ବିଭିନ୍ନ ସ୍ଥାନରେ ଲକଡାଉନ ଯୋଗୁଁ ଅଟକି ରହିଥିବା ପ୍ରବାସୀ ଶ୍ରମିକମାନେ ବହୁ ସଂଖ୍ୟାରେ ଘର ମୁହାଁ ହେବାକୁ ବ୍ୟଗ୍ର ହେବାର କାରଣ ସମ୍ପର୍କରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ରାଜ୍ୟମାନଙ୍କ ଉଦ୍ଦେଶ୍ୟରେ ଜାରି ଏକ ପତ୍ରରେ କୁହାଯାଇଛି । ଏହା ପଛରେ କରୋନା ସଂକ୍ରମଣ ଭୟ ଓ ଜୀବିକାହାନୀର ଆଶଙ୍କା ମୁଖ୍ୟ କାରଣ ବୋଲି କୁହାଯାଇଛି । ଏହି ପ୍ରବାସୀ ଶ୍ରମିକଙ୍କ ଦୁଃଖ ଦୁର୍ଦ୍ଦଶା ଲାଘବ କରିବା ପାଇଁ ଏହି ପତ୍ରରେ ରାଜ୍ୟମାନଙ୍କୁ ପରାମର୍ଶ ଦିଆଯିବା ସହ କେତେକ ପଦକ୍ଷେପ ସମ୍ପର୍କରେ ମଧ୍ୟ ଅବଗତ କରାଯାଇଛି । ଏହି କାର୍ଯ୍ୟରେ କେନ୍ଦ୍ର ସରକାରଙ୍କ ସହ ସକ୍ରିୟ ସମନ୍ୱୟ ରଖି କାମ କରିବାକୁ ପରାମର୍ଶ ଦିଆଯାଇଛି ।

ସେଗୁଡିକ ହେଲା –

• ଉପଯୁକ୍ତ ଓ ସକ୍ରିୟ ସହଯୋଗ ଭିତ୍ତିରେ ଏସବୁ ଶ୍ରମିକମାନଙ୍କ ପାଇଁ ଅଧିକ ସଂଖ୍ୟକ ସ୍ୱତନ୍ତ୍ର ଟ୍ରେନ ଚଳାଚଳର ବ୍ୟବସ୍ଥା ଅବିଳମ୍ବେ କରିବା । ଏଥିପାଇଁ ରେଳବାଇ ମନ୍ତ୍ରଣାଳୟ ସହ ସକ୍ରିୟ ସହଯୋଗ ରକ୍ଷା କରି କାର୍ଯ୍ୟ କରିବାକୁ ରାଜ୍ୟ ସରକାରମାନଙ୍କୁ କୁହାଯାଇଛି ।
• ପ୍ରବାସୀ ଶ୍ରମିକମାନଙ୍କୁ ସେମାନଙ୍କ ଗନ୍ତବ୍ୟ ସ୍ଥଳରେ ପହଞ୍ଚାଇବା ପାଇଁ ଅଧିକରୁ ଅଧି ବସ ଚଳାଚଳର ସୁବିଧା କରିବା । ଆନ୍ତଃରାଜ୍ୟ ସୀମାନ୍ତ ଫାଟକରେ ପ୍ରବାସୀଶ୍ରମିକଙ୍କୁ ନେଇ ଆସୁଥିବା ବସଗୁଡିକ ରାଜ୍ୟରେ ପ୍ରବେଶ ପାଇଁ ଆବଶ୍ୟକ ଅନୁମତି ଦେବାର ବ୍ୟବସ୍ଥା କରିବାକୁ ପଡିବ ।
• ଶ୍ରମିକଙ୍କ ପରିବହନ ପାଇଁ ଉଦ୍ଦିଷ୍ଟ ସ୍ୱତନ୍ତ୍ର ଟ୍ରେନ ଓ ବସର ଯାତ୍ରା ସମୟରେ ଓ ତାରିଖ ସମ୍ପର୍କରେ ସ୍ପଷ୍ଟ ସୂଚନା ପ୍ରଦାନ କରିବାକୁ ହେବ । ଏ ନେଇ ସ୍ପଷ୍ଟ ସୂଚନାର ଅଭାବ ଯୋଗୁଁ ଗୁଜବ ସୃଷ୍ଟି ହୋଇ ଶ୍ରମିକମାନେ ବିଭ୍ରାନ୍ତ ହେଉଛନ୍ତି ଏବଂ ସେମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହେଉଛି । ତେଣୁ ତାହାର ତୁରନ୍ତ ନିରାକରଣ କରିବାକୁ ହେବ ।
• ପ୍ରବାସୀ ଶ୍ରମିକଙ୍କ ପାଇଁ ବିଶ୍ରାମ ଶିବିର/ସ୍ଥାନ ଆଦି ଆବଶ୍ୟକତା ଅନୁସାରେ କରିବାକୁ ପଡିବ । ଏସବୁ ବିଶ୍ରାମ ସ୍ଥଳରେ ଖାଦ୍ୟ, ପାନୀୟ, ସ୍ୱାସ୍ଥ୍ୟସେବା ଓ ମୌଳିକ ପରିଚ୍ଛନ୍ନତା ବ୍ୟବସ୍ଥା ରହିବ । ଯେଉଁ ସବୁ ଶ୍ରମିକ ଏବେ ରାସ୍ତାରେ ଚାଲି ଚାଲି ଘରକୁ ଫେରୁଛନ୍ତି ସେମାନଙ୍କ ପାଇଁ ଏସବୁ ବ୍ୟବସ୍ଥା ନିଶ୍ଚିତ କରିବାକୁ ପଡିବ ଏବଂ ଏସବୁ କାମ ନିଶ୍ଚିତ କରିବା ରାଜ୍ୟ ସରକାରଙ୍କ ଦାୟିତ୍ୱ ।
• ଜିଲ୍ଲା ପ୍ରଶାସନ ପଦାତିକ ଶ୍ରମିକମାନଙ୍କୁ ବିଶ୍ରାମ ଓ ଆଶ୍ରୟ ଶିବିରରେ ରଖିବାର ବ୍ୟବସ୍ଥା କରିବା ସହ ସେମାନଙ୍କୁ ନିକଟବର୍ତ୍ତୀ ରେଳଷ୍ଟେସନ/ବସଷ୍ଟାଣ୍ଡକୁ ପଠାଇବାର ପରିବହନ ବ୍ୟବସ୍ଥା କରିବେ ।
• ମହିଳା, ଶିଶୁ ଓ ବୟସ୍କ ପ୍ରବାସୀମାନଙ୍କ ନିର୍ଦ୍ଦିଷ୍ଟ ଆବଶ୍ୟକତା ପୂରଣ ପାଇଁ ସ୍ୱତନ୍ତ୍ର ଦୃଷ୍ଟି ଦେବାକୁ ପଡିବ ।
• ଜିଲ୍ଲା ପ୍ରଶାସନ ବିଶ୍ରାମ/ଆଶ୍ରୟ ଶିବିର ଗୁଡିକରେ ସ୍ୱେଚ୍ଛାସେବୀ ସଂଗଠନର ପ୍ରତିନିଧିମାନଙ୍କୁ ନୟୋଜିତ କରି ପ୍ରବାସୀ ଶ୍ରମିକମାନଙ୍କ କ୍ୱାରେଣ୍ଟାଇନ ଗତ ଆବଶ୍ୟକତା ପୂରଣ ଦିଗରେ ପଦକ୍ଷେପ ନେଇପାରିବେ । ପ୍ରବାସୀ ଶ୍ରମିକମାନେ ଏବେ ଯେଉଁଠି ଅଛନ୍ତି ସେଠାରେ ସେମାନଙ୍କୁ ମୌଳିକ ସୁବିଧା ସୁଯୋଗ ଯୋଗାଇ ଆଉ କିଛି କାଳ ରହିବାକୁ ଉତ୍ସାହିତ କରାଯାଇପାରିବ ।
• ପ୍ରବାସୀ ଶ୍ରମିକମାଙ୍କ ନାମ, ଠିକଣା, ଯୋଗାଯୋଗ ନମ୍ବର ଆଦି ଲିପିବଦ୍ଧ କରିବାକୁ ହେବ । ଭବିଷ୍ୟତରେ ଏହା କଣ୍ଟାକ୍ଟ ଟ୍ରେସଂରେ ସହାୟକ ହେବ ।

ଏହି ପତ୍ରରେ ଆହୁରି କୁହାଯାଇଛି ଯେ କୌଣସି ପ୍ରବାସୀ ଶ୍ରମିକ ରେଳପଥ ଓ ରାସ୍ତାରେ ଚାଲିଚାଲି ଘରକୁ ଯେପରି ନ ଫେରନ୍ତି ତାହାକୁ ରାଜ୍ୟ ସରକାରମାନଙ୍କୁ ନିଶ୍ଚିତ କରିବାକୁ ପଡିବ । ଏହି ଶ୍ରମିକମାନଙ୍କୁ ନିଜର ଗନ୍ତବ୍ୟ ସ୍ଥାନରେ ପହଞ୍ଚାଇବା ପାଇଁ ରାଜ୍ୟ ସରକାର ସ୍ୱତନ୍ତ୍ର ଟ୍ରେନ ଚଳାଚଳ ପାଇଁ ରେଳବାଇ ମନ୍ତ୍ରଣାଳୟକୁ ଆବଶ୍ୟକତା ଅନୁସାରେ ଅନୁରୋଧ କରିବେ ।

*****************