ্বাইদগী হন্থবা লৈবাশিংগী মনুংদগী অমনি।

হৌজিক রাজ্য কয়াগী খংনহৌ-উহৌবা অমদি মশানা-মশাদা থাজবনা ভারত অসি কোরোনাগী খুদোংথিবা অসিদা মশাগী মাংজগদবা অদু লেপথোক্তুনা মমাংলোমদা চংশিনবা ঙম্লি, মাগী শেন্মীৎলোন অদুবু থুনা-য়াংনানবা ঙম্মি।

মরূপশিং,

হৌখিবা চয়োল অনিগী অনলোক-ৱান অসিনা ঐখোয়দা চৎন-কাংলোনশিংগী নিংথিনা ঙাক্না চৎলবদি, লমজিং-লমতাকশিং মতুং ইল্লবদি কোরোনাগী অরুবা ফীভম অসিদগী ভারত অসি খ্বাইদগী তানা খুদোংথিবশিং নংগনি হায়বগী য়াম্না অচৌবা পারা অমা তম্বিরে। মরম অসিনা মাস্ক নত্রগা ফেস কোভরশিংদা হেন্না অকনবা মীৎয়েং চংবগী মথৌ তাই। মাস্ক অমসুং ফেস কোভর উপ্তনা য়ুমদগী মপান্দা চত্থোকপগী ৱাখল খনবফাওবা অচুম্বা নত্তে। মসি মীদুদখক্ত নত্তনা মনাক্তা লৈরিবা মীশিংদুগীসু অদুক্কী মতিক খুদোংথিনিংঙাই ওই।

মরম অসিনা গজ অনি লাপথোক্নবা হায়বসিনা ঐখোয়গী মন্ত্র ওইদুনা, নোংমদা হঞ্জিন-হঞ্জিন সেকেন্দ ২০-২০ শাপোন নোইদুনা খুৎ হাম্ববু ওইরো, সেনিতাইজর শিজিন্নবা ওইরো পুম্নমক অসি লুনা লৌদুনা ইশাগী ঙাকথোকচনবগীদমক, ইমুং-মনুং ঙাকথোক্নবগীদমক মরুওইনা অহাংশিং অমসুং অহল ওইরবশিংগীদমক ঙাকথোক্নবা তৌবা হায়বসি য়াম্না মথৌ তাই।

হৌজিক অয়াম্বা ওফিসশিং হাংদোক্নখ্রে, প্রাইভেৎ সেক্তরদসু ওফিস কানবা হৌবা, কৈথেলশিংদা, লম্বীশিংদা মী চিনবা হেনগৎলক্লবা মতম অসিদা পাম্বৈশিং অসিনা কোরোনা অসিবু থুনা শন্দোরক্কদবগী লাকশিনবদা মতেং ওইগনি। খরা হেক চেকশিনহৌদবদা, কোমথোকপদা, থকশি-খাশি ৱাৎপদা কোরোনাগী মায়োক্তা লান্থেংনরিবা অসি শোন্থহনগনি।

ঐখোয়না মতম পুম্বদা চেকশিনগদবা ৱাফমদি ঐখোয়না কোরোনা অসিবু অদুক্কী মতীক থিংবা ঙম্লিবমখৈ হেনগৎলকপা অদু থিংবা ঙম্লিবমখৈ ঐখোয়গী শেন্মীৎলোনগী ওইবশিং হাংদোরক্কনি, ঐখোয়গী ওফিস হাংগনি, ঐখোয়গী কৈথেল হাংগনি, চত্থোক-চৎশিনগী পাম্বৈ হাংগনি অমসুং অদুক্কী মতীক থবক তৌনবগী তাঞ্জা ফংগনি।

মরূপশিং,

লাক্কদৌরিবা নুমীৎ খরনিসিদা তোঙান-তোঙানবা রাজ্যশিংদা শেল-থুমগী ওইবা থবকশিং অসি পাক শন্না চাওথোকহন্দুনা মদুদগী খংহৌ-উহৌবশিং অদুনা অতোপ্পা রাজ্যশিংদা য়াম্না কান্নহনগনি। হৌখিবা চয়োল খরদা কন্না হোৎনবদগী ঐখোয়গী শেন্মীৎলোন্দা অনৌবা ময়োলশিং চোংখৎলকপা উনরে। পাৱর কঞ্জুমসন অদু হান্নদগী হন্থরম্বা অদু হৌজিক হেনগৎপা হৌরে। হন্দক্কী চহীগী মে থাদা হার য়োনবগী চাং অসি হৌখিবা চহীশিংগা চাংদম্নবদা শরুক অনী হেল্লে।

হন্দক্কী কুমগী লৌরোক অসি হৌখিবা চহীশিংগা চাংদম্নবদা চাদা ১২-১৩ হেল্লে। তু-হ্বীলরগী দিমান্দ মসুং প্রদক্সন অসি লোকদাউনগী মমাংদা লৈরম্বা থাক্তগী চাওরাক্না চাদা ৭০ য়ৌখ্রে। দিজিতেল পেমেন্তকী রিতেল অসি লোকদাউনগী মমাংগী ফীভমদা য়ৌখ্রে।

মসিদা নত্তনা, মে থাদা তোল কলেক্সন অসি হেনগৎহনবা, শেল-থুমগী থবকশিং ফগৎলকপা উরে। থা অদুম লেপ্তনা এস্কপোর্ত তৌবা হন্থরুরবা মতুংদা জুন থাদা এক্সপোর্ত অসি অমুক হান্নগী ফীভমদা হঞ্জিন্দুনা কোবিদকী মমাংগী ফীভমদা য়ৌখ্রে। পীরিবা ঈঙ্গীৎশিং অসিনা ঐখোয়বু পক্নিং থৌগৎলি, মমাংলোমদা চংশিন্নবা থৌনা হাপ্লি।

মরূপশিং,

অদোমগী রাজ্যশিংগী মরক্তগী অয়াম্বনা লৌউ-শিংউ, হোর্তিকলচর, ফিসরীশিং অমসুং এম.এস.এম.ই.শিংগী শরুক অসি য়াম্না চাওই। আত্মনির্ভরতা ভারত অভিয়ান্দগী হৌখিবা নুমীৎ খরনিসিদাহায়রিবা সেক্তর কয়া অসিগীদমক সোলুসন কয়া অমসু পাংথোকখ্রে।

এম.এস.এম.ই.শিংবু শৌগৎনবগীদমক ইকুই কুইদনা ৱারেপ কয়া লৌখ্রে। পারিবা মতমগী মনুংদা এম.এস.এম.ইশিংবু বেঙ্কতগী শেল পুহন্ননবা হোৎনরি। লুপা কোতী ১০০ ফাওবগী তর্ন ওভরগী ওইবা ইন্দস্ত্রীশিংদা চাদা ২০গী মথক্তা মশা মথন্তা হমনগৎলকপগদী কান্নবা পীরি।

করিগুম্বা বেঙ্কর কমিতীশিংদগী ঐখোয়না মসি লেপথোক্লবদি ইন্দস্ত্রীশিং অসিবু থুনা শেল পুবা ফংহল্লবদি মখোয়সিং অসি য়াম্না থুনা থবক হৌবা ঙমহন্দুনা থবক পীবা ঙম্লগনি।

মরূপশিং,

ঐখোয়গী অসিদা অপীকপা ফেস্তরীশিং লৈরিবশিং অসি লমজিং-লমতাকপগী, খুৎ পায়দুনা পুবিবগী য়াম্না মথৌ তাই। অদোমগী লমজিংনা মায়কৈ অসিদা থবক কয়া তৌরি হায়বসি ঐ খংই। লল্লোন-ইতীক অমসুং ইন্দস্ত্রীদা হান্নগী অদুগুম্বা খোংজেল অদু য়ৌবা ফংনবগীদমক্তা ভেল্যু চেন্দসু ঐখোয় পুন্না থবক তৌমিন্নবা তাই।

রাজ্যশিংদা অখন্নবা শেল-থুমগী ওইবা থবক-থৌরাংশিংগী ৱাফমশিং লৈরবদি পুং ২৪ থবক তৌননবা পোৎলমশিং হাপ্তোক-হাপচিন থুনা তৌননবা সহর অমদগী সহর অমদা পোৎ পুবদা লেংদবা থাক্তা করিগুম্বা মখল অমত্তগী খুদোংচাদবা অমত্তা লৈত্রবদি শেল-থুমগী থবক অসি হেন্না থুনা য়াংনা তৌহল্লগনি।

মরূপশিং,

লৌমীশিংগী পোত্থোকশিং অসি মার্কেতিং তৌনবগী লমদা হন্দক্তা নৌনা শেমদোকখ্রে, মদুদগী লৌমীশিংনা য়াম্না কান্নবা পংলগনি। মসিদগী লৌমীশিংনা মাগী পোত্থোকশিং অদু য়োন্ননবগীদমক অতোপ্পা খন্ননবা অমা লৈগনি, মকোয়গী চাগা হেনগৎকনি অমসুং নোংজু-নোংশা ফত্তবা মতমদা স্তোরেজগী অৱাৎপা লৈবনা মখোয়শিংদা অমাং-অতা থোকহনগদবা অদু হন্থহনবা ঙম্লগনি।

লৌমীশিংগী চাগা হেনগৎলবদি চপ চানা দিমান্দ তৌবসু হেনগৎলক্কনি অমসুং রাজ্যগী শেন্মীৎলোনগী খোংজেলসু য়াংখৎলগনি। মরু ওইনা অৱাং-নোংপোক অমসুং ঐখোয়গী সেদ্যুল ত্রাইবকী মফমশিংদা ফার্মিং অমসুং হোর্তিকলচরগীদমক্তা খুদোংচাবা কয়া ফংলগনি। ওর্গানিক প্রদকশিংগী ওইরো, ৱাগী পোত্থোকশিংগী অতোপ্পা ত্রাইবেলগী পোত্থোকশিং ওইরো মখোয়গীদমক্তা অনৌবা কৈথেলগী থোং কয়া হাংলগনি। লমদুগী ওইবা পোত্থোকশিংগীদমক্তা লাওথোকখিবা ক্লস্তর বেজগী লাল্লোং অসিগী কান্নবা অসিসু রাজ্য খুদিংমক্না ফংগনি। মসিগীদমক্তা ব্লোক খুদিংমক্তা, জীলা খুদিংমক্তা প্রোসেসিং নত্রগা মার্কেতিং তৌদুনা হেন্না ফবা পোত্থোক অদু লৈবাক অসিদা অমসুং মালেম অসিগী পুথোরকপা য়াননবা অসিগুম্বা পোত্থোকশিং অসি মশক খংদোকপগী মথৌ তাই।

মরূপশিং,

হৌখিবা নুমীৎ খরনিসিদা আত্মনির্ভর ভারত অভিয়ান্দগী লাওথোকখিবশিং অদু চপ চানা পাংথোকপা ঙম্নবগীদমক ঐখোয়না অমত্তা ওইনা পুনশিন্নদুনা থবক তৌমিন্নগদবনি। মসিগী প্লেৎফোর্ম অসিদা কোরোনাগা লান্থেংননবা অমসুং শেল-থুমগী ওইবা থবকশিংগা মরী লৈনবা অদোমগী ৱাফমশিং, থৌরাংশিং অদু খংনবা পাম্মী। ঐনা গৃহ মন্ত্রীদা মথংগী খন্ন-নৈনবা অসি হৌবিনগীদমক্তা হায়জরি।

*****